TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2019/1753 ó Pharlaimint na hEorpa agus ón gComhairle an 23 Deireadh Fómhair 2019 maidir le gníomhaíocht an Aontais tar éis a aontachais le hIonstraim na Ginéive de Chomhaontú Liospóin i dtaca le hAinmniúcháin Tionscnaimh agus Tásca Geografacha (1), agus go háirithe Airteagal 7(1) agus (3) de,

De bharr an mhéid seo a leanas:

(1)

I gcomhréir le hAirteagal 5(1) agus (2) d’Ionstraim na Ginéive, féadfaidh Údaráis Inniúla gach Páirtí Chonarthaigh in Ionstraim na Ginéive iarratais a chomhdú maidir le clárú idirnáisiúnta ainmniúcháin tionscnaimh nó táisc gheografaigh le Biúró Idirnáisiúnta na hEagraíochta Domhanda um Maoin Intleachtúil, arb é a chláróidh é sa Chlár Idirnáisiúnta i gcomhréir le hAirteagal 6 d’Ionstraim na Ginéive. I gcomhréir le hAirteagal 9 d’Ionstraim na Ginéive, déanfaidh na Páirtithe Conarthacha eile ainmniúcháin tionscnaimh agus tásca geografacha arna gclárú a chosaint laistigh dá gcóras dlí féin faoi réir aon diúltú, aon tréigean, aon neamhbhailíochtú nó aon chealú.

(2)

I gcomhréir le hAirteagal 6(4) d’Ionstraim na Ginéive, an 27 Meán Fómhair 2023, thug Biúró Idirnáisiúnta na hEagraíochta Domhanda um Maoin Intleachtúil fógra don Choimisiún go ndearnadh an t-ainm ‘تين دجبة / Figues de Djebba’, a ndearna an Túinéis iarratas ina leith, a thaifeadadh ina Thásc Geografach sa Chlár Idirnáisiúnta um Ainmniúcháin Tionscnaimh agus um Thásca Geografacha faoi Ionstraim na Ginéive.

(3)	De bhun Airteagal 4(1) de Rialachán (AE) 2019/1753, foilsíodh clárú idirnáisiúnta an Tásca Gheografaigh ‘تين دجبة / Figues de Djebba’ in Iris Oifigiúil an Aontais Eorpaigh (2) chun go bhféadfaí aon fhreasúra a d’fhéadfadh a bheith ann a thaisceadh.

(4)

De bhun Airteagal 5 de Rialachán (AE) 2019/1753, rinne an Coimisiún measúnú ar chlárú idirnáisiúnta an Ainmniúcháin Tionscnaimh ‘تين دجبة / Figues de Djebba’ i gcoinne na gcoinníollacha a leagtar síos san Airteagal sin, lena n-áirítear an fhaisnéis bhreise a iarradh ar an Túinéis d’aon ghnó a mhéid a bhaineann leis na sonraí a bhaineann le cáilíocht, clú nó saintréithe mar a leagtar síos i Riail 5(3) de na Comhrialacháin faoi Chomhaontú Liospóin agus faoi Ionstraim na Ginéive de Chomhaontú Liospóin, agus chinn sé go gcomhlíontar iad.

(5)	Ós rud é nach bhfuair an Coimisiún aon fhreasúra faoi Airteagal 6 de Rialachán (AE) 2019/1753, ba cheart an t-ainm ‘تين دجبة / Figues de Djebba’ a chosaint san Aontas, i gcomhréir le hIonstraim na Ginéive.

(6)	Ós rud é gur cláraíodh an tAinmniúchán Tionscnaimh ‘تين دجبة / Figues de Djebba’ faoi chomhaontú Liospóin, is gá raon feidhme na cosanta a dheonaítear leis an Rialachán seo agus iarmhairtí agus coinníollacha na cosanta sna seacht mBallstát atá ina bpáirtithe i gComhaontú Liospóin a shoiléiriú.

(7)	Tá na bearta dá bhforáiltear sa Rialachán seo i gcomhréir leis an tuairim ón gCoiste um Beartas Cáilíochta maidir le táirgí talmhaíochta, fíon agus deochanna biotáilleacha faoi Rialachán (AE) 2024/1143,

TAR ÉIS AN RIALACHÁN SEO A GHLACADH:

Airteagal 1

Déanfar an t-ainm ‘تين دجبة / Figues de Djebba’ atá cláraithe mar Ainmniúchán Tionscnaimh sa Chlár Idirnáisiúnta a chosaint san Aontas.

Leis an ainm dá dtagraítear sa chéad mhír sainaithnítear táirge den chineál ‘toradh’.

Airteagal 2

Tá feidhm ag an gcosaint dá dtagraítear in Airteagal 1 maidir le críoch iomlán an Aontais Eorpaigh agus glacann sí ionad an chórais náisiúnta cosanta is infheidhme sna Ballstáit ar páirtithe iad i gComhaontú Liospóin. Ráthófar leanúnachas leis an gcosaint náisiúnta a dheonaítear sna Ballstáit sin don Ainmniúchán Tionscnaimh ‘تين دجبة / Figues de Djebba’.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.