(1)

Leagtar síos in Airteagal 19(2) de Rialachán (CE) Uimh. 1217/2009 nach mór ranníocaíochtaí airgeadais ón gCiste Eorpach um Ráthaíocht Talmhaíochta (CERT) a sholáthar do na Ballstáit chun ranníocaíocht a dhéanamh le costais cur chun feidhme na mBallstát agus an córas á bhunú acu chun athróga a bhailiú a bhaineann leis na topaicí a leagtar amach in Iarscríbhinn -I a ghabhann le Rialachán (CE) Uimh. 1217/2009, go háirithe athróga comhshaoil agus sóisialta, chun ceanglais an Rialacháin sin a chomhlíonadh, lena n-áirítear ceanglais a bhaineann le hoiliúint agus idir-inoibritheacht idir córais um bailiú sonraí.

(2)

Chun na críche sin, is gá, go háirithe, na nósanna imeachta mionsonraithe a leagan síos a bhaineann leis na ranníocaíochtaí airgeadais ón Aontas dá dtagraítear in Airteagal 19(2) de Rialachán (CE) Uimh. 1217/2009 agus lena leagtar amach na critéir ar ar a mbonn a leithdháiltear na ranníocaíochtaí in aghaidh an Bhallstáit.

(3)

Áirítear i mbuiséad an Aontais le haghaidh 2024, laistigh d’imchlúdach CERT, suim EUR 50 milliún le haghaidh na ranníocaíochtaí airgeadais dá dtagraítear in Airteagal 19(2) de Rialachán (CE) Uimh. 1217/2009, chun tacú leis na Ballstáit an Líonra Sonraí um Inbhuanaitheacht Feirme (LSIF) a bhunú.

(4)

Chun aghaidh a thabhairt ar na hiarrachtaí atá ag teastáil ó gach Ballstát chun a gcóras ríomhairithe um bailiú agus um thuairisciú sonraí a thiontú chun ceanglais LSIF a chomhlíonadh, agus chun bainistíocht airgeadais na ranníocaíochta ón Aontas a shimpliú, ba cheart na ranníocaíochtaí airgeadais ón Aontas dá dtagraítear in Airteagal 19(2) de Rialachán (CE) Uimh. 1217/2009 a chur ar fáil do na Ballstáit i bhfoirm ranníocaíocht chnapshuime chun costais incháilithe a chumhdach, mar atá na costais sin a bhaineann le forbairt na teicneolaíochta faisnéise agus le hidir-inoibritheacht idir na foinsí éagsúla sonraí a liostaítear in Airteagal 4(2) de Rialachán (CE) Uimh. 1217/2009.

(5)

Tar éis measúnú domhain a dhéanamh, measann an Coimisiún gurb iad cnapshuimeanna an fhoirm ranníocaíochta is iomchuí toisc go bhfuil an cineál gníomhaíochta lena mbunaítear LSIF oiriúnach do chostais ar féidir iad a mheas roimh ré, lena mbaineann gníomhaíochtaí gaolmhara a mbeidh bunú oibríochtúil LSIF mar thoradh orthu. Ina theannta sin, meastar go bhfuil riosca íseal neamhrialtachta nó calaoise ann toisc gur comhlachtaí poiblí iad na tairbhithe. Meastar freisin go ndéanfaidh úsáid ranníocaíochtaí cnapshuime an cur chun feidhme a shimpliú go mór don Choimisiún agus do na Ballstáit trí dheireadh a chur leis an ngá atá le tuairisciú airgeadais agus fíorú airgeadais.

(6)

Chun bainistíocht airgeadais na ranníocaíochta ón Aontas a shimpliú, ba cheart na méideanna cnapshuime atá le cur ar fáil a bhunú ar bhuiséad measta a bheidh le soláthar ag gach Ballstát, faoi réir uasmhéideanna atá comhréireach leis an daonra talmhaíochta, éagsúlacht na struchtúr laistigh den earnáil talmhaíochta agus méid na ranníocaíochta ó gach Ballstát le táirgeadh talmhaíochta an Aontais.

