(1)

An 25 Meán Fómhair 2015, ghlac Comhthionól Ginearálta na Náisiún Aontaithe creat domhanda nua um fhorbairt inbhuanaithe, Clár Oibre 2030 don Fhorbairt Inbhuanaithe (‘Clár Oibre 2030’), a bhfuil na Spriocanna Forbartha Inbhuanaithe (SDGanna) mar chroílár ann. Sa Teachtaireacht ón gCoimisiún an 22 Samhain 2016 dar teideal ‘Next steps for a sustainable European future: European action for sustainability [Na chéad chéimeanna eile i dtreo todhchaí inbhuanaithe don Eoraip: Gníomhaíocht Eorpach don inbhuanaitheacht]’, déantar na SDGanna a nascadh le creat beartais an Aontais chun a áirithiú, le gach gníomhaíocht agus tionscnamh beartais de chuid an Aontais, laistigh den Aontas agus ar fud an domhain, go gcuirfear na SDGanna san áireamh ón tús. Leis na conclúidí ón gComhairle Eorpach an 22 agus 23 Meitheamh 2017, deimhníodh gealltanas an Aontais agus na mBallstát Clár Oibre 2030 a chur chun feidhme ar bhealach iomlán, comhleanúnach, cuimsitheach, comhtháite agus éifeachtach agus i ndlúthchomhar le comhpháirtithe agus geallsealbhóirí eile. Ina theannta sin, tá breis agus 5 300 sínitheoir, arb ionann iad agus os cionn EUR 120 trilliún de shócmhainní faoi bhainistíocht, ag na Prionsabail um Infheistíocht Fhreagrach, a dtacaíonn NA leo, tráth glactha an Rialacháin seo,. An 11 Nollaig 2019, d’fhoilsigh an Coimisiún a theachtaireacht dar teideal The European Green Deal [An Comhaontú Glas don Eoraip] (‘An Comhaontú Glas don Eoraip’). An 30 Meitheamh 2021, glacadh an Dlí Aeráide Eorpach mar Rialachán (AE) 2021/1119 ó Pharlaimint na hEorpa agus ón gComhairle (3), lena gcumhdaítear i ndlí an Aontais an sprioc a leagtar amach sa Chomhaontú Glas don Eoraip m maidir le geilleagar agus sochaí an Aontais a bheith aeráidneodrach faoi 2050.

(2)

Tá an t-aistriú chuig geilleagar inbhuanaithe ríthábhachtach chun iomaíochas agus inbhuanaitheacht fhadtéarmach gheilleagar an Aontais agus cáilíocht saoil shaoránaigh an Aontais a áirithiú, agus chun an téamh domhanda a choinneáil cuid mhaith faoi bhun thairseach 1,5 céim Celsius. Tá an inbhuanaitheacht i gcroílár bheartais an Aontais le fada agus aithnítear sa Chonradh ar an Aontas Eorpach agus sa Chonradh ar Fheidhmiú an Aontais Eorpaigh (CFAE) araon a gnéithe sóisialta agus comhshaoil.

(3)

Chun cuspóirí na SDGanna a ghnóthú san Aontas, ní mór sreafaí caipitil a chur i dtreo infheistíochtaí inbhuanaithe. Is gá leas iomlán a bhaint as acmhainneacht an mhargaidh inmheánaigh chun na cuspóirí sin a ghnóthú. Sa chomhthéacs sin, tá sé ríthábhachtach deireadh a chur le bacainní ar ghluaiseacht éifeachtúil chaipitil i dtreo infheistíochtaí inbhuanaithe sa mhargadh inmheánach, cosc a chur ar na bacainní sin teacht chun cinn, agus rialacha agus caighdeáin a leagan síos, ar thaobh amháin, chun maoiniú inbhuanaithe a chur chun cinn agus, ar an taobh eile, infheistíochtaí a dhídhreasú a bhféadfadh drochthionchar a bheith acu ar ghnóthú cuspóirí na SDGanna.

(4)

Tá cur chuige an Aontais maidir le fás inbhuanaithe agus cuimsitheach fréamhaithe san 20 prionsabal de Cholún Eorpach na gCeart Sóisialta, mar a leagtar síos sa Teachtaireacht ón gCoimisiún an 26 Aibreán 2017 dar teideal ‘Establishing the European Pillar of Social Rights’ [Colún Eorpach na gCeart Sóisialta a bhunú] arb é is aidhm dóibh aistriú cothrom i dtreo fás den sórt sin a áirithiú mar aon le beartais nach bhfágtar aon duine ar lár leo. Thairis sin, le acquis sóisialta an Aontais, lena n-áirítear Straitéisí Aontas an Chomhionannais, cuirtear caighdeáin ar fáil maidir le dlí an tsaothair, an comhionannas, an inrochtaineacht, sláinte agus sábháilteacht ag an obair, agus an frith-idirdhealú.

(5)

Tá ról ríthábhachtach ag margaí airgeadais maidir le caipiteal a chur i dtreo infheistíochtaí a bhfuil gá leo chun cuspóirí aeráide agus comhshaoil an Aontais a bhaint amach. Sa teachtaireacht uaidh an 8 Márta 2018, d’fhoilsigh an Coimisiún a Phlean Gníomhaíochta maidir le ‘Financing Sustainable Growth’ [Fás Inbhuanaithe a Mhaoiniú], lena seoltar a straitéis maidir le hairgeadas inbhuanaithe. Is iad cuspóirí an Phlean Gníomhaíochta sin tosca inbhuanaitheachta a phríomhshruthú i mbainistíocht riosca agus sreafaí caipitil a atreorú i dtreo infheistíocht inbhuanaithe chun fás inbhuanaithe agus cuimsitheach a bhaint amach.

(6)

Mar chuid den Phlean Gníomhaíochta maidir le Fás Inbhuanaithe a Mhaoiniú, in 2021 choimisiúnaigh an Coimisiún staidéar dar teideal ‘Study on Sustainability Related Ratings, Data and Research’ [Staidéar ar Rátálacha, Sonraí agus Taighde a bhaineann leis an Inbhuanaitheacht] chun na forbairtí i margadh na dtáirgí agus na seirbhísí a bhaineann leis an inbhuanaitheacht a mheas, chun príomh-rannpháirtithe an mhargaidh a shainaithint agus chun na heasnaimh a d’fhéadfadh a bheith ann a thabhairt chun suntais. Leis an staidéar sin, soláthraíodh fardal agus aicmiú gníomhaithe margaidh, táirgí agus seirbhísí inbhuanaitheachta atá ar fáil ar an margadh agus anailís ar an úsáid a bhaineann rannpháirtithe sa mhargadh as táirgí agus seirbhísí a bhaineann leis an inbhuanaitheacht, agus ar an gcáilíocht a mheastar a bheith ag baint leis na táirgí agus na seirbhísí sin. Tugadh chun suntais sa staidéar gur ann do choimhlintí leasa, d’easpa trédhearcachta agus cruinnis a mhéid a bhaineann le modheolaíochtaí rátála comhshaoil, sóisialta agus rialachais (ESG) agus d’easpa soiléireachta maidir leis an téarmaíocht agus oibríochtaí soláthraithe rátála ESG.

(7)

Faoi chuimsiú an Chomhaontaithe Ghlais don Eoraip, chuir an Coimisiún straitéis uasdátaithe maidir le hairgeadas inbhuanaithe chun cinn a glacadh ina theachtaireacht an 6 Iúil 2021 dar teideal ‘Strategy for Financing the Transition to a Sustainable Economy’ [Straitéis maidir leis an aistriú chuig geilleagar inbhuanaithe a mhaoiniú].

