(1)

Rinneadh formheas aicibeansólar-S-meitile a athnuachan le Rialachán Cur Chun Feidhme (AE) 2016/389 ón gCoimisiún (2).

(2)

Le Rialachán (AE) 2018/605 ón gCoimisiún (3), leasaíodh Rialachán (CE) 1107/2009 trí chritéir nua a thabhairt isteach chun substaintí gníomhacha a bhfuil airíonna suaiteora inchrínigh acu a shainaithint, agus tháinig sé i bhfeidhm an 10 Samhain 2018. Ceanglaítear leis sin go ndéanfadh an t-iarratasóir faisnéis bhreise dheimhnitheach a chur faoi bhráid an Choimisiúin, na mBallstát agus an Údaráis Eorpaigh um Shábháilteacht Bia (‘an tÚdarás’) a mhéid a bhaineann le hairíonna suaiteora inchrínigh aicibeansólar-S-meitile.

(3)

Chuir an t-iarratasóir sainchomhaid cothrom le dáta isteach chomh maith le faisnéis bhreise i mí Feabhra 2019.

(4)

An 8 Iúil 2021, d’fhoilsigh an tÚdarás athbhreithniú piaraí ar an tsubstaint ghníomhaí aicibeansólar-S-meitil (4) i ndáil leis na sonraí deimhniúcháin a chuir an t-iarratasóir isteach, athbhreithniú ina dtuairiscíodh nárbh fhéidir measúnú ar airíonna suaiteora inchrínigh aicibeansólar-S-meitile a thabhairt chun críche bunaithe ar na sonraí a bhí ar fáil i leith daoine agus orgánaigh nach spriocorgánaigh iad araon, agus ina sainaithníodh sonraí breise ba ghá chun an measúnú a thabhairt chun críche.

(5)

Dá réir sin, chuir an Coimisiún tús le hathbhreithniú ar an bhformheas ar an tsubstaint ghníomhach atá ann cheana i gcomhréir le hAirteagal 21 de Rialachán (CE) Uimh. 1107/2009. Iarradh ar an iarratasóir faisnéis bhreise a chur isteach faoi dheireadh mhí an Mheithimh 2025, faisnéis atá riachtanach chun a mheas an gcomhlíonann aicibeansólar-S-meitil na critéir formheasa a leagtar síos i bpointe 3.6.5 d’Iarscríbhinn II a ghabhann leis an Rialachán sin go fóill.

(6)

An 8 Meán Fómhair 2023, chuir an t-iarratasóir an Coimisiún ar an eolas faoi theacht chun críche staidéir bhreise maidir le hairíonna suaiteora inchrínigh aicibeansólar-S-meitile agus gur chinn sé an tsubstaint sin a fhéin-aicmiú mar thocsaineach don atáirgeadh (de chatagóir 1B) (R1B) faoi Rialachán (CE) Uimh. 1272/2008 ó Pharlaimint na hEorpa agus ón gComhairle (5).

(7)

Dá réir sin, níor suíodh go gcomhlíontar na critéir formheasa dá bhforáiltear in Airteagal 4 de Rialachán (CE) Uimh. 1107/2009. Dá réir sin, measann an Coimisiún nach gcomhlíonann aicibeansólar-S-meitil na critéir formheasa a leagtar síos i bpointe 3.6.5 d’Iarscríbhinn II a ghabhann leis an Rialachán sin.

(8)

Dá bhrí sin, is iomchuí formheas aicibeansólar-S-meitile a tharraingt siar.

(9)

Dá bhrí sin, ba cheart Rialachán Cur Chun Feidhme (AE) Uimh. 540/2011 ón gCoimisiún (6) a leasú dá réir agus ba cheart Rialachán Cur Chun Feidhme (AE) Uimh. 2016/389 a aisghairm.

(10)

Ba cheart am leordhóthanach a thabhairt do na Ballstáit údaruithe le haghaidh táirgí cosanta plandaí ina bhfuil aicibeansólar-S-meitil a tharraingt siar.

(11)

Maidir le táirgí cosanta plandaí ina bhfuil aicibeansólar-S-meitil, i gcás ina ndeonóidh na Ballstáit aon tréimhse chairde i gcomhréir le hAirteagal 46 de Rialachán (CE) Uimh. 1107/2009, ba cheart an tréimhse sin a bheith chomh gearr agus is féidir agus gan bheith níos faide ná 12 mí ó dháta theacht i bhfeidhm an Rialacháin seo.

(12)

Leis an Rialachán seo, ní chuirtear cosc ar iarratas nua a chur isteach maidir leis an tsubstaint ghníomhach aicibeansólar-S-meitil a fhormheas de bhun Airteagal 7 de Rialachán (CE) Uimh. 1107/2009.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,