(1)

Le Rialachán (AE) Uimh. 10/2011 ón gCoimisiún (2) leagtar síos rialacha sonracha maidir le hábhair phlaisteacha agus earraí plaisteacha atá beartaithe lena dteacht i dteagmháil le bia. Go háirithe, i gCaibidil II de leagtar amach ceanglais chomhdhéanaimh maidir le hábhair phlaisteacha agus earraí plaisteacha, chun a áirithiú i dtaobh na n-ábhar plaisteach deiridh atá beartaithe lena dteacht i dteagmháil le bia go bhfuil siad sábháilte go leor, chun ceanglais Airteagal 3 de Rialachán (CE) Uimh. 1935/2004 a chomhlíonadh.

(2)

I gCaibidil II de, na ceanglais chomhdhéanaimh le haghaidh substaintí is féidir a úsáid i monaraíocht ábhar plaisteach agus earraí plaisteacha, tagraíonn siad go sonrach do ‘sraitheanna plaisteacha’ in ábhair phlaisteacha agus earraí plaisteacha. I mórán cásanna, áfach, ní chloíonn ábhair phlaisteacha agus earraí plaisteacha le struchtúr sraithe ach is éard a bhíonn iontu ábhar aonchineálach aonair a bhfuil cruth casta air, rud a fhágann go bhfuil débhríocht ann. Dá bhrí sin, i gCaibidil II de Rialachán (AE) Uimh. 10/2011 ba cheart tagairt a dhéanamh d’ábhair phlaisteacha agus earraí plaisteacha seachas do shraitheanna plaisteacha. D’fhéadfadh an fhoclaíocht nua a bheith ina hábhar amhrais i dtaobh na gceanglas comhdhéanaimh a leagtar síos i Rialachán (AE) Uimh. 10/2011 agus an fheidhm atá acu maidir le sraitheanna neamhphlaisteacha d’ábhair phlaisteacha agus d’earraí plaisteacha, amhail greamacháin, dúigh phriontála, vearnaisí agus bratuithe, agus mar sin ba cheart a shoiléiriú nach bhfuil feidhm ag na ceanglais chomhdhéanaimh maidir leis na sraitheanna sin. Mar sin féin, ba cheart an tagairt do ‘sraitheanna plaisteacha’ i gCaibidil III de Rialachán (AE) Uimh. 10/2011 a choinneáil, ós rud é, i ndáil le hábhair agus earraí ilsrathacha, go gceadaítear leis an tagairt sin go mbeidh feidhm ag roinnt forálacha den Chaibidil sin maidir le sraitheanna áirithe ach ní le sraitheanna eile. Go háirithe, an tsraith phlaisteach a scartar ón mbia le bacainn fheidhmiúil in ábhair ilsrathacha, féadfar an tsraith sin a mhonarú le substaintí nach liostaítear i liosta an Aontais. Ba cheart é a bheith fós indéanta freisin a fhíorú go gcomhlíontar na teorainneacha ascnaimh i gcomhréir le Rialachán (AE) 10/2011 a bhaineann le hábhair agus earraí a thagann faoina raon feidhme, ábhair agus earraí a choinnítear le chéile le greamacháin nó a phriontáiltear agus/nó a chumhdaítear le bratú.

(3)

De réir an tsainmhínithe ar ‘phlaisteach’ i Rialachán (AE) Uimh. 10/2011, is éard atá i ‘plaisteach’ polaiméirí a bhféadfadh breiseáin nó substaintí eile a bheith curtha leo, chun éifeacht fhisiceach nó cheimiceach a bhaint amach sa phlaisteach. Leis an Rialachán sin, údaraítear breiseáin agus substaintí tosaithe in dá chatagóir éagsúla. Dá bhrí sin, ní féidir breiseán a úsáid mar shubstaint tosaithe mura n-údaraítear mar sin é, agus a mhalairt. De ghnáth, ní bhíonn breiseáin nasctha go ceimiceach leis na polaiméirí. Mar sin féin, cáithníní áirithe, snáithíní áirithe nó ábhair sholadacha eile a úsáidtear i bplaistigh chun éifeacht fhisiceach a bhaint amach, déantar na nithe sin a nascadh le cúnamh ó oibreán nasctha leis an bpolaiméir, nó gan an cúnamh sin, chun sláine fhoriomlán an ábhair a áirithiú. I bhfianaise na sainmhínithe i Rialachán (AE) Uimh. 10/2011 ar phlaisteach, breiseáin, polaiméirí agus substaintí tosaithe, i gcás inar nasc ceimiceach é an nasc sin, d’fhéadfadh amhras a bheith ann an bhfuil ábhar soladach den sórt sin le meas mar bhreiseán nó mar shubstaint tosaithe. Dá bhrí sin, bíonn éiginnteacht ann an mar bhreiseán nó mar shubstaint tosaithe atá an t-ábhar soladach sin le húdarú. Dá bhrí sin, is iomchuí an sainmhíniú ar bhreiseáin a shoiléiriú. Go háirithe, ós rud é go bhfágann cineál na substaintí tosaithe go bhfuil siad oiriúnach do pholaiméiriú, próiseas lena mbaineann athrú ceimiceach suntasach, ach ní athraíonn ábhair sholadacha a úsáidtear mar bhreiseáin go substaintiúil ón bhfoirm a bhí siad nuair a cuireadh leis iad, ba cheart a mheas maidir leis an ábhar soladach atá nasctha go ceimiceach leis an bpolaiméir lena gcuirtear é go bhfeidhmíonn an t-ábhar sin mar bhreiseán agus ní mar shubstaint tosaigh, cé go bhféadfadh a dhromchla imoibriú fós leis na polaiméirí sa phlaisteach.

(4)

Substaintí údaraithe áirithe a liostaítear in Iarscríbhinn I a ghabhann le Rialachán (AE) Uimh. 10/2011, díorthaítear ó ábhair de thionscnamh nádúrtha iad, lena n-áirítear mianraí agus orgánaigh bheo, ar ábhair iad a úsáidtear freisin mar bhreiseáin i bplaistigh, mar shnáithíní nó mar cháithníní beaga. Measadh riamh gur shubstaintí iad na hábhair sin a úsáidtear i monaraíocht plaisteach agus, dá bhrí sin, measadh iad a bheith faoi raon feidhme an Rialacháin sin. Tá comhdhéanamh na substaintí sin casta athraitheach, áfach, agus d’fhéadfadh sé nach bhfuil eolas iomlán orthu. Dá thoradh sin, bíonn sé deacair céannachtaí na substaintí sin a shainiú agus cruthaíonn sé sin deacrachtaí mar tá tábhacht ag baint le sainiú soiléir na substaintí sin chun idirdhealú a dhéanamh idir gach ceann acu agus substaintí eile. Tagraítear do na substaintí sin i Rialachán (CE) Uimh. 1907/2006 ó Pharlaimint na hEorpa agus ón gComhairle (3) mar shubstaintí nach eol a gcomhdhéanamh nó a mbíonn a gcomhdhéanamh athraitheach, mar tháirgí imoibriúcháin casta nó mar ábhair bhitheolaíocha (‘UVCB’). Chun ailíniú níos fearr Rialachán (AE) Uimh. 10/2011 le Rialachán (CE) Uimh. 1907/2006 a áirithiú agus, go háirithe, chun ailíniú measúnú riosca agus údarú substaintí den sórt sin a éascú amach anseo, is iomchuí, dá bhrí sin, an coincheap sin maidir le substaintí UVCB a chur i bhfeidhm freisin faoi Rialachán (AE) Uimh. 10/2011.

(5)

De bhun Airteagal 5 de Rialachán (AE) Uimh. 10/2011, i liosta an Aontais de shubstaintí a leagtar síos in Iarscríbhinn I a ghabhann leis an Rialachán sin, tá na substaintí a údaraítear lena n-úsáid ‘d’aon ghnó’ i monaraíocht ábhar plaisteach agus earraí plaisteacha. I gcásanna áirithe, áirítear in Iarscríbhinn I freisin sonraíochtaí maidir leis na heisíontais a d’fhéadfadh a bheith sa tsubstaint, ar choinníoll go bhfuil siad ábhartha don mheasúnú riosca agus go bhféadfadh siad difear a dhéanamh do shláinte an duine. Is amhlaidh atá i gcás aon táirge imoibriúcháin nó díghrádúcháin a bhaineann le himoibriú substaintí, táirgí is féidir a fhoirmiú le linn mhonaraíocht an ábhair phlaistigh nó an earra phlaistigh. Mar sin féin, ní d’aon ghnó atá na heisíontais, ná na táirgí imoibriúcháin nó sin san ábhar plaisteach nó san earra plaisteach. Dá bhrí sin, is iomchuí an focal ‘d’aon ghnó’ a scriosadh in Airteagal 5 de Rialachán (AE) Uimh. 10/2011.

(6)

Na substaintí a liostaítear i dtábla 1 d’Iarscríbhinn I a ghabhann le Rialachán (AE) Uimh. 10/2011, cuirtear in iúl iad le huimhir ábhar teagmhála bia na substainte a ghabhann leo, lena n-uimhir thagartha agus lena n-ainm ceimiceach agus, i gcás ina mbeidh fáil uirthi, leis an-uimhir Chláraithe na Seirbhíse Achoimreachtaí Ceimiceán (CAS) a ghabhann leo, faoi seach. Is léir ón taithí a fuarthas, áfach, go bhféadfadh amhras a bheith ann fós maidir le céannacht bheacht na substaintí a údaraítear. Ós rud é go mbeidh faisnéis maidir le céannacht na substainte san iarratas ar údarú substainte, amhail an t-ainm ceimiceach, an comhdhéanamh ceimiceach, an leibhéal íonachta, an meáchan móilíneach agus na sonraí speictreascópacha, agus go bhfíoraíonn an tÚdarás Eorpach um Shábháilteacht Bia (‘an tÚdarás) an fhaisnéis sin, ba cheart céannacht ainmnithe na substaintí a liostaítear i dtábla 1 d’Iarscríbhinn I a ghabhann le Rialachán (AE) Uimh. 10/2011 a mheas i ndáil le céannacht na substainte a shonraítear sa tuairim ón Údarás. Dá bhrí sin, má bhíonn amhras fós ann maidir le hainmniú substainte, ba cheart dul i gcomhairle leis an Údarás.

