(1)

Is é is cuspóir do Threoir (AE) 2019/771 ó Pharlaimint na hEorpa agus ón gComhairle (4) feabhas a chur ar fheidhmiú an mhargaidh inmheánaigh, agus ardleibhéal cosanta do thomhaltóirí á bhaint amach an tráth céanna chomh maith le ciorclaíocht mhéadaithe laistigh den gheilleagar. I gcomhthéacs an aistrithe ghlais, is é an cuspóir atá leis an Treoir seo feabhas a chur ar fheidhmiú an mhargaidh inmheánaigh, agus tomhaltas níos inbhuanaithe á chur chun cinn an tráth céanna agus, ar an gcaoi sin, comhlánaítear léi an cuspóir a shaothraítear le Treoir (AE) 2019/771.

(2)

Chun na cuspóirí sin a bhaint amach, agus go háirithe chun soláthar trasteorann seirbhísí agus iomaíocht i measc deisitheoirí earraí arna gceannach ag tomhaltóirí sa mhargadh inmheánach a éascú, is gá rialacha aonfhoirmeacha a leagan síos lena gcuirtear chun cinn deisiú earraí arna gceannach ag tomhaltóirí laistigh de dhliteanas an díoltóra a bhunaítear le Treoir (AE) 2019/771 agus lasmuigh de. Tá rialacha tugtha isteach ag na Ballstáit cheana féin, nó tá siad ag smaoineamh ar rialacha a thabhairt isteach, lena gcuirtear chun cinn deisiú agus athúsáid earraí arna gceannach ag tomhaltóirí lasmuigh de dhliteanas reatha an díoltóra a bhunaítear le Treoir (AE) 2019/771. Mar gheall ar rialacha náisiúnta sainordaitheacha éagsúla sa réimse seo tá bacainní iarbhír nó féideartha ar fheidhmiú an mhargaidh inmheánaigh, rud a dhéanann difear diúltach d’idirbhearta trasteorann na n-oibreoirí eacnamaíocha atá ag gníomhú ar an margadh sin. D’fhéadfadh sé go mbeadh ar na hoibreoirí sin a gcuid seirbhísí a oiriúnú chun na rialacha náisiúnta sainordaitheacha éagsúla a chomhlíonadh agus go mbeadh costais bhreise idirbheart le híoc acu chun an chomhairle dlí is gá a fháil maidir le ceanglais dhlí an Bhallstáit ina bhfuil gnáthchónaí ar an tomhaltóir, a bhfuil fheidhme acu de bhun Rialachán (CE) Uimh. 593/2008 ó Pharlaimint na hEorpa agus ón gComhairle (5), agus go mbeadh orthu a gconarthaí maidir le soláthar seirbhísí deisiúcháin a oiriúnú dá réir. Beidh tionchar aige sin, go háirithe, ar fhiontair bheaga agus mheánmhéide, arb iad na cineálacha gnólachtaí is mó atá in earnáil an deisiúcháin. D’fhéadfadh ilroinnt dhlíthiúil difear diúltach a dhéanamh freisin do mhuinín tomhaltóirí i ndeisiúchán trasteorann mar gheall ar éiginnteachtaí maidir le tosca atá tábhachtach don chinneadh earraí a dheisiú.

(3)

Chun laghdú a dhéanamh ar dhiúscairt roimh am na n-earraí inmharthana arna gceannach ag tomhaltóirí agus chun tomhaltóirí a spreagadh úsáid níos faide a bhaint as a gcuid earraí, is gá na forálacha maidir le deisiú earraí a neartú, trínar féidir le tomhaltóirí deisiú atá inacmhainne a lorg óna rogha soláthraí seirbhísí deisiúcháin. Ba cheart tomhaltas inbhuanaithe a bheith mar thoradh ar dheisiú, ós rud é gur dócha gur lú an méid dramhaíola a bheidh ann de dheasca earraí a dhiúscairt, gur lú éileamh ar acmhainní, lena n-áirítear fuinneamh, mar thoradh ar an bpróiseas lena ndéantar earraí nua a mhonarú agus a dhíol le cur in ionad earraí lochtacha, agus gur lú astaíochtaí gás ceaptha teasa. Leis an Treoir seo, cuirtear tomhaltas inbhuanaithe chun cinn d’fhonn sochair a bhaint amach don chomhshaol, trí shaolré earraí a chur chun cinn lena n-áirítear athúsáid, deisiú agus athchóiriú, agus sochair á soláthar léi freisin do thomhaltóirí trí chostais a bhaineann le ceannacháin nua a sheachaint sa ghearrthéarma.

(4)

Tá réimse leathan gnéithe i gceist le hiompraíocht tomhaltóirí. Agus rogha á déanamh idir earra a dheisiú nó earra nua a cheannach, bíonn ról tábhachtach ag critéir ar an gcinneadh amhail áisiúlacht eacnamaíoch, marthanacht, infhaighteacht agus gaireacht seirbhíse deisiúcháin, agus an t-am a theastaíonn chun deisiúchán a dhéanamh. D’fhéadfadh bacainní éagsúla cosc a chur ar thomhaltóirí deisiú a roghnú. Is é is aidhm don Treoir seo aghaidh a thabhairt ar chuid de na bacainní sin.

(5)

Le Rialachán (AE) 2024/1781 ó Pharlaimint na hEorpa agus ón gComhairle (6), leagtar síos, go háirithe, ceanglais ó thaobh an tsoláthair de lena saothraítear an cuspóir maidir le dearadh táirgí níos inbhuanaithe ag céim an táirgthe. Le Treoir (AE) 2024/825 ó Pharlaimint na hEorpa agus ón gComhairle (7), leagtar síos ceanglais atá dírithe ar an éileamh lena n-áirithítear go soláthrófar faisnéis níos fearr maidir le marthanacht agus indeisitheacht earraí ag an díolphointe, rud a chuirfeadh ar a gcumas do thomhaltóirí cinntí ceannaigh inbhuanaithe a dhéanamh ar bhonn eolas maith. Tá sé d’aidhm ag an Treoir seo na ceanglais sin ó thaobh an tsoláthair agus an éilimh de a chomhlánú, trí dheisiú agus athúsáid a chur chun cinn sa chéim iardhíola lasmuigh de dhliteanas an díoltóra. Ina theannta sin, ba cheart Treoir (AE) 2019/771 a leasú chun deisiú a chur chun cinn laistigh de dhliteanas an díoltóra. Dá bhrí sin, saothraítear leis an Treoir seo na cuspóirí, i gcomhthéacs an Chomhaontaithe Ghlais don Eoraip, maidir le tomhaltas níos inbhuanaithe, geilleagar ciorclach agus an t-aistriú glas a chur chun cinn.

(6)

Leis an Treoir seo, níor cheart difear a dhéanamh do shaoirse na mBallstát rialáil a dhéanamh ar ghnéithe de chonarthaí le haghaidh soláthar seirbhísí deisiúcháin seachas na cinn a chomhchuibhítear le dlí an Aontais. Leis an Treoir seo, níor cheart difear a dhéanamh do shaoirse na mBallstát gnéithe de dhlí ginearálta na gconarthaí a rialáil ach oiread, amhail rialacha maidir le foirmiú, bailíocht, neamhniú nó éifeachtaí conarthaí, lena n-áirítear na hiarmhairtí a bhaineann le foirceannadh conartha, a mhéid nach rialáiltear iad leis an Treoir seo, ná don cheart chun damáistí a fháil. Ba cheart nár dhochar an Treoir seo do Rialachán (AE) 2023/988 ó Pharlaimint na hEorpa agus ón gComhairle (8), go háirithe i gcás aisghairm táirge ar mhaithe le sábháilteacht.

