(1)

Sna conclúidí uaithi an 22 Márta 2024, chuir an Chomhairle Eorpach in iúl, i bhfianaise phráinn na staide, go bhfuil rún daingean ag an Aontas Eorpach leanúint den tacaíocht pholaitiúil, airgeadais, eacnamaíoch, dhaonnúil, mhíleata agus thaidhleoireachta uile is gá a sholáthar don Úcráin agus dá muintir, agus í sin a fhad is gá agus ar an leibhéal is déine is gá.

(2)

An 21 Bealtaine 2024, ghlac an Chomhairle Cinneadh (CBES) 2024/1470 (1) , lenar leasaíodh Cinneadh 2014/512/CBES (2) chun foráil a dhéanamh maidir leis na taisclanna lárnacha urrús de réir bhrí Rialachán (AE) Uimh. 909/2014 ó Pharlaimint na hEorpa agus ón gComhairle (3) (‘taisclanna lárnacha urrús’) a shealbhaíonn sócmhainní agus cúlchistí ar mó a luach iomlán ná EUR 1 mhilliún, tá siad le ranníocaíocht airgeadais a dhéanamh óna nglanbhrabúis a eascraíonn as blocáil sócmhainní de chuid na Rúise, ranníocaíocht atá cothrom le 99,7 % de na glanbhrabúis sin arna gcarnadh ón 15 Feabhra 2024 i leith. Ba cheart na híocaíochtaí a dhéanamh i dtráthchodanna débhliantúla go dtí go scoirfidh an brabús urghnách de bheith ag carnadh ar chláir chomhardaithe na dtaisclann lárnach urrús i ngeall ar scor na mbeart sriantach lena dtoirmisctear idirbhearta le sócmhainní agus cúlchistí Bhanc Ceannais na Rúise. De réir an Chinnidh sin, tá 90 % de mhéideanna na ranníocaíochta airgeadais arna híoc leis an Aontas le húsáid chun tacú leis an Úcráin, tríd an tSaoráid Eorpach Síochána arna bunú le Cinneadh (CBES) 2021/509 ón gComhairle (4) (SES). Ós rud é go bhfuil an leithdháileadh le hathbhreithniú go bliantúil agus den chéad uair roimh an 1 Eanáir 2025, d’fhéadfadh athrú teacht amach anseo ar an gcéatadán den ranníocaíocht airgeadais a leithdháilfear ar an tSaoráid Eorpach Síochána.

(3)

Chun úsáid a bhaint as na sásraí seachadta atá ann cheana, ba cheart na méideanna a leithdháiltear ar an tSaoráid Eorpach Síochána a leithdháileadh ar bhearta cúnaimh chun tacaíocht mhíleata a sholáthar d’Fhórsaí Armtha na hÚcráine sa bhreis ar na ranníocaíochtaí deonacha dá dtagraítear in Airteagal 30 de Chinneadh (CBES) 2021/509. Ba cheart na méideanna sin a bheith sa bhreis ar na méideanna tagartha arna gcomhaontú le haghaidh na mbeart cúnaimh faoi seach. Is iomchuí foráil a dhéanamh maidir le rialacha sonracha don fhoinse nua chistiúcháin sin, ar cheart di rialacha na Saoráide Eorpaí Síochána atá ann cheana a chomhlánú. Go háirithe, ní gá don Choiste Polaitiúil agus Slándála glacadh leis an ranníocaíocht bhreise ná ní gá do Choiste na Saoráide Eorpaí Síochána í a údarú; ós rud é go bhforáiltear cheana le Cinneadh (CBES) 2024/1470 d’údarú díreach ón gComhairle, níl gá le haon nós imeachta breise den sórt sin maidir le glacadh. Ina theannta sin, ní gá socruithe riaracháin a thabhairt i gcrích le taisclanna lárnacha urrús, ós rud é go mbunaítear na rialacha maidir leis an ranníocaíocht sa Chinneadh seo.