(7)

Féadfar táirgí bithicídeacha ina bhfuil substaintí gníomhacha a ionchorprú in ábhair éagsúla a d’fhéadfadh a bheith i dteagmháil le bia, lena n-áirítear plaistigh. Chun substaintí a úsáid i monaraíocht ábhar plaisteach agus earraí plaisteacha a bhíonn i dteagmháil le bia, foráiltear le Rialachán (AE) Uimh. 10/2011 maidir leis na substaintí sin a bheartaítear a bheith sna hábhair phlaisteacha dheiridh nó sna hearraí plaisteacha deiridh agus a mbeidh feidhm bhithicídeach acu, foráiltear nach mór do na substaintí sin a bheith údaraithe ag an gCoimisiún nó, go dtí go bhfaighfear an t-údarú sin, nach mór iad a bheith ar cheann de na substaintí a áirítear sa liosta sealadach dá dtagraítear in Airteagal 7 den Rialachán sin. Le Rialachán (AE) Uimh. 528/2012 ó Pharlaimint na hEorpa agus ón gComhairle (4), áfach, leagtar síos rialacha maidir le húdarú na gcineálacha táirgí bithicídeacha a liostaítear in Iarscríbhinn V a ghabhann leis, lena n-áirítear na táirgí sin a bheartaítear a ionchorprú in ábhair agus earraí a bhíonn i dteagmháil le bia, agus maidir le hearraí cóireáilte ina bhfuil na táirgí sin, amhail ábhair agus earraí a bhíonn i dteagmháil le bia, a chur ar an margadh. I gcomhréir leis an Rialachán sin, táirge bithicídeach ina bhfuil substaint ghníomhach, féadfar é a ionchorprú in ábhair a bhíonn i dteagmháil le bia ar choinníoll go ndéanfar an tsubstaint agus an táirge ina bhfuil an tsubstaint sin a fhormheas agus a údarú, faoi seach, le haghaidh na húsáide sin faoi Rialachán (AE) Uimh. 528/2012. Dá bhrí sin, ba cheart tagairt a dhéanamh i Rialachán (AE) Uimh. 10/2011 do Rialachán (AE) Uimh. 528/2012 a mhéid a bhaineann leis na substaintí gníomhacha bithicídeacha agus na táirgí bithicídeacha a fhéadfar a úsáid i monaraíocht ábhar plaisteach a bhíonn i dteagmháil le bia agus atá ann d’aon ghnó in ábhair phlaisteacha a bhíonn i dteagmháil le bia.

(8)

