(1)

Is é an Comhaontú Glas don Eoraip a leagtar amach i dteachtaireacht ón gCoimisiún an 11 Nollaig 2019 straitéis fáis inbhuanaithe na hEorpa agus tá sé d’aidhm aici sochaí chothrom rathúil a dhéanamh den Aontas, ina mbeidh geilleagar nua-aimseartha, iomaíoch, neodrach ó thaobh na haeráide de agus ciorclach agus comhshaol saor ó thocsainí. Leagtar amach an cuspóir uaillmhianach chun a áirithiú go mbeidh an tAontas ar an gcéad ilchríoch a bheidh neodrach ó thaobh na haeráide de faoi 2050. Aithníonn sé na buntáistí a bhaineann le hinfheistíocht a dhéanamh in inbhuanaitheacht iomaíoch an Aontais trí Eoraip níos cothroime, níos glaise agus níos digití a thógáil. Tá ról lárnach ag táirgí san aistriú glas seo. Ag cur i dtábhacht go bhfuil na próisis táirgthe agus na patrúin tomhaltais atá ann faoi láthair fós rólíneach agus go bhfuil siad ag brath an iomarca ar thréchur ábhar nua a bhaintear, a thrádáiltear agus a phróiseáiltear ina n-earraí agus a dhiúscraítear ar deireadh mar dhramhaíl nó mar astaíochtaí, cuireann an Comhaontú Glas don Eoraip béim ar an ngéarghá atá le haistriú go samhail an gheilleagair chiorclaigh agus cuireann sé béim ar an dul chun cinn suntasach atá fós le déanamh. Sainaithnítear leis an éifeachtúlacht fuinnimh mar thosaíocht i ndícharbónú na hearnála fuinnimh agus i mbaint amach na gcuspóirí aeráide in 2030 agus 2050.

(2)

Chun dlús a chur leis an aistriú chuig samhail den gheilleagar ciorclach, cheap an Coimisiún clár oibre dírithe ar an todhchaí i dteachtaireacht uaidh an 11 Márta 2020 ar Phlean Gníomhaíochta nua um an nGeilleagar Ciorclach le haghaidh Eoraip a bheidh níos glaine agus níos iomaíche(CEAP), agus é ina chuspóir aige an creat rialála a chur in oiriúint do thodhchaí inbhuanaithe. Cuirtear i bhfios go láidir in CEAP, ‘go gcuirfidh an geilleagar ciorclach táirgí ardcháilíochta, feidhmiúla agus sábháilte ar fáil do na saoránaigh, ar táirgí iad atá éifeachtúil agus inacmhainne, a mhaireann níos faide agus atá ceaptha lena n-athúsáid, lena ndeisiú agus lena n-athchúrsáil ar ardcháilíocht’. Mar a leagtar amach in CEAP, níl aon tacar cuimsitheach ceanglas ann faoi láthair chun a áirithiú go n-éireoidh na táirgí uile a chuirtear ar mhargadh an Aontais níos inbhuanaithe agus go gcomhlíonfaidh siad critéir na ciorclaíochta. Go háirithe, le dearadh táirgí ní chuirtear inbhuanaitheacht chun cinn go leordhóthanach le linn na saolré iomláine. Dá thoradh sin, tá táirgí á n-athsholáthar go minic, lena mbaineann úsáid shuntasach fuinnimh agus acmhainní chun táirgí nua a tháirgeadh agus a dháileadh agus chun seantáirgí a dhiúscairt. Tá sé ródheacair fós d’oibreoirí eacnamaíocha agus do shaoránaigh roghanna inbhuanaithe a dhéanamh i ndáil le táirgí ós rud é go bhfuil an fhaisnéis ábhartha nó roghanna inacmhainne chun é sin a dhéanamh in easnamh. Dá thoradh sin cailltear deiseanna i dtaca le hinbhuanaitheacht agus le hoibríochtaí luachchoinneála, leis an éileamh teoranta ar ábhair thánaisteacha agus le bacainní ar ghlacadh samhlacha gnó ciorclacha.

(3)

Is réamhriachtanas é margadh inmheánach lánfheidhmiúil do tháirgí inbhuanaithe chun geilleagar ciorclach a bhunú san Aontas. Le comhcheanglais éicidhearthóireachta ar leibhéal an Aontais, chumasófaí samhlacha gnó nua an gheilleagair chiorclaigh a fhorbairt, a chur in úsáid agus a mhéadú de réir scála ar fud an mhargaidh inmheánaigh. Leis na bearta sin, mhaolófaí an t-ualach díréireach ar chuideachtaí agus thabharfaí rochtain don tionscal agus do thomhaltóirí ar shonraí iontaofa soiléire, rud a d’fhágfadh go ndéanfaí roghanna níos inbhuanaithe.

(4)

Leagtar amach i dTeachtaireacht ón gCoimisiún an 10 Márta 2020 i dtaobh Straitéis Thionsclaíoch Nua le haghaidh na hEorpa uaillmhian uileghabhálach an Aontais ‘dé-aistriú’ chun neodracht aeráide agus ceannaireacht dhigiteach a chothú. Tacaíonn sí leis an gComhaontú Glas don Eoraip agus í ag díriú ar an ról ceannasach nach mór do thionscal na hEorpa a imirt ina leith sin, trína lorg carbóin agus lorg ábhair a laghdú agus trí chiorclaíocht a neadú ar fud an gheilleagair, agus cuirtear i dtábhacht inti an gá atá ann aistriú ó shamhlacha traidisiúnta, agus athrú ó bhonn ar an tslí a ndearaimid, a ndéanaimid, a n-úsáidimid agus a ndiúscraímid táirgí, chomh maith leis an ngá atá le soláthar slán amhábhar. Cuideoidh athchúrsáil agus úsáid amhábhar tánaisteach le spleáchas an Aontais a laghdú. I dteachtaireacht ón gCoimisiún an 5 Bealtaine 2021 maidir le ‘Updating the 2020 New Industrial Strategy: Building a stronger Single Market for Europe’s recovery’ [Straitéis Nua Tionsclaíochta 2020 a thabhairt cothrom le dáta: Margadh Aonair níos láidre a thógáil le haghaidh théarnamh na hEorpa] neartaítear príomhtheachtaireachtaí Straitéis 2020 le Margadh Aonair níos láidre a thógáil do théarnamh na hEorpa agus dírítear ar na ceachtanna a foghlaimíodh ó ghéarchéim COVID-19, lena n-áirítear an gá le hathléimneacht a chothú.

(5)

In éagmais dhlí an Aontais, tá cineálacha éagsúla cur chuige náisiúnta ann cheana chun inbhuanaitheacht comhshaoil táirgí a fheabhsú, ceanglais faisnéise a bhaineann le fad comhoiriúnachta bogearraí feistí leictreonacha agus oibleagáidí tuairiscithe maidir le láimhseáil earraí marthanacha gan díol ina measc. Is léiriú é seo gur dócha go mbeadh ilroinnt bhreise sa mhargadh inmheánach de thoradh iarrachtaí breise náisiúnta chun na haidhmeanna atá á saothrú leis an Rialachán seo a bhaint amach. Dá bhrí sin, chun gur féidir cur le feidhmiú an mhargaidh inmheánaigh agus ardleibhéal cosanta comhshaoil a áirithiú an tráth céanna, tá gá le creat rialála uaillmhianach chun ceanglais éicidhearthóireachta a thabhairt isteach de réir a chéile le haghaidh táirgí. Leis an Rialachán seo, bunófar creat den sórt sin tríd an gcur chuige éicidhearthóireachta a leagadh amach ar dtús i dTreoir 2009/125/CE ó Pharlaimint na hEorpa agus ón gComhairle (3) is infheidhme maidir leis an réimse is leithne is féidir táirgí.

(6)

Leis an Rialachán seo, tacófar le patrúin táirgthe agus tomhaltais atá ailínithe le spriocanna inbhuanaitheachta foriomlána an Aontais, lena n-áirítear spriocanna aeráide, comhshaoil, fuinnimh, úsáide acmhainní agus bithéagsúlachta, agus beifear ag fanacht laistigh de theorainneacha an phláinéid, trí chreat reachtach a bhunú a chuireann le cuimsiú táirgí atá oiriúnach do gheilleagar ciorclach atá aeráidneodrach agus tíosach ar acmhainní, le dramhaíl a laghdú agus lena áirithiú go ndéanfar gnáthchleachtas de réir a chéile d’fheidhmíocht na gceannródaithe san inbhuanaitheacht. Ba cheart a fhoráil leis sin ceanglais nua éicidhearthóireachta a leagan síos chun marthanacht, iontaofacht, in-athsholáthar, in-uasghrádú, ath-inúsáidteacht, agus in-athchúrsáilteacht táirgí, an cumas athchóirithe agus cothabhála táirgí a fheabhsú, aghaidh a thabhairt ar láithreacht ceimiceán guaiseach i dtáirgí,éifeachtúlacht fuinnimh agus acmhainní táirgí a mhéadú, lena n-áirítear i dtaobh an féidir amhábhar straitéiseacha agus ríthábhachtach a aisghabháil, a nginiúint ionchasach dramhaíola a laghdú agus an t-ábhar athchúrsáilte i dtáirgí a mhéadú, agus a bhfeidhmíocht agus a sábháilteacht a áirithiú, athmhonarú agus athchúrsáil ardcháilíochta a chumasú agus lorg carbóin agus comhshaoil a laghdú.

(7)

Leis na ceanglais éicidhearthóireachta, ba cheart díriú freisin ar chleachtais atá bainteach le dífheidhmeacht anabaí. Bíonn tionchar diúltach foriomlán ag na cleachtais sin ar an gcomhshaol ó thaobh dramhaíl mhéadaithe agus úsáid mhéadaithe fuinnimh agus ábhar ar féidir iad a laghdú trí cheanglais éicidhearthóireachta agus rannchuidiú le tomhaltas inbhuanaithe ag an am céanna.

(8)

I rún uaithi an 25 Samhain 2020 dar teideal ‘I dtreo margaidh aonair níos inbhuanaithe do ghnólachtaí agus do thomhaltóirí’ (4), chuir Parlaimint na hEorpa in iúl gur díol sásaimh di táirgí marthanacha a chur chun cinn, ar táirgí iad atá níos éasca a dheisiú, a athúsáid agus a athchúrsáil. I rún uaithi an 10 Feabhra 2021 ar an bPlean Gníomhaíochta nua don Gheilleagar Ciorclach (5), chuir Parlaimint na hEorpa i bhfios go láidir gur cheart táirgí agus ábhair atá inbhuanaithe, ciorclach, sábháilte agus neamhthocsaineach a bheith ina ngnáthchleachtas i margadh an Aontais seachas mar eisceacht, agus gur cheart breathnú orthu mar an rogha réamhshocraithe, atá tarraingteach, inacmhainne agus inrochtana do gach tomhaltóir. D’iarr Parlaimint na hEorpa freisin go ndéanfadh spriocanna ceangailteacha an Aontais laghdú suntasach ar loirg ábhair agus tomhaltais an Aontais. Mheas sí, leis an aistriú go dtí geilleagar ciorclach, gur féidir réitigh a sholáthar chun aghaidh a thabhairt ar na dúshláin chomhshaoil reatha agus ar an ngéarchéim eacnamaíoch a tháinig as paindéim COVID-19. Ina conclúidí maidir le bheith ag féachaint le Téarnamh Ciorclach Glas, a glacadh an 11 Nollaig 2020, ba dhíol sásaimh don Chomhairle freisin intinn an Choimisiúin tograí reachtacha a chur isteach mar chuid de chreat beartais cuimsitheach, comhtháite agus inbhuanaithe do tháirgí lena gcuirtear neodracht aeráide, éifeachtúlacht fuinnimh agus acmhainní agus geilleagar ciorclach neamhthocsaineach chun cinn, lena gcosnaítear an tsláinte phoiblí agus an bhithéagsúlacht, agus lena gcumasaítear agus lena gcosnaítear tomhaltóirí agus ceannaitheoirí poiblí.

(9)

Leis an Rialachán seo, rannchuideofar le cuspóirí aeráide agus fuinnimh an Aontais a bhaint amach. I gcomhréir leis na spriocanna a leagtar amach i gComhaontú Pháras, a glacadh an 12 Nollaig 2015 faoi Chreat-Choinbhinsiún na Náisiún Aontaithe ar an Athrú Aeráide (6) (‘Comhaontú Pháras’), a d’fhormheas an tAontas an 5 Deireadh Fómhair 2016 (7), i Rialachán (AE) 2021/1119 ó Pharlaimint na hEorpa agus ón gComhairle (8) bunaítear gealltanas ceangailteach de laghdú intíre de chuid an Aontais ar ghlanastaíochtaí gás ceaptha teasa 55 % ar a laghad faoi 2030 agus cumhdaítear sa reachtaíocht an sprioc aeráidneodrachta ar fud an gheilleagair faoi 2050. In 2021, ghlac an Coimisiún pacáiste ‘Oiriúnach do 55’ ionas go mbeadh beartais aeráide agus fuinnimh an Aontais oiriúnach chun na cuspóirí sin a bhaint amach. Chun é sin a dhéanamh, i gcomhréir le céadphrionsabal na héifeachtúlachta fuinnimh a chumhdaítear i dTreoir (AE) 2018/2002 ó Pharlaimint na hEorpa agus ón gComhairle (9), ní mór feabhsuithe ar an éifeachtúlacht fuinnimh a mhéadú go suntasach, go dtí thart ar 36 % i dtéarmaí an tomhaltais fuinnimh deiridh faoi 2030. Beidh ról suntasach ag ceanglais táirge a bhunaítear faoin Rialachán seo chun an sprioc sin a bhaint amach trí lorg fuinnimh táirgí a laghdú go suntasach. Leis na ceanglais éifeachtúlachta fuinnimh sin, laghdófar freisin leochaileacht na dtomhaltóirí i leith méaduithe ar phraghsanna fuinnimh. Mar a aithnítear i gComhaontú Pháras, beidh ról tábhachtach ag inbhuanaitheacht an tomhaltais agus an táirgthe a fheabhsú in aghaidh a thabhairt ar an athrú aeráide.

(10)

Leis an Rialachán seo, rannchuideofar freisin le cuspóirí comhshaoil níos leithne an Aontais a bhaint amach. Cumhdaíonn an 8ú Clár Gníomhaíochta Comhshaoil arna bhunú le Cinneadh (AE) 2022/591 ó Pharlaimint na hEorpa agus ón gComhairle (10) i gcreat dlíthiúil cuspóir an Aontais fanacht laistigh de theorainneacha an phláinéid agus sainaithnítear ann coinníollacha cumasúcháin chun cuspóirí tosaíochta a bhaint amach, an t-aistriú chuig geilleagar ciorclach neamhthocsaineach san áireamh. Leis an gComhaontú Glas don Eoraip, iarrtar ar an Aontas freisin faireachán níos fearr a dhéanamh ar thruailliú aeir, uisce, ithreach agus táirgí tomhaltais, agus an truailliú sin a chosc agus a leigheas. Ciallaíonn sé sin nach mór ceimiceáin, ábhair agus táirgí a bheith sábháilte agus inbhuanaithe ina ndearadh agus le linn a saolré, rud a bheidh timthriallta ábhar neamhthocsaineach ina thoradh air arna leagan amach i dteachtaireacht ón gCoimisiún an 12 Bealtaine 2021 ar Phlean Gníomhaíochta AE: ‘Towards Zero Pollution for Air, Water and Soil’ [Conair i dTreo Uisce, Aer agus Ithir Saor ó Thruailliú] agus teachtaireacht ón gCoimisiún an 14 Deireadh Fómhair 2020 dar teideal ‘Straitéis Ceimiceán don Inbhuanaitheacht – I dTreo Timpeallacht Saor ó Thocsainí’, ina n-iarrtar go nglacfaí leis na spriocanna truaillithe nialasaigh i dtáirgeadh agus i dtomhaltas. Ina theannta sin, leis an gComhaontú Glas don Eoraip agus le CEAP aithnítear go soláthraíonn margadh inmheánach an Aontais mais chriticiúil lenar féidir tionchar a imirt ar chaighdeáin dhomhanda maidir le hinbhuanaitheacht táirgí agus dearadh táirgí. Dá bhrí sin, beidh ról suntasach ag an Rialachán seo maidir le roinnt spriocanna arna mbunú faoi Spriocanna Forbartha Inbhuanaithe Chlár Oibre 2030 na Náisiún Aontaithe don Fhorbairt Inbhuanaithe a bhaint amach, laistigh agus lasmuigh den Aontas araon, go háirithe spriocanna faoi Sprioc Forbartha Inbhuanaithe 12 (‘Tomhaltas agus Táirgeadh Freagrach’).

(11)

Le Treoir 2009/125/CE bunaítear creat chun na ceanglais éicidhearthóireachta do tháirgí a bhaineann le fuinneamh a shocrú. I gcomhar le Rialachán (AE) 2017/1369 ó Pharlaimint na hEorpa agus ón gComhairle (11), tá laghdú nach beag tagtha ar éileamh fuinnimh phríomhúil an Aontais ar tháirgí agus meastar go leanfaidh an coigilteas sin de bheith ag méadú. Áiríodh freisin sna bearta cur chun feidhme a glacadh faoi Threoir 2009/125/CE ceanglais a bhaineann le gnéithe ciorclaíochta, amhail marthanacht, indeisitheacht agus in-athchúrsáilteacht. An tráth céanna, tá raon feidhme ionstraimí amhail Éicilipéad AE, a tugadh isteach le Rialachán (CE) Uimh. 66/2010 ó Pharlaimint na hEorpa agus ón gComhairle (12), nó critéir AE um sholáthar poiblí glas a leagtar amach i dteachtaireacht ón gCoimisiún an 16 Iúil 2008 maidir le soláthar Poiblí ar mhaithe le timpeallacht níos fearr níos leithne ach tá tionchar laghdaithe acu toisc na srianta a bhaineann le cur chuige deonach.

(12)

Tríd is tríd, d’éirigh go maith le Treoir 2009/125/CE maidir le héifeachtúlacht fuinnimh agus roinnt gnéithe ciorclachta de tháirgí a bhaineann le fuinneamh a chothú, agus lena cur chuige éicidhearthóireachta d’fhéadfaí aghaidh a thabhairt de réir a chéile ar inbhuanaitheacht na dtáirgí uile. Chun gealltanais an Chomhaontaithe Ghlais don Eoraip a bhaint amach, ba cheart an cur chuige sin a leathnú chuig grúpaí táirgí eile agus aghaidh a thabhairt go córasach ar phríomhghnéithe chun inbhuanaitheacht comhshaoil táirgí a mhéadú le ceanglais cheangailteacha. Trína áirithiú nach gcuirfear ar mhargadh an Aontais ach táirgí a chomhlíonann na ceanglais sin, ní hamháin go bhfeabhsóidh an Rialachán seo saorghluaiseacht na dtáirgí sin trí mhíchothromaíochtaí náisiúnta a sheachaint, ach go laghdófar freisin tionchair dhiúltacha chomhshaoil saolré na dtáirgí sin a bhfuil na ceanglais sin leagtha síos dóibh.

(13)

Chun creat rialála comhchuibhithe a bheidh éifeachtach agus slán i bhfad na haimsire a chruthú, is gá foráil a dhéanamh chun ceanglais éicidhearthóireachta a shocrú i leith na n-earraí fisiceacha ar fad a chuirtear ar an margadh nó a chuirtear i seirbhís, lena n-áirítear comhpháirteanna amhail boinn agus táirgí idirmheánacha. Tá ábhar digiteach atá mar dhlúthchuid de tháirge fisiceach le cur san áireamh sa raon feidhme. Leis sin, ba cheart a cheadú don Choimisiún an réimse is leithne táirgí is féidir a chur i gcuntas agus tús áite á thabhairt aige do bhunú ceanglas éicidhearthóireachta agus ar an gcaoi sin a éifeachtacht a uasmhéadú. I gcás inar gá, ba cheart foráil a dhéanamh do dhíolúintí sonracha agus ceanglais éicidhearthóireachta á leagan síos, go háirithe i gcás nach gá ceanglais éicidhearthóireachta chun rannchuidiú le hinbhuanaitheacht chomhshaoil táirgí sonracha, nó mar shampla i gcás táirgí a bhfuil úsáid nó cuspóir ar leith acu nach bhféadfaí a chomhlíonadh agus ceanglais éicidhearthóireachta nó táirgí a tháirgtear i gcainníochtaí an-bheag á gcomhlíonadh, nó sainiúlacht agus méid mhargadh an táirge á gcur i gcuntas. Ina theannta sin, níor cheart feidhm a bheith ag an Rialachán seo maidir le táirgí ar léir cheana nach mbeadh na ceanglais éicidhearthóireachta oiriúnach nó i gcás ina bhforáiltear i gcreataí eile do na ceanglais sin a shocrú. Ba cheart gurb amhlaidh a bheadh i gcás bia agus beatha mar a shainmhínítear i Rialachán (CE) Uimh. 178/2002 ó Pharlaimint na hEorpa agus ón gComhairle (13), i gcás táirgí íocshláinte mar a shainmhínítear i dTreoir 2001/83/CE ó Pharlaimint na hEorpa agus ón gComhairle (14), i gcás táirgí íocshláinte tréidliachta mar a shainmhínítear i Rialachán (AE) 2019/6 ó Pharlaimint na hEorpa agus ón gComhairle (15), i gcás plandaí beo, ainmhithe agus miocrorgánaigh, i gcás táirgí de thionscnamh an duine agus táirgí plandaí agus ainmhithe a bhaineann go díreach lena n-atáirgeadh amach anseo agus i gcás feithiclí dá dtagraítear in Airteagal, in Airteagal 2(1) de Rialachán (AE) Uimh. 167/2013 ó Pharlaimint na hEorpa agus ón gComhairle (16), in Airteagal 2(1) de Rialachán (AE) Uimh. 168/2013 ó Pharlaimint na hEorpa agus ón gComhairle (17) agus in Airteagal 2(1) de Rialachán (AE) 2018/858 ó Pharlaimint na hEorpa agus ón gComhairle (18), i leith na ngnéithe táirgí sin a bhfuil ceanglais leagtha síos ina leith faoi ghníomhartha reachtacha earnáilsonracha de chuid an Aontais is infheidhme maidir leis na feithiclí sin. Tá na feithiclí sin faoi réir roinnt ceanglas táirgeshonrach agus faoi réir córais chomhchuibhithe cineálcheadaithe éagsúla faoi ghníomhartha dlíthiúla an Aontais, amhail Treoracha 2000/53/CE (19) agus 2005/64/CE (20) ó Pharlaimint na hEorpa agus ón gComhairle, agus Rialachán (AE) 2018/858. Ba cheart ceanglais chomhchuibhithe bhreise feithiclí a theorannú do ghnéithe nach dtugtar aghaidh orthu faoi láthair, mar shampla ceanglais chomhshaoil bonn. Níor cheart, áfach, r-rothair ná scútair leictreacha a eisiamh ó raon feidhme an Rialacháin seo.

(14)

Le Treoir (AE) 2024/1275 ó Pharlaimint na hEorpa agus ón gComhairle (21), ní foláir do na Ballstáit íoscheanglais feidhmíochta fuinnimh a shocrú d’eilimintí foirgnimh atá mar chuid den imchlúdach foirgneamh, agus ceanglais chórais a shocrú i leith na feidhmíochta fuinnimh go foriomlán, suiteáil cheart agus toisiú cuí, coigeartú agus rialú iomchuí na gcóras teicniúil foirgneamh i bhfoirgnimh nua nó i bhfoirgnimh atá ann cheana. Tá sé comhsheasmhach le cuspóirí an Rialacháin seo go bhféadfaidh na íoscheanglais feidhmíochta fuinnimh sin, i gcúinsí áirithe, srian a chur le suiteáil táirgí a bhaineann le fuinneamh a chomhlíonann an Rialachán seo agus a ghníomhartha tarmligthe, ar an gcoinníoll nach gcuirfeadh na ceanglais sin bac ar an margadh gan údar maith.

(15)

Chun inbhuanaitheacht comhshaoil táirgí a fheabhsú agus chun saorghluaiseacht táirgí sa mhargadh inmheánach a áirithiú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chun an Choimisiúin chun an Rialachán seo a fhorlíonadh trí cheanglais éicidhearthóireachta a leagan amach. Mar riail, ba cheart feidhm a bheith ag na ceanglais éicidhearthóireachta sin maidir le grúpaí sonracha táirgí, amhail meaisíní níocháin tí agus niteoir-triomadóirí tí. Chun éifeachtacht na gceanglas éicidhearthóireachta a uasmhéadú agus chun inbhuanaitheacht comhshaoil na dtáirgí a fheabhsú go héifeachtúil, ba cheart a bheith in ann ceanglas cothrománach éicidhearthóireachta amháin nó níos mó a leagan amach le haghaidh réimse níos leithne de ghrúpaí táirgí, amhail fearais leictreonacha nó teicstílí. Ba cheart ceanglais chothrománacha éicidhearthóireachta a bhunú i gcás ina bhfágann cosúlachtaí teicniúla grúpaí táirgí gur féidir feabhas a chur ar a n-inbhuanaitheacht comhshaoil bunaithe ar na ceanglais chéanna. Tá sé tábhachtach go bhforbrófaí ceanglais chothrománacha go háirithe maidir le marthanacht agus indeisitheacht.

(16)

Ba cheart ceanglais feidhmíochta nó ceanglais faisnéise, nó an dá rud, a áireamh sna ceanglais éicidhearthóireachta, de réir mar is iomchuí. Ba cheart na ceanglais sin a úsáid chun gnéithe táirgí atá ábhartha d’inbhuanaitheacht comhshaoil a fheabhsú, amhail marthanacht, ath-inúsáidteacht, indeisitheacht, éifeachtúlacht fuinnimh, in-athchúrsáilteacht, agus an lorg carbóin agus comhshaoil. Ba cheart na ceanglais éicidhearthóireachta a bheith trédhearcach, oibiachtúil, comhréireach agus i gcomhréir le rialacha trádála idirnáisiúnta.

(17)

Tá ról tábhachtach ag an earnáil athláimhe i dtáirgeadh agus i dtomhaltas inbhuanaithe a chur chun cinn, lena n-áirítear i bhforbairt samhlacha gnó ciorclacha nua, agus cuidíonn sí le saolré táirge a fhadú chun nach ndéanfar dramhaíl de. Ní táirgí nua iad táirgí athláimhe, go háirithe táirgí a dhéantar a athchóiriú nó a dheisiú, is táirgí ó laistigh den Aontas iad agus is féidir iad a chur i gcúrsaíocht laistigh den mhargadh inmheánach gan gá gníomhartha tarmligthe a chomhlíonadh lena socraítear ceanglais éicidhearthóireachta a tháinig i bhfeidhm tar éis iad a chur ar an margadh. Meastar gur táirgí nua iad táirgí a athmhonaraítear, áfach, agus beidh siad faoi réir ceanglais éicidhearthóireachta má thagann siad faoi raon feidhme gnímh tharmligthe.

(18)

A luaithe a ghlacfaidh an Coimisiún gníomh tarmligthe lena socraítear ceanglais éicidhearthóireachta i gcás grúpa táirgí ar leith, níor cheart cead a bheith ag na Ballstáit, d’fhonn feidhmiú an mhargaidh inmheánaigh a áirithiú, ceanglais feidhmíochta náisiúnta a shocrú a thuilleadh bunaithe ar pharaiméadair táirgí a chumhdaítear faoi na ceanglais feidhmíochta sin a leagtar síos sa ghníomh tarmligthe sin, agus níor cheart cead a bheith ag na Ballstáit a thuilleadh ceanglais faisnéise náisiúnta a shocrú bunaithe ar pharaiméadair táirgí a chumhdaítear leis na ceanglais faisnéise sin a leagtar síos sa ghníomh tarmligthe sin. Chun inbhuanaitheacht comhshaoil táirgí a fheabhsú agus chun a saorghluaiseacht sa mhargadh inmheánach a áirithiú, ba cheart an Coimisiún a chumhachtú chun a shuí nach gá aon cheanglais éicidhearthóireachta i bhfoirm ceanglais feidhmíochta nó i bhfoirm ceanglais faisnéise i ndáil le paraiméadar sonrach táirge dá mbeadh tionchar diúltach ag ceanglas a bhaineann leis an bparaiméadar táirge sonrach sin ar na ceanglais éicidhearthóireachta a mheastar le haghaidh an ghrúpa táirgí.

(19)

Agus ceanglais éicidhearthóireachta á mbunú aige, ba cheart don Choimisiún cineál agus cuspóir na dtáirgí lena mbaineann chomh maith le saintréithe na margaí ábhartha a chur i gcuntas. Mar shampla, ní mór trealamh cosanta a bheith ábalta oibriú faoi choinníollacha sonracha agus faoi dhálaí géara uaireanta, agus is gá é sin a mheas agus ceanglais éicidhearthóireachta á leagan síos. Níor cheart faisnéis áirithe faoi threalamh cosanta a nochtadh agus ba cheart í a chosaint. Dá bhrí sin, níor cheart ceanglais éicidhearthóireachta a leagan síos i gcás táirgí arb é an t-aon chuspóir atá leo freastal ar chosaint nó ar shlándáil náisiúnta. Tá sé tábhachtach, i gcás trealamh míleata nó íogair eile, go gcuirfí i gcuntas le ceanglais éicidhearthóireachta riachtanais slándála agus saintréithe mhargadh na cosanta, mar a shainmhínítear i dTreoir 2009/81/CE ó Pharlaimint na hEorpa agus ón gComhairle (22). Ar an gcaoi chéanna, tá tionscal an spáis straitéiseach don Eoraip agus dá neamhspleáchas teicneolaíoch. Ós rud é go n-oibríonn teicneolaíochtaí spáis i ndálaí foircneacha, ba cheart, le haon cheanglas éicidhearthóireachta le haghaidh táirgí spáis, cothromaíocht a bheith ann idir breithnithe inbhuanaitheachta agus athléimneacht agus an fheidhmíocht a mheastar a bheidh ann. Ina theannta sin, i gcás feistí leighis mar a shainmhínítear in Airteagal 2(1) de Rialachán (AE) 2017/745 ó Pharlaimint na hEorpa agus ón gComhairle (23) agus feistí leighis diagnóiseacha in vitro mar a shainmhínítear in Airteagal 2(2) de Rialachán (AE) 2017/746 ó Pharlaimint na hEorpa agus ón gComhairle (24), ba cheart don Choimisiún a chur i gcuntas gur gá gan drochthionchar a bheith aige ar shláinte agus ar shábháilteacht othar agus úsáideoirí. Ina theannta sin, agus measúnú á dhéanamh ar shaintréithe an mhargaidh agus ceanglais éicidhearthóireachta á n-ullmhú aige, ba cheart don Choimisiún a dhícheall a dhéanamh saintréithe náisiúnta a bhreithniú, amhail na dálaí aeráide éagsúla sna Ballstáit agus cleachtais agus teicneolaíochtaí a úsáidtear sna Ballstáit a bhfuil éifeachtaí tairbheacha comhshaoil cruthaithe acu.

(20)

Chun ualach rialála a sheachaint, ba cheart comhsheasmhacht a áirithiú idir an Rialachán seo agus na ceanglais a leagtar amach i ndlí eile de chuid an Aontais nó dá bun, go háirithe maidir le táirgí, ceimiceáin, pacáistíocht agus dramhaíl. Mar sin féin, le cumhachtuithe faoi dhlí eile de chuid an Aontais chun ceanglais a shocrú ag a bhfuil na héifeachtaí céanna nó comhchosúla leis na ceanglais faoin Rialachán seo, níor cheart teorainn a chur leis na cumhachtuithe a áirítear sa Rialachán seo, mura sonraítear a mhalairt sa Rialachán seo.

(21)

Agus ceanglais éicidhearthóireachta á n-ullmhú aige, ba cheart don Choimisiún roinnt gnéithe a chur i gcuntas, eadhon tosaíochtaí an Aontais, dlí ábhartha náisiúnta agus an Aontais, comhaontuithe idirnáisiúnta ábhartha chomh maith le bearta féinrialála agus caighdeáin ábhartha. Ba cheart don Choimisiún tosaíochtaí na haeráide, an chomhshaoil, na héifeachtúlachta fuinnimh, éifeachtúlacht agus slándáil na n-acmhainní, lena n-áirítear geilleagar ciorclach neamhthocsaineach, agus tosaíochtaí agus spriocanna gaolmhara eile an Aontais a chur i gcuntas chomh maith. Tá sé tábhachtach aird a thabhairt ar chuspóirí an 8ú Clár Gníomhaíochta don Chomhshaol a leagtar amach i gCinneadh (AE) 2022/591, lena n-áirítear, faoi 2050 ar a dhéanaí, go mairfidh daoine go maith, i dteorainneacha an phláinéid i ngeilleagar dea-bhaile, prionsabal ‘gan dochar a dhéanamh’ agus ord na réiteach dramhaíola mar a shainmhínítear i dTreoir 2008/98/CE ó Pharlaimint na hEorpa agus ón gComhairle (25), chomh maith le gealltanais an Aontais an bhithéagsúlacht a chosaint agus a athbhunú mar a cuireadh in iúl freisin i dteachtaireacht ón gCoimisiún an 20 Bealtaine 2020 maidir le Straitéis Bhithéagsúlachta an Aontais do 2030 – an dúlra a thabhairt ar ais inár saol agus i gCreat Bithéagsúlachta Domhanda Kunming-Montreal arna nglacadh ag an 15ú cruinniú de Chomhdháil na bPáirtithe(COP-15) i gCoinbhinsiún na Náisiún Aontaithe maidir leis an mBithéagsúlacht.

(22)

Ba cheart do ghníomhartha tarmligthe lena leagtar amach ceanglais éicidhearthóireachta, mar a tharla i gcás bearta cur chun feidhme faoi Threoir 2009/125/CE, dul faoi mheasúnú tionchair tiomnaithe agus faoi chomhairliúchán tiomnaithe leis na geallsealbhóirí, agus ba cheart iad a tharraingt suas i gcomhréir le treoirlínte an Choimisiúin maidir le Rialáil Níos Fearr, agus measúnú ar an ngné idirnáisiúnta agus ar an tionchar ar thríú tíortha a áireamh iontu. Ba cheart don Choimisiún a mheasúnú tionchair a bhunú ar an bhfianaise is fearr atá ar fáil agus aird chuí a thabhairt ar gach gné de shaolré an táirge. Agus ceanglais éicidhearthóireachta á n-ullmhú aige, ba cheart don Choimisiún cur chuige eolaíoch a úsáid agus aird a thabhairt freisin ar fhaisnéis theicniúil ábhartha go háirithe a úsáidtear mar bhonn do, nó a dhíorthaítear ó Rialachán (CE) Uimh. 66/2010, Treoir 2010/75/AE ó Pharlaimint na hEorpa agus ón gComhairle (26), critéir scagtha theicniúla arna nglacadh de bhun Rialachán (AE) 2020/852 ó Pharlaimint na hEorpa agus ón gComhairle (27) agus critéir AE um sholáthar poiblí glas.

(23)

Chun éagsúlacht na dtáirgí a chur i gcuntas, ba cheart don Choimisiún modhanna a roghnú chun measúnú a dhéanamh ar leagan síos na gceanglas éicidhearthóireachta agus, de réir mar is iomchuí, iad a fhorbairt tuilleadh. Ba cheart modhanna den sórt sin a bheith bunaithe ar chineál an táirge, ar na gnéithe is ábhartha de agus ar a thionchar le linn a shaolré. Agus an méid sin á dhéanamh aige, ba cheart don Choimisiún a thaithí a chur i gcuntas le linn measúnú a dhéanamh ar leagan amach na gceanglas faoi Threoir 2009/125/CE agus ar na hiarrachtaí leanúnacha chun uirlisí measúnaithe eolaíochtbhunaithe a fhorbairt agus a fheabhsú, lena n-áirítear an mhodheolaíocht d’éicidhearthóireacht táirgí a bhaineann le fuinneamh a thabhairt cothrom le dáta, agus an modh tomhais táirge maidir le lorg comhshaoil a leagtar amach i Moladh (AE) 2021/2279 ón gCoimisiún (28), lena n-áirítear maidir le stóráil shealadach carbóin, chomh maith le caighdeáin a fhorbairt ag eagraíochtaí idirnáisiúnta agus Eorpacha um chaighdeánú, lena n-áirítear éifeachtúlacht ábhartha táirgí a bhaineann le fuinneamh. Ag cur leis na huirlisí sin agus ag baint úsáid as staidéir thiomnaithe nuair is gá, ba cheart don Choimisiún gnéithe ciorclaíochta a threisiú tuilleadh (amhail marthanacht, indeisitheacht lena n-áirítear scóráil indeisitheachta, in-athchúrsáilteacht, in-athúsáidteacht, sainaithint ceimiceán a chuireann bac ar athúsáid agus athchúrsáil agus measúnú á dhéanamh ar tháirgí, i gcomhréir le cur chuige saolré d’fhonn ceanglais éicidhearthóireachta a ullmhú, agus ba cheart dó modhanna nó uirlisí nua a fhorbairt i gcás inarb iomchuí. Ba cheart faisnéis a bhaineann le táscairí saolré comhshaoil, amhail an lorg carbóin, a ríomh agus modhanna atá curtha chun feidhme cheana féin i ndlí an Aontais á gcur san áireamh. Tá sé tábhachtach freisin go gcuirfear san áireamh modhanna eolaíocha arna moladh ag eagraíochtaí idirnáisiúnta agus Eorpacha um chaighdeánú. Go háirithe, i dtaobh shamhaltú an fhuinnimh a úsáidtear sna próisis mhonaraíochta, ba cheart aird ar leith a thabhairt ar shamhaltú an mheascáin fuinnimh lena gcuirfí saincheisteanna i gcuntas chomh maith amhail comhaontuithe ceannaigh cumhachta, ráthaíochtaí tionscnaimh agus táirgeadh leictreachas dílis. D’fhéadfadh cineálacha cur chuige nua a bheith ag teastáil freisin chun critéir éigeantacha um sholáthar poiblí a ullmhú agus chun cosc a chur ar tháirgí tomhaltais gan díol a dhíothú.

(24)

Ba cheart baint a bheith ag na ceanglais feidhmíochta le paraiméadar táirge roghnaithe atá ábhartha don ghné táirge spriocdhírithe a sainaithníodh go bhféadfaí inbhuanaitheacht comhshaoil a fheabhsú ina leith. D’fhéadfaí a áireamh ar na ceanglais sin íosleibhéil nó uasleibhéil feidhmíochta i ndáil le paraiméadar an táirge, ceanglais neamhchainníochtúla arb é is aidhm dóibh feabhas a chur ar fheidhmíocht i ndáil le paraiméadar an táirge, nó ceanglais a bhaineann le feidhmíocht fheidhmiúil an táirge chun a áirithiú nach mbeidh drochthionchar ag na ceanglais feidhmíochta roghnaithe ar chumas an táirge an fheidhm ar ceapadh agus ar margaíodh é lena haghaidh a chomhlíonadh. Maidir le híosleibhéil nó le huasleibhéil, d’fhéadfaidís, mar shampla, a bheith i bhfoirm teorann ar thomhaltas fuinnimh sa chéim úsáide nó i bhfoirm cainníochtaí ábhair ar leith a ionchorpraítear sa táirge, i bhfoirm ceanglas i gcás íoschainníochtaí d’ábhar athchúrsáilte, nó i bhfoirm teorann ar chatagóir shonrach tionchair ar an gcomhshaol nó i bhfoirm comhiomlánaithe de na tionchair ábhartha uile ar an gcomhshaol. Sampla de cheanglas neamhchainníochtúil is ea an toirmeasc ar réiteach teicniúil sonrach a dhéanann dochar d’indeisitheacht an táirge. Úsáidfear ceanglais feidhmíochta chun a áirithiú go mbainfear na táirgí is neamhfheidhmiúla den mhargadh agus chun bogadh de réir a chéile chun na dtáirgí is fearr feidhmíocht i gcás inar gá sin chun rannchuidiú le cuspóirí inbhuanaitheachta comhshaoil an Rialacháin seo. D’fhéadfadh go mbaineann ceanglais feidhmíochta freisin le húsáid acmhainní, lena n-áirítear ceanglais a bhaineann le húsáid na n-acmhainní in-athnuaite nó ábhar bithbhunaithe sa táirge agus a thugann aghaidh ar scaoileadh nanaphlaisteach agus micreaphlaisteach. Le linn meascán riachtanas a shamhlú, ba cheart don Choimisiún measúnú a dhéanamh orthu ina n-iomláine agus an teaglaim ceanglas lena soláthraítear na tairbhí inbhuanaitheachta comhshaoil is airde a shainaithint.

(25)

Chun comhsheasmhacht a áirithiú, leis na ceanglais feidhmíochta ba cheart cur chun feidhme dhlí an Aontais maidir le dramhaíl a chomhlánú. Cé go leagtar síos ceanglais chun pacáistiú a chur ar an margadh mar tháirge deiridh faoi Threoir 94/62/CE ó Pharlaimint na hEorpa agus ón gComhairle (29), d’fhéadfadh an Rialachán seo an Treoir sin a chomhlánú trí cheanglais táirge-bhunaithe a leagan síos a dhíríonn ar phacáistíocht táirgí sonracha nuair a chuirtear ar an margadh iad. I gcás inarb ábhartha, leis na ceanglais chomhlántacha sin ba cheart rannchuidiú go háirithe le méid na pacáistíochta a úsáidtear a íoslaghdú, agus, ar an gcaoi sin, rannchuidiú le giniúint dramhaíola san Aontas a chosc.

(26)

Is gné aitheanta d’inbhuanaitheacht táirge í an tsábháilteacht cheimiceach. Tá sé bunaithe ar ghuaiseacha intreacha ceimiceán don tsláinte nó don chomhshaol in éineacht le nochtadh sonrach nó cineálach, agus tugtar aghaidh air le dlí an Aontais maidir le ceimiceáin, amhail Rialacháin (CE) Uimh. 1935/2004 (30), (CE) Uimh. 1907/2006 (31), (CE) Uimh. 1272/2008 (32), (CE) Uimh. 1223/2009 (33), (AE) 2017/745 agus (AE) 2019/1021 (34) agus Treoir 2009/48/CE (35) ó Pharlaimint na hEorpa agus ón gComhairle. Níor cheart don Rialachán seo a fhoráil go srianfar substaintí bunaithe go príomha ar shábháilteacht cheimiceach, mar a rinneadh faoi dhlí eile de chuid an Aontais. Foráiltear cheana féin i ndlí an Aontais maidir le ceimiceáin go sriantar substaintí nó meascáin a bhaineann le sábháilteacht nó le riosca, i gcás inar gá. Le leagan síos ceanglas feidhmíochta, áfach, ba cheart freisin, i gcás inarb iomchuí, rioscaí suntasacha do shláinte an duine nó don chomhshaol a laghdú. Le ceanglais na faisnéise a bhaineann le substaintí is údar imní, cuirfear freisin leis an nochtadh do cheimiceáin a laghdú, rud a chuirfidh leis na bearta bainistithe riosca dá bhforáiltear le dlí eile de chuid an Aontais. Ar an gcaoi chéanna, níor cheart don Rialachán seo srianadh substaintí a chumasú ar chúiseanna a bhaineann le sábháilteacht bia. Le dlí an Aontais maidir le ceimiceáin agus bia, áfach, ní fhoráiltear do thionchair ar inbhuanaitheacht nach mbaineann le sábháilteacht cheimiceach ná le sábháilteacht bia a bhfuil aghaidh le tabhairt orthu trí shrianta ar shubstaintí áirithe. D’fhonn an teorannú sin a shárú, ba cheart a fhoráil leis an Rialachán seo, faoi choinníollacha áirithe, substaintí a shrianadh atá i dtáirgí nó a úsáidtear ina bpróisis déantúsaíochta a mbíonn tionchar diúltach acu ar inbhuanaitheacht táirgí. Leis an Rialachán seo, i gcás inar gá, ba cheart srianta ar shubstaintí a chumhdaítear le Treoir 2011/65/AE ó Pharlaimint na hEorpa agus ón gComhairle (36) a chomhlanú, a bhfuil sé mar chuspóir aici sláinte an duine agus an comhshaol a chosaint, lena n-áirítear aisghabháil agus diúscairt dramhaíola ó threalamh leictreach agus leictreonach ar shlí neamhdhíobhálach don chomhshaol, ach níor cheart na srianta sin a dhúbláil ná a ionadú.

