(1)

Le Treoir (AE) 2018/2001 leagtar síos ceanglais maidir le breoslaí áirithe, is iad sin bithbhreoslaí, bithleachtanna, breoslaí bithmhaise, breoslaí in-athnuaite de thionscnamh neamh-bhitheolaíoch agus breoslaí carbóin athchúrsáilte. Áirithítear leis na ceanglais maidir leis na breoslaí sin nach féidir iad a áireamh faoi chomhair na spriocanna a leagtar amach sa Treoir sin ach amháin más rud é gur táirgeadh go hinbhuanaithe iad agus go sábháiltear líon mór astaíochtaí gás ceaptha teasa leo i gcomparáid le breoslaí iontaise. Le hAirteagal 29 de Threoir (AE) 2018/2001, leagtar síos critéir maidir le hinbhuanaitheacht agus maidir le laghdú ar astaíochtaí gás ceaptha teasa do bhithbhreoslaí, do bhithleachtanna agus do bhreoslaí bithmhaise.

(2)

Tá ról tábhachtach ag na scéimeanna deonacha maidir le fianaise a sholáthar ar chomhlíonadh na gcritéar maidir le hinbhuanaitheacht agus maidir le laghdú ar astaíochtaí gás ceaptha teasa do bhithbhreoslaí, do bhithleachtanna agus do bhreoslaí bithmhaise. Faoi Threoir (AE) 2018/2001, is féidir scéimeanna deonacha a úsáid chun a dheimhniú go gcomhlíonann na breoslaí ar fad a tháirgtear ó bhithmhais na critéir maidir le hinbhuanaitheacht a leagtar síos sa Treoir sin agus chun sonraí cruinne a sholáthar faoin laghdú ar astaíochtaí gás ceaptha teasa ó na breoslaí sin.

(3)

An 17 Lúnasa 2022, chuir an scéim dheonach ‘US Soybean Sustainability Assurance Protocol’ (‘SSAP’) [Prótacal Dearbhaithe na Stát Aontaithe maidir le hInbhuanaitheacht na bPónairí Soighe] faoi bhráid an Choimisiúin iarraidh tosaigh ar aitheantas faoi Airteagal 30(4) de Threoir (AE) 2018/2001. Rinne an Coimisiún measúnú ar an scéim agus shainaithin roinnt saincheisteanna a raibh leasú ag teastáil ina leith. San iarratas deireanach a athchuireadh faoina bhráid an 13 Nollaig 2023, thug an scéim dheonach ‘SSAP’ aghaidh ar na saincheisteanna a sainaithníodh agus tháinig an Coimisiún ar an gconclúid go gcumhdaítear leis an scéim dheonach ‘SSAP’ go leormhaith na critéir maidir le bithmhais talmhaíochta a sholáthar agus go soláthraítear sonraí cruinne léi maidir leis an laghdú ábhartha ar astaíochtaí gás ceaptha teasa.

(4)

Cumhdaítear leis an scéim bithmhais talmhaíochta ó phónairí soighe a sholáthraítear sna Stáit Aontaithe. Ní chumhdaítear ach na Stáit Aontaithe agus an soláthar agus an t-onnmhairiú bithmhaise talmhaíochta ó phónairí soighe.

(5)

Agus measúnú á dhéanamh ag an gCoimisiún ar an scéim dheonach ‘SSAP’, chinn sé go gcumhdaítear léi go leormhaith na critéir maidir le hinbhuanaitheacht a leagtar síos in Airteagal 29(3) go (5) de Threoir (AE) 2018/2001. Chinn an Coimisiún freisin go soláthraítear leis an scéim sonraí cruinne faoi laghdú ar astaíochtaí gás ceaptha teasa chun críocha Airteagal 29(10) den Treoir sin agus go gcuirtear modheolaíocht maidir le cothromaíocht mhaise i bhfeidhm léi i gcomhréir le ceanglais Airteagal 30(1) agus (2) den Treoir sin.

(6)

Chinn an Coimisiún go gcomhlíonann an scéim dheonach ‘SSAP’ go leormhaith na rialacha a leagtar amach i Rialachán Cur Chun Feidhme (AE) 2022/996 ón gCoimisiún (2).

(7)

Sa mheasúnú ar an scéim dheonach ‘SSAP’, tháinig an Coimisiún ar an gconclúid go gcomhlíonann sí caighdeáin iontaofachta, trédhearcachta agus iniúchóireachta neamhspleáiche go leormhaith agus go gcomhlíonann sí na ceanglais mhodheolaíocha a leagtar amach in Iarscríbhinn V a ghabhann le Treoir (AE) 2018/2001.

(8)

Na bearta dá bhforáiltear sa Chinneadh seo, tá siad i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise,