1.   I gcás go gceanglaítear leis an Reacht nó leis na Rialacha seo doiciméad a sheirbheáil ar dhuine, féachfaidh an Cláraitheoir chuige go ndéanfar an tseirbheáil trí mheán leictreonach nó trí chóip den doiciméad atá le seirbheáil a chur chuige tríd an bpost cláraithe, maille le foirm admhála, nó tríd an gcóip a sheachadadh go pearsanta agus admháil a fháil ina leith.

2.   Cinnfidh an Chúirt Bhreithiúnais, trí chinneadh, na coinníollacha ina bhféadfar doiciméad nós imeachta a sheirbheáil trí mheán leictreonach. Foilseofar an cinneadh sin in Iris Oifigiúil an Aontais Eorpaigh.

3.   I gcás go dtugann an seolaí a thoiliú go ndéanfar doiciméid nós imeachta a sheirbheáil air trí mheán leictreonach, sna coinníollacha arna gcinneadh ag an gCúirt Bhreithiúnais, déanfar gach doiciméad nós imeachta, lena n-áirítear breithiúnais agus orduithe na Cúirte Breithiúnais, a sheirbheáil tríd an meán sin. Ina mhalairt de chás, déanfar seirbheálacha ag seoladh an duine le haghaidh seirbheála nó, murar luaigh an seolaí seoladh le haghaidh seirbheála, ag a sheoladh trí chóip den doiciméad atá le seirbheáil a sheoladh tríd an bpost cláraithe, maille le foirm admhála, nó tríd an gcóip sin a sheachadadh go pearsanta agus admháil a fháil ina leith. Ullmhóidh agus deimhneoidh an Cláraitheoir na cóipeanna de dhoiciméid a bheidh le seirbheáil.

4.   Mura féidir, ar chúiseanna teicniúla nó toisc chineál nó fhad an doiciméid, doiciméad nós imeachta a sheoladh trí mheán leictreonach, déanfar an doiciméad a sheirbheáil ag seoladh le haghaidh seirbheála an tseolaí nó, murar luaigh an seolaí seoladh le haghaidh seirbheála, ag a sheoladh i gcomhréir leis na modhanna a leagtar síos i mír 3 den Airteagal seo. Cuirfear an seolaí ar an eolas faoi sin trí aon mheán teicniúil nó leictreonach eile cumarsáide atá ag an gCúirt agus ag an seolaí. Measfar go mbeidh an tseirbheáil déanta ar an seolaí trí phost cláraithe ar an deichiú lá i ndiaidh an litir chláraithe a thaisceadh ag an bpostoifig san áit a bhfuil a suíomh ag an gCúirt, mura dtaispeánfar trí fhoirm admhála go bhfuarthas an litir ar dháta eile nó mura gcuirfidh an seolaí in iúl don Chláraitheoir, laistigh de thrí seachtaine tar éis é a chur ar an eolas mar a luaitear thuas, nach bhfuil an doiciméad atá le seirbheáil air faighte aige.’

1.   I gcás ina gcuireann cúiseanna sláinte, slándála nó cúiseanna tromchúiseacha eile bac ar ionadaí ar pháirtí nó ar dhuine leasmhar dá dtagraítear in Airteagal 23 den Reacht páirt a ghlacadh in éisteacht i bpearsa, féadfar cead a thabhairt don ionadaí sin freastal ar an éisteacht sin trí fhíschomhdháil. Beidh feidhm ag an riail sin freisin maidir leis na páirtithe sna príomhimeachtaí i gcás, i gcomhréir leis na rialacha nós imeachta náisiúnta is infheidhme, go gceadaítear dóibh imeachtaí cúirte a thionscnamh nó a chosaint gan ionadaíocht ó dhlíodóir.

2.   Déanfar iarratas chun freastal ar an éisteacht trí fhíschomhdháil a thíolacadh i ndoiciméad ar leith, a luaithe atá cúis an bhaic ar eolas agus léireofar go cruinn ann cineál an bhaic sin.

3.   Déanfaidh an tUachtarán cinneadh maidir leis an iarratas sin a luaithe is féidir.

4.   Ní cheadófar físchomhdháil a úsáid i gcás go dtugann an Chúirt breith i seomra iata de bhun Airteagal 79 de na Rialacha seo.

5.   Sonrófar na coinníollacha teicniúla atá le comhlíonadh chun freastal ar éisteacht trí fhíschomhdháil sna treoracha cleachtais do pháirtithe, arna nglacadh ar bhonn Airteagal 208 de na Rialacha seo.’

1.   Cuirfidh an tUachtarán tús leis na himeachtaí ó bhéal agus déanfaidh sé stiúradh orthu agus beidh sé freagrach as an éisteacht a sheoladh mar is cuí.

2.   Féadfaidh na comhaltaí d’fhoirmíocht na Cúirte agus an tAbhcóide Ginearálta, i gcúrsa na héisteachta, ceisteanna a chur ar ghníomhairí, ar chomhairleoirí nó ar dhlíodóirí na bpáirtithe agus, sna himthosca dá dtagraítear in Airteagal 47(2) de na Rialacha seo, ar na páirtithe sna príomhimeachtaí nó ar a n-ionadaithe.’

