(1)

An Comhaontú idir an Comhphobal Eorpach, de pháirt, agus Rialtas na Danmhairge agus Rialtas Baile Oileáin Fharó, den pháirt eile (‘an Comhaontú’), rinne an tAontas é a thabhairt i gcrích le Cinneadh 97/126/CE ón gComhairle (1) agus tháinig sé i bhfeidhm an 1 Eanáir 1997.

(2)

De bhun Airteagal 31 den Chomhaontú, féadfaidh an Comhchoiste, a bunaíodh faoin Airteagal sin (‘an Comhchoiste’) cinntí a dhéanamh sna cásanna dá bhforáiltear sa Chomhaontú.

(3)

Ag an gcéad chruinniú eile a bheidh aige, tá an Comhchoiste le cinneadh a dhéanamh lena mbunaítear na ceanglais ghinearálta maidir le cruthúnais tionscnaimh a eisítear go leictreonach.

(4)

Is iomchuí an seasamh atá le glacadh thar ceann an Aontais sa Chomhchoiste a bhunú ós rud é go mbeidh éifeachtaí dlíthiúla ag an gcinneadh ón gComhchoiste.

(5)

Thug an tAontas an Coinbhinsiún Réigiúnach maidir le rialacha tionscnaimh fabhracha Uile-Eora-Mheánmhara (‘an Coinbhinsiún’) i gcrích le Cinneadh 2013/94/AE ón gComhairle (2) agus tháinig sé i bhfeidhm i ndáil leis an Aontas an 1 Bealtaine 2012. Le Cinneadh (AE) 2019/2198 (3), thacaigh an Chomhairle leis an leasú ar an gCoinbhinsiún lena ndéantar foráil do thacar nua rialacha tionscnaimh nuachóirithe agus níos solúbtha (‘an leasú ar an gCoinbhinsiún’). Tiocfaidh an leasú ar an gCoinbhinsiún i bhfeidhm an 1 Eanáir 2025.

(6)

Ag an gcruinniú teicniúil a tionóladh sa Bhruiséil an 5 Feabhra 2020, chomhaontaigh tromlach na bPáirtithe Conarthacha sa Choinbhinsiún tacar malartach rialacha tionscnaimh a chur chun feidhme, bunaithe ar an leasú ar an gCoinbhinsiún ar bhonn déthaobhach idirthréimhseach (‘na Rialacha idirthréimhseacha’). Tá feidhm ag na Rialacha idirthréimhseacha i gcomhthráth le rialacha an Choinbhinsiúin, ar bhonn déthaobhach idirthréimhseach, go dtí go dtiocfaidh an leasú ar an gCoinbhinsiún i bhfeidhm.

(7)

Le cur i bhfeidhm na Rialacha idirthréimhseacha, áirithítear oiriúnú na sreafaí trádála agus na gcleachtas custaim go dtí go dtiocfaidh an leasú ar an gCoinbhinsiún i bhfeidhm.

(8)

Ó bhí an 1 Meán Fómhair 2021 ann, tá roinnt prótacal déthaobhach tagtha i bhfeidhm maidir le rialacha tionscnaimh idir roinnt Páirtithe Conarthacha sa Choinbhinsiún (4), rud a fhágann go bhfuil feidhm ag na Rialacha idirthréimhseacha go dtí go dtiocfaidh an leasú ar an gCoinbhinsiún i bhfeidhm. A mhéid a bhaineann le Ríocht na Danmhairge (‘an Danmhairg’) agus le hOileáin Fharó, cuireadh Prótacal 3 nua in ionad Phrótacal 3 a ghabhann leis an gComhaontú le Cinneadh Uimh. 1/2021 ó Chomhchoiste CE/an Danmhairg-Oileáin Fharó (5). Leagtar amach na Rialacha idirthréimhseacha i bhFoscríbhinn A a ghabhann leis an bPrótacal 3 nua sin.

(9)

Is iad an dá phríomhchuspóir atá ag na Rialacha idirthréimhseacha, ar an gcéad dul síos, foráil a dhéanamh do rialacha nach bhfuil chomh dian sin a thabhairt isteach chun é a dhéanamh níos éasca d’earraí cáiliú do stádas tionscnaimh fhabhraigh agus, ar an dara dul síos, úsáid cruthúnas tionscnaimh arna n-eisiúint go leictreonach agus/nó arna gcur isteach go leictreonach a chumasú.

(10)

Chomhaontaigh an tAontas de pháirt, agus an Danmhairg agus Oileáin Fharó, den pháirt eile, Airteagal 17(4) d’Fhoscríbhinn A a ghabhann le Prótacal 3 a ghabhann leis an gComhaontú a chur i bhfeidhm, a mhéid a bhaineann le cruthúnais tionscnaimh a eisítear go leictreonach. Dá bhrí sin, ba cheart creat ceanglas ginearálta maidir le cruthúnais tionscnaimh a eisítear go leictreonach a chinneadh.

(11)

Dá bhrí sin, ba cheart seasamh an Aontais sa Chomhchoiste a bheith bunaithe ar an dréachtchinneadh atá i gceangal leis seo,