(1)

Le Rialachán Cur Chun Feidhme (AE) 2022/1194 ón gCoimisiún (2), bunaítear bearta chun Clavibacter sepedonicus (Spieckermann & Kotthoff 1914) Nouioui et al. 2018 a dhíothú agus chun a leathadh a chosc i gcríoch an Aontais.

(2)

I gcomhréir le hAirteagal 6(1), an chéad fhomhír, de Rialachán Cur Chun Feidhme (AE) 2022/1194, níl plandaí sonraithe a ainmnítear mar phlandaí ionfhabhtaithe leis an lotnaid shonraithe le plandú. Áiritheoidh an t-údarás inniúil go scriosfar na plandaí sonraithe ionfhabhtaithe nó go ndíorthófar iad ar bhealach eile, ar choinníoll nach ann d’aon riosca inaitheanta go leathfaidh an lotnaid shonraithe.

(3)

Ós rud é nach féidir leis na húdaráis inniúla rochtain éasca a fháil ar na suíomhanna uile faoi seach, is féidir le hoibreoirí gairmiúla, faoi mhaoirseacht an údaráis inniúil, na bearta sin a dhéanamh ar bhealach níos éifeachtaí ná na húdaráis inniúla féin.

(4)

I gcomhréir le hAirteagal 3(3) den Rialachán sin, déanfaidh na Ballstáit suirbhéanna bliantúla rioscabhunaithe maidir leis an lotnaid sin a bheith ann agus tuairisceoidh siad torthaí na suirbhéanna sin don Choimisiún agus do na Ballstáit eile ar bhonn bliantúil. Agus na torthaí sin á dtuairisciú acu, úsáidfidh na Ballstáit teimpléad a leagtar amach in Iarscríbhinn II a ghabhann leis an Rialachán sin.

(5)

Is léir anois ó chur i bhfeidhm Rialachán Cur Chun Feidhme (AE) 2022/1194 gur cheart an teimpléad sin a leasú chun feabhas a chur ar a úsáid phraiticiúil agus ar a éifeachtúlacht.

(6)

Go háirithe, ní sholáthraítear faisnéis shuntasach chun críoch an tsuirbhé le sonraí a thuairiscítear maidir leis an tsampláil ar thiúbair seachas tiúbair le haghaidh plandú agus prátaí margaidh agus prátaí próiseála.

(7)

Ina theannta sin, is gá a shoiléiriú an dtagann torthaí tástála saotharlainne ó shampláil ar thiúbair atá á stóráil nó ó shampláil ar thiúbair le linn cigireachtaí amhairc ar bharra atá ag fás.

(8)

Ní féidir an líon cigireachtaí amhairc dearfacha a thaifeadadh go dtí go bhfaightear na torthaí ó thástáil saotharlainne. Dá bhrí sin, ba cheart an colún ábhartha a aistriú go dtí na ranna maidir le tástálacha saotharlainne.

(9)

Tógtar samplaí siomptómacha agus samplaí aisiomptómacha le linn cigireachtaí amhairc. Braitear ionfhabhtuithe folaigh ar shamplaí aisiomptómacha. Mar gheall ar an tábhacht a bhaineann le hionfhabhtú folaigh chun leathadh féideartha an ghalair a thuiscint agus chun na bearta atá le déanamh chun leathadh den sórt sin a sheachaint, ba cheart idirdhealú a dhéanamh sa teimpléad idir torthaí ó shamplaí siomptómacha agus ó shamplaí aisiomptómacha.

(10)

Is léir ón taithí a fuarthas nach soláthraítear faisnéis shuntasach chun críoch an tsuirbhé le sonraí a thuairiscítear maidir leis an tréimhse samplála ar thiúbair le haghaidh tástáil saotharlainne.

(11)

Soláthraítear ceanglais maidir le méid an tsampla i bpointe 4 d’Iarscríbhinn I a ghabhann le Rialachán Cur Chun Feidhme (AE) 2022/1194. Dá bhrí sin, níl gá a thuilleadh leis an gceanglas sonraí maidir le méid na mbaisceanna i dtona a chur in iúl sna teimpléid, ní chruthaíonn sé ach ualach breise riaracháin.

(12)

Thairis sin, is gá a shoiléiriú sa chéad abairt d’Iarscríbhinn II go gcuirtear i láthair leis an teimpléad torthaí an tsuirbhé ó fhómhar prátaí na bliana roimh bhliain an tuairiscithe, chun nach mbeidh mearbhall ar na húdaráis inniúla maidir leis an mbliain lena mbaineann agus chun aighneachtaí comhsheasmhacha na dtorthaí faoi seach ó na húdaráis inniúla éagsúla a éascú.

(13)

Ba cheart Rialachán Cur Chun Feidhme (AE) 2022/1194 a leasú dá réir sin.

(14)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

in Airteagal 6(1), cuirtear an méid seo a leanas in ionad na chéad fhomhíre:

‘Ní dhéanfar plandaí sonraithe a ainmnítear mar phlandaí ionfhabhtaithe ag an lotnaid shonraithe de bhun Airteagal 5(5), pointe (a) a phlandú. Áiritheoidh oibreoirí gairmiúla, faoi mhaoirseacht oifigiúil an údaráis inniúla, go scriosfar na plandaí sonraithe ionfhabhtaithe nó go ndíorthófar iad ar bhealach eile, i gcomhréir le pointe 1 d’Iarscríbhinn V, ar choinníoll go suitear nach ann d’aon riosca inaitheanta go leathfaidh an lotnaid shonraithe’;

(2)

Cuirtear an téacs atá san Iarscríbhinn a ghabhann leis an Rialachán seo in ionad Iarscríbhinn II.