(1)

An 26 Aibreán 2024 cuireadh faoi bhráid an Choimisiúin iarraidh ar chlárú an tionscnaimh Eorpaigh ó na saoránaigh dar teideal ‘Air-Quotas’.

(2)

Is é is aidhm don tionscnamh, arna cur in iúl ag na heagraithe, a iarraidh ar an gCoimisiún ‘tionól aeráide a bhunú as a dtiocfaidh sásra cuóta carbóin le haghaidh saoránach i ngach tír agus lena spreagfar gnólachtaí chun dícharbónú a dhéanamh mar gheall ar éileamh tomhaltóirí’. Measann na heagraithe gur cheart gach ceannachán earraí agus seirbhísí a chumhdach leis an sásra cuóta carbóin agus gur cheart tosú in earnáil an aeriompair. Ina theannta sin, luann siad ‘feachtas faisnéise maidir le Air-Quotas’ mar bhealach chun ‘tuiscint a fháil ar an sásra trádála idir easnaimh agus barrachais charbóin bunaithe ar dháileadh cothrom a laghdaítear ó bhliain go bliain i gcomhréir le Comhaontú Pháras agus leis an bhfógra ón Aontas maidir le laghdú 55 %’.

(3)

In iarscríbhinn a ghabhann leis an tionscnamh, tugtar tuilleadh sonraí maidir le hábhar, cuspóirí agus cúlra an tionscnaimh. Luaitear inti ‘nach mór laghdú as cuimse a dhéanamh ar an lorg aeráide atá ag an ngníomhaíochta dhaonna ar an bpláinéad chun go mbeidh an domhan ináitrithe i gcónaí’ agus tagraítear inti do roghanna éagsúla chun an lorg carbóin a laghdú. Measann na heagraithe go mbeadh ‘cuntas carbóin le haghaidh eitlíochta’ ar an sásra ab iomchuí, ag tosú le haerárthaí a mheastar a bheith ar ‘an bhfoinse gáis ceaptha teasa is suaithinsí’. Mar chuid dá iarraidh ar chlárú chuir an grúpa d’eagraithe doiciméad breise isteach ina soláthraítear eolas cúlra maidir le cuótaí carbóin.

(4)

Maidir le haidhm an tionscnaimh, a mhéid a dhírítear léi i dtreo sásra cuótaí carbóin a chruthú i ngach Ballstát lena spreagfar gnólachtaí chun dícharbónú a dhéanamh trí éileamh tomhaltóirí, d’fhéadfadh an Coimisiún togra le haghaidh gníomh dlí a ghlacadh ar bhonn Airteagail 191 go 193 CFAE.

(5)

Ar an gcúis sin, measann an Coimisiún nach bhfuil aon chuid den tionscnamh ann ar follas nach dtagann sí faoi chreat chumhachtaí an Choimisiúin togra a thíolacadh le haghaidh gníomh dlí de chuid an Aontais chun na Conarthaí a chur chun feidhme.

(6)

Is conclúid é sin nach ndéanann difear don mheasúnú ar cé acu a chomhlíonfaí nó nach gcomhlíonfaí, sa chás seo, na coinníollacha coincréiteacha substainteacha ba ghá chun go ngníomhódh an Coimisiún, coinníollacha lena n-áirítear comhlíonadh phrionsabail na comhréireachta agus na coimhdeachta, sin agus comhoiriúnacht do chearta bunúsacha.

(7)

Tá fianaise iomchuí curtha ar fáil ag an ngrúpa d’eagraithe go gcomhlíontar na ceanglais a leagtar síos in Airteagal 5(1) agus (2) de Rialachán (AE) 2019/788, agus go bhfuil na daoine teagmhála ainmnithe aige i gcomhréir le hAirteagal 5(3), an chéad fhomhír, den Rialachán sin.

(8)

Ní tionscnamh é ar follas é a bheith míchuí, suaibhreosach ná cráiteach, ná ní follas go bhfuil sé contrártha do luachanna an Aontais mar a leagtar amach in Airteagal 2 den Chonradh ar an Aontas Eorpach iad ná do na cearta a chumhdaítear i gCairt um Chearta Bunúsacha an Aontais Eorpaigh.

(9)

Dá bhrí sin, ba cheart an tionscnamh dar teideal ‘Air-Quotas’ a chlárú.

(10)

An chonclúid go gcomhlíontar na coinníollacha maidir le clárú faoi Airteagal 6(3) de Rialachán (AE) 2019/788, ní thugann sí le tuiscint go ndeimhníonn an Coimisiún ar bhealach ar bith go bhfuil inneachar an tionscnaimh cruinn fíorasach, agus is é an grúpa d’eagraithe atá i mbun an tionscnaimh, agus é sin amháin, atá freagrach as an méid sin. Ní chuireann inneachar an tionscnaimh in iúl ach tuairimí an ghrúpa d’eagraithe, agus ní féidir a dhéanamh amach ar aon bhealach gurb iad tuairimí an Choimisiúin a léiríonn sé,