(7)

I gcás ina bhfuil sé comhréireach leis na hoibleagáidí a leagtar síos sa Treoir seo agus le dlí eile an Aontais is infheidhme, ba cheart na Ballstáit a bheith in ann i gcónaí forálacha a choinneáil nó a thabhairt isteach maidir le gnéithe eile de dheisiú earraí a chur chun cinn, ar forálacha iad a d’fhéadfadh na rialacha a leagtar amach sa Treoir seo a chomhlánú, mar shampla maidir le ráthaíochtaí tráchtála, ionaid seirbhísí deisiúcháin a bheith ann nó dreasachtaí airgeadais le haghaidh deisiúcháin.

(8)

Chun leas iomlán a bhaint as tairbhí na Treorach seo, ba cheart feidhm a bheith aici maidir le gach earra. Mar sin féin, níor cheart feidhm a bheith ag na forálacha a bhaineann leis na hoibleagáidí maidir le deisiú agus faisnéis a thabhairt mar a shonraítear sa Treoir seo ach amháin i ndáil le hearraí dá bhforáiltear ceanglais indeisitheachta le gníomhartha dlí an Aontais.

(9)

Ba cheart a chuimsiú le ceanglais indeisitheachta na ceanglais uile faoi ghníomhartha dlí an Aontais lena n-áirithítear gur féidir earraí a dheisiú, lena n-áirítear ceanglais faoin gcreat éicidhearthóireachta dá dtagraítear i Rialachán (AE) 2024/1781, ach gan a bheith teoranta dóibh, chun raon leathan earraí a chumhdach chomh maith le forbairtí a dhéanfar amach anseo in aon réimse eile de dhlí an Aontais.

(10)

Tá deisitheoirí le faisnéis bhunriachtanach a chur ar fáil do thomhaltóirí maidir lena seirbhísí deisiúcháin. Chun saor-rogha an tomhaltóra a éascú maidir le cinneadh a dhéanamh cé a dhéanfaidh earraí a dheisiú agus chun cuidiú le seirbhísí deisiúcháin oiriúnacha a shainaithint agus a roghnú, ba cheart deisitheoirí a bheith in ann an Fhoirm chaighdeánaithe Eorpach um Fhaisnéis faoin Deisiúchán dá bhforáiltear in Iarscríbhinn I a ghabhann leis an Treoir seo a úsáid ar bhonn deonach. Ba cheart a bheith san Fhoirm Eorpach um Fhaisnéis faoin Deisiúchán na príomhpharaiméadair a mbíonn tionchar acu ar chinntí na dtomhaltóirí maidir le deisiú, amhail cineál an lochta, an praghas agus an tréimhse ama ar laistigh di a gheallann an deisitheoir an deisiú a chríochnú. Má thairgeann an deisitheoir seirbhísí breise amhail iompar, ba cheart costais aonair na seirbhísí sin a léiriú. Ba cheart faisnéis san Fhoirm Eorpach um Fhaisnéis faoin Deisiúchán a chur ar fáil do thomhaltóirí ar bhealach soiléir sothuigthe agus i gcomhréir le ceanglais inrochtaineachta Threoir (AE) 2019/882 ó Pharlaimint na hEorpa agus ón gComhairle (9). Leis an bhFoirm Eorpach um Fhaisnéis faoin Deisiúchán, d’fhéadfaí tomhaltóirí a chumasú chun measúnú a dhéanamh ar sheirbhísí deisiúcháin, agus iad a chur i gcomparáid le chéile go héasca lena n-áirítear tairiscintí malartacha deisiúcháin, agus d’fhéadfaí soláthar faisnéise maidir le seirbhísí deisiúcháin a éascú, go háirithe do mhicrifhiontair agus fiontair bheaga agus mheánmhéide. Bheadh deimhneacht dhlíthiúil níos fearr ag deisitheoirí agus an Fhoirm Eorpach um Fhaisnéis faoin Deisiúchán á húsáid agus á líonadh isteach acu i gceart, ós rud é go measfaí a n-oibleagáidí dlíthiúla a bheith á gcomhlíonadh acu, go háirithe maidir le faisnéis réamhchonarthach áirithe a chur ar fáil de bhun Threoir 2011/83/AE ó Pharlaimint na hEorpa agus ón gComhairle (10). Le leagan amach caighdeánaithe na príomhfhaisnéise tríd an bhFoirm Eorpach um Fhaisnéis faoin Deisiúchán, chuirfí feabhas ar an tsoiléireacht agus ar an trédhearcacht, agus ar an gcaoi sin rannchuideofaí le go mbeadh muinín níos fearr ag tomhaltóirí as seirbhísí deisiúcháin.

(11)

Má chuireann an deisitheoir an Fhoirm Eorpach um Fhaisnéis faoin Deisiúchán ar fáil, ba cheart dó an fhoirm a chur ar fáil laistigh de thréimhse réasúnta ama, ar cheart í a bheith ag freagairt don tréimhse ama is giorra is féidir tar éis na hiarrata agus sula mbeidh an tomhaltóir faoi cheangal ag conradh maidir le soláthar seirbhísí deisiúcháin. I gcás nach gcuirtear aon Fhoirm Eorpach um Fhaisnéis faoin Deisiúchán ar fáil, ba cheart freisin an tomhaltóir a bheith in ann conradh a thabhairt i gcrích chun seirbhísí deisiúcháin a sholáthar le deisitheoir de bhun faisnéis réamhchonarthach arna soláthar ar mhodh eile i gcomhréir le Treoir 2011/83/AE.

(12)

Ba cheart an Fhoirm Eorpach um Fhaisnéis faoin Deisiúchán a chur ar fáil saor in aisce. Mar sin féin, bíonn cásanna ann inar gá do dheisitheoir seirbhís dhiagnóiseach a dhéanamh, i.e. iniúchadh a dhéanamh ar na hearraí chun cineál an lochta nó an deisiúcháin a shainaithint. I gcásanna den sórt sin, ba cheart an deisitheoir a bheith in ann iarraidh ar an tomhaltóir na costais riachtanacha a thabhaíonn sé a íoc, lena n-áirítear costais saothair nó iompair. I gcomhréir leis an bhfaisnéis réamhchonarthach agus le ceanglais eile a leagtar amach i dTreoir 2011/83/AE, ba cheart don deisitheoir an tomhaltóir a chur ar an eolas faoi na costais sin sula n-iarrfaidh an tomhaltóir seirbhís dhiagnóiseach agus sula soláthraítear an Fhoirm Eorpach um Fhaisnéis faoin Deisiúchán. Ba cheart na tomhaltóirí a bheith in ann staonadh ón tseirbhís dhiagnóiseach a iarraidh i gcás ina measann siad go bhfuil na costais a bhaineann leis an tseirbhís dhiagnóiseach a fháil ró-ard. Má roghnaíonn an tomhaltóir a shocrú go ndéanfaí an t-earra a dheisiú, ba cheart an deisitheoir a bheith in ann na costais sin a asbhaint ó phraghas an deisiúcháin. Ní dochar an méid sin do rialacha na mBallstát maidir le hasbhaint éigeantach na gcostas sin. D’fhéadfaí an asbhaint a chur in iúl tríd an bhFoirm Eorpach um Fhaisnéis faoin Deisiúchán.