(4)

Tá leithdháileadh na méideanna ar bhearta cúnaimh mar thacaíocht leis an Úcráin gan dochar do cháilíocht shonrach beartais slándála agus cosanta Ballstát áirithe agus do sheasamh na mBallstát a staon ó vótáil agus a rinne dearbhú foirmiúil nó a staonfaidh ó vótáil agus a dhéanfaidh dearbhú foirmiúil i gcomhréir leis an dara fomhír d’Airteagal 31(1) den Chonradh ar an Aontas Eorpach (CAE) maidir le beart cúnaimh faoin tSaoráid Eorpach Síochána. Dá bhrí sin, níl oibleagáid ar na Ballstáit sin fós na cinntí maidir le bearta cúnaimh na Saoráide Eorpaí Síochána a chur i bhfeidhm i gcás inar staon siad agus ina ndearna siad dearbhú foirmiúil. Níl feidhm ag an dara habairt d’Airteagal 5(3) i gCinneadh (CBES) 2021/509.

(5)

Is iomchuí a fhoráil nár cheart do na ranníocaíochtaí náisiúnta leis an tSaoráid Eorpach Síochána na costais riaracháin a bhaineann le bainistiú na méideanna sin a sheasamh, ach go bhfuil siad le cumhdach ó na méideanna sin. Tá tacaíocht mhíleata faoin tSaoráid Eorpach Síochána le cur ar fáil i gcomhréir leis an gcreat rialála ábhartha, lena n-áirítear rialacha cur chun feidhme na Saoráide Eorpaí Síochána. Thairis sin, tráth a bheidh aon tacaíocht mhíleata á soláthar faoin tSaoráid Eorpach Síochána, tabharfar lánurraim do bheartas slándála agus cosanta Ballstát áirithe, áiritheofar trédhearcacht agus inrianaitheacht na tacaíochta arna maoiniú ag an tSaoráid Eorpach Síochána, agus cuirfear leasanna slándála agus cosanta gach Ballstáit san áireamh. Thairis sin, i gcomhréir le hAirteagal 73(10) de Chinneadh (CBES) 2021/509, i gcásanna inar staon Ballstát ó vótáil agus ina ndearna sé dearbhú foirmiúil i gcomhréir leis an dara fomhír d’Airteagal 31(1) CAE maidir le beart cúnaimh atá le maoiniú leis an méid tiomnaithe a leagtar amach sa chéad fhomhír d’Airteagal 73(10) de Chinneadh (CBES) 2021/509, ní rannchuideoidh an Ballstát sin le costais an bhirt cúnaimh sin agus, i gcomhréir le hAirteagal 16(4) de Chinneadh (CBES) 2021/509, ní Ballstát is rannchuiditheoir é i dtaobh dliteanas neamhchonarthach an Aontais a eascraíonn as cur chun feidhme birt cúnaimh arna ghlacadh faoi Chinneadh (CBES) 2021/509 a chumhdach. Tá feidhm ag an méid sin freisin maidir le Ballstát a staon ón vótáil agus a rinne dearbhú foirmiúil i gcomhréir leis an dara fomhír d’Airteagal 31(1) CAE i ndáil le beart cúnaimh dá bhforáiltear i gCinneadh (CBES) 2022/338 ón gComhairle (5).

(6)

I bhfianaise riachtanais athraitheacha Fhórsaí Armtha na hÚcráine agus chun breisluach an Aontais a uasmhéadú, ba cheart don Choiste um an tSaoráid arna bhunú le Cinneadh (CBES) 2021/509 leithdháileadh na méideanna a fhaightear idir bearta cúnaimh a agus a athbhreithniú go tréimhsiúil i gcomhréir le treoshuíomh straitéiseach tiomnaithe arna sholáthar ag an gCoiste Polaitiúil agus Slándála de bhun Airteagal 9(2) de Chinneadh (CBES) 2021/509. Ba cheart feidhm a bheith ag na rialacha a leagtar síos in Airteagal 5(5), chomh maith le hAirteagal 11(8) agus (14) de Chinneadh (CBES) 2021/509,