(1)

Le géarchéimeanna roimhe seo, go háirithe laethanta tosaigh ghéarchéim COVID-19, léiríodh gur féidir difear mór a dhéanamh do shaorghluaiseacht earraí, daoine agus seirbhísí sa mhargadh inmheánach agus dá shlabhraí soláthair. Is féidir iarmhairtí a bheith aige sin ar thrádáil trasteorann idir na Ballstáit, rud a chruthaíonn bacainní ar fheidhmiú cuí an mhargaidh inmheánaigh. Ina theannta sin, le linn na ngéarchéimeanna sin, bhí uirlisí bainistithe géarchéime iomchuí agus sásraí comhordúcháin iomchuí in easnamh, níor cumhdaíodh gach gné den mhargadh inmheánach leo nó ní rabhthas in ann freagairt thráthúil agus éifeachtach a thabhairt ar na géarchéimeanna sin leo.

(2)

Ag tús ghéarchéim COVID-19, thug na Ballstáit bacainní ar shaorghluaiseacht sa mhargadh inmheánach isteach chomh maith le bearta éagsúla maidir le soláthar earraí agus seirbhísí a raibh ríthábhacht leo nó a bhí fíor-riachtanach chun freagairt ar an ngéarchéim, nach raibh údar leo i gcónaí. Níor leor bearta ad hoc a ghlac an Coimisiún chun feidhmiú an mhargaidh inmheánaigh a athbhunú bunaithe ar na rialacha atá ann cheana. Ní raibh an tAontas ullmhaithe go leordhóthanach chun monarú, soláthar agus dáileadh éifeachtúil earraí neamhleighis atá ábhartha i gcás géarchéime a áirithiú, amhail trealamh cosanta pearsanta. Na bearta chun a áirithiú go mbeadh fáil ar earraí neamhleighis atá ábhartha i gcás géarchéime le linn ghéarchéim COVID-19, ba ghá go raibh siad frithghníomhach. Ina theannta sin, le géarchéim COVID-19, léiríodh comhroinnt neamhleor faisnéise agus forléargas neamhleor ar acmhainneachtaí monaraíochta ar fud an Aontais, chomh maith le leochaileachtaí a bhaineann le slabhraí soláthair laistigh den Aontas agus le slabhraí soláthair domhanda.

(3)

Ina theannta sin, bhí tionchar ar leith ag bearta neamhchomhordaithe lenar cuireadh srian ar shaorghluaiseacht daoine ar earnálacha a bhraitheann ar oibrithe taistil, lena n-áirítear oibrithe i réigiúin teorann, a raibh ról ríthábhachtach acu sa mhargadh inmheánach le linn ghéarchéim COVID-19.

(4)

Bhí an Chomhairle in ann, trí na socruithe Comhtháite maidir le Freagairt Pholaitiúil ar Ghéarchéimeanna (IPCR), faisnéis a mhalartú agus gníomhaíochtaí áirithe a chomhordú maidir le géarchéim COVID-19, agus ghníomhaigh na Ballstáit go neamhspleách i gcásanna eile. Mar sin féin, cuireadh moill roinnt seachtainí ar ghníomhaíochtaí de chuid an Choimisiúin mar gheall ar easpa beart pleanála teagmhasaí ar fud an Aontais agus easpa soiléireachta maidir leis an údarás náisiúnta ar cheart dul i dteagmháil leis chun teacht ar réitigh thapa ar thionchar na géarchéime ar an margadh inmheánach. Ina theannta sin, ba léir go gcuirfeadh gníomhaíochtaí sriantacha neamhchomhordaithe a rinne na Ballstáit le tionchar na géarchéime ar an margadh inmheánach. Tháinig sé chun solais go bhfuil gá le socruithe idir na Ballstáit agus institiúidí, comhlachtaí, oifigí agus gníomhaireachtaí an Aontais maidir le pleanáil theagmhasach, comhordú agus comhar ar an leibhéal teicniúil, agus malartú faisnéise. Ina theannta sin, ba léir gur ghéaraigh an easpa comhordaithe éifeachtaigh idir na Ballstáit ar na ganntanais earraí agus gur chruthaigh sé níos mó bacainní ar shaorghluaiseacht seirbhísí agus daoine.

(5)

Mhaígh eagraíochtaí ionadaíocha oibreoirí eacnamaíocha nach raibh faisnéis leordhóthanach ag oibreoirí eacnamaíocha faoi na srianta ar shaorghluaiseacht ná faoi bhearta freagartha ar ghéarchéimeanna a thug na Ballstáit isteach le linn ghéarchéim COVID-19. Ba é ba chúis leis sin, inter alia, easpa trédhearcachta ó údaráis na mBallstát, oibreoirí eacnamaíocha nach raibh a fhios acu cén áit ar cheart dóibh fhaisnéis den sórt sin a fháil, srianta teanga agus an t-ualach riaracháin a bhaineann le fiosrúcháin a dhéanamh arís agus arís eile sna Ballstáit uile, go háirithe i dtimpeallacht rialála a bhíonn ag síorathrú. Leis an easpa faisnéise sin, cuireadh cosc ar oibreoirí eacnamaíocha cinntí feasacha gnó a dhéanamh maidir lena mhéid a d’fhéadfaidís a gceart chun saorghluaiseachta a fheidhmiú nó leanúint d’oibríochtaí gnó trasteorann le linn na géarchéime sin. Is gá feabhas a chur ar infhaighteacht faisnéise maidir le srianta ar an tsaorghluaiseacht ar an leibhéal náisiúnta agus ar leibhéal an Aontais agus maidir le bearta freagartha ar ghéarchéimeanna ar an leibhéal náisiúnta agus ar leibhéal an Aontais.

(6)

D’ainneoin na heaspa comhordaithe a bhí ann ar dtús, bhí ról lárnach ag rialacha an mhargaidh inmheánaigh maidir le tionchar diúltach ghéarchéim COVID-19 a mhaolú agus maidir le téarnamh tapa gheilleagar an Aontais a áirithiú, eadhon trí chosc a chur ar shrianta náisiúnta díréireacha nach bhfuil údar leo atá sna freagairtí aontaobhacha ó na Ballstáit agus trí dhreasacht láidir a sholáthar chun teacht ar réitigh choiteanna, agus ar an gcaoi sin an dlúthpháirtíocht a chur chun cinn.

(7)

Le himeachtaí a bhaineann le géarchéim COVID-19, léiríodh gur gá don Aontas cur chuige comhordaithe a ghlacadh agus a bheith níos ullmhaithe do ghéarchéimeanna a d’fhéadfadh a bheith ann amach anseo, go háirithe i bhfianaise éifeachtaí leanúnacha an athraithe aeráide a mbíonn tubaistí nádúrtha mar thoradh orthu, chomh maith le héagobhsaíochtaí eacnamaíocha agus geopholaitiúla ar fud an domhain. I measc na ngéarchéimeanna eile a bhféadfadh freagairt níos tapúla a bheith ag teastáil ina leith chun bacainní ar shaorghluaiseacht sa mhargadh inmheánach a chosc agus chun cur isteach mór ar shlabhraí soláthair a sheachaint, ar géarchéimeanna iad atá fíor-riachtanach chun gníomhaíochtaí sa mhargadh inmheánach a choinneáil ar bun, áirítear, mar shampla, dóiteáin foraoise, creathanna talún nó cibirionsaithe mórscála. Ós rud é gur teagmhais eisceachtúla thobanna de chineál urghnách agus ar scála urghnách iad géarchéimeanna den sórt sin, tugtar le tuiscint go bhfuil teagmhais den sórt sin réasúnta gan choinne. Ós rud é nach eol cén cineál géarchéimeanna eile a d’fhéadfadh teacht chun cinn agus tionchar tromchúiseach a bheith acu ar an margadh inmheánach agus ar a shlabhraí soláthair amach anseo, is gá foráil a dhéanamh maidir le hionstraim a mbeadh feidhm aici i gcás réimse leathan géarchéimeanna a mbeadh tionchar acu ar an margadh inmheánach.

(8)

Is féidir le tionchar géarchéime ar an margadh inmheánach bac a chur ar fheidhmiú an mhargaidh inmheánaigh ar dhá bhealach. Is féidir leis a bheith ina chúis le bacainní ar shaorghluaiseacht nó is féidir leis cur isteach ar shlabhraí soláthair. Má chuirtear isteach ar shlabhraí soláthair, is féidir ganntanais earraí agus seirbhísí sa mhargadh inmheánach a ghéarú agus is féidir bac a chur ar tháirgeadh, rud as a n-eascraíonn bacainní breise ar thrádáil agus saobhadh iomaíochta idir na Ballstáit agus idir oibreoirí príobháideacha, rud a chuireann isteach ar fheidhmiú cuí an mhargaidh inmheánaigh. Má chuirtear isteach ar shlabhraí soláthair, d’fhéadfadh sé go dtiocfadh bearta náisiúnta éagsúla chun cinn nó gur dócha go dtiocfaidh siad chun cinn chun aghaidh a thabhairt ar na saincheisteanna sin sa slabhra soláthair, rud a d’fhágfadh go ndéanfaí modh éigeandála an mhargaidh inmheánaigh a ghníomhachtú. Leis an Rialachán seo, ba cheart aghaidh a thabhairt ar na cineálacha tionchair sin ar an margadh inmheánach agus ba cheart bearta a thabhairt isteach chun bacainní ar shaorghluaiseacht nó cur isteach ar shlabhra soláthair a sheachaint, ar bacainní iad lena gcruthaítear ganntanais earraí nó seirbhísí atá ábhartha i gcás géarchéime.

(9)

Chun ualach riaracháin nach bhfuil gá leis ar na Ballstáit a sheachaint, ba cheart teagmhais a thuairiscítear trí bhíthin na bhfoláireamh ad hoc maidir le luathrabhadh dá dtagraítear sa Rialachán seo a shainiú sa chaoi go n-eisiatar leo teagmhais nach bhfuil ach iarmhairt dhiomaibhseach intuartha acu ar shaorghluaiseacht earraí, seirbhísí agus daoine, lena n-áirítear oibrithe, nó ar shlabhraí soláthair earraí agus seirbhísí atá fíor-riachtanach chun feidhmeanna sochaíocha ríthábhachtacha nó gníomhaíochtaí eacnamaíocha ríthábhachtacha a choinneáil ar bun sa mhargadh inmheánach.

(10)

Chun a áirithiú go mbeidh an creat beart a leagtar síos leis an Rialachán seo in ann leas iomlán a bhaint as a éifeacht iomlán i gcomhthéacs mhodhanna forairdill agus éigeandála an mhargaidh inmheánaigh, ba cheart an chumhacht a thabhairt don Choimisiún socruithe mionsonraithe a leagan amach maidir le hullmhacht i gcomhair géarchéimeanna, comhar, malartú faisnéise agus cumarsáid géarchéime. Ba cheart a leagan amach sna socruithe mionsonraithe sin, i bhfoirm creat teagmhasach, gnéithe teicniúla agus oibríochtúla sonracha na sásraí chun faisnéis a mhalartú idir an Coimisiún agus na Ballstáit. Ina theannta sin, ba cheart socruithe a leagan síos leis le haghaidh comhordú oibríochtúil idir an Coimisiún agus na Ballstáit maidir le cumarsáid géarchéime. Sa chomhthéacs sin, ba cheart fardal tiomnaithe a chur ar bun, ar bhonn na faisnéise arna cur in iúl ag na Ballstáit, fardal d’údaráis inniúla uile na mBallstát lena mbaineann a bhfuil baint acu le cur chun feidhme an chreata a leagtar síos leis an Rialachán seo. Ba cheart a léiriú san fhardal sin, go háirithe, na róil agus na freagrachtaí a sannadh d’údaráis inniúla a mBallstát faoi seach le linn mhodhanna forairdill agus éigeandála an mhargaidh inmheánaigh i gcomhréir leis an dlí náisiúnta. Ba cheart a chumhdach freisin leis na socruithe idir an Coimisiún agus na Ballstáit malartú slán faisnéise a bhaineann le comhairliúchán leis na hoibreoirí eacnamaíocha agus leis na comhpháirtithe sóisialta maidir lena dtionscnaimh agus lena ngníomhaíochtaí faoi seach chun éifeachtaí géarchéime a d’fhéadfadh a bheith ann a mhaolú agus chun freagairt orthu.

(11)

Ba cheart na bearta a leagtar amach sa Rialachán seo a úsáid ar bhealach comhleanúnach, trédhearcach, éifeachtúil, comhréireach agus tráthúil, agus aird chuí á tabhairt ar an ngá atá le feidhmeanna sochaíocha ríthábhachtacha a choinneáil ar bun, lena n-áirítear an tslándáil phoiblí, an tsábháilteacht phoiblí, an beartas poiblí nó an tsláinte phoiblí. Leis an Rialachán seo, níor cheart difear a dhéanamh d’inniúlacht na mBallstát i ndáil le beartais náisiúnta na sláinte poiblí, mar shampla, agus ba cheart é a bheith gan dochar don fhreagracht atá ar na Ballstáit an tslándáil náisiúnta a choimirciú agus dá gcumhacht feidhmeanna sár-riachtanacha eile stáit a choimirciú, lena n-áirítear iomláine chríochach an stáit a áirithiú agus an t-ord poiblí a chaomhnú. Dá bhrí sin, ba cheart an Rialachán seo a bheith gan dochar d’ábhair a bhaineann le slándáil agus cosaint náisiúnta.

(12)

Leis an Rialachán seo, soláthraítear na hacmhainní is gá chun a áirithiú, le linn géarchéime, go leanfar d’fheidhmiú an mhargaidh inmheánaigh, na ngnólachtaí a oibríonn sa mhargadh inmheánach agus a shlabhraí soláthair straitéiseacha, lena n-áirítear saorghluaiseacht earraí, seirbhísí agus daoine, lena n-áirítear oibrithe, agus infhaighteacht earraí nó seirbhísí atá ábhartha i gcás géarchéime do shaoránaigh, do ghnólachtaí agus d’údaráis phoiblí. Ina theannta sin, bunaítear leis an Rialachán seo fóram le haghaidh comhordú, comhar agus malartú faisnéise iomchuí. Ina theannta sin, soláthraítear leis na modhanna chun go mbeidh rochtain thráthúil ar an bhfaisnéis is gá le haghaidh freagairt spriocdhírithe agus iompraíocht leormhaith sa mhargadh ag gnólachtaí agus saoránaigh le linn géarchéime agus chun go mbeidh an fhaisnéis sin ar fáil go tráthúil.

(13)

I gcás inar féidir, ba cheart a cheadú leis an Rialachán seo go mbeifí in ann imeachtaí agus géarchéimeanna a thuar trína cheadú don Aontas leanúint d’fhorbairt a dhéanamh ar anailís leanúnach a bhaineann le hearnálacha ríthábhachtacha den gheilleagar margaidh inmheánaigh.

(14)

Trí athléimneacht agus ullmhacht thionscal an Aontais a threisiú maidir le hamhábhair chriticiúla, comhlánaítear an Rialachán seo le Rialachán (AE) 2024/1252 ó Pharlaimint na hEorpa agus ón gComhairle (4), rud a chuireann ar chumas an Choimisiúin, le linn mhodh forairdill an mhargaidh inmheánaigh nó mhodh éigeandála an mhargaidh inmheánaigh, bearta spriocdhírithe a ghníomhachtú nuair a thagann bagairt nó cur isteach ar sholáthar earraí a bhfuil ríthábhacht leo chun cinn, lena n-áirítear maidir le hamhábhair chriticiúla.

(15)

Leis an Rialachán seo, níor cheart dúbláil a dhéanamh ar an gcreat atá ann cheana maidir le táirgí íocshláinte, feistí leighis nó frithbhearta leighis eile faoi Chreat Slándála Sláinte an Aontais, lena n-áirítear Rialacháin (AE) 2022/123 (5), (AE) 2022/2370 (6) agus (AE) 2022/2371 (7) ó Pharlaimint na hEorpa agus ón gComhairle agus Rialachán (AE) 2022/2372 ón gComhairle (8) maidir le hullmhacht agus freagairt i gcomhair géarchéimeanna i réimse na sláinte. Ba cheart tosaíocht a bheith ag Creat Slándála Sláinte an Aontais ar an Rialachán seo maidir le cur isteach ar an slabhra soláthair agus ganntanais táirgí íocshláinte, feistí leighis nó frithbheart leighis eile i gcás ina gcomhlíontar coinníollacha an chreata sin. Dá bhrí sin, ba cheart táirgí íocshláinte, feistí leighis nó frithbhearta leighis eile de réir bhrí Rialacháin (AE) 2022/2371 agus (AE) 2022/2372 a eisiamh ó raon feidhme an Rialacháin seo, i gcás inar áiríodh iad ar an liosta a glacadh de bhun Airteagal 7(1) de Rialachán (AE) 2022/2372, seachas i ndáil leis na forálacha a bhaineann le saorghluaiseacht earraí, seirbhísí agus daoine, lena n-áirítear oibrithe, le linn éigeandáil sa mhargadh inmheánach, agus go háirithe iad siúd atá ceaptha chun saorghluaiseacht a athbhunú agus a éascú.

(16)

Leis an Rialachán seo, ba cheart comhlánú a dhéanamh ar shocruithe IPCR arna n-oibriú ag an gComhairle faoi Chinneadh 2014/415/AE ón gComhairle (9) maidir le hobair na Comhairle ar an tionchar atá ag géarchéimeanna trasearnála ar an margadh inmheánach lena n-éilítear cinnteoireacht i ndáil le pleanáil theagmhasach agus cur chun feidhme beart forairdill agus éigeandála. Ba cheart an Rialachán seo a bheith gan dochar do shocruithe IPCR arna n-oibriú ag an gComhairle faoi Chinneadh Cur Chun Feidhme (AE) 2018/1993 ón gComhairle (10).

(17)

Ba cheart an Rialachán seo a bheith gan dochar do Shásra an Aontais um Chosaint Shibhialta (UCPM). Leis an Rialachán seo, ba cheart UCPM a chomhlánú agus ba cheart tacú leis, i gcás inar gá, maidir le hinfhaighteacht earraí criticiúla agus saorghluaiseacht oibrithe cosanta sibhialta, lena n-áirítear a dtrealamh, le haghaidh géarchéimeanna a thagann faoi shainchúram UCPM.

(18)

Ba cheart an Rialachán seo a bheith gan dochar do Rialachán (AE) 2016/399 ó Pharlaimint na hEorpa agus ón gComhairle (11), lena n-áirítear a chreat ginearálta maidir le rialuithe ag teorainneacha inmheánacha a thabhairt isteach nó a fhadú ar bhonn sealadach agus an córas fógartha chun rialuithe ag teorainneacha inmheánacha a athbhunú ar bhonn sealadach.

(19)

Ba cheart an Rialachán seo a bheith gan dochar d’fhorálacha Rialachán (CE) Uimh. 178/2002 ó Pharlaimint na hEorpa agus ón gComhairle (12) maidir le bainistiú géarchéime, mar a leagtar amach in Airteagail 55 go 57 de, arna gcur chun feidhme le Cinneadh Cur Chun Feidhme (AE) 2019/300 ón gCoimisiún (13).

(20)

Ba cheart an Rialachán seo a bheith gan dochar don Sásra Eorpach um Ullmhacht agus Freagairt i gcás Géarchéimeanna Slándála Bia. Mar sin féin, ba cheart táirgí bia a rialú le forálacha saorghluaiseachta an Rialacháin seo, lena n-áirítear na forálacha sin a bhaineann le srianta ar an gceart chun saorghluaiseachta. Is féidir athbhreithniú a dhéanamh freisin ar na bearta a bhaineann le táirgí bia maidir lena mhéid a chomhlíonann siad aon fhorálacha ábhartha eile de dhlí an Aontais.

(21)

Ba cheart an Rialachán seo a bheith gan dochar do chumas an Choimisiúin dul i mbun comhairliúchán nó comhoibriú, thar ceann an Aontais, le húdaráis ábhartha tíortha lasmuigh den Aontas, i gcomhréir le dlí an Aontais, agus aird ar leith á tabhairt ar thíortha atá i mbéal forbartha, d’fhonn réitigh chomhoibritheacha a lorg chun cur isteach ar shlabhraí soláthair a sheachaint, i gcomhréir le hoibleagáidí idirnáisiúnta. D’fhéadfadh comhordú i bhfóraim idirnáisiúnta ábhartha a bheith i gceist leis sin, i gcás inarb iomchuí.

(22)

Ar cheann de na dúshláin a sainaithníodh le linn ghéarchéim COVID-19 bhí an easpa líonra chun ullmhacht agus comhroinnt faisnéise a áirithiú idir na Ballstáit, ar thaobh amháin, agus idir na Ballstáit agus an Coimisiún, ar an taobh eile. Dá bhrí sin, ba cheart tacú le baint amach na gcuspóirí arna saothrú leis an Rialachán seo trí shásra rialachais. Ar leibhéal an Aontais, ba cheart a bhunú leis an Rialachán seo Bord um Éigeandálaí sa Mhargadh Inmheánach agus Athléimneacht an Mhargaidh Inmheánaigh (‘an Bord’), atá comhdhéanta d’ionadaithe ó na Ballstáit agus atá faoi chathaoirleacht an Choimisiúin, chun comhar, malartú faisnéise agus cur chun feidhme rianúil, éifeachtach agus comhchuibhithe an Rialacháin seo a éascú. Ba cheart don Bhord comhairle agus cúnamh a thabhairt don Choimisiún maidir le ceisteanna sonracha, lena n-áirítear cur chun feidhme comhsheasmhach an Rialacháin seo, comhar i measc na mBallstát a éascú, agus ba cheart dó anailís agus plé a dhéanamh ar ábhair ábhartha a bhaineann le géarchéimeanna atá ar tí tarlú nó le géarchéimeanna leanúnacha.

(23)

Ba cheart don Choimisiún a bheith ina chathaoirleach ar an mBord agus a rúnaíocht a sholáthar. Ba cheart do gach Ballstát ionadaí agus ionadaí malartach a cheapadh. Ba cheart don Chathaoirleach cuireadh a thabhairt d’ionadaí ó Pharlaimint na hEorpa mar bhreathnóir buan. Chun comhairle ábhartha a fháil maidir le gníomhaíochtaí an Bhoird agus chun rannpháirtíocht iomchuí saineolaithe a cheadú, ba cheart don Chathaoirleach a bheith in ann cuireadh a thabhairt do shaineolaithe a bheith rannpháirteach, mar bhreathnóirí, in obair an Bhoird agus freastal ar chruinnithe sonracha, ar bhonn ad hoc, i gcás ina bhfuil an freastal sin ábhartha i bhfianaise chlár oibre an chruinnithe. D’fhonn freagairt chomhleanúnach chomhordaithe ón Aontas a áirithiú do ghéarchéimeanna éagsúla a bhféadfadh tionchar a bheith acu ar fheidhmiú an mhargaidh inmheánaigh, ba cheart don Chathaoirleach cuireadh a thabhairt freisin d’ionadaithe ó chomhlachtaí eile atá ábhartha i gcás géarchéime ar leibhéal an Aontais mar bhreathnóirí chuig cruinnithe ábhartha an Bhoird. D’fhonn comhar idirnáisiúnta a chur chun cinn, ba cheart don Chathaoirleach cuireadh a thabhairt d’ionadaithe eagraíochtaí idirnáisiúnta agus tíortha lasmuigh den Aontas páirt a ghlacadh i gcruinnithe ábhartha an Bhoird i gcomhréir leis na comhaontuithe ábhartha déthaobhacha nó idirnáisiúnta. Ba cheart don Chathaoirleach a bheith in ann cuireadh a thabhairt do bhreathnóirí rannchuidiú leis an bplé le saineolas, faisnéis agus léargais ábhartha, ach níor cheart do bhreathnóirí páirt a ghlacadh i gceapadh tuairimí, moltaí ná comhairle ón mBord.

