(1)

Tá roinnt leasuithe le déanamh ar Threoir 98/71/CE ó Pharlaimint na hEorpa agus ón gComhairle (3). Ar mhaithe le soiléireacht, ba cheart an Treoir sin a athmhúnlú.

(2)

Le Treoir 98/71/CE, rinneadh comhchuibhiú ar phríomhfhorálacha de dhlí substainteach na mBallstát maidir le dearaí a measadh, tráth a nglactha, gurbh iad a rinne an difear ba dhírí d’fheidhmiú an mhargaidh inmheánaigh trí bhac a chur ar shaorghluaiseacht earraí agus ar an tsaoirse chun seirbhísí a sholáthar san Aontas.

(3)

Bíonn an chosaint dearaí i ndlí náisiúnta na mBallstát ann i gcomhthráth leis an gcosaint atá ar fáil ar leibhéal an Aontais trí dhearaí de chuid an Aontais Eorpaigh (‘dearaí AE’) a mbaineann gné aonadach leo agus atá bailí ar fud an Aontais mar a leagtar síos i Rialachán (CE) Uimh. 6/2002 ón gComhairle (4). Tá comhthráthacht agus cothromaíocht na gcóras cosanta dearaí ar leibhéal an Aontais agus ar an leibhéal náisiúnta ina mbunchloch den chur chuige atá ag an Aontas maidir le maoin intleachtúil a chosaint.

(4)

I gcomhréir lena Theachtaireacht an 19 Bealtaine 2015 dar teideal Better regulation for better results – An EU agenda [Rialáil níos fearr ar mhaithe le torthaí níos fearr – clár oibre de chuid an Aontais] agus lena ghealltanas athbhreithniú tráthrialta a dhéanamh ar bheartais an Aontais, rinne an Coimisiún meastóireacht fhairsing ar na córais cosanta dearaidh san Aontas, lenar ghabh measúnú cuimsitheach eacnamaíoch agus dlíthiúil, agus ar thacaigh sraith staidéar leis.

(5)

Sna conclúidí uaithi an 10 Samhain 2020 maidir leis an mbeartas maoine intleachtúla agus an t-athbhreithniú ar an gcóras dearaí tionsclaíocha san Aontas, d’iarr an Chomhairle ar an gCoimisiún tograí a thíolacadh le haghaidh athbhreithniú ar Rialachán (CE) Uimh. 6/2002 agus ar Threoir 98/71/CE. Iarradh an t-athbhreithniú mar gheall ar an ngá atá ann córais dearaí tionsclaíocha a nuachóiriú agus cosaint dearaí a dhéanamh níos tarraingtí do dhearthóirí aonair agus gnólachtaí aonair, go háirithe fiontair bheaga agus mheánmhéide (FBManna). Go háirithe, iarradh an t-athbhreithniú sin chun aghaidh a thabhairt ar leasuithe arbh éard ab aidhm dóibh tacú leis an gcaidreamh comhlántach idir córais cosanta dearaí an Aontais agus na córais cosanta dearaí náisiúnta agus réigiúnacha, agus an caidreamh comhlántach sin a neartú, agus bainfidh iarrachtaí breise leis chun réimsí dibhéirseachta laistigh den chóras cosanta dearaí san Aontas a laghdú.

(6)

Bunaithe ar thorthaí deiridh na meastóireachta sin, d’fhógair an Coimisiún, ina theachtaireacht an 25 Samhain 2020 dar teideal Making the most of the EU’s innovative potential. An intellectual property action plan to support the EU’s recovery and resilience [An leas is fearr is féidir a bhaint as acmhainneacht nuálaíochta an Aontais Eorpaigh. Plean gníomhaíochta um maoin intleachtúil chun tacú le téarnamh agus athléimneacht an Aontais], go ndéanfadh sé, tar éis athchóiriú rathúil a dhéanamh ar reachtaíocht an Aontais maidir le trádmharcanna, athbhreithniú ar reachtaíocht an Aontais maidir le cosaint dearaí, chun an córas a shimpliú agus é a dhéanamh níos inrochtana agus níos éifeachtúla, agus chun an creat rialála a thabhairt cothrom le dáta i bhfianaise na bhforbairtí i ndáil le teicneolaíochtaí nua ar an margadh.

