(1)

Agus limistéar saoirse, slándála agus ceartais á chomhdhéanamh aige, ba cheart don Aontas a áirithiú nach mbeidh rialuithe teorann inmheánaí ann le haghaidh daoine, agus ba cheart dó comhbheartas a chumadh maidir le tearmann agus imirce, agus teorainneacha seachtracha a rialú agus fillteacha, agus gluaiseachtaí neamhúdaraithe idir na Ballstáit a chosc, a bheadh bunaithe ar an dlúthpháirtíocht agus ar chomhroinnt chóir na freagrachta idir na Ballstáit, agus a bheadh cothrom freisin do náisiúnaigh tríú tír agus do dhaoine gan stát agus lánurraim á tabhairt do chearta bunúsacha.

(2)

Tá gá le cur chuige cuimsitheach, a mbeidh sé mar chuspóir aige muinín fhrithpháirteach idir na Ballstáit a threisiú, agus é á aithint go mbíonn éifeachtacht an chur chuige fhoriomláin ag brath ar aghaidh a thabhairt ar ghnéithe uile an scéil ar bhonn comhpháirteach agus iad a chur chun feidhme ar bhealach comhtháite.

(3)

D’fhéadfadh dúshláin imirce a bheith roimh an Aontas agus a Bhallstáit, ar dúshláin iad a d’fhéadfadh a bheith an-éagsúil, go háirithe maidir le scála agus comhdhéanamh na ndaoine a bhíonn ag teacht isteach. Tá sé ríthábhachtach, dá bhrí sin, go mbeadh uirlisí éagsúla ag an Aontas chun freagairt ar gach cineál cáis. Leis an gcur chuige cuimsitheach a leagtar amach i Rialachán (AE) 2024/1351 ó Pharlaimint na hEorpa agus ón gComhairle (4), lena n-áirítear trí chomhpháirtíochtaí le tríú tíortha ábhartha, ba cheart a áirithiú go mbeidh rialacha sonracha ar fáil don Aontas chun an imirce a bhainistiú go héifeachtach, go háirithe maidir leis an sásra dlúthpháirtíochta éigeantach a chur i ngníomh, agus go gcuirfear na bearta uile is gá i bhfeidhm chun géarchéimeanna a chosc. Leagtar amach sa Rialachán seo rialacha atá comhlántach leis an gcur chuige sin agus leis na rialacha a leagtar amach i dTreoir 2001/55/CE ón gComhairle (5) freisin, ar féidir iad a chur i bhfeidhm i gcomhthráth.

(4)

In ainneoin na bearta coisctheacha is gá a chur i bhfeidhm, ní féidir a chur as an áireamh go dtiocfaidh cás géarchéime nó force majeure chun cinn i réimse na himirce agus an tearmainn de thoradh imthosca nach bhfuil neart ag an Aontas nó ag a Bhallstáit orthu. Féadtar a áireamh ar chásanna eisceachtúla den sórt sin an líon ollmhór náisiúnach tríú tír agus daoine gan stát atá ag teacht isteach ar chríoch Bhallstáit amháin nó níos mó, nó cás ina bhfuil ionstraimiú imirceach á dhéanamh ag tríú tír nó ag gníomhaí naimhdeach nach gníomhaí stáit é chun an Ballstát nó an tAontas a dhíchobhsú, nó cás ina bhfuil force majeure ann sa Bhallstát. Sna himthosca sin, d’fhéadfadh sé nach leordhóthanach na bearta agus an tsolúbthacht dá bhforáiltear faoi Rialachán (AE) 2024/1351 agus Rialachán (AE) 2024/1348 ó Pharlaimint na hEorpa agus ón gComhairle (6) chun aghaidh a thabhairt ar chásanna eisceachtúla den sórt sin. Tá na cásanna eisceachtúla sin éagsúil leis na cásanna sin ina bhfuil cás suntasach imirce roimh Bhallstát i ngeall ar éifeacht charnach na n-imirceach atá ag teacht isteach ar a chórais dhea-ullmhaithe tearmainn, ghlactha agus imirce nó i gcás ina bhfuil Ballstát faoi bhrú imirce mar gheall ar an líon ollmhór imirceach atá ag teacht isteach, nach sroicheann an líon daoine atá ag teacht isteach leibhéal ollmhór ach a chruthaíonn ualach díréireach ar chórais dhea-ullmhaithe an Bhallstáit ag an tráth céanna agus lena bhforáiltear do na bearta is infheidhme i leith na gcásanna sin i Rialachán (AE) 2024/1351. Anuas air sin, ní dhéanfar leis an Rialachán seo difear d’fheidhmiú na bhfreagrachtaí atá ar na Ballstáit maidir le riail agus reacht a chaomhnú agus an tslándáil inmheánach a chosaint.