Faoi láthair, le Rialachán (AE) Uimh. 10/2011 leagtar síos i taobh na substaintí a úsáidtear i monaraíocht sraitheanna plaisteacha in ábhair phlaisteacha agus in earraí plaisteacha, nach mór na substaintí sin íonacht a bheith acu atá oiriúnach don úsáid atá beartaithe agus don úsáid intuartha a bhainfear as na hábhair nó na hearraí sin. Ón taithí a fuarthas, chun ardleibhéal cosanta do shláinte an duine a áirithiú agus chun cabhrú le hoibreoirí gnó measúnú a dhéanamh ar chomhlíonadh ábhar agus earraí le Rialachán (AE) Uimh. 10/2011, is léir gur cheart coincheap íonachta na substaintí a úsáidtear i monaraíocht ábhar agus earraí a bhíonn i dteagmháil le bia a shainiú. I bhfianaise na faisnéise eolaíche agus na bhforálacha rialála atá ann faoi láthair i ndáil le húdarú substaintí a úsáidtear i monaraíocht ábhar agus earraí a bhíonn i dteagmháil le bia, is iomchuí an t-ardleibhéal íonachta a shainiú le haghaidh substaintí a úsáidtear i monaraíocht ábhar nó earraí a bhíonn i dteagmháil le bia maidir lena gcéannacht agus, de réir mar is ábhartha, maidir leis na sonraíochtaí nó na srianta a leagtar síos in Iarscríbhinn I a ghabhann le Rialachán (AE) Uimh. 10/2011, maidir le measúnú riosca i gcomhréir le hAirteagal 19 nó maidir leis an treoir ábhartha ón Údarás. I ndáil leis an méid sin, sa Nóta Treorach uaidh maidir le hiarratas a ullmhú ar mheasúnú sábháilteachta ar shubstaint atá le húsáid in ábhair phlaisteacha a bhíonn i dteagmháil le bia (5), shuigh an tÚdarás an prionsabal dá airde an nochtadh do thomhaltóirí trí ascnamh substaintí isteach i mbia ó ábhair nó earraí a bhíonn i dteagmháil le bia, is ea is mó gá a bheadh le sonraí tocsaineolaíocha. Go háirithe, measann an tÚdarás, maidir le substaint a úsáidtear i monaraíocht ábhar nó earra a bhíonn i dteagmháil le bia, i gcás ina bhfuil ascnaimh na substainte sin isteach i mbia ag leibhéal atá faoi bhun 0,00015 mg substaint/kg bia (0,15μg/kg), nach dócha go mbeidh riosca géineatocsaineachta ann agus nach bhfuil gá le tástáil tocsaineachta ar an tsubstaint ascnaimh (6), agus, i gcás ina bhfuil leibhéal ascnaimh níos mó ná 0,15μg/kg ach níos lú ná 0,05 mg/kg aici, nach bhfuil gá ach le sonraí maidir le tástálacha géineatocsaineachta (7). Mar sin féin, ag na céimeanna luatha i bpróiseas monaraíochta ábhar plaisteach agus earraí plaisteacha, d’fhéadfadh sé nach mbeadh eolas leordhóthanach ar na chéad chéimeanna monaraíochta eile agus/nó úsáid deiridh na n-ábhar agus na n-earraí chun leibhéil ascnaimh substainte isteach i mbia a ríomh. Dá bhrí sin, maidir le substaint a úsáidtear i monaraíocht ábhair nó earra a bhíonn i dteagmháil le bia, chun comhlíontacht na substainte sin leis na leibhéil tairsí sin a mheas, is iomchuí tosca a chur san áireamh a dhéanann difear dá dtiúchan sna hábhair dheiridh agus sna hearraí deiridh agus dá n-ascnamh ó na hábhair dheiridh agus na hearraí deiridh isteach i mbia. Thairis sin, i gcás ina bhfuil gá le measúnú ar ghéineatocsaineacht substainte aonair, ba cheart go bhféadfaí é a ionadú le measúnú ar ghéineatocsaineacht grúpa substaintí, ach é sin a dhéanamh faoi cheanglais shonracha agus faoi cheanglais shonracha amháin (8).

(9)

Le Rialachán (AE) Uimh. 10/2011 ní fhorchuirtear srianta ar fhoinse na substaintí is féidir a úsáid i monaraíocht ábhar plaisteach agus earraí plaisteacha agus, dá bhrí sin, féadfar substaintí den sórt sin a mhonarú as dramhaíl. I substaintí a mhonaraítear as dramhaíl, áfach, d’fhéadfadh éilliú teagmhasach a bheith i gceist. Ar mhaithe le sláinte an duine a chosaint agus ós rud é, le próisis mhonaraíochta áirithe substaintí, gur féidir deireadh a chur le láithreacht éilleán teagmhasach nó an láithreacht sin a laghdú chun a áirithiú nach n-eascraíonn riosca do shláinte an duine as an ábhar plaisteach deiridh a bheith éillithe, ba cheart ceanglas a bheith ann ardleibhéal íonachta a bheith ag substaintí arna dtáirgtear as dramhaíl freisin.

(10)

Ní mór rialacha sonracha a leagan síos maidir le híonacht substaintí de thionscnamh nádúrtha, substaintí UVCB mar a thugtar orthu. I gcásanna áirithe, tagann substaint ó chuid d’orgánach nár baineadh aon cheann dá chomhábhair de, nó is de thionscnamh ábhar nádúrtha í nár íonaíodh ach go páirteach agus, dá bhrí sin, d’fhéadfadh a comhdhéanamh iomlán a bheith anaithnid nó athraitheach. I gcásanna eile, áfach, inar féidir an tsubstaint nádúrtha a eastóscadh ón ábhar nádúrtha agus í a íonú tuilleadh, féadfar substaint a bhfuil comhdhéanamh ceimiceach aitheanta aici a fháil. Dá bhrí sin, a mhéid a bhaineann le substaintí de thionscnamh nádúrtha, is iomchuí a shonrú conas a chinnfear a gcéannacht chun an ceanglas maidir le hardleibhéal íonachta a chur i bhfeidhm. Ar bhonn an eolais is déanaí, déanann an tÚdarás cur síos chomh mionsonraithe agus is féidir ar chéannacht na substaintí sin, lena n-áirítear a gcomhdhéanamh, a bhfoinse, an próiseas a úsáideadh chun iad a fháil, agus sonraíonn an tÚdarás an codán neamhthréithrithe a mhéid is féidir. I gcás nár soláthraíodh ainmniú mionsonraithe den sórt sin riamh, áfach, ba cheart gurb é ainm na substainte an toisc chinntitheach lena sainaithint.