(8)

Mar obair leantach, d’fhógair an Coimisiún sa straitéis sin go mbeadh comhairliúchán poiblí ann maidir le rátálacha ESG chun cur le measúnú tionchair. Sa chomhairliúchán poiblí a rinneadh in 2022, dhearbhaigh geallsealbhóirí go raibh imní orthu faoin easpa trédhearcachta maidir le modheolaíochtaí agus cuspóirí rátála ESG agus faoin easpa soiléireachta maidir le gníomhaíochtaí rátála ESG. Ós rud é go bhfuil an iontaoibh ríthábhachtach agus na margaí airgeadais á bhfeidhmiú, ba cheart aghaidh a thabhairt go práinneach ar an easpa trédhearcachta agus iontaofachta sin i rátálacha ESG.

(9)

Ar an leibhéal idirnáisiúnta, d’eisigh an Eagraíocht Idirnáisiúnta um Choimisiúin Urrús (IOSCO) tuarascáil i mí na Samhna 2021 ina bhfuil sraith moltaí maidir le soláthraithe rátála ESG agus táirgí sonraí. Ba cheart don Choimisiún agus don Údarás Maoirseachta Eorpach (an tÚdarás Eorpach um Urrúis agus Margaí) (ESMA) arna bhunú le Rialachán (AE) Uimh. 1095/2010 ó Pharlaimint na hEorpa agus ón gComhairle (4) breithniú a dhéanamh ar chur i bhfeidhm na moltaí IOSCO sin agus measúnú á dhéanamh ar cheanglais an Rialacháin seo a bheith á gcomhlíonadh ag dlínse tríú tír nó ag soláthraí rátála ESG chun críche coibhéise, formhuinithe nó aitheantais.

(10)

Tá ról tábhachtach ag rátálacha ESG sna margaí caipitil domhanda, ós rud é gur mó a úsáideann infheisteoirí, iasachtaithe agus eisitheoirí na rátálacha ESG mar chuid den phróiseas maidir le cinntí feasacha a dhéanamh a bhaineann le hinfheistíocht agus maoiniú inbhuanaithe. Is minic a úsáideann institiúidí creidmheasa, gnólachtaí infheistíochta, gnóthais árachais agus gnóthais athárachais, i measc eagraíochtaí eile, na rátálacha ESG mar thagairt don fheidhmíocht inbhuanaitheachta nó do na rioscaí agus na deiseanna inbhuanaitheachta ina ngníomhaíocht infheistíochta. Dá réir sin, bíonn tionchar suntasach ag rátálacha ESG ar an tslí a n-oibríonn margaí agus ar iontaoibh agus muinín infheisteoirí agus tomhaltóirí. Chun a áirithiú go mbeidh rátálacha ESG arna n-úsáid san Aontas neamhspleách, inchomparáide i gcás inar féidir, neamhchlaonta, córasach agus ar cháilíocht leormhaith, tá sé tábhachtach go ndéanfaí gníomhaíochtaí rátála ESG i gcomhréir le prionsabail na sláine, na trédhearcachta, na freagrachta agus an dea-rialachais, agus go rannchuideofaí le clár oibre airgeadais inbhuanaithe an Aontais ag an am céanna. Chuirfeadh inchomparáideacht níos fearr agus iontaofacht mhéadaithe rátálacha ESG le héifeachtúlacht an mhargaidh sin atá ag fás go tapa, rud a d’éascódh dul chun cinn i dtreo chuspóirí an Chomhaontaithe Ghlais don Eoraip.

(11)

Tá ról cumasúcháin ag rátálacha ESG maidir le feidhmiú cuí mhargadh airgeadais inbhuanaithe an Aontais trí fhaisnéis thábhachtach a sholáthar d’infheisteoirí agus institiúidí airgeadais le haghaidh a straitéisí infheistíochta, bainistíocht riosca agus oibleagáidí nochta. Is gá, dá bhrí sin, a áirithiú go soláthrófar le rátálacha ESG faisnéis a bheidh ábhartha agus úsáideach d’úsáideoirí rátálacha ESG i dtaobh cinntí a dhéanamh, agus gur fearr a thuigfidh úsáideoirí rátálacha ESG na cuspóirí a shaothraítear le rátálacha ESG agus na saincheisteanna sonracha agus na méadrachtaí a thomhaistear le rátálacha den sórt sin.

(12)

Is gá aitheantas a thabhairt do shamhlacha gnó éagsúla an mhargaidh rátála ESG. Is é an chéad samhail ghnó an tsamhail ‘íocann an t-úsáideoir’, inarb infheisteoirí den chuid is mó iad úsáideoirí rátálacha ESG, a cheannaíonn rátálacha ESG chun cinntí infheistíochta a dhéanamh. Is é an dara samhail ghnó an tsamhail ‘íocann an t-eisitheoir’, ina gceannaíonn gnóthais rátálacha ESG chun measúnú a dhéanamh ar rioscaí agus ar dheiseanna laistigh dá n-oibríochtaí. Chun iontaofacht níos fearr na rátálacha ESG a sholáthraítear san Aontas a áirithiú, ba cheart an fhéidearthacht a bheith ag míreanna rátáilte nó, i gcás ionstraim airgeadais nó táirge airgeadais, ag eisitheoirí míre rátáilte na sonraí a úsáideann an soláthraí rátála ESG a fhíorú agus aird a tharraingt ar aon earráidí fíorasacha sa tacar sonraí arna úsáid a d’fhéadfadh tionchar a imirt ar cháilíocht rátálacha sa todhchaí. Chuige sin, ba cheart do mhír rátáilte nó d’eisitheoir míre rátáilte, arna iarraidh sin, a bheith in ann rochtain a fháil ar an tacar sonraí arna úsáid chun a rátáil ESG a eisiúint. Ba cheart don fhéidearthacht an tacar sonraí a fhíorú a bheith ina huirlis seiceála fíricí amháin agus níor cheart do mhíreanna rátáilte ná d’eisitheoirí míreanna rátáilte a bheith in ann tionchar a imirt ar aon bhealach ar na modheolaíochtaí rátála ná ar an toradh rátála. Níor cheart feidhm a bheith ag an gceanglas atá ar sholáthraí rátála ESG fógra a thabhairt don mhír rátáilte nó d’eisitheoir míre rátáilte sula ndéantar rátáil ESG a eisiúint ach amháin roimh chéadeisiúint na rátála agus níor cheart feidhm a bheith aige maidir le haon nuashonruithe ina dhiaidh sin. Fónann an ceanglas sin mar mhodh chun an mhír rátáilte nó eisitheoir míre rátáilte a chur ar an eolas go ndéanfaidh an soláthraí rátála ESG é nó í a rátáil.

