RIALACHÁN CUR CHUN FEIDHME (AE) 2025/356 ÓN gCOIMISIÚN

an 21 Feabhra 2025

lena leasaítear Rialachán Cur Chun Feidhme (AE) 2022/1941 a mhéid a bhaineann leis an toirmeasc ar lotnaidí áirithe a thabhairt isteach, a ghluaiseacht, a choinneáil, a iolrú nó a scaoileadh

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/2031 ó Pharlaimint na hEorpa agus ón gComhairle an 26 Deireadh Fómhair 2016 maidir le bearta cosantacha i gcoinne lotnaidí plandaí, lena leasaítear Rialacháin (AE) Uimh. 228/2013, (AE) Uimh. 652/2014 agus (AE) Uimh. 1143/2014 ó Pharlaimint na hEorpa agus ón gComhairle agus lena n-aisghairtear Treoracha 69/464/CEE, 74/647/CEE, 93/85/CEE, 98/57/CE, 2000/29/CE, 2006/91/CE agus 2007/33/CE ón gComhairle (1), agus go háirithe Airteagal 30(1) de,

De bharr an mhéid seo a leanas:

(1)	Liostaítear i Rialachán Cur Chun Feidhme (AE) 2022/1941 ón gCoimisiún (2) na lotnaidí a bhfuil toirmeasc sealadach orthu, de bhun Airteagal 30(1) de Rialachán (AE) 2016/2031, a thabhairt isteach i gcríoch an Aontais, a ghluaiseacht laistigh di, nó a choinneáil, a iolrú nó a scaoileadh inti.

(2)	Áiríodh an lotnaid Leucinodes pseudorbonalis ar dtús san Iarscríbhinn a ghabhann le Rialachán Cur Chun Feidhme (AE) 2022/1941, ar bhonn catagóiriú lotnaide a rinne an tÚdarás Eorpach um Shábháilteacht Bia (‘an tÚdarás’).

(3)

In 2024 thug an tÚdarás tuairim eolaíoch uaidh maidir le measúnú iomlán ar an riosca lotnaide a bhaineann le speiceas Afracach Leucinodes (3), lena n-áirítear Leucinodes pseudorbonalis. Tháinig sé ar an gconclúid go bhfuil an dóchúlacht an-bheag go mbunófaí Leucinodes pseudorbonalis san Aontas agus go bhfuil an tionchar a mheastar a bheidh aige an-bheag freisin.

(4)

I bhfianaise thuairim an Údaráis, is iomchuí teacht ar an gconclúid nach bhfuil riosca fíteashláintíochta do-ghlactha ag gabháil leis an lotnaid Leucinodes pseudorbonalis do chríoch an Aontais agus, dá bhrí sin, nach gcomhlíonann sí na critéir maidir le lotnaidí coraintín de chuid an Aontais a leagtar amach i Roinn 1, ná i Roinn 3, Foroinn 2 d’Iarscríbhinn I a ghabhann le Rialachán (AE) 2016/2031, a mhéid a bhaineann le críoch an Aontais. Dá bhrí sin, níor cheart í a bheith faoi réir na mbeart sealadach a thuilleadh arna nglacadh de bhun Airteagal 30 de Rialachán (AE) 2016/2031. Dá bhrí sin, ba cheart Leucinodes pseudorbonalis a bhaint den Iarscríbhinn a ghabhann le Rialachán Cur Chun Feidhme (AE) 2022/1941.

(5)	Chun sainaithint na lotnaidí atá faoi réir an toirmisc agus fad an toirmisc a éascú, is iomchuí a shonrú san Iarscríbhinn na cóid a úsáidtear san Eagraíocht Eorpach agus Meánmhara um Chosaint Plandaí chun na lotnaidí ábhartha agus an dáta éaga a ainmniú.

(6)	Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2022/1941 a leasú dá réir.

(7)	Tá forálacha an Rialacháin seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán Cur Chun Feidhme (AE) 2022/1941 mar a leanas:

(1)

cuirtear an méid seo a leanas in ionad Airteagail 1 agus 2:

‘Airteagal 1

Toirmeasc ar lotnaidí

Na lotnaidí a liostaítear san Iarscríbhinn, ní dhéanfar iad a thabhairt isteach i gcríoch an Aontais, a ghluaiseacht laistigh di, ná a choinneáil, a iolrú, ná a scaoileadh, go dtí an dáta a leagtar amach san Iarscríbhinn le haghaidh na lotnaide lena mbaineann.

Airteagal 2

Teacht i bhfeidhm

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.’

(2)	cuirtear an téacs a leagtar amach san Iarscríbhinn a ghabhann leis an Rialachán seo in ionad na hIarscríbhinne.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 21 Feabhra 2025.

Thar ceann an Choimisiúin

An tUachtarán

Ursula VON DER LEYEN

(1) IO L 317, 23.11.2016, lch. 4, ELI: http://data.europa.eu/eli/reg/2016/2031/2019-12-14.

(2) Rialachán Cur Chun Feidhme (AE) 2022/1941 ón gCoimisiún an 13 Deireadh Fómhair 2022 maidir le toirmeasc ar lotnaidí áirithe a thabhairt isteach, a ghluaiseacht, a choinneáil, a iolrú nó a scaoileadh de bhun Airteagal 30(1) de Rialachán (AE) 2016/2031 ó Pharlaimint na hEorpa agus ón gComhairle (IO L 268, 14.10.2022, lch. 13, ELI: http://data.europa.eu/eli/reg_impl/2022/1941/oj).

(3) Painéal EFSA maidir le Sláinte Plandaí, 2024. Tuairim Eolaíoch maidir le Measúnú riosca lotnaidí ar speiceas Afracach Leucinodes le haghaidh an Aontais Eorpaigh, https://doi.org/10.2903/j.efsa.2024.8739.

IARSCRÍBHINN

‘IARSCRÍBHINN

Liosta na lotnaidí atá faoi réir an toirmisc dá dtagraítear in Airteagal 1:

	Géineas nó speiceas na lotnaidí lena gcóid EECP	Dáta éaga an toirmisc
1.	Chloridea virescens Fabricius [HELIVI]	31 Bealtaine 2027
2.	Homona magnanima Dyakonov [HOMOMA]	31 Bealtaine 2027
3.	Resseliella citrifrugis Jiang [RESSCI]	31 Bealtaine 2027
4.	Spodoptera ornithogalli Guenée [PRODOR]	31 Bealtaine 2027

’