(27)

Agus ceanglais feidhmíochta á socrú aige, ba cheart an Coimisiún a bheith in ann ceanglais a thabhairt isteach chun substaintí áirithe a chosc a bheadh ar áireamh i dtáirge. Ba cheart sainaithint na substaintí sin a bheith mar chuid de mheasúnú an Choimisiúin sula socrófar ceanglais éicidhearthóireachta do ghrúpa táirgí ar leith agus ba cheart don Choimisiún a chur i gcuntas sa mheasúnú sin, mar shampla, an ndéantar athúsáid nó athchúrsáil táirge níos casta le substaint nó an ndéanann substaint difear diúltach d’airíonna an ábhair athchúrsáilte, mar shampla trína dhath nó trína bholadh. I gcás ina bhfuil sé suite cheana féin go gcuireann substaint ar leith bac ar chiorclaíocht do ghrúpa táirgí amháin, is féidir gur léiriú é sin go gcuireann sé bac ar chiorclaíocht do ghrúpaí táirgí eile. Le sainaithint substainte agus srian féideartha ar shubstaint, ba cheart ceanglas faisnéise a spreagadh chomh maith.

(28)

Chun inbhuanaitheacht comhshaoil na dtáirgí a fheabhsú, ba cheart baint a bheith ag ceanglais faisnéise le paraiméadar táirge roghnaithe atá ábhartha do ghné an táirge, amhail lorg comhshaoil agus carbóin an táirge agus a mharthanacht. Ba cheart dóibh a cheangal ar an monaróir faisnéis a chur ar fáil faoi fheidhmíocht an táirge i ndáil le paraiméadar roghnaithe táirge nó faisnéis eile a d’fhéadfadh tionchar a imirt ar an gcaoi a láimhseálann páirtithe seachas an monaróir an táirge chun feidhmíocht a fheabhsú i ndáil le paraiméadar den sórt sin. Ba cheart na ceanglais faisnéise sin a shocrú sa bhreis ar na ceanglais feidhmíochta maidir leis an bparaiméadar táirge céanna, nó ina n-ionad, de réir mar is iomchuí. Tá sé tábhachtach go dtabharfadh an Coimisiún údar cuí lena chinneadh gan ach ceanglais faisnéise a leagan síos in ionad ceanglais feidhmíochta. I gcás ina n-áirítear ceanglais faisnéise i ngníomh tarmligthe, ba cheart a shonrú ann an modh chun an fhaisnéis is gá a chur ar fáil agus a dhéanamh inrochtana go héasca, amhail í a chur ar shuíomh gréasáin saor-rochtana, i bpas táirge digiteach nó ar lipéad táirge. Ba cheart faisnéis bhunriachtanach a bhaineann le sláinte, sábháilteacht agus cearta úsáideoirí deiridh a sholáthar do thomhaltóirí i gcónaí trí mhodhanna fisiceacha agus ba cheart rochtain a bheith uirthi trí iompróir sonraí atá ar an táirge. Tá gá le ceanglais faisnéise le go dtarlóidh an t-athrú iompraíochta is gá chun a áirithiú go mbainfear amach cuspóirí inbhuanaitheachta comhshaoil an Rialacháin seo. Ba cheart faisnéis atá ábhartha chun cinneadh ceannaigh feasach a dhéanamh a chur ar fáil don tomhaltóir sula gceannaítear an táirge. Trí mhodhanna iomchuí a chur ar fáil do cheannaitheoirí agus d’údaráis phoiblí chun táirgí a chur i gcomparáid le chéile ar bhonn a n-inbhuanaitheachta comhshaoil, táthar ag súil go gcuirfidh na ceanglais faisnéise dlús le tomhaltóirí agus le húdaráis phoiblí i dtreo roghanna níos inbhuanaithe a dhéanamh. Le ceanglais faisnéise, ba cheart rannchuidiú freisin le rátaí bailithe feabhsaithe na mBallstát do ghrúpaí táirgí ábhartha, go háirithe dóibh siúd a bhfuil acmhainneacht shuntasach athúsáide agus athchóirithe ann ina leith, amhail fóin phóca nach mó ná 5 % an ráta bailithe sna Ballstáit ina leith, mar shampla trí fhaisnéis a éascú maidir le scéimeanna aisghabhála trí dhreasachtaí airgeadais agus córais aisíoca éarlaise, ráthaíochtaí príobháideachais sonraí, bunachair sonraí na bpointí fágála, agus faisnéis phearsantaithe faoi dheireadh ré, tríd an bpas táirge digiteach, ar luach an táirge agus trí dhea-chleachtais i dtaobh diúscairt chuí.

(29)

I gcás ina mbeidh ceanglais faisnéise sna gníomhartha tarmligthe, d’fhéadfaidís, sa bhreis air sin, aicmí feidhmíochta a chinneadh i ndáil le paraiméadar táirge ábhartha amháin nó níos mó, chun comparáid idir táirgí a éascú. Le haicmí feidhmíochta, ba cheart a bheith in ann táirgí a dhifreáil bunaithe ar a n-inbhuanaitheacht choibhneasta agus d’fhéadfadh tomhaltóirí agus údaráis phoiblí araon iad a úsáid. Dá réir sin, tá sé i gceist leo an margadh a chur chun cinn i dtreo táirgí níos inbhuanaithe.

(30)

Tá ról lárnach ag ceanglais faisnéise a bhaineann le hindeisitheacht agus marthanacht le linn tomhaltóirí a chumasú chun páirt a ghlacadh i dtomhaltas inbhuanaithe. Leis an Rialachán seo, ba cheart a bheith in ann scóir indeisitheachta nó mharthanachta a bhunú le haghaidh táirgí i gcás ina meastar gurb iomchuí na scóir sin, chun tairbhí comhshaoil a sholáthar agus faisnéis níos soiléire a chur ar fáil do thomhaltóirí. Chun go mbeidh tomhaltóirí ábalta measúnú agus comparáid éifeachtach a dhéanamh ar tháirgí, tá sé tábhachtach go n-áireofar i bhformáid, in ábhar agus i dtaispeáint na scór indeisitheachta agus marthanachta sin teanga agus picteagraim atá éasca le tuiscint agus go mbeidh an scór indeisitheachta bunaithe ar mhodheolaíocht chomhchuibhithe a shonraítear don táirge nó don ghrúpa táirgí, a chomhiomlánaíonn paraiméadair amhail infhaighteacht agus praghas na bpáirteanna spártha, éascaíocht na díchóimeála agus infhaighteacht uirlisí in aon scór amháin.

(31)

Chun táirgí atá inbhuanaithe a shainaithint agus a chur chun cinn, is príomheilimint í faisnéis maidir le láithreacht substaintí ar ábhar imní iad i dtáirgí. Cinneann comhdhéanamh ceimiceach táirgí a bhfeidhmiúlachtaí agus a dtionchar den chuid is mó, chomh maith leis an bhféidearthacht chun iad a athúsáid nó a aisghabháil nuair a dhéantar dramhaíl díobh. Sa teachtaireacht ón gCoimisiún an 14 Deireadh Fómhair 2020 dar teideal ‘Chemicals Strategy for Sustainability Towards a Toxic-Free Environment’ [Straitéis Ceimiceán don Inbhuanaitheacht i dTreo Timpeallacht Saor ó Thocsainí], iarrtar go n-íoslaghdófar láithreacht substaintí is údar imní i dtáirgí, agus go n-áiritheofar go mbeidh fáil ar fhaisnéis faoi ábhar ceimiceach agus úsáid shábháilte, trí cheanglais faisnéise a thabhairt isteach agus láithreacht substaintí ar údar imní iad a rianú le linn shaolré na n-ábhar agus na dtáirgí. Le Rialachán (CE) Uimh. 1272/2008 agus le dlíceimiceán láithreach eile amhail Rialachán (CE) Uimh. 1223/2009, áirithítear cumarsáid cheana féin maidir le guaiseacha ar an tsláinte nó ar an gcomhshaol mar gheall ar shubstaintí áirithe ar ábhar imní iad astu féin nó i meascán. Ba cheart faisnéis ábhartha a sholáthar d’úsáideoirí substaintí agus meascán freisin. Thairis sin, ba cheart d’úsáideoirí táirgí nach substaintí ná meascáin iad, agus do bhainisteoirí dramhaíola ó na táirgí sin, faisnéis ábhartha a fháil freisin, lena n-áirítear faisnéis a bhaineann go príomha le guaiseacha na gceimiceán ar an tsláinte nó ar an gcomhshaol. Dá bhrí sin, ba cheart, leis an Rialachán seo foráil a dhéanamh maidir le ceanglais a shocrú a bhaineann le faisnéis inbhuanaitheachta a rianú agus a chur in iúl, lena n-áirítear láithreacht substaintí ar ábhar imní iad i dtáirgí le linn a saolré, chomh maith d’fhonn na táirgí sin a dhí-éilliú agus a aisghabháil freisin nuair is dramhaíl iad. Ba cheart é a bheith d’aidhm ag creat den sórt sin na substaintí is údar imní a chumhdach de réir a chéile i ngach táirge a liostaítear i bpleananna oibre atá le glacadh ag an gCoimisiún. Ba cheart ceanglais den sórt sin a bhaineann le rianú substaintí is údar imní a áireamh mar réamhshocrú i gcás ina bhfuil ceanglas faisnéise le socrú faoin Rialachán seo, ach amháin nuair is cuid de cheanglais chothrománacha éicidhearthóireachta ceanglas faisnéise den sórt sin. Chun na critéir atá le comhlíonadh leis na ceanglais éicidhearthóireachta a chur i gcuntas, agus go háirithe chun ualach riaracháin díréireach d’oibreoirí eacnamaíocha a sheachaint, ba cheart an Coimisiún a bheith in ann, de réir mar is iomchuí don ghrúpa táirgí lena mbaineann, tairseacha a shocrú maidir le tiúchan substaintí sa táirge nó sna comhpháirteanna ábhartha lena spreagtar an ceanglas rianaithe, sprioc-amanna difreáilte iarratais a leagan síos agus, i gcásanna a bhfuil údar cuí leo, díolúintí a sholáthar ón gceanglas rianaithe. Agus mionsonraí na faisnéise is gá agus na tairseacha á socrú aige, ba cheart don Choimisiún na ceanglais faisnéise agus na tairseacha láithreacha faoi dhlí an Aontais a chur san áireamh, go háirithe faoi Rialacháin (CE) Uimh. 1907/2006 agus (CE) Uimh. 1272/2008, agus faoi reachtaíocht earnála táirgí eile. D’fhéadfadh feidhm a bheith ag maolú a bheadh bunaithe ar an bhféidearthacht theicniúil i gcásanna nach féidir láithreacht substainte i dtáirge a fhíorú leis na teicneolaíochtaí reatha atá ar fáil.

(32)

Ba cheart a chur san áireamh sna ceanglais faisnéise a leagtar amach faoin Rialachán seo an ceanglas pas táirge digiteach a chur ar fáil. Is uirlis thábhachtach é an pas táirge digiteach chun faisnéis a chur ar fáil do ghníomhaithe feadh an tslabhra luacha ina iomláine agus táthar ag súil le feabhsú suaithinseach ar inrianaitheacht táirge ó cheann go ceann ar feadh a shlabhra luacha má tá pas táirge digiteach ar fáil. I measc nithe eile, táthar ag súil go gcuideoidh an pas táirge digiteach le custaiméirí roghanna eolasacha a dhéanamh trína rochtain ar fhaisnéis ábhartha a fheabhsú, ligean d’oibreoirí eacnamaíocha, eadhon monaróirí, ionadaithe údaraithe, allmhaireoirí, dáileoirí, déileálaithe agus soláthraithe seirbhíse comhlíonta, agus do ghníomhaithe slabhra luacha eile, amhail custaiméirí, deisitheoirí gairmiúla, oibreoirí neamhspleácha, athchóiritheoirí, athmhonaróirí, athchúrsálaithe, údaráis faireachais margaidh agus custam, eagraíochtaí na sochaí sibhialta, taighdeoirí, ceardchumainn, agus an Coimisiún, nó aon eagraíocht a ghníomhaíonn thar a gceann, rochtain a fháil ar na sonraí ábhartha, í a thabhairt isteach nó a nuashonrú, agus a chur ar chumas na n-údarás inniúil náisiúnta a ndualgais a chomhlíonadh, gan cosaint faisnéise rúnda gnó a chur i mbaol. Chuige sin, tá sé tábhachtach go mbeadh an pas táirge digiteach éasca le húsáid agus go mbeadh na sonraí atá ann cruinn, iomlán agus cothrom le dáta. Ba cheart an pas táirge digiteach, i gcás inar gá, a bheith comhlánaithe le foirmeacha neamhdhigiteacha tarchurtha faisnéise, amhail faisnéis sa lámhleabhar táirge nó ar lipéad. Ina theannta sin, ba cheart a bheith ábalta an pas táirge digiteach a úsáid i gcás faisnéise a chur ar fáil maidir leis an ngrúpa táirgí ábhartha de bhun dlí eile de chuid an Aontais.

(33)

Chun cineál an táirge agus a mhargadh a chur i gcuntas, ba cheart an fhaisnéis atá le cuimsiú sa phas táirge digiteach a scrúdú go cúramach ar bhonn cás ar chás agus rialacha a bhaineann go sonrach leis an táirge á n-ullmhú. Chun rochtain ar na sonraí a eascraíonn as sin a bharrfheabhsú agus cearta maoine intleachtúla á gcosaint an tráth céanna, ní mór an pas táirge digiteach a cheapadh agus a chur chun feidhme ar mhodh a lamhálann rochtain dhifreáilte ar na sonraí sa phas táirge digiteach ag brath ar chineál na sonraí agus ar thíopeolaíocht na ngeallsealbhóirí. Ar an gcaoi chéanna, chun costais do chuideachtaí agus ar an bpobal a sheachaint, ar costais iad atá díréireach leis na sochair is leithne, ba cheart baint shonrach a bheith ag an bpas táirge digiteach leis an tsamhail ítime, bhaisce nó táirge, ag brath, mar shampla, ar chastacht an tslabhra luacha, ar mhéid, ar chineál nó ar thionchair na dtáirgí a bhreithnítear. Sna measúnuithe tionchair a dhéanfar agus na gníomhartha tarmligthe á n-ullmhú lena leagtar síos ceanglais éicidhearthóireachta, ba cheart anailís a dhéanamh ar na costais agus ar na tairbhí a bhaineann le ceanglais faisnéise a shocrú trí phasanna táirgí digiteacha ar leibhéal na samhla, na baisce nó na hítime. De ghnáth, tagraíonn an téarma ‘samhail’ do leagan de tháirge a bhfuil na saintréithe teicniúla céanna atá ábhartha do na ceanglais éicidhearthóireachta agus an t-aitheantóir múnla céanna ag gach aonad de, de ghnáth tagraíonn an téarma ‘baisc’ d’fhothacar de shamhail shonrach atá comhdhéanta de na táirgí go léir a tháirgtear i ngléasra monaraíochta ar leith ag am ar leith agus tagraíonn an téarma ‘ítim’ d’aonad aonair de mhúnla de ghnáth. Ba cheart a mheas sa mheasúnú tionchair ina theannta sin, a mhéid atá an pas táirge digiteach ag brath ar chaighdeáin nach bhfuil saor in aisce, an bhfuil spleáchas den sórt sin iomchuí agus an féidir costais dhíréireacha do mhicrifhiontair agus d’fhiontair bheaga agus mheánmhéide (FBManna) a sheachaint.

(34)

Ós rud é go socraítear, le dlí eile an Aontais, ceanglais faisnéise i gcás táirgí agus go socraítear leis córais chun an fhaisnéis sin a chur ar fáil d’oibreoirí eacnamaíocha agus do chustaiméirí, ba cheart don Choimisiún breithniú ar cheanglais faisnéise faoin Rialachán seo a nascadh leis na ceanglais eile sin, amhail an oibleagáid bileoga sonraí sábháilteachta a sholáthar i gcás substaintí agus meascán de réir Rialachán (CE) Uimh. 1907/2006. I gcás inar féidir, ba cheart don Choimisiún an pas táirge digiteach a nascadh freisin le bunachair sonraí agus uirlisí láithreacha an Aontais amhail an Chlárlann Eorpach Táirgí le haghaidh Lipéadú Fuinnimh (EPREL) nó an bunachar sonraí i gcás faisnéis maidir le Substaintí ar Ábhar Imní iad in earraí, mar sin nó in earraí casta (Táirgí) (SCIP).

(35)

Chun nach gcuirfear moill gan ghá ar shocrú ceanglas éicidhearthóireachta seachas na cinn sin maidir leis an bpas táirge digiteach nó chun a áirithiú gur féidir pasanna táirge digiteacha a chur chun feidhme go héifeachtach, ba cheart cead a bheith ag an gCoimisiún grúpaí táirgí a dhíolmhú ó na ceanglais pasanna táirge digiteacha i gcás nach bhfuil sonraíochtaí teicniúla ar fáil i ndáil leis na ceanglais fhíor-riachtanacha i gcomhair dhearadh agus oibriú teicniúil an phas táirge dhigitigh. Ar an gcaoi chéanna, chun ualach riaracháin nach gá ar oibreoirí eacnamaíocha a chosc, ba cheart lamháil don Choimisiún grúpaí táirgí a dhíolmhú ó na ceanglais pasanna táirge digiteacha i gcás ina bhfuil córas ann cheana féin i ndlí an Aontais chun faisnéis faoin táirge a sholáthar go digiteach lena lamháiltear do ghníomhaithe feadh an tslabhra luacha rochtain a fháil ar fhaisnéis táirge ábhartha agus lena n-éascófar fíorú ar chomhlíontacht an táirge ag údaráis inniúla náisiúnta. Ba cheart athbhreithniú tréimhsiúil a dhéanamh ar na díolúintí sin agus infhaighteacht bhreise sonraíochtaí teicniúla á cur i gcuntas.

(36)

Gné bhunúsach is ea sainaithint uathúil táirgí i dtaobh inrianaitheacht a chumasú ar fud an tslabhra soláthair. Dá bhrí sin, ba cheart an pas táirge digiteach a bheith nasctha le haitheantóir táirge uathúil. Ina theannta sin, i gcás inarb iomchuí, ba cheart an pas táirge digiteach a nascadh le haitheantóir oibreora uathúil agus le haitheantóir saoráide uathúil a lamhálfadh go bhféadfaí na gníomhaithe agus na saoráidí monaraíochta a bhaineann leis an táirge sin a rianú. Chun idir-inoibritheacht a áirithiú, ba cheart an t-iompróir sonraí, aitheantóirí uathúla an oibreora agus aitheantóirí uathúla na saoráide lena gcumasófar inrianaitheacht a eisíodh i gcomhréir le caighdeáin a aithnítear go hidirnáisiúnta. Ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a leasú trí chaighdeáin a ionadú nó a chur isteach, ar caighdeáin iad ar i gcomhréir leo is féidir an t-iompróir sonraí, aitheantóir uathúil an oibreora agus aitheantóir uathúil na saoráide a eisiúint, i bhfianaise dul chun cinn teicniúil nó eolaíoch. Ba cheart a áirithiú leis sin go bhféadfaidh gach oibreoir eacnamaíoch na sonraí atá sa phas táirge digiteach a thaifeadadh agus a tharchur, chomh maith le comhoiriúnacht na n-aitheantóirí uathúla le comhpháirteanna seachtracha amhail gairis scanacháin a ráthú. Thairis sin, ba cheart na sonraí a bheith inaistrithe trí líonra malartaithe sonraí idir-inoibritheach oscailte gan gaibhniú díoltóirí.

(37)

Trí iompróir sonraí a scanadh, amhail comhartha uisce nó cód mearfhreagartha (QR), ba cheart rochtain éasca a bheith ar fhaisnéis dhigitithe faoin táirge agus faoina shaolré nó, i gcás inarb infheidhme, faoina phas. I gcás inar féidir, ba cheart an t-iompróir sonraí a bheith ar an táirge féin lena áirithiú go leanfaidh na sonraí de bheith inrochtana i rith a shaolré. Ba cheart a bheith in ann maoluithe a dhéanamh, áfach, ag brath ar chineál, ar mhéid nó ar úsáid na dtáirgí lena mbaineann.