(13)

Níor cheart do dheisitheoirí na coinníollacha deisiúcháin a chuireann siad ar fáil san Fhoirm Eorpach um Fhaisnéis faoin Deisiúchán a athrú, lena n-áirítear an praghas le haghaidh deisiúcháin, ar feadh 30 lá féilire ar a laghad. Mar sin féin, ba cheart an deisitheoir agus an tomhaltóir a bheith in ann teacht ar chomhaontú maidir le tréimhse níos faide. D’áiritheofaí leis an méid sin go dtabharfaí dóthain ama do thomhaltóirí comparáid a dhéanamh idir tairiscintí deisiúcháin éagsúla. Má thugtar conradh chun seirbhísí deisiúcháin a sholáthar i gcrích bunaithe ar an bhFoirm Eorpach um Fhaisnéis faoin Deisiúchán, ba cheart an fhaisnéis faoi choinníollacha deisiúcháin agus praghais atá san fhoirm sin a bheith ina dlúthchuid den chonradh chun seirbhísí deisiúcháin a sholáthar agus, ar an gcaoi sin, oibleagáidí an deisitheora faoin gconradh sin a shainiú. Tá neamh-chomhlíonadh na n-oibleagáidí conarthacha sin faoi rialú an dlí náisiúnta is infheidhme.

(14)

Má chinneann deisitheoir an Fhoirm Eorpach um Fhaisnéis faoin Deisiúchán a chur ar fáil agus má ghlacann an tomhaltóir leis na coinníollacha dá bhforáiltear inti, ba cheart é a bheidh d’oibleagáid ar an deisitheoir an t-earra a dheisiú. Ba cheart do na Ballstáit foráil a dhéanamh maidir le leigheasanna comhréireacha agus éifeachtacha do thomhaltóirí i gcás nach ndéanann an deisitheoir an tseirbhís deisiúcháin tar éis don tomhaltóir glacadh leis an bhFoirm Eorpach um Fhaisnéis faoin Deisiúchán. D’fhéadfaí aisíocaíocht an chostais a íocadh as an tseirbhís dhiagnóiseach a áireamh ar leigheasanna den sórt sin.

(15)

Le Treoir (AE) 2019/771, forchuirtear oibleagáid ar dhíoltóirí earraí a dheisiú i gcás easpa comhréireachta a bhí ann an tráth a seachadadh na hearraí agus a thagann chun solais laistigh den tréimhse dhliteanais. I gcásanna nach bhfuil feidhm ag an oibleagáid sin, déantar líon mór earraí atá lochtach, ach atá inmharthana ar shlí eile, a dhiúscairt roimh am. Chun tomhaltóirí a spreagadh chun a shocrú go ndéanfaí earraí a dheisiú sna cásanna sin, ba cheart, leis an Treoir seo, oibleagáid a fhorchur ar mhonaróirí earraí a dheisiú arna iarraidh sin don tomhaltóir, ar earraí iad a bhfuil feidhm ag na ceanglais indeisitheachta a fhorchuirtear le gníomhartha dlí an Aontais ina leith, ós rud é gurb iad monaróirí seolaithe na gceanglas indeisitheachta sin. Ba cheart feidhm a bheith ag an oibleagáid sin maidir le monaróirí atá bunaithe laistigh den Aontas agus lasmuigh de araon i ndáil le hearraí a chuirtear ar mhargadh an Aontais. Thairis sin, níor cheart, leis an Treoir seo, saoirse eacnamaíoch rogha na monaróirí deireadh a chur le monarú earra a chur in amhras, gan dochar, i gcás inarb infheidhme, don oibleagáid maidir le páirteanna spártha agus uirlisí a sholáthar faoi dhlí an Aontais.

(16)

Ós rud é go gcumhdaíonn an oibleagáid maidir le deisiú a fhorchuirtear ar mhonaróirí faoin Treoir seo lochtanna nach é neamh-chomhréireacht na n-earraí le conradh díolacháin is cúis leo, ba cheart monaróirí a bheith in ann deisiúchán a sholáthar le haghaidh praghas a íocann an tomhaltóir, nó saor in aisce. Agus praghas á ghearradh acu, ba cheart monaróirí a spreagadh le samhlacha gnó inbhuanaithe a fhorbairt, lena n-áirítear seirbhísí deisiúcháin a sholáthar. D’fhéadfaí a chur san áireamh sa phraghas sin, mar shampla, costais saothair, costais do pháirteanna spártha, costais chun an tsaoráid deisithe a oibriú agus gnáthchorrlach. Ba cheart an praghas a bheith réasúnta, rud a chiallaíonn gur cheart é a shocrú ar bhealach nach ndíspreagtar tomhaltóirí d’aon ghnó ó thairbhe a bhaint as oibleagáid an mhonaróra maidir le deisiú. Ba cheart an praghas ar dheisiú agus na coinníollacha deisiúcháin a chomhaontú i gconradh idir an tomhaltóir agus an monaróir agus ba cheart don tomhaltóir leanúint de bheith saor chun a chinneadh an bhfuil an praghas sin agus na coinníollacha sin inghlactha. Ba cheart leis an ngá atá le conradh den sórt sin agus an brú iomaíoch ó dheisitheoirí eile spreagadh a thabhairt do mhonaróirí ar a bhfuil oibleagáid maidir le deisiú chun an praghas a choinneáil inghlactha don tomhaltóir. D’fhéadfaí an deisiúchán a dhéanamh saor in aisce freisin i gcás ina gcumhdaítear an locht le ráthaíocht tráchtála, mar shampla, i ndáil le marthanacht ráthaithe earraí. Mar dhreasú do thomhaltóirí a shocrú go ndéanfaí a n-earraí a dheisiú lasmuigh den ráthaíocht dhlíthiúil, ba cheart an monaróir a bheith in ann earra inchomparáide a thairiscint fad a bheidh an deisiú á dhéanamh, earra a mbeifear ag dréim lena thabhairt ar ais ach a bhfaighidh an tomhaltóir an t-earra deisithe ar ais.

(17)

Ba thairbheach dá bhféadfaí an deisiú a dhéanamh chomh gar agus is féidir don tomhaltóir chun costais seachadta agus astaíochtaí neamhriachtanacha a chosc. Ba cheart monaróirí agus, i gcás inarb infheidhme, ionadaithe údaraithe, allmhaireoirí agus dáileoirí, a bheith in ann a n-oibleagáid maidir le deisiú a chomhlíonadh trí dheisiúchán a ligean ar fochonradh, mar shampla, mura bhfuil an bonneagar deisiúcháin acu nó más féidir le deisitheoir atá lonnaithe níos gaire don tomhaltóir an t-earra a dheisiú. Mar sin féin, ba cheart iad a bheith faoi dhliteanas fós i leith na hoibleagáide maidir le deisiú.

(18)

Faoi na ceanglais a leagtar síos i ngníomhartha tarmligthe arna nglacadh de bhun Rialachán (AE) 2024/1781 nó i mbearta cur chun feidhme arna nglacadh de bhun Threoir 2009/125/CE ó Pharlaimint na hEorpa agus ón gComhairle (11), ní mór do mhonaróirí rochtain a thabhairt ar pháirteanna spártha, ar fhaisnéis faoi dheisiú agus cothabháil agus ar aon uirlisí bogearraí, dochtearraí nó modhanna cúnta comhchosúla a bhaineann le deisiú. Áirithítear leis na ceanglais sin indéantacht theicniúil an deisithe, ní hamháin ag an monaróir, ach ag deisitheoirí eile freisin. Mar thoradh air sin, beidh rochtain ag na deisitheoirí agus, i gcás inarb infheidhme, ag tomhaltóirí ar pháirteanna spártha agus ar fhaisnéis agus uirlisí a bhaineann le deisiú i gcomhréir le gníomhartha dlí an Aontais agus beidh rogha níos leithne de dheisitheoirí ag tomhaltóirí nó, i gcás inarb infheidhme, beidh an deis acu féin earraí a dheisiú. Ba cheart páirteanna spártha a chur ar fáil ar feadh na tréimhse a leagtar amach i ngníomhartha dlí an Aontais ar a laghad. Monaróirí a chuireann páirteanna spártha agus uirlisí ar fáil d’earraí a chumhdaítear leis na gníomhartha dlí a liostaítear in Iarscríbhinn II a ghabhann leis an Treoir seo, bíodh sin mar gheall ar oibleagáidí dlíthiúla comhfhreagracha faoi dhlí an Aontais nó as a stuaim féin, ba cheart dóibh praghas réasúnta a ghearradh nach ndíspreagann rochtain ar na páirteanna spártha agus na huirlisí sin, rud a choisceann deisiú. Chun na bearta sin a chomhlánú, níor cheart do mhonaróirí úsáid a bhaint as aon chlásail chonarthacha, teicnící crua-earraí nó bogearraí a chuireann bac ar dheisiú earraí a bhfuil ceanglais indeisitheachta ann ina leith a leagtar amach i ngníomhartha dlí an Aontais a liostaítear in Iarscríbhinn II a ghabhann leis an Treoir seo ach amháin má tá údar maith leo de bharr tosca dlisteanacha agus oibiachtúla, lena n-áirítear chun cosc nó srian a chur ar úsáid neamhúdaraithe saothar agus ábhar eile atá cosanta le cearta maoine intleachtúla faoi ghníomhartha dlí an Aontais agus faoi ghníomhartha dlí náisiúnta, go háirithe Treoracha 2001/29/CE (12), 2004/48/CE (13) agus (AE) 2019/790 ó Pharlaimint na hEorpa agus ón gComhairle (14). Dá bhrí sin, ba cheart go spreagfadh sé sin iomaíocht agus go rachadh sé chun tairbhe do thomhaltóirí a bhfuil seirbhísí níos fearr agus praghsanna deisiúcháin níos ísle uathu.

(19)

D’fhéadfaí a mheas gur cleachtais tráchtála éagóracha iad faoi Threoir 2005/29/CE ó Pharlaimint na hEorpa agus ón gComhairle (15), i gcás inarb infheidhme, iad na cleachtais sin a dhéanann trádálaithe chun a chur ina luí ar thomhaltóirí nach féidir a n-earraí a dheisiú de dheasca deisiú nó iniúchadh a rinne deisitheoir neamhspleách, deisitheoir neamhghairmiúil nó úsáideoirí deiridh roimhe sin, nó de dheasca éilimh bhréagacha lena maítear go dtagann rioscaí sábháilteachta as deisiú nó iniúchadh den chineál sin, agus a mhíthreoraíonn tomhaltóirí ar an gcaoi sin.

(20)

Ba cheart feidhm a bheith ag an oibleagáid maidir le deisiú freisin i gcásanna ina bhfuil an monaróir bunaithe lasmuigh den Aontas. Chun a chur ar a gcumas do thomhaltóirí dul i muinín oibreoir eacnamaíoch atá bunaithe san Aontas chun an oibleagáid sin a chomhlíonadh, déantar foráil sa Treoir seo maidir le seicheamh oibreoirí eacnamaíocha malartacha ar gá dóibh oibleagáid an mhonaróra maidir le deisiú a chomhlíonadh sna cásanna sin. Ba cheart dó sin cur ar chumas na monaróirí atá lonnaithe lasmuigh den Aontas a n-oibleagáid maidir le deisiú a eagrú agus a chomhlíonadh laistigh den Aontas.

(21)

Ionas nach gcuirfear ró-ualach ar mhonaróirí agus chun a áirithiú go mbeidh siad in ann a n-oibleagáid maidir le deisiú a chomhlíonadh, ba cheart an oibleagáid sin a theorannú do na hearraí sin dá bhforáiltear d’aon cheanglais indeisitheachta i ngníomhartha dlí an Aontais, agus a mhéid a fhoráiltear don mhéid sin. Ní chuireann ceanglais indeisitheachta oibleagáid ar mhonaróirí earraí lochtacha a dheisiú, ach a áirithiú go bhfuil earraí indeisithe. Samplaí de ghníomhartha dlí de chuid an Aontais lena leagtar síos ceanglais indeisitheachta is ea gníomhartha tarmligthe arna nglacadh de bhun Rialachán (AE) 2024/1781 nó bearta cur chun feidhme arna nglacadh de bhun Threoir 2009/125/CE, lena gcruthaítear creat chun inbhuanaitheacht comhshaoil táirgí a fheabhsú, nó gníomhartha dlí ábhartha eile de chuid an Aontais mar atá Rialachán (AE) 2023/1542 ó Pharlaimint na hEorpa agus ón gComhairle (16). Ba cheart, leis teorannú sin ar an oibleagáid maidir le deisiú, a áirithiú nach mbeidh ach na hearraí sin atá indeisithe trí dhearadh faoi réir na hoibleagáide sin. Áirítear ar na ceanglais indeisitheachta ábhartha ceanglais deartha lena bhfeabhsaítear an cumas na hearraí a dhíchóimeáil agus raon páirteanna spártha atá le cur ar fáil ar feadh íostréimhse. Ba cheart an oibleagáid maidir le deisiú a bheith comhfhreagrach le raon feidhme na gceanglas indeisitheachta, mar shampla, d’fhéadfadh sé nach mbeadh feidhm ag ceanglais éicidhearthóireachta ach amháin maidir le comhpháirteanna áirithe de na hearraí nó d’fhéadfaí tréimhse shonrach ama a leagan síos chun páirteanna spártha a chur ar fáil. An oibleagáid sin maidir le deisiú faoin Treoir seo, trínar féidir leis an tomhaltóir a éileamh go díreach ar an monaróir earra a dheisiú le linn na céime iardhíola, ba cheart di na ceanglais indeisitheachta a bhaineann le taobh an tsoláthair a leagtar síos mar shampla i Rialachán (AE) 2024/1781 a chomhlánú agus, ar an gcaoi sin, tomhaltóirí a spreagadh chun deisiú a éileamh.

(22)

Chun deimhneacht dhlíthiúil a áirithiú, ba cheart leis an Treoir seo, in Iarscríbhinn II a ghabhann léi, gníomhartha dlí an Aontais ina bhfuil ceanglais indeisitheachta le haghaidh catagóirí ábhartha earraí a liostú. Chun comhleanúnachas a áirithiú le forbairtí rialála amach anseo, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i leith gníomhartha dlí de chuid an Aontais a chur le hIarscríbhinn II nuair a ghlactar ceanglais nua indeisitheachta. Ba cheart don Choimisiún na gníomhartha dlí sin a chur le hIarscríbhinn II a ghabhann leis an Treoir seo a luaithe is féidir agus ar a dhéanaí 12 mhí tar éis a bhfoilsithe. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (17). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile an tráth céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(23)

Cé go bhforchuirtear leis an Treoir seo an oibleagáid maidir le deisiú ar an monaróir, éascaítear léi freisin rogha seirbhísí deisiúcháin do thomhaltóirí ó dheisitheoirí eile. Is leis an bhFoirm Eorpach um Fhaisnéis faoin Deisiúchán a éascófar an rogha sin, foirm a sholáthróidh ní hamháin an monaróir ach deisitheoirí eile mar atá an díoltóir nó deisitheoirí neamhspleácha, ar soláthar deonach é, nó a gheofar trí chuardach a dhéanamh tríd an ardán deisiúcháin ar líne. Ós rud é go mbeidh ar thomhaltóirí íoc as an deisiú, is dócha go gcuirfidh siad deiseanna deisiúcháin i gcomparáid le chéile chun na seirbhísí deisiúcháin is oiriúnaí dá gcuid riachtanas a roghnú. Dá bhrí sin, is dócha go rachaidh siad i dteagmháil le deisitheoirí neamhspleácha gar dóibh nó leis an díoltóir sula rachaidh siad i dteagmháil le monaróirí a d’fhéadfadh a bheith suite níos faide uathu, mar shampla, agus a bhféadfadh a bpraghas a bheith níos airde mar gheall ar chostais iompair.