1.   Féadfar éisteachtaí os comhair na Cúirte a chraoladh. Craoladh beo a bheidh ann sa chás go mbaineann sé le fógairt breithiúnas nó Tuairimí, agus craoladh moillithe a bheidh ann sa chás go mbaineann sé le pléadálacha ó bhéal na bpáirtithe nó na ndaoine leasmhara dá dtagraítear in Airteagal 23 den Reacht i gcás a sannadh ar an gCúirt iomlán, ar an Mór-Dhlísheomra, ar an Dlísheomra de mhéid idirmheánach nó, go heisceachtúil i gcás ina bhfuil údar leis sin mar gheall ar thábhacht an cháis, dlísheomra ina bhfuil cúigear Breithiúna ina suí.

2.   Sa chás go bhfuil sé beartaithe ag an gCúirt éisteacht a chraoladh, cuirfidh an Chlárlann an méid sin in iúl do na páirtithe agus do na daoine leasmhara dá dtagraítear in Airteagal 23 den Reacht, agus fógra á thabhairt dóibh chun freastal ar an éisteacht sin.

3.   Má mheasann páirtí nó duine leasmhar dá dtagraítear in Airteagal 23 den Reacht nár chóir an éisteacht dár tugadh fógra dó chun freastal air a chraoladh, cuirfidh sé sin in iúl don Chúirt a luaithe is féidir, agus na himthosca lena dtugtar údar gan an éisteacht a chraoladh á leagan amach go mionsonraithe.

4.   Tabharfaidh an tUachtarán breith ar an iarratas sin a luaithe is féidir, tar éis an Breitheamh is Rapóirtéir agus an tAbhcóide Ginearálta a éisteacht.

5.   Beidh fístaifead de na héisteachtaí a craoladh ar fáil ar shuíomh gréasáin Chúirt Bhreithiúnais an Aontais Eorpaigh ar feadh tréimhse nach faide ná aon mhí amháin i ndiaidh clabhsúr na héisteachta.

6.   Má mheasann páirtí nó duine leasmhar dá dtagraítear in Airteagal 23 den Reacht gur cheart fístaifead d’éisteacht ina raibh sé páirteach a bhaint den suíomh gréasáin thuasluaite, cuirfidh sé an méid sin in iúl don Chúirt Bhreithiúnais chomh luath agus is féidir agus na himthosca lena dtugtar údar dó a bhaint á leagan amach.

7.   Déanfaidh an tUachtarán cinneadh faoin iarraidh sin láithreach, tar éis dó an Breitheamh is Rapóirtéir agus an tAbhcóide Ginearálta a éisteacht.

8.   Cinnfidh an Chúirt, trí chinneadh, na rialacha agus na socruithe maidir le craoladh na n-éisteachtaí a chur chun feidhme. Foilseofar an cinneadh sin in Iris Oifigiúil an Aontais Eorpaigh.’

1.   I gcás ina gcuirtear iarraidh ar réamhrialú faoi bhráid na Cúirte, cuirfidh an Chlárlann an iarraidh sin chuig an Uachtarán, chuig an Leas-Uachtarán agus chuig an gCéad Abhcóide Ginearálta.

2.   Má mheasann an tUachtarán, i ndiaidh anailís a dhéanamh ar an iarraidh ar réamhrialú, tar éis an Leas-Uachtarán agus an Chéad Abhcóide Ginearálta a éisteacht, go mbaineann an iarraidh sin go heisiach le ceann amháin nó níos mó de na hábhair shonracha dá dtagraítear sa chéad mhír d’Airteagal 50b den Reacht, cuirfidh sé sin in iúl don Chlárlann agus tarchuirfidh an Chlárlann an iarraidh chuig Clárlann an Cúirte Ginearálta láithreach. Leanfar leis na himeachtaí ansin os comhair na Cúirte Ginearálta, i gcomhréir le forálacha a Rialacha Nós Imeachta.

3.   Más rud é, i ndiaidh na hanailíse sin agus tar éis an Leas-Uachtarán agus an Chéad Abhcóide Ginearálta a éisteacht, go measann an tUachtarán, cé go dtagann an iarraidh ar réamhrialú faoi cheann amháin nó níos mó de na hábhair shonracha dá dtagraítear sa chéad mhír d’Airteagal 50b den Reacht, go mbaineann an iarraidh le hábhair eile freisin nó go n-ardaíonn an iarraidh ceisteanna neamhspleácha maidir le léiriú ar an dlí príomha, ar an dlí idirnáisiúnta poiblí, ar phrionsabail ghinearálta dhlí an Aontais nó ar an gCairt um Chearta Bunúsacha an Aontais Eorpaigh, de réir bhrí an dara mír d’Airteagal 50b den Reacht, tarchuirfidh an Chúirt Ghinearálta an iarraidh chun na Cúirte Breithiúnais gan mhoill. Má mheasann an Chúirt Bhreithiúnais go dtagann an iarraidh go heisiach faoi cheann amháin nó níos mó de na hábhair shonracha dá dtagraítear sa chéad mhír d’Airteagal 50b den Reacht, cuirfidh Clárlann na Cúirte Breithiúnais an iarraidh sin chuig Clárlann na Cúirte Ginearálta agus leanfar leis an nós imeachta os comhair na Cúirte Ginearálta, i gcomhréir le forálacha a Rialacha Nós Imeachta. Ina mhalairt de chás, leanfar leis an nós imeachta os comhair na Cúirte Breithiúnais, i gcomhréir le forálacha na Rialacha seo.

4.   I gcás ina gcuirfear iarraidh ar réamhrialú chuig Clárlann na Cúirte Ginearálta i gcomhréir le míreanna 2 nó 3 den Airteagal seo, cuirfidh an Chlárlann an chúirt a rinne an tarchur ar an eolas.’

1.   Sa chás go ndéanann an chúirt nó an binse a rinne an tarchur an iarraidh ar réamhrialú a anaithnidiú nó go gcinneann an chúirt nó an binse a rinne an tarchur sonraí a bhaineann le daoine nádúrtha nó le heintitis lena mbaineann an díospóid sna príomhimeachtaí, cibé acu an páirtithe nó tríú páirtithe sa díospóid sin iad, a fhágáil ar lár, cloífidh an Chúirt leis an anaithnidiú sin nó leis an bhfágáil ar lár sin sna himeachtaí atá ar feitheamh os a comhair.

2.   Ar iarratas ón gcúirt nó ón mbinse a rinne an tarchur, ar iarratas ó pháirtí sna príomhimeachtaí nó uaithi féin, féadfaidh an Chúirt freisin iarraidh ar réamhrialú a anaithnidiú nó a chinneadh sonraí pearsanta duine nádúrtha amháin nó níos mó lena mbaineann an díospóid sna príomhimeachtaí, cibé acu an páirtithe nó tríú páirtithe sa díospóid sin iad, a fhágáil ar lár.’

1.   Measfar go mbeidh na doiciméid nós imeachta dá dtagraítear san Airteagal roimhe seo taiscthe, tráth a dhéanfar cóip den doiciméad bunaidh sínithe agus na hítimí agus na doiciméid a mbeifear ag brath orthu mar thacaíocht dó, mar aon le sceideal dá dtagraítear in Airteagal 57(3) a sheachadadh chuig Clárlann na Cúirte, trí e-Curia nó trí aon mheán teicniúil nó leictreonach cumarsáide atá ag an gCúirt. Seolfar an doiciméad bunaidh agus na hiarscríbhinní dá dtagraítear thuas chuig an gClárlann láithreach.

2.   I gcás ina n-éilíonn an tAirteagal roimhe seo go seirbheálfar doiciméad ar dhuine nó go gcuirfear doiciméad in iúl dóibh, déanfar an tseirbheáil sin nó an fógra sin trí mheán leictreonach, sna coinníollacha arna gcinneadh ag an gCúirt, i gcás inar thoiligh an seolaí go seirbheálfar doiciméid nós imeachta air ar an gcaoi sin. Ina mhalairt de chás, déanfar na seirbheálacha agus na fógraí thuasluaite trí chóip den doiciméad a sheoladh trí aon mheán teicniúil nó leictreonach cumarsáide atá ag an gCúirt agus ag an seolaí.’

1.   Sa chás go dtarchuireann an Chúirt Ghinearálta, de bhun an dara fomhír d’Airteagal 256(3) CFAE, iarraidh ar réamhrialú chuig an gCúirt lena n-éilítear breith ar phrionsabal a d’fhéadfadh difear a dhéanamh d’aontacht nó do chomhchuibheas dhlí an Aontais, láimhseálfar an iarraidh sin go pras.

2.   Ainmneoidh an tUachtarán an Breitheamh is Rapóirtéir a bheidh freagrach as an gcás láithreach agus ainmneoidh an Chéad Abhcóide Ginearálta Abhcóide Ginearálta.

3.   Má tá clabhsúr curtha leis an gcuid i scríbhinn den nós imeachta cheana nuair a tharchuirfear an cás chuig an gCúirt, féadfaidh na daoine leasmhara dá dtagraítear in Airteagal 23 den Reacht pléadálacha i scríbhinn nó barúlacha i scríbhinn comhlántacha a thaisceadh faoin gceist phrionsabail arna hardú san iarraidh ar réamhrialú, laistigh de thréimhse arna socrú ag an Uachtarán, nach féidir a bheith níos giorra ná 15 lá.

4.   Tabharfaidh an Chúirt a breith a luaithe is féidir, tar éis barúlacha ó bhéal na ndaoine leasmhara dá dtagraítear in Airteagal 23 den Reacht agus Tuairim an Abhcóide Ghinearálta a éisteacht, i gcás inarb iomchuí.’