(38)

Chun rochtain ar an bpas táirge digiteach a áirithiú go ceann na tréimhse a shonraítear sna gníomhartha tarmligthe, lena n-áirítear tar éis dócmhainneachta, leachtaithe, nó scor de ghníomhaíocht san Aontas, ba cheart don oibreoir eacnamaíoch, agus an táirge á chur ar an margadh aige, cóip chúltaca den phas táirge digiteach a chur ar fáil trí sholáthraí seirbhíse pasanna táirge digiteacha ar tríú páirtí neamhspleách é.

(39)

Chun leathadh amach éifeachtach an phas táirge dhigitigh a áirithiú, ba cheart dearadh teicniúil, ceanglais sonraí agus oibriú an phas táirge cloí le tacar ceanglas teicniúil fíor-riachtanach a sholáthraíonn bonn chun an pas táirge digiteach a imscaradh go comhsheasmhach thar earnálacha éagsúla. Ba cheart sonraíochtaí teicniúla a bhunú chun cur chun feidhme éifeachtach na gceanglas fíor-riachtanach sin a áirithiú, i bhfoirm na gcaighdeán comhchuibhithe a bhfuil na huimhreacha tagartha foilsithe ina leith in Iris Oifigiúil an Aontais Eorpaigh nó, mar rogha chúltaca, sonraíocht choiteann arna glacadh ag an gCoimisiún trí ghníomhartha cur chun feidhme. Leis an dearadh teicniúil, ba cheart a áirithiú go mbeidh sonraí á n-iompar ar an bpas táirge digiteach ar bhealach slán, agus rialacha príobháideachais á n-urramú. Is gá an pas táirge digiteach a fhorbairt i gcomhphlé oscailte le comhpháirtithe idirnáisiúnta, chun a dtuairimí a chur i gcuntas agus sonraíochtaí teicniúla á bhforbairt agus chun a áirithiú go gcuideoidh siad le deireadh a chur le bacainní trádála ar tháirgí níos glaise a bhfuil saolré fadaithe agus ciorclaíocht acu, lena n-ísleofar costais d’infheistíochtaí, do mhargaíocht do chomhlíonadh inbhuanaithe agus chun tacú leis an nuálaíocht. Chun go bhféadfar iad a chur chun feidhme go héifeachtach, tá sé tábhachtach go ndéantar sonraíochtaí teicniúla agus ceanglais theicniúla a bhaineann le hinrianaitheacht ar fud an tslabhra luacha a fhorbairt, a mhéid is féidir, ar chur chuige comhthoiliúil agus ar rannpháirtíocht, ceannach isteach agus comhoibriú éifeachtach tacar éagsúil gníomhaithe, lena n-áirítear comhlachtaí um chaighdeánú, comhlachais tionscail, gnólachtaí nuathionscanta, eagraíochtaí tomhaltóirí, saineolaithe, eagraíochtaí neamhrialtasacha agus comhpháirtithe idirnáisiúnta, lena n-áirítear geilleagair i mbéal forbartha.

(40)

Ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trí ról agus freagrachtaí na ngníomhaithe éagsúla a shainiú go soiléir amhail gníomhaireachtaí eisiúna agus soláthraithe seirbhíse a mbeidh baint acu le cruthú, fíordheimhniú, próiseáil, agus stóráil sonraí, agus b’fhéidir eilimintí tábhachtacha den phas táirge digiteach a tharraingt siar, amhail aitheantóirí uathúla agus iompróirí sonraí. D’fhéadfadh an Coimisiún, sa mhéid sin, measúnú tionchair a dhéanamh chun oiriúnacht forbartha scéim deimhniúcháin a imscrúdú do sholáthraithe seirbhísí pas táirge digiteach.

(41)

Chun a áirithiú go mbeidh an pas táirge digiteach solúbtha, láidir agus faoi thionchar an mhargaidh agus go bhforbraíonn sé i gcomhréir le samhlacha gnó, margaí agus nuálaíocht, ba cheart é a bheith bunaithe ar chóras sonraí díláraithe, agus ba cheart d’oibreoirí eacnamaíocha é a chur ar bun agus a bhainistiú. Mar sin féin, chun críoch forfheidhmithe agus faireacháin, is gá go mbeadh rochtain dhíreach ag na húdaráis náisiúnta inniúla agus ag an gCoimisiún ar thaifead ar gach iompróir sonraí agus aitheantóir uathúil atá nasctha le táirgí a chuirtear ar an margadh nó a chuirtear i seirbhís. Chuige sin, ba cheart don Choimisiún clárlann pasanna táirge digiteach a chur ar bun agus a bhainistiú chun na sonraí sin (‘an chlárlann’) a stóráil. I gcás inar gá chun forfheidhmiú a éascú a thuilleadh, ba cheart don Choimisiún, de réir mar is iomchuí, faisnéis eile a shonrú a chuimsítear sa phas táirge nach mór a stóráil sa chlárlann.

(42)

Ba cheart don Choimisiún tairseach ghréasáin atá soláimhsithe d’úsáideoirí agus ar fáil go poiblí a bhunú agus a chothabháil ina mbeidh rochtain ag geallsealbhóirí amhail custaiméirí, oibreoirí eacnamaíocha agus gníomhaithe ábhartha eile ar shonraí a áirítear sna pasanna táirgí digiteacha agus gur féidir na sonraí a áirítear sna pasanna sin a chuardach agus a chur i gcomparáid i gcomhréir lena gcearta rochtana faoi seach a shonraítear sna gníomhartha tarmligthe lena leagtar síos ceanglais éicidhearthóireachta. Leis an tairseach ghréasáin, ba cheart nascanna le sonraí a sholáthar atá stóráilte cheana féin ag an oibreoir eacnamaíoch ina phas táirge digiteach díláraithe.

(43)

Comhlíonfaidh aon phróiseáil sonraí pearsanta de bhun an Rialacháin seo na rialacha is infheidhme maidir le cosaint sonraí pearsanta. Ba cheart do na húdaráis náisiúnta inniúla laistigh de na Ballstáit sonraí pearsanta a phróiseáil i gcomhréir le Rialachán (AE) 2016/679 ó Pharlaimint na hEorpa agus ón gComhairle (37) agus aird ar leith á tabhairt ar phrionsabail na cosanta sonraí trí dhearadh agus mar réamhshocrú. Aon phróiseáil a dhéanfaidh an Coimisiún ar shonraí pearsanta, go háirithe na cinn sin atá stóráilte sa chlárlann, déanfar í i gcomhréir le Rialachán (AE) 2018/1725 ó Pharlaimint na hEorpa agus ón gComhairle (38). Níor cheart sonraí pearsanta custaiméirí a stóráil sa phas táirge digiteach.

(44)

Tá forfheidhmiú éifeachtach i ndáil le táirgí a chuirtear ar mhargadh an Aontais, cibé acu a tháirgtear ar bhonn intíre nó a allmhairítear iad, riachtanach chun aidhmeanna an Rialacháin seo a bhaint amach. Dá bhrí sin, nuair atá an chlárlann curtha ar bun ag an gCoimisiún, ba cheart rochtain dhíreach a bheith ag na húdaráis chustaim uirthi trí Thimpeallacht an Ionaid Ilfhreastail AE maidir le Custaim a bunaíodh le Rialachán (AE) 2022/2399 ó Pharlaimint na hEorpa agus ón gComhairle (39). Is é an ról ba cheart a bheith ag údaráis chustaim a fhíorú ar a laghad go gcomhfhreagraíonn aitheantóir uathúil clárúcháin táirge a cheanglaítear air a sholáthar nó a chur ar fáil dóibh agus an cód tráchtearraí ábhartha do na sonraí a stóráiltear sa chlárlann. Lamhálfadh sé sin do na húdaráis custam a fhíorú go bhfuil pas táirge digiteach ann le haghaidh táirgí allmhairithe. I gcás inarb iomchuí, ba cheart don Choimisiún a leagan síos ina ghníomh cur chun feidhme maidir leis an gclárlann na hoibleagáidí is gá chun go gcoimeádfaidh oibreoirí eacnamaíocha cothrom le dáta na sonraí atá stóráilte sa chlárlann.

(45)

Leis na sonraí a chuimsítear sa phas táirge digiteach, beartaítear a lamháil do na húdaráis custam an bhainistíocht riosca a fheabhsú agus a éascú agus díriú níos fearr ar rialuithe ag an teorainn a chumasú. Dá bhrí sin, ba cheart do na húdaráis custam a bheith ábalta na sonraí a chuimsítear sa phas táirge digiteach agus sa chlár gaolmhar a aisghabháil agus a úsáid chun a gcúraimí a dhéanamh i gcomhréir le dlí an Aontais, lena n-áirítear iad a dhéanamh le haghaidh bainistíocht riosca i gcomhréir le Rialachán (AE) Uimh. 952/2013 ó Pharlaimint na hEorpa agus ón gComhairle (40).

(46)

Chun tomhaltóirí a chur chun roghanna inbhuanaithe, ba cheart faisnéis shoiléir shothuigthe a sholáthar ar lipéid, nuair a cheanglaítear sin leis na gníomhartha tarmligthe arna nglacadh de bhun an Rialacháin seo, lena gceadófaí comparáid éifeachtach a dhéanamh idir táirgí, mar shampla trí aicmí feidhmíochta a léiriú. I gcomhair tomhaltóirí go sonrach, is féidir le lipéid fhisiceacha a bheith ina bhfoinse bhreise faisnéise ag an áit díolacháin. Ba cheart dóibh bonn tapa amhairc a chur ar fáil do thomhaltóirí chun idirdhealú a dhéanamh idir táirgí bunaithe ar a bhfeidhmíocht i ndáil le paraiméadar sonrach táirge nó tacar paraiméadar táirge. Ba cheart, i gcás inarb iomchuí, go bhféadfaí rochtain a fháil ar fhaisnéis bhreise trí thagairtí sonracha a bheith orthu amhail seoltaí suíomhanna gréasáin, cóid dhinimiciúla QR, naisc chuig lipéid ar líne nó aon mhodh iomchuí atá dírithe ar an tomhaltóir. Ba cheart don Choimisiún a leagan amach sa ghníomh tarmligthe ábhartha an tslí is éifeachtaí chun na lipéid sin a thaispeáint, lena n-áirítear iad a thaispeáint i gcás ciandíolachán ar líne, agus na himpleachtaí le haghaidh custaiméirí agus oibreoirí eacnamaíocha agus saintréithe na dtáirgí lena mbaineann á gcur i gcuntas. Ba cheart an Coimisiún a bheith in ann a cheangal freisin go ndéanfar an lipéad a chló ar phacáistíocht an táirge.

(47)

Tá feidhm ag Rialachán (AE) 2017/1369, a leagann síos creat ar lipéadú fuinnimh, i gcomhthráth leis an Rialachán seo, maidir le táirgí a bhaineann le fuinneamh. Is ionstraim rathúil iad lipéid fuinnimh maidir leis an bhfhaisnéis iomchuí a chur ar fáil do thomhaltóirí i gcás táirgí a bhaineann le fuinneamh. Ba cheart aicmí feidhmíochta a chinntear faoin Rialachán seo, a ionchorprú, i gcás inarb iomchuí, sa lipéad fuinnimh mar fhaisnéis fhorlíontach dá bhforáiltear in Airteagal 16 de Rialachán (AE) 2017/1369. I gcásanna nach féidir faisnéis ábhartha faoi fheidhmíocht táirge i ndáil le paraiméadar táirge a áireamh mar fhaisnéis fhorlíontach ar an lipéad fuinnimh, ba cheart don Choimisiún a bheith ábalta, i gcás inarb iomchuí, a cheangal go mbunófar lipéad i gcomhréir leis an Rialachán seo in ionad an lipéid fuinnimh, inar féidir an fhaisnéis ábhartha ar an lipéad fuinnimh a ionchorprú amhlaidh.

(48)

Ní mór tomhaltóirí a chosaint ar fhaisnéis mhíthreorach a d’fhéadfadh cur isteach ar a roghanna i gcás táirgí níos inbhuanaithe. Ar an gcúis sin, ba cheart é a bheith toirmiscthe táirgí a chur ar an margadh nó a chur i seirbhís ar a bhfuil lipéid, nó a bhfuil lipéid ag gabháil leo, ar dóigh dóibh custaiméirí a chur amú nó mearbhall a chur orthu trí na lipéid dá bhforáiltear sa Rialachán seo a aithris, nó a bhfuil faisnéis ag gabháil leo ar dóigh di custaiméirí a chur amú nó mearbhall a chur uirthi maidir leis na lipéid dá bhforáiltear sa Rialachán seo. Ní mheasfar Éicilipéad AE agus eicilipéid eile chineál I EN ISO 14024 atá aitheanta go hoifigiúil, go náisiúnta nó go réigiúnach gur lipéid mhíthreoracha nó mhearbhallacha iad ar choinníoll go mbeidh na critéir a fhorbraítear faoi na scéimeanna lipéadaithe sin ar a laghad chomh dian leis na ceanglais éicidhearthóireachta.

(49)

Chun cuspóirí an Chomhaontaithe Ghlais don Eoraip a bhaint amach ar an mbealach is éifeachtúla agus chun aghaidh a thabhairt ar na táirgí is mó tionchar ar dtús, ba cheart don Choimisiún tosaíocht a thabhairt do na táirgí atá le rialáil faoin Rialachán seo agus do na ceanglais a mbeidh feidhm acu maidir leo. Ba cheart don Choimisiún plean oibre a ghlacadh bunaithe ar an bpróiseas a leanadh le haghaidh beartú tosaíochta faoi Threoir 2009/125/CE, lena gcumhdófaí trí bliana ar a laghad, agus lena leagfaí síos liosta de ghrúpaí táirgí a bhfuil sé beartaithe aige gníomhartha tarmligthe a ghlacadh ina leith mar aon le gnéithe an táirge a bhfuil sé beartaithe aige gníomhartha tarmligthe a ghlacadh ina leith a bhfuil feidhm chothrománach acu. Ba cheart don Choimisiún a thosaíocht a bhunú ar shraith critéar a bhaineann go háirithe le rannchuidiú féideartha na ngníomhartha tarmligthe le cuspóirí aeráide, comhshaoil agus fuinnimh an Aontais a bhaint amach agus a n-acmhainneacht chun gnéithe an táirge a fheabhsú a roghnaítear gan costais dhíréireacha a bheith ar oibreoirí poiblí agus eacnamaíocha. Ba cheart dul i gcomhairle leis na Ballstáit agus leis na geallsealbhóirí freisin trí Fhóram Éicidhearthóireachta atá le cur ar bun ag an gCoimisiún. I ngeall ar na comhlántachtaí idir an Rialachán seo agus Rialachán (AE) 2017/1369 i gcás táirgí a bhaineann le fuinneamh, ba cheart na hamlínte i gcomhair an phlean oibre faoin Rialachán seo agus an plean oibre dá bhforáiltear faoi Airteagal 15 de Rialachán (AE) 2017/1369 a ailíniú. Agus tosaíocht á tabhairt do tháirgí idirmheánacha, ba cheart don Choimisiún na hiarmhairtí do tháirgí deiridh atá déanta de na táirgí idirmheánacha sin a chur i gcuntas chomh maith. I bhfianaise a thábhachtaí atá siad chun cuspóirí fuinnimh an Aontais a bhaint amach, ba cheart a áireamh sna pleananna oibre sciar leordhóthanach de na gníomhaíochtaí a bhaineann le táirgí a bhaineann le fuinneamh. Tá feithiclí dá dtagraítear in Airteagal 2(1) de Rialachán (AE) Uimh. 167/2013, in Airteagal 2(1) de Rialachán (AE) Uimh. 168/2013 agus in Airteagal 2(1) de Rialachán (AE) 2018/858 faoi réir forálacha cuimsitheacha cheana, lena n-áirítear ceanglais shonracha chomhshaoil agus, mar sin, níor cheart tosaíocht a thabhairt dóibh chun ceanglais éicidhearthóireachta a shocrú. I gcás an chéad phlean oibre, ba cheart don Choimisiún tosaíocht a thabhairt d’iarann, cruach, alúmanam, teicstílí, go háirithe baill éadaigh agus coisbheart, troscán, lena n-áirítear tochtanna, boinn, glantaigh, péinteanna, bealaí, ceimiceáin, táirgí teicneolaíochta faisnéise agus cumarsáide agus táirgí eile a bhaineann le leictreonaic agus fuinneamh, a bhfuil ceanglais éicidhearthóireachta le socrú ina leith den chéad uair nó a bhfuil athbhreithniú le déanamh orthu faoin Rialachán seo ar bhearta láithreacha arna nglacadh de bhun Threoir 2009/125/CE. Ba cheart don Choimisiún údar iomchuí a chur ar fáil i gcás ina gcinnfidh sé an liosta sin a mhodhnú.

(50)

Is ó thionscal na stroighne, mar cheann de na hearnálacha is mó atá dian ar fhuinneamh, ar ábhair agus ar charbón, a thagann thart ar 7 % de na hastaíochtaí domhanda agus 4 % d’astaíochtaí CO2 an Aontais, rud a fhágann gur príomhearnáil í chun ailíniú le comhaontú Pháras agus le cuspóirí aeráide an Aontais a luaithe is féidir. Cé go bhfuil táirgí foirgníochta, lena n-áirítear stroighin, le cumhdach faoi Rialachán ó Pharlaimint na hEorpa agus ón gComhairle lena leagtar síos coinníollacha comhchuibhithe chun táirgí foirgníochta a mhargú (‘an Rialachán maidir le táirgí foirgníochta’), fanann siad faoi raon feidhme an Rialacháin seo. Chun nach mbeidh easpa ceanglas táirge ann a bhfuil géarghá leo chun ár gcuspóirí aeráide agus comhshaoil a bhaint amach, ba cheart don Choimisiún gníomh tarmligthe a ghlacadh lena socrófar ceanglais éicidhearthóireachta do stroighin tráth nach luaithe ná an 31 Nollaig 2028 agus nach déanaí ná an 1 Eanáir 2030 in éagmais na gceanglas leormhaith feidhmíochta agus na gceanglas faisnéise le haghaidh táirgí den sórt sin faoin Rialachán maidir le táirgí foirgníochta.

(51)

Agus aghaidh á tabhairt ar tháirgí foirgníochta, níor cheart go leagfaí síos leis an Rialachán seo ceanglais do tháirgí deiridh ach amháin i gcás nach dócha go ngnóthóidh na hoibleagáidí a chruthaítear leis an Rialachán maidir le táirgí foirgníochta agus nuair nach dócha go ngnóthóidh a chur chun feidhme na cuspóirí inbhuanaitheachta comhshaoil a shaothraítear leis an Rialachán seo go leordhóthanach. Ina theannta sin, agus pleananna oibre á gceapadh aige, ba cheart don Choimisiún a chur i gcuntas, agus é ag leanúint den chleachtas reatha, go dtugtar, leis an Rialachán maidir le táirgí foirgníochta, leitheadúlacht do cheanglais inbhuanaitheachta arna leagan síos faoin Rialachán seo i gcás táirgí a bhaineann le fuinneamh ar táirgí foirgníochta iad chomh maith. Ba cheart an cás a bheith amhlaidh, mar shampla, i gcás téitheoirí, coirí, teaschaidéil, fearais téite uisce agus spáis, gaothráin, córais fuaraithe agus aerála agus táirgí fótavoltacha, cé is moite de phainéil fhótavoltacha atá comhtháite san fhoirgneamh. Is féidir feidhm a bheith ag an Rialachán maidir le táirgí foirgníochta maidir leis na táirgí sin ar shlí chomhlántach i gcás inar gá, go príomha i ndáil le gnéithe sábháilteachta, agus dlí eile an Aontais maidir le táirgí amhail fearais gháis, trealamh agus innealra ísealvoltais á cur i gcuntas chomh maith.

(52)

Chun a áirithiú go ndéanfar comhairliúchán cuí leis na páirtithe leasmhara uile, ba cheart don Choimisiún Fóram Éicidhearthóireachta a bhunú, a bheidh comhdhéanta de shaineolaithe arna n-ainmniú ag na Ballstáit agus páirtithe leasmhara eile, amhail ionadaithe tionscail, lena n-áirítear FBManna agus an tionscal ceardaíochta, fiontair shóisialta, ceardchumainn, trádálaithe, miondíoltóirí, allmhaireoirí, eagraíochtaí tomhaltóirí agus comhshaoil, gníomhaithe a bhfuil baint acu le gníomhaíochtaí an gheilleagair chiorclaigh, eagraíochtaí Eorpacha um chaighdeánú, chomh maith le taighdeoirí. Laistigh den Fhóram Éicidhearthóireachta, ba cheart don Choimisiún Grúpa Saineolaithe de chuid na mBallstát a bhunú, ar cheart dó rannchuidiú le ceanglais éicidhearthóireachta nua a ullmhú, le measúnú a dhéanamh ar bhearta féinrialála, le malartú faisnéise agus dea-chleachtas idir na Ballstáit maidir le bearta chun comhlíonadh an Rialacháin seo a fheabhsú, amhail feachtais oideachais agus faisnéise nó tacaíocht a sholáthar do FBManna, chomh maith le tosaíochtaí a leagan síos.

