(1)

Is cuid ríthábhachtach é an Creat um Chéannacht Dhigiteach Eorpach arna bhunú le Rialachán (AE) Uimh. 910/2014 chun éiceachóras céannachta digití atá slán agus idir-inoibritheach a bhunú ar fud an Aontais. Ós rud é gurb iad na Tiachóga Céannachta Digití Eorpaí (‘tiachóga’) bunchloch an chreata, is é is aidhm dó rochtain ar sheirbhísí ó Bhallstát go chéile a éascú, agus cosaint sonraí pearsanta agus príobháideachais á háirithiú an tráth céanna.

(2)

Tá feidhm ag Rialachán (AE) 2016/679 ó Pharlaimint na hEorpa agus ón gComhairle (2), nó Rialachán (AE) 2018/1725 ó Pharlaimint na hEorpa agus ón gComhairle (3) agus, i gcás inarb ábhartha, Treoir 2002/58/CE ó Pharlaimint na hEorpa agus ón gComhairle (4) maidir le gach gníomhaíocht próiseála sonraí pearsanta faoin Rialachán seo.

(3)

Le hAirteagal 5a(23) de Rialachán (AE) Uimh. 910/2014, tugtar sainordú don Choimisiún, i gcás inar gá, sonraíochtaí agus nósanna imeachta ábhartha a bhunú. Baintear é sin amach trí bhíthin ceithre Rialachán Cur Chun Feidhme, lena ndéileáiltear le prótacail agus comhéadain: Rialachán Cur Chun Feidhme (AE) 2024/2982 ón gCoimisiún (5), sláine agus croífheidhmiúlachtaí: Rialachán Cur Chun Feidhme (AE) 2024/2979 ón gCoimisiún (6), sonraí sainaitheantais duine agus ríomhdhearbhú tréithe: Rialachán Cur Chun Feidhme (AE) 2024/2977 ón gCoimisiún (7), mar aon leis na fógraí chuig an gCoimisiún: Rialachán Cur Chun Feidhme (AE) 2024/2980 (8). Leagtar síos leis an Rialachán seo na ceanglais ábhartha maidir le fógraí na mBallstát faoi eintitis iontaofa lena mbunaítear iontaofacht an Chreata um Chéannacht Dhigiteach Eorpach.

(4)

Déanann an Coimisiún measúnú tráthrialta ar theicneolaíochtaí, cleachtais, caighdeáin nó sonraíochtaí teicniúla nua. Chun an leibhéal comhchuibhithe is airde a áirithiú i measc na mBallstát maidir le forbairt agus deimhniú na dtiachóg, beidh na sonraíochtaí teicniúla a leagtar amach sa Rialachán seo ag brath ar an obair a rinneadh ar bhonn Mholadh (AE) 2021/946 ón gCoimisiún an 3 Meitheamh 2021 maidir le Bosca Coiteann Uirlisí de chuid an Aontais le haghaidh cur chuige comhordaithe i dtreo Creat Digiteach Eorpach (9) agus go háirithe an creat ailtireachta agus tagartha.I gcomhréir le hAithris 75 de Rialachán (AE) 2024/1183 ó Pharlaimint na hEorpa agus ón gComhairle (10), ba cheart don Choimisiún an Rialachán Cur Chun Feidhme seo a athbhreithniú agus a thabhairt cothrom le dáta, más gá, chun é a choimeád i gcomhréir le forbairtí domhanda, leis an gcreat ailtireachta agus tagartha, agus chun na dea-chleachtais ar an margadh inmheánach a leanúint.

