(1)

Tá ról lárnach ag ceanglais tuairiscithe chun faireachán cuí ar an reachtaíocht agus forfheidhmiú ceart ghníomhartha dlí an Aontais a áirithiú. Tá sé tábhachtach, áfach, ceanglais den sórt sin a chuíchóiriú chun a áirithiú go gcomhlíonfaidh siad an cuspóir dár beartaíodh iad agus chun an t-ualach riaracháin a theorannú.

(2)

Dá bhrí sin, is tosaíocht é oibleagáidí tuairiscithe a chuíchóiriú agus an t-ualach riaracháin a laghdú. I Rialacháin (AE) Uimh. 1379/2013 (3), (AE) Uimh. 167/2013 (4) agus (AE) Uimh. 168/2013 (5) ó Pharlaimint na hEorpa agus ón gComhairle tá roinnt ceanglas tuairiscithe i réimsí na gcaighdeán margaíochta agus an fhaireachais margaidh ar cheart iad a shimpliú i gcomhréir le teachtaireacht ón gCoimisiún an 16 Márta 2023 dar teideal ‘Iomaíochas fadtéarmach an Aontais Eorpaigh: níos faide ar aghaidh ná 2030’.

(3)

Leis an Rialachán seo, déantar ceanglais tuairiscithe a dhíchur agus a shimpliú nach meastar a bheith riachtanach a thuilleadh i réimse chomheagrú na margaí i dtáirgí iascaigh agus dobharshaothraithe agus a dhéanann difear do thionscal na hiascaireachta agus i réimse an chineálcheadaithe agus an fhaireachais margaidh ar fheithiclí talmhaíochta agus foraoiseachta, ar fheithiclí dhá agus trí roth agus ar chuadrothair.

(4)

Le Rialachán (AE) Uimh. 1379/2013, foráiltear go bhfuil na rialacha lena mbunaítear comhchaighdeáin mhargaíochta, go háirithe na rialacha sin a leagtar síos, inter alia, i Rialachán (CE) Uimh. 2406/96ón gComhairle (6) le leanúint d’fheidhm a bheith acu.

(5)

Ceanglaítear le hAirteagal 13 de Rialachán (CE) Uimh. 2406/96 ar gach Ballstát liosta a sholáthar do na Ballstáit eile agus don Choimisiún d’ainmneacha agus seoltaí na saineolaithe agus na n-eagraíochtaí trádála arna gceapadh chun na táirgí iascaigh a ghrádú le haghaidh úire agus méide tráth nach déanaí ná mí amháin roimh theacht i bhfeidhm an Rialacháin sin, agus na Ballstáit eile agus an Coimisiún a chur ar an eolas ina dhiaidh sin faoi aon leasuithe ar an liosta. Ós rud é go bhfuil an ceanglas sin as dáta agus nach bhfuil sé riachtanach a thuilleadh chun cuspóirí Rialachán (AE) Uimh. 1379/2013 a ghnóthú, níor cheart feidhm a bheith aige a thuilleadh.

(6)

Leagtar amach i Rialachán (AE) Uimh. 167/2013 na rialacha maidir le formheas agus faireachas margaidh ar fheithiclí talmhaíochta agus foraoiseachta.

(7)

Ceanglaítear le hAirteagail 74 agus 75 de Rialachán (AE) Uimh. 167/2013 ar na Ballstáit an Coimisiún a chur ar an eolas faoi chur i bhfeidhm na nósanna imeachta cineálcheadaithe agus na gceaduithe aonair feithiclí faoi seach, agus ceanglaítear ar an gCoimisiún tuarascálacha a chur faoi bhráid Pharlaimint na hEorpa agus na Comhairle. In 2022, rinne an Coimisiún staidéar ar na hábhair atá faoi réir na n-oibleagáidí faisnéise agus tuairiscithe sin. Ós rud é gur cinneadh sa staidéar sin go bhfuil na nósanna imeachta cineálcheadaithe agus na ceaduithe aonair feithiclí sásúil, níor cheart feidhm a bheith ag na hoibleagáidí faisnéise agus tuairiscithe sin a thuilleadh.

(8)

Leagtar amach i Rialachán (AE) Uimh. 168/2013 na rialacha maidir le ceadú agus le faireachas margaidh ar fheithiclí dhá nó trí roth agus cuadrothair.

(9)

Ceanglaítear le hAirteagail 78 agus 80 de Rialachán (AE) Uimh. 168/2013 ar na Ballstáit an Coimisiún a chur ar an eolas faoi chur i bhfeidhm na nósanna imeachta cineálcheadaithe agus na gceaduithe aonair feithiclí faoi seach, agus ceanglaítear ar an gCoimisiún tuarascálacha a chur faoi bhráid Pharlaimint na hEorpa agus na Comhairle. In 2022, rinne an Coimisiún staidéar ar na hábhair atá faoi réir na n-oibleagáidí faisnéise agus tuairiscithe sin. Ós rud é gur cinneadh sa staidéar go bhfuil na nósanna imeachta cineálcheadaithe agus na ceaduithe aonair feithiclí sásúil, níor cheart feidhm a bheith ag na hoibleagáidí faisnéise agus tuairiscithe sin a thuilleadh.

(10)

Ós rud é nach féidir leis na Ballstáit cuspóir an Rialacháin seo, eadhon na ceanglais tuairiscithe a leagtar síos i Rialacháin (AE) Uimh. 1379/2013, (AE) Uimh. 167/2013 agus (AE) Uimh. 168/2013 a chuíchóiriú, a ghnóthú go leordhóthanach ach gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(11)

Ba cheart, dá bhrí sin, Rialacháin (AE) Uimh. 1379/2013, (AE) Uimh. 167/2013 agus (AE) Uimh. 168/2013 a leasú dá réir,

(1)

scriostar Airteagal 74;

(2)

scriostar Airteagal 75.

(1)

scriostar Airteagal 78;

(2)

scriostar Airteagal 80.