(53)

Ar mhaithe le féinrialáil a spreagadh mar rogha mhalartach bhailí ar chineálacha cur chuige rialála, ba cheart a áireamh sa Rialachán seo, ag cur le Treoir 2009/125/CE, go bhféadfadh an tionscal bearta féinrialála a chur isteach le haghaidh táirgí nó grúpaí táirgí nach n-áirítear sa phlean oibre. Ba cheart bearta féinrialála a ailíniú le cuspóirí an Rialacháin seo. Ba cheart don Choimisiún measúnú a dhéanamh ar na bearta féinrialála arna moladh ag an tionscal, mar aon leis an bhfaisnéis agus leis an bhfianaise a chuir na sínitheoirí isteach, agus freisin i bhfianaise, inter alia, ghealltanais trádála idirnáisiúnta an Aontais, an gá atá le comhsheasmhacht le dlí an Aontais a áirithiú. Is iomchuí freisin, mar shampla i bhfianaise forbairtí ábhartha sa mhargadh nó forbairtí teicneolaíocha ábhartha laistigh den ghrúpa táirgí lena mbaineann, go mbeadh an Coimisiún in ann leagan athbhreithnithe den bheart féinrialála a iarraidh aon uair a mheastar gur gá sin. A luaithe a liostaítear beart féinrialála i ngníomh cur chun feidhme ina bhfuil liosta de bhearta féinrialála lena gcomhlíontar na critéir a leagtar síos sa Rialachán seo, bíonn ionchas dlisteanach ann d’oibreoirí eacnamaíocha go ndéanfaidh an Coimisiún ábhar an bhirt sin a mheas ar dtús, sula molfaidh sé gníomh tarmligthe lena leagtar síos ceanglais éicidhearthóireachta don ghrúpa táirgí sonrach lena mbaineann. Mar sin féin, ba cheart don Choimisiún a bheith in ann ceanglais éicidhearthóireachta a ghlacadh a mbeadh feidhm acu freisin maidir le roinnt de na táirgí nó na táirgí uile a chumhdaítear le beart féinrialála aitheanta le haghaidh ghnéithe an táirge nach dtugtar aghaidh orthu leis an mbeart féinrialála sin. I gcás ina measann an Coimisiún nach gcomhlíonann beart féinrialála na critéir a leagtar síos sa Rialachán seo a thuilleadh, ba cheart dó é a bhaint den ghníomh cur chun feidhme. Dá bhrí sin, ba cheart é a bheith indéanta ceanglais éicidhearthóireachta a leagan síos le haghaidh na ngrúpaí táirgí ar tugadh aghaidh orthu roimhe seo leis an mbeart féinrialála sin.

(54)

D’fhéadfadh FBManna tairbhe mhór a bhaint as méadú ar an éileamh ar tháirgí inbhuanaithe ach d’fhéadfadh costais agus deacrachtaí a bheith orthu freisin mar gheall ar roinnt de na ceanglais. Ba cheart don Choimisiún, agus ceanglais éicidhearthóireachta á n-ullmhú aige, a dtionchar ar FBManna a chur san áireamh, go háirithe a dtionchar ar mhicrifhiontair, atá gníomhach san earnáil táirgí ábhartha. Ba cheart do na Ballstáit agus don Choimisiún, ina réimsí freagrachta faoi seach, faisnéis leormhaith, lena n-áirítear treoir, a sholáthar, oiliúint spriocdhírithe agus speisialaithe a sholáthar, agus cúnamh agus tacaíocht shonrach a sholáthar, lena n-áirítear tacaíocht airgeadais, do FBManna atá gníomhach i monarú táirgí a bhfuil ceanglais éicidhearthóireachta leagtha síos dóibh. Tá tábhacht ar leith ag baint leis na gníomhaíochtaí sin do ghrúpaí táirgí i gcás ina bhfuil láithreacht FBManna ábhartha. Ba cheart don Choimisiún, i gcás inarb iomchuí, tacú le ríomh lorg comhshaoil an táirge trí uirlisí digiteacha a sholáthar, amhail uirlisí chun measúnú saolré a ríomh, agus tacú le cur chun feidhme an phas táirge digitigh. Tá sé tábhachtach go ndéanann an Choimisiún tacaíocht airgeadais a sholáthar d’ionadaithe FBManna, go háirithe ionadaithe micrifhiontar, chun a rannpháirtíocht éifeachtach san Fhóram Éicidhearthóireachta a chumasú agus go ndéanann sé faisnéis atá inrochtana go héasca a sholáthar do FBManna maidir leis an tacaíocht airgeadais agus na cláir atá ar fáil. Ba cheart gníomhaíochtaí na mBallstát a dhéanamh i gcomhréir leis na rialacha is infheidhme maidir le Státchabhair. Agus na gníomhaíochtaí sin á bhforbairt agus á gcur chun feidhme acu, is féidir leis na Ballstáit brath ar an tacaíocht a sholáthraítear le cláir agus tionscnaimh de chuid an Aontais do FBManna.

(55)

Tá díothú táirgí tomhaltais gan díol, amhail teicstílí agus coisbheart, ag oibreoirí eacnamaíocha ag teacht chun bheith ina fhadhb chomhshaoil fhorleathan ar fud an Aontais, go háirithe mar gheall ar an bhfás tapa atá tagtha ar dhíolacháin ar líne. Is ionann é agus caillteanas acmhainní eacnamaíocha luachmhara toisc go ndéantar earraí a tháirgeadh, a iompar, agus a dhíothú ina dhiaidh sin, gan iad a úsáid riamh chun na críche a ceapadh dóibh. Is gá, dá bhrí sin, ar mhaithe le cosaint an chomhshaoil, creat a bhunú leis an Rialachán seo chun díothú táirgí gan díol a chosc, ar táirgí iad a ceapadh go príomha do thomhaltóirí, lena n-áirítear táirgí nár tairgeadh lena ndíol nó táirgí arna gcur ar ais ag tomhaltóirí ar bhonn a gcirt tarraingt siar mar a leagtar síos le Treoir 2011/83/AE ó Pharlaimint na hEorpa agus ón gComhairle (41) nó le linn aon tréimhse aistarraingthe níos faide arna soláthar ag an trádálaí. Ba cheart a chumhdach le coincheap an díothaithe mar a leagtar amach sa Rialachán seo na trí ghníomhaíocht dheireanacha maidir le hord na réiteach dramhaíola, eadhon athchúrsáil, aisghabháil agus diúscairt eile. Níor cheart ullmhú le haghaidh athúsáide, lena n-áirítear athchóiriú agus athmhonaraíocht, a mheas mar dhíothú. Má dhéantar díothú a chosc, laghdófar tionchar na dtáirgí sin ar an gcomhshaol trí ghiniúint dramhaíola a laghdú agus trí rótháirgeadh a dhídhreasú. Ba cheart d’oibreoirí eacnamaíocha na bearta is gá a dhéanamh chun cosc a chur ar an ngá atá le táirgí tomhaltais gan díol a dhíothú. Ina theannta sin, ós rud é gur thug roinnt Ballstát reachtaíocht náisiúnta isteach maidir le táirgí tomhaltais gan díol a dhíothú, rud a chruthaigh saobhadh margaidh, tá gá le rialacha comhchuibhithe maidir le táirgí tomhaltais gan díol a dhíothú chun a áirithiú go mbeidh dáileoirí, miondíoltóirí agus oibreoirí eacnamaíocha eile faoi réir na rialacha agus na ndreasachtaí céanna ar fud na mBallstát.

(56)

Chun díothú táirgí tomhaltais gan díol a dhídhreasú agus tuilleadh sonraí a ghiniúint maidir leis an gcleachtas sin a bheith ag tarlú, ba cheart oibleagáid trédhearcachta a thabhairt isteach leis an Rialachán seo d’oibreoirí eacnamaíocha, cé is moite de mhicrifhiontair agus d’fhiontair bheaga, lena gceanglófaí orthu faisnéis a nochtadh maidir le líon agus meáchan na dtáirgí tomhaltais gan díol a dhiúscraítear in aghaidh na bliana ar a laghad ar leathanach dá suíomh gréasáin is éasca a rochtain. I gcás inarb infheidhme, ba cheart an deis a bheith acu freisin an fhaisnéis sin a áireamh ina dtuarascálacha bainistíochta de bhun Threoir 2013/34/AE ó Pharlaimint na hEorpa agus ón gComhairle (42). Ba cheart feidhm a bheith ag an oibleagáid maidir le fiontair mheánmhéide 6 bliana tar éis theacht i bhfeidhm an Rialacháin seo. Ba cheart don oibreoir eacnamaíoch cineál nó catagóir an táirge, na cúiseanna a bhí le diúscairt na dtáirgí agus lena seachadadh le haghaidh oibríochtaí cóireála dramhaíola ina dhiaidh sin, chomh maith le bearta a rinneadh agus bearta atá beartaithe chun cosc a chur ar dhíothú táirgí tomhaltais gan díol a léiriú.

(57)

Bíonn tionchar suntasach ar an gcomhshaol ag méideanna táirgeachta nach bhfuil gá leo agus ag céim ghearr úsáide na dteicstílí, arb iad éadaí atá i gceist leis an sciar is mó dá dtomhaltas san Aontas, mar a thuairiscítear i dteachtaireacht ón gCoimisiún an 30 Márta 2022 maidir le Straitéis an Aontais Eorpaigh um Theicstílí Inbhuanaithe agus Ciorclacha. Tá teicstílí nua-tháirgthe gan díol, go háirithe éadaí, i measc na nithe a thuairiscítear a bhíonn á ndíothú. Ba cheart luach níos airde a chur ar éadaí, agus iad a chaitheamh ar feadh tréimhse níos faide agus aire níos fearr a thabhairt dóibh, ná mar is amhlaidh i gcás chultúr mearfhaisin an lae inniu. Ó thaobh an gheilleagair chiorclaigh de, is léir go bhfuil cur amú acmhainní luachmhara den sórt sin contrártha do chuspóirí an Rialacháin seo. Dá bhrí sin, tá údar maith le díothú éadaí tomhaltais agus díothú gabhálas éadaigh neamhdhíolta, chomh maith le díothú coisbhirt, a thoirmeasc.

(58)

Chun an tionchar ar an gcomhshaol a bhíonn ag díothú cineálacha eile táirgí tomhaltais gan díol a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a leasú trí ghrúpaí nó táirgí nua a chur le liosta táirgí tomhaltais a bhfuil toirmeasc ar oibreoirí eacnamaíocha a scriosadh. I bhfianaise an réimse leathain táirgí a d’fhéadfaí a dhíothú gan iad a dhíol ná a úsáid riamh, is gá go ndéanfaidh an Coimisiún measúnú ar a mhéid a dhíothaítear na táirgí sin go hiarbhír, agus an fhaisnéis arna cur ar fáil ag oibreoirí eacnamaíocha á cur san áireamh i gcás inarb iomchuí. Chun a áirithiú go bhfuil an oibleagáid sin comhréireach, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trí mhaoluithe sonracha a leagan amach faoinar féidir táirgí tomhaltais gan díol a dhíothú fós, mar shampla i bhfianaise saincheisteanna sláinte agus sábháilteachta. Chun faireachán a dhéanamh ar éifeachtacht toirmisc den sórt sin agus chun teacht timpeall a dhídhreasú, ba cheart a cheangal ar oibreoirí eacnamaíocha líon agus meáchan na dtáirgí tomhaltais gan díol arna ndiúscairt, na cúiseanna leis na táirgí sin a dhiúscairt agus na maoluithe is infheidhme a nochtadh. Ar deireadh, chun aon ualach riaracháin míchuí do mhicrifhiontair agus d’fhiontair bheaga a sheachaint, ba cheart iad a dhíolmhú ón toirmeasc ar dhíothú táirgí sonracha a leagtar amach sa Rialachán seo. Ba cheart feidhm a bheith ag an toirmeasc sin maidir le fiontair mheánmhéide 6 bliana tar éis theacht i bhfeidhm an Rialacháin seo. Mar sin féin, i gcás ina bhfuil fianaise réasúnta ann go bhféadfaí micrifhiontair agus fiontair bheaga a úsáid chun teacht timpeall ar an toirmeasc sin, ba cheart don Choimisiún a bheith in ann a cheangal, i ngníomhartha tarmligthe, go mbeadh feidhm ag an toirmeasc ar tháirgí tomhaltais gan díol a dhíothú nó ag an oibleagáid um nochtadh maidir leis na fiontair sin le haghaidh táirgí sonracha.

(59)

Níor cheart cosc a chur ar na Ballstáit bearta náisiúnta a thabhairt isteach nó a choinneáil ar bun maidir le táirgí tomhaltais gan díol a dhíothú i gcás táirgí nach bhfuil faoi réir an toirmisc faoin Rialachán seo, ar choinníoll go bhfuil na bearta sin i gcomhréir le dlí an Aontais.

(60)

Bunaithe ar an bhfaisnéis a nochtann oibreoirí eacnamaíocha agus ar fhianaise eile atá ar fáil, ba cheart don Choimisiún faisnéis chomhdhlúite maidir le díothú táirgí tomhaltais gan díol a fhoilsiú ar a shuíomh gréasáin agus ba cheart dó na táirgí ar cheart an toirmeasc ar dhíothú a mheas ina leith a shainaithint sa phlean oibre. Ba cheart trealamh leictreach agus leictreonach a chur san áireamh sa chéad phlean oibre.

(61)

Ba cheart d’oibreoirí eacnamaíocha a bheith freagrach as táirgí a bheith ag comhlíonadh na gceanglas éicidhearthóireachta, i ndáil lena róil faoi seach sa slabhra soláthair, chun saorghluaiseacht na dtáirgí sin ar an margadh inmheánach a áirithiú agus chun a n-inbhuanaitheacht a fheabhsú. Ba cheart d’oibreoirí eacnamaíocha a dhéanann idirghabháil sa slabhra soláthair agus dáilte bearta iomchuí a dhéanamh chun a áirithiú nach gcuirfidh siad ar fáil ar an margadh ach táirgí atá i gcomhréir leis an Rialachán seo agus leis na gníomhartha tarmligthe arna nglacadh dá bhun.

(62)

Ós rud é go bhfuil eolas mionsonraithe ag monaróirí ar an bpróiseas deartha agus táirgthe, ba cheart dóibh a bheith freagrach as an nós imeachta um measúnú comhréireachta is infheidhme a dhéanamh nó as a shocrú go ndéanfar é thar a gceann.

(63)

Chun feidhmiú an mhargaidh inmheánaigh a chosaint, is gá a áirithiú go gcomhlíonann táirgí ó thríú tíortha a thagann isteach i margadh an Aontais an Rialachán seo agus na gníomhartha tarmligthe arna nglacadh dá bhun, cibé acu a allmhairítear iad mar tháirgí, mar chomhpháirteanna nó mar tháirgí idirmheánacha. Is gá, go háirithe, a áirithiú gur chuir monaróirí nósanna imeachta iomchuí um measúnú comhréireachta i gcrích maidir leis na táirgí sin. Ba cheart a cheangal ar allmhaireoirí, dá bhrí sin, a áirithiú go gcomhlíonann na táirgí a chuireann siad ar an margadh na ceanglais sin agus go bhfuil an mharcáil CE agus an doiciméadacht arna dtarraingt suas ag monaróirí ar fáil le haghaidh cigireachta ag na húdaráis náisiúnta inniúla. Ba cheart a cheangal ar allmhaireoirí freisin a áirithiú, i gcás inarb infheidhme, go bhfuil pas táirge digiteach ar fáil i gcomhair na dtáirgí sin.

(64)

Agus táirge á chur ar an margadh acu, ba cheart d’allmhaireoirí a n-ainm, a dtrádainm cláraithe nó a dtrádmharc cláraithe mar aon leis an seoladh poist agus an modh leictreonach cumarsáide trínar féidir dul i dteagmháil leo a léiriú ar an táirge. Ba cheart foráil a dhéanamh do mhaoluithe i gcásanna nach bhfágann méid an táirge gur féidir na tásca sin nó i gcás a bheith ann nó i gcás ina mbeadh ar allmhaireoirí an phacáistíocht a oscailt chun an t-ainm agus an seoladh a chur ar an táirge nó i gcás ina bhfuil an táirge róbheag chun an fhaisnéis sin a ghreamú.

(65)

Ós rud é go gcuireann dáileoirí táirgí ar fáil ar an margadh tar éis don mhonaróir nó don allmhaireoir na táirgí sin a chur air, ba cheart dóibh gníomhú leis an gcúram is cuí i ndáil leis na ceanglais éicidhearthóireachta is infheidhme. Ba cheart do dháileoirí a áirithiú freisin nach ndéanann an chaoi a láimhseálann siad táirgí dochar don Rialacháin seo nó na gníomhartha tarmligthe arna nglacadh dá bhun a bheith á gcomhlíonadh ag na táirgí sin.

(66)

Ós rud é go bhfuil dáileoirí agus allmhaireoirí gar don mhargadh agus go bhfuil ról tábhachtach acu maidir le comhlíonadh táirgí a áirithiú, ba cheart dóibh ról a bheith acu i gcúraimí faireachais margaidh arna ndéanamh ag na húdaráis náisiúnta inniúla, agus ba cheart dóibh a bheith réidh chun bheith rannpháirteach go gníomhach tríd an bhfaisnéis uile is gá a bhaineann leis an táirge lena mbaineann a thabhairt do na húdaráis sin.

(67)

Toisc go dtairgeann déileálaithe táirgí lena ndíol, lena bhfruiliú nó lena bhfruilcheannach, nó go dtaispeánann siad táirgí do chustaiméirí nó do shuiteálaithe, is gá go n-áirithíonn déileálaithe go mbeidh a gcuid custaiméirí, lena n-áirítear custaiméirí ionchasacha, in ann rochtain éifeachtach a fháil ar an bhfaisnéis a cheanglaítear faoin Rialachán seo, lena n-áirítear i gcás ciandíolacháin. Ba cheart, go háirithe, a chur de cheangal ar dhéileálaithe leis an Rialachán seo a áirithiú go mbeidh rochtain ag a gcustaiméirí, lena n-áirítear custaiméirí ionchasacha, ar an bpas táirge digiteach agus go mbeidh na lipéid ar taispeáint go soiléir, i gcomhréir leis na ceanglais is infheidhme. Ba cheart do dhéileálaithe an oibleagáid sin a chomhlíonadh gach uair a thairgtear táirge lena dhíol, lena fhruiliú nó lena fhruilcheannach.

(68)

Chun roghnú táirgí níos inbhuanaithe a éascú, ba cheart lipéid a thaispeáint, i gcás inar gá, ar bhealach atá infheicthe agus inaitheanta go soiléir. Ba cheart iad a bheith inaitheanta mar na lipéid a bhaineann leis an táirge i dtrácht, gan gá do chustaiméirí, lena n-áirítear custaiméirí ionchasacha, an t-ainm branda agus uimhir an mhúnla ar na lipéid a léamh. Ba cheart do lipéid aird na gcustaiméirí a tharraingt agus é ag brabhsáil trí na táirgí atá ar taispeáint. Chun a áirithiú go mbeidh rochtain ag custaiméirí ar na lipéid agus ceannach á mheas acu, ba cheart don déileálaí agus don oibreoir eacnamaíoch freagrach araon iad a chur ar taispeáint aon uair a dhéantar fógraíocht ar an táirge, agus i gcásanna ciandíolacháin freisin, lena n-áirítear ar líne.

(69)

Aon allmhaireoirí nó dáileoirí a chuireann táirge atá cumhdaithe ag gníomh tarmligthe arna ghlacadh de bhun an Rialacháin seo ar an margadh faoina n-ainm nó faoina dtrádmharc féin, nó a mhodhnaíonn táirge den sórt sin sula gcuirtear i mbun seirbhíse é ar bhealach a d’fhéadfadh difear a dhéanamh do chomhlíonadh an Rialacháin seo nó an ghnímh tharmligthe ábhartha, ba cheart a mheas gurb é an monaróir é agus ba cheart dó oibleagáidí an mhonaróra a ghlacadh air féin.

(70)

Tá ról ríthábhachtach ag soláthraithe margaí ar líne sa slabhra soláthair, rud a ligeann d’oibreoirí eacnamaíocha teacht ar líon mór custaiméirí. I bhfianaise an róil thábhachtaigh atá acu mar idirghabhálaithe idir oibreoirí eacnamaíocha agus custaiméirí i ndíol táirgí, ba cheart do sholáthraithe margaí ar líne freagracht a ghlacadh as aghaidh a thabhairt ar dhíol táirgí nach gcomhlíonann na ceanglais éicidhearthóireachta agus ba cheart dóibh comhoibriú leis na húdaráis faireachais margaidh. Le Treoir 2000/31/CE ó Pharlaimint na hEorpa agus ón gComhairle (43), déantar foráil maidir leis an gcreat ginearálta le haghaidh ríomhthráchtála agus leagtar síos oibleagáidí áirithe le haghaidh ardáin ar líne. Le Rialachán (AE) 2022/2065 ó Pharlaimint na hEorpa agus ón gComhairle (44), rialaítear freagracht agus cuntasacht soláthraithe seirbhísí idirghabhálacha ar líne maidir le hábhar neamhdhleathach, lena n-áirítear táirgí nach gcomhlíonann ceanglais éicidhearthóireachta. Chun cur leis an gcreat ginearálta sin, ba cheart ceanglais shonracha a thabhairt isteach chun aghaidh a thabhairt go héifeachtach ar dhíolachán táirgí neamhchomhlíontacha ar líne.