(24)

Ba cheart cúraimí sonracha a bheith ag an mBord i gcomhthéacs an chreata theagmhasaigh, mhodh forairdill an mhargaidh inmheánaigh agus mhodh éigeandála an mhargaidh inmheánaigh. Áirítear ar na cúraimí sin tuairimí a mhalartú agus comhairle a sholáthar don Choimisiún maidir le measúnú a dhéanamh ar na critéir atá le cur i gcuntas agus na modhanna éagsúla á ngníomhachtú agus maidir le measúnú a dhéanamh ar cé acu a chomhlíontar nó nach gcomhlíontar na réamhchoinníollacha sonracha chun bearta freagartha nithiúla a úsáid. Ba cheart don Choimisiún lánaird a thabhairt ar thuairimí, ar mholtaí nó ar thuarascálacha arna nglacadh ag an mBord.

(25)

Ar mhaithe le rúndacht na faisnéise a fhaightear de bhun an Rialacháin seo a ráthú, spreagtar an Bord foráil a dhéanamh ina rialacha nós imeachta nach bhfuil a chomhaltaí ná a bhreathnóirí le rúin trádála agus ghnó agus faisnéis íogair agus rúnda eile a fhaightear nó a ghintear agus an Rialachán seo á chur i bhfeidhm a nochtadh agus go bhfuil siad le hoibleagáidí rúndachta gairmiúla atá coibhéiseach leis na hoibleagáidí is infheidhme maidir le baill foirne an Choimisiúin a urramú.

(26)

Chun trédhearcacht, cuntasacht agus comhordú níos fearr a áirithiú, go háirithe le linn géarchéimeanna, ba cheart do choiste inniúil Pharlaimint na hEorpa a bheith in ann a iarraidh ar Chathaoirleach an Bhoird teacht os comhair an choiste sin. Ba cheart Parlaimint na hEorpa a chur ar an eolas a luaithe is féidir faoi aon ghníomhartha cur chun feidhme ón gComhairle a mholtar nó a ghlactar. Ba cheart don Choimisiún gnéithe a chur san áireamh a eascraíonn as na tuairimí a cuireadh in iúl tríd an idirphlé éigeandála agus athléimneachta arna dhéanamh faoin Rialachán seo, lena n-áirítear na rúin ábhartha ó Pharlaimint na hEorpa.

(27)

Ina theannta sin, chun rannpháirtíocht na bpríomh-gheallsealbhóirí a fheabhsú, go háirithe ionadaithe oibreoirí eacnamaíocha, comhpháirtithe sóisialta, taighdeoirí agus an tsochaí shibhialta, ba cheart don Choimisiún ardán geallsealbhóirí a chur ar bun chun freagairt dheonach ar éigeandálaí sa mhargadh inmheánach a éascú agus a spreagadh.

(28)

Chun comhordú agus malartú faisnéise éifeachtach a áirithiú i gcomhthéacs an chreata theagmhasaigh, agus i gcomhthéacs mhodhanna forairdill agus éigeandála an mhargaidh inmheánaigh, ba cheart do na Ballstáit lároifig idirchaidrimh a ainmniú chun bheith freagrach as teagmháil a dhéanamh leis an oifig idirchaidrimh ar leibhéal an Aontais arna hainmniú ag an gCoimisiún agus le lároifigí idirchaidrimh na mBallstát eile. Ba cheart do na lároifigí idirchaidrimh oibriú mar phointe fócasach maidir le teagmhálacha a dhéanamh le húdaráis inniúla ábhartha na mBallstát, agus faisnéis a thiomsú ó na húdaráis sin, lena n-áirítear, i gcás inarb ábhartha, údaráis ar an leibhéal réigiúnach agus ar an leibhéal áitiúil. Ba cheart do na lároifigí idirchaidrimh a bheith freagrach freisin as comhordú agus malartú faisnéise. Ba cheart do na Ballstáit a bheith in ann údarás atá ann cheana a ainmniú mar lároifig idirchaidrimh. Ba cheart d’oifigí idirchaidrimh den sórt sin an fhaisnéis uile atá ábhartha i gcás géarchéime a tharchur freisin chuig na pointí teagmhála aonair sna Ballstáit i bhfíor-am i gcás inar féidir.

(29)

Ba cheart an Rialachán seo a bheith gan dochar don fhéidearthacht atá ag an gCoimisiún measúnú a dhéanamh i dtaobh an iomchuí srianta a fhorchur ar onnmhairí earraí i gcomhréir le cearta agus oibleagáidí idirnáisiúnta an Aontais faoi Rialachán (AE) 2015/479 ó Pharlaimint na hEorpa agus ón gComhairle (14).

(30)

Ba cheart an Rialachán seo a bheith gan dochar do bhearta arna nglacadh de bhun Rialachán (AE) Uimh. 1308/2013 ó Pharlaimint na hEorpa agus ón gComhairle (15).

(31)

Tá feidhm ag an Rialachán seo gan dochar do Threoir (AE) 2022/2557 ó Pharlaimint na hEorpa agus ón gComhairle (16) agus tá sé comhlántach léi, ar treoir í lena leagtar síos rialacha íosta comhchuibhithe chun a áirithiú go ndéanfar seirbhísí atá fíor-riachtanach chun feidhmeanna sochaíocha ríthábhachtacha nó gníomhaíochtaí eacnamaíocha ríthábhachtacha a choinneáil ar bun a sholáthar ar bhealach gan bhac sa mhargadh inmheánach, chun feabhas a chur ar athléimneacht eintiteas criticiúil a sholáthraíonn seirbhísí den sórt sin, agus chun comhar trasteorann idir údaráis inniúla a fheabhsú.

(32)

Agus é mar chuspóir a bheith ullmhaithe níos fearr do ghéarchéimeanna a d’fhéadfadh a bheith ann amach anseo agus a bheith níos athléimní le linn géarchéimeanna a d’fhéadfadh a bheith ann amach anseo, ar géarchéimeanna iad a d’fhéadfadh tionchar diúltach tromchúiseach a imirt ar shaorghluaiseacht earraí, seirbhísí agus daoine, lena n-áirítear oibrithe, nó a bheith ina gcúis le cur isteach ar shlabhraí soláthair earraí agus seirbhísí sa mhargadh inmheánach, ba cheart don Choimisiún oibreoirí eacnamaíocha a spreagadh agus a éascú chun prótacail dheonacha ghéarchéime a tharraingt suas. Ba cheart saoirse a bheith ag oibreoirí eacnamaíocha i gcónaí cinneadh a dhéanamh an nglacfaidh siad páirt i bprótacail dheonacha ghéarchéime den sórt sin. Níor cheart ualach riaracháin díréireach a bheith mar thoradh ar rannpháirtíocht i bprótacail dheonacha ghéarchéime den sórt sin. Ba cheart a leagan amach sna prótacail dheonacha ghéarchéime paraiméadair shonracha an chur isteach a bhfuiltear ag súil leis, chomh maith le leithdháileadh róil shonracha gach rannpháirtí, cur síos ar shásraí gníomhachtaithe prótacal den sórt sin agus ar na gníomhaíochtaí gaolmhara. Maidir le geallsealbhóirí ábhartha, lena n-áirítear údaráis na mBallstát, comhlachtaí, oifigí agus gníomhaireachtaí de chuid an Aontais agus eagraíochtaí na sochaí sibhialta nó eagraíochtaí ábhartha eile, d’fhéadfadh baint a bheith acu freisin le tarraingt suas prótacal deonach géarchéime den sórt sin. Agus paraiméadair an chur isteach atá le breithniú á gcinneadh, ba cheart d’oibreoirí eacnamaíocha a bheith in ann cur leis an taithí a fuair siad roimhe seo i ndáil le srianta ar shaorghluaiseacht agus ar chur isteach ar shlabhra soláthair arb iad géarchéimeanna éagsúla is cúis leo.

(33)

D’fhonn leas a bhaint as an taithí a fuarthas ó ghéarchéimeanna roimhe seo, ba cheart don Choimisiún cláir oiliúna agus ábhair a fhorbairt agus a chur ar fáil le haghaidh geallsealbhóirí poiblí agus príobháideacha, lena n-áirítear oibreoirí eacnamaíocha. Ba cheart rannpháirtíocht i gcláir oiliúna den sórt sin agus in ionsamhlúcháin a bheith deonach i gcónaí.

(34)

Mar chuid d’ullmhacht i gcomhair géarchéimeanna, ba cheart a bheith in ann, leis an Rialachán seo, teagmhais agus géarchéimeanna a thuar a bhféadfaí tástálacha struis agus ionsamhlúcháin a dhéanamh ina leith, agus forbairt á déanamh ar anailís leanúnach maidir le hearnálacha ríthábhachtacha de gheilleagar an mhargaidh inmheánaigh agus obair fadbhreathnaitheachta leanúnach an Aontais. Go háirithe, ba cheart don Choimisiún cásanna agus paraiméadair a fhorbairt in earnálacha sonracha lena ngabhtar na rioscaí ar leith a bhaineann le géarchéim. Chun ullmhacht na ngníomhaithe uile i gcomhair géarchéimeanna a áirithiú, is gá rialacha maidir le tástálacha struis a leagan amach, ar rialacha iad ba cheart a dhéanamh gach 2 bhliain ar a laghad. Sa chomhthéacs sin, ba cheart don Choimisiún forbairt straitéisí ullmhachta éigeandála a éascú agus a spreagadh, lena n-áirítear straitéisí le haghaidh cumarsáid géarchéime agus faisnéis a mhalartú faoi na srianta is infheidhme in imthosca dúshlánacha. Ba cheart sainaithint na n-earnálacha sonracha fócais a bheith bunaithe ar uirlisí táscaire-bhunaithe atá ann cheana lena ndéantar faireachán ar fhorbairt slabhraí soláthair san Aontas d’fhonn deacrachtaí a d’fhéadfadh a bheith ann a shainaithint, agus critéir shonracha ábhartha á gcur san áireamh amhail sreafaí trádála, éileamh agus soláthar, comhchruinniú an tsoláthair, acmhainneachtaí táirgthe agus táirgeachta domhanda agus de chuid an Aontais ag céimeanna éagsúla den slabhra luacha agus na hidirspleáchais idir oibreoirí eacnamaíocha.

(35)

Ba cheart é a bheith féideartha faisnéis a bhaineann le foláirimh ad hoc maidir le luathrabhadh a mhalartú tríd an líonra arna chruthú idir lároifigí idirchaidrimh na mBallstát agus an oifig idirchaidrimh ar leibhéal an Aontais. Ba cheart fógra a thabhairt don Choimisiún faoi fholáirimh ad hoc den sórt sin maidir le luathrabhadh i gcásanna teagmhas suntasach chun go mbeidh an tAontas in ann súil níos fearr a choinneáil ar fhorbairt géarchéime féideartha, géarchéime atá ar tí tarlú nó géarchéime leanúnaí, agus ar an gcaoi sin leibhéal ullmhachta níos fearr a áirithiú i gcás ina dtiocfadh an ghéarchéim chun cinn nó ina dtiocfadh forbairt uirthi.