(7)

In éagmais aon idirthréimhse shonrach lena gceadófaí céim ullmhúcháin sho-aitheanta roimh an gcur chun feidhme, ba cheart do na Ballstáit na ceanglais nua a tugadh isteach le Rialachán (AE) 2023/2674 ó Pharlaimint na hEorpa agus ón gComhairle (2), lena leasaítear Rialachán (CE) Uimh. 1217/2009, a chur i bhfeidhm de réir a chéile ó thús an chéad timthrialla bailithe sonraí tar éis theacht i bhfeidhm Rialachán (AE) 2023/2674, i.e., an timthriall a bhaineann leis an mbliain tuairiscithe 2025. Tugtar le tuiscint leis sin gur tathantaíodh ar na Ballstáit tús a chur lena gcórais a oiriúnú díreach tar éis theacht i bhfeidhm na gceanglas nua go luath in 2024 ionas go mbeidh siad in ann na chéad oiriúnuithe a chur i bhfeidhm roimh dheireadh mhí Dheireadh Fómhair 2024, nuair a chuirfear tús le timthriall bailithe na sonraí nua. Chun an sprioc-am sin a chomhlíonadh agus chun na ceanglais nua a chur chun feidhme go rathúil, moladh do na Ballstáit cur chun feidhme na ngníomhaíochtaí a bhfuil gá leo le haghaidh an aistrithe chuig LSIF a chur chun cinn. Dá réir sin, agus ionas nach ngearrfar pionós ar na Ballstáit as tús a chur leis na ceanglais nua a chur chun feidhme a luaithe is féidir in 2024, ba cheart údarú a thabhairt do na Ballstáit na costais a thabhaítear ón 1 Eanáir 2024 a mheas mar chostais atá incháilithe do na ranníocaíochtaí airgeadais ón Aontas dá dtagraítear in Airteagal 19(2) de Rialachán (CE) Uimh. 1217/2009.

(8)

Ba cheart bunú LSIF i ngach Ballstát, agus dá bhrí sin incháilitheacht na ranníocaíochta ón Aontas, a fhíorú trí úsáid a bhaint as tuarascálacha cur chun feidhme arna dtarraingt suas ag na Ballstáit maidir leis na gníomhaíochtaí iarbhír a dhéantar a bhfuil bunú oibríochtúil LSIF mar thoradh orthu. D’fhéadfadh na gníomhaíochtaí iarbhír a dhéantar a bheith éagsúil leis na gníomhaíochtaí a bhí beartaithe ar dtús i gcás inar cuireadh gníomhaíochtaí malartacha ábhartha ina n-ionad.

(9)

Chun dlús a chur leis an tiontú chuig LSIF, ba cheart réamh-mhaoiniú a sholáthar do na Ballstáit roimh an 31 Nollaig 2024.

(10)

Beidh sé de chumhacht ag an gCoimisiún, ag Oifig an Ionchúisitheora Phoiblí Eorpaigh (OIPE) i leith na mBallstát sin atá rannpháirteach sa chomhar feabhsaithe de bhun Rialachán (AE) 2017/1939 ón gComhairle (3), ag an Oifig Eorpach Frith-Chalaoise (OLAF) agus ag an gCúirt Iniúchóirí a n-inniúlachtaí féin a fheidhmiú, lena n-áirítear iniúchtaí, seiceálacha ar an láthair agus imscrúduithe a dhéanamh ar úsáid na ranníocaíochtaí airgeadais ón Aontas dá bhforáiltear faoin Rialachán seo.

(11)

Chun é a chur ar a gcumas do na Ballstáit togra a chur faoi bhráid an Choimisiúin ina leagfar amach méid na ranníocaíochtaí cnapshuime a iarradh a luaithe is féidir, ba cheart an Rialachán seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

(12)

Tá na bearta dá bhforáiltear sa Rialachán seo i gcomhréir leis an tuairim ón gCoiste um an Líonra Sonraí um Inbhuanaitheacht Feirme,