(71)

Tá sé bunriachtanach go n-oibreodh soláthraithe margaí ar líne i ndlúthchomhar leis na húdaráis faireachaismargaidh. Forchuirtear oibleagáid maidir le comhar leis na húdaráis faireachais margaidh ar sholáthraithe seirbhíse na sochaí faisnéise faoi Airteagal 7(2) de Rialachán (AE) 2019/1020 ó Pharlaimint na hEorpa agus ón gComhairle (45) i ndáil le táirgí a chumhdaítear leis an Rialachán sin, lena n-áirítear táirgí a bhfuil ceanglais éicidhearthóireachta leagtha síos dóibh faoin Rialachán seo. Chun na críche sin, ba cheart feidhm a bheith ag na hoibleagáidí ginearálta a leagtar síos faoi Chaibidil IV de Rialachán (AE) 2022/2065, go háirithe an oibleagáid a bhaineann le comhlíonadh trí dhearadh do sholáthraithe margaí ar líne in Airteagal 31 de Rialachán (AE) 2022/2065. Chun críocha Airteagal 31(3) de Rialachán (AE) 2022/2065, ba cheart do sholáthraithe margaí ar líne úsáid a bhaint, inter alia, as an bhfaisnéis atá ar fáil i gcomhéadan poiblí úsáideora an chórais faisnéise agus cumarsáide dá dtagraítear in Rialachán (AE) 2019/1020. Ba cheart do sholáthraithe margaí ar líne comhoibriú freisin le húdaráis faireachais margaidh chun dul i ngleic le hábhar neamhdhleathach a bhaineann le táirgí neamhchomhlíontacha. Ba cheart a áireamh ar na gníomhaíochtaí faoi chuimsiú an chomhair sin malartú rialta agus struchtúrtha faisnéise a bhunú maidir le gníomhaíocht a dhéanann soláthraithe margaí ar líne, lena n-áirítear tairiscintí táirgí a bhaint. Ba cheart do sholáthraithe margaí ar líne rochtain ar a gcomhéadain a thabhairt freisin chun cabhrú le húdaráis ufaireachais margaidh táirgí neamhchomhlíontacha a dhíoltar ar líne a shainaithint. Thairis sin, d’fhéadfadh sé go mbeadh ar na húdaráis faireachais margaidh sonraí a scriosadh a chamchóipeáil ó na margaí ar líne freisin.

(72)

I gcás nach bhfuil aon mhodh éifeachtach eile ar fáil chun deireadh a chur le riosca tromchúiseach, le hAirteagal 14 de Rialachán (AE) 2019/1020 tugtar de chumhacht do na húdaráis faireachais margaidh a éileamh go mbainfí ábhar a thagraíonn do tháirgí neamhchomhlíontacha ó chomhéadan ar líne. Na cumhachtaí a thugtar do na húdaráis faireachais margaidh le an Rialachán sin, ba cheart feidhm a bheith acu i gcomhthéacs an Rialacháin seo freisin. Mar sin féin, ionas go ndéanfar faireachas éifeachtach ar an margadh faoin Rialachán seo agus chun táirgí neamhchomhlíontacha a sheachaint ar mhargadh an Aontais, ba cheart feidhm a bheith ag na cumhachtaí sin maidir le gach cás atá riachtanach agus comhréireach, lena n-áirítear táirgí nach bhfuil riosca chomh tromchúiseach sin ag baint leo. Ba cheart na cumhachtaí sin a fheidhmiú i gcomhréir le hAirteagal 9 de Rialachán (AE) 2022/2065.

(73)

Trí inrianaitheacht táirge a áirithiú feadh an tslabhra soláthair ina iomláine éascaítear cúram na n-údarás faireachais margaidh oibreoirí eacnamaíocha a rianú a chuir táirgí neamhchomhlíontacha ar an margadh nó a chuir ar fáil ar an margadh iad. Ba cheart a éileamh ar oibreoirí eacnamaíocha, dá bhrí sin, an fhaisnéis faoina n-idirbhearta a choinneáil go ceann tréimhse ama áirithe.

(74)

Chun dlús a chur le fíorú chomhlíontacht na dtáirgí a chuirtear ar an margadh agus chun an fíorú sin a éascú, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trína cheangal ar oibreoirí eacnamaíocha, i gcás inar gá, codanna sonracha den doiciméadacht theicniúil a chur ar fáil go digiteach d’údaráis inniúla náisiúnta agus don Choimisiún araon. Ligfí leis sin ligean do na húdaráis náisiúnta inniúla rochtain a fháil ar fhaisnéis den sórt sin gan iarraidh, agus cosaint rún trádála agus cearta maoine intleachtúla fós á ráthú ag an am céanna. Maidir le modhanna féideartha chun faisnéis den sórt sin a chur ar fáil go digiteach, ba cheart, mar riail, pas táirge digiteach a áireamh iontu, nó trína háireamh sa chuid sin den bhunachar sonraí táirgí dá dtagraítear i Rialachán (AE) 2017/1369 a bhaineann le comhlíontacht, nó ar shuíomh gréasáin de chuid an oibreora eacnamaíoch. Níor cheart don oibleagáid sin laghdú ar cheart na n-údarás náisiúnta inniúil rochtain a fháil ar chodanna eile den doiciméadacht theicniúil arna hiarraidh sin.

(75)

Le go bhféadfaí meastachán níos fearr a dhéanamh ar dhul i bhfód ar mhargadh na dtáirgí ábhartha, eolas níos fearr a chur ar fáil do staidéir a chuireann le dréachtú nó nuashonrú ceanglas agus pleananna oibre éicidhearthóireachta, agus chun cuidiú leis an sciar den mhargadh atá ag grúpaí sonracha táirgí a shainaithint d’fhonn dlús a chur le foirmliú nó athbhreithniú na gceanglas éicidhearthóireachta, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trína cheangal go mbaileofar sonraí leordhóthanacha iontaofa maidir le táirgí a dhíol, trína cheadú don Choimisiún sonraí den sórt sin a bhailiú go díreach ó mhonaróirí nó miondíoltóirí nó trína cheadú go ndéanfaí é sin thar ceann an Choimisiúin. Agus rialacha maidir le faireachán agus tuairisciú á nglacadh aige, ba cheart don Choimisiún a chur san áireamh an gá atá ann an leas is fearr is féidir a bhaint as na sonraí atá ar fáil maidir le dul i bhfód ar an margadh agus an gá atá ann an t-ualach riaracháin ar oibreoirí eacnamaíocha a íoslaghdú, go háirithe do FBManna.

(76)

Chun na ceanglais éicidhearthóireachta a fheabhsú amach anseo agus chun feabhas a chur ar mhuinín úsáideoirí deiridh maidir le agus diallais idir fuinneamh le linn úsáide agus paraiméadair eile feidhmíochta a shainaithint agus cheartú acu nuair a dhéantar iad a thomhas faoi dhálaí tástála agus faoi fheidhmiú iarbhír, ba cheart rochtain a bheith ag an gCoimisiún ar shonraí neamhphearsanta faoi fhíorthomhaltas fuinnimh táirgí agus iad in úsáid agus i gcás inarb ábhartha iad sin do pharaiméadair feidhmíochta eile. Chuige sin, ba cheart an chumhacht chun gníomhartha tarmligthe a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trína cheangal ar tháirgí aonair, ar an gcaoi chéanna le feithiclí bóthair, a dtomhaltas fuinnimh le linn úsáide agus paraiméadair ábhartha eile feidhmíochta a thaifeadadh agus na sonraí gaolmhara a thaispeáint don úsáideoir deiridh. I gcás táirgí atá nasctha leis an idirlíon, ba cheart an chumhacht chun gníomhartha tarmligthe a ghlacadh a tharmligean chuig an gCoimisiún chun an Rialachán seo a fhorlíonadh trína chur de cheangal ar oibreoirí eacnamaíocha sonraí neamhphearsanta in-úsáide a bhailiú go cianda agus na sonraí sin a thuairisciú don Choimisiún, mar go bhfuil sé bunriachtanach an chaoi a n-oibríonn na táirgí a shainaithint agus an pobal a chur ar an eolas. I gcás táirgí a mbraitheann a bhfeidhmíocht in-úsáide go mór ar dhálaí aeráide nó geografacha freisin, ba cheart faisnéis ghinearálta aeráide nó gheografach a a bhailiúagus a thuairisciú freisin, ar bhealach nach bhfágann gur féidir suíomh sonrach fearas aonair a shainaithint. Ba cheart d’úsáideoirí deiridh aontú go sainráite le bailiú faisnéise a mheasann siad a bheith iomchuí a roinnt. Níor cheart go gceadófaí bailiú faisnéise faoi iompraíocht na bhfearas a bhíonn ar siúl i gcomhthéacs inar féidir le duine aonair a bheith ag súil le réasún nach bhfuil aon bhreathnóireacht ná taifeadadh á dhéanamh, nó bailiú faisnéise lena bhféadfaí daoine aonair a shainaithint nó ina bhféadfaí a n-iompraíocht a thabhairt le tuiscint.

(77)

Chun cabhrú le fíorú chomhlíonadh na gceanglas éicidhearthóireachta, lena n-áirítear measúnú comhréireachta agus faireachas margaidh, ba cheart an chumhacht a bheith ag an gCoimisiún a cheangal ar ghníomhaithe sa slabhra soláthair, i gcás ina bhfuil údar cuí leis, faisnéis a sholáthar, saor in aisce, maidir lena soláthraíonn siad amhail cainníocht agus cineál nó comhdhéanamh ceimiceach na n-ábhar a úsáidtear nó an próiseas táirgeachta a úsáidtear, nó faisnéis a chur ar fáil maidir lena gcoinníollacha soláthair seirbhísí. Ba cheart é a bheith indéanta freisin cead a thabhairt do mhonaróirí rochtain a bheith acu ar na doiciméid ina bhfuil an fhaisnéis sin nó ar shaoráidí iarbhír ghníomhaithe an tslabhra soláthair ionas gur féidir leo rochtain dhíreach a fháil ar an bhfaisnéis is gá mura soláthraíonn gníomhaithe an tslabhra soláthair an fhaisnéis a iarradh laistigh de thréimhse réasúnach ama. Ba cheart a thabhairt de chumhacht don Choimisiún é a chur ar a gcumas do chomhlachtaí faoina dtugtar fógra agus d’údaráis náisiúnta cruinneas na faisnéise a bhaineann le gníomhaíochtaí na ngníomhaithe sa slabhra soláthair a fhíorú.

(78)

Chun cur i bhfeidhm éifeachtach comhchuibhithe na gceanglas éicidhearthóireachta a leagtar amach faoin Rialachán seo a áirithiú, lena n-áirítear gnéithe amhail úsáid fuinnimh nó éifeachtúlacht, marthanacht agus iontaofacht, chomh maith le cion athchúrsáilte, ba cheart comhlíonadh na gceanglas sin a thomhas trí úsáid a bhaint as modhanna iontaofa, cruinne agus in-atáirgthe a gcuirtear san áireamh leo na modhanna úrscothacha a aithnítear go ginearálta. De ghnáth, ba cheart na sonraíochtaí le haghaidh tástálacha, tomhais nó ríomhanna is gá chun comhlíontacht a shuí nó a fhíorú a bheith ar áireamh i ngníomhartha tarmligthe lena leagtar síos ceanglais éicidhearthóireachta i gcomhair táirgí. Ina theannta sin, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trína cheangal go n-úsáidfear uirlisí digiteacha lena léirítear na ceanglais ríofa is infheidhme, chun a áirithiú go gcuirfear i bhfeidhm go comhchuibhithe iad.

(79)

Chun a áirithiú go mbainfidh ceanglais éicidhearthóireachta na héifeachtaí atá beartaithe dóibh amach, ba cheart forálacha cuimsitheacha uileghabhálacha a leagan amach sa Rialachán seo, forálacha a bheidh infheidhme maidir le gach táirge a chumhdaítear le ceanglais éicidhearthóireachta agus lena dtoirmeasctar teacht timpeall ar na ceanglais sin. Dá bhrí sin, ba cheart toirmeasc a chur ar aon chleachtas as a n-eascraíonn athrú gan údar ar fheidhmíocht an táirge le linn tástáil chomhlíontachta nó laistigh de thréimhse ghearr tar éis an táirge a chur i mbun seirbhíse, as a n-eascródh feidhmíocht dhearbhaithe lena dtabharfaí bréagléiriú ar fheidhmíocht iarbhír an táirge agus é in úsáid.

(80)

I gcás inarb iomchuí, ba cheart é a bheith indéanta gníomhartha tarmligthe lena leagtar síos ceanglais éicidhearthóireachta tagairt a dhéanamh d’úsáid caighdeán chun comhlíontacht a shuí nó a fhíorú. Chun a áirithiú nach mbeidh aon bhacainn ar thrádáil ar an margadh inmheánach, ba cheart na caighdeáin sin a chomhchuibhiú ar leibhéal an Aontais. A luaithe a ghlacfar tagairt do chaighdeáin den sórt sin i gcomhréir le Rialachán (AE) Uimh. 1025/2012 ó Pharlaimint na hEorpa agus ón gComhairle (46) agus a fhoilsítear in Iris Oifigiúil an Aontais Eorpaigh í, ba cheart a mheas go bhfuil táirgí atá i gcomhréir leis na caighdeáin sin i gcomhréir leis na ceanglais éicidhearthóireachta arna nglacadh de bhun an Rialacháin seo a mhéid a chumhdaítear leis na caighdeáin chomhchuibhithe ábhartha iad. Ar an gcaoi chéanna, ba cheart a mheas go bhfuil modhanna tástála, tomhais nó ríofa atá i gcomhréir le caighdeáin chomhchuibhithe i gcomhréir leis na ceanglais tástála, tomhais agus modhanna ríofa a leagtar amach sna gníomhartha tarmligthe ábhartha lena leagtar síos ceanglais éicidhearthóireachta, a mhéid atá siad cumhdaithe ag na caighdeáin chomhchuibhithe ábhartha.

(81)

Maidir le creat reatha an Aontais um chaighdeánú, atá bunaithe ar phrionsabail an Chur Chuige Nua a leagtar amach i Rún ón gComhairle an 7 Bealtaine 1985 maidir le cur chuige nua i leith comhchuibhiú teicniúil agus caighdeán (47) agus i Rialachán (AE) Uimh. 1025/2012, is é atá ann, mar réamhshocrú, an creat chun caighdeáin a tharraingt suas lena bhforailtear do thoimhde comhréireachta leis na ceanglais ábhartha a leagtar amach sa Rialachán seo. In éagmais tagairtí ábhartha do chaighdeáin chomhchuibhithe, ba cheart don Choimisiún a bheith in ann gníomhartha cur chun feidhme a ghlacadh lena mbunaítear sonraíochtaí coiteanna mar réiteach cúltaca eisceachtúil chun comhlíonadh na gceanglas éicidhearthóireachta ag an monaróir a éascú, mar shampla nuair a chuirtear bac ar an bpróiseas caighdeánaithe mar gheall ar easpa comhthola idir geallsealbhóirí nó i gcás ina bhfuil moilleanna ann maidir le caighdeán comhchuibhithe a bhunú agus nach féidir an spriocdháta a leagadh síos a urramú. D’fhéadfadh na moilleanna sin a bheith ann, mar shampla, nuair nach mbaintear amach an cháilíocht is gá. Ina theannta sin, ba cheart a bheith in ann dul i muinín an réitigh sin i gcás ina bhfuil an Coimisiún tar éis na tagairtí do chaighdeáin chomhchuibhithe ábhartha a shrianadh nó a tharraingt siar i gcomhréir le Rialachán (AE) Uimh. 1025/2012. Ba cheart toimhde comhréireachta a bheith mar thoradh ar chomhlíonadh sonraíochtaí coiteanna freisin. Chun éifeachtúlacht a áirithiú, ba cheart don Choimisiún ról a thabhairt do gheallsealbhóirí ábhartha sa phróiseas lena mbunaítear sonraíochtaí comhchoiteanna lena gcumhdaítear na ceanglais éicidhearthóireachta arna nglacadh de bhun an Rialacháin seo.

(82)

Chun a chur ar a gcumas d’oibreoirí eacnamaíocha a léiriú, agus d’údaráis inniúla a fhíorú, go gcomhlíonann táirgí a chuirtear ar fáil ar an margadh na ceanglais éicidhearthóireachta arna nglacadh de bhun an Rialacháin seo, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh trí nósanna imeachta um measúnú comhréireachta a leagan síos a bheidh iomchuí agus comhréireach le cineál an táirge lena mbaineann agus le cineál na bparaiméadar táirgí a rialáiltear. Chun comhsheasmhacht le dlí eile de chuid an Aontais a áirithiú, ba cheart na nósanna imeachta um measúnú comhréireachta a roghnú as measc na nósanna imeachta sin sa mhodúl um rialú inmheánach táirgthe a áirítear sa Rialachán seo agus as measc na modúl a áirítear i gCinneadh Uimh. 768/2008/CE ó Pharlaimint na hEorpa agus ón gComhairle (48), ó na cinn is lú déine go dtí na modúil is déine. Lena áirithiú tuilleadh go bhfuil an modúl is infheidhme iomchuí agus comhréireach le cineál an táirge lena mbaineann agus le cineál na bparaiméadar táirgí a rialaítear, ba cheart don Choimisiún, i gcás inar gá, an modúl a roghnaítear a oiriúnú dá réir sin.

(83)

Ba cheart do mhonaróirí dearbhú comhréireachta de chuid an Aontais a dhréachtú chun faisnéis a sholáthar faoi chomhréireacht táirgí leis an Rialachán seo. D’fhéadfaí a cheangal ar mhonaróirí le dlí eile de chuid an Aontais dearbhú comhréireachta AE a tharraingt suas freisin. Chun rochtain éifeachtach ar fhaisnéis a áirithiú chun críoch faireachais margaidh, ba cheart dearbhú comhréireachta aonair de chuid an Aontais a dhréachtú i ndáil le dlí uile an Aontais. Chun an t-ualach riaracháin ar oibreoirí eacnamaíocha a laghdú, ba cheart don dearbhú comhréireachta aonair sin de chuid an Aontais a bheith in ann a bheith ina shainchomhad ina mbeidh na dearbhuithe comhréireachta aonair ábhartha de chuid an Aontais.

(84)

Le Rialachán (CE) Uimh. 765/2008 ó Pharlaimint na hEorpa agus ón gComhairle leagtar (49) síos rialacha maidir le creidiúnú comhlachtaí um measúnú comhréireachta agus leagtar amach leis na prionsabail ghinearálta lena rialaítear an mharcáil CE agus an gaol atá aige le marcálacha eile. Ba cheart feidhm a bheith ag an Rialachán sin maidir le táirgí a chumhdaítear leis an Rialachán seo chun a áirithiú go gcomhlíonann táirgí a bhaineann tairbhe as an tsaorghluaiseacht earraí laistigh den Aontas ceanglais lena soláthraítear ardleibhéal cosanta i gcomhair leas an phobail, mar shampla sláinte an duine, sábháilteacht agus an comhshaol. I gcás inar glacadh ceanglais éicidhearthóireachta le haghaidh táirge, ba cheart a chur in iúl leis an marcáil CE go bhfuil an táirge sin i gcomhréir leis an Rialachán seo agus leis na ceanglais éicidhearthóireachta a glacadh dá bhun, a mhéid a bhaineann siad leis an táirge. Ós rud é go ndéantar foráil sa Rialachán seo maidir le ceanglais éicidhearthóireachta a shocrú le haghaidh raon mór táirgí, ba cheart a leagaan amach sna gníomhartha tarmligthe lena socraítear na ceanglais sin rialacha maidir le marcáil chomhréireachta i ndáil le ceanglais éicidhearthóireachta chun comhsheasmhacht a áirithiú leis na ceanglais faoi dhlí an Aontais is infheidhme maidir leis na táirgí a chumhdaítear, chun mearbhall le marcálacha eile a chosc agus chun an t-ualach riaracháin ar oibreoirí eacnamaíocha a íoslaghdú.

(85)

Le cuid de na modúil um measúnú comhréireachta a leagtar síos i gCinneadh Uimh. 768/2008/CE, éilítear idirghabháil na gcomhlachtaí um measúnú comhréireachta. Chun coinníollacha aonfhoirmeacha a áirithiú maidir le cur chun feidhme an Rialacháin seo, ba cheart d’údaráis na mBallstát fógra a thabhairt don Choimisiún faoi na comhlachtaí sin.

(86)

Chun leibhéal comhsheasmhach cáilíochta a áirithiú agus measúnú comhréireachta á dhéanamh, is gá ceanglais a shocrú le haghaidh na n-údarás a thugann fógra atá bainteach le measúnú a dhéanamh ar chomhlachtaí dá dtugtar fógra, fógra a thabhairt dóibh agus faireachán a dhéanamh orthu. Go háirithe, ba cheart do na Ballstáit a dhearbhú go bhfuil an t-údarás a thugann fógra oibiachtúil agus neamhchlaonta maidir lena ghníomhaíocht. Thairis sin, ba cheart a éileamh ar na húdaráis a thugann fógra rúndacht na faisnéise a fhaigheann siad a choimirciú ach ba cheart dóibh, mar sin féin, a bheith in ann faisnéis a mhalartú faoi na comhlachtaí dá dtugtar fógra leis an húdaráis náisiúnta, leis na húdaráis a thugann fógra sna Ballstáit eile agus leis an gCoimisiún chun comhsheasmhacht leis an measúnú comhréireachta a áirithiú. Chun inniúlacht agus neamhspleáchas na gcomhlachtaí is iarratasóirí a shuí agus faireachán a dhéanamh orthu go héifeachtach, níor cheart do na húdaráis a thugann fógra measúnú a dhéanamh ach amháin ar an gcomhlacht dlíthiúil sonrach a dhéanann iarratas ar fhógra, gan dintiúir máthairchuideachtaí nó comhchuideachtaí a chur san áireamh. Ar an gcúis chéanna, ba cheart do na húdaráis a thugann fógra measúnú a dhéanamh ar na comhlachtaí is iarratasóirí i ndáil leis na gceanglas ábhartha uile agus na gcúraimí um measúnú comhréireachta uile, agus iad ag brath ar chaighdeáin chomhchuibhithe maidir leis na ceanglais agus na cúraimí a chumhdaítear leis na caighdeáin sin.

(87)

I bhfianaise an róil lárnaigh atá acu maidir le hiontaofacht na measúnuithe comhréireachta i ndáil le ceanglais éicidhearthóireachta a áirithiú, tá sé bunriachtanach go mbeidh dóthain pearsanra inniúil agus maoiniú leordhóthanach ar fáil do na húdaráis a thugann fógra chun a gcuid cúraimí a dhéanamh mar is ceart.