(36)

Chun cineál eisceachtúil fheidhmiú an mhargaidh inmheánaigh le linn mhodh forairdill an mhargaidh inmheánaigh nó le linn mhodh éigeandála an mhargaidh inmheánaigh a chur san áireamh, agus chun na hiarmhairtí forleathana a d’fhéadfadh a bheith ann d’fheidhmiú an mhargaidh inmheánaigh le linn na modhanna sin a chur san áireamh, ba cheart, ar bhonn eisceachtúil, cumhachtaí cur chun feidhme a thabhairt don Chomhairle chun modh forairdill an mhargaidh inmheánaigh nó modh éigeandála an mhargaidh inmheánaigh a ghníomhachtú de bhun Airteagal 291(2) den Chonradh ar Fheidhmiú an Aontais Eorpaigh (CFAE). Ba cheart gnéithe a bheith sa ghníomh cur chun feidhme ón gComhairle chun modh forairdill an mhargaidh inmheánaigh a ghníomhachtú, ar gnéithe iad a bhfuil dlúthbhaint acu leis an measúnú ar chomhlíonadh na réamhchoinníollacha lena dtugtar údar leis an ngníomhachtú, eadhon measúnú ar an tionchar a d’fhéadfadh a bheith ag an ngéarchéim ábhartha ar shaorghluaiseacht earraí, seirbhísí agus daoine, lena n-áirítear oibrithe, sa mhargadh inmheánach agus ar a shlabhraí soláthair, liosta de na hearraí agus de na seirbhísí a bhfuil ríthábhacht leo agus atá fíor-riachtanach chun feidhmeanna sochaíocha ríthábhachtacha nó gníomhaíochtaí eacnamaíocha ríthábhachtacha a choinneáil ar bun sa mhargadh inmheánach agus na bearta forairdill atá le déanamh. Ina theannta sin, i gcás ina n-éilítear freisin, chun modh éigeandála an mhargaidh inmheánaigh a ghníomhachtú, liosta a ghlacadh d’earraí atá ábhartha i gcás géarchéime nó de sheirbhísí atá ábhartha i gcás géarchéime, nó iad araon, ba cheart an liosta sin a ghlacadh an tráth céanna a ghníomhachtaítear modh éigeandála an mhargaidh inmheánaigh agus ba cheart, dá bhrí sin, é a bheith nasctha go dlúth leis an ngníomhachtú sin. Ar an gcúis sin, ba cheart cumhachtaí cur chun feidhme a thabhairt don Chomhairle freisin chun an liosta sin d’earraí atá ábhartha i gcás géarchéime nó seirbhísí atá ábhartha i gcás géarchéime a ghlacadh agus chun aon nuashonrú ar an liosta sin a ghlacadh. Ba cheart a bheith in ann modh forairdill an mhargaidh inmheánaigh nó modh éigeandála an mhargaidh inmheánaigh a leathnú trí ghníomh cur chun feidhme ón gComhairle ar thogra ón gCoimisiún. Má tharlaíonn sé nach gá ceachtar de na modhanna a bheith gníomhach, ba cheart an modh faoi seach a dhíghníomhachtú.

(37)

Chun a áirithiú go bhfaigheann an Bord faisnéis iomchuí faoi éigeandáil a d’fhéadfadh a bheith ann sa mhargadh inmheánach, is gá foráil a dhéanamh maidir le faireachán. Ba cheart baint a bheith ag faireachán den sórt sin le slabhraí soláthair earraí agus seirbhísí a bhfuil ríthábhacht leo agus a bhfuil modh forairdill an mhargaidh inmheánaigh gníomhachtaithe ina leith agus le saorghluaiseacht daoine a bhfuil baint acu le táirgeadh agus soláthar earraí agus seirbhísí den sórt sin. Ba cheart d’údaráis inniúla na mBallstát faireachán a dhéanamh ar shlabhraí soláthair earraí agus seirbhísí a bhfuil ríthábhacht leo ar bhonn iarrataí ar sholáthar deonach faisnéise faoi thosca a mbíonn tionchar acu ar infhaighteacht na n-earraí agus na seirbhísí roghnaithe a bhfuil ríthábhacht leo, amhail acmhainneacht táirgthe, infhaighteacht an lucht saothair is gá, stoic, teorainneacha soláthróirí, féidearthachtaí maidir le héagsúlú agus ionadú, dálaí éilimh agus scrogaill. Ba cheart an iarraidh ar sholáthar deonach faisnéise i gcomhthéacs faireacháin den sórt sin a dhíriú chuig na gníomhaithe uile feadh shlabhra soláthair ábhartha na n-earraí agus seirbhísí a bhfuil ríthábhacht leo agus chuig geallsealbhóirí ábhartha eile atá bunaithe i gcríoch na mBallstát. Tá tábhacht ar leith ag baint le faisnéis a bhailiú faoi chur isteach ar an tsaorghluaiseacht ó na hoibreoirí eacnamaíocha ábhartha feadh shlabhraí soláthair na n-earraí agus seirbhísí a bhfuil ríthábhacht leo toisc go bhfuil easpa lucht saothair iomchuí ar cheann de na cúiseanna atá ann faoi láthair le cur isteach ar shlabhraí soláthair. Ba cheart an faireachán a dhéanann údaráis na mBallstát ar chur isteach ar shaorghluaiseacht daoine a bhfuil baint acu le táirgeadh agus soláthar earraí agus seirbhísí a thuiscint go leathan, lena gcumhdaítear oibrithe, soláthraithe seirbhíse, ionadaithe gnó agus daoine eile a bhfuil baint acu le taighde, forbairt agus earraí a chur ar an margadh. Ba cheart d’údaráis inniúla na mBallstát an fhaisnéis a bhailítear a sholáthar don Choimisiún agus don Bhord trí na lároifigí idirchaidrimh. Ba cheart a chur ar chumas an Bhoird leis an bhfaisnéis sin comhairle a thabhairt don Choimisiún maidir leis an ngá atá le modh éigeandála an mhargaidh inmheánaigh a ghníomhachtú.

(38)

I gcás bearta náisiúnta nach bhfuil comhchuibhithe faoin Rialachán seo agus a dhéanann difear, nuair a ghlactar iad agus nuair a chuirtear i bhfeidhm iad mar fhreagairt ar éigeandáil sa mhargadh inmheánach, don tsaorghluaiseacht earraí nó daoine, nó don tsaoirse chun seirbhísí a sholáthar le linn éigeandálaí sa mhargadh inmheánach, ba cheart do na Ballstáit a áirithiú go gcomhlíonfaidh bearta den sórt sin CFAE agus forálacha eile de dhlí an Aontais amhail Rialachán (AE) Uimh. 492/2011 ó Pharlaimint na hEorpa agus ón gComhairle (17), agus Treoracha 2004/38/CE (18), 2005/36/CE (19), 2006/123/CE (20) agus (AE) 2015/1535 (21) ó Pharlaimint na hEorpa agus ón gComhairle. Má ghlacann na Ballstáit bearta den sórt sin, ba cheart údar a bheith leo agus ba cheart dóibh prionsabail na comhréireachta agus an neamh-idirdhealaithe a urramú i gcomhréir le dlí an Aontais. Ina theannta sin, i gcomhréir leis na prionsabail sin, níor cheart, le bearta den sórt sin, ualach riaracháin neamhriachtanach a chruthú agus ba cheart do na Ballstáit gach beart is féidir a dhéanamh chun teorainn a chur le haon ualach riaracháin arb iad bearta arna nglacadh mar fhreagairt ar éigeandáil sa mhargadh inmheánach is cúis leis. Chomh maith leis sin, ba cheart staid na réigiún teorann agus na réigiún is forimeallaí a chur san áireamh go leormhaith i mbearta den sórt sin, go háirithe i gcás oibrithe trasteorann. Ba cheart do na Ballstáit deireadh a chur le bearta a rinneadh chun freagairt ar éigeandáil sa mhargadh inmheánach lena gcuirtear srian ar an tsaorghluaiseacht a luaithe nach mbeidh gá leo a thuilleadh. Go ginearálta, ní bheadh údar a thuilleadh i bprionsabal le bearta náisiúnta lena gcuirtear srian leis an tsaorghluaiseacht nach bhfuil comhchuibhithe faoin Rialachán seo ná ní bheadh siad comhréireach a thuilleadh i bprionsabal nuair a dhéantar modh éigeandála an mhargaidh inmheánaigh a dhíghníomhachtú agus ba cheart, dá bhrí sin, deireadh a chur leo.

(39)

Níor cheart an Rialachán seo a fhorléiriú mar Rialachán lena n-údaraítear nó lena dtugtar údar le srianta ar shaorghluaiseacht earraí, seirbhísí agus daoine, ar srianta iad atá contrártha le CFAE nó le forálacha eile de dhlí an Aontais. Mar shampla, ós rud é go ndéantar roinnt srianta a thoirmeasc go sainráite le linn mhodh éigeandála an mhargaidh inmheánaigh, níor cheart a fhorléiriú leis sin go bhfuil údar le srianta den sórt sin lasmuigh den mhodh sin nó mar údar le srianta féideartha eile nach bhfuil ag luí le dlí an Aontais nach dtoirmisctear go sainráite leis an Rialachán seo.

(40)

Le hAirteagal 21 CFAE, leagtar síos an ceart atá ag saoránaigh den Aontas gluaiseacht agus cónaí faoi shaoirse ar chríoch na mBallstát, faoi réir na dteorainneacha agus na gcoinníollacha dá bhforáiltear sna Conarthaí agus sna forálacha arna nglacadh lena gcur chun feidhme. Leagtar síos na coinníollacha agus na teorainneacha mionsonraithe maidir leis an gceart sin i dTreoir 2004/38/CE. Leagtar amach sa Treoir sin na prionsabail ghinearálta is infheidhme maidir leis na teorainneacha sin agus na forais is féidir a úsáid chun údar a thabhairt le bearta den sórt sin. Is iad an beartas poiblí, an tslándáil phoiblí nó an tsláinte phoiblí na forais sin. Sa chomhthéacs sin, is féidir údar a thabhairt le srianta ar an tsaoirse gluaiseachta má tá siad comhréireach agus neamh-idirdhealaitheach. Níl sé beartaithe leis an Rialachán seo foráil a dhéanamh maidir le forais bhreise chun an ceart chun saorghluaiseachta atá ag daoine a theorannú thar na forais dá bhforáiltear i gCaibidil VI de Threoir 2004/38/CE.

(41)

Tá bearta chun saorghluaiseacht daoine a éascú agus aon bhearta eile lena ndéantar difear do shaorghluaiseacht daoine dá bhforáiltear faoin Rialachán seo bunaithe ar Airteagal 21 CFAE agus comhlánaíonn siad Treoir 2004/38/CE le linn éigeandálaí sa mhargadh inmheánach. Níor cheart srianta ar an tsaorghluaiseacht atá contrártha leis na Conarthaí nó le dlí eile de chuid an Aontais a údarú ná údar a thabhairt leo mar thoradh ar bhearta den sórt sin.

(42)

Le hAirteagal 45 CFAE, leagtar síos an ceart chun saorghluaiseachta oibrithe, faoi réir na dteorainneacha agus na gcoinníollacha a leagtar síos sna Conarthaí agus sna forálacha arna nglacadh lena gcur chun feidhme. Is é Airteagal 46 CFAE an bunús dlí chun bearta a ghlacadh a bhfuil gá leo chun saoirse gluaiseachta d’oibrithe, mar a shainmhínítear in Airteagal 45 CFAE, a thabhairt i gcrích. Tá forálacha sa Rialachán seo lena gcomhlánaítear na bearta atá ann cheana chun saorghluaiseacht daoine a neartú tuilleadh, trédhearcacht a mhéadú agus cúnamh riaracháin a sholáthar le linn éigeandálaí sa mhargadh inmheánach. Áirítear ar bhearta den sórt sin pointí teagmhála aonair a chur ar bun agus a chur ar fáil d’oibrithe agus dá n-ionadaithe sna Ballstáit agus ar leibhéal an Aontais le linn mhodhanna forairdill agus éigeandála an mhargaidh inmheánaigh i gcomhréir leis an Rialachán seo.

(43)

Is iomchuí toirmeasc a chur ar bhearta náisiúnta áirithe lena gcuirtear srian ar an tsaorghluaiseacht nó ar an tsaoirse chun seirbhísí a sholáthar agus nár cheart a fhorchur le linn éigeandáil sa mhargadh inmheánach ná mar fhreagairt uirthi, toisc gur follasach go bhfuil siad díréireach. Dá bhrí sin, aon bhearta den sórt sin a dhéanann na Ballstáit, ba cheart measúnú a dhéanamh orthu i bhfianaise na bhforálacha comhchuibhithe sin seachas i bhfianaise CFAE ná dlí eile de chuid an Aontais.