(13)

Ní dhéanann na Ballstáit rialáil ná maoirseacht ar ghníomhaíochtaí soláthraithe rátála ESG ná ar na coinníollacha maidir le rátálacha ESG a sholáthar. I bhfianaise na n-éagsúlachtaí, na heaspa trédhearcachta agus na heaspa comhrialacha atá ann faoi láthair, is dócha go nglacfadh na Ballstáit bearta agus cuir chuige éagsúla lena gcuirfí bac ar ailíniú le cuspóirí na SDGanna agus le cuspóirí an Chomhaontaithe Ghlais don Eoraip. Bheadh tionchar diúltach díreach ag na bearta agus na cuir chuige éagsúla sin ar fheidhmiú cuí an mhargaidh inmheánaigh, agus chruthófaí bacainní ar fheidhmiú cuí an mhargaidh inmheánaigh leo agus bheadh siad díobhálach don mhargadh rátála ESG. Maidir le soláthraithe rátála ESG a eisíonn rátálacha ESG lena n-úsáid ag institiúidí agus gnóthais airgeadais san Aontas, bheidís faoi réir rialacha éagsúla i mBallstáit éagsúla. D’fhágfadh caighdeáin agus cleachtais mhargaidh éagsúla go mbeadh sé deacair soiléireacht a bheith ann maidir le tógáil rátálacha ESG agus comparáid a dhéanamh eatarthu, rud a chruthódh dálaí míchothroma margaidh d’úsáideoirí rátálacha ESG. Bheadh sé sin ina chúis le bacainní breise laistigh den mhargadh inmheánach agus bheadh baol ann go ndéanfaí cinntí infheistíochta a shaobhadh.

(14)

Comhlánaítear leis an Rialachán seo gníomhartha dlí de chuid an Aontais atá ann cheana i réimse an airgeadais inbhuanaithe agus is é is aidhm dó sreafaí faisnéise a éascú chun cinntí infheistíochta a éascú.

(15)

Chun an raon feidhme críochach a shainiú go leormhaith, ba cheart an Rialachán seo a bheith bunaithe ar an gcoincheap ‘oibriú san Aontas’, lena ndéantar idirdhealú idir cásanna ina bhfuil soláthraithe rátála ESG bunaithe san Aontas, de pháirt amháin, agus cásanna ina bhfuil soláthraithe rátála ESG bunaithe lasmuigh den Aontas, den pháirt eile. Sa chéad chás, ba cheart a mheas go bhfuil soláthraithe rátála ESG atá bunaithe san Aontas ag oibriú san Aontas nuair a eisíonn siad agus nuair a fhoilsíonn siad a rátálacha ESG ar a suíomh gréasáin nó trí mhodhanna eile, nó nuair a eisíonn siad agus nuair a dháileann siad a rátálacha ESG trí shuibscríobh nó trí chaidrimh chonarthacha eile le gnóthais airgeadais rialáilte san Aontas, le gnóthais a thagann faoi raon feidhme Threoir 2013/34/AE ó Pharlaimint na hEorpa agus ón gComhairle (5), le gnóthais a thagann faoi raon feidhme Threoir 2004/109/CE ó Pharlaimint na hEorpa agus ón gComhairle (6), go háirithe maidir le heisitheoirí tríú tír a ligtear isteach a n-urrúis chun a dtrádála ar mhargaí rialáilte an Aontais, nó le hinstitiúidí, comhlachtaí, oifigí agus gníomhaireachtaí de chuid an Aontais nó le húdaráis phoiblí de chuid na mBallstát. Sa dara cás, níor cheart a mheas go bhfuil soláthraithe rátála ESG atá bunaithe lasmuigh den Aontas ag oibriú san Aontas ach amháin nuair a eisíonn siad agus nuair a dháileann siad a rátálacha ESG trí shuibscríobh nó trí chaidrimh chonarthacha eile leis na heintitis chéanna agus a dhéanann soláthraithe rátála ESG atá bunaithe san Aontas.

(16)

Tá an Rialachán seo ceaptha chun eisiúint, dáileadh agus, i gcás inarb ábhartha, foilsiú rátálacha ESG a rialú, gan é a bheith beartaithe a n-úsáid a rialú. I bhfianaise go bhfuil raon feidhme críochach an Rialacháin seo ceangailte leis an gcoincheap ‘oibriú san Aontas’, ba cheart d’úsáideoirí rátálacha ESG dul i dteagmháil le soláthraithe rátála ESG atá údaraithe nó cláraithe faoin Rialachán seo. Mar sin féin, i gcásanna teoranta, ba cheart d’úsáideoir rátálacha ESG san Aontas a bheith in ann dul i dteagmháil le soláthraí rátála ESG atá bunaithe lasmuigh den Aontas agus nach bhfuil údaraithe ná aitheanta faoin Rialachán seo. Ba cheart, sna cásanna sin, cloí go docht le coinníollacha sonracha chun aon riosca go dtiocfaí timpeall ar na ceanglais faoin Rialachán seo a sheachaint.

(17)

Chun an raon táirgí a bhfuil feidhm ag an Rialachán seo maidir leo a shainiú go leormhaith, ba cheart an sainmhíniú ar rátáil ESG a bheith teoranta do thuairimí nó do scóir, nó meascán den dá rud, atá bunaithe ar mhodheolaíocht bhunaithe agus ar chóras rangaithe sainithe amhail catagóirí rátála araon. Mar shampla, ba cheart sannadh míre do chatagóir nó scála atá dearfach nó diúltach, bunaithe ar mhodheolaíocht bhunaithe a mhéid a bhaineann le cearta comhshaoil, cearta sóisialta agus cearta an duine, fachtóirí rialachais nó le neamhchosaint ar rioscaí, a mheas mar chóras rangaithe chun críocha an Rialacháin seo.

(18)

Níor cheart feidhm a bheith ag an Rialachán seo maidir le foilsiú nó dáileadh sonraí maidir le cearta comhshaoil, cearta sóisialta agus cearta an duine, agus fachtóirí rialachais nach bhfuil forbairt rátála ESG mar thoradh orthu. Thairis sin, níor cheart feidhm a bheith ag an Rialachán seo maidir le táirgí nó seirbhísí ina n-ionchorpraítear gné de rátáil ESG, lena n-áirítear taighde infheistíochta mar a leagtar síos i dTreoir 2014/65/AE ó Pharlaimint na hEorpa agus ón gComhairle (7). Maidir le hathbhreithnithe seachtracha ar Bhannaí Glasa Eorpacha, dá bhforáiltear i Rialachán (AE) 2023/2631 ó Pharlaimint na hEorpa agus ón gComhairle (8), agus athbhreithnithe seachtracha agus tuairimí dara páirtí ar bhannaí a mhargaítear mar bhannaí atá inbhuanaithe ó thaobh an chomhshaoil de, bannaí atá nasctha leis an inbhuanaitheacht, agus bannaí, iasachtaí agus cineálacha eile ionstraimí fiachais a mhargaítear mar bhannaí, iasachtaí agus cineálacha eile ionstraimí fiachais atá inbhuanaithe, ba cheart iad a bheith lasmuigh de raon feidhme an Rialacháin seo freisin a mhéid nach ann do rátálacha ESG arna n-eisiúint ag an athbhreithneoir seachtrach nó ag an soláthraí tuairime dara páirtí in athbhreithnithe seachtracha agus i dtuairimí dara páirtí den sórt sin. Áirítear le hathbhreithnithe seachtracha athbhreithnithe ar nochtaí réamheisiúna, amhail bileoga fíricí maidir le Bannaí Glasa Eorpacha nó creataí bannaí a mhargaítear mar bhannaí atá inbhuanaithe, chomh maith le hathbhreithnithe ar nochtaí iareisiúna, amhail tuarascálacha leithdháilte bliantúla maidir le Bannaí Glasa Eorpacha, tuarascálacha tionchair maidir le Bannaí Glasa Eorpacha agus tuarascálacha maidir le bannaí a mhargaítear mar bhannaí atá inbhuanaithe. Ina theannta sin, níor cheart feidhm a bheith ag an Rialachán seo maidir le rátálacha arna bhforbairt go heisiach le haghaidh próisis chreidiúnúcháin nó deimhniúcháin, toisc nach ndírítear le rátálacha den sórt sin ar anailís infheistíochta, anailís airgeadais, cinnteoireacht infheistíochta ná ar chinnteoireacht airgeadais. Ar deireadh, níor cheart feidhm a bheith ag an Rialachán seo maidir le gníomhaíochtaí lipéadaithe ESG ar choinníoll nach mbaineann nochtadh rátála ESG leis na lipéid a dheonaítear d’eintitis, d’ionstraimí airgeadais nó do tháirgí.