(5)

Chun an cuspóir a chomhlíonadh maidir le foinse faisnéise thrédhearcach iontaofa a bhunú chun eintitis a fhíordheimhniú in éiceachóras na dTiachóg Céannachta Digití Eorpaí, amhail soláthraithe tiachóg, soláthraithe sonraí sainaitheantais duine agus páirtithe is úsáideoirí tiachóige, ba cheart do na Ballstáit fógra a thabhairt faoin bhfaisnéis is gá don chóras leictreonach arna sholáthar ag an gCoimisiún. I gcomhréir leis an gcur chuige a glacadh le Cinneadh Cur Chun Feidhme (AE) 2015/1984 ón gCoimisiún (11) lena sainítear na cúinsí, na formáidí agus na nósanna imeachta um fhógra a thabhairt faoi na scéimeanna ríomh-shainaitheantais is infheidhme maidir le modhanna ríomh-shainaitheantais, ba cheart do na Ballstáit faisnéis a sholáthar don Choimisiún i mBéarla. Ar an mbealach sin, tá tuairiscí ar scéimeanna ríomh-shainaitheantais ar fáil i mBéarla do gach scéim den sórt sin, gan beann ar cé acu a bhaineann nó nach mbaineann siad le modhanna ríomh-shainaitheantais nó le tiachóga.

(6)

Ar mhaithe leis an gcuspóir céanna foinsí faisnéise a bhunú lenar féidir eintitis in éiceachóras na dTiachóg Céannachta Digití Eorpaí a fhíordheimhniú, ba cheart don Choimisiún bonneagar a bhunú chun an fhaisnéis a chur ar fáil don phobal ar bhealach slán, inléite ag an duine, soiléir agus inrochtana go héasca, agus i bhfoirm ríomhshínithe nó ríomhshéalaithe a bheidh oiriúnach do phróiseáil uathoibrithe, lena n-áirítear trí chomhéadan feidhmchláir a chur ar fáil.

(7)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug an Maoirseoir tuairim an 30 Meán Fómhair 2024.

(8)

Tá na bearta dá bhforáiltear sa Rialachán seo i gcomhréir leis an tuairim ón gCoiste dá dtagraítear in Airteagal 48 de Rialachán (CE) Uimh. 910/2014,

(1)

na cláir leictreonacha a úsáideann Ballstát chun faisnéis a fhoilsiú maidir le páirtithe is úsáideoirí tiachóige atá cláraithe sa Bhallstát sin i gcomhréir le hAirteagal 5b(5) de Rialachán (AE) Uimh. 910/2014 (‘cláir na bpáirtithe is úsáideoirí tiachóige’), suíomh chláir na bpáirtithe is úsáideoirí tiachóige, agus sainaithint chláraitheoirí na bpáirtithe is úsáideoirí tiachóige;

(2)

céannacht na bpáirtithe cláraithe is úsáideoirí tiachóige;

(3)

barántúlacht agus bailíocht na n-aonad tiachóige;

(4)

sainaithint na soláthraithe tiachóg;

(5)

barántúlacht na sonraí sainaitheantais duine;

(6)

sainaithint soláthraithe sonraí sainaitheantais duine;

le tabhairt cothrom le dáta go tráthrialta chun iad a choimeád i gcomhréir le forbairtí teicneolaíochta agus caighdeán agus leis an obair a rinneadh ar bhonn Mholadh (AE) 2021/946, agus go háirithe an creat ailtireachta agus tagartha.

(1)

ciallaíonn ‘soláthraí tiachóg’ duine nádúrtha nó dlítheanach a sholáthraíonn réitigh tiachóige;

(2)

ciallaíonn ‘soláthraí sonraí sainaitheantais duine’ duine nádúrtha nó dlítheanach atá freagrach as sonraí sainaitheantais duine a eisiúint agus a chúlghairm agus as a áirithiú go mbeidh na sonraí sainaitheantais duine atá ag úsáideoir ceangailte go cripteagrafach d’aonad tiachóige;

(3)

ciallaíonn ‘páirtí is úsáideoir tiachóige’ páirtí is úsáideoir a bhfuil sé beartaithe aige brath ar aonaid tiachóige chun seirbhísí poiblí nó príobháideacha a sholáthar trí bhíthin idirghníomhaíocht dhigiteach;