(11)

Le linn phróisis monaraíochta ábhar plaisteach agus earraí plaisteacha, ní féidir táirgeadh fuíollghearrthóga, fuíll agus seachtháirgí eile a sheachaint go hiomlán. Trí athphróiseáil na seachtháirgí sin a cheadú chun ábhar plaisteach agus earraí plaisteacha a mhonarú, is féidir rannchuidiú le hábhar monaraíochta neamh-inúsáidte a laghdú. Más féidir seachtháirgí a úsáid go díreach i monaraíocht plaisteach gan aon oibríochtaí breise seachas gnáthchleachtais thionsclaíocha, amhail mionghearradh agus athghránadh, ní mheastar gur dramhaíl iad. Ós rud é nach bhfuil feidhm ag Rialachán (AE) Uimh. 2022/1616 (9) ón gCoimisiún maidir leis na seachtháirgí sin agus go bhfuil gá le soiléireacht maidir le cé na seachtháirgí ar féidir a mheas a bheith sábháilte le haghaidh athphróiseála, ba cheart rialacha a leagan síos chun sábháilteacht a n-úsáide a áirithiú. Dá bhrí sin, is iomchuí sainmhíniú ar athphróiseáil a chur san áireamh chun go mbeidh dealú soiléir ann idir na táirgí a bhfuil feidhm ag Rialachán (AE) Uimh. 10/2011 maidir leo agus iad sin a bhfuil feidhm ag Rialachán (AE) Uimh. 2022/1616 maidir leo, agus rialacha a leagan síos maidir le hathphróiseáil shábháilte na seachtháirgí sin.

(12)

Le Treoir (AE) 2019/904 ó Pharlaimint na hEorpa agus ón gComhairle (10) díspreagtar úsáid a bhaint as ábhair phlaisteacha aon úsáide a bhíonn i dteagmháil le bia mar gheall ar a dtionchar ar an gcomhshaol, agus de bharr sin déantar ábhair phlaisteacha agus earraí plaisteacha a bhíonn i dteagmháil le bia a dhearadh lena n-úsáid arís agus arís eile. Mar sin féin, d’fhéadfadh meathlú ar an ábhar plaisteach nó ar an earra plaisteach a bheith mar thoradh ar úsáid arís agus arís eile, rud a d’fhágfadh go dtiocfadh méadú ar ascnamh na gcomhábhar isteach i mbia, rud a d’fhéadfadh sláinte an duine a chur i mbaol. Bíonn comharthaí éagsúla ann a léiríonn meathlú den sórt sin ar ábhair phlaisteacha agus ar earraí plaisteacha, mar shampla, scoilteanna agus mionscoilteanna dromchla, cloig, dílannú, crapadh nó dífhoirmiú eile, agus buíochan nó dídhathú buan eile nó cailliúint loinnreach nó trédhearcachta. Mar sin féin, athruithe a bhaineann le húsáid, amhail smálú ó dhatháin ó bhianna, lena n-áirítear ó lícipéin agus ó churcaimín, i bprionsabal ní meathlú ar an ábhar nó earra atá ansin. Chun úsáid earraí plaisteacha meathlaithe a chosc, an mhonaróir nó an oibreoir eile atá freagrach as an earra plaisteach deiridh a bhíonn i dteagmháil le bia a chur ar an margadh, ba cheart dóibh faisnéis a sholáthar d’úsáideoirí earraí plaisteacha a bhíonn i dteagmháil le bia maidir le conas meathlú a chosc nó a mhoilliú agus maidir leis na hathruithe a léiríonn an meathlú a eascraíonn as úsáid arís agus arís eile.

(13)

Le hAirteagal 15 de Rialachán (CE) Uimh. 1935/2004 a mhéid a bhaineann le hábhair agus earraí nach mbíonn i dteagmháil le bia tráth a chuirtear ar an margadh iad, foráiltear go mbeidh treoracha speisialta ag gabháil leis na hábhair agus na hearraí sin, más gá, treoracha atá le hurramú chun úsáid shábháilte iomchuí a áirithiú. Le Rialachán (CE) Uimh. 10/2011 leagtar amach srianta maidir le húsáid earraí plaisteacha agus is iomchuí a mheas, dá bhrí sin, gur gá i gcónaí treoracha speisialta den sórt sin a chur ar fáil do thomhaltóirí.