(7)

Sa rún uaithi an 11 Samhain 2021 maidir le plean gníomhaíochta um maoin intleachtúil chun tacú le téarnamh agus athléimneacht an Aontais (5), chuir Parlaimint na hEorpa in iúl gur gheal léi ullmhacht an Choimisiúin reachtaíocht an Aontais maidir le cosaint dearaí a nuachóiriú chun tacú níos fearr leis an aistriú chuig an ngeilleagar digiteach, inbhuanaithe agus glas, d’iarr sí ar an gCoimisiún na nósanna imeachta maidir le cur i bhfeidhm agus neamhbhailíochtú sna Ballstáit a chomhchuibhiú a thuilleadh, agus mhol sí go ndéanfaí machnamh ar Threoir 98/71/CE agus Rialachán (CE) Uimh. 6/2002 a ailíniú chun deimhneacht dhlíthiúil níos fearr a chruthú. Sa rún sin, luaigh Parlaimint na hEorpa freisin gur cheart córas cosanta dearaí an Aontais a ailíniú le córas trádmharcanna an Aontais ionas go mbeidh sealbhóirí dearaidh in ann cosc a chur ar earraí a sháraíonn dearadh teacht isteach i gcríoch chustaim an Aontais agus d’iarr sí ar an gCoimisiún a chur ar chumas úinéirí branda stop a chur le dearadh góchumtha atá ar idirthuras tríd an Aontas. Thug sí dá haire freisin nach ndearnadh ach comhchuibhiú páirteach ar chosaint dearaí le haghaidh páirteanna a úsáidtear chun táirgí casta a dheisiú agus go raibh ilroinnt agus éiginnteacht dhlíthiúil sa mhargadh inmheánach mar thoradh air sin.

(8)

Léiríodh le comhairliúchán agus meastóireacht a rinne an Coimisiún go bhfuil, d’ainneoin an chomhchuibhithe a rinneadh roimhe seo ar dhlíthe náisiúnta, réimsí ann fós ina bhféadfadh tuilleadh comhchuibhithe tionchar dearfach a imirt ar iomaíochas agus fás, go háirithe, maidir leis an inrochtaineacht mhéadaithe a bheadh ag FBManna ar an gcóras cosanta dearaí.

(9)

Chun margadh inmheánach dea-fheidhmiúil a áirithiú, agus chun éascú a dhéanamh, i gcás inarb iomchuí, ar chearta dearaidh san Aontas a fháil, a riar agus a chosaint ar mhaithe le fás agus iomaíochas gnólachtaí laistigh den Aontas, go háirithe FBManna, agus leasanna tomhaltóirí á gcur san áireamh, is gá comhfhogasú na ndlíthe a bhaintear amach le Treoir 98/71/CE a leathnú chuig gnéithe eile den dlí substainteach maidir le dearaí lena rialaítear dearaí a chosnaítear trí chlárú de bhun Rialachán (CE) Uimh. 6/2002.

(10)

Thairis sin, is gá rialacha nós imeachta a chomhfhogasú freisin chun fáil, riar agus cosaint cearta dearaidh san Aontas a éascú. Dá bhrí sin, ba cheart príomhrialacha nós imeachta áirithe i réimse an chlárúcháin dearaidh a ailíniú sna Ballstáit agus i gcóras dearaí an Aontais. A mhéid a bhaineann le nósanna imeachta faoin dlí náisiúnta, is leor prionsabail ghinearálta a leagan síos, lena bhfágfar na Ballstáit saor chun rialacha níos sonraí a bhunú.

(11)

Ní eisiatar leis an Treoir seo go mbeidh feidhm maidir le dearaí ag dlí lena bhforáiltear do chosaint cé is moite den chosaint a thugtar le clárú nó foilsiú mar dhearadh, mar shampla dlí an Aontais a bhaineann le cearta dearaidh neamhchláraithe nó dlí de chuid an Aontais nó dlí náisiúnta a bhaineann le trádmharcanna, paitinní agus cuspaí áisiúlachta, iomaíocht éagórach nó dliteanas sibhialta.

(12)

Tá sé tábhachtach an prionsabal maidir le carnadh na cosanta faoi dhlí sonrach um chosaint dearaí cláraithe agus faoi dhlí an chóipchirt a bhunú, ar dá réir ba cheart dearaí a chosnaítear le cearta dearaidh a bheith incháilithe freisin chun a bheith cosanta mar shaothair chóipchirt, ar choinníoll go gcomhlíontar ceanglais an dlí cóipchirt.

