(1)

An 6 Meitheamh 2018 fuair an Coimisiún iarratas ón gcuideachta Progarein (‘an t-iarratasóir’) ar fhormheas 1,3,7-trímheitiolxaintín (caiféin) mar shubstaint bhunata atá le húsáid i gcosaint plandaí mar fheithidicíd i gcabáiste, prátaí agus crainn bhosca agus mar mhoiliscicíd i ngach barr inite agus do-ite.

(2)

Fuair an Coimisiún iarratas athbhreithnithe i mí an Mheithimh 2019, agus ina dhiaidh sin fuair sé leaganacha athbhreithnithe breise a cuireadh isteach i mí na Nollag 2019 agus i mí Aibreáin 2020. Bhí an fhaisnéis a cheanglaítear faoi Airteagal 23(3), an dara fomhír, de Rialachán (CE) Uimh. 1107/2009 ag gabháil leis an iarratas athbhreithnithe, mar a fuarthas é i mí Aibreáin 2020.

(3)

D’iarr an Coimisiún cúnamh eolaíoch ar an Údarás Eorpach um Shábháilteacht Bia (‘an tÚdarás’) de bhun Airteagal 23(4) de Rialachán (CE) Uimh. 1107/2009. Sholáthair an tÚdarás tuarascáil theicniúil don Choimisiún maidir le 1,3,7-trímheitiolxaintín (caiféin) an 26 Eanáir 2021 (2). Chuir an Coimisiún tuarascáil athbhreithniúcháin (3) i láthair don Bhuanchoiste um Plandaí, Ainmhithe, Bia agus Beatha an 5 Iúil 2021.

(4)

D’iarr an Coimisiún ar an iarratasóir a bharúlacha féin a chur isteach i ndáil leis an tuarascáil theicniúil ón Údarás agus i ndáil leis an tuarascáil maidir le hathbhreithniú ón gCoimisiún.

(5)

I mí Lúnasa 2021 d’iarr an t-iarratasóir an nós imeachta chun cinneadh a ghlacadh maidir le formheas 1,3,7-trímheitiolxaintín (caiféin) mar shubstaint bhunata a chur ar feitheamh chun go bhféadfaí faisnéis bhreise a ullmhú a thacaíonn lena iarratas. Ghlac an Coimisiún iarraidh an iarratasóra.

(6)

I mí Mheán Fómhair 2022 sholáthair an t-iarratasóir iarratas cothrom le dáta maidir le formheas caiféine mar shubstaint bhunata. Dháil an Coimisiún an t-iarratas sin agus an fhaisnéis i gceangal leis ar na Ballstáit agus ar an Údarás chun barúlacha a fháil uathu. Ar bhonn na faisnéise atá le fáil san iarratas athbhreithnithe agus sna barúlacha a fuarthas, bheartaigh an Buanchoiste um Plandaí, Ainmhithe, Bia agus Beatha nach raibh gá le cúnamh eolaíoch athnuaite ón Údarás.

(7)

De réir an aicmithe comhchuibhithe Aontais arna bhunú i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (4), déanann caiféin dochar do dhaoine má shlogtar í (Géarthocsaineacht 4). A mhéid a bhaineann le sláinte an duine, thug an tÚdarás dá aire freisin, ar bhonn na tuairime eolaíche ó Phainéal EFSA ar Tháirgí Diaitéiteacha, Cothú agus Ailléirgí maidir le sábháilteacht caiféine (5), go mbíonn éifeachtaí díobhálacha ag caiféin ar an gcóras cardashoithíoch, ar hiodráitiú agus ar theocht an choirp i measc daoine fásta, mar aon leis na héifeachtaí a bhíonn aici ar lárchóras na néaróg (codladh, imní, athruithe iompraíochta) i measc daoine fásta agus leanaí, agus toradh díobhálach a bhaineann le meáchan breithe i measc mná torracha mar gheall uirthi. Thairis sin, i bhfianaise na heaspa sonraí, níorbh fhéidir leis an Údarás a mheasúnú ar rioscaí neamhchothaitheacha d’oibreoirí, d’oibrithe, do dhaoine ar an láthair agus do chónaitheoirí a chur i gcrích.

(8)

A mhéid a bhaineann le tionchar caiféine ar an gcomhshaol, thug an tÚdarás dá aire, maidir leis an teorainn pharaiméadrach 0,1 μg/L le haghaidh uisce óil a mbeadh feidhm aici maidir le caiféin dá bhformheasfaí í mar shubstaint ghníomhach, go sárófaí go mór an teorainn sin i gcás na n-úsáidí a ndearnadh iarratas ina leith san iarratas. De réir an Údaráis, is féidir a mheas go mbeidh nochtadh suntasach d’uisce dromchla freisin. Thairis sin, ní raibh na sonraí a bhí ar fáil leordhóthanach chun riosca inghlactha d’orgánaigh nach spriocorgánaigh iad a léiriú.

(9)

Chuir an Coimisiún tuarascáil athbhreithniúcháin nuashonraithe, mar aon le dréacht-Rialachán Cur Chun Feidhme maidir le caiféin, i láthair don Bhuanchoiste um Plandaí, Ainmhithe, Bia agus Beatha an 23 Bealtaine 2024 agus an 11 Iúil 2024, faoi seach, agus thángthas ar an gconclúid sa tuarascáil, i gcás 1,3,7-trímheitiolxaintín (caiféin), nach gcomhlíontar na critéir formheasa le haghaidh substaintí bunata agus, dá bhrí sin, nár cheart é a fhormheas mar shubstaint bhunata.

(10)

D’iarr an Coimisiún ar an iarratasóir a bharúlacha féin a chur isteach i leith na tuarascála athbhreithniúcháin nuashonraithe ón gCoimisiún i gcomhréir le hAirteagal 13(1) de Rialachán (CE) Uimh. 1107/2009. Chuir an t-iarratasóir a bharúlacha isteach, agus tugadh aird orthu.

(11)

Mar sin féin, d’ainneoin na n-argóintí a rinne an t-iarratasóir, ní fhéadfaí deireadh a chur leis na hábhair imní a bhain le sábháilteacht úsáid na substainte sin maidir le sláinte an duine agus an comhshaol a chosaint.

(12)

Dá thoradh sin, níor suíodh go gcomhlíontar na coinníollacha a leagtar síos in Airteagal 23 de Rialachán (CE) Uimh. 1107/2009. Dá bhrí sin, is iomchuí gan 1,3,7-trímheitiolxaintín (caiféin) a fhormheas mar shubstaint bhunata.

(13)

Ní chuirtear cosc leis an Rialachán seo ar iarratas eile a chur isteach ar fhormheas 1,3,7-trímheitiolxaintín (caiféin) mar shubstaint bhunata i gcomhréir le hAirteagal 23(3) de Rialachán (CE) Uimh. 1107/2009.

(14)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,