(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear i liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Áirítear ‘Próitéin hidrealaithe go páirteach arna táirgeadh le heorna chaite (Hordeum vulgare) agus le rís (Oryza sativa) mar bhia núíosach údaraithe i liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470.

(4)

Le Rialachán Cur Chun Feidhme (AE) 2023/2851 ón gCoimisiún (3), údaraíodh próitéin hidrealaithe go páirteach arna táirgeadh le heorna chaite (Hordeum vulgare) agus rís (Oryza sativa) a chur ar an margadh mar bhia núíosach lena húsáid i roinnt bianna le haghaidh an phobail i gcoitinne.

(5)

An 6 Feabhra 2024, chuir an chuideachta Evergrain LLC (‘an t-iarratasóir’) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283, iarratas ar athrú ar cheanglais lipéadaithe shonracha an bhia núíosaigh ‘Próitéin hidrealaithe go páirteach arna táirgeadh le heorna chaite agus rís’. D’iarr an t-iarratasóir go n-athrófaí na ceanglais lipéadaithe shonracha, go háirithe ainmniú an bhia núíosaigh go ‘Próitéin hidrealaithe arna táirge le heorna agus rís’.

(6)

Ar an lipéadú bunaidh rinneadh tagairt do ‘Próitéin hidrealaithe go páirteach arna táirgeadh le heorna chaite agus rís’. Measann an t-iarratasóir gur gá an t-ainmniú a athrú toisc nach téarma dea-shainithe é na focail ‘go páirteach’, go háirithe don ghnáth-thomhaltóir nach mbeidh a fhios aige a mhéid atá an phróitéin hidrealaithe, go háirithe i gcomparáid le próitéiní plandúla eile. Cuireann an t-iarratasóir in iúl freisin nach n-úsáidtear an focal ‘chaite’ le haghaidh próitéiní núíosacha údaraithe eile a phróiseáiltear ar bhealach comhchosúil, agus dá bhrí sin measann sé go bhféadfadh sé sin mearbhall a chruthú dá n-úsáidfí don bhia núíosach seo é. Thairis sin, cuireann an t-iarratasóir in iúl freisin, nuair a phróiseáiltear bunábhair eorna agus ríse, gurb é an chéad chéim an stáirse a bhaint agus déantar amhlaidh chun aon phróitéin phlandúil eile a phróiseáil.

(7)

An nuashonrú a iarradh ar liosta an Aontais maidir leis an athrú ar na ceanglais lipéadaithe shonracha, go háirithe ainmniú an bhia núíosaigh ‘Próitéin hidrealaithe go páirteach arna táirgeadh le heorna chaite agus rís’ mar atá beartaithe ag an iarratasóir, measann an Coimisiún nach dócha go mbeidh tionchar aige ar shláinte an duine agus nach gá don Údarás Eorpach um Shábháilteacht Bia (‘an tÚdarás’) meastóireacht sábháilteachta a dhéanamh i gcomhréir le hAirteagal 10(3) de Rialachán (AE) 2015/2283. Bunaithe ar an mbonn cirt a thug an t-iarratasóir, is é tuairim an Choimisiúin go bhféadfar an focal ‘chaite’ a fhágáil ar lár ó ainmniú an bhia núíosaigh chun críocha lipéadaithe. Ní aontaíonn an Coimisiún, áfach, leis na focail ‘go páirteach’ a bhaint d’ainmniú an bhia núíosaigh. I gcomhréir leis na rialacha maidir le lipéadú, go háirithe Airteagal 10(2), pointe (g), de Rialachán (AE) 2015/2283, níor cheart an tomhaltóir a chur amú leis na ceanglais lipéadaithe shonracha. Thairis sin, de bhun Airteagal 7 de Rialachán (AE) Uimh. 1169/2011 ó Pharlaimint na hEorpa agus ón gComhairle (4), níor cheart faisnéis bhia a bheith míthreorach, go háirithe maidir le saintréithe, airíonna agus comhdhéanamh an bhia, i measc nithe eile. Ós rud é gurb é 1-7 % méid hidrealaithe an bhia núíosaigh, measann an Coimisiún gur cheart na focail ‘go páirteach’ a choinneáil ar bun in ainmniú an bhia núíosaigh. Ina theannta sin, más mian leis an iarratasóir an tomhaltóir a chur ar an eolas a thuilleadh faoin méid hidrealaithe, féadfaidh sé é a léiriú go deonach ar lipéad an táirge i gcomhréir le hAirteagal 36 de Rialachán (AE) Uimh. 1169/2011. Dá bhrí sin, is é ‘Próitéin hidrealaithe arna táirgeadh le heorna agus le rís’ ainmniú an bhia núíosaigh ba cheart a bheith ar lipéadú na n-earraí bia a bhfuil sé iontu.

(8)

Is leor an foras atá le fáil san fhaisnéis a sholáthraítear san iarratas chun a shuí go bhfuil na hathruithe ar cheanglais lipéadaithe shonracha an bhia núíosaigh i gcomhréir le coinníollacha Airteagal 12 de Rialachán (AE) 2015/2283 agus gur cheart iad a fhormheas.

(9)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,