RIALACHÁN TARMLIGTHE (AE) 2025/22 ÓN gCOIMISIÚN

an 19 Nollaig 2024

lena leasaítear Rialachán Tarmligthe (AE) 2022/1645 ón gCoimisiún a mhéid a bhaineann le ceanglais maidir le slándáil faisnéise le haghaidh eagraíochtaí a sholáthraíonn seirbhísí láimhseáil ar talamh

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2018/1139 ó Pharlaimint na hEorpa agus ón gComhairle an 4 Iúil 2018 maidir le rialacha comhchoiteanna i réimse na heitlíochta sibhialta agus lena mbunaítear Gníomhaireacht Sábháilteachta Eitlíochta de chuid an Aontais Eorpaigh, agus lena leasaítear Rialachán (CE) Uimh. 2111/2005, Rialachán (CE) Uimh. 1008/2008, Rialachán (AE) Uimh. 996/2010, Rialachán (AE) Uimh. 376/2014 agus Treoir 2014/30/AE agus Treoir 2014/53/AE ó Pharlaimint na hEorpa agus ón gComhairle agus lena n-aisghairtear Rialachán (CE) Uimh. 552/2004 agus Rialachán (CE) Uimh. 216/2008 ó Pharlaimint na hEorpa agus ón gComhairle agus Rialachán (CEE) Uimh. 3922/91 ón gComhairle (1)), agus go háirithe Airteagal 39(1), pointe (e), de,

De bharr an mhéid seo a leanas:

(1)

Le Rialachán (AE) 2018/1139 bunaítear na ceanglais fhíor-riachtanacha maidir le soláthar sábháilte seirbhísí láimhseáil ar talamh agus maidir le heagraíochtaí a sholáthraíonn iad, chomh maith le forálacha maidir le húdaráis inniúla náisiúnta formhaoirseacht a dhéanamh ar na heagraíochtaí sin agus ar na seirbhísí láimhseáil ar talamh a sholáthraítear ag na aeradróim de chuid an Aontais a thagann faoi raon feidhme an Rialacháin sin.

(2)

I gcomhréir leis na ceanglais fhíor-riachtanacha a leagtar amach in Iarscríbhinn VII, pointe 4.2.1, a ghabhann le Rialachán (AE) 2018/1139 agus i gcomhréir le Rialachán Tarmligthe (AE) 2025/20 (2) ón gCoimisiún, tá eagraíochtaí atá freagrach as soláthar sábháilte seirbhísí láimhseáil ar talamh le córas bainistíochta a chur chun feidhme agus a chothabháil chun rioscaí sábháilteachta a bhainistiú. D’fhéadfadh rioscaí sábháilteachta den sórt sin eascairt as bagairtí slándála faisnéise freisin. Ba cheart d’eagraíochtaí a sholáthraíonn seirbhísí láimhseáil ar talamh aghaidh a thabhairt go cuí ar rioscaí den chineál sin. Chun an méid sin a chumasú, ba cheart raon feidhme Rialachán Tarmligthe (AE) 2022/1645 (3) a leasú chun eagraíochtaí a sholáthraíonn seirbhís láimhseáil ar talamh a chur san áireamh.

(3)

Oibríonn eagraíochtaí atá faoi réir Rialachán Tarmligthe (AE) 2022/1645 amhail na heagraíochtaí láimhseáil ar talamh agus na heagraíochtaí a sholáthraíonn seirbhísí bainistíochta naprúin faoi chóras dearbhaithe. Tugann sé sin le tuiscint nach gá dá n-údaráis inniúla a gcóras bainistíochta ná aon cheann dá chomhpháirteanna a fhormheas. Leis an gcóras céanna ba cheart na heagraíochtaí sin a bheith in ann na forálacha slándála faisnéise a chur i bhfeidhm gan ceangal a bheith orthu a lámhleabhar bainistíochta slándála faisnéise nó an próiseas chun athruithe a bhainistiú a bheith formheasta ag an údarás inniúil. Ba cheart na ceanglais a bhaineann leis na heilimintí sin a leasú chun an díolúine sin do na heagraíochtaí a chuireann dearbhú isteach a léiriú.

(4)

Eagraíochtaí a chumhdaítear leis an Rialachán seo atá faoi réir ceanglais slándála cheana féin a eascraíonn as Rialachán Tarmligthe Cur Chun Feidhme (AE) 2015/1998 (4) ón gCoimisiún, ba cheart dóibh ceanglais Iarscríbhinn I (Cuid IS.D.OR.230 ‘Scéim tuairiscithe seachtraigh maidir le slándáil faisnéise’) a ghabhann le Rialachán (AE) 2022/1645 ón gCoimisiún a chomhlíonadh freisin ós rud é nach bhfuil aon fhoráil i Rialachán (AE) 2015/1998 maidir le tuairisciú seachtrach ar theagmhais slándála faisnéise.

(5)	Tá na ceanglais a leagtar síos sa Rialachán seo bunaithe ar Thuairim Uimh. 01/2024 (5), arna heisiúint ag an nGníomhaireacht i gcomhréir le hAirteagal 75(2), pointí (b) agus (c), agus Airteagal 76(1) de Rialachán (AE) 2018/1139.

(6)	I gcomhréir le hAirteagal 128(4) de Rialachán (AE) 2018/1139, chuaigh an Coimisiún i gcomhairle le saineolaithe arna n-ainmniú ag gach Ballstát i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr.

(7)	Chun a ndóthain ama a thabhairt d’eagraíochtaí a áirithiú go gcomhlíonfar na rialacha agus na nósanna imeachta nua a thabharfar isteach leis an Rialachán seo, ba cheart feidhm a bheith ag an Rialachán seo ó 6 bliana tar éis dháta a theacht i bhfeidhm,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán Tarmligthe (AE) 2022/1645 ón gCoimisiún mar a leanas:

(1)

In Airteagal 2(1) cuirtear isteach an pointe (c) seo a leanas:

‘(c)

eagraíochtaí láimhseáil ar talamh atá faoi réir Rialachán Tarmligthe (AE) 2025/20 (*1) ón gCoimisiún ar fíor an méid seo a leanas ina leith:

(i)	nach mór dóibh, chun na seirbhísí faoi seach a sholáthar, sonraí a sholáthraíonn tríú páirtithe a bhailiú, a stóráil, a anailísiú nó a phróiseáil ar bhealach eile; nó

(ii)	a chuireann sonraí a úsáidfear chun críoch oibríochtúil ar fáil go díreach d’oibreoirí aerárthaí (*1)

(*1) Rialachán Tarmligthe (AE) 2025/22 ón gCoimisiún an 19 Nollaig 2024 lena leasaítear Rialachán Tarmligthe (AE) 2022/1645 ón gCoimisiún a mhéid a bhaineann le ceanglais maidir le slándáil faisnéise le haghaidh eagraíochtaí a sholáthraíonn seirbhísí láimhseáil ar talamh (IO L, 2025/20, 7.3.2025, ELI: http://data.europa.eu/eli/reg_del/2025/20/oj).’;"

(2)

In Airteagal 5(1) cuirtear isteach an pointe (c) seo a leanas:

‘(c)	maidir le heagraíochtaí dá dtagraítear in Airteagal 2, pointe (c), an t-údarás inniúil a ainmnítear i gcomhréir leis an Iarscríbhinn (Cuid-ARGH) a ghabhann le Rialachán Cur Chun Feidhme (AE) 2025/23 ón gCoimisiún (*2).

(*2) Rialachán Tarmligthe (AE) 2025/22 ón gCoimisiún an 19 Nollaig 2024 lena leasaítear Rialachán Tarmligthe (AE) 2022/1645 ón gCoimisiún a mhéid a bhaineann le ceanglais maidir le slándáil faisnéise le haghaidh eagraíochtaí a sholáthraíonn seirbhísí láimhseáil ar talamh (IO L, 2025/20, 7.3.2025, ELI: http://data.europa.eu/eli/reg_del/2025/20/oj).’;"

Airteagal 2

Leasaítear an Iarscríbhinn a ghabhann le Rialachán Tarmligthe (AE) 2022/1645 i gcomhréir leis an Iarscríbhinn a ghabhann leis an Rialachán seo.

Airteagal 3

1. Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

2. Beidh feidhm ag Airteagal 1 ón 27 Márta 2031.

3. Beidh feidhm ag Airteagal 2 ón 16 Deireadh Fómhair 2025.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 19 Nollaig 2024.

Thar ceann an Choimisiúin

An tUachtarán

Ursula VON DER LEYEN

(1) IO L 212, 22.8.2018, lch. 1, ELI: http://data.europa.eu/eli/reg/2018/1139/oj.

(2) Rialachán Tarmligthe (AE) 2025/20 ón gCoimisiún an 19 Nollaig 2024 lena bhforlíontar Rialachán (AE) 2018/1139 ó Pharlaimint na hEorpa agus ón gComhairle trí cheanglais a leagan síos maidir le soláthar sábháilte seirbhísí láimhseáil ar talamh agus maidir le heagraíochtaí a sholáthraíonn iad (IO L 2025/20, dd.mm.2025, ELI: http://data.europa.eu/eli/reg_del/2025/20/oj).

(3) Rialachán Tarmligthe (AE) 2022/1645 ón gCoimisiún an 14 Iúil 2022 lena leagtar síos rialacha maidir le cur i bhfeidhm Rialachán (AE) 2018/1139 ó Pharlaimint na hEorpa agus ón gComhairle, a mhéid a bhaineann le ceanglais, i ndáil le bainistíocht rioscaí slándála faisnéise a bhféadfadh tionchar a bheith acu ar shábháilteacht eitlíochta, ar eagraíochtaí a chumhdaítear le Rialacháin (AE) Uimh. 748/2012 agus (AE) Uimh. 139/2014 ón gCoimisiún agus lena leasaítear Rialacháin (AE) Uimh. 748/2012 agus (AE) Uimh. 139/2014 ón gCoimisiún (IO L 248, 26.9.2022, lch. 18, ELI: http://data.europa.eu/eli/reg_del/2022/1645/oj).

(4) Rialachán Cur Chun Feidhme (AE) 2015/1998 ón gCoimisiún an 5 Samhain 2015 lena leagtar síos bearta mionsonraithe le haghaidh chur chun feidhme na mbunchaighdeán comhchoiteann maidir le slándáil eitlíochta (IO L 123, 12.5.2016, ELI: http://data.europa.eu/eli/agree_interinstit/2016/512/oj).

(5) https://www.easa.europa.eu/en/document-library/opinions/opinion-no-012024.

IARSCRÍBHINN

Leasaítear Rialachán Tarmligthe (AE) 2022/1645 mar a leanas:

Leasaítear pointe IS.D.OR.200(a)(5) mar a leanas:

‘(5)

na bearta is gá chun eachtraí slándála faisnéise a bhrath a shainiú agus a chur chun feidhme i gcomhréir le pointe IS.D.OR.220, na heachtraí sin a mheastar gur teagmhais slándála faisnéise iad lena ngabhann tionchar féideartha ar an tsábháilteacht eitlíochta a shainaithint, agus freagairt do na teagmhais slándála faisnéise sin agus téarnamh uathu;’;

Leasaítear pointí (b) agus (c) de IS.D.OR.250 mar a leanas:

‘(b)

Formheasfaidh an t-údarás inniúil eisiúint tosaigh an Lámhleabhair Bainistíochta Slándála Faisnéise (LBSF) agus coinneoidh sé cóip de. Ní bheidh gá le formheas le haghaidh eagraíochtaí a chuireann dearbhú isteach. Déanfar an LBSF a leasú de réir mar is gá ionas go leanfaidh sé de bheith ina thuairisc atá cothrom le dáta ar CBSF na heagraíochta. Tabharfar cóip d’aon leasú ar an LBSF don údarás inniúil.

(c)

Déanfar leasuithe ar an LBSF a bhainistiú trí nós imeachta arna bhunú ag an eagraíocht. Formheasfaidh an t-údarás inniúil aon leasú nach n-áirítear faoi raon feidhme an nós imeachta seo agus aon leasú a bhaineann leis na hathruithe dá dtagraítear i bpointe IS.D.OR.255(b). Ní bheidh gá le formheas le haghaidh eagraíochtaí a chuireann dearbhú isteach.’;

Cuirtear an méid seo a leanas in ionad phointe IS.D.OR.255:

‘IS.D.OR.255 Athruithe ar an gcóras bainistíochta faisnéise slándála

(a)	Féadfar athruithe ar an CBSF a bhainistiú agus a fhógairt don údarás inniúil trí nós imeachta arna fhorbairt ag an eagraíocht. Déanfaidh an t-údarás inniúil an nós imeachta sin a fhormheas ach amháin i gcás eagraíochtaí a chuireann dearbhú isteach.

(b)

Maidir le hathruithe ar an CBSF nach gcumhdaítear leis an nós imeachta dá dtagraítear i bpointe (a), déanfaidh an eagraíocht iarratas ar fhormheas a eiseoidh an t-údarás inniúil agus gheobhaidh sí an formheas sin, ach amháin i gcás eagraíochtaí a chuireann dearbhú isteach, nach gá formheas ina leith.

Maidir leis na hathruithe sin:

(1)	cuirfear an t-iarratas isteach sula dtarlóidh aon athrú den sórt sin chun é a chur ar a chumas don údarás inniúil cinneadh a dhéanamh maidir le comhlíontacht leanúnach leis an Rialachán seo agus chun an deimhniú eagraíochta agus téarmaí gaolmhara an fhormheasa a ghabhann leis a leasú, más gá;

(2)	aon fhaisnéis a iarrann an t-údarás inniúil chun an t-athrú a mheas, cuirfidh an eagraíocht sin ar fáil don údarás sin;

(3)	ní chuirfear an t-athrú chun feidhme go dtí go bhfaighfear formheas foirmiúil ón údarás inniúil, ach amháin i gcás eagraíochtaí a chuireann dearbhú isteach, a d’fhéadfadh an t-athrú a chur chun feidhme láithreach;

(4)	oibreoidh an eagraíocht faoi na coinníollacha arna bhforordú ag an údarás inniúil le linn chur chun feidhme na n-athruithe sin.’.