(5)

Leis an Rialachán seo, tá sé beartaithe ullmhacht agus athléimneacht an Aontais a fheabhsú chun cásanna géarchéime a bhainistiú agus comhordú oibríochtúil, tacaíocht acmhainneachta agus infhaighteacht cistiúcháin i gcásanna géarchéime a éascú.

(6)

Áirithítear leis an Rialachán seo cur i bhfeidhm éifeachtach phrionsabal na dlúthpháirtíochta agus na comhroinnte córa freagrachta idir na Ballstáit agus oiriúnú ar na rialacha ábhartha maidir le nós imeachta tearmainn, lena n-áirítear nós imeachta brostaithe a chur i bhfeidhm ionas go mbeidh na huirlisí dlí is gá ag na Ballstáit agus ag an Aontas chun freagairt go tapa do chásanna géarchéime agus force majeure, lena n-áirítear na hamlínte a oiriúnú chun na nósanna imeachta ar fad a dhéanamh.

(7)

Áirithítear leis an Rialachán seo go bhfaighidh na Ballstáit tacaíocht iomlán i gcásanna géarchéime agus force majeure, lena n-áirítear tríd an sásra dlúthpháirtíochta lena n-áirithítear comhroinnt chóir na freagrachta agus cothromaíocht iarrachtaí idir na Ballstáit i gcásanna géarchéime.

(8)

Leis an Rialachán seo, urramaítear cearta bunúsacha náisiúnach tríú tír agus daoine gan stát agus cloítear leis na prionsabail a shainaithnítear i gCairt um Chearta Bunúsacha an Aontais Eorpaigh (‘an Chairt’), go háirithe urraim agus cosaint ar dhínit an duine, toirmeasc ar chéasadh agus ar íde atá mídhaonna nó táireach nó ar phionós atá mídhaonna nó táireach, meas ar an saol príobháideach agus ar shaol an teaghlaigh, prionsabal phríomhleas an linbh, an ceart chun tearmainn agus cosanta i gcás aistrithe, díbeartha nó eiseachadta, chomh maith le Coinbhinsiún na Ginéive i dtaobh Stádas Dídeanaithe an 28 Iúil 1951, arna fhorlíonadh le Prótacal Nua-Eabhrac an 31 Eanáir 1967 (‘Coinbhinsiún na Ginéive’). Ba cheart an Rialachán seo a chur chun feidhme i gcomhréir leis an gCairt agus le prionsabail ghinearálta dhlí an Aontais agus leis an dlí idirnáisiúnta. D’fhonn léiriú a thabhairt ar an tús áite nach mór a thabhairt do phríomhleas an linbh, i gcomhréir le Coinbhinsiún na Náisiún Aontaithe um Chearta an Linbh 1989, agus ar an ngá atá ann saol an teaghlaigh a urramú, chomh maith le cosaint shláinte na ndaoine lena mbaineann a áirithiú, ba cheart coimircí a chur i bhfeidhm i ndáil le mionaoisigh agus a mbaill teaghlaigh, agus le hiarratasóirí ar chosaint idirnáisiúnta (‘iarratasóirí’) a dteastaíonn tacaíocht shonrach agus leordhóthanach uathu mar gheall ar a sláinte. Ba cheart do na rialacha agus na ráthaíochtaí a leagtar amach i Rialachán (AE) 2024/1348 leanúint d’fheidhm a bheith acu maidir le daoine atá faoi réir na maoluithe dá bhforáiltear sa Rialachán seo, ach amháin i gcás ina bhforáiltear a mhalairt leis an Rialachán seo. Na rialacha a leagtar amach i dTreoir (AE) 2024/1346 ó Pharlaimint na hEorpa agus ón gComhairle (7), lena n-áirítear iad siúd a bhaineann le hiarratasóirí a choimeád faoi choinneáil, ba cheart dóibh leanúint d’fheidhm a bheith acu, ón tráth a dhéantar iarratas ar chosaint idirnáisiúnta.

(9)

Ní dhéantar leis an Rialachán seo foráil do mhaoluithe ar na rialacha agus ráthaíochtaí, lena n-áirítear iad sin a bhaineann le dálaí glactha ábhartha, faoi Threoir (AE) 2024/1346. Ba cheart do Bhallstát atá i gcás géarchéime foráil a dhéanamh d’acmhainní daonna agus ábhartha breise agus leordhóthanacha chun go mbeidh sé in ann a oibleagáidí a chomhlíonadh faoin Treoir sin.

(10)

Ba cheart do na rialacha agus ráthaíochtaí a leagtar amach i Rialacháin (AE) 2024/1356 (8), (AE) 2024/1358 (9), agus (AE) 2024/1347 (10) ó Pharlaimint na hEorpa agus ón gComhairle agus i dTreoir (AE) 2024/XXX ó Pharlaimint na hEorpa agus ón gComhairle (11) leanúint d’fheidhm a bheith acu gan beann ar mhaoluithe arna gcur i bhfeidhm faoin Rialachán seo. Níor cheart do na Ballstáit na bearta dá bhforáiltear sa Rialachán seo a chur i bhfeidhm ach amháin i gcomhréir leis na coinníollacha a bhfuil na bearta sin faoina réir, dá bhforáiltear sa chinneadh cur chun feidhme ábhartha ón gComhairle arna ghlacadh de bhun an Rialacháin seo agus nuair is fíorghá agus comhréireach é.

