(1)

Le Treoir 2006/74/CE ón gCoimisiún (2) áirítear meatconasól mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí meatconasól, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 15 Márta 2025.

(4)

Cuireadh iarratas faoi bhráid na Beilge, an Ballstát is rapóirtéir, agus faoi bhráid na Ríochta Aontaithe, an Ballstát is comhrapóirtéir, chun formheas na substainte gníomhaí meatconasól a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) agus laistigh den tréimhse ama dá bhforáiltear san Airteagal sin.

(5)

Chuir an t-iarratasóir na sainchomhaid fhorlíontacha is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 26 Feabhra 2018. Sa dréacht-tuarascáil uaidh maidir le measúnú ar athnuachan, mhol an Ballstát is rapóirtéir go ndéanfaí an formheas maidir le meatconasól a athnuachan.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar an iarratasóir agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 12 Iúil 2019 d’iarr an tÚdarás faisnéis bhreise ar an iarratasóir maidir le hairíonna suaiteora inchríneach meatconasóil de bhun Airteagal 13(3a), an chéad fhomhír, de Rialachán Cur Chun Feidhme (AE) Uimh. 844/2012. Chuir an t-iarratasóir faisnéis isteach chun go mbeadh an tÚdarás in ann an measúnú a chur i gcrích a mhéid a bhaineann le cé acu a chomhlíontar nó nach gcomhlíontar na critéir eolaíocha maidir le hairíonna suaiteora inchríneach a chinneadh a leagtar amach i bpointe 3.8.2 d’Iarscríbhinn II a ghabhann le Rialachán (CE) Uimh. 1107/2009, mar a tugadh isteach le Rialachán (AE) 2018/605 ón gCoimisiún (6).

(9)

I mí Aibreáin 2022 rinne an Ballstát is rapóirtéir dréacht-tuarascáil cothrom le dáta maidir le measúnú ar athnuachan a chur ar fáil don Údarás, do na Ballstáit agus don Choimisiún. Sa dréacht-tuarascáil cothrom le dáta maidir le measúnú ar athnuachan, phléigh an Ballstát is rapóirtéir an fhaisnéis bhreise maidir leis na critéir chun airíonna suaiteora inchríneach a shainaithint agus mhol sé formheas meatconasóil a athnuachan.

(10)

An 11 Iúil 2023 chuir an tÚdarás an chonclúid uaidh (7) in iúl don Choimisiún go bhféadfaí coinne a bheith leis go gcomhlíonfaidh meatconasól na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(11)

Chuir an Coimisiún tuarascáil athnuachana agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha an 11 agus an 12 Nollaig 2023 agus an 30 agus an 31 Eanáir 2024 faoi seach.

(12)

D’iarr an Coimisiún ar an iarratasóir a bharúlacha a chur isteach maidir le conclúid an Údaráis agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, maidir leis an tuarascáil athnuachana. Chuir an t-iarratasóir a bharúlacha isteach, rinneadh scrúdú cúramach orthu agus cuireadh san áireamh iad.

(13)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach meatconasól, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(14)

An measúnú riosca maidir le formheas na substainte gníomhaí meatconasól a athnuachan, tá sé bunaithe ar líon teoranta úsáidí ionadaíocha, úsáidí nach gcuireann srian, áfach, ar na húsáidí lena bhféadfar táirgí cosanta plandaí a bhfuil meatconasól iontu a údarú. Dá bhrí sin, is iomchuí gan an srian a choinneáil ar bun maidir le húsáid a bhaint as ach amháin mar fhuingicíd agus mar rialaitheoir fáis plandaí.