(44)

Go háirithe, ba cheart do na Ballstáit staonadh ó bhearta a thabhairt isteach arb ionann iad agus idirdhealú bunaithe ar náisiúntacht nó, i gcás cuideachtaí, an áit ina bhfuil a n-oifig chláraithe, a riarachán lárnach nó a bpríomháit ghnó.

(45)

Ba cheart do na Ballstáit staonadh ó bhearta a thabhairt isteach a fhágann go bhfuil sé dodhéanta do thairbhithe an chirt chun saorghluaiseachta filleadh ar a mBallstát cónaithe má bhíonn siad i mBallstát eile nuair a bhriseann géarchéim amach.

(46)

Ba cheart do na Ballstáit staonadh ó bhearta a dhéanamh a fhágann go bhfuil sé dodhéanta do thairbhithe an chirt chun saorghluaiseachta taisteal chuig Ballstáit eile ar chúiseanna teaghlaigh dianriachtanacha, i gcás ina gceadaítear taisteal den sórt sin fós laistigh den Bhallstát a bhfuil an beart á ghlacadh aige sna himthosca céanna.

(47)

Leis an Rialachán seo, níor cheart cosc a chur ar na Ballstáit cead a thabhairt dá náisiúnaigh agus dá gcónaitheoirí filleadh ar a gcríoch le linn éigeandálaí sa mhargadh inmheánach. Chun taisteal den sórt sin a éascú, ba cheart do Bhallstáit eile cead a thabhairt do náisiúnaigh agus cónaitheoirí den sórt sin imeacht as a gcríoch chun taisteal chuig Ballstát na náisiúntachta nó an chónaithe, nó chun idirthuras a dhéanamh trína gcríoch chun Ballstát na náisiúntachta nó an chónaithe a bhaint amach.

(48)

Toirmisctear srianta ar an tsaorghluaiseacht, lena n-áirítear srianta i bhfoirm ceanglais agus nósanna imeachta riaracháin amhail nósanna imeachta dearbhúcháin, clárúcháin nó údarúcháin, mura gcomhlíonann siad dlí an Aontais. I gcás inar glacadh ceanglais agus nósanna imeachta riaracháin a bhfuil údar leo agus atá comhréireach i gcomhréir le dlí an Aontais, ba cheart do na Ballstáit, le linn éigeandáil sa mhargadh inmheánach, tosaíocht a thabhairt do chomhlíonadh ceanglas den sórt sin a éascú agus nósanna imeachta den sórt sin a phróiseáil do dhaoine a bhfuil baint acu le táirgeadh nó soláthar earraí atá ábhartha i gcás géarchéime nó seirbhísí atá ábhartha i gcás géarchéime. Chuige sin agus nuair is gá sin a dhéanamh chun saorghluaiseacht soláthraithe den sórt sin nó catagóirí áirithe díobh a éascú, ba cheart don Choimisiún socruithe a chur i bhfeidhm, lena n-áirítear uirlisí digiteacha agus teimpléid dhigiteacha.

(49)

Leagtar síos leis an Rialachán seo oibleagáidí d’fhonn trédhearcacht a áirithiú i ndáil le bearta náisiúnta arna nglacadh le linn mhodh éigeandála an mhargaidh inmheánaigh lena gcuirtear srian ar an gceart chun saorghluaiseachta atá ag daoine. Le haon srianta den sórt sin, ba cheart dlí an Aontais, go háirithe Treoir 2004/38/CE, a chomhlíonadh. Ba cheart na hoibleagáidí sin a bheith gan dochar d’aon oibleagáidí atá ann cheana maidir le faisnéis nó fógra a thabhairt a leanann d’fheidhm a bheith acu. Tá saorghluaiseacht daoine ríthábhachtach d’fheidhmiú cuí an mhargaidh inmheánaigh. Is léir ón taithí a fuarthas ó ghéarchéim COVID-19 gur féidir éifeachtaí iarmharta a bheith ag srianta ar an gceart sin chun saorghluaiseachta ar na saoirsí bunúsacha eile go léir. Is féidir le heaspa faisnéise faoi shrianta a bhaineann le géarchéimeanna ar shaorghluaiseacht daoine a bheith ina cúis le deacrachtaí breise a bheith ag saoránaigh den Aontas agus ag oibreoirí eacnamaíocha a gcuid gníomhaíochtaí a bhainistiú le linn géarchéime. Faoi láthair, níl aon chóras trédhearcachta is infheidhme i bhfeidhm a d’fhéadfadh faisnéis a sholáthar do shaoránaigh den Aontas agus d’oibreoirí eacnamaíocha maidir le srianta ar shaorghluaiseacht daoine. Ba cheart do na Ballstáit téacs na bhforálacha reachtacha nó rialála náisiúnta lena dtugtar isteach srianta ar fheidhmiú an chirt chun saorghluaiseachta atá ag daoine mar fhreagairt ar ghéarchéim, chomh maith leis na modhnuithe ar an gceart sin, a chur in iúl don Choimisiún agus do na Ballstáit eile gan mhoill tar éis a nglactha. Ba cheart na cúiseanna atá le bearta den sórt sin a bheith ag gabháil leis an téacs sin, lena n-áirítear cúiseanna lena léirítear go bhfuil údar leis na bearta agus go bhfuil siad comhréireach, chomh maith le haon sonraí eolaíocha foluiteacha nó sonraí foluiteacha eile a thacaíonn lena nglacadh, raon feidhme beart den sórt sin, na dátaí ar glacadh agus ar cuireadh i bhfeidhm iad, agus fad na mbeart sin. Chun a áirithiú gur féidir le saoránaigh den Aontas agus oibreoirí eacnamaíocha faisnéis iontaofa a fháil maidir le srianta ar an tsaorghluaiseacht, ba cheart do na Ballstáit faisnéis shoiléir, chuimsitheach agus thráthúil a sholáthar don phobal lena mínítear bearta den sórt sin, go háirithe a raon feidhme, an dáta ar glacadh agus ar cuireadh i bhfeidhm iad agus a bhfad, a luaithe is féidir. Ba cheart an fhaisnéis sin a sholáthar don Choimisiún freisin. Ar an mbonn sin, ba cheart don Choimisiún an fhaisnéis ábhartha a fhoilsiú ar shuíomh gréasáin tiomnaithe atá ar fáil i dteangacha oifigiúla uile institiúidí an Aontais.

(50)

Chun a áirithiú nach n-úsáidfear bearta sonracha éigeandála an mhargaidh inmheánaigh dá bhforáiltear sa Rialachán seo ach amháin nuair atá siad fíor-riachtanach chun freagairt ar éigeandáil áirithe sa mhargadh inmheánach, ba cheart a éileamh go ndéanfar bearta den sórt sin a ghníomhachtú trí bhíthin gníomhartha cur chun feidhme ón gCoimisiún lena léirítear na cúiseanna atá le gníomhachtú den sórt sin agus na hearraí atá ábhartha i gcás géarchéime nó na seirbhísí atá ábhartha i gcás géarchéime a bhfuil feidhm ag bearta den sórt sin maidir leo.

(51)

Ina theannta sin, chun comhréireacht na ngníomhartha cur chun feidhme sin a áirithiú agus chun urraim chuí do ról na n-oibreoirí eacnamaíocha i mbainistiú géarchéime a áirithiú, níor cheart don Choimisiún dul i muinín ghníomhachtú na mbeart freagartha éigeandála sa mhargadh inmheánach ach amháin tar éis don Chomhairle modh éigeandála an mhargaidh inmheánaigh a ghníomhachtú agus mura mbeidh oibreoirí eacnamaíocha in ann réiteach a sholáthar ar bhonn deonach laistigh de thréimhse réasúnach ama (‘gníomhachtú dhá shraith’). Ba cheart údar a thabhairt i ngach gníomh cur chun feidhme den sórt sin leis an ngá atá le bearta freagartha éigeandála sa mhargadh inmheánach a ghníomhachtú, agus i ndáil le gach gné ar leith de ghéarchéim.

(52)

Chun gur féidir measúnuithe beachta a dhéanamh i dtaobh an bhféadfaí laghdú a dhéanamh ar na ganntanais thromchúiseacha earraí atá ábhartha i gcás géarchéime nó seirbhísí atá ábhartha i gcás géarchéime nó ar an ngarbhaol go bhféadfaidís a bheith ann i gcás éigeandáil sa mhargadh inmheánach dá n-úsáidfí bearta sonracha freagartha éigeandála sa mhargadh inmheánach, ba cheart don Choimisiún a bheith in ann faisnéis a iarraidh ar na hoibreoirí eacnamaíocha ábhartha i slabhraí soláthair earraí agus seirbhísí atá ábhartha i gcás géarchéime. Ba cheart iarrataí ar an bhfaisnéis sin a bheith bainteach, i gcás inarb iomchuí, leis an méid seo a leanas: acmhainneachtaí táirgthe agus stoic earraí atá ábhartha i gcás géarchéime i saoráidí táirgthe atá lonnaithe san Aontas agus i dtíortha lasmuigh den Aontas araon a oibríonn na hoibreoirí eacnamaíocha sin, a ndéanann siad conradh leo nó a gceannaíonn siad soláthairtí uathu; sceideal an aschuir táirgeachta a bhfuiltear ag súil leis do na 3 mhí ina dhiaidh sin i gcás gach saoráide táirgthe atá lonnaithe san Aontas agus i dtíortha lasmuigh den Aontas a oibríonn na hoibreoirí eacnamaíocha sin nó a ndéanann siad conradh leo nó meastachán ar an aschur táirgeachta sin; agus mionsonraí faoi aon chur isteach ábhartha ar shlabhraí soláthair nó faoi aon ghanntanais i slabhraí soláthair. Chun rannpháirtíocht iomlán an Bhallstáit ina bhfuil a shaoráid táirgthe ag an oibreoir eacnamaíoch a áirithiú, ba cheart don Choimisiún cóip den iarraidh ar fhaisnéis a chur ar aghaidh, gan mhoill, chuig an mBallstát sin agus, má iarrann údarás inniúil an Bhallstáit sin amhlaidh, ba cheart don Choimisiún an fhaisnéis atá faighte aige a roinnt leis an mBallstát sin trí mhodhanna slána.

(53)

Níor cheart don Choimisiún iarrataí ar fhaisnéis arna gcur chuig oibreoirí eacnamaíocha a úsáid ach amháin i gcás, maidir leis an bhfaisnéis is gá chun freagairt leormhaith a thabhairt ar an éigeandáil sa mhargadh inmheánach, amhail faisnéis is gá le haghaidh soláthar arna dhéanamh ag an gCoimisiún thar ceann nó in ainm na mBallstát nó meastachán a dhéanamh ar acmhainneachtaí táirgthe monaróirí earraí atá ábhartha i gcás géarchéime ar cuireadh isteach ar a slabhraí soláthair, nach bhfuil sí ar fáil fós don Choimisiún agus nach féidir í a fháil ó fhoinsí atá ar fáil go poiblí nó mar thoradh ar fhaisnéis a chuirtear ar fáil go deonach. Agus iarraidh ar fhaisnéis á déanamh aige trí bhíthin gníomh cur chun feidhme, ba cheart don Choimisiún a áirithiú gur mó an tairbhe ar mhaithe le leas an phobail ná na míchaoithiúlachtaí a d’fhéadfadh na hoibreoirí eacnamaíocha lena mbaineann a choinneáil ar bun. Ba cheart don Choimisiún an t-ualach a d’fhéadfadh a bheith i gceist le hiarraidh den sórt sin ar fhaisnéis a chur i gcuntas, go háirithe do mhicrifhiontair agus d’fhiontair bheaga agus mheánmhéide (FBManna), agus ba cheart dó an teorainn ama a leagan síos le haghaidh freagra dá réir sin. I gcás ina bhféadfadh próiseáil iarrata ar fhaisnéis ag oibreoir eacnamaíoch cur isteach go suntasach ar a oibríochtaí, ba cheart cead a bheith ag an oibreoir eacnamaíoch sin diúltú an fhaisnéis a iarrtar a sholáthar. Aon diúltú an fhaisnéis a iarrtar a sholáthar, ba cheart é a bheith d’oibleagáid ar an oibreoir eacnamaíoch na cúiseanna atá le haon diúltú den sórt sin a sholáthar don Choimisiún. Ba cheart a áireamh ar na cúiseanna sin, go háirithe, an riosca dliteanais i leith sárú oibleagáidí conarthacha neamhnochta bunaithe ar chonarthaí arna rialú ag dlí tíre lasmuigh den Aontas nó an riosca maidir le faisnéis a nochtadh a bhaineann leis an tslándáil náisiúnta i gcás earraí a bhféadfaí úsáidí a bhaint astu i gcomhthéacs na slándála náisiúnta, lena bhféadfaí cúlchistí náisiúnta a áireamh.