(13)

Ceanglaítear le gnóthú chuspóirí an mhargaidh inmheánaigh go mbeidh na coinníollacha maidir le ceart dearaidh chláraithe a fháil comhchuibhithe sna Ballstáit uile. Chuige sin is gá sainmhínithe aonadacha a leagan síos ar choincheapa an dearaidh agus an táirge, ar sainmhínithe iad atá soiléir, trédhearcach, agus cothrom le dáta ó thaobh na teicneolaíochta de agus teacht chun cinn dearaí nua nach n-ionchorpraítear i dtáirgí fisiceacha á chur san áireamh. Gan rún ann liosta uileghabhálach a dhéanamh de liosta na dtáirgí ábhartha, is iomchuí idirdhealú a dhéanamh idir táirgí a ionchorpraítear i réad fisiceach, táirgí a léirshamhlaítear i ngrafaic, nó táirgí atá soiléir ó leagan amach spásúil na n-ítimí atá beartaithe chun timpeallacht inmheánach nó seachtrach a chruthú. Sa chomhthéacs sin, ba cheart a aithint gur féidir le beochan, amhail gluaiseacht nó aistriú gnéithe táirge, cur leis an gcuma atá ar dhearaí, go háirithe dearaí nach bhfuil corpraithe i réad fisiceach. Thairis sin, is gá sainmhíniú aonadach a thabhairt ar na ceanglais maidir le húrnuacht agus gné shainiúil ba cheart do chearta dearaidh chláraithe a chomhlíonadh.

(14)

Chun saorghluaiseacht earraí a éascú, is gá a áirithiú i bprionsabal go dtabharfaidh cearta dearaidh chláraithe cosaint choibhéiseach don sealbhóir cirt sna Ballstáit uile.

(15)

Is trí chlárú dearaidh a thugtar cosaint don sealbhóir cirt maidir leis na gnéithe dearaí sin de tháirge, ina iomláine nó i bpáirt, atá le feiceáil go soiléir in iarratas ar dhearadh mar sin a chlárú agus a chuirtear ar fáil don phobal tríd an gcomhad ábhartha a bhaineann leis an iarratas a fhoilsiú nó a cheadú.

(16)

Cé is moite de bheith le feiceáil go soiléir san iarratas ar chlárú, ní gá do ghnéithe dearaidh táirge a bheith le feiceáil in aon tráth sonrach nó in aon chás úsáide shonrach chun go mbainfidís tairbhe as cosaint dearaí. Mar eisceacht ón bprionsabal sin, níor cheart cosaint a leathnú chuig na comhpháirteanna sin nach mbíonn le feiceáil le linn gnáthúsáid táirge chasta, ná chuig na gnéithe sin de pháirt mar sin nach mbíonn le feiceáil nuair atá an pháirt suite, nó nach gcomhlíonann, astu féin, na ceanglais maidir le húrnuacht agus gné shainiúil. Dá bhrí sin, níor cheart na gnéithe dearaí sin de chuid comhpháirteanna táirgí casta a eisiatar ón gcosaint ar na cúiseanna sin a chur san áireamh chun a mheasúnú an gcomhlíonann gnéithe eile den dearadh na ceanglais maidir le cosaint.

(17)

Cé gur cheart tásc na dtáirgí a bheith mar chuid d’iarratas ar chlárú dearaidh, níor cheart dó difear a dhéanamh do raon feidhme chosaint an dearaidh ann féin. In éineacht le léiriú an dearaidh, is féidir tásca na dtáirgí a úsáid chun cineál an táirge ina n-ionchorpraítear an dearadh nó ar ina leith a bhfuil sé beartaithe iad a chur i bhfeidhm a chinneadh. Thairis sin, le tásca na dtáirgí, feabhsaítear inchuardaitheacht dearaí i gclár na ndearaí arna gcoinneáil ag oifig maoine tionsclaíche agus méadaítear trédhearcacht agus inrochtaineacht cláir. Dá bhrí sin, roimh chlárú, ní mór do thásca na dtáirgí a bheith cruinn, gan ualach míchuí a chur ar iarratasóirí ar dhearadh cláraithe.

(18)

Ba cheart an measúnú maidir le cibé acu an bhfuil nó nach bhfuil gné shainiúil ag dearadh a bheith bunaithe ar cibé acu an bhfuil difríochtaí ann idir an bhraistint fhoriomlán a mhúsclaítear san úsáideoir eolach a amharcann ar an ndearadh agus an bhraistint a mhúsclaítear san úsáideoir sin nuair a amharcann an t-úsáideoir sin ar aon dearadh eile atá mar chuid den chorpas dearaí atá ann faoi láthair; leis an measúnú sin, ba cheart a chur san áireamh cineál an táirge ar a gcuirtear an dearadh i bhfeidhm nó ina n-ionchorpraítear an dearadh, agus go háirithe an earnáil tionsclaíochta lena mbaineann sé agus méid na saoirse a bhí ag an dearthóir agus an dearadh á fhorbairt aige.

(19)

Níor cheart a chur isteach ar nuálaíocht theicneolaíoch trí chosaint dearaí a dheonú do dhearaí nach bhfuil iontu ach gnéithe nó an socrú gnéithe a rialaítear trí fheidhmiú teicniúil amháin. Tuigtear nach gciallaíonn sé sin gur gá mianach aeistéitiúil a bheith ag dearadh. D’fhéadfaí a dhearbhú go bhfuil ceart dearaidh chláraithe neamhbhailí i gcás nach raibh ról ag aon chúinsí seachas an gá go gcomhlíonfadh an táirge sin feidhm theicniúil, go háirithe iad siúd a bhaineann leis an ngné amhairc, i rogha na ngnéithe a bhaineann le cuma.

(20)

Ar an gcaoi chéanna, níor cheart a chur isteach ar idir-inoibritheacht cineálacha éagsúla táirgí trí chosaint a leathnú go dtí dearadh feisteas meicniúil.

(21)

Mar sin féin, féadann feistis mheicniúla de tháirgí modúlacha a bheith ina ngné thábhachtach de shaintréithe nuálacha táirgí modúlacha agus is mórshócmhainn mhargaíochta iad agus, dá bhrí sin, ba cheart iad a bheith incháilithe do chosaint.

(22)

Níor cheart feidhm a bheith ag ceart dearaidh maidir le dearadh atá in aghaidh an bheartais phoiblí nó na moráltachta poiblí a bhfuil glacadh leo go forleathan. An treoir seo, ní comhchuibhiú í ar choincheapa náisiúnta an bheartais phoiblí ná ar phrionsabail na moráltachta a bhfuil glacadh leo go forleathan.

(23)

Tá sé riachtanach d’fheidhmiú rianúil an mhargaidh inmheánaigh an téarma cosanta a thugtar le cearta dearaidh chláraithe a aontú.

(24)

Tá an Treoir seo gan dochar do chur i bhfeidhm na rialacha iomaíochta faoi Airteagail 101 agus 102 den Chonradh ar Fheidhmiú an Aontais Eorpaigh.

(25)

Ar chúiseanna deimhneachta dlíthiúla, ba cheart na forais shubstainteacha chun iarratais ar chlárú a dhiúltú agus na forais shubstainteacha le neamhbhailíocht an dearaidh chláraithe i ngach Ballstát a liostú go huileghabhálach sa Treoir seo.

(26)

Chun úsáid mhíchuí siombailí a chosc a bhfuil leas ar leith ag an bpobal iontu i mBallstát, seachas na siombailí sin dá dtagraítear in Airteagal 6ter den Choinbhinsiún chun Maoin Tionscail a Chosaint a síníodh i bPáras an 20 Márta 1883 (Coinbhinsiún Pháras), ba cheart an tsaoirse a bheith ag na Ballstáit foráil a dhéanamh d’fhorais shonracha le haghaidh neamh-inchláraitheachta. Chun clárú míchuí agus míleithreasú gnéithe a bhaineann leis an oidhreacht chultúrtha ar cuid den leas náisiúnta iad a chosc, ba cheart an tsaoirse a bheith ag na Ballstáit freisin foráil a dhéanamh d’fhorais shonracha le haghaidh neamh-inchláraitheachta agus neamhbhailíochta. Ar na gnéithe sin den oidhreacht chultúrtha, arna meas de réir bhrí an Choinbhinsiúin maidir leis an oidhreacht dhomhanda, chultúrtha agus nádúrtha a chosaint a ghlac Comhdháil Ghinearálta Unesco an 16 Samhain 1972, nó, a mhéid is léiriú inláimhsithe iad ar oidhreacht chultúrtha dholáimhsithe, de réir bhrí an Choinbhinsiúin maidir le caomhnú na hoidhreachta cultúrtha doláimhsithe, a ghlac Comhdháil Ghinearálta Unesco ag an 32ú seisiún dá cuid an 17 Deireadh Fómhair 2003, áirítear, mar shampla, séadchomharthaí nó grúpa foirgneamh, déantáin, lámhcheardaíocht nó éadaí.