(19)

Ina theannta sin, níor cheart feidhm a bheith ag an Rialachán seo maidir le rátálacha arna n-eisiúint ag comhaltaí den Chóras Eorpach Banc Ceannais (CEBC) nuair nach bhfoilsítear nó nach ndáiltear rátálacha den sórt sin chun críoch tráchtála. Tá an teorainn sin leis an raon feidhme le háirithiú nach mbeadh tionchar neamhbheartaithe ag an Rialachán seo ar bhearta CEBC a fhéachann le breithnithe aeráide nó breithnithe eile comhshaoil, sóisialta agus rialachais a chur san áireamh i gcreat comhthaobhachta beartais airgeadaíochta CEBC agus nuair atá príomhchuspóir CEBC maidir le cobhsaíocht praghsanna a chothabháil agus, gan dochar don chuspóir sin, a chuspóir chun tacú leis na beartais eacnamaíocha ghinearálta san Aontas, á saothrú aige.

(20)

I gcás ina nochtann gnóthas nó institiúid airgeadais faisnéis faoina dtionchair, a rioscaí nó a ndeiseanna inbhuanaitheachta féin nó faoi thionchair, rioscaí nó deiseanna a slabhra luacha, níor cheart an fhaisnéis sin a mheas mar rátáil ESG faoin Rialachán seo.

(21)

Níor cheart feidhm a bheith ag an Rialachán seo maidir le rátálacha ESG príobháideacha arna n-eisiúint de bhun ordú aonair agus arna soláthar go heisiach don duine a chuir an t-ordú isteach agus nach bhfuil beartaithe lena nochtadh nó lena ndáileadh go poiblí trí shuibscríobh nó trí mhodhanna eile. Níor cheart feidhm a bheith ag an Rialachán seo ach oiread maidir le rátálacha ESG arna n-eisiúint ag gnóthais airgeadais rialáilte san Aontas a úsáidtear go heisiach chun críoch inmheánach nó chun seirbhísí nó táirgí airgeadais inmheánacha nó inghrúpa a sholáthar.

(22)

Chun feidhmiú an mhargaidh inmheánaigh agus leibhéal na cosanta d’infheisteoirí a fheabhsú tuilleadh, tá sé tábhachtach trédhearcacht leordhóthanach agus chomhsheasmhach a áirithiú maidir le rátálacha ESG arna n-eisiúint ag gnóthais airgeadais rialáilte san Aontas agus arna n-ionchorprú ina dtáirgí nó seirbhísí airgeadais, nuair a nochtar rátálacha den sórt sin agus nuair a bhíonn siad infheicthe, dá bhrí sin, do thríú páirtithe. Ba cheart d’infheisteoirí faisnéis leormhaith a fháil faoi na modheolaíochtaí is bonn leis na rátálacha ESG, ar faisnéis í ba cheart a nochtadh sa chumarsáid mhargaíochta. Dá bhrí sin, ba cheart don Rialachán seo na hoibleagáidí nochta a bhaineann le cumarsáid mhargaíochta a bhunaítear le Rialachán (AE) 2019/2088 ó Pharlaimint na hEorpa agus ón gComhairle (9) a chomhlánú freisin. Ba cheart an fhaisnéis chéanna a cheangal freisin ar aon ghnóthas airgeadais rialáilte eile san Aontas a nochtann rátáil ESG arna n-eisiúint ag an ngnóthas airgeadais rialáilte sin le tríú páirtí mar chuid dá chumarsáid mhargaíochta, ach amháin i gcás ina bhfuil sé faoi réir Rialachán (AE) 2019/2088. Ba cheart d’infheisteoirí, trí nasc chuig na nochtaí ar shuíomh gréasáin an ghnóthais airgeadais rialáilte san Aontas, an fhaisnéis chéanna a cheanglaítear ar sholáthraí rátála ESG de bhun phointe 1 d’Iarscríbhinn III den Rialachán seo, agus ábhar aon fhaisnéise arna nochtadh cheana ag rannpháirtithe sa mhargadh airgeadais agus comhairleoirí airgeadais de bhun Rialachán (AE) 2019/2088 á chur san áireamh. Ba cheart do ghnóthais airgeadais rialáilte eile san Aontas an fhaisnéis chéanna a nochtadh, agus na cineálacha éagsúla táirgí airgeadais, a saintréithe agus na difríochtaí eatarthu á gcur san áireamh, chomh maith leis an ngá atá le haon dúbláil faisnéise arna foilsiú cheana de bhun ceanglais rialála eile is infheidhme a sheachaint. Go ginearálta, ba cheart aon dúbláil ar cheanglais is infheidhme maidir le nochtadh a sheachaint. Agus an cuspóir céanna acu, ba cheart gnóthais airgeadais rialáilte san Aontas a eisíonn rátálacha ESG agus a ionchorpraíonn na rátálacha sin sna táirgí nó sna seirbhísí airgeadais a thairgeann siad do thríú páirtithe a eisiamh ó raon feidhme an Rialacháin seo.

(23)

Eagraíochtaí neamhbhrabúsacha a eisíonn rátálacha ESG chun críoch neamhthráchtála agus a fhoilsíonn na rátálacha sin saor in aisce, níor cheart a mheas go dtagann siad faoi raon feidhme an Rialacháin seo. Mar sin féin, ba cheart dóibh féachaint leis na ceanglais trédhearcachta a leagtar síos sa Rialachán seo a chomhtháthú i gcás inarb infheidhme. I gcás ina ngearrann eagraíochtaí neamhbhrabúis muirear ar mhíreanna rátáilte agus ar eisitheoirí míreanna rátáilte chun sonraí a thuairisciú nó rátáil a fháil trína n-ardán, nó i gcás ina ngearrann siad muirear ar úsáideoirí rátálacha ESG chun rochtain a fháil ar aon fhaisnéis faoi rátálacha ESG, ba cheart dóibh a bheith faoi réir cheanglais an Rialacháin seo.

(24)

Níor cheart do dhaoine nádúrtha, lena n-áirítear acadóirí agus iriseoirí, a fhoilsíonn agus a dháileann rátálacha ESG chun críoch neamhthráchtála teacht faoi raon feidhme an Rialacháin seo.

(25)

Chun measúnú a dhéanamh ar phróifíl ESG cuideachtaí, agus mar chuid dá bpróisis chinnteoireachta infheistíochta agus maoiniúcháin inbhuanaithe, braitheann institiúidí creidmheasa, gnólachtaí infheistíochta, gnóthais árachais agus gnóthais athárachais, i measc nithe eile, ar rátálacha ESG seachtracha agus ar tháirgí sonraí ESG seachtracha araon. Ba cheart freagracht a bheith ar institiúidí airgeadais i gcás líomhaintí i dtaobh an ghlas-snasaithe i dtaca lena dtáirgí airgeadais, agus níor cheart dáileadh faisnéise ESG faoi eintitis nó faoi tháirgí airgeadais, a bhraitheann ar mhodheolaíocht dílseánaigh nó bhunaithe, lena n-áirítear, i measc nithe eile, tacair sonraí maidir le hastaíochtaí agus sonraí maidir le conspóidí ESG, a chumhdach leis an Rialachán seo. Ba cheart don Choimisiún athbhreithniú a dhéanamh ar an Rialachán seo chun measúnú a dhéanamh i dtaobh an leor an raon feidhme arna shainaithint chun muinín infheisteoirí agus tomhaltóirí as feidhmíocht inbhuanaitheachta táirgí agus seirbhísí airgeadais a áirithiú. I gcás inar gá, ba cheart don Choimisiún cuimhneamh ar an tacar táirgí sonraí ESG agus soláthraithe táirgí sonraí ESG a chumhdaítear leis an Rialachán seo a leathnú.