(54)

Ba cheart 20 lá oibre a bheith san uasteorainn ama d’oibreoir eacnamaíoch chun freagra a thabhairt ar iarraidh ar fhaisnéis. Ba cheart an teorainn ama aonair shonrach a shocrú de réir an cháis agus d’fhéadfadh sí, in imthosca áirithe, a bheith níos giorra. Ba cheart cead a bheith ag an oibreoir eacnamaíoch síneadh aonuaire ar an teorainn ama a iarraidh a d’fhéadfadh, faoi réir chomhaontú sainráite an Choimisiúin, síneadh ama a chur leis fhoriomlán thar 20 lá oibre. Ba cheart foráil a dhéanamh go ndéanfar aon iarraidh ar shíneadh a chur leis an teorainn ama ón oibreoir eacnamaíoch a chur faoi bhráid an Choimisiúin i gcomhréir leis na socruithe cumarsáide a shonraítear sa chinneadh aonair. Ba cheart foráil a dhéanamh freisin go measfar an chéad teorainn ama a bheith infheidhme go hiomlán go dtí go dtabharfaidh an Coimisiún freagra ar an iarraidh ar shíneadh.

(55)

Le gníomhachtú mhodh éigeandála an mhargaidh inmheánaigh, i gcás inar gá, ba cheart a bheith in ann cur i bhfeidhm nósanna imeachta áirithe um fhreagairt do ghéarchéimeanna a ghníomhachtú, ar nósanna imeachta iad lena dtugtar isteach coigeartuithe ar na rialacha lena rialaítear dearadh, monarú, measúnú comhréireachta agus cur ar an margadh earraí atá faoi réir rialacha comhchuibhithe an Aontais chomh maith le rialacha áirithe lena rialaítear na hearraí atá faoi réir chreat ginearálta sábháilteachta táirgí an Aontais. Leis na nósanna imeachta sin um fhreagairt do ghéarchéimeanna, ba cheart a bheith in ann táirgí arna n-ainmniú mar earraí atá ábhartha i gcás géarchéime a chur ar an margadh go tapa i gcomhthéacs éigeandála. I gcás táirgí comhchuibhithe, ba cheart do na comhlachtaí um measúnú comhréireachta tosaíocht a thabhairt don mheasúnú comhréireachta ar earraí atá ábhartha i gcás géarchéime thar aon iarratas leanúnach eile le haghaidh táirgí eile. I gcás ina bhfuil moill mhíchuí ar na nósanna imeachta um measúnú comhréireachta ar earraí atá ábhartha i gcás géarchéime, ba cheart d’údaráis inniúla na mBallstát a bheith in ann údaruithe a eisiúint le haghaidh earraí den sórt sin nach ndeachaigh faoi na nósanna imeachta um measúnú comhréireachta is infheidhme chun iad a chur ar a margadh faoi seach, ar choinníoll go gcomhlíonann siad na ceanglais sábháilteachta is infheidhme. Níor cheart údaruithe den sórt sin a bheith bailí ach amháin i gcríoch an Bhallstáit eisiúna go dtí go sínfear bailíocht na n-údaruithe sin chuig críoch an Aontais trí bhíthin gníomh cur chun feidhme ón gCoimisiún. Ba cheart bailíocht údaruithe den sórt sin lena maolaítear ó nósanna imeachta um measúnú comhréireachta a theorannú d’fhad mhodh éigeandála an mhargaidh inmheánaigh. Ina theannta sin, d’fhonn an méadú ar sholáthar earraí comhchuibhithe agus neamh-chomhchuibhithe atá ábhartha i gcás géarchéime a éascú, ba cheart solúbthachtaí áirithe a thabhairt isteach i ndáil leis na sásraí toimhde comhréireachta agus i ndáil leis an toimhde comhréireachta leis an gceanglas sábháilteachta ginearálta, faoi seach. I gcomhthéacs éigeandáil sa mhargadh inmheánach, ba cheart do mhonaróirí earraí atá ábhartha i gcás géarchéime a bheith in ann brath ar chaighdeáin náisiúnta agus idirnáisiúnta freisin lena soláthraítear leibhéal coibhéiseach cosanta leis na caighdeáin Eorpacha ar foilsíodh na tagairtí dóibh in Iris Oifigiúil an Aontais Eorpaigh. Maidir leis na hearraí comhchuibhithe atá ábhartha i gcás géarchéime, agus maidir leo amháin, i gcásanna nach ann do chaighdeáin Eorpacha den sórt sin nó ina bhfuil comhlíonadh na gcaighdeán sin ródheacair mar thoradh ar chur isteach ar an margadh inmheánach, ba cheart don Choimisiún a bheith in ann sonraíochtaí coiteanna a eisiúint lena bhforáiltear toimhde comhréireachta chun réitigh theicniúla atá réidh le húsáid a sholáthar do na monaróirí.

(56)

Chun na coigeartuithe sin atá ábhartha i gcás géarchéime ar rialacha earnála ábhartha an Aontais a thabhairt isteach, is gá coigeartuithe spriocdhírithe a dhéanamh ar na 16 ghníomh seo a leanas: Treoracha 2000/14/CE (22), 2006/42/AE (23), 2010/35/AE (24), 2014/29/AE (25), 2014/30/AE (26), 2014/33/AE (27), 2014/34/AE (28), 2014/35/AE (29), 2014/53/AE (30), 2014/68/AE (31) ó Pharlaimint na hEorpa agus ón gComhairle agus Rialacháin (AE) 2016/424 (32), (AE) 2016/425 (33), (AE) 2016/426 (34), (AE) Uimh. 305/2011 (35), (AE) 2023/988 (36) agus (AE) 2023/1230 (37) ó Pharlaimint na hEorpa agus ón gComhairle. Níor cheart feidhm a bheith ag na leasuithe lena leagtar síos nósanna imeachta éigeandála i ngach ceann de na gníomhartha lena mbaineann ach amháin nuair a ghníomhachtaítear iad go sonrach. Ba cheart gníomhachtú na nósanna imeachta éigeandála faoi gach gníomh lena mbaineann a bheith coinníollach ar mhodh éigeandála an mhargaidh inmheánaigh a ghníomhachtú faoin Rialachán seo agus ba cheart é a theorannú do tháirgí a ainmnítear mar earraí atá ábhartha i gcás géarchéime agus a bheith teoranta ó thaobh ama d’fhad mhodh éigeandála an mhargaidh inmheánaigh.

(57)

I gcásanna ina bhfuil rioscaí substaintiúla ann d’fheidhmiú an mhargaidh inmheánaigh nó i gcásanna ganntanas tromchúiseach agus leanúnach nó éilimh aird as an ngnáth ar earraí atá ábhartha i gcás géarchéime, d’fhéadfadh bearta ar leibhéal an Aontais arb é is aidhm dóibh a áirithiú go mbeidh earraí atá ábhartha i gcás géarchéime ar fáil, amhail iarrataí tosaíochta, a bheith fíor-riachtanach chun feidhmiú cuí an mhargaidh inmheánaigh agus a shlabhraí soláthair a áirithiú.

(58)

Mar ionstraim na rogha deiridh chun a áirithiú go gcoinneofar feidhmeanna sochaíocha ríthábhachtacha nó gníomhaíochtaí eacnamaíocha ríthábhachtacha ar bun sa mhargadh inmheánach i gcás nárbh fhéidir táirgeadh nó soláthar earraí áirithe atá ábhartha i gcás géarchéime a bhaint amach le bearta eile, ba cheart don Choimisiún a bheith in ann iarrataí a dhíriú chuig oibreoirí eacnamaíocha atá bunaithe san Aontas earraí áirithe atá ábhartha i gcás géarchéime a tháirgeadh nó a sholáthar. Agus iarraidh á heisiúint aige, ba cheart don Choimisiún an tionchar diúltach a d’fhéadfadh a bheith ar an iomaíocht sa mhargadh inmheánach a chur san áireamh chomh maith leis an mbaol go ngéarófaí ar shaobhadh an mhargaidh. Ina theannta sin, níor cheart rogha fhaighteoirí agus thairbhithe na n-iarrataí a bheith idirdhealaitheach.

(59)

Ba cheart an iarraidh tosaíochta a bheith bunaithe ar shonraí oibiachtúla, fíorasacha, intomhaiste agus réasúnaithe. In iarrataí den sórt sin, ba cheart aird a thabhairt ar leasanna dlisteanacha na n-oibreoirí eacnamaíocha agus ar an gcostas agus ar an iarracht is gá le haghaidh aon athrú ar an seicheamh táirgthe. Ba cheart a shonrú go soiléir san iarraidh tosaíochta go bhfanann an rogha glacadh leis an iarraidh nó diúltú di go hiomlán leis an oibreoir eacnamaíoch. I gcás ina roghnaíonn an t-oibreoir eacnamaíoch diúltú don iarraidh tosaíochta, tá sé de shaoirse ag an oibreoir eacnamaíoch freisin cinneadh a dhéanamh i dtaobh diúltú sainráite a sholáthar agus údar a thabhairt agus an Coimisiún á chur ar an eolas faoina dhiúltú.

(60)

Nuair a ghlactar léi, ba cheart tosaíocht a bheith ag an oibleagáid an iarraidh tosaíochta a dhéanamh ar aon oibleagáid feidhmíochta faoin dlí príobháideach nó poiblí. Ba cheart gach iarraidh tosaíochta a dhéanamh ar phraghas cóir réasúnach. Ba cheart a bheith in ann praghas den sórt sin a ríomh ar bhonn meánphraghsanna margaidh le blianta beaga anuas, faoi réir cúiseanna a thabhairt maidir le haon mhéadú nó laghdú, mar shampla boilsciú nó costais ionchuir a chur san áireamh. I bhfianaise a thábhachtaí atá sé soláthar earraí atá ábhartha i gcás géarchéime a áirithiú, ar earraí iad atá fíor-riachtanach chun feidhmeanna sochaíocha ríthábhachtacha nó gníomhaíochtaí eacnamaíocha ríthábhachtacha a choinneáil ar bun sa mhargadh inmheánach, níor cheart comhlíonadh na hoibleagáide maidir le hiarraidh tosaíochta a dhéanamh a bheith faoi dhliteanas do thríú páirtithe i leith damáistí a d’fhéadfadh eascairt as aon sárú ar oibleagáidí conarthacha arna rialú ag dlí Ballstáit, a mhéid a bhí gá le sárú na n-oibleagáidí conarthacha chun an tosaíocht shainordaithe a chomhlíonadh. Ba cheart cead a bheith ag oibreoirí eacnamaíocha a d’fhéadfadh a bheith laistigh de raon feidhme iarrata tosaíochta foráil a dhéanamh, faoi choinníollacha a gconarthaí tráchtála, d’iarmhairtí a d’fhéadfadh a bheith ag iarraidh tosaíochta. Gan dochar d’infheidhmeacht forálacha eile, níor cheart, leis an díolúine dliteanais sin, difear a dhéanamh don dliteanas i leith táirgí lochtacha dá bhforáiltear i dTreoir 85/374/CEE ón gComhairle (38).