(27)

I bhfianaise na húsáide méadaithí atá á baint as teicneolaíochtaí priontála 3T i réimsí éagsúla an tionscail, lena n-áirítear le cabhair ón intleacht shaorga, agus i bhfianaise na ndúshlán a eascraíonn as sin do shealbhóirí cirt dearaidh maidir le cosc éifeachtach a chur ar chóipeáil neamhdhlisteanach éasca a ndearaí cosanta, is iomchuí a fhoráil gurb é a thiocfaidh as cruthú, íoslódáil, cóipeáil agus cur ar fáil aon mheáin ina bhfuil an dearadh nó aon bhogearraí ina bhfuil taifead den dearadh, chun táirge a sháraíonn an dearadh cosanta a atáirgeadh, go mbeidh an úsáid a bhainfear as an dearadh faoi réir údarú an tsealbhóra cirt.

(28)

Chun cosaint dearaí a neartú agus góchumadh a chomhrac ar bhealach níos éifeachtaí, agus i gcomhréir le hoibleagáidí idirnáisiúnta na mBallstát faoi chreat na hEagraíochta Domhanda Trádála (EDT), go háirithe Airteagal V den Chomhaontú Ginearálta um Tharaifí agus Trádáil (CGTT 1947) maidir le saoirse idirthurais agus, a mhéid a bhaineann le cógais chineálacha, Dearbhú Doha maidir le Comhaontú TRIPS agus Sláinte Phoiblí a ghlac Comhdháil Aireachta EDT an 14 Samhain 2001, ba cheart do shealbhóir cirt dearaidh chláraithe a bheith i dteideal cosc a chur ar thríú páirtithe, le linn trádála, táirgí ó thríú tíortha a thabhairt isteach sa Bhallstát ina bhfuil an dearadh cláraithe gan é a scaoileadh i saorchúrsaíocht ansin, i gcás, gan údarú an tsealbhóra cirt a fháil, ina ndéantar an dearadh a ionchorprú sna táirgí sin nó ina gcuirtear i bhfeidhm orthu é ar bhealach comhionann, nó nach féidir an dearadh a idirdhealú ina bhunghnéithe den chuma ó na táirgí sin.

(29)

Chuige sin, ba cheart cead a bheith ag sealbhóirí cirt dearaidh chláraithe cosc a chur ar theacht isteach táirgí sáraitheacha agus ar earraí sáraitheacha mar iad a chur i ngach cás custaim, lena n-áirítear, go háirithe, idirthuras, trasloingsiú, stórasú, saorchriosanna, stóráil shealadach, próiseáil isteach nó cead isteach sealadach, agus nuair nach mbeidh sé beartaithe na táirgí sin a chur ar mhargadh an Bhallstáit lena mbaineann. Agus rialuithe custaim á ndéanamh, ba cheart do na húdaráis chustaim leas a bhaint as na cumhachtaí agus na nósanna imeachta a leagtar síos i Rialachán (AE) Uimh. 608/2013 ó Pharlaimint na hEorpa agus ón gComhairle (6), lena n-áirítear arna iarraidh sin do shealbhóirí an chirt freisin. Ba cheart do na húdaráis chustaim, go háirithe, na rialuithe ábhartha a dhéanamh ar bhonn critéir anailíse riosca.

(30)

Chun an gá atá le forghníomhú éifeachtach ceart dearaidh a áirithiú agus an riachtanas atá ann gan cur isteach ar shaorshreabhadh trádála i dtáirgí dlisteanacha a réiteach, ba cheart do theidlíocht an tsealbhóra cirt dearaidh a dhul i léig i gcás, le linn na n-imeachtaí arna dtionscnamh os comhair an údaráis bhreithiúnaigh nó an údaráis eile atá inniúil cinneadh substainteach a dhéanamh maidir le cé acu a sáraíodh an ceart dearaidh chláraithe nó nár sáraíodh, ina mbeidh dearbhóir nó sealbhóir na dtáirgí in ann a chruthú nach bhfuil úinéir an chirt dearaidh chláraithe sin i dteideal toirmeasc a chur ar na táirgí a chur ar an margadh i dtír an chinn scríbe.