(4)

ciallaíonn ‘clár na bpáirtithe is úsáideoirí tiachóige’ clár leictreonach a úsáideann Ballstát chun faisnéis maidir le páirtithe is úsáideoirí tiachóige atá cláraithe sa Bhallstát sin a chur ar fáil go poiblí mar a leagtar amach in Airteagal 5b(5) de Rialachán (AE) Uimh. 910/2014;

(5)

ciallaíonn ‘cláraitheoir páirtithe is úsáideoirí tiachóige’ an comhlacht atá freagrach as liosta na bpáirtithe cláraithe is úsáideoirí tiachóige atá bunaithe ina gcríoch agus atá ainmnithe ag Ballstát a bhunú agus a choinneáil ar bun;

(6)

ciallaíonn ‘aonad tiachóige’ cumraíocht uathúil de réiteach tiachóige lena n-áirítear áisc tiachóige, feidhmchláir chripteagrafacha shlána tiachóige agus gairis chripteagrafacha shlána tiachóige arna soláthar ag soláthraí tiachóg d’úsáideoir aonair tiachóige;

(7)

ciallaíonn ‘réiteach tiachóige’ teaglaim de bhogearraí, crua-earraí, seirbhísí, socruithe, agus cumraíochtaí, lena n-áirítear áisc tiachóige, feidhmchlár cripteagrafach slán tiachóige amháin nó níos mó agus gaireas cripteagrafach slán tiachóige amháin nó níos mó;

(8)

ciallaíonn ‘ásc tiachóige’ an feidhmchlár a shuiteáiltear agus a chumraítear ar ghaireas nó ar thimpeallacht úsáideora tiachóige, ar cuid d’aonad tiachóige é, agus a úsáideann úsáideoir na tiachóige chun idirghníomhú leis an aonad tiachóige;

(9)

ciallaíonn ‘feidhmchlár cripteagrafach slán tiachóige’ feidhmchlár lena mbainistítear sócmhainní criticiúla trína bheith nasctha leis na feidhmeanna cripteagrafacha agus neamh-chripteagrafacha a sholáthraíonn an gaireas cripteagrafach slán tiachóige agus trína n-úsáid;

(10)

ciallaíonn ‘gaireas cripteagrafach slán tiachóige’ gaireas crioscaíldíonach lena soláthraítear timpeallacht atá nasctha leis an bhfeidhmchlár cripteagrafach slán tiachóige agus a úsáideann sé chun sócmhainní criticiúla a chosaint agus chun feidhmeanna cripteagrafacha a sholáthar chun oibríochtaí criticiúla a fhorghníomhú ar bhealach slán;

(11)

ciallaíonn ‘sócmhainní criticiúla’ sócmhainní laistigh d’aonad tiachóige, nó i ndáil leis, a bhfuil tábhacht chomh neamhghnách sin ag baint leo go n-imreofaí tionchar an-tromchúiseach díblitheach ar an gcumas brath ar an aonad tiachóige i gcás ina gcuirfí infhaighteacht, rúndacht nó sláine na sócmhainní sin i mbaol;

(12)

ciallaíonn ‘úsáideoir tiachóige’ úsáideoir a bhfuil an t-aonad tiachóige faoina rialú;

(13)

ciallaíonn ‘soláthraí deimhnithe rochtana páirtí is úsáideoir tiachóige’ duine nádúrtha nó dlítheanach arna shainordú ag Ballstát chun deimhnithe rochtana páirtí is úsáideoir a eisiúint do pháirtithe is úsáideoirí tiachóige atá cláraithe sa Bhallstát sin;

(14)

ciallaíonn ‘deimhniú rochtana páirtí is úsáideoir tiachóige’ deimhniú le haghaidh ríomhshéalaí nó ríomhshínithe lena bhfíordheimhnítear agus lena mbailíochtaítear an páirtí is úsáideoir tiachóige arna eisiúint ag soláthraí deimhnithe rochtana páirtí is úsáideoir tiachóige.