(14)

In Airteagal 14(4) de Rialachán (AE) Uimh. 10/2011 leagtar amach i dtaobh na rialacha maidir le teorainneacha ascnaimh a leagtar síos in Airteagail 11 agus 12, nach bhfuil feidhm ag na rialacha sin maidir le sraitheanna plaisteacha in ábhair agus earraí ilábhair ilsrathacha. Mar sin féin, i gcás ábhair dheiridh agus earraí deiridh ilábhair ilsrathacha, ina bhfuil an tsraith a bhíonn i dteagmháil díreach le bia ina shraith phlaisteach, d’fhéadfadh na rioscaí sláinte céanna a bheith ag baint leo agus a bhaineann le hábhair phlaisteacha nó earraí plaisteacha agus ba cheart don tsraith sin na forálacha maidir le hascnamh a leagtar amach i Rialachán (AE) Uimh. 10/2011 a chomhlíonadh. Os a choinne sin, níor cheart feidhm a bheith fós ag Airteagail 11 agus 12 de Rialachán (AE) Uimh. 10/2011 maidir le sraitheanna in ábhair ilábhair ilsrathacha nach sraitheanna plaisteacha iad. Féadfaidh feidhm a bheith ag reachtaíocht eile de chuid an Aontais nó ag rialacha náisiúnta eile. Mar sin féin, leanfaidh na teorainneacha ascnaimh a leagtar amach i Rialachán (AE) Uimh. 10/2011 d’fheidhm a bheith acu maidir le sraitheanna plaisteacha in ábhair agus in earraí a phriontáiltear, a bhrataítear nó a choinnítear le chéile le greamacháin.

(15)

Tá oibleagáidí ar oibreoirí gnó faisnéis a soláthar d’údaráis inniúla agus chun na hoibleagáidí sin a shonrú a thuilleadh, ba cheart a cheangal ar oibreoirí gnó faisnéis maidir le comhdhéanamh na substaintí tosaigh agus doiciméad tacaíochta a sholáthar do na húdaráis inniúla ag gach céim den phróiseas monaraíochta. Ba cheart a léiriú sa doiciméadacht sin freisin go gcomhlíontar na rialacha maidir leis an ardleibhéal íonachta a thugtar isteach leis an Rialachán seo.

(16)

Ar mhaithe le comhlíonadh Rialachán (AE) Uimh. 10/2011 a áirithiú, tá bearta rialaithe éifeachtacha le bheith i bhfeidhm ag na Ballstáit, lena n-áirítear sampláil ábhar plaisteach agus earraí plaisteacha, chomh maith le táirgí ó na céimeanna idirmheánacha. Ón taithí a fuarthas, áfach, is léir go bhféadfadh dúshláin phraiticiúla a bheith roimh chigirí agus samplaí á dtógáil acu ag céimeanna áirithe den phróiseas monaraíochta ar láithreáin mhonaraíochta. Dá bhrí sin, is iomchuí a cheangal ar mhonaróirí cigireachtaí a éascú trína áirithiú gur féidir le cigirí samplaí a thógáil ag céimeanna ábhartha den phróiseas monaraíochta agus gur féidir leo samplaí a thógáil de shubstaintí agus d’ábhair (idirmheánacha) a úsáidtear don mhonaraíocht agus atá ar an láithreán monaraíochta.

(17)

Fíorchóimheas dromchla go toirt an earra plaisteach deiridh a bhíonn i dteagmháil le bia, is é sin a bhíonn mar bhonn do na rialacha maidir le tástáil ascnaimh a leagtar síos i Rialachán (AE) Uimh. 10/2011. Mar sin féin, bunaítear leis an Rialachán sin freisin, maidir le hábhair agus earraí áirithe, go bhfuil cóimheas seasta dromchla go toirt le cur i bhfeidhm, ar mhaithe le cinneadh an leibhéil ascnaimh a éascú, go háirithe agus tástáil á déanamh ar earraí nach bhfuil i dteagmháil le bia go fóill, earraí nach bhfuil sé indéanta an t-achar dromchla a bhíonn i dteagmháil le bia a chinneadh ina leith ná cúiteamh a dhéanamh i leith an leibhéil rómheastacháin ná gannmheastacháin a bhfuil coinne leis ar nochtadh tomhaltóirí do chomhábhair sna hábhair agus sna hearraí sin. I gcásanna áirithe, áfach, dá gcuirfí cóimheas seasta dromchla go toirt i bhfeidhm, d’fhéadfaí gannmheastachán a bheith mar thoradh air maidir le nochtadh tomhaltóirí do chomhábhair sna hábhair agus sna hearraí sin agus d’fhéadfadh sé sin sláinte an duine a chur i mbaol. Dá bhrí sin, is iomchuí go mbeadh an deis ag oibreoirí gnó an fíorchóimheas dromchla go toirt a roghnú seachas oibleagáid a bheith orthu úsáid a bhaint as an gcóimheas seasta dromchla go toirt arna bhunú le haghaidh na n-eisceachtaí sin.

