(1)

Le Treoir 2007/25/CE ón gCoimisiún (2) áiríodh meitríbhúisin mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí meitríbhúisin, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 15 Feabhra 2025.

(4)

Cuireadh iarratas faoi bhráid na hEastóine, an Ballstát is rapóirtéir, agus faoi bhráid na Gearmáine, an Ballstát is comhrapóirtéir, chun formheas na substainte gníomhaí meitríbhúisin a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) agus laistigh den tréimhse ama dá bhforáiltear san Airteagal sin.

(5)

Chuir an t-iarratasóir na sainchomhaid fhorlíontacha is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 30 Meán Fómhair 2019. Sa dréacht-tuarascáil uaidh maidir le measúnú ar athnuachan, mhol an Ballstát is rapóirtéir nach ndéanfaí an formheas maidir le meitríbhúisin a athnuachan.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar an iarratasóir agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 25 Iúil 2023, chuir an tÚdarás an chonclúid (6) uaidh in iúl don Choimisiún maidir le cé acu is féidir nó nach féidir coinne a bheith leis go gcomhlíonfaidh meitríbhúisin na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Shainaithin an tÚdarás ábhair imní. Go háirithe, tháinig sé ar an gconclúid go gcomhlíonann meitríbhúisin na critéir chun é a shainaithint mar shuaiteoir inchríneach i gcás daoine maidir le módúlacht na faireoga tíoróidigh agus nár léiríodh gur diomaibhseach é nochtadh an duine don tsubstaint ghníomhach sin i dtáirge cosanta plandaí, faoi choinníollacha úsáide réalaíocha atá beartaithe. Thairis sin, tháinig an tÚdarás ar an gconclúid gur mó na meastacháin ar nochtadh féachadóirí agus cónaitheoirí ná an teorainnluach bunaithe le haghaidh na n-úsáidí ionadaíocha uile a ndearnadh meastóireacht orthu, agus nár leor na staidéir a bhí ar fáil chun ardriosca do bheacha a chur as an áireamh.

(10)

Rinne an tÚdarás meastóireacht i dtaobh an bhfuil gá le meitríbhúisin chun baol tromchúiseach do shláinte plandaí a rialú, baol nach féidir a shrianadh trí mhodhanna eile atá ar fáil, lena n-áirítear modhanna neamhcheimiceacha. Níor áiríodh sa mheastóireacht seo ach cásanna ina n-úsáidtear meitríbhúisin chun fiailí a rialú ó thaobh leathadh luibhicídí roimh a dteacht chun cinn nó tar éis a dteacht chun cinn de. Tháinig an tÚdarás ar an gconclúid nach raibh líon leordhóthanach roghanna malartacha ceimiceacha ar fáil tráth an mheasúnaithe le haghaidh na mbarr uile a ndearnadh meastóireacht orthu agus, dá bhrí sin, go dtacaítear go heolaíoch leis an maolú i ndáil leis sin sna barra uile a ndearnadh meastóireacht orthu. Ar bhonn an mheasúnaithe ar roghanna malartacha neamhcheimiceacha le haghaidh na n-úsáidí a chuirtear i láthair, thángthas ar an gconclúid go bhfuil raon leathan modhanna neamhcheimiceacha ar fáil, in ainneoin go bhféadfadh sé nach mbeadh an éifeachtúlacht chéanna ag na modhanna sin agus atá ag modhanna ceimiceacha nó go bhféadfadh teorainneacha eacnamaíocha a bheith acu. Dá bhrí sin, measann an Coimisiún nach gcomhlíontar na coinníollacha maidir leis an maolú in Airteagal 4(7) de Rialachán (CE) Uimh. 1107/2009 a chur i bhfeidhm.

(11)

Chuir an Coimisiún tuarascáil athnuachana agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha an 22 Bealtaine 2024 agus an 10 Iúil 2024 faoi seach.

(12)

D’iarr an Coimisiún ar an iarratasóir a bharúlacha a chur isteach i leith chonclúid an Údaráis. Thairis sin, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, d’iarr an Coimisiún ar an iarratasóir a bharúlacha a chur isteach i leith na tuarascála athnuachana. Chuir an t-iarratasóir a bharúlacha isteach, agus rinneadh scrúdú cúramach orthu.

(13)

D’ainneoin na n-argóintí a rinne an t-iarratasóir, ní fhéadfaí an t-ábhar imní maidir leis an tsubstaint ghníomhach meitríbhúisin a chur as an áireamh.

(14)

Dá réir sin, maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil meitríbhúisin, níor suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009. Dá bhrí sin, is iomchuí gan formheas na substainte gníomhaí meitríbhúisin a athnuachan i gcomhréir le hAirteagal 20(1), pointe (b), den Rialachán sin.

(15)

Ba cheart, dá bhrí sin, Rialachán Cur Chun Feidhme (AE) Uimh. 540/2011 a leasú dá réir.

(16)

I Rialachán Cur Chun Feidhme (AE) 2015/408 ón gCoimisiún (7), liostaíodh meitríbhúisin mar shubstaint atá inbhreithnithe lena hionadú. I bhfianaise an neamh-athnuachana ar fhormheas meitríbhúisin, níl an liostú sin ábhartha a thuilleadh. Dá réir sin, ba cheart meitríbhúisin a scriosadh ón Iarscríbhinn a ghabhann le Rialachán Cur Chun Feidhme (AE) 2015/408.

(17)

Ba cheart am leordhóthanach a thabhairt do na Ballstáit údaruithe maidir le táirgí cosanta plandaí ina bhfuil meitríbhúisin a tharraingt siar.

(18)

Maidir le táirgí cosanta plandaí ina bhfuil meitríbhúisin, i gcás ina ndeonóidh na Ballstáit aon tréimhse chairde i gcomhréir le hAirteagal 46 de Rialachán (CE) Uimh. 1107/2009, níor cheart an tréimhse sin a bheith níos faide ná 12 mhí ó dháta theacht i bhfeidhm an Rialacháin seo.

(19)

Le Rialachán Cur Chun Feidhme (AE) 2023/918 ón gCoimisiún (8), cuireadh síneadh leis an tréimhse formheasa le haghaidh meitríbhúisin go dtí an 15 Feabhra 2025 chun go bhféadfar an próiseas athnuachana a thabhairt chun críche sula rachaidh tréimhse formheasa na substainte gníomhaí sin in éag. Mar sin féin, ós rud é go ndéantar cinneadh maidir le neamh-athnuachan ar an bhformheas roimh dháta éaga na tréimhse formheasa sin ar cuireadh síneadh léi, ba cheart feidhm a bheith ag an Rialachán seo tráth is luaithe ná an dáta sin.

(20)

Leis an Rialachán seo ní chuirtear cosc ar iarratas eile a chur isteach maidir leis an tsubstaint ghníomhach meitríbhúisin a fhormheas de bhun Airteagal 7 de Rialachán (CE) Uimh. 1107/2009.

(21)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,