(1)

Le Rialachán (CE) Uimh. 1831/2003, foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis an bhforas agus na nósanna imeachta chun údarú den sórt sin a dheonú agus a athnuachan.

(2)

Le Rialachán Cur Chun Feidhme (AE) Uimh. 1059/2013 ón gCoimisiún (2), údaraíodh ullmhóid arb é atá inti Saccharomyces cerevisiae MUCL 39885 ar feadh 10 mbliana mar bhreiseán beathaithe le haghaidh eallaí lena ramhrú.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun athnuachan a dhéanamh ar údarú na hullmhóide Saccharomyces cerevisiae MUCL 39885 mar bhreiseán beathaithe. Bhí na sonraí agus na doiciméid a cheanglaítear faoi Airteagal 14(2) de Rialachán (CE) Uimh. 1831/2003 ag gabháil leis an iarratas sin.

(4)

Tháinig an tÚdarás Eorpach um Shábháilteacht Bia (‘an tÚdarás) ar an gconclúid sa tuairim uaidh an 13 Márta 2024 (3) gur chuir an t-iarratasóir fianaise ar fáil go bhfuil an ullmhóid Saccharomyces cerevisiae MUCL 39885 fós sábháilte don spriocspeiceas, do na tomhaltóirí agus don chomhshaol, faoi na coinníollacha úsáide atá údaraithe faoi láthair. Tháinig an tÚdarás ar an gconclúid freisin nach bhfuil an ullmhóid Saccharomyces cerevisiae MUCL 39885 greannach don chraiceann ná do na súile, ach gur cheart a mheas gur íogróir craicinn agus riospráide í. Léirigh sé freisin nach bhfuil aon ghá measúnú a dhéanamh ar éifeachtúlacht na hullmhóide Saccharomyces cerevisiae MUCL 39885, toisc nach n-áirítear leis an iarratas ar athnuachan an údaraithe togra chun coinníollacha an údaraithe bunaidh a leasú nó a fhorlíonadh, ar togra é a mbeadh tionchar aige ar éifeachtúlacht an bhreiseáin. Níor mheas an tÚdarás go raibh gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar thángthas orthu sa mheasúnú a rinneadh i dtaobh mhodh anailíse na hullmhóide Saccharomyces cerevisiae MUCL 39885 mar bhreiseán beathaithe i gcomhthéacs an údaraithe roimhe seo, measann an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (c) de Rialachán (CE) Uimh. 378/2005 (4) ón gCoimisiún, níl gá le tuarascáil meastóireachta na Saotharlainne Tagartha dá réir sin.

(6)

I bhfianaise an mhéid thuas, measann an Coimisiún go gcomhlíonann an ullmhóid Saccharomyces cerevisiae MUCL 39885 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha an bhreiseáin ar shláinte na n-úsáideoirí a chosc.

(7)

Mar thoradh ar athnuachan údarú na hullmhóide Saccharomyces cerevisiae MUCL 39885 mar bhreiseán beathaithe, ba cheart Rialachán Cur Chun Feidhme (AE) Uimh. 1059/2013 a aisghairm.

(8)

Ós rud é, ar chúiseanna sábháilteachta, nach gá na modhnuithe ar na coinníollacha údaraithe maidir le húdarú na hullmhóide Saccharomyces cerevisiae MUCL 39885 a chur i bhfeidhm láithreach, is iomchuí foráil a dhéanamh maidir le hidirthréimhse le haghaidh páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(9)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,