(18)

Le pointe 07.04 de Thábla 2 d’Iarscríbhinn III a ghabhann le Rialachán (AE) Uimh. 10/2011 sanntar ionsamhlaigh bhia do chatagóirí cáise. Mar sin féin, na sannacháin reatha, go háirithe catagóirí 07.04.B agus 07.04.C, ní fhreagraíonn siad do léirmhíniú coiteann agus d’úsáid choiteann na nathanna ‘cáis nádúrtha’ agus ‘cáis phróiseáilte’. Go sonrach, meastar de ghnáth gur cáis phróiseáilte í cáis leáite, agus meastar go coitianta gur cáiseanna nádúrtha neamhphróiseáilte iad cáiseanna atá cosúil le cáis tí. Ní leanann na sannacháin atá ann faoi láthair an téarmaíocht a úsáidtear in ‘Aicmiú FoodEx2’ ach oiread, téarmaíocht a bhunaigh an tÚdarás (11) agus a bhaineann go háirithe le cáis neamhaibithe (úr) agus cáis aibithe. Dá bhrí sin, is iomchuí na catagóirí ábhartha a leasú chun cáiseanna nádúrtha agus próiseáilte agus cáis aibithe agus neamhaibithe a aicmiú ar bhealach níos fearr, agus sannacháin ionsamhlacha atá iomchuí do na catagóirí nua cáise sin á leagan amach ar bhonn na sannachán atá ann cheana.

(19)

Ar mhaithe le sábháilteacht a áirithiú, ní mór d’oibreoirí gnó an fhaisnéis uile is ábhartha a fháil maidir le sábháilteacht na n-ábhar plaisteach agus na n-earraí plaisteacha a mhonaraíonn siad nó a úsáideann siad. Le Rialachán (AE) Uimh. 10/2011, áfach, ní cheanglaítear ach go n-áirítear sa dearbhú i scríbhinn maidir le comhlíonadh faisnéis faoi na substaintí a úsáidtear nó faoi tháirgí díghrádúcháin díobh a bhfuil srianta agus/nó sonraíochtaí leagtha amach ina leith in Iarscríbhinní I agus II a ghabhann leis an Rialachán sin. Ar mhaithe leis an leibhéal sábháilteachta a mhéadú a thuilleadh, is iomchuí a cheangal maidir leis an dearbhú maidir le comhlíonadh go mbeidh faisnéis ann freisin i dtaobh substaintí nár cuireadh leis d’aon ghnó, amhail eisíontais agus idirmheánaigh imoibriúcháin, dianscaoileadh, nó táirgí imoibriúcháin a foirmíodh le linn phróiseas monaraíochta an ábhair phlaistigh nó an earra phlaistigh agus a d’fhéadfadh a bheith san ábhar deiridh nó san earra deiridh a bhíonn i dteagmháil le bia.

(20)

Cé go bhféadfadh éilleáin a dhíorthaítear ó dhramhaíl a bheith i substaintí a mhonaraítear as dramhaíl, éilleáin a d’fhéadfadh sláinte an duine a chur i mbaol, na rialacha atá ann faoi láthair a bhaineann leis an dearbhú i scríbhinn maidir le comhlíonadh, níl ceanglas sna rialacha sin le sonraíocht a dhéanamh ar monaraíodh an t-ábhar plaisteach le substaintí a monaraíodh as dramhaíl. Dá bhrí sin, is gá na forálacha i ndáil leis an dearbhú maidir le comhlíonadh a leasú, ionas go bhfaighidh monaróir an earra phlaistigh dheiridh faisnéis leordhóthanach lena gcuirfí ar a chumas a áirithiú go gcomhlíonfar an ceanglas a leagtar síos in Airteagal 3(1) de Rialachán (CE) Uimh. 1935/2004 nach gcuirfidh ábhair phlaisteacha ná earraí plaisteacha sláinte an duine i mbaol.

(21)

Chun torthaí inchomparáide a bhaint amach, ní mór do shaotharlanna tástáil chomhlíontachta a dhéanamh faoi dhálaí tástála caighdeánaithe. Ina theannta sin, ní mór anailís a dhéanamh ar thorthaí na dtástálacha go comhsheasmhach. Dá bhrí sin, is iomchuí na rialacha maidir le fíorú na tástála comhlíontachta a shonrú a thuilleadh in Iarscríbhinn V a ghabhann le Rialachán (AE) Uimh. 10/2011.

(22)

Le Rialachán (AE) 2022/1616 ceanglaítear go gcomhlíonfaidh ábhair phlaisteacha agus earraí plaisteacha athchúrsáilte Caibidlí II agus III agus Caibidil V de Rialachán (AE) Uimh. 10/2011. An ceanglas ardíonachta a leagtar síos leis an Rialachán sin i gCaibidil II de Rialachán (AE) Uimh. 10/2011, tá feidhm aige maidir le substaintí a úsáidtear i monaraíocht ábhar plaisteach agus earraí plaisteacha. Mar sin féin, ní gá feidhm a bheith ag an gceanglas ardíonachta maidir le substaintí a fhaightear in ionchur phróiseas dí-éillithe na dramhaíola plaistí agus atá fós le fáil in aschur an phróisis sin mar le Rialachán (AE) 2022/1616 áirithítear maidir le monaraíocht na n-ábhar plaisteach athchúrsáilte a bheartaítear a bheith dteagmháil le bia go bhfágfaidh an próiseas sin an t-ábhar gan éilliú teagmhasach a mhéid a chomhlíontar ceanglais Airteagal 3 de Rialachán (CE) Uimh. 1935/2004. Dá bhrí sin, maidir le monaraíocht ábhar plaisteach athchúrsáilte agus earraí plaisteacha athchúrsáilte, níor cheart feidhm a bheith ag an gceanglas ardíonachta ach amháin maidir le haon substaint a chuirtear leis le linn an phróisis athchúrsála agus maidir le haon táirge imoibriúcháin idirmheánach, dianscaoilte nó imoibriúcháin a eascraíonn as an tsubstaint sin. Dá bhrí sin, is iomchuí a shonrú a thuilleadh sa Rialachán cé na forálacha de Rialachán (AE) Uimh. 10/2011 a bhfuil feidhm acu maidir le hábhair phlaisteacha athchúrsáilte agus earraí plaisteacha athchúrsáilte.