(61)

I gcás inar ghlac an t-oibreoir eacnamaíoch go sainráite le hiarraidh tosaíochta agus ina bhfuil gníomh cur chun feidhme glactha ag an gCoimisiún tar éis an ghlactha sin, ba cheart don oibreoir eacnamaíoch coinníollacha uile an ghnímh cur chun feidhme sin a chomhlíonadh. Mura gcomhlíonann an t-oibreoir eacnamaíoch na coinníollacha a leagtar síos sa ghníomh cur chun feidhme, ba cheart an tairbhe a bhaineann le tarscaoileadh dliteanais chonarthaigh a chailleadh mar gheall air sin. Nuair a dhéantar an neamhchomhlíonadh d’aon ghnó nó nuair is mórfhaillí is cúis leis, féadfaidh an t-oibreoir eacnamaíoch a bheith faoi réir fíneála freisin, faoi réir phrionsabal na comhréireachta. Níor cheart é a bheith indéanta fíneálacha a fhorchur ar oibreoirí eacnamaíocha nár ghlac go sainráite le hiarraidh tosaíochta.

(62)

I gcás ina gcuireann Ballstát amháin nó níos mó an Coimisiún ar an eolas faoi ghanntanais earraí agus seirbhísí atá ábhartha i gcás géarchéime nó faoi riosca go bhféadfaidís a bheith ann, ba cheart don Choimisiún a bheith in ann a mholadh go ndéanfadh na Ballstáit bearta arb é is aidhm dóibh a áirithiú go dtiocfaidh méadú tapa ar infhaighteacht earraí agus seirbhísí atá ábhartha i gcás géarchéime. Ba cheart don Choimisiún tionchar na mbeart atá beartaithe ar na hoibreoirí eacnamaíocha lena mbaineann a mheas. D’fhéadfaí bearta a áireamh ar na moltaí sin ar bearta iad arb é is aidhm dóibh leathnú, athrú cuspóra nó bunú acmhainneachtaí táirgthe nua a éascú le haghaidh earraí atá ábhartha i gcás géarchéime nó acmhainneachtaí nua a bhaineann le gníomhaíochtaí seirbhíse atá ábhartha i gcás géarchéime agus arb é is aidhm dóibh freisin dlús a chur leis na nósanna imeachta formheasa, údarúcháin agus clárúcháin ábhartha agus is infheidhme.

(63)

I gcás ina gcuireann Ballstát amháin nó níos mó an Coimisiún ar an eolas faoi ghanntanais earraí atá ábhartha i gcás géarchéime nó faoi ghanntanais seirbhísí atá ábhartha i gcás géarchéime, ba cheart don Choimisiún an fhaisnéis sin a tharchur chuig údaráis inniúla uile na mBallstát agus comhordú na freagartha a chuíchóiriú. Ina theannta sin, chun a áirithiú go mbeidh fáil ar earraí áirithe atá ábhartha i gcás géarchéime nó ar sheirbhísí áirithe atá ábhartha i gcás géarchéime le linn éigeandáil sa mhargadh inmheánach agus d’fhonn deireadh a chur leis an éigeandáil sa mhargadh inmheánach, ba cheart don Choimisiún a bheith in ann a mholadh do na Ballstáit na hearraí nó na seirbhísí sin a dháileadh, ag féachaint go cuí do phrionsabail na dlúthpháirtíochta, an riachtanais agus na comhréireachta. Ba cheart don Choimisiún cuidiú leis an dáileadh sin a chomhordú.

(64)

I dteannta na féidearthachta maidir le soláthar comhpháirteach idir an Coimisiún agus Ballstát amháin nó níos mó, agus dá bhforáiltear i Rialachán (AE, Euratom) 2024/2509 ó Pharlaimint na hEorpa agus ón gComhairle (39) (‘an Rialachán Airgeadais’), ba cheart do Bhallstát amháin nó níos mó a bheith in ann a iarraidh ar an gCoimisiún soláthar a sheoladh thar a gceann nó ina n-ainm chun earraí agus seirbhísí a bhfuil ríthábhacht leo nó earraí agus seirbhísí atá ábhartha i gcás géarchéime a cheannach, chun cumhacht ceannaigh agus seasamh caibidlíochta an Choimisiúin a ghiaráil le linn mhodh forairdill an mhargaidh inmheánaigh nó mhodh éigeandála an mhargaidh inmheánaigh. Ba cheart a chumhdach le soláthar den sórt sin fáil oibreacha, soláthairtí nó seirbhísí atá ábhartha i gcás géarchéime ag an údarás conarthach nó ag an eintiteas conarthach, trí bhíthin conartha, agus talamh, foirgnimh nó maoin dhochorraithe eile a fháil nó a fháil ar cíos ó oibreoirí eacnamaíocha arna roghnú ag an údarás conarthach sin nó ag an eintiteas conarthach sin chun freagairt ar an ngéarchéim. Ba cheart don Choimisiún a bheith in ann an nós imeachta soláthair ábhartha a sheoladh thar ceann nó in ainm na mBallstát bunaithe ar chomhaontú idir na páirtithe, nó gníomhú mar mhórdhíoltóir, trí sholáthairtí agus seirbhísí a cheannach, a stocáil agus a athdhíol nó a dheonú, lena n-áirítear talamh, foirgnimh nó maoin dhochorraithe eile a fháil ar cíos, do na Ballstáit rannpháirteacha nó do na heagraíochtaí comhpháirtíochta atá roghnaithe aige.

(65)

Ba léir le linn ghéarchéim COVID-19 gur cheart don Choimisiún a bheith in ann earraí agus seirbhísí atá ábhartha i gcás géarchéime a sholáthar i gcomhpháirt le Stáit Chomhlachas Saorthrádála na hEorpa (CSTE) agus tíortha lasmuigh den Aontas, amhail micreastáit na hEorpa. Aon nósanna imeachta soláthair chomhpháirtigh a sheoltar chun earraí agus seirbhísí atá ábhartha i gcás géarchéime nó earraí agus seirbhísí a bhfuil ríthábhacht leo a fháil, níor cheart dóibh difear diúltach a dhéanamh d’fheidhmiú an mhargaidh inmheánaigh agus níor cheart idirdhealú ná srianadh ar thrádáil a bheith iontu, ná níor cheart nósanna imeachta soláthair den sórt sin a bheith ina gcúis le saobhadh iomaíochta ná níor cheart aon tionchar díreach airgeadais a bheith acu ar bhuiséad na dtíortha nach bhfuil rannpháirteach sa nós imeachta soláthair chomhpháirtigh. Tá sé ríthábhachtach freisin a áirithiú go ndéanfaidh na Ballstáit a gcuid gníomhaíochtaí a chomhordú le tacaíocht ón gCoimisiún agus ón mBord sula seolfar nósanna imeachta chun earraí agus seirbhísí atá ábhartha i gcás géarchéime a sholáthar. Le linn na céime teagmhasaí, ba cheart do na Ballstáit córas a chur i bhfeidhm lena gceadófaí sainaithint na n-údarás conarthach agus na n-eintiteas conarthach atá faoi réir Threoracha 2014/24/AE (40) agus 2014/25/AE (41) ó Pharlaimint na hEorpa agus ón gComhairle a bhfuil na hearraí agus na seirbhísí atá ábhartha i gcás géarchéime á soláthar acu le linn éigeandálaí. Ba cheart do na Ballstáit a bheith in ann brath ar na lároifigí idirchaidrimh chun faisnéis a bhailiú agus a tharchur maidir le soláthar leanúnach agus beartaithe ag na húdaráis chonarthacha agus na heintitis chonarthacha ina gcríoch chun críocha chomhlíonadh an chlásail comhordúcháin faoin Rialachán seo.

(66)

Leis an gcomhaontú lena rialaítear soláthar an Choimisiúin thar ceann Ballstát amháin nó níos mó nó in ainm Ballstáit amháin nó níos mó nó soláthar comhpháirteach idir an Coimisiún agus Ballstát amháin nó níos mó, ba cheart foráil a dhéanamh, i gcás inarb iomchuí, do chlásal eisiachais, faoina ngeallann na Ballstáit rannpháirteacha gan na hearraí atá ábhartha i gcás géarchéime i dtrácht nó na seirbhísí atá ábhartha i gcás géarchéime i dtrácht a sholáthar trí bhealaí eile agus gan caibidlíocht chomhthreomhar a dhéanamh. I gcás ina bhforáiltear do chlásal eisiachais den sórt sin, ba cheart a shonrú ann, i gcás ina bhfuil riachtanais bhreise soláthair ag na Ballstáit agus nach mbaineann soláthar den sórt sin an bonn ón soláthar comhpháirteach leanúnach nó ón soláthar leanúnach thar ceann nó in ainm na mBallstát de réir mheasúnú an Choimisiúin, gur féidir leis na Ballstáit rannpháirteacha a nós imeachta soláthair féin a sheoladh. Chun críocha an tsoláthair chomhpháirtigh, ba cheart Stáit CSTE agus tíortha is iarrthóirí ar bhallraíocht san Aontas, chomh maith le Prionsacht Andóra, Prionsacht Mhonacó, Poblacht San Mairíne agus Stát Chathair na Vatacáine a mheas mar Bhallstáit rannpháirteacha i gcás ina gcinneann siad a bheith rannpháirteach sa soláthar comhpháirteach. Is é is cuspóir don chlásal eisiachais a áirithiú nach mbainfear an bonn ón soláthar comhpháirteach leanúnach nó ón soláthar leanúnach thar ceann nó in ainm na mBallstát. Ní dhéanann soláthar de minimis difear do sholáthar den sórt sin, agus dá bhrí sin ba cheart a cheadú d’údaráis chonarthacha agus eintitis chonarthacha na mBallstát nós imeachta soláthair a sheoladh a thiteann faoi bhun thairseacha Threoracha 2014/24/AE agus 2014/25/AE. Ina theannta sin, ós rud é nach ndéanann soláthar ó oibreoir eacnamaíoch nach bhfuil rannpháirteach sa tairiscint leanúnach an bonn a bhaint ón soláthar leanúnach, níor cheart feidhm a bheith ag an gclásal eisiachais a leagtar síos sa Rialachán seo maidir leis an gcineál sin soláthair. I gcás ina gcinneann Ballstát a bheith rannpháirteach i soláthar comhpháirteach nó i soláthar thar ceann nó in ainm na mBallstát chun earraí agus seirbhísí atá ábhartha i gcás géarchéime a fháil, ba cheart dó a bheith in ann na lároifigí idirchaidrimh dá bhforáiltear sa Rialachán seo a úsáid chun na húdaráis chonarthacha uile agus na heintitis chonarthacha uile ina chríoch a chur ar an eolas faoin soláthar leanúnach lena spreagtar cur i bhfeidhm an chlásail eisiachais.

(67)

Is bunphrionsabal í an trédhearcacht maidir le soláthar poiblí éifeachtach lena bhfeabhsaítear an iomaíocht, lena méadaítear an éifeachtúlacht agus lena gcruthaítear machaire comhréidh. Ba cheart Parlaimint na hEorpa a chur ar an eolas faoi nósanna imeachta a bhaineann le soláthairtí comhpháirteacha faoin Rialachán seo agus, arna iarraidh sin, rochtain a dheonú di ar na conarthaí arna dtabhairt i gcrích mar thoradh ar na nósanna imeachta sin, faoi réir cosaint leormhaith rúndachta, cosaint sonraí pearsanta, chosaint shlándáil náisiúnta na mBallstát agus cosaint faisnéise atá íogair ó thaobh na tráchtála de, lena n-áirítear rúin ghnó.