(24)

I gcomhréir le Treoir (AE) 2019/771, ba cheart monaróir a dhíolmhú ón oibleagáid maidir le deisiúi gcás ina bhfuil sé dodhéanta an deisiú a dhéanamh go fíorasach nó go dlíthiúil. Dá bhrí sin, níor cheart don mhonaróir a bheith in ann deisiú a dhiúltú ar chúiseanna eacnamaíocha amháin, mar shampla costas na bpáirteanna spártha, nó ar an aon chúis amháin go ndearna deisitheoirí eile nó, i gcás inarb infheidhme, an tomhaltóir deisiú roimhe sin. Tá an critéar á úsáid cheana féin, is é sin an bhfuil an deisiú dodhéanta, sa dlí náisiúnta lena gcuirtear chun feidhme Treoir (AE) 2019/771 nó Treoir 1999/44/CE ó Pharlaimint na hEorpa agus ón gComhairle (18) a tháinig roimpi, agus tá sé á chur i bhfeidhm ag cúirteanna náisiúnta.

(25)

Chun feasacht na dtomhaltóirí a ardú maidir le deisiú a bheith ar fáil agus, ar an gcaoi sin, dóchúlacht an deisithe sin, ba cheart do mhonaróirí nó, i gcás inarb infheidhme, d’ionadaithe údaraithe, allmhaireoirí nó dáileoirí, tomhaltóirí a chur ar an eolas trí fhaisnéis a chur ar fáil faoina n-oibleagáid maidir le deisiú agus faoina seirbhísí deisiúcháin. Ba cheart an fhaisnéis a bheith ar fáil ar a laghad ar feadh thréimhse iomlán na hoibleagáide maidir le deisiú, a d’fhéadfaí a thuiscint a thosaíonn ón tráth a chuirfear earra ar an margadh go dtí go rachaidh na ceanglais indeisitheachta in éag. Ba cheart na hearraí a chumhdaítear leis an oibleagáid sin a lua san fhaisnéis, mar aon le míniú go gcuirtear deisiú ar fáil do na hearraí sin agus a mhéid a chuirtear deisiú ar fáil dóibh, mar shampla trí fhochonraitheoirí. Ba cheart rochtain éasca a bheith ag an tomhaltóir ar an bhfaisnéis sin agus í a bheith curtha ar fáil ar bhealach soiléir sothuigthe, gan gá don tomhaltóir í a iarraidh, agus i gcomhréir le ceanglais inrochtaineachta Threoir (AE) 2019/882. Ba cheart an tsaoirse a bheith ag an monaróir na modhanna trína gcuireann sé an tomhaltóir ar an eolas a chinneadh, amhail trí shuíomh gréasáin ar bhealach infheicthe feiceálach, tríd an bPas Táirge Digiteach nó ag an díolphointe, mar shampla i gcás inarb é an monaróir an díoltóir.

(26)

Chun deisiú a spreagadh, ba cheart don Choimisiún ardán Eorpach deisiúcháin ar líne a chur ar bun (‘an t-ardán Eorpach ar líne’). Ba cheart an t-ardán Eorpach ar líne a bheith comhdhéanta de ranna náisiúnta atá bunaithe ar chomhéadan coiteann ar líne agus naisc chuig ardáin náisiúnta deisiúcháin ar líne (‘na hardáin náisiúnta ar líne’) a chomhlíonann na critéir a leagtar amach sa Treoir seo. Chuige sin, ba cheart don Choimisiún comhéadan coiteann ar líne a fhorbairt don ardán Eorpach ar líne. Ba cheart don Choimisiún a bheith freagrach freisin as cothabháil TF an chomhéadain choitinn ar líne a áirithiú agus as freagra a thabhairt ar fhiosruithe teicniúla nó ar cheisteanna eile ó úsáideoirí maidir leis an ardán Eorpach ar líne a bheith ag feidhmiú go mícheart. Ba cheart an t-ardán Eorpach ar líne a bheith inrochtana saor in aisce do thomhaltóirí. Ba cheart dó freisin a bheith in ann fónamh, i gcás inarb infheidhme, do dhíoltóirí earraí athchóirithe, ceannaitheoirí earraí lochtacha lena n-athchóiriú nó ionstraimí margadhbhunaithe comhlántacha, amhail tionscnaimh deisiúcháin faoi stiúir an phobail. Ba cheart do na Ballstáit an comhéadan coiteann ar líne a úsáid chun a ranna náisiúnta a chruthú ar an ardán Eorpach ar líne nó ardáin náisiúnta ar líne a chomhlíonann na critéir a leagtar amach sa Treoir seo a bhunú nó a choinneáil ar bun i gcás inarb infheidhme. Nuair a bhaineann na Ballstáit úsáid as an ardán Eorpach ar líne, ba cheart é a fhágáil faoi na Ballstáit conas na ranna náisiúnta a phoibliú, mar shampla trí fhéinchlárú, trí bhulcshonraí a allmhairiú ó bhunachair sonraí atá ann cheana le toiliú na ndeisitheoirí nó trí chlárú a chur faoi réir formheas roimh ré. I gcás ina measfadh na Ballstáit gur gá sin, ba cheart dóibh a bheith in ann coinníollacha a leagan amach chun rochtain a fháil ar na ranna náisiúnta, mar shampla trí chritéir a chomhlíonadh maidir le cáilíochtaí gairmiúla nó a léiriú go gcomhlíontar na caighdeáin cháilíochta deisiúcháin dheonacha Eorpacha nó náisiúnta is infheidhme. Ba cheart na coinníollacha sin a bheith neamh-idirdhealaitheach agus i gcomhréir le dlí an Aontais. Ba cheart do na Ballstáit arb é a rogha coinníollacha rochtana a shocrú ina ranna náisiúnta 6 mhí bhreise a bheith acu chun a roinn náisiúnta a dhéanamh oibríochtúil.

(27)

Tá acmhainní infheistithe ag roinnt Ballstát nó gnólachtaí chun ardáin náisiúnta ar líne a fhorbairt chun deisiú a chur chun cinn. Ionas nach gcruthófar ualach riaracháin iomarcach agus chun solúbthacht iomchuí a chur ar fáil, ba cheart an rogha a bheith ag na Ballstáit freisin ardán náisiúnta ar líne atá ann cheana agus a chomhlíonann ceanglais na Treorach seo a choinneáil ar bun. I gcás ina gcoinneoidh nó ina mbunóidh Ballstát ardán náisiúnta ar líne, níor cheart é a bheith d’oibleagáid air roinn náisiúnta a bhunú ar an ardán Eorpach ar líne ná pointí teagmhála náisiúnta a ainmniú. Ba cheart do na Ballstáit rogha a dhéanamh idir roinn náisiúnta a bhunú ar an ardán Eorpach ar líne nó ardán náisiúnta ar líne a bhunú a chomhlíonann na coinníollacha a leagtar amach sa Treoir seo agus an Coimisiún a chur ar an eolas faoi sin faoin 31 Iúil 2026. Beidh rochtain ar na hardáin náisiúnta ar líne sin trí nasc ón ardán Eorpach ar líne má tá siad oibríochtúil ar a dhéanaí an 31 Iúil 2027. D’fhéadfaí gur ardáin phríobháideacha, ardáin phoiblí nó ardáin comhpháirtíochtaí príobháideacha poiblí iad na hardáin sin.

(28)

Ba cheart uirlisí soláimhsithe chun deisitheoirí a chuardach de réir Ballstáit a áireamh ar an ardán Eorpach ar líne. Chabhródh sé sin le tomhaltóirí measúnú a dhéanamh ar fhiúntas soláthraithe seirbhísí deisiúcháin éagsúla agus comparáid a dhéanamh eatarthu agus, ar an gcaoi sin, iad a mhealladh chun deisiú a roghnú. Cé gur aidhm don ardán Eorpach ar líne cuardach a éascú ar sheirbhísí deisiúcháin i gcaidrimh gnólacht le tomhaltóir, chun tomhaltas inbhuanaithe a chur chun cinn, ba cheart do na Ballstáit a bheith in ann raon feidhme a roinne náisiúnta ar an ardán Eorpach ar líne a leathnú chun go gcuirfear san áireamh leo díoltóirí earraí athchóirithe, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail, mar shampla caiféanna deisiúcháin.