(11)

Ba cheart glacadh beart faoin Rialachán seo i ndáil le Ballstát ar leith a bheith gan dochar don fhéidearthacht Airteagal 78(3) den Chonradh ar Fheidhmiú an Aontais Eorpaigh (CFAE) a chur i bhfeidhm.

(12)

D’fhéadfadh teacht isteach líon ollmhór náisiúnach tríú tír agus daoine gan stát a bheith ina chúis le cás nach féidir le Ballstát iarratais ar chosaint idirnáisiúnta náisiúnach tríú tír agus daoine gan stát a phróiseáil i gcomhréir leis na rialacha a leagtar amach i Rialachán (AE) 2024/1351 agus Rialachán (AE) 2024/1348 agus a bhfuil iarmhairtí ag cás den sórt sin d’fheidhmiú an chórais tearmainn agus imirce, ní hamháin sa Bhallstát sin ach san Aontas ina iomláine. Dá bhrí sin, is gá rialacha agus sásraí sonracha a leagan síos lena bhféadfar gníomhaíocht éifeachtach a dhéanamh chun aghaidh a thabhairt ar na cásanna sin.

(13)

Ba cheart acmhainní daonna agus airgeadais leordhóthanacha agus bonneagar leordhóthanach a bheith ag na Ballstáit chun beartais bainistithe tearmainn agus imirce a chur chun feidhme go héifeachtach. Ba cheart do na Ballstáit comhordú iomchuí a áirithiú idir na húdaráis náisiúnta ábhartha agus in éineacht le húdaráis náisiúnta na mBallstát eile chomh maith chun a áirithiú go bhfuil a gcórais tearmainn, a gcórais ghlactha, lena n-áirítear seirbhísí cosanta leanaí, nó a gcórais fillte dea-ullmhaithe, lena n-áirítear ullmhacht agus pleanáil theagmhasach, agus go bhfuil acmhainneacht leordhóthanach ag gach comhpháirt.

(14)

D’fhéadfadh cás ina bhfuil ionstraimiú á dhéanamh a bheith ann i gcás ina spreagann nó ina n-éascaíonn tríú tír nó gníomhaí naimhdeach nach gníomhaí stáit é gluaiseacht náisiúnach tríú tír agus daoine gan stát chuig teorainneacha seachtracha an Aontais nó chuig Ballstát, i gcás ina léireodh na gníomhaíochtaí sin rún tríú tír nó gníomhaí naimhdigh nach gníomhaí stáit é an tAontas nó Ballstát a dhíchobhsú, agus i gcás inar dócha go gcuirfeadh gníomhaíochtaí den sórt sin feidhmeanna bunriachtanacha Ballstáit i mbaol, lena n-áirítear riail agus reacht a chaomhnú, nó a shlándáil náisiúnta a chosaint.

(15)

Sna cásanna ina mbíonn gníomhaithe nach gníomhaithe stáit iad ag gabháil do choireacht eagraithe, go háirithe ag gabháil don smuigleáil, níor cheart a mheas gur ionstraimiú imirceach é sin nuair nach aidhm di an tAontas nó Ballstát a dhíchobhsú.

(16)

Níor cheart cabhair dhaonnúil a mheas mar ionstraimiú imirceach nuair nach aidhm di an tAontas nó Ballstát a dhíchobhsú.

(17)

Gan dochar do na bearta is infheidhme faoi réimsí beartais agus ionstraimí dlí eile, chun freagairt láithreach iomchuí ar bhagairtí hibrideacha a áirithiú i gcomhréir le dlí an Aontais agus le hoibleagáidí idirnáisiúnta, dírítear sa Rialachán seo ar na bearta sonracha is infheidhme i réimse na himirce arb é is aidhm dóibh aghaidh a thabhairt ar chásanna ina bhfuil ionstraimiú á dhéanamh.

(18)

I gcás ina bhfuil ionstraimiú á dhéanamh, d’fhéadfadh náisiúnaigh tríú tír agus daoine gan stát iarratas a dhéanamh ar chosaint idirnáisiúnta ag an teorainn sheachtrach nó i limistéar idirthurais Ballstáit, ós minic is daoine iad a ghabhtar i dtaca le trasnú neamhúdaraithe na teorann seachtraí, ar tír, ar muir nó san aer, nó is daoine iad a chuirtear i dtír tar éis oibríochtaí cuardaigh agus tarrthála. Is féidