(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas ar údarú ullmhóide arb é atá inti Saccharomyces cerevisiae DBVPG 48 SF mar bhreiseán beathaithe. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide arb é atá inti Saccharomyces cerevisiae DBVPG 48 SF mar bhreiseán beathaithe le haghaidh capall, athchogantach agus gach muice, agus iarrtar ann go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’ a mhéid a bhaineann le capaill, agus san fheidhmghrúpa ‘breiseáin zóiteicniúla eile’ a mhéid a bhaineann le hathchogantaigh agus muca.

(4)

Le Rialachán Cur Chun Feidhme (AE) 2023/2734 ón gCoimisiún (2), údaraíodh an ullmhóid Saccharomyces cerevisiae DBVPG 48 SF ar feadh 10 mbliana mar bhreiseán beathaithe le haghaidh capall, athchogantaigh dhéiríochta agus muc.

(5)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 23 Márta 2023 (3) agus an 13 Márta 2024 (4) go bhfuil an ullmhóid Saccharomyces cerevisiae DBVPG 48 SF sábháilte do na spriocspeicis, do na tomhaltóirí agus don chomhshaol, faoi na coinníollacha úsáide atá beartaithe. Tháinig an tÚdarás ar an gconclúid freisin nach greannaitheoir súl ná craicinn í an ullmhóid Saccharomyces cerevisiae DBVPG 48 SF ach gur cheart í a mheas mar íogróir riospráide, cé nach raibh sé in ann teacht ar chonclúid maidir le poitéinseal na hullmhóide um íogrú craicinn. Ina theannta sin, tháinig an tÚdarás ar an gconclúid go bhféadfadh an ullmhóid Saccharomyces cerevisiae DBVPG 48 SF a bheith éifeachtúil le haghaidh na n-athchogantach uile ar an gcoinníoll úsáide atá beartaithe. Níor mheas sé go raibh gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar na modhanna anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(6)

I bhfianaise an mhéid thuas, measann an Coimisiún go gcomhlíonann an ullmhóid Saccharomyces cerevisiae DBVPG 48 SF na coinníollacha dá bhforáiltear in Airteagal 5 de Rialachán (CE) Uimh. 1831/2003 le haghaidh athchogantaigh seachas athchogantaigh dhéiríochta. Dá réir sin, ba cheart úsáid na hullmhóide sin a údarú le haghaidh athchogantaigh seachas athchogantaigh dhéiríochta. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,