(1)

An liosta d’úsáidí beartaithe le haghaidh beatha atá beartaithe chun críoch cothaitheach áirithe, liosta a bhunaítear le Rialachán (AE) 2020/354 ón gCoimisiún (2), féadfar é a thabhairt cothrom le dáta i gcomhréir leis na rialacha agus na nósanna imeachta a leagtar síos i Rialachán (CE) Uimh. 767/2009.

(2)

Fuair an Coimisiún iarratas i gcomhréir le hAirteagal 10 de Rialachán (CE) Uimh. 767/2009 chun an liosta d’úsáidí beartaithe a thabhairt cothrom le dáta trí 1,25-déhiodrocsacolacailciféaról glicisilithe ó eastóscán Solanum glaucophyllum a chur leis an úsáid chun na críche cothaithí áirithe ‘Laghdú ar an riosca fiabhrais bainne agus hipeacailcéime aisiomptómaí’. Rinneadh scrúdú ar an iarraidh sin agus an tuairim ón Údarás Eorpach um Shábháilteacht Bia (‘an tÚdarás’) maidir leis an mbreiseán beathaithe sin arna glacadh an 29 Meitheamh 2022 (3) á cur san áireamh, tuairim inar léiríodh go bhféadfadh 1,25-déhiodrocsacolacailciféaról glicisilithe ó eastóscán Solanum glaucophyllum, agus é a thabhairt tríd an mbéal in ábhar beatha comhlántach i bhfoirm bhólais i dtréimhse ó 9 lá roimh bhreith lao go dtí díreach roimh bhreith lao, hipeacailcéime i mba déiríochta a chosc nuair a thugtar é mar a rinneadh sna staidéir ar ainmhithe a ndearnadh meastóireacht orthu. Sna staidéir sin, comhlánaíodh an bólas le hábhar beatha ina raibh leibhéil iomchuí chailciam agus mhaignéisiam.

(3)

Fuair an Coimisiún iarratas eile i gcomhréir le hAirteagal 10 de Rialachán (CE) Uimh. 767/2009 chun an liosta d’úsáidí beartaithe a thabhairt cothrom le dáta trí athrú a dhéanamh ar na coinníollacha a bhaineann leis an úsáid bheartaithe le haghaidh beatha atá beartaithe chun na críche cothaithí áirithe ‘Laghdú ar an riosca fiabhrais bainne agus hipeacailcéime aisiomptómaí’, is é sin modhnú a dhéanamh ar na saintréithe cothaitheacha fíor-riachtanacha atá nasctha leis an difríocht idir caitiain agus ainiain chothaithe, trí luachana diúltacha a thabhairt isteach le haghaidh na cothromaíochta caitian-ainian sa cholún ‘Saintréithe cothaitheacha fíor-riachtanacha’. Sa liosta d’úsáidí beartaithe atá ann faoi láthair, bunaítear an DCAC mar raon deimhneach idir níos mó ná nialas agus faoi bhun 100. Bheartaigh an t-iarratasóir luach diúltach DCAC a áireamh sna saintréithe cothaitheacha fíor-riachtanacha. Ciallaíonn sé sin go bhféadfadh an leibhéal ian diúltach (ainiain) a bheith níos airde ná an leibhéal ian deimhneach (caitiain). Leis an athrú atá beartaithe is féidir an pH i bhfual an ainmhí a laghdú, rud a spreagann eisfhearadh cailciam san fhual agus a laghdaíonn an tiúchan chailciam sa séiream i bhfuil an ainmhí. Le laghdú na tiúchana cailciam sa séiream spreagtar tál an hormóin pharaitíoróidigh, rud a mhéadaíonn scaoileadh cailciam ó na cnámha agus a ghníomhaíonn vitimín D sa duán (rud a fhágann go bhfeabhsaítear ionsú cailciam sa chonair ghastraistéigeach). Thairis sin, bíonn de thoradh ar an DCAC diúltach go méadaítear iontógáil beatha na spriocainmhithe.

(4)

Chuir an Coimisiún an dá iarratas, lena n-áirítear na sainchomhaid, ar fáil do na Ballstáit.

(5)

Sa mheasúnú ar an iarratas maidir leis an modhnú ar na saintréithe cothaitheacha fíor-riachtanacha atá nasctha leis an DCAC, agus sa mheasúnú ar an iarratas maidir le 1,25-déhiodrocsacolacailciféaról glicisilithe ó eastóscán Solanum glaucophyllum, arna thabhairt mar a rinneadh sna staidéir ar ainmhithe a ndearnadh meastóireacht orthu, a chur leis an liosta d’úsáidí beartaithe, léirítear go gcomhlíonann comhdhéanamh sonrach an dá ábhar beatha lena mbaineann an chríoch chothaitheach áirithe atá beartaithe agus nach bhfuil éifeachtaí díobhálacha acu ar shláinte ainmhithe, ar shláinte an duine, ar an gcomhshaol ná ar leas ainmhithe.

(6)

I bhfianaise an mhéid thuas, is iomchuí an liosta d’úsáidí beartaithe le haghaidh beatha atá beartaithe chun críoch cothaitheach áirithe, liosta a bhunaítear le Rialachán (AE) 2020/354 ón gCoimisiún, a thabhairt cothrom le dáta a mhéid a bhaineann leis an gcríoch chothaitheach áirithe ‘Laghdú ar an riosca fiabhrais bainne agus hipeacailcéime aisiomptómaí’.

(7)

Dá bhrí sin, ba cheart Rialachán (AE) 2020/354 a leasú dá réir.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,