(26)

Tá sé tábhachtach rialacha a leagan síos lena n-áiritheofar go mbeidh rátálacha ESG arna soláthar ag soláthraithe rátála ESG atá údaraithe san Aontas ar cháilíocht leormhaith, go mbeidh siad faoi réir ceanglais iomchuí, go n-aithnítear gur ann do shamhlacha gnó éagsúla leo, agus go n-áiritheofar sláine an mhargaidh leo. Bheadh feidhm ag na rialacha sin maidir le rátálacha ESG foriomlána lena léirítear fachtóirí comhshaoil, sóisialta agus rialachais, agus maidir le rátálacha lena ndéantar measúnú ach ar aon fhachtóir comhshaoil, sóisialta nó rialachais amháin nó ar fho-chomhpháirt d’fhachtóir den sórt sin. Ba cheart rátálacha comhshaoil (E), sóisialta (S) agus rialachais (G) ar leithligh a sholáthar seachas rátáil ESG aonair lena gcomhiomlánaítear fachtóirí E, S agus G. Má chinneann soláthraithe rátála ESG rátálacha comhiomlánaithe a sholáthar, ba cheart dóibh an ráta agus an t-ualach a dheonaítear do gach catagóir E, S agus G a nochtadh agus ba cheart dóibh an fhaisnéis sin a chur i láthair ar bhealach lena n-áirithítear gur féidir gach ceann de na catagóirí sin a chur i gcomparáid leis na cinn eile.

(27)

I bhfianaise úsáid rátálacha ESG ó sholáthraithe atá bunaithe lasmuigh den Aontas, agus chun sláine an mhargaidh, cosaint infheisteoirí agus forfheidhmiú cuí an Rialacháin seo a áirithiú, is gá ceanglais a thabhairt isteach bunaithe ar cé na soláthraithe rátála ESG atá bunaithe lasmuigh den Aontas a d’fhéadfadh a gcuid seirbhísí a thairiscint san Aontas. Dá bhrí sin, moltar trí chóras fhéideartha do sholáthraithe rátála ESG atá bunaithe lasmuigh den Aontas: coibhéis, formhuiniú agus aitheantas. Mar riail, ba cheart maoirseacht agus rialáil i dtríú tír a bheith coibhéiseach le maoirseacht agus rialáil an Aontais ar rátálacha ESG. Dá bhrí sin, maidir le rátálacha ESG a sholáthraíonn soláthraí rátála ESG atá bunaithe lasmuigh den Aontas agus údaraithe nó cláraithe mar sin i dtríú tír, níor cheart iad a thairiscint san Aontas ach amháin i gcás ina bhfuil cinneadh dearfach déanta ag an gCoimisiún maidir le coibhéis an chórais tríú tír. Chun aon drochthionchar a sheachaint mar thoradh ar scor tobann a d’fhéadfadh a bheith ann de rátálacha ESG arna soláthar ag soláthraí rátála ESG tríú tír atá bunaithe lasmuigh den Aontas a thairiscint, is gá foráil a dhéanamh maidir le córais áirithe eile, eadhon córais formhuiniúcháin agus aitheantais. Ba cheart d’aon soláthraí rátála ESG ag a bhfuil struchtúr grúpa a bheith in ann úsáid a bhaint as an gcóras formhuiniúcháin do rátálacha ESG arna bhforbairt lasmuigh den Aontas. Chun é sin a dhéanamh, ba cheart dó, laistigh den struchtúr grúpa, soláthraí rátála ESG údaraithe a bhunú san Aontas. Ba cheart don soláthraí rátála ESG údaraithe sin a áirithiú go gcomhlíonann eisiúint agus dáileadh rátálacha ESG formhuinithe ceanglais atá chomh dian céanna ar a laghad le ceanglais an Rialacháin seo. Ina theannta sin, ba cheart an saineolas is gá a bheith ag an soláthraí rátála ESG atá bunaithe san Aontas chun faireachán a dhéanamh go héifeachtach ar eisiúint agus dáileadh rátálacha ESG arna soláthar ag an soláthraí rátála ESG atá bunaithe lasmuigh den Aontas agus ba cheart cúis oibiachtúil a bheith ann leis an bhfáth a n-eisíonn soláthraí atá bunaithe lasmuigh den Aontas na rátálacha formhuinithe. Níor cheart an ceanglas maidir le léiriú ar chomhlíontacht leis an Rialachán seo a chruthú le haghaidh gach rátála ESG formhuinithe ar leith ach le haghaidh na modheolaíochtaí agus na nósanna imeachta foriomlána arna gcur chun feidhme ag an soláthraí rátála ESG. Maidir le soláthraithe rátála ESG a aicmítear mar ghnóthais bheaga nó mar ghrúpaí beaga de réir na gcritéar a leagtar síos i dTreoir 2013/34/AE (‘soláthraithe rátála ESG beaga’), ba cheart dóibh a bheith in ann tairbhe a bhaint as an gcóras aitheantais. I gcás ina bhfuil soláthraí ESG atá bunaithe lasmuigh den Aontas faoi réir maoirseacht i dtríú tír, ba cheart socruithe comhair iomchuí a chur i bhfeidhm chun malartú éifeachtúil faisnéise leis an údarás inniúil tríú tír ábhartha a áirithiú.

(28)

Baineann coincheap na bunaíochta le haon fhíorghníomhaíocht éifeachtach a fheidhmítear trí shocruithe cobhsaí. Agus cinneadh á dhéanamh an bhfuil bunaíocht i mBallstát ag eintiteas atá bunaithe lasmuigh den Aontas, is iomchuí breithniú a dhéanamh ar leibhéal cobhsaíochta na socruithe sin, ar fheidhmiú éifeachtach gníomhaíochtaí san Aontas, agus ar chineál sonrach na ngníomhaíochtaí agus na seirbhísí eacnamaíocha a chuirtear ar fáil.

(29)

Tá an tAontas ar cheann de na príomh-mhargaí le haghaidh rátálacha ESG. Tá sé ar cheann de na chéad dlínsí freisin le trédhearcacht agus sláine rátálacha ESG a rialáil. Ba cheart don Choimisiún leanúint de bheith ag obair le páirtithe idirnáisiúnta chun cóineasacht na rialacha a bhfuil feidhm acu maidir le soláthraithe rátála ESG a chothú.

(30)

Chun ardleibhéal muiníne a áirithiú i measc infheisteoirí agus tomhaltóirí as an margadh inmheánach, ba cheart a cheangal ar sholáthraithe rátála ESG a sholáthraíonn rátálacha ESG san Aontas a bheith údaraithe. Is gá, dá bhrí sin, coinníollacha comhchuibhithe a leagan síos maidir le húdarú den sórt sin agus leis an nós imeachta chun údarú den sórt sin a dheonú, diúltú dó, a chur ar fionraí nó a tharraingt siar. Ba cheart do sholáthraithe rátála ESG údaraithe fógra a thabhairt do ESMA faoi aon athruithe ábhartha ar na coinníollacha maidir lena n-údarú tosaigh gan moill mhíchuí. Áirítear le hathruithe ábhartha aon bhrainse a oscailt nó a dhúnadh laistigh den Aontas. Chun tuilleadh soiléireachta a chur ar fáil do sholáthraithe rátála ESG, ba cheart do ESMA a shonrú cad is athrú ábhartha ann trí threoirlínte chuige sin a eisiúint.