(31)

Ba cheart na cearta eisiacha a thugtar le ceart dearaidh chláraithe a bheith faoi réir tacar iomchuí teorainneacha. Cé is moite de ghníomhaíochtaí a dhéantar go príobháideach chun críoch neamhthráchtála agus gníomhartha a dhéantar chun críoch turgnaimh, ba cheart a áireamh i liosta na n-úsáidí incheadaithe sin gníomhaíochtaí atáirgthe chun sleachta as an saothar a lua nó chun teagasc a dhéanamh, úsáid thagartha i gcomhthéacs fógraíocht chomparáideach, agus a úsáid chun críche tráchtaireachta, critice nó scigaithrise, ar choinníoll go bhfuil na gníomhaíochtaí sin comhoiriúnach le cleachtais chóirthrádála agus nach ndéanann siad dochar míchuí do ghnáthshaothrú an dearaidh. Maidir leis an úsáid a bhaineann tríú páirtithe as dearadh chun críche léirithe ealaíne, ba cheart a mheas go bhfuil an úsáid sin cothrom fad atá sí i gcomhréir le cleachtais mhacánta in ábhair thionsclaíocha agus thráchtála. Thairis sin, ba cheart an Treoir seo a chur i bhfeidhm ar bhealach lena n-áirithítear urraim iomlán do chearta agus saoirsí bunúsacha, go háirithe don tsaoirse tuairimí a nochtadh.

(32)

Is é is cuspóir do chosaint dearaí cearta eisiacha a dheonú ar an gcuma atá ar tháirge, ach ní monaplacht ar an táirge ann féin a dheonú. Dá dtabharfaí cosaint do dhearaí nach ann d’aon mhalairt phraiticiúil orthu, is amhlaidh go gcruthófaí monaplacht táirge dá thoradh. Maidir le cosaint den sórt, ba rí-gheall í le mí-úsáid ar an gcóras cosanta dearaí. I gcás ina gceadaítear do thríú páirtithe páirteanna spártha a tháirgeadh agus a dháileadh, coinnítear ar bun an iomaíocht. Má leathnaítear cosaint dearaí chuig páirteanna spártha, sáraíonn tríú páirtithe den sórt sin na cearta sin, cuirtear deireadh leis an iomaíocht agus tugtar monaplacht táirge de facto do shealbhóir an chirt dearaidh.

(33)

Na difríochtaí i ndlíthe na mBallstát maidir le dearaí cosanta a úsáid chun go gceadófar táirge casta a dheisiú ionas go n-athbhunófar an chuma a bhí air i dtosach, i gcás inar comhpháirt de tháirge casta atá spleách ar fhoirm an táirge ina n-ionchorpraítear an dearadh nó ar a gcuirtear an dearadh i bhfeidhm, bíonn tionchar díreach ag na difríochtaí sin ar bhunú agus feidhmiú an mhargaidh inmheánaigh. Déanann difríochtaí den sórt sin saobhadh ar an iomaíocht agus ar an trádáil laistigh den mhargadh inmheánach agus cruthaíonn siad éiginnteacht dhlíthiúil. Tá indeisitheacht táirgí i gcroílár geilleagair inbhuanaithe, mar a tugadh chun suntais sa teachtaireacht ón gCoimisiún an 11 Nollaig 2019 maidir leis ‘An Comhaontú Glas don Eoraip’.

(34)

Dá bhrí sin, ar mhaithe le feidhmiú rianúil an mhargaidh inmheánaigh agus chun iomaíocht chóir a áirithiú, is gá dlíthe cosanta dearaí na mBallstát a chomhfhogasú, a mhéid a bhaineann le húsáid dearaí cosanta chun deisiú táirge casta a cheadú chun an chuma a bhí air i dtosach a athbhunú, trí ‘clásal deisiúcháin’ a chur isteach atá comhchosúil leis an gclásal sin atá i Rialachán (CE) Uimh. 6/2002 cheana féin, atá infheidhme maidir le dearaí AE ar leibhéal an Aontais agus nach bhfuil feidhm acu go sainráite ach amháin maidir le comhpháirteanna atá spleách ar fhoirm de tháirgí casta. Ós rud é gurb é an éifeacht atá beartaithe leis an gclásal deisiúcháin sin cearta dearaidh a dhéanamh neamh-infheidhmithe i gcás ina n-úsáidtear dearadh na comhpháirte de tháirge casta chun táirge casta a dheisiú chun an chuma a bhí air i dtosach a athbhunú, ba cheart an clásal deisiúcháin a bheith ar cheann de na cosaintí dá bhforáiltear faoin Treoir seo i gcoinne shárú na gceart dearaidh. Ina theannta sin, chun a áirithiú nach gcuirfear tomhaltóirí amú agus go mbeidh siad in ann cinneadh eolach a dhéanamh idir táirgí iomaíocha ar féidir iad a úsáid le haghaidh an deisiúcháin, ba cheart foráil a dhéanamh go sainráite nach féidir le monaróir comhpháirte ná le díoltóir comhpháirte an clásal deisiúcháin a agairt i gcás nár chuir siad tomhaltóirí ar an eolas go cuí faoi thionscnamh tráchtála, agus faoi chéannacht mhonaróir an táirge atá le húsáid chun an táirge casta a dheisiú. Ba cheart an fhaisnéis mhionsonraithe sin a sholáthar trí thásc soiléir agus infheicthe ar an táirge nó, i gcás nach féidir é sin a dhéanamh, ar a phacáistíocht nó i ndoiciméad a ghabhann leis an táirge, agus ba cheart ar a laghad an trádmharc faoina gcuirtear an táirge ar an margadh, agus ainm an mhonaróra, a bheith le feiceáil ann.