(29)

Ba cheart do na Ballstáit ionadaí a ainmniú le bheith páirteach i ngrúpa saineolaithe arna bhunú ag an gCoimisiún chun comhairle a thabhairt maidir le dearadh agus feidhmiú an ardáin Eorpaigh ar líne, chun comhordú idir an Coimisiún agus na Ballstáit a éascú.

(30)

Ba cheart do na Ballstáit pointí teagmhála náisiúnta a ainmniú freisin a bheidh freagrach as cúraimí a bhaineann le bainistiú a roinne náisiúnta. Ba cheart do phointí teagmhála náisiúnta arna n-ainmniú ag na Ballstáit, i gcás inarb infheidhme, faireachas a dhéanamh ar na sonraí atá sa roinn náisiúnta darb aidhm faisnéis neamhbhailí a bhrath, a shainaithint agus a bhaint i gcomhréir le dlí an Aontais.

(31)

Ba cheart don Choimisiún a áirithiú go mbeidh rochtain éasca agus saor in aisce ag tomhaltóirí ar an ardán Eorpach ar líne. Ba cheart don ardán Eorpach ar líne ligean do thomhaltóirí seirbhísí deisiúcháin oiriúnacha a aimsiú dá n-earraí lochtacha agus, i gcás inarb infheidhme, díoltóirí earraí athchóirithe, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail mar shampla caiféanna deisiúcháin a aimsiú. Ba cheart do thomhaltóirí a bheith in ann feidhmeanna cuardaigh a úsáid chun scagadh a dhéanamh de réir gnéithe éagsúla mar shampla catagóirí earraí, infhaighteacht earraí athsholáthair sealadacha, táscairí cáilíochta agus aon choinníoll deisiúcháin, lena n-áirítear suíomh an deisitheora agus an fhéidearthacht seirbhísí a sholáthar ar bhonn trasteorann. Ba cheart an t-ardán Eorpach ar líne a bheith inrochtana freisin do thomhaltóirí leochaileacha, lena n-áirítear daoine faoi mhíchumas, i gcomhréir le dlí an Aontais is infheidhme maidir le hinrochtaineacht.

(32)

D’fhéadfadh an fheidhm chuardaigh atá bunaithe ar earraí tagairt a dhéanamh don chineál earra nó don bhranda earra. Ós rud é nach féidir le deisitheoirí a bheith ar an eolas faoin locht sonrach sula ndéantar iarraidh ar dheisiú, ba cheart é a bheith leordhóthanach go ndéanann siad a sholáthar ar an ardán Eorpach ar líne faisnéis chineálach maidir le príomhghnéithe dá seirbhísí deisiúcháin chun a chur ar a gcumas do thomhaltóirí cinneadh a dhéanamh maidir leis an earra atá i gceist a dheisiú, go háirithe an meán-am chun deisiúchán a dhéanamh, infhaighteacht earraí athsholáthair sealadacha, an áit ina dtugann an tomhaltóir na hearraí ar láimh lena ndeisiú agus infhaighteacht seirbhísí coimhdeacha. Ba cheart deisitheoirí agus, i gcás inarb infheidhme, díoltóirí earraí athchóirithe, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail mar shampla caiféanna deisiúcháin, a spreagadh chun a bhfaisnéis ar an ardán Eorpach ar líne a thabhairt cothrom le dáta go tráthrialta. Chun muinín a chothú i measc tomhaltóirí as na seirbhísí deisiúcháin atá ar fáil ar an ardán Eorpach ar líne, ba cheart deisitheoirí a bheith in ann a léiriú go gcloíonn siad le caighdeáin áirithe deisiúcháin.

(33)

Chun an Fhoirm Eorpach um Fhaisnéis faoin Deisiúchán a éascú, ba cheart an deis a bheith ag tomhaltóirí ar an ardán Eorpach ar líne an fhoirm sin a iarraidh go díreach ón deisitheoir tríd an ardán Eorpach ar líne, i gcás ina gcuireann an deisitheoir an fhoirm sin ar fáil go deonach.

(34)

Chun feasacht na dtomhaltóirí ar an ardán Eorpach ar líne a ardú, ba cheart don Choimisiún agus do na Ballstáit tabhairt faoi chéimeanna iomchuí, mar shampla fógraíocht a dhéanamh ar an ardán Eorpach ar líne ar shuíomhanna gréasáin náisiúnta gaolmhara nó feachtais chumarsáide a dhéanamh.

(35)

Ba cheart do na Ballstáit a áirithiú go bhfuil a ndlíthe náisiúnta, lena n-áirítear nuair a thrasuíonn siad an Treoir seo, i gcomhréir go hiomlán leis an tsaoirse bhunúsach chun seirbhísí a sholáthar agus leis an tsaoirse bunaíochta mar a chumhdaítear sna Conarthaí. Ba cheart an Treoir seo a bheith gan dochar do Threoir (AE) 2018/958 ó Pharlaimint na hEorpa agus ón gComhairle (19).

(36)

Ba cheart do na Ballstáit beart amháin ar a laghad a dhéanamh chun deisiú a chur chun cinn. D’fhéadfadh na bearta sin a bheith de chineál airgeadais nó de chineál neamhairgeadais. D’fhéadfaí a áireamh ar bhearta de chineál neamhairgeadais feachtais faisnéise, tacaíocht do thionscnaimh deisiúcháin faoi stiúir an phobail trí mhodhanna díreacha mar shampla spás a chur ar fáil do shaotharlanna deisiúcháin nó d’áiteanna cruinnithe, cuir i gcás in ionaid phobail nó chultúrtha. D’fhéadfadh bearta de chineál airgeadais a bheith i bhfoirmeacha éagsúla mar shampla dearbháin deisiúcháin, cistí deisiúcháin, tacú le hardáin áitiúla nó réigiúnacha ar líne le haghaidh deisiú nó iad a chruthú, clár oiliúna a eagrú nó a mhaoiniú chun scileanna speisialta a shealbhú i ndáil le deisiú, nó bearta cánachais. I gcomhthéacs bearta cánachais, i gcás inarb infheidhme, i gcomhréir le hIarscríbhinn III a ghabhann le Treoir 2006/112/CE ón gComhairle (20), féadfaidh na Ballstáit a roghnú, de réir mar is iomchuí, foráil a dhéanamh maidir le ráta laghdaithe cánach breisluacha i ndáil le soláthar seirbhísí deisiúcháin d’fhearais tí, bróga agus earraí leathair, éadaí agus línéadach tí, lena n-áirítear deisiú agus athrú. Sa chomhthéacs sin, d’fhéadfadh an Coimisiún breathnú ar thogra a thabhairt isteach, más iomchuí, chun Iarscríbhinn III a ghabhann leis an Treoir sin a leasú. D’fhéadfaí na bearta sin a dhéanamh ar an leibhéal náisiúnta, réigiúnach nó áitiúil. Ba cheart do na Ballstáit fógra a thabhairt don Choimisiún faoi cheann amháin nó níos mó de na bearta a dhéantar chun deisiú a chur chun cinn, chun malartú dea-chleachtas a éascú. Ba cheart don Choimisiún an fhaisnéis maidir leis na bearta sin a chur ar fáil don phobal.