(31)

Chun ardleibhéal faisnéise a áirithiú d’infheisteoirí agus d’úsáideoirí eile rátálacha ESG, ba cheart faisnéis maidir le rátálacha ESG agus soláthraithe rátála ESG a chur ar fáil ar an bpointe rochtana aonair Eorpach (ESAP) arna bhunú le Rialachán (AE) 2023/2859 ó Pharlaimint na hEorpa agus ón gComhairle (10).

(32)

Chun cáilíocht agus iontaofacht rátálacha ESG a áirithiú, ba cheart do sholáthraithe rátála ESG modheolaíochtaí rátála a úsáid atá dian, córasach, neamhspleách, agus ar féidir údar cuí a thabhairt leo agus a bhfuil feidhm leanúnach leo agus ar bhealach trédhearcach. Ba cheart soláthraithe rátála ESG a spreagadh chun aghaidh a thabhairt ar an dá ghné de phrionsabal na hábharthachta dúbailte. Ba cheart do sholáthraithe rátála ESG athbhreithniú a dhéanamh ar mhodheolaíochtaí rátála ESG ar bhonn leanúnach agus ar a laghad uair sa bhliain, agus forbairtí Aontais agus idirnáisiúnta a dhéanann difear d’fhachtóirí E, S nó G á gcur san áireamh. Tá sé tábhachtach, áfach, é a fhágáil faoi sholáthraithe rátála ESG iad féin a modheolaíochtaí féin a chinneadh i gcomhréir leis na prionsabail sin.

(33)

Ba cheart do sholáthraithe rátála ESG faisnéis a nochtadh don phobal maidir leis na modheolaíochtaí, na samhlacha agus na príomhthoimhdí rátála a úsáideann na soláthraithe sin ina ngníomhaíochtaí rátála ESG agus i ngach ceann dá dtáirgí rátála ESG. I bhfianaise na n-úsáidí a bhaineann infheisteoirí as rátálacha ESG, ba cheart a nochtadh go soiléir sna táirgí rátála cén ghné de phrionsabal na hábharthachta dúbailte a dtugtar aghaidh uirthi leis an rátáil, eadhon, cibé an é an riosca airgeadais ábhartha don mhír rátáilte nó d’eisitheoir na míre rátáilte agus tionchar ábhartha na míre rátáilte nó eisitheoir na míre rátáilte ar an gcomhshaol agus ar an tsochaí i gcoitinne araon atá i gceist, nó an é nach dtugtar aghaidh ach ar cheann amháin díobh sin léi. Ba cheart do sholáthraithe rátála ESG a nochtadh go soiléir freisin an dtugtar aghaidh ar ghnéithe eile leis an rátáil. Ar an gcúis chéanna, ba cheart do sholáthraithe rátála ESG faisnéis níos mionsonraithe a sholáthar maidir leis na modheolaíochtaí, na samhlacha agus na príomhthoimhdí rátála d’úsáideoirí rátálacha ESG. Ba cheart go gcuirfeadh an fhaisnéis sin ar a gcumas d’úsáideoirí rátálacha ESG a ndícheall cuí féin a dhéanamh agus measúnú á dhéanamh acu i dtaobh ar cheart dóibh brath ar na rátálacha ESG sin. Níor cheart, áfach, go nochtfaí faisnéis íogair ghnó le nochtadh faisnéise a bhaineann le modheolaíochtaí, samhlacha agus príomhthoimhdí rátála ná go gcuirfí bac ar nuálaíocht. Ba cheart do sholáthraithe rátála ESG a nochtadh freisin an ndearna siad fachtóirí E, S, nó G, nó comhiomlánú díobh, an rátáil a thugtar do gach fachtóir ábhartha, agus an t-ualú a thugtar do gach ceann de na fachtóirí sin sa chomhiomlánú a chur san áireamh. Ba cheart do sholáthraithe rátála ESG teorainneacha na faisnéise atá ar fáil dóibh agus teorainneacha na modheolaíochta a úsáidtear a nochtadh freisin, amhail nuair nach ndéanann siad measúnú ach ar cheann amháin den dá ghné de phrionsabal na hábharthachta dúbailte nó nuair a shloinntear an rátáil ESG i luach coibhneasta nó i ndearbhluach. Ba cheart dóibh faisnéis a nochtadh freisin maidir le haon teagmháil fhéideartha le geallsealbhóirí na míre rátáilte nó le heisitheoir na míre rátáilte.

(34)

Chun leibhéal leordhóthanach cáilíochta a áirithiú, moltar cuspóirí an Aontais agus caighdeáin idirnáisiúnta le haghaidh gach fachtóra a chur san áireamh i rátálacha ESG. Mar sin, ba cheart do sholáthraithe rátála ESG faisnéis a sholáthar i dtaobh an gcuirtear san áireamh sa rátáil, i measc spriocanna agus cuspóirí eile, spriocanna agus cuspóirí comhaontuithe idirnáisiúnta ábhartha, lena n-áirítear na cinn sin a leagtar amach i gComhaontú Pháras a glacadh faoi Chreat-Choinbhinsiún na Náisiún Aontaithe ar an Athrú Aeráide (‘Comhaontú Pháras’) arna fhormheas ag an Aontas an 5 Deireadh Fómhair 2016 (11) le haghaidh fhachtóir E, comhlíonadh chroíchoinbhinsiúin na hEagraíochta Idirnáisiúnta Saothair maidir leis an gceart chun eagrúcháin agus chun cómhargála le haghaidh fhachtóir S, agus ailíniú le caighdeáin idirnáisiúnta maidir le himghabháil agus seachaint cánach le haghaidh fhachtóir G.

(35)

Is tionscnaimh reachtacha thábhachtacha iad Rialachán (AE) 2019/2088, Rialachán (AE) 2020/852 ó Pharlaimint na hEorpa agus ón gComhairle (12) agus Treoir (AE) 2022/2464 ó Pharlaimint na hEorpa agus ón gComhairle (13) chun infhaighteacht, cáilíocht agus comhsheasmhacht ceanglas ESG a fheabhsú ar fud shlabhra luacha iomlán na rannpháirtithe sa mhargadh airgeadais, lena rannchuidíter le feabhas a chur ar cháilíocht rátálacha ESG.

(36)

Níor cheart go gcuirfí isteach leis an Rialachán seo ar na modheolaíochtaí rátála ESG ná ar inneachar rátálacha ESG. Áirithítear le héagsúlacht i modheolaíochtaí soláthraithe rátála ESG gur féidir riachtanais leathana úsáideoirí rátálacha ESG a chomhlíonadh agus cuirtear an iomaíocht sa mhargadh chun cinn léi.

(37)

Cé gur cheart cead a bheith ag soláthraí rátála ESG úsáid a bhaint as ailíniú leis an tacsanomaíocht a leagtar amach i Rialachán (AE) 2020/852 mar fhachtóir ábhartha nó mar eochairtháscaire feidhmíochta ina mhodheolaíocht rátála, níor cheart rátálacha ESG laistigh de raon feidhme an Rialacháin seo a mheas mar lipéid ESG lena léirítear nó lena soláthraítear dearbhuithe comhlíontachta nó ailínithe le Rialachán (AE) 2020/852 nó le haon chaighdeáin eile.