(35)

D’fhonn éifeachtacht léirscaoileadh an mhargaidh iardhíola páirteanna spártha a éilítear leis an Treoir seo a chaomhnú agus i gcomhréir le cásdlí (7) Chúirt Bhreithiúnais an Aontais Eorpaigh, ionas go mbeifear in ann tairbhe a bhaint as an díolúine ón gclásal deisiúcháin ó chosaint an deartha, tá an monaróir comhpháirte nó an díoltóir comhpháirte de tháirge casta faoi dhualgas cúraim a áirithiú, trí mheáin iomchuí, go háirithe trí mheáin chonarthacha, nach bhfuil sé beartaithe ag úsáideoirí iartheachtacha na comhpháirteanna atá i gceist a úsáid chun críoch eile seachas críocha deisiúcháin chun an chuma bhunaidh ar an táirge casta a athbhunú. Leis sin, níor cheart ceangal a chur ar an monaróir comhpháirte ná ar an díoltóir comhpháirte a rathú, go hoibiachtúil agus i ngach imthoisc, go mbainfidh na húsáideoirí deiridh úsáid iarbhír as comhpháirteanna de tháirge casta a tháirgeann nó a dhíolann siad chun táirge casta a dheisiú chun an chuma a bhí ar an táirge chasta sin i dtosach a athbhunú, agus chun na críche sin amháin.

(36)

Chun nach mbeidh coinníollacha éagsúla sna Ballstáit maidir le húsáid roimhe sin ina gcúis le difríochtaí ó thaobh láidreacht dhlíthiúil an dearaidh chéanna sna Ballstáit éagsúla, is iomchuí a áirithiú, maidir le haon tríú duine atá in ann a shuíomh go ndearna sé, roimh dháta comhdaithe an iarratais ar dhearadh nó, má éilítear tosaíocht, roimh an dáta tosaíochta, tús a chur le húsáid a bhaint as dearadh laistigh de Bhallstát de mheon macánta, nó go ndearna sé ullmhúcháin dháiríre éifeachtacha chuige sin, ar dearadh é a áirítear faoi raon feidhme cosanta de chuid cirt dearaidh chláraithe, agus nár cóipeáladh ón dearadh cláraithe sin, tá sé nó sí i dteideal saothrú teoranta a dhéanamh ar an dearadh sin.

(37)

(38)

Chun rochtain ar chosaint dearaí a fheabhsú agus a éascú agus chun cur le deimhneacht dhlíthiúil agus intuarthacht, ba cheart an nós imeachta maidir le dearaí a chlárú sna Ballstáit a bheith éifeachtúil agus trédhearcach agus faoi réir rialacha atá cosúil leis na rialacha is infheidhme maidir le dearaí AE.

(39)

Is gá rialacha riachtanacha comhchoiteanna a leagan síos maidir leis na ceanglais agus na modhanna teicniúla chun dearaí a léiriú go soiléir in aon chineál atáirgthe amhairc ag céim chomhdaithe an iarratais ar chlárú, agus an dul chun cinn teicniúil maidir le léirshamhlú dearaí agus riachtanais thionscal an Aontais i ndáil le dearaí (digiteacha) nua á gcur san áireamh. Ina theannta sin, ba cheart do na Ballstáit caighdeáin chomhchuibhithe a bhunú trí bhíthin cóineasú cleachtas.

(40)

Ar mhaithe le héifeachtúlacht níos fearr, is iomchuí freisin a cheadú d’iarratasóirí dearaí cláraithe roinnt dearaí a chur le chéile in aon il-iarratas amháin agus a cheadú dóibh déanamh amhlaidh gan a bheith faoi réir an choinníll go mbaineann na táirgí a bhfuil sé beartaithe dearaí a ionchorprú iontu nó a chur i bhfeidhm orthu leis an aicme chéanna den Aicmiú Idirnáisiúnta i gcomhair Dearaí Tionscail (‘Aicmiú Locarno’), a bunaíodh le Comhaontú Locarno (1968).

