(1)

Le hAirteagal 17(1) de Rialachán (AE) Uimh. 978/2012, tír a shainaithníonn na Náisiúin Aontaithe (‘NA’) mar cheann de na tíortha is lú forbairt, foráiltear gur cheart í a thairbhiú de na fabhair tharaife faoin socrú speisialta le haghaidh na dtíortha is lú forbairt, ‘Gach Ní Seachas Airm’ (‘EBA’).

(2)

Leagtar amach liosta na dtíortha is tairbhithe den socrú speisialta do na tíortha is lú forbairt dá dtagraítear in Airteagal 1(2), pointe (c) de Rialachán (AE) Uimh. 978/2012 in Iarscríbhinn IV a ghabhann leis an Rialachán. Le hAirteagal 17(2) de Rialachán (AE) Uimh. 978/2012, leagtar amach go bhfuil athbhreithniú leanúnach le déanamh ar Iarscríbhinn IV chun athruithe a bhaineann leis na coinníollacha a leagtar síos in Airteagal 17(1) a léiriú. Thairis sin, le hAirteagal 17(2) de Rialachán (AE) Uimh. 978/2012 leagtar amach idirthréimhse 3 bliana chun tír a bhaint ó liosta na dtíortha is tairbhithe den scéim EBA.

(3)

Thug na Náisiúin Aontaithe ardú céime amach as catagóir na dtíortha is lú forbartha don Bhútáin an 13 Nollaig 2023. Dá bhrí sin, níl an Bhútáin cáilithe a thuilleadh le haghaidh stádas an tairbhí de EBA faoi Airteagal 17(1) de Rialachán (AE) Uimh. 978/2012, agus ba cheart í a bhaint d’Iarscríbhinn IV a ghabhann leis an Rialachán sin. I gcomhréir le hAirteagal 17(2) de Rialachán (AE) Uimh. 978/2012, baint na Bútáine de liosta na dtíortha is tairbhithe de EBA, ba cheart feidhm a bheith aici tar éis idirthréimhse 3 bliana ón dáta a thiocfaidh an gníomh tarmligthe ón gCoimisiún lena leasaítear Iarscríbhinn IV de Rialachán (AE) Uimh. 978/2012 i bhfeidhm. Ba cheart, dá bhrí sin, an Bhútáin a bhaint d’Iarscríbhinn IV agus feidhm a bheith ag an méid sin ón 1 Eanáir 2028.

(4)

Dá bhrí sin, ba cheart Iarscríbhinn IV a ghabhann le Rialachán (AE) Uimh. 978/2012 a leasú dá réir,