(37)

Ní mór do na Ballstáit pionóis a leagan síos i gcás ina sárófar na forálacha náisiúnta arna nglacadh de bhun na Treorach seo agus a áirithiú go bhforfheidhmeofar iad. Ba cheart do na pionóis sin a bheith éifeachtach, comhréireach agus athchomhairleach.

(38)

Ba cheart don Choimisiún an fhorbairt ar chaighdeán deonach cáilíochta Eorpach a chumasú le haghaidh seirbhísí deisiúcháin, mar shampla trí chomhar deonach maidir le caighdeán idir gnólachtaí, údaráis phoiblí agus geallsealbhóirí eile a spreagadh agus a éascú, mar shampla deisitheoirí neamhspleácha agus tionscnaimh deisiúcháin faoi stiúir an phobail, nó trí iarraidh ar chaighdeánú a eisiúint do na heagraíochtaí Eorpacha um chaighdeánú. D’fhéadfadh caighdeán cáilíochta Eorpach le haghaidh seirbhísí deisiúcháin cur le muinín tomhaltóirí as seirbhísí deisiúcháin ar fud an Aontais. D’fhéadfaí a áireamh ar an gcaighdeán sin gnéithe a mbíonn tionchar acu ar chinntí tomhaltóirí maidir le deisiúchán, amhail an t-am chun deisiúchán a dhéanamh, infhaighteacht earraí athsholáthair sealadacha, dearbhuithe cáilíochta lena n-áirítear ráthaíocht tráchtála maidir le deisiúchán, agus infhaighteacht seirbhísí coimhdeacha, ina measc baint, suiteáil agus iompar arna dtairiscint ag deisitheoirí.

(39)

Tá na forálacha maidir le forfheidhmiú a leagtar amach sa Treoir seo gan dochar do Threoir (AE) 2020/1828 ó Pharlaimint na hEorpa agus ón gComhairle (21).

(40)

Chun tomhaltóirí a dhreasú chun deisiú a roghnú chun earraí a thabhairt chun comhréireachta laistigh de dhliteanas an díoltóra agus, dá bhrí sin, chun deisiú a chur chun cinn, i gcás ina roghnóidh an tomhaltóir deisiú mar an leigheas chun na hearraí a thabhairt chun comhréireachta, ba cheart Treoir (AE) 2019/771 a leasú chun síneadh 12 mhí a chur leis an tréimhse dhliteanais, ar cheart í a chur leis an tréimhse dhliteanais atá fágtha ag an earra. Ba cheart feidhm a bheith ag an síneadh sin aon uair amháin. Mar sin féin, d’fhéadfadh na Ballstáit deisiú a dhreasú a thuilleadh trí fhoráil a dhéanamh maidir le síntí breise ar dhliteanas an díoltóra má dhéantar an deisiú arís. D’fhéadfadh na Ballstáit rialacha a thabhairt isteach nó a choinneáil chun dliteanas an díoltóra a shíneadh i gcás deisiú ar feadh tréimhsí níos faide ná 12 mhí. I gcomhréir le Treoir (AE) 2019/771, i gcás ina bhfuil feidhm ag síneadh na tréimhse dliteanais, ba cheart an díoltóir a bheith faoi dhliteanas i leith aon easpa comhréireachta a bhí ann an tráth a seachadadh na hearraí agus a thiocfaidh chun solais laistigh den tréimhse dhliteanais atá fágtha ag an earra, ar tréimhse í lena n-áirítear an síneadh. Ba cheart síneadh na tréimhse dliteanais a bheith gan dochar do chearta tomhaltóirí dá bhforáiltear i dTreoir (AE) 2019/771. Ba cheart an Treoir seo a bheith gan dochar do na Ballstáit a bheith ag tabhairt isteach nó ag coinneáil ar bun forálacha nach bhforáiltear do shíneadh níos faide a chur leis an tréimhse dhliteanais leo ach i gcás codanna deisithe amháin i gcomhréir le Treoir (AE) 2019/771. Agus an tsolúbthacht dá bhforáiltear le Treoir (AE) 2019/771 á cur san áireamh, na Ballstáit nach bhforálann do theorainneacha ama socraithe le haghaidh dhliteanas an díoltóra nó nach bhforálann ach do thréimhse theorann le haghaidh na leigheasanna, ba cheart dóibh a áirithiú go mbeidh dliteanas an díoltóra nó an tréimhse theorann le haghaidh leigheasanna i gcás deisiú coibhéiseach le 2 bhliain agus 12 mhí ar a laghad, a bheidh comhfhreagrach le híostréimhse dhliteanais an díoltóra a leagtar amach i dTreoir (AE) 2019/771 agus leis an síneadh íosta ar an tréimhse sin i gcás deisiú. Dá gcuirfí síneadh leis an tréimhse dhliteanais, spreagfaí tomhaltas inbhuanaithe agus chuirfí leis an ngeilleagar ciorclach.

(41)

Chun deisiú a chur chun cinn laistigh de dhliteanas an díoltóra, ar mhaithe le tomhaltóirí agus chun an comhshaol a chosaint, ba cheart Treoir (AE) 2019/771 a leasú a thuilleadh chun oibleagáid nua a thabhairt isteach an tomhaltóir a chur ar an eolas faoin gceart rogha a dhéanamh idir deisiú agus athsholáthar, chomh maith le síneadh a chur leis an tréimhse dhliteanais má roghnaíonn an tomhaltóir sin deisiú agus, ar an gcaoi sin, feasacht a mhúscailt ar roghanna malartacha agus ar an mbuntáiste a bhaineann le deisiú a roghnú. Spreagfadh an ceanglas faisnéise sin tomhaltas inbhuanaithe agus chuirfeadh sé le geilleagar ciorclach.

(42)

Chun tacú le tomhaltóirí agus dreasacht a thabhairt dóibh deisiú a dhéanamh, d’fhéadfadh an díoltóir, ag brath ar shainiúlachtaí na catagóire earraí ábhartha, earra athsholáthair a thabhairt ar iasacht don tomhaltóir, murar cuireadh an deisiú i gcrích laistigh de thréimhse réasúnta ama nó gan míchaoithiúlacht shuntasach. D’fhéadfadh an t-earra athsholáthair sin a bheith ina earra athchóirithe chomh maith. In aon chás, ba cheart an t-earra athsholáthair a thugtar ar iasacht go sealadach don tomhaltóir a bheith saor in aisce. Fós féin, ba cheart don díoltóir, ina theannta sin, tabhairt faoin deisiú laistigh de thréimhse réasúnta ama. Is féidir míchaoithiúlacht shuntasach don tomhaltóir a sheachaint trí earra a thabhairt ar iasacht fad a bheidh an deisiú á dhéanamh, ach ní údar maith é sin le tréimhse dheisiúcháin atá neamhréasúnach fada. Thairis sin, i gcás athsholáthair mar leigheas agus arna iarraidh sin don tomhaltóir, d’fhéadfadh an díoltóir earra athchóirithe a sholáthar don tomhaltóir.

(43)

Chun gur féidir na rialacha a leagtar amach sa Treoir seo a fhorfheidhmiú trí bhíthin caingne ionadaíocha, is gá leasú a dhéanamh ar Iarscríbhinn I a ghabhann le Treoir (AE) 2020/1828. Maidir leis na húdaráis inniúla arna n-ainmniú ag a mBallstáit chun comhoibriú agus comhordú a dhéanamh le chéile agus leis an gCoimisiún chun comhlíonadh na rialacha a leagtar amach sa Treoir seo a fhorfheidhmiú, is gá leasú a dhéanamh ar an Iarscríbhinn a ghabhann le Rialachán (AE) 2017/2394 ó Pharlaimint na hEorpa agus ón gComhairle (22).