(38)

Ba cheart do sholáthraithe rátála ESG a áirithiú go soláthraíonn siad rátálacha ESG atá neamhspleách, neamhchlaonta, córasach agus ar cháilíocht leormhaith. Tá sé tábhachtach ceanglais eagraíochtúla a thabhairt isteach chun cosc agus maolú ar choinbhleachtaí leasa a d’fhéadfadh a bheith ann a áirithiú. Chun neamhspleáchas soláthraithe rátála ESG a áirithiú, ba cheart dóibh cásanna coinbhleachta leasa a sheachaint agus coinbhleachtaí den sórt sin a bhainistiú go leormhaith i gcás nach féidir iad a sheachaint. Ba cheart do sholáthraithe rátála ESG coinbhleachtaí leasa a nochtadh go tráthúil. Ba cheart dóibh taifead a choinneáil freisin de gach bagairt mhór ar a neamhspleáchas agus ar neamhspleáchas a gcuid fostaithe agus daoine eile atá páirteach sa phróiseas rátála, agus de na coimircí a chuirtear i bhfeidhm chun na bagairtí sin a mhaolú. Ina theannta sin, chun coinbhleachtaí leasa a d’fhéadfadh a bheith ann a sheachaint, níor cheart cead a bheith ag soláthraithe rátála ESG roinnt gníomhaíochtaí eile a thairiscint ó laistigh den eintiteas céanna, lena n-áirítear seirbhísí comhairliúcháin, rátálacha creidmheasa, tagarmharcanna, gníomhaíochtaí infheistíochta, iniúchóireachta, gníomhaíochtaí institiúidí creidmheasa nó gníomhaíochtaí árachais agus athárachais. Ar deireadh, chun aon choinbhleacht leasa a chosc, a shainaithint, a chur as an áireamh nó a bhainistiú agus a nochtadh, agus chun cáilíocht, sláine agus críochnúlacht an phróisis rátála agus athbhreithnithe ESG a áirithiú i gcónaí, ba cheart do sholáthraithe rátála ESG beartais agus nósanna imeachta inmheánacha iomchuí a bhunú i ndáil le fostaithe agus daoine eile atá páirteach sa phróiseas rátála. Ba cheart, go háirithe, sásraí rialaithe inmheánaigh agus feidhm formhaoirseachta a bheith san áireamh le beartais agus nósanna imeachta den sórt sin.

(39)

Chun aghaidh a thabhairt ar rioscaí coinbhleachtaí leasa, ba cheart gur ó eintitis dhlíthiúla ar leithligh a dhéanfaí roinnt gníomhaíochtaí a thairiscint. D’fhéadfaí roinnt de na gníomhaíochtaí sin a thairiscint, áfach, ó laistigh den eintiteas dlíthiúil céanna i gcás ina bhfuil bearta agus nósanna imeachta leordhóthanacha i bhfeidhm ag an soláthraí rátála ESG lena mbaineann chun a áirithiú go bhfeidhmítear gach gníomhaíocht go neamhspleách agus chun cruthú coinbhleachtaí leasa a d’fhéadfadh a bheith ann sa chinnteoireacht laistigh dá ghníomhaíochtaí rátála ESG a sheachaint. Níor cheart é a bheith indéanta maolú den sórt sin a dhéanamh i gcás gníomhaíochtaí rátála creidmheasa ná i gcomhair gníomhaíochtaí iniúchóireachta agus comhairliúcháin. Áirítear ar ghníomhaíochtaí comhairliúcháin forbairt straitéisí inbhuanaitheachta agus straitéisí chun rioscaí nó tionchair inbhuanaitheachta a bhainistiú. Maidir leis an ngníomhaíocht a bhaineann le soláthar tagarmharcanna, ba cheart do ESMA measúnú a dhéanamh i dtaobh an bhfuil na bearta arna moladh ag an soláthraí rátála ESG iomchuí agus leordhóthanach maidir leis na rioscaí coinbhleachta leasa a d’fhéadfadh a bheith ann. Ba cheart a chur san áireamh i measúnú den sórt sin cibé an dtairgeann an riarthóir tagarmharcanna tagarmharcanna lena saothraítear cuspóirí inbhuanaitheachta agus go háirithe Tagarmharcanna Aistrithe Aeráide an Aontais agus Tagarmharcanna an Aontais atá ailínithe le Comhaontú Pháras i gcomhréir le Rialachán (AE) 2016/1011 ó Pharlaimint na hEorpa agus ón gComhairle (14).

(40)

Ba cheart do sholáthraithe rátála ESG a áirithiú maidir lena bhfostaithe agus daoine eile atá rannpháirteach sa phróiseas rátála, nach mbeidh siad rannpháirteach i rátáil ESG aon mhír rátáilte a chinneadh, ná nach mbeidh tionchar eile acu ar an gcinneadh sin, i gcás ina bhfuil aon fhianaise ann maidir le féin-athbhreithniú, féinleas, abhcóideacht nó eolas a eascraíonn as caidrimh airgeadais, pearsanta, gnó, fostaíochta nó eile idir na daoine sin agus an mhír rátáilte nó eisitheoir míre rátáilte, ar dá bharr a thiocfadh tríú páirtí oibiachtúil, réasúnach agus feasach, agus na coimircí a cuireadh i bhfeidhm á gcur san áireamh, ar an tátal go gcuirfí neamhspleáchas na ndaoine sin i mbaol. Más rud é, le linn na tréimhse ina bhfuil fostaithe soláthraithe rátála ESG nó daoine eile a bhfuil baint acu leis an bpróiseas rátála mar chuid de na gníomhaíochtaí measúnaithe, go gcumascann mír rátáilte nó eisitheoir míre rátáilte le heintiteas eile, nó go bhfaigheann sé eintiteas eile, ba cheart do na daoine sin, maidir le haon leas nó aon chaidreamh atá ann faoi láthair nó a bhí ann le déanaí a shainaithint agus a mheas, an leas nó caidreamh é, agus na coimircí atá ar fáil á gcur san áireamh, a d’fhéadfadh neamhspleáchas na ndaoine sin agus a gcumas leanúint de bheith rannpháirteach sna gníomhaíochtaí measúnaithe tar éis dháta éifeachtach an chumaisc nó na fála a chur i mbaol.

(41)

Chun tuilleadh soiléireachta a thabhairt agus chun muinín a fheabhsú maidir le hoibríochtaí soláthraithe rátála ESG, is gá ceanglais a leagan síos maidir le maoirseacht leanúnach ar sholáthraithe rátála ESG san Aontas. I bhfianaise na gcosúlachtaí suntasacha idir gníomhaíochtaí gníomhaireachtaí rátála creidmheasa agus gníomhaíochtaí soláthraithe rátála ESG, i bhfianaise dhlúthailíniú gaolmhar na ngnéithe lárnacha den chreat rialála do sholáthraithe rátála ESG leis an gcreat rialála le haghaidh gníomhaireachtaí rátála creidmheasa faoi Rialachán (CE) Uimh. 1060/2009 ó Pharlaimint na hEorpa agus ón gComhairle, (15) agus chun cur i bhfeidhm comhchuibhithe an Rialacháin seo chomh maith le maoirseacht aonfhoirmeach a áirithiú, moltar i bhfianaise an chinnidh a rinneadh faoi Rialachán (CE) Uimh. 1060/2009 maoirseacht a chur de chúram ar ESMA maoirseacht soláthraithe rátála ESG a chur de chúram ar ESMA. Cé go gcuirtear maoirseacht de chúram ar ESMA leis an Rialachán seo, ní fasach é sin agus níor cheart a thuiscint as go mbunaítear cleachtas nó beartas maidir le sannadh freagrachtaí maoirseachta san earnáil seirbhísí airgeadais.