(88)

Tá sé bunriachtanach go ndéanfadh na comhlachtaí dá dtugtar fógra go léir a bhfeidhmeanna ar an leibhéal céanna agus faoi dhálaí comhionanna iomaíochta agus go huathrialach. Dá bhrí sin, ba cheart ceanglais a shocrú i gcomhair comhlachtaí um measúnú comhréireachta ar mian leo stádas comhlachta dá dtugtar fógra a fháil chun gníomhaíochtaí um measúnú comhréireachta a sholáthar. Ba cheart go leanfadh na ceanglais sin d’fheidhm a bheith acu chun a áirithiú go ndéantar inniúlacht an chomhlachta dá dtugtar fógra a choinneáil. Chun a neamhspleáchas a áirithiú, ba cheart a cheangal ar an gcomhlacht dá dtugtar fógra agus ar an bhfoireann atá fostaithe aige a bheith neamhspleách ar oibreoirí eacnamaíocha i slabhra luacha na dtáirgí ar tugadh fógra dó ina leith agus ar chuideachtaí eile, lena n-áirítear comhlachais ghnó agus máthairchuideachtaí agus comhchuideachtaí, fochuideachtaí agus fochonraitheoirí.

(89)

Má léiríonn comhlacht um measúnú comhréireachta go bhfuil sé i gcomhréir leis na critéir a leagtar síos sna caighdeáin chomhchuibhithe, ba cheart glacadh leis go gcomhlíonann sé na ceanglais chomhfhreagracha a leagtar amach sa Rialachán seo.

(90)

Is minic a ligeann comhlachtaí um measúnú comhréireachta codanna dá ngníomhaíochtaí a bhaineann leis an measúnú comhréireachta ar fochonradh nó a théann ann siad i muinín fochuideachta. Chun a áirithiú go gcomhlíonann táirgí a chuirtear ar mhargadh an Aontais ceanglais éicidhearthóireachta, ba cheart d’fhochonraitheoirí agus d’fhochuideachtaí um measúnú comhréireachta na ceanglais chéanna a chomhlíonadh is a chomhlíonann na comhlachtaí dá dtugtar fógra maidir le feidhmiú cúraimí um measúnú comhréireachta faoin Rialachán seo. Chun a áirithiú gurb amhlaidh atá an cás, ba cheart do na comhlachtaí ábhartha dá dtugtar fógra nósanna imeachta a bhunú chun faireachán leanúnach a dhéanamh ar inniúlacht, gníomhaíochtaí agus feidhmíocht a bhfochonraitheoirí nó a bhfochuideachtaí, mar shampla trí mhaitrís cháilíochta.

(91)

Le go bhféadfaidh na húdaráis a thugann fógra inniúlacht agus neamhspleáchas na gcomhlachtaí is iarratasóirí a bhunú agus faireachán a dhéanamh orthu go héifeachtach, ba cheart do na húdaráis sin a bheith neamhspleách agus leanúint de bheith neamhspleách. Dá bhrí sin, ba cheart don chomhlacht ar leith dá dtugtar fógra gníomhaíochtaí agus próisis áirithe chinnteoireachta a dhéanamh é féin, maidir le measúnú comhréireachta ar tháirgí agus le gníomhaíochtaí eile araon ar tháirgí agus gníomhaíochtaí inmheánacha de chuid an chomhlachta dá dtugtar fógra iad.

(92)

Chun an próiseas a éascú chun inniúlacht agus neamhspleáchas na gcomhlachtaí is iarratasóirí a bhunú agus faireachán a dhéanamh orthu, ba cheart do na comhlachtaí is iarrthóirí tuairisc a thabhairt ar conas a chomhfhreagraíonn a bpearsanra ábhartha agus stádas agus cúraimí an phearsanra sin do na cúraimí um measúnú comhréireachta a bhfuil sé beartaithe ag na comhlachtaí sin fógra a fháil ina leith, amhail i bhfoirm maitrís cháilíochta, agus ar an gcaoi sin, a chur ar chumas an údaráis a thugann fógra measúnú níos éifeachtaí a dhéanamh ar leordhóthanacht an tsoláthair foirne agus ar neamhspleáchas leanúnach na gcomhlachtaí dá dtugtar fógra. Ba cheart do chomhlachtaí dá dtugtar fógra a áirithiú go ndéantar uainíocht ar an bpearsanra a bheidh i mbun cúraimí éagsúla um measúnú comhréireachta.

(93)

Ós rud é go bhféadfadh sé go mbeadh baint ag na seirbhísí atá á dtairiscint ag na comhlachtaí dá dtugtar fógra i mBallstát le táirgí a chuirtear ar fáil ar an margadh ar fud an Aontais, is iomchuí an deis a thabhairt do na Ballstáit eile agus don Choimisiún agóid a dhéanamh maidir le comhlacht dá dtugtar fógra.

(94)

Ar mhaithe leis an nós imeachta um measúnú comhréireachta a éascú agus dlús a chur leis, agus chun cóir chomhionann a áirithiú i gcomhair oibreoirí eacnamaíocha, tá sé ríthábhachtach go gcuirfidh na comhlachtaí dá dtugtar fógra na nósanna imeachta um measúnú comhréireachta i bhfeidhm go comhsheasmhach agus gan ualach nach bhfuil gá leis a chruthú d’oibreoirí eacnamaíocha.

(95)

Sula ndéanfar cinneadh críochnaitheach cibé acu an féidir deimhniú comhréireachta a bhronnadh ar tháirge nó nach féidir, níor cheart cead a bheith ag an oibreoir eacnamaíoch ar mian leis an táirge sin a chur ar an margadh an doiciméadacht ábhartha a fhorlíonadh ach aon uair amháin. Tá an teorannú sin riachtanach chun a áirithiú nach mbeidh na comhlachtaí dá dtugtar fógra in ann cúnamh a thabhairt do mhonaróirí athruithe a dhéanamh go dtí go mbainfear amach comhréireacht, ós rud é go gciallódh sé sin go mbeadh an tseirbhís a chuirtear ar fáil cosúil le seirbhís comhairliúcháin agus go bhféadfadh sí, sa chleachtas, caolú a dhéanamh ar chúraimí na gcomhlachtaí dá dtugtar fógra ar chun leas an phobail iad. I gcás inarb iomchuí, ba cheart do na comhlachtaí dá dtugtar fógra a bheith in ann aon deimhniú nó aon chinneadh formheasa a shrianadh, a chur ar fionraí nó a tharraingt siar.

(96)

Chun éascú a dhéanamh ar shainaithint agus réiteach cásanna ina mbíonn comhlachtaí dá dtugtar fógra, monaróirí nó táirgí neamhchomhréireach, ba cheart do na comhlachtaí dá dtugtar fógra faisnéis ábhartha atá ar fáil dóibh a chur ar aghaidh go réamhghníomhach chuig na húdaráis a thugann fógra nó chuig na húdaráis faireachais margaidh.

(97)

Tá sé bunriachtanach malartú éifeachtúil faisnéise a áirithiú idir na comhlachtaí dá dtugtar fógra agus na húdaráis faireachais, lena n-áirítear faisnéis ó Bhallstáit eile. Chuige sin, ba cheart do na húdaráis a thugann fógra agus do na comhlachtaí dá dtugtar fógra a áirithiú go ndéanfar obair leantach ar iarrataí ar fhaisnéis ó na húdaráis faireachais margaidh.

(98)

Ba cheart don Choimisiún comhordú agus comhar iomchuí a éascú idir na comhlachtaí dá dtugtar fógra. Chun cur i bhfeidhm comhchuibhithe na gceanglas éicidhearthóireachta a áirithiú, ba cheart do na comhlachtaí dá dtugtar fógra plé agus comhordú a dhéanamh maidir le hábhair a d’fhéadfadh a bheith dibhéirseach. Agus iad i mbun an phróisis sin, ba cheart dóibh aon treoir agus aon mholtaí ábhartha arna n-eisiúint ag coistí teicniúla inniúla na gcomhlachtaí Eorpacha um chaighdeánú a chur san áireamh.

(99)

Chun tomhaltóirí a dhreasú le roghanna inbhuanaithe a dhéanamh, go háirithe nuair nach mbíonn na táirgí is inbhuanaithe inacmhainne go leor, d’fhéadfaí foráil a dhéanamh maidir le sásraí amhail éiceadhearbháin agus cánachas comhshaoil. Nuair a chinnfidh na Ballstáit úsáid a bhaint as dreasachtaí chun luaíocht a thabhairt do na táirgí is fearr feidhmíocht, ba cheart dóibh é sin a dhéanamh trí dhíriú ar na dreasachtaí sin ar an dá aicme feidhmíochta is airde daonra a leagadh síos leis na gníomhartha tarmligthe arna nglacadh de bhun an Rialacháin seo, agus ní gá go nglacfaí go carnach iad, i gcás ina socrófar aicmí feidhmíochta i ndáil le níos mó ná paraiméadar amháin. Maidir le táirgí a bhaineann le fuinneamh a chumhdaítear le Rialachán (AE) 2017/1369 nó maidir le boinn a chumhdaítear le ceanglais lipéadaithe i ndáil le héifeachtúlacht breosla agus paraiméadair eile faoi Rialachán (AE) 2020/740 ó Pharlaimint na hEorpa agus ón gComhairle (50), ba cheart feidhm a bheith ag na critéir a leagtar síos faoin dá ionstraim sin seachas acu sin faoin Rialachán seo. Mar sin féin, níor cheart do na Ballstáit a bheith in ann toirmeasc a chur ar tháirge a chur ar an margadh bunaithe ar a aicme feidhmíochta. Tabhairt isteach dhreasachtaí na mBallstát, ba cheart é a bheith gan dochar do chur i bhfeidhm rialacha an Aontais maidir le Státchabhair.

(100)

Is ionann soláthar poiblí agus 14 % de OTI an Aontais. Chun rannchuidiú leis an gcuspóir neodracht aeráide a bhaint amach, éifeachtúlacht fuinnimh agus acmhainní a fheabhsú agus aistriú chuig geilleagar ciorclach lena gcosnaítear an tsláinte phoiblí agus an bhithéagsúlacht, trína áirithiú go bhfuil éileamh leordhóthanach ar tháirgí atá níos inbhuanaithe ó thaobh an chomhshaoil de, ba cheart d’údaráis chonarthacha agus d’eintitis chonarthacha, i gcás inarb iomchuí, a soláthar a ailíniú le ceanglais shonracha maidir le soláthar poiblí glas. I gcomparáid le cur chuige deonach, áiritheofar le ceanglais éigeantacha maidir le soláthar poiblí glas go n-uasmhéadófar giaráil an chaiteachais phoiblí chun borradh a chur faoin éileamh ar tháirgí a fheidhmíonn níos fearr. Tá sé tábhachtach go soláthródh na Ballstáit cúnamh d’údaráis chonarthacha náisiúnta chun foireann atá i gceannas ar sholáthar poiblí glas a uas-sciliú agus a athsciliú. Ba cheart gur íoscheanglais iad na ceanglais sin maidir le soláthar poiblí glas, rud a chiallaíonn gur cheart go mbeadh údaráis chonarthacha agus eintitis chonarthacha in ann ceanglais bhreise agus ceanglais níos déine a shocrú. Ba cheart do na ceanglais sin a bheith trédhearcach, oibiachtúil agus neamh-idirdhealaitheach. Ba cheart gur údaráis chonarthacha agus eintitis chonarthacha a chuirfeadh an nós imeachta soláthair phoiblí i gcrích i gcomhréir le Treoracha 2014/24/AE (51) agus 2014/25/AE (52) ó Pharlaimint na hEorpa agus ón gComhairle, agus leis an reachtaíocht earnála is infheidhme, chomh maith le gealltanais idirnáisiúnta an Aontais, lena n-áirítear an Comhaontú maidir le Soláthar Rialtais agus comhaontuithe idirnáisiúnta eile a bhfuil an tAontas faoi cheangal acu. Tá na ceanglais sin gan dochar don fhéidearthacht atá ag údaráis chonarthacha agus ag eintitis chonarthacha brath ar mhaoluithe nó ar dhíolúintí maidir le conarthaí poiblí a leagtar amach i ndlí an Aontais, go háirithe Treoracha 2014/24/AE agus 2014/25/AE. Ba cheart na ceanglais a leagtar síos i gcomhair grúpaí sonracha táirgí a chomhlíonadh ní hamháin nuair a fhaightear na táirgí sin go díreach i gconarthaí soláthair phoiblí ach i gconarthaí oibreacha poiblí nó conarthaí seirbhísí poiblí freisin i gcás ina n-úsáidfear na táirgí sin le haghaidh gníomhaíochtaí arb iad ábhar na gconarthaí sin iad. Ba cheart na ceanglais sin a shocrú i ndáil leis na gnéithe táirgí a dtugtar aghaidh orthu sa ghníomh tarmligthe lena rialaítear na táirgí i dtrácht. Mar chuid de na ceanglais sin, d’fhéadfadh an Coimisiún íos-sonraíochtaí teicniúla éigeantacha a leagan amach lena gceanglófaí ar tháirgí na leibhéil feidhmíochta is fearr is féidir a chomhlíonadh mar a leagtar amach sna gníomhartha tarmligthe ábhartha, lena n-áirítear, i gcás ina mbeidh fáil orthu, comhlíonadh an dá aicme feidhmíochta is airde nó an dá scór is airde. Mar thoradh air sin, mar shampla, bheadh sé éigeantach d’údaráis chonarthacha agus d’eintitis chonarthacha a cheangal go gcomhlíonfadh táirgí na dtairgeoirí ceanglais shonracha maidir le lorg carbóin. I gcomhréir leis an gcreat um sholáthar poiblí, ba cheart, leis na híos-sonraíochtaí teicniúla éigeantacha sin, srian saorga a chur leis an iomaíocht agus tús áite a thabhairt d’oibreoir eacnamaíoch ar leith a sheachaint. D’fhéadfadh an Coimisiún íoschritéir dhámhachtana éigeantacha a chur ar bun freisin, lena n-áirítear ualú sonrach, idir 15 % agus 30 %, a shannadh do na critéir sin chun a áirithiú gur féidir leo tionchar suntasach a imirt ar rogha na dtáirgí i bhfabhar na dtáirgí sin is inbhuanaithe ó thaobh an chomhshaoil de. Mar thoradh air sin, mar shampla, bheadh sé éigeantach d’údaráis chonarthacha agus d’eintitis chonarthacha íosualú idir 20 % agus 30 % a thabhairt do chion athchúrsáilte na dtáirgí i dtrácht. Mar thoradh air sin, d’fhéadfadh údaráis chonarthacha agus eintitis chonarthacha, sa nós imeachta dámhachtana sonrach, ualú is airde ná 30 %, ach nach lú ná 20 %, a shannadh do chion athchúrsáilte. Ba cheart tosaíocht a thabhairt do chritéir dhámhachtana thar shonraíochtaí teicniúla nuair is ann d’éiginnteachtaí maidir le hinfhaighteacht nó costas na dtáirgí is fearr feidhmíocht i margadh an Aontais. D’fhéadfadh an Coimisiún coinníollacha agus spriocanna feidhmíochta conartha a leagan síos freisin ar dá réir, mar shampla, ba cheart d’údaráis chonarthacha agus d’eintitis chonarthacha 50 % ar a laghad dá soláthar bliantúil de tháirgí áirithe a dhámhachtain orthu siúd a bhfuil céatadán d’ábhar in-athchúrsáilte níos mó ná 70 % acu. Mar thoradh air sin, d’fhéadfadh na Ballstáit spriocanna níos airde a leagan síos maidir le soláthar na dtáirgí sin. Nuair a bhíonn gníomhartha cur chun feidhme á bhforbairt aige agus, go háirithe, nuair a bhíonn indéantacht eacnamaíoch na n-údarás conarthach agus na n-eintiteas conarthach á meas aige, ba cheart don Choimisiún aird a thabhairt ar na táirgí agus na réitigh chomhshaoil is fearr is féidir atá ar fáil ar an margadh, ar éifeachtaí na gceanglas ar an iomaíocht agus ar an bhfíoras go bhféadfadh acmhainneachtaí buiséadacha éagsúla nó srianta eile amhail dálaí aeráide nó bonneagar líonra a bheith ag údaráis chonarthacha agus eintitis chonarthacha éagsúla i mBallstáit éagsúla.

(101)

Níor cheart cosc a chur ar na Ballstáit bearta náisiúnta a thabhairt isteach nó a choinneáil ar bun maidir le soláthar poiblí glas i dtaobh grúpaí táirgí nach bhfuil ceanglais soláthair phoiblí faoin Rialachán seo leagtha síos ina leith go fóill ná níor ceart cosc a chur orthu ceanglais náisiúnta níos déine a thabhairt isteach maidir le táirgí a thagann faoi raon feidhme gníomhartha cur chun feidhme lena leagtar amach ceanglais maidir le soláthar poiblí glas, ar choinníoll go bhfuil na bearta agus na ceanglais sin i gcomhréir le dlí an Aontais.

(102)

Tá forfheidhmiú éifeachtach na gceanglas éicidhearthóireachta bunriachtanach chun iomaíocht chomhionann i margadh an Aontais a áirithiú agus chun a áirithiú go mbainfear amach na tairbhí a mheastar a thiocfaidh as an Rialachán seo agus an méid a mheastar a chuirfidh sé le cuspóirí aeráide, fuinnimh agus ciorclaíochta an Aontais a bhaint amach. Dá bhrí sin, ba cheart feidhm a bheith ag Rialachán (AE) 2019/1020 lena leagtar amach creat cothrománach maidir le faireachas margaidh agus rialú ar tháirgí a thagann isteach i margadh an Aontais maidir le táirgí a bhfuil ceanglais éicidhearthóireachta leagtha síos ina leith de bhun an Rialacháin seo, sa mhéid nach bhfuil forálacha sonracha ann a bhfuil an cuspóir, an cineál nó an éifeacht chéanna acu sa Rialachán seo. Ina theannta sin, chun leibhéil fhadhbacha neamhchomhlíontachta na dtáirgí a chumhdaítear le bearta cur chun feidhme arna nglacadh faoi Threoir 2009/125/CE a laghdú, chun neamhchomhlíontacht le ceanglais éicidhearthóireachta amach anseo a chosc ar bhealach níos éifeachtúla, agus raon feidhme níos leithne agus uaillmhian mhéadaithe an Rialacháin seo i gcomparáid le Treoir 2009/125/CE á gcur san áireamh, ba cheart rialacha breise sonracha a bheith sa Rialachán seo lena gcomhlánaítear an creat a cruthaíodh le Rialachán (AE) 2019/1020. Ba cheart na rialacha sin a dhíriú ar phleanáil, comhordú agus tacaíocht iarrachtaí na mBallstát a neartú a thuilleadh agus ba cheart uirlisí breise a sholáthar don Choimisiún chun cabhrú lena áirithiú go ndéanfaidh údaráis faireachais margaidh gníomhaíocht leordhóthanach chun neamhchomhlíontacht leis na ceanglais éicidhearthóireachta a chosc.

(103)

Chomh maith leis na húdaráis faireachais margaidh, tá ról tábhachtach ag na húdaráis chustaim freisin maidir leis an Rialachán seo a fhorfheidhmiú i ndáil le hearraí arna n-allmhairiú agus féadfaidh siad brath ar Rialachán (CE) Uimh. 515/97 ón gComhairle (53) chun na críche sin.

(104)

Chun a áirithiú go ndéanfar seiceálacha iomchuí ar scála leormhaith i ndáil le ceanglais éicidhearthóireachta, ina straitéis náisiúnta faireachais margaidh dábhforáiltear in Airteagal 13 de Rialachán (AE) 2019/1020, ba cheart do na Ballstáit roinn thiomnaithe a tharraingt suas ina liostófar na táirgí nó na ceanglais atá shainaitheanta acu mar thosaíochtaí maidir le faireachas margaidh faoin Rialachán seo agus na gníomhaíochtaí a bheartaítear chun neamhchomhlíontacht táirgí ábhartha leis na ceanglais éicidhearthóireachta ábhartha a laghdú nó chun deireadh a chur leis an neamhchomhlíontacht sin.

(105)

Ba cheart tosaíochtaí maidir le faireachas margaidh faoin Rialachán seo a shainaithint bunaithe ar chritéir oibiachtúla amhail na leibhéil neamhchomhlíontachta a bhreathnaítear nó na tionchair ar an gcomhshaol a eascraíonn as neamhchomhlíontacht. Na gníomhaíochtaí atá beartaithe chun aghaidh a thabhairt ar na tosaíochtaí sin, ba cheart iad a bheith comhréireach ina seal leis na fíorais is cúis lena dtosaíocht.

(106)

Ar bhonn sonraí a iontráladh sa chóras faisnéise agus cumarsáide dá dtagraítear i Rialachán (AE) 2019/1020, ba cheart don Choimisiún tuarascáil a tharraingt suas ina mbeidh faisnéis faoi chineál agus líon na seiceálacha a rinneadh, faoi na leibhéil neamhchomhlíontachta a sainaithníodh agus faoi chineál agus déine na bpionós a forchuireadh i ndáil le neamhchomhlíontacht leis na ceanglais éicidhearthóireachta le 4 bliana féilire roimhe sin. Ba cheart comparáid a bheith sa tuarascáil idir gníomhaíochtaí na mBallstát agus na gníomhaíochtaí atá beartaithe, tagarmharcanna táscacha agus liosta tosaíochtaí d’údaráis faireachais margaidh. Agus breithniú á dhéanamh ar ghníomhartha cur chun feidhme a ghlacadh i gcomhréir le hAirteagal 11(4) de Rialachán (AE) 2019/1020, ba cheart don Choimisiún torthaí na dtuarascálacha a tharraing sé suas de bhun an Rialacháin seo a chur san áireamh ar bhonn na faisnéise a chuir údaráis faireachais margaidh isteach sa chóras faisnéise agus cumarsáide dá dtagraítear i Rialachán (AE) 2019/1020, agus ba cheart dó aghaidh a thabhairt, de réir mar is iomchuí, ar na táirgí nó ar na grúpaí táirgí a chumhdaítear le gníomhartha tarmligthe arna nglacadh de bhun an Rialacháin seo i ndáil leis na rioscaí sonracha nó sáruithe tromchúiseacha a shainaithnítear go leanúnach, chun ardleibhéal comhlíontachta leis an Rialachán seo a áirithiú.