(41)

I roinnt cásanna, d’fhéadfaí an rath a bhaineann le hoibríocht tráchtála ina bhfuil an dearadh bainteach a scriosadh nó a chur i mbaol mar thoradh ar ghnáthfhoilsiú tar éis dearadh a chlárú. Sna cásanna sin, bheadh an deis chun an foilsiú a chur siar ina réiteach. Ar mhaithe le comhleanúnachas agus deimhneacht dhlíthiúil níos fearr agus, ar an gcaoi sin, cuidiú le gnólachtaí costais a laghdú le linn dóibh punanna dearaí a bhainistiú, ba cheart cur siar an fhoilsithe a bheith faoi réir na rialacha céanna ar fud an Aontais.

(42)

Chun cothrom iomaíochta a áirithiú do ghnólachtaí, agus chun an leibhéal céanna rochtana ar chosaint dearaí a sholáthar ar fud an Aontais trí na hualaí clárúcháin agus na hualaí nós imeachta eile a bhíonn ar iarratasóirí a choinneáil chomh híseal agus is féidir, ba cheart do lároifigí maoine tionsclaíche uile na mBallstát agus Oifig Benelux um Maoin Intleachtúil teorainn a chur, mar a dhéanann Oifig Maoine Intleachtúla an Aontais Eorpaigh (EUIPO) ar leibhéal an Aontais, leis an scrúdú substainteach a dhéanann siad as a stuaim féin go dtí scrúdú i dtaobh an ann nó as do na forais atá le neamh-inchláraitheacht a áirítear go huileghabhálach sa Treoir seo.

(43)

Chun modhanna eile a chur ar fáil lena ndearbhófar cearta dearaidh a bheith neamhbhailí, ba cheart cead a bheith ag na Ballstáit foráil a dhéanamh maidir le nós imeachta riaracháin maidir le dearbhú neamhbhailíochta atá ailínithe a mhéid is iomchuí leis an nós imeachta sin is infheidhme maidir le dearaí cláraithe de chuid an Aontais.

(44)

Is inmhianaithe go n-oibreoidh lároifigí maoine tionsclaíche na mBallstát agus Oifig Benelux um Maoin Intleachtúil i gcomhar le chéile agus le hOifig Maoine Intleachtúla an Aontais Eorpaigh (EUIPO) i ngach réimse an chlárúcháin agus an riaracháin dearaí chun an cóineasú cleachtas agus uirlisí a chur chun cinn, amhail bunachair sonraí agus tairseacha atá comhchoiteann nó nasctha a bhunú agus a thabhairt cothrom le dáta chun críoch ceadaithe agus cuardaigh. Ba cheart do na Ballstáit a áirithiú a thuilleadh go n-oibreoidh a lároifigí maoine tionsclaíche agus Oifig Benelux um Maoin Intleachtúil i gcomhar le chéile agus le EUIPO i ngach réimse eile dá ngníomhaíochtaí atá ábhartha maidir le dearaí a chosaint san Aontas.

(45)

Ós rud é nach féidir leis na Ballstáit cuspóirí na Treorach seo, is é sin margadh inmheánach dea-fheidhmiúil a chothú agus a chruthú agus clárú, riar agus cosaint ceart dearaidh san Aontas a éascú ar mhaithe le fás agus leis an iomaíochas i gcás inarb iomchuí, a ghnóthú go leordhóthanach agus, de bharr a fairsinge agus a héifeachtaí, gur fearr is féidir iad a ghnóthú níos fearr ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun na cuspóirí sin a ghnóthú.

(46)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (8).

(47)

Ba cheart an oibleagáid an Treoir seo a thrasuí sa dlí náisiúnta a theorannú do na forálacha sin ar leasú substainteach iad i gcomparáid le Treoir 98/71/CE. Is ann don oibleagáid na forálacha nach bhfuil athraithe a thrasuí mar thoradh ar an Treoir sin a bhí ann roimhe seo.

(48)

Ba cheart nár dhochar an Treoir seo d’oibleagáidí na mBallstát maidir leis an teorainn ama chun an Treoir a leagtar amach in Iarscríbhinn I a ghabhann leis an Treoir seo a thrasuí sa dlí náisiúnta,