(23)

Le Rialachán (AE) 2022/1616 leagtar síos rialacha maidir le córais dearbhaithe cáilíochta chun dramhábhar plaisteach a bhailiú, a réamhphróiseáil, a dhí-éilliú agus a athchúrsáil. Tugtar isteach leis an Rialachán seo rialacha maidir le hathphróiseáil seachtháirgí plaisteacha ó mhonaraíocht plaisteach. Ar mhaithe le sábháilteacht bia a mhéadú a thuilleadh, ba cheart rialacha mionsonraithe maidir le dea-chleachtais mhonaraíochta a leagan síos i Rialachán (CE) Uimh. 2023/2006 (12) ón gCoimisiún a mhéid a bhaineann le hathphróiseáil agus athchúrsáil.

(24)

Seachtháirgí plaisteacha a bheartaítear le haghaidh athphróiseála, d’fhéadfaí iad a athphróiseáil ag suíomh monaraíochta nach ionann agus an suíomh ónar tháinig siad ar dtús. Mura bhfuil sé soiléir, áfach, cén úsáid a bhainfí as na seachtháirgí sin, nó má éillítear iad le linn stórála nó iompair ón tsaoráid táirgthe ónar tháinig siad, d’fhéadfadh rioscaí a bheith ag baint lena n-athphróiseáil. Dá bhrí sin, ar mhaithe le cosc a chur ar aon úsáid a bhaintear as seachtháirgí plaisteacha chun críoch nach bhfuil oiriúnach dóibh agus chun éilliú seachtháirgí plaisteacha ón bpointe ina dtáirgtear iad go dtí pointe a n-athphróiseála a chosc, ba cheart rialacha a leagan síos i Rialachán (CE) Uimh. 2023/2006 ón gCoimisiún. Ina theannta sin, nuair a chuirtear seachtháirgí den sórt sin ar an margadh, leis an dearbhú maidir le comhlíonadh dá dtagraítear in Airteagal 15 de Rialachán (AE) Uimh. 10/2011, ba cheart go soláthrófaí an fhaisnéis a bhfuil gá leis dá n-athphróiseáil, go háirithe maidir lena n-oiriúnacht d’úsáidí áirithe.

(25)

Chun gur féidir le hoibreoirí oiriúnú do na hathruithe dá bhforáiltear sa Rialachán seo, is iomchuí go ndéantar a fhoráil maidir le hábhair phlaisteacha agus earraí plaisteacha a chomhlíonann Rialachán (AE) Uimh. 10/2011, de réir mar is infheidhme roimh dháta theacht i bhfeidhm an Rialacháin seo, agus aon reachtaíocht ábhartha eile de chuid an Aontais, go gceadófar iad a chur ar an margadh den chéad uair ar feadh tréimhse 18 mí tar éis theacht i bhfeidhm an Rialacháin seo agus go bhfanfaidh siad ar an margadh go dtí go n-ídeofar na stoic. Mar sin féin, is iondúil go mbíonn soláthar roinnt táirgí agus substaintí ó chéimeanna idirmheánacha monaraíochta ag oibreoirí eile i gceist le hábhair phlaisteacha agus earraí plaisteacha deiridh a tháirgeadh. Ar mhaithe le sábháilteacht an tomhaltóra, ba cheart an t-aistriú chuig comhlíonadh iomlán an Rialacháin seo a bhaint amach ar bhealach chomh héifeachtúil agus is féidir, agus a luaithe is féidir. Dá bhrí sin, oibreoirí a chuireann táirgí idirmheánacha agus substaintí ar an margadh nach gcomhlíonann an Rialachán seo go fóill, amhail ó 9 mí roimh dhul in éag na hidirthréimhse 18 mí, ba cheart a cheangal ar na hoibreoirí sin úsáideoirí na dtáirgí sin a chur ar an eolas nach féidir iad a úsáid i monaraíocht ábhar plaisteach agus earraí plaisteacha atá le cur ar an margadh tar éis don idirthréimhse dul in éag.

(26)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,