(15)

Measann an Coimisiún, áfach, gur substaint atá inbhreithnithe lena hionadú é meatconasól de bhun Airteagal 24 de Rialachán (CE) Uimh. 1107/2009. Meastar gur substaint mharthanach thocsaineach meatconasól i gcomhréir le pointí 3.7.2.1 agus 3.7.2.3, faoi seach, d’Iarscríbhinn II a ghabhann le Rialachán (CE) Uimh. 1107/2009, ós rud é go bhfuil leathré mheatconasóil níos faide ná 40 lá i bhfionnuisce agus níos airde ná 120 lá i ndríodar fionnuisce, go n-aicmítear an tsubstaint mar shubstaint atá tocsaineach don atáirgeadh (catagóir 2) de bhun Rialachán (CE) Uimh. 1272/2008 ó Pharlaimint na hEorpa agus ón gComhairle (8) agus gur lú ná 0,01 mg/L an tiúchan gan aon éifeacht thar thréimhse fada i gcás orgánaigh fionnuisce. Dá bhrí sin, comhlíonann sé na coinníollacha a leagtar amach sa dara fleasc de phointe 4 d’Iarscríbhinn II a ghabhann le Rialachán (CE) Uimh. 1107/2009.

(16)

Dá bhrí sin, is iomchuí formheas meatconasóil a athnuachan, mar shubstaint atá inbhreithnithe lena hionadú, de bhun Airteagal 24 de Rialachán (CE) Uimh. 1107/2009.

(17)

I gcomhréir le hAirteagal 14(1) de Rialachán (CE) Uimh. 1107/2009, i gcomhar le hAirteagal 6 de, agus i bhfianaise an eolais eolaíoch theicniúil reatha agus i bhfianaise thoradh an mheasúnaithe riosca, is gá, áfach, foráil a dhéanamh maidir le coinníollacha agus srianta áirithe.

(18)

I bhfianaise na n-ábhar imní a d’fhéadfadh a bheith ann maidir le leitheadúlacht mhéadaitheach tréithchineálacha atá frithsheasmhach in aghaidh asól in A. fumigatus, agus prionsabal an réamhchúraim á chur san áireamh, is iomchuí go háirithe úsáid táirgí ina bhfuil meatconasól a shrianadh d’úsáideoirí gairmiúla amháin.

(19)

Thairis sin, is iomchuí tuilleadh faisnéis deimhniúcháin a éileamh maidir leis an measúnú ar phróisis cóireála uisce i ndáil le hiarmhair substaintí gníomhacha nó a meitibilítí in uisce a aistarraingítear chun uisce óil a tháirgeadh. Ina theannta sin, chun muinín as an gcinneadh seo a mhéadú, ba cheart faisnéis a iarraidh chun na luachanna tagartha tocsaineolaíocha iomchuí is infheidhme maidir le meitibilítí áirithe agus an sainmhíniú ar iarmhar le haghaidh measúnú riosca a dheimhniú.

(20)

Ba cheart Rialachán Cur Chun Feidhme (AE) Uimh. 540/2011 a leasú dá réir.

(21)

I Rialachán Cur Chun Feidhme (AE) 2015/408 ón gCoimisiún (9), liostaíodh meatconasól mar shubstaint atá inbhreithnithe lena hionadú. I bhfianaise na hathnuachana ar fhormheas meatconasóil mar shubstaint atá inbhreithnithe lena hionadú agus i bhfianaise aistriú comhfhreagrach na substainte sin go Cuid E den Iarscríbhinn a ghabhann le Rialachán Cur Chun Feidhme (AE) Uimh. 540/2011, ba cheart an iontráil a bhaineann le meatconasóil a scriosadh ón Iarscríbhinn a ghabhann le Rialachán Cur Chun Feidhme (AE) 2015/408.

(22)

Le Rialachán Cur Chun Feidhme (AE) 2023/689 ón gCoimisiún (10), cuireadh síneadh leis an tréimhse formheasa le haghaidh meatconasóil go dtí an 15 Márta 2025 chun go bhféadfar an próiseas athnuachana a thabhairt chun críche sula rachaidh tréimhse formheasa na substainte gníomhaí sin in éag. Ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, áfach, ba cheart feidhm a bheith ag an Rialachán seo tráth is luaithe ná an dáta sin.

(23)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,