(1)

Foráiltear le Rialachán (CE) Uimh. 2065/2003 nach bhféadfar ach blastáin deataigh a áirítear ar liosta an Aontais de tháirgí príomhúla um blastán deataigh údaraithe (‘liosta an Aontais’) a chur ar an margadh laistigh den Aontas, agus iad sin amháin.

(2)

Le Rialachán Cur Chun Feidhme (AE) Uimh. 1321/2013 ón gCoimisiún (2) bunaítear liosta an Aontais, ina leagtar síos na táirgí príomhúla um blastán deataigh údaraithe, a sonraíochtaí agus a gcoinníollacha úsáide. Bhí údaruithe tháirgí príomhúla um blastán deataigh SF-001 go SF-010 bailí ón 1 Eanáir 2014 go ceann 10 mbliana agus in-athnuaite ar feadh tréimhsí 10 mbliana eile ina dhiaidh sin ar iarratas chuig an gCoimisiún ó shealbhóir an údaraithe.

(3)

I gcás táirgí príomhúla um blastán deataigh SF-007 agus SF-010 níor cuireadh isteach aon iarratas chun an t-údarú a athnuachan agus chuaigh an t-údarú in éag an 1 Eanáir 2024.

(4)

I gcás táirgí príomhúla um blastán deataigh SF-001, SF-002, SF-003, SF-004, SF-005, SF-006, SF-008 agus SF-009, cuireadh isteach iarratais chun a n-údarú a athnuachan i mí an Mheithimh 2022. Dhiúltaigh an Coimisiún athnuachan a dhéanamh ar údarú táirgí príomhúla um blastán deataigh SF-001, SF-002, SF-003, SF-004, SF-005, SF-006, SF-008 agus SF-009 le Cinntí Cur Chun Feidhme (AE) 2024/2071 (3), [C(2024)3702] (4), [C(2024)3703] (5), [C(2024)3704] (6), [C(2024)3705] (7), [C(2024)3706] (8), [C(2024)3707] (9) agus [C(2024)3708] (10) ón gCoimisiún.

(5)

Ós rud é nach bhfuil na deich dtáirge phríomhúla sin um blastán deataigh údaraithe a thuilleadh, is iomchuí na hiontrálacha ábhartha a scriosadh ó liosta an Aontais.

(6)

Dá bhrí sin, ba cheart Rialachán Cur Chun Feidhme (AE) Uimh. 1321/2013 a leasú dá réir.

(7)

Mar sin féin, i bhfianaise ábhair imní an Údaráis maidir le táirgí príomhúla um blastán deataigh SF-001, SF-002, SF-003, SF-004, SF-005, SF-006, SF-008 agus SF-009, ach ina theannta sin i bhfianaise an fhíorais go n-úsáidtear táirgí príomhúla um blastán deataigh go forleathan i réimse leathan táirgí bia agus go bhfuil úsáidí údaraithe uile na dtáirgí príomhúla um blastán deataigh lena dtugtar blas ‘deataithe’ nó, i gcásanna áirithe, lena ndéantar ionadú ar phróiseas deataithe traidisiúnta, imithe in éag nó gan bheith athnuaite, ba cheart bearta iomchuí, atá oiriúnaithe do na cineálacha éagsúla úsáidí a bhaintear as táirgí príomhúla um blastán deataigh, a thabhairt isteach chun deis a thabhairt do na hoibreoirí gnólachtaí bia roghanna eile a aimsiú.

(8)

Bianna de chatagóirí 1.7 (cáis agus táirgí cáise), 8 (Feoil), 9.2 (Iasc próiseáilte agus táirgí iascaigh próiseáilte lena n-áirítear crústaigh agus moilisc), 9.3 (Eochraí éisc) agus a bhfochatagóirí comhfhreagracha, a gcuirtear na táirgí príomhúla sin um blastán deataigh leo agus a chomhlíonann na forálacha a leagtar síos le haghaidh na dtáirgí príomhúla sin um blastán deataigh i liosta an Aontais roimh an … 21 Lúnasa 2024, ba cheart a bheith in ann iad a chur ar an margadh go dtí an 1 Iúil 2029 agus iad a fhágáil ar an margadh go dtí a ndáta íosmharthanachta nó go dtí a ndáta éagtha ós rud é go gcuirtear úsáid táirgí príomhúla um blastán deataigh sna bianna sin nó ar na bianna sin in ionad próiseas traidisiúnta deataithe agus d’fhéadfadh gá a bheith le hinfheistiú nach beag agus, i gcásanna áirithe, nósanna imeachta fada riaracháin chun coigeartú a dhéanamh ar na próisis táirgthe.

(9)

Bianna de gach catagóir eile a gcuirtear na táirgí príomhúla sin um blastán deataigh leo agus a chomhlíonann na forálacha a leagtar síos le haghaidh na dtáirgí príomhúla sin um blastán deataigh i liosta an Aontais roimh an … 21 Lúnasa 2024, ba cheart a bheith in ann iad a chur ar an margadh go dtí an 1 Iúil 2026 agus iad a fhágáil ar an margadh go dtí a ndáta íosmharthanachta nó go dtí a ndáta éagtha chun am leordhóthanach a thabhairt do na hoibreoirí gnólachtaí bia a bhaineann úsáid as na táirgí príomhúla sin um blastán deataigh coigeartú a dhéanamh ar oidis a mbianna.

(10)

Ar na cúiseanna céanna, ullmhóidí ina bhfuil na táirgí príomhúla um blastán deataigh sin agus nach mbeartaítear a chaitheamh sa riocht sin, ba cheart a bheith in ann iad a chur ar an margadh go dtí na dátaí a leagtar amach le haghaidh na mbianna dá bhfuil siad beartaithe.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,