(44)

Chun gur féidir le hoibreoirí eacnamaíocha iad féin a chur in oiriúint don Treoir seo, ba cheart forálacha idirthréimhseacha a thabhairt isteach maidir le cur i bhfeidhm roinnt Airteagal den Treoir seo. Níor cheart feidhm a bheith ag an leasú ar Threoir (AE) 2019/771 ach amháin maidir le conarthaí díolacháin arna dtabhairt i gcrích tar éis an 31 Iúil 2026 chun deimhneacht dhlíthiúil a áirithiú agus chun dóthain ama a thabhairt do dhíoltóirí iad féin a chur in oiriúint do na leigheasanna leasaithe deisithe agus athsholáthair.

(45)

I gcomhréir le Dearbhú Comhpháirteach Polaitiúil an 28 Meán Fómhair 2011 ó na Ballstáit agus ón gCoimisiún maidir le doiciméid mhíniúcháin (23), ghlac na Ballstáit mar chúram orthu féin, i gcásanna a bhfuil údar cuí leo, doiciméad amháin nó níos mó a chur leis an bhfógra maidir lena mbearta trasuite, ar doiciméid iad lena mínítear an gaol idir na comhpháirteanna de threoir agus codanna comhfhreagracha na n-ionstraimí náisiúnta trasuite. I ndáil leis an Treoir seo, measann an reachtóir go bhfuil údar cuí le doiciméid den sórt sin a tharchur.

(46)

Deisiú earraí arna gceannach ag tomhaltóirí a chur chun cinn, d’fhonn rannchuidiú le feidhmiú cuí an mhargaidh inmheánaigh agus foráil á déanamh d’ardleibhéal cosanta don chomhshaol agus do thomhaltóirí, ní féidir leis na Ballstáit an cuspóir sin a ghnóthú go leordhóthanach. Maidir le rialacha náisiúnta sainordaitheacha atá ag teacht chun cinn lena gcuirtear tomhaltas inbhuanaithe chun cinn trí lochtanna lasmuigh de raon feidhme Threoir (AE) 2019/771 a dheisiú, is dócha go mbeidh siad éagsúil agus go mbeidh siad ina gcúis le hilroinnt an mhargaidh inmheánaigh. Ní fhéadfaidh na Ballstáit leasú a dhéanamh ar na rialacha atá comhchuibhithe go hiomlán a bhaineann le lochtanna laistigh de dhliteanas an díoltóra a leagtar amach i dTreoir (AE) 2019/771. De bharr fhairsinge agus éifeachtaí chuspóir na Treorach seo, is fearr is féidir é a ghnóthú ar leibhéal an Aontais trí rialacha comhchoiteanna atá comhchuibhithe go hiomlán lena gcuirtear deisiúchán chun cinn laistigh de dhliteanas an díoltóra a bhunaítear le Treoir (AE) 2019/771 agus lasmuigh de. Dá bhrí sin, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(47)

Leis an Treoir seo, urramaítear na cearta agus na saoirsí bunúsacha agus féachtar lena áirithiú go n-urramófar go hiomlán Airteagail 16, 26, 37, 38 agus 47 de Chairt um Chearta Bunúsacha an Aontais Eorpaigh (‘an Chairt’) go háirithe. Rannchuidítear léi le feabhas a chur ar cháilíocht an chomhshaoil i gcomhréir le hAirteagal 37 den Chairt trí thomhaltas inbhuanaithe earraí a chur chun cinn agus, ar an gcaoi sin, tionchair dhiúltacha ar an gcomhshaol de bharr earraí inmharthana a bheith á ndiúscairt roimh am a laghdú. Leis an Treoir seo, áirithítear go n-urramófar go hiomlán Airteagal 38 maidir le cosaint do thomhaltóirí trí fheabhas a chur ar chearta tomhaltóirí a bhaineann le lochtanna a thagann chun cinn nó a thagann chun solais lasmuigh de dhliteanas an díoltóra de bhun Threoir (AE) 2019/771. Áirithítear léi freisin go n-urramófar an tsaoirse chun gnó a sheoladh i gcomhréir le hAirteagal 16 den Chairt trí shaoirse chonarthach a choimirciú agus trí fhorbairt seirbhísí deisiúcháin sa mhargadh inmheánach a spreagadh. Leis an Treoir seo, rannchuidítear le daoine faoi mhíchumas a lánpháirtiú i gcomhréir le hAirteagal 26 den Chairt trí inrochtaineacht ar an ardán Eorpach ar líne a éascú do dhaoine faoi mhíchumas. Leis an Treoir seo, féachtar lena áirithiú go n-urramófar go hiomlán Airteagal 47 den Chairt maidir leis an gceart chun leigheas éifeachtach agus triail chóir a fháil trí mhodhanna éifeachtacha forfheidhmithe,

(1)

ciallaíonn ‘tomhaltóir’ tomhaltóir mar a shainmhínítear in Airteagal 2, pointe (2), de Threoir (AE) 2019/771;

(2)

ciallaíonn ‘deisitheoir’ aon duine nádúrtha nó dlítheanach a sholáthraíonn seirbhís deisiúcháin a bhaineann le trádáil, gnó, ceird nó gairm an duine sin, lena n-áirítear monaróirí agus díoltóirí a sholáthraíonn seirbhísí deisiúcháin agus soláthraithe seirbhísí deisiúcháin, bídís neamhspleách nó cleamhnaithe leis na monaróirí nó díoltóirí sin;

(3)

ciallaíonn ‘deisiú’‘deisiú’ mar a shainmhínítear in Airteagal 2, pointe (20), de Rialachán (AE) 2024/1781;

(4)

ciallaíonn ‘díoltóir’‘díoltóir’ mar a shainmhínítear in Airteagal 2, pointe (3), de Threoir (AE) 2019/771;

(5)

ciallaíonn ‘monaróir’‘monaróir’ mar a shainmhínítear in Airteagal 2, pointe (42), de Rialachán (AE) 2024/1781;

(6)

ciallaíonn ‘ionadaí údaraithe’‘ionadaí údaraithe’ mar a shainmhínítear in Airteagal 2, pointe (43) de Rialachán (AE) 2024/1781;

(7)

ciallaíonn ‘allmhaireoir’‘allmhaireoir’ mar a shainmhínítear in Airteagal 2, pointe (44), de Rialachán (AE) 2024/1781;

(8)

ciallaíonn ‘dáileoir’‘dáileoir’ mar a shainmhínítear in Airteagal 2, pointe (45), de Rialachán (AE) 2024/1781;

(9)

ciallaíonn ‘earraí’‘earraí’ mar a shainmhínítear in Airteagal 2, pointe (5), de Threoir (AE) 2019/771, seachas uisce, gás agus leictreachas;

(10)

ciallaíonn ‘athchóiriú’‘athchóiriú’ mar a shainmhínítear in Airteagal 2, pointe (18), de Rialachán (AE) 2024/1781;

(11)

ciallaíonn ‘ceanglais indeisitheachta’ ceanglais faoi ghníomhartha dlí an Aontais a liostaítear in Iarscríbhinn II lena gcumasaítear earra a dheisiú, lena n-áirítear ceanglais maidir le feabhas a chur ar a éascaíocht díchóimeála agus ceanglais maidir le rochtain ar pháirteanna spártha, agus faisnéis agus uirlisí a bhaineann le deisiúchán is infheidhme maidir le hearraí nó comhpháirteanna sonracha earraí;

(12)

ciallaíonn ‘meán marthanach’‘meán marthanach’ mar a shainmhínítear in Airteagal 2, pointe (11), de Threoir (AE) 2019/771.

(1)

In Airteagal 7(1), cuirtear an méid seo a leanas in ionad phointe (d):

;

(2)

Leasaítear Airteagal 10 mar a leanas:

(3)

In Airteagal 13, cuirtear isteach an mhír seo a leanas:

(4)

Cuirtear an méid seo a leanas in ionad Airteagal 14, mír (1):