(107)

Chun comhordú na n-údarás faireachais margaidh a neartú a thuilleadh, ba cheart don ghrúpa comhair riaracháin (‘ADCO’) a bunaíodh de bhun Rialachán (AE) 2019/1020, chun na táirgí nó na ceanglais a shainaithnítear mar thosaíochtaí d’fhaireachas margaidh faoin Rialachán seo agus na gníomhaíochtaí a bheartaítear chun neamhchomhlíontacht leis an Rialachán seo a laghdú nó chun deireadh a chur leis, teacht le chéile go tráthrialta agus comhthosaíochtaí maidir le faireachas margaidh a bheidh le cur san áireamh i straitéisí faireachais margaidh náisiúnta na mBallstát, tosaíochtaí maidir le soláthar tacaíochta ón Aontas, agus ceanglais arna nglacadh de bhun an Rialacháin seo a chuirtear i bhfeidhm nó a léirmhínítear ar bhealaí éagsúla as a dtiocfaidh saobhadh sa mhargadh a shainaithint, dá bhrí sin.

(108)

Chun tacú leis na Ballstáit ina n-iarrachtaí a áirithiú go ndéanfar gníomhaíocht leordhóthanach chun neamhchomhlíontacht leis na ceanglais éicidhearthóireachta a chosc, ba cheart don Choimisiún, i gcás inarb ábhartha, leas a bhaint as na bearta tacaíochta dá bhforáiltear i Rialachán (AE) 2019/1020. Ba cheart don Choimisiún comhthionscadail faireachais agus tástáil margaidh i réimsí comhleasa, infheistíochtaí comhpháirteacha in acmhainneachtaí faireachais margaidh agus cláir oiliúna coiteanna d’fhoireann na n-údarás faireachais margaidh, na n-údarás custaim, na n-údarás a thugann fógra agus na gcomhlachtaí dá dtugtar fógra a eagrú agus, i gcás inarb iomchuí, iad a mhaoiniú. Ina theannta sin, ba cheart don Choimisiún treoirlínte a tharraingt suas maidir le conas ceanglais arna nglacadh de bhun an Rialacháin seo a chur i bhfeidhm agus a fhorfheidhmiú i gcás inar gá chun a áirithiú go gcuirfear i bhfeidhm go comhchuibhithe iad.

(109)

Níor cheart táirgí a chur ar an margadh ach amháin mura bhfuil riosca ag baint leo. Chun é a ailíniú níos fearr le cineál sonrach na gceanglas éicidhearthóireachta agus chun a áirithiú go ndíreofar sna hiarrachtaí maidir le faireachas margaidh ar neamhchomhlíontacht leis na ceanglais sin, ba cheart, chun críocha an Rialacháin seo, táirge a bhfuil riosca ag baint leis a shainiú mar tháirge a d’fhéadfadh dochar a dhéanamh don chomhshaol nó do leasanna eile de chuid an phobail a chosnaítear leis an gceanglas sin, toisc nach gcomhlíonann sé ceanglas éicidhearthóireachta nó toisc nach gcomhlíonann oibreoir eacnamaíoch freagrach ceanglas éicidhearthóireachta. Ba cheart an sainiú níos sonraí sin a úsáid agus Airteagail 19 agus 20 de Rialachán (AE) 2019/1020 á gcur i bhfeidhm.

(110)

Ba cheart nós imeachta a bheith ann faoina gcuirtear páirtithe leasmhara ar an eolas faoi bhearta a bheartaítear a ghlacadh i ndáil le táirgí a bhfuil riosca ag baint leo. Ba cheart dó a cheadú freisin do na húdaráis faireachais margaidh sna Ballstáit, i gcomhar leis na hoibreoirí eacnamaíocha ábhartha, gníomhú ag céim luath maidir leis na táirgí sin. Chuige sin, ba cheart an clásal cosanta atá i dTreoir 2009/125/CE faoi láthair a thabhairt cothrom le dáta agus a ailíniú leis na nósanna imeachta cosanta atá ar áireamh i reachtaíocht chomhchuibhithe eile de chuid an Aontais agus i gCinneadh Uimh. 768/2008/CE.

(111)

Ba cheart an ceart a bheith ag na húdaráis faireachais margaidh a cheangal ar oibreoirí eacnamaíocha gníomhaíocht cheartaitheach a dhéanamh ar bhonn torthaí a léiríonn nach gcomhlíonann táirge na ceanglais éicidhearthóireachta nó gur sháraigh an t-oibreoir eacnamaíoch na rialacha maidir le táirgí a chur ar an margadh nó a chur ar fáil ar an margadh, nó rialacha eile atá dírithe air.

(112)

Agus gníomhartha tarmligthe á nglacadh aige de bhun Airteagal 290 CFAE, tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear é sin a dhéanamh ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (54). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(113)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún a mhéid a bhaineann leis an méid seo a leanas: (a) nósanna imeachta a bhunú chun na dintiúir dhigiteacha a eisiúint agus a fhíorú chun rochtana ar na sonraí a stórálann oibreoirí eacnamaíocha agus gníomhaithe ábhartha eile sa phas táirge digiteach bunaithe ar a gceart faoi seach; (b) socruithe cur chun feidhme a shonrú le haghaidh idirnascadh na clárlainne agus Córas Malartaithe Deimhnithe an Ionaid Ilfhreastail AE maidir le Custam, lena n-áirítear an t-aitheantóir uathúil clárúcháin a chur in iúl; (c) comhcheanglais a bhunú maidir le leagan amach lipéad; (d) liosta de bhearta féinrialála a ghlacadh agus a thabhairt cothrom le dáta arna bhunú mar roghanna malartacha bailí ar ghníomh tarmligthe arna ghlacadh de bhun an Rialacháin seo; (e) na sonraí agus an fhormáid a leagan amach chun an fhaisnéis faoi tháirgí tomhaltais gan díol a nochtadh, ar táirgí iad lena bhfuarthas réidh; (f) sonraíochtaí coiteanna lena gcumhdaítear ceanglais éicidhearthóireachta, na ceanglais bhunriachtanacha i gcomhair pasanna táirgí digiteacha nó na ceanglais do mhodhanna tástála, tomhais nó ríomha a bhunú, a leasú nó a aisghairm; (g) íoscheanglais a leagan síos maidir le conarthaí poiblí a dhámhachtain chun táirgí a chumhdaítear le ceanglais éicidhearthóireachta a cheannach, nó le haghaidh oibreacha nó seirbhísí i gcás ina n-úsáidtear na táirgí sin le haghaidh gníomhaíochtaí arb iad ábhar na gconarthaí sin iad agus (h) a chinneadh, de bhun nós imeachta cosanta an Aontais, an bhfuil bonn cirt le beart náisiúnta nó nach bhfuil. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (55).

(114)

Chun muinín as na táirgí a chuirtear ar an margadh a fheabhsú, go háirithe a mhéid a bhaineann le táirgí a bheith ag comhlíonadh ceanglais éicidhearthóireachta, ní mór don phobal a bheith cinnte go mbeidh oibreoirí eacnamaíocha a chuireann táirgí neamhchomhlíontacha ar an margadh faoi réir pionós. Dá bhrí sin, is gá do na Ballstáit rialacha a leagan síos maidir leis na pionóis is infheidhme i gcás sáruithe ar an Rialachán seo agus a áirithiú go gcuirfear na rialacha sin chun feidhme. Ba cheart na pionóis dá bhforáiltear a bheith éifeachtach, comhréireach agus athchomhairleach agus ba cheart a áireamh orthu, ar a laghad, fíneálacha agus eisiamh ó nósanna imeachta soláthair phoiblí, atá teoranta ó thaobh ama de. Gan dochar do neamhspleáchas nós imeachta na mBallstát ná do lánrogha na n-údarás inniúil agus na mbreithiúna pionóis iomchuí a fhorchur sna cásanna aonair, ba cheart critéir choiteanna neamh-uileghabhálacha a bhunú chun na cineálacha agus na leibhéil pionós a bheidh le forchur i gcás sáruithe ar an Rialachán seo a chinneadh, chun cur i bhfeidhm níos comhsheasmhaí na bpionós a éascú. Ba cheart a áireamh ar na critéir sin, inter alia, cineál, tromchúis agus fad an tsáraithe, staid airgeadais an duine nádúrtha nó dhlítheanaigh a mheastar a bheith freagrach mar a léirítear mar shampla leis an láimhdeachas iomlán nó leis an ioncam bliantúil, agus na tairbhí eacnamaíocha a baineadh as an sárú agus a ghineadh as an tsárú, a mhéid is féidir na tairbhí sin a chinneadh.

(115)

Ba cheart don Choimisiún meastóireacht a dhéanamh ar an Rialachán seo. De bhun mhír 22 den Chomhaontú Idirinstitiúideach maidir le Reachtóireacht Níos Fearr, ba cheart an mheastóireacht sin a bhunú ar chúig chritéar mar atá éifeachtúlacht, éifeachtacht, ábharthacht, comhleanúnachas agus breisluach agus ba cheart í a bheith mar bhonn le measúnuithe tionchair ar bhearta a d’fhéadfadh a bheith ann amach anseo. Ba cheart don Choimisiún tuarascáil ar chur chun feidhme an Rialacháin seo agus ar a thionchar ar inbhuanaitheacht comhshaoil táirgí agus ar fheidhmiú an mhargaidh inmheánaigh a chur faoi bhráid Pharlaimint na hEorpa, na Comhairle, Choiste Eacnamaíoch agus Sóisialta na hEorpa agus Choiste na Réigiún. I gcás inarb iomchuí, ba cheart togra chun an Rialachán a leasú a bheith ag gabháil leis an tuarascáil.

(116)

Is iomchuí go ndéanfadh an Coimisiún measúnú ar na tairbhí a d’fhéadfadh a bheith ag baint le ceanglais a leagan síos i ndáil le gnéithe sóisialta táirgí freisin. Mar chuid den mheasúnú sin, ba cheart don Choimisiún breithniú a dhéanamh ar a mhéid a d’fhéadfadh na ceanglais sin dlí an Aontais a chomhlánú, agus, ar an gcaoi sin, aghaidh a thabhairt ar thionchair dhíobhálacha ar chearta an duine agus ar chearta sóisialta a eascraíonn as oibríochtaí cuideachtaí agus as táirgí. Ba cheart don Choimisiún, dá bhrí sin, meastóireacht a dhéanamh laistigh de 4 bliana ó dháta theacht i bhfeidhm an Rialacháin seo maidir leis na tairbhí a d’fhéadfadh a bheith ann dá n-áireofaí ceanglais inbhuanaitheachta sóisialta faoi raon feidhme an Rialacháin seo. Ba cheart don Choimisiún tuarascáil ar an meastóireacht a chur faoi bhráid Pharlaimint na hEorpa, na Comhairle, Choiste Eacnamaíoch agus Sóisialta na hEorpa agus Choiste na Réigiún. I gcás inarb iomchuí, ba cheart togra reachtach chun an Rialachán seo a leasú a bheith ag gabháil leis an tuarascáil.

(117)

Chun forfheidhmiú príobháideach an Rialacháin seo a éascú, ba cheart an ceart a bheith ag tomhaltóirí ar bhain damáiste dóibh toisc nár chomhlíon an táirge ceanglais éicidhearthóireachta cúiteamh a éileamh as an damáiste sin ó mhonaróir an táirge, nó, más rud é nach bhfuil an monaróir bunaithe san Aontas, ón allmhaireoir nó ó ionadaí údaraithe an mhonaróra, nó, más rud é nach bhfuil aon cheann de na hoibreoirí eacnamaíocha sin bunaithe san Aontas, ón soláthraí seirbhíse comhlíonta. Ba cheart an ceart chun cúitimh sin a bheith gan dochar do leigheasanna eile atá ar fáil do thomhaltóirí faoi dhlí an Aontais, amhail na leigheasanna i gcoinne an díoltóra i gcás easpa comhréireachta na n-earraí a dhíoltar i gcomhréir le Treoir (AE) 2019/771 ó Pharlaimint na hEorpa agus ón gComhairle (56). Thairis sin, níor cheart cosc a chur ar na Ballstáit cearta a choinneáil nó a thabhairt isteach do thomhaltóirí ar leigheasanna eile i gcomhréir leis an dlí náisiúnta, amhail deisiú nó athsholáthar táirgí a sháraíonn ceanglais éicidhearthóireachta.

(118)

Ba cheart tomhaltóirí a bheith i dteideal a gcearta a fhorfheidhmiú i ndáil leis na hoibleagáidí a fhorchuirtear ar mhonaróirí agus, i gcás inarb infheidhme, ar allmhaireoirí, ar ionadaithe údaraithe agus ar sholáthraithe seirbhíse comhlíonta faoin Rialachán seo trí chaingne ionadaíocha i gcomhréir le Treoir (AE) 2020/1828 ó Pharlaimint na hEorpa agus ón gComhairle (57). Chun na críche sin, ba cheart foráil a dhéanamh sa Rialachán seo do Threoir (AE) 2020/1828 a bheith infheidhme maidir le caingne ionadaíocha a bhaineann le sáruithe ar an Rialachán seo ag monaróirí agus, i gcás inarb infheidhme, ag allmhaireoirí, ionadaithe údaraithe agus soláthraithe seirbhíse comhlíonta atá cáilithe mar thrádálaithe faoi Airteagal 3, pointe (2), den Treoir sin, a dhéanann díobháil do chomhleasanna tomhaltóirí nó a d’fhéadfadh díobháil a dhéanamh dóibh. Ba cheart, dá bhrí sin, Iarscríbhinn I a ghabhann leis an Treoir sin a leasú dá réir. Is faoi na Ballstáit atá sé a áirithiú go léirítear an leasú ina mbearta trasuite arna nglacadh i gcomhréir leis an Treoir sin, cé nach bhfuil glacadh na mbeart trasuite náisiúnta i ndáil leis an méid sin mar choinníoll i dtaca le hinfheidhmeacht na Treorach sin maidir leis na caingne ionadaíochta sin. Infheidhmeacht na Treorach sin i ndáil leis na caingne ionadaíocha a thugtar in aghaidh sáruithe ag monaróirí agus, i gcás inarb infheidhme, allmhaireoirí, ionadaithe údaraithe agus soláthraithe seirbhíse comhlíonta ar fhorálacha an Rialacháin seo a dhéanann díobháil nó a d’fhéadfadh díobháil a dhéanamh do chomhleasanna tomhaltóirí, ba cheart go dtosóidh sí amhail ó dháta theacht i bhfeidhm an Rialacháin seo.

(119)

Tá sé riachtanach go mbeidh feidhm ag na ceanglais éicidhearthóireachta maidir leis an réimse is leithne táirgí is féidir, agus ní hamháin maidir le táirgí a bhaineann le fuinneamh, agus go leathnófar an sainmhíniú ar cheanglais éicidhearthóireachta chun gach gné den chiorclaíocht a chuimsiú. Is gá freisin an Rialachán seo a ailíniú leis an gCreat Reachtach Nua a leagtar amach i Rialachán (CE) Uimh. 765/2008 agus i gCinneadh Uimh. 768/2008/CE, agus na forálacha a bhaineann le faireachas margaidh a fheabhsú. Ba cheart Treoir 2009/125/CE a ionadú dá bhrí sin. Chun deimhneacht dhlíthiúil a áirithiú do gach oibreoir eacnamaíoch ó dháta theacht i bhfeidhm an Rialacháin seo agus chun cothroime iomaíochta a áirithiú do ghnólachtaí atá ag oibriú ar an margadh inmheánach, ba cheart cur i bhfeidhm na bhforálacha lena leagtar amach oibleagáidí trédhearcachta a bhaineann le fáil réidh le táirgí tomhaltais gan díol, teacht timpeall, agus faireachas margaidh, a bheith aonfhoirmeach i gcás na n-oibreoirí uile ar fud an Aontais. Ba cheart Rialachán a chur in ionad Threoir 2009/125/CE dá bhrí sin.

(120)

I bPlean Oibre Éicidhearthóireachta agus Lipéadaithe Fuinnimh 2022-2024, a leagtar amach i dTeachtaireacht ón gCoimisiún an 4 Bealtaine 2022, sainaithníodh na tosaíochtaí polaitiúla le haghaidh obair ar tháirgí a bhaineann le fuinneamh. Nuair a thiocfaidh forálacha an Rialacháin seo i bhfeidhm, beidh obair ullmhúcháin lena ndéanfaí measúnú ar indéantacht na gceanglas éicidhearthóireachta de bhun Threoir 2009/125/CE ag céim shuntasach chun tosaigh i gcás painéil fhótavoltacha, téitheoirí spáis agus comhthéitheoirí, téitheoirí uisce, téitheoirí spáis áitiúla breosla sholadaigh, aerchóiritheoirí lena n-áirítear teaschaidéil aer go haer agus gaothráin chompoird, coirí breosla sholadaigh, táirgí téimh agus fuaraithe, aonaid aerála agus fuaraithe, folúsghlantóirí, fearais cócaireachta, caidéil uisce, gaothráin thionsclaíocha, imshruthaithe, soláthairtí cumhachta seachtracha, ríomhairí, freastalaithe agus táirgí stórála sonraí, claochladáin chumhachta, trealamh cuisniúcháin gairmiúil agus trealamh íomháithe. A bhuí leis an obair ullmhúcháin sin, sainaithníodh an iliomad réimsí inar féidir fuinneamh agus ábhar a shábháil, agus rinneadh comhairliúcháin fhorleathana le saoránaigh agus le geallsealbhóirí. Dá gcuirfí tús athuair ar an obair ullmhúcháin sin faoin Rialachán seo, chuirfí moill mhór ar ghlacadh na gceanglas a bhaineann le coigilteas fuinnimh agus ábhair do na táirgí sin. Chun a áirithiú nach gcaillfear an obair ullmhúcháin, is gá, dá bhrí sin, foráil a dhéanamh maidir le rialacha idirthréimhseacha lena gceadófar bearta cur chun feidhme maidir leis na táirgí sin atá le glacadh de bhun Threoir 2009/125/CE, faoin 31 Nollaig 2026. Inatheannta sin, agus chun feidhmiú cuí na mbeart cur chun feidhme arna nglacadh faoi Airteagal 15 de Threoir 2009/125/CE a áirithiú, ba cheart leasuithe is gá lena dtugtar aghaidh ar na saincheisteanna teicniúla a ghlacadh, más ábhartha, i gcomhréir le forálacha ábhartha na Treorach sin, faoin 31 Nollaig 2030.

(121)

Chun deimhneacht dhlíthiúil agus leanúnachas a áirithiú maidir le táirgí a chuirtear ar an margadh nó a chuirtear i mbun seirbhíse i gcomhréir le bearta cur chun feidhme arna nglacadh de bhun Threoir 2009/125/CE, sa leagan di is infheidhme ar dháta theacht i bhfeidhm an Rialacháin seo ba cheart do na bearta sin leanúint de bheith i bhfeidhm tar éis an dáta sin, agus go dtí go n-aisghairfear iad le gníomh tarmligthe arna ghlacadh de bhun an Rialacháin seo. Ar na cúiseanna céanna, ba cheart do roinnt forálacha i dTreoir 2009/125/CE leanúint d’éifeacht iomlán a bheith acu i gcomhthéacs chur i bhfeidhm na mbeart cur chun feidhme sin. Baineann sé sin go háirithe le forálacha de chuid Threoir 2009/125/CE lena n-eisiatar modhanna iompair i gcomhair earraí nó daoine óna raon feidhme, lena mbunaítear sainmhínithe atá ábhartha maidir le bearta cur chun feidhme, lena leagtar síos freagrachtaí oibreoirí eacnamaíocha maidir le táirgí a chuirtear ar an margadh, lena sonraítear mionsonraí na nósanna imeachta ábhartha um measúnú comhréireachta agus dearbhú comhréireachta CE, lena mbunaítear toimhde comhréireachta le haghaidh táirgí ar bronnadh Éicilipéad AE orthu agus lena gcumasaítear gníomhaíocht riachtanach i ndáil le caighdeáin chomhchuibhithe. I bhfianaise a thábhachtaí atá sé saorghluaiseacht earraí a áirithiú, cosc a chur ar chleachtais lena n-athraítear feidhmíocht táirgí go neamhdhleathach chun toradh níos fabhraí a bhaint amach agus forfheidhmiú cuí na gceanglas éicidhearthóireachta a áirithiú, ba cheart forálacha ábhartha an Rialacháin seo a bheith infheidhme maidir le táirgí a bhaineann le fuinneamh arna gcur ar an margadh de bhun bearta cur chun feidhme faoi Threoir 2009/125/CE.

(122)

I dtaca le cuspóirí an Rialacháin seo, mar atá cur le hinbhuanaitheacht comhshaoil táirgí agus saorghluaiseacht sa mhargadh inmheánach i gcomhair táirgí ar leagadh síos ceanglais éicidhearthóireachta ina leith, ós rud é nach féidir leis na Ballstáit na cuspóirí sin a ghnóthú go leordhóthanach, ach gur fearr is féidir, de bharr a bhfairsinge agus a n-éifeachtaí, iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,