(68)

Is gá coimircí a sholáthar do shealbhóirí faisnéise go ndéanfar an fhaisnéis atá soláthartha acu mar thoradh ar chur i bhfeidhm an Rialacháin seo a phróiseáil agus a úsáid agus prionsabail an riachtanais agus na comhréireachta á n-urramú. Maidir le faisnéis a fhaightear trí bhíthin faireacháin, iarrataí ar fhaisnéis agus iarrataí tosaíochta, ba cheart d’institiúidí, comhlachtaí, oifigí nó gníomhaireachtaí an Aontais agus a bhfoireann, údaráis na mBallstát agus a bhfoireann, nó aon duine aonair, lena n-áirítear comhaltaí agus breathnóirí an Bhoird, agus dóibhsean amháin, í a úsáid chun na críche ar iarradh faisnéis den sórt sin ina leith.

(69)

Ós rud é go ngníomhaíonn an Bord mar chomhlacht comhairleach don Choimisiún, ba cheart dó prionsabail, caighdeáin agus rialacha an Choimisiúin a urramú maidir le faisnéis rúnaicmithe agus faisnéis íogair neamh-rúnaicmithe a chosaint, lena n-áirítear, inter alia, forálacha chun faisnéis den sórt sin a phróiseáil agus a stóráil mar a leagtar amach i gCinntí (AE, Euratom) 2015/443 (42) agus (AE, Euratom) 2015/444 (43) ón gCoimisiún. Ba cheart do bhaill foirne an Choimisiúin agus institiúidí agus comhlachtaí eile de chuid an Aontais a bhfuil rochtain acu ar fhaisnéis rúnaicmithe agus ar fhaisnéis íogair neamh-rúnaicmithe a bhaineann le hobair an Bhoird a bheith faoi cheangal na gceanglas rúndachta faoi Airteagal 339 CFAE, fiú tar éis deireadh a theacht lena ndualgais.

(70)

I gcás ina mbaineann na gníomhaíochtaí atá le déanamh de bhun an Rialacháin seo le próiseáil sonraí pearsanta, ba cheart do phróiseáil den sórt sin reachtaíocht ábhartha an Aontais maidir le cosaint sonraí pearsanta a chomhlíonadh, eadhon Rialacháin (AE) 2016/679 (44) agus (AE) 2018/1725 (45) ó Pharlaimint na hEorpa agus ón gComhairle.

(71)

Is gá rialacha a leagan síos maidir le huirlisí digiteacha chun ullmhacht a áirithiú chun freagairt ar éigeandálaí a d’fhéadfadh a bheith ann amach anseo ar bhealach tráthúil agus éifeachtúil chun feidhmiú leanúnach an mhargaidh inmheánaigh, saorghluaiseacht earraí, seirbhísí agus daoine le linn géarchéime agus infhaighteacht earraí agus seirbhísí atá ábhartha i gcás géarchéime a ráthú do shaoránaigh, do ghnólachtaí agus d’údaráis phoiblí. Ina theannta sin, ba cheart rialacha a leagan amach sa Rialachán seo maidir le huirlisí digiteacha lena n-áirithítear go dtabharfar tosaíocht do nósanna imeachta údarúcháin, clárúcháin nó dearbhúcháin, agus go gcuirfear dlús leo, chun saorghluaiseacht daoine agus tarchur agus malartú slán faisnéise a éascú. Ba cheart don Choimisiún agus do na Ballstáit na huirlisí digiteacha atá acu cheana a athúsáid nó a leathnú a mhéid is féidir. I gcás nach féidir sin a dhéanamh, ba cheart don Choimisiún agus do na Ballstáit uirlisí digiteacha nua a bhunú, i gcás inar gá agus ina bhfuil údar leis. Ba cheart don Choimisiún gnéithe teicniúla uirlisí nó bonneagar den sórt sin a leagan amach trí bhíthin gníomhartha cur chun feidhme.

(72)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún i dtaca le sonraíochtaí an chreata theagmhasaigh maidir le hullmhacht, comhar, malartú faisnéise agus cumarsáid géarchéime maidir le modhanna forairdill agus éigeandála an mhargaidh inmheánaigh. Thairis sin, ba cheart cumhachtaí cur chun feidhme a thabhairt don Choimisiún i dtaca leis an bhféidearthacht bearta maolaithe a ghlacadh, eadhon socruithe riaracháin, uirlisí digiteacha agus teimpléid dhigiteacha, lena n-éascaítear saorghluaiseacht daoine. Thairis sin, ba cheart cumhachtaí cur chun feidhme a thabhairt don Choimisiún i dtaca le bearta sonracha freagartha éigeandála a ghníomhachtú tráth mhodh éigeandála an mhargaidh inmheánaigh, chun gur féidir freagairt go tapa agus ar bhonn comhordaithe. Ina theannta sin, ba cheart cumhachtaí cur chun feidhme a thabhairt don Choimisiún i dtaca le gnéithe teicniúla d’uirlisí digiteacha sonracha a bhunú chun tacú le cuspóirí an Rialacháin seo. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (46).

(73)

Ba cheart don Choimisiún gníomhartha cur chun feidhme atá infheidhme láithreach a ghlacadh más rud é, i gcásanna a bhfuil údar cuí leo a bhaineann le tionchair na géarchéime ar an margadh inmheánach, go n-éilítear amhlaidh ar mhórfhorais phráinne.

(74)

Leis an Rialachán seo, urramaítear cearta bunúsacha agus comhlíontar na prionsabail a aithnítear go háirithe le Cairt um Chearta Bunúsacha an Aontais Eorpaigh (‘an Chairt’). Go háirithe, urramaítear leis an ceart chun príobháideachais atá ag na hoibreoirí eacnamaíocha a chumhdaítear in Airteagal 7 den Chairt, an ceart go ndéanfar sonraí a chosaint a leagtar amach in Airteagal 8 den Chairt, an tsaoirse chun gnó a sheoladh agus an tsaoirse conartha, a chosnaítear le hAirteagal 16 den Chairt, an ceart chun maoine, a chosnaítear le hAirteagal 17 den Chairt, an ceart chun cómhargála agus an ceart chun gníomhaíocht chomhchoiteann a ghlacadh a chosnaítear le hAirteagal 28 den Chairt agus an ceart chun leigheas breithiúnach éifeachtach agus triail chóir a fháil dá bhforáiltear in Airteagal 47 den Chairt.

(75)

Leis an Rialachán seo, níor cheart difear a dhéanamh do neamhspleáchas na gcomhpháirtithe sóisialta mar a aithnítear le CFAE.

(76)

Níor cheart an Rialachán seo a léirmhíniú mar ní a dhéanann difear don cheart chun cosaint an chomhshaoil, don cheart chun cómhargála ná don cheart chun gníomhaíocht chomhchoiteann a ghlacadh i gcomhréir leis an gCairt, lena n-áirítear an ceart atá ag oibrithe agus ag fostóirí gníomhaíocht chomhchoiteann a ghlacadh chun a leasanna a chosaint, lena n-áirítear dul ar stailc, agus an ceart nó an tsaoirse chun dul ar stailc nó gníomhaíocht eile a dhéanamh a chumhdaítear leis na córais shonracha caidrimh thionsclaíoch sna Ballstáit i gcomhréir leis an dlí náisiúnta nó leis an gcleachtas náisiúnta.

(77)

Ní dhéanann gníomhartha dlí eile de chuid an Aontais, amhail na gníomhartha sin lena bhforáiltear maidir le hoibleagáidí ar oibreoirí eacnamaíocha sonraí a chur ar fáil do chomhlachtaí earnála poiblí, difear don Rialachán seo. Dá bhrí sin, i gcás ina bhfuil forálacha i ngníomhartha dlí eile de chuid an Aontais freisin maidir le hiarrataí ar fhaisnéis ón gCoimisiún a bhfuil an cuspóir céanna acu agus atá leo siúd dá bhforáiltear faoin Rialachán seo, tar éis don Chomhairle modh éigeandála an mhargaidh inmheánaigh a ghníomhachtú, níor cheart feidhm a bheith ach ag na forálacha ábhartha den Rialachán seo a bhaineann le hiarrataí ar fhaisnéis.

(78)

Tá an tAontas tiomanta i gcónaí don dlúthpháirtíocht idirnáisiúnta agus tacaíonn sé go láidir leis an bprionsabal go ndéanfar aon bhearta a mheastar a bheith riachtanach arna ndéanamh faoin Rialachán seo, lena n-áirítear na bearta sin is gá chun ganntanais chriticiúla a chosc nó a mhaolú, a chur chun feidhme ar bhealach spriocdhírithe, trédhearcach, comhréireach, sealadach agus comhsheasmhach le hoibleagáidí na hEagraíochta Domhanda Trádála.

(79)

Ba cheart a áireamh i gcreat an Aontais gnéithe idir-réigiúnacha chun bearta comhleanúnacha, ilearnála agus trasteorann a bhunú, ar bearta freagartha ar chásanna teagmhasacha, forairdill agus éigeandála sa mhargadh inmheánach iad, agus aird á tabhairt, go háirithe, ar na hacmhainní, na hacmhainneachtaí agus na leochaileachtaí ar fud réigiún comharsanachta, go háirithe réigiúin teorann.

(80)

Ba cheart don Choimisiún meastóireacht thráthrialta a dhéanamh ar fheidhmiú agus éifeachtacht an Rialacháin seo agus tuarascáil a chur faoi bhráid Pharlaimint na hEorpa agus na Comhairle, lena n-áirítear meastóireacht ar obair an Bhoird, tástálacha struis, oiliúint agus prótacail ghéarchéime, na critéir chun modh forairdill an mhargaidh inmheánaigh agus modh éigeandála an mhargaidh inmheánaigh a ghníomhachtú chomh maith le húsáid uirlisí digiteacha. Ina theannta sin, ba cheart tuarascálacha a thíolacadh laistigh de 4 mhí tar éis modh forairdill an mhargaidh inmheánaigh nó modh éigeandála an mhargaidh inmheánaigh, de réir mar is infheidhme, a dhíghníomhachtú. Ba cheart a áireamh sna tuarascálacha sin meastóireacht ar na bearta a chuirtear chun feidhme faoin Rialachán seo i ndáil leis an ngéarchéim as ar eascair gníomhachtú an mhodha sin, go háirithe ar éifeachtacht na mbeart sin. D’fhéadfaí aon fheabhsuithe a mholadh sna tuarascálacha sin más gá, agus d’fhéadfaí tograí reachtacha ábhartha a bheith ag gabháil leo, i gcás inarb iomchuí.

(81)

Foráiltear le Rialachán (CE) Uimh. 2679/98 ón gComhairle (47) do shásra le haghaidh plé déthaobhach agus fógra a thabhairt faoi bhacainní ar fheidhmiú an mhargaidh inmheánaigh. Chun dúbláil rialacha a sheachaint i gcás ina bhfuil modh éigeandála an mhargaidh inmheánaigh gníomhachtaithe, ba cheart an Rialachán sin a leasú dá réir. Níor cheart do Rialachán (CE) Uimh. 2679/98 difear a dhéanamh ar bhealach ar bith d’fheidhmiú na gceart bunúsach mar a aithnítear iad ar leibhéal an Aontais agus sna Ballstáit, lena n-áirítear an ceart nó an tsaoirse chun dul ar stailc nó chun gníomhaíocht eile a dhéanamh a chumhdaítear leis na córais shonracha caidrimh thionsclaíoch sna Ballstáit, i gcomhréir leis an dlí náisiúnta nó leis an gcleachtas náisiúnta. Ba cheart é a bheith gan dochar freisin don cheart dul i mbun caibidlíochta, comhaontuithe comhchoiteanna a thabhairt i gcrích agus gníomhaíocht chomhchoiteann a ghlacadh i gcomhréir leis an dlí náisiúnta nó leis an gcleachtas náisiúnta.

(82)

Ós rud é nach féidir leis na Ballstáit cuspóir an Rialacháin seo, eadhon feidhmiú rianúil agus gan bhriseadh an mhargaidh inmheánaigh a áirithiú trí bhearta teagmhasacha, forairdill agus éigeandála a chur i bhfeidhm ar fud an mhargaidh inmheánaigh chun comhordú na mbeart freagartha a éascú i gcás géarchéime, a ghnóthú go leordhóthanach agus, de bharr fhairsinge nó éifeachtaí na gníomhaíochta, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,