(42)

Seachas a n-úsáid san earnáil seirbhísí airgeadais, úsáidtear rátálacha ESG freisin i gcomhthéacs an tsoláthair agus an tslabhra soláthair. Dá bhrí sin, agus maoirseacht á déanamh aige ar sholáthraithe rátála ESG, ba cheart do ESMA an t-idirdhealú idir soláthraithe rátála ESG in earnálacha seirbhísí airgeadais agus iad siúd in earnálacha seirbhísí neamhairgeadais a chur san áireamh.

(43)

Ba cheart do ESMA a bheith in ann an fhaisnéis uile is gá a éileamh chun a chúraimí maoirseachta a dhéanamh go héifeachtach. Dá bhrí sin, ba cheart dó a bheith in ann an fhaisnéis sin a éileamh ó sholáthraithe rátála ESG, ó dhaoine a bhfuil baint acu le gníomhaíochtaí rátála ESG, ó mhíreanna rátáilte agus eisitheoirí míreanna rátáilte, ó thríú páirtithe a ndearna soláthraithe rátála ESG feidhmeanna nó gníomhaíochtaí oibríochtúla a sheachfhoinsiú chucu, ó dhaoine a bhaineann nó atá nasctha go dlúth agus go substaintiúil ar shlí eile le soláthraithe rátála ESG nó le gníomhaíochtaí rátála ESG, agus ó ionadaithe dlíthiúla arna n-ainmniú faoin gcóras aitheantais.

(44)

Ba cheart do ESMA a bheith in ann a chúraimí maoirseachta a chomhlíonadh, agus go háirithe iallach a chur ar sholáthraithe rátála ESG deireadh a chur le sárú, faisnéis iomlán agus cheart a sholáthar, nó géilleadh d’imscrúdú nó do chigireacht ar an láthair. Chun a áirithiú go mbeidh sé in ann na cúraimí maoirseachta sin a dhéanamh, ba cheart do ESMA a bheith in ann fíneálacha agus íocaíochtaí pionósacha tréimhsiúla a fhorchur.

(45)

I bhfianaise an róil atá aige mar údarás an Aontais a dhéanann soláthraithe rátála ESG a údarú agus a dhéanann maoirseacht orthu, ba cheart do ESMA dréachtchaighdeáin theicniúla rialála a fhorbairt agus iad a chur faoi bhráid an Choimisiúin. Ba cheart do ESMA an fhaisnéis is gá le haghaidh údarú soláthraithe rátála ESG a shonrú a thuilleadh. Ba cheart é a thabhairt de chumhacht don Choimisiún na caighdeáin theicniúla rialála sin a ghlacadh trí bhíthin gníomhartha tarmligthe de bhun Airteagal 290 CFAE agus i gcomhréir le hAirteagail 10 go 14 de Rialachán (AE) Uimh. 1095/2010.

(46)

Agus soláthraithe rátála ESG á n-údarú agus maoirseacht á déanamh orthu ag ESMA, ba cheart dó a bheith in ann táillí maoirseachta a ghearradh ar eintitis faoi mhaoirseacht. Ba cheart na táillí sin a bheith comhréireach agus iomchuí do mhéid na soláthraithe rátála ESG agus do mhéid na maoirseachta a dhéantar orthu.

(47)

Chun gnéithe teicniúla breise den Rialachán seo a shonrú, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca le sonraíochtaí an nós imeachta lena bhforchuirtear fíneálacha nó íocaíochtaí pionósacha tréimhsiúla, lena n-áirítear forálacha maidir le cearta cosanta, forálacha ama, forálacha maidir le fíneálacha nó íocaíochtaí pionósacha tréimhsiúla a bhailiú, agus rialacha mionsonraithe maidir leis na tréimhsí teorann i dtaca le fíneálacha nó íocaíochtaí pionósacha tréimhsiúla a fhorchur agus a fhorfheidhmiú agus i leith chineál na dtáillí, na nithe a bhfuil táillí dlite ina leith, mhéid na dtáillí, agus an modh ina n-íocfar na táillí sin. Tá sé tábhachtach, go háirithe, go rachaidh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (16). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(48)

Is gá roinnt beart a bheith i bhfeidhm lena dtacaítear le soláthraithe rátála ESG beaga chun a chur ar a gcumas leanúint dá ngníomhaíochtaí, nó dul isteach sa mhargadh tar éis dháta chur i bhfeidhm an Rialacháin seo. I bhfianaise an mhéid sin, ba cheart córas sealadach a thabhairt isteach chun iontráil soláthraithe rátála ESG beaga sa mhargadh a éascú agus chun tacú le forbairt soláthraithe rátála ESG beaga atá ann cheana agus atá ag oibriú cheana féin san Aontas roimh theacht i bhfeidhm an Rialacháin seo. Faoin gcóras sealadach sin, ba cheart do sholáthraithe rátála ESG beaga clárú le ESMA, gan gá le húdarú a fháil chun oibriú san Aontas, agus níor cheart dóibh a bheith faoi réir ach forálacha an Rialacháin seo maidir le ceanglais eagraíochtúla agus trédhearcachta. Ba cheart an chumhacht a thabhairt do ESMA faisnéis a iarraidh, imscrúduithe ginearálta agus cigireachtaí ar an láthair a dhéanamh, agus bearta riaracháin a ghlacadh freisin. Ba cheart do ESMA a áirithiú go seachnófar rioscaí teacht timpeall maidir leis an Rialachán seo, go háirithe trí chosc a chur ar ghnóthais bheaga laistigh de ghrúpaí meánmhéide nó móra, de réir na gcritéar a leagtar síos i dTreoir 2013/34/AE, tairbhe a bhaint as an gcóras sealadach sin. A luaithe a thiocfaidh deireadh leis an gcóras sealadach sin, ba cheart do sholáthraithe rátála ESG beaga iarratas a dhéanamh ar údarú chun oibriú san Aontas agus tairbhe a bhaint as ceanglais rialachais chomhréireacha agus as táillí maoirseachta atá comhréireach le glanláimhdeachas bliantúil an tsoláthraí rátála ESG lena mbaineann.

(49)

I gcás ina lorgaíonn mír, eisitheoir míre nó infheisteoir rátáil ESG ó dhá sholáthraí rátála ESG ar a laghad, féadfaidh sé breithniú a dhéanamh ar sholáthraí rátála ESG amháin ar a laghad ag a bhfuil sciar den mhargadh le haghaidh gníomhaíochtaí rátála ESG nach mó ná 10 % san Aontas a cheapadh.

(50)

Ós rud é nach féidir leis na Ballstáit cuspóir an Rialacháin seo, eadhon córas comhsheasmhach agus éifeachtach a leagan síos chun aghaidh a thabhairt ar na heasnaimh agus na leochaileachtaí is féidir eascairt as rátálacha ESG, a ghnóthú go leordhóthanach, agus, de bharr fairsinge agus éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(51)

Tá feidhm ag an Rialachán seo gan dochar do chur i bhfeidhm Airteagail 101 agus 102 CFAE.

(52)

Thug Banc Ceannais na hEorpa a thuairim féintionscnaimh uaidh an 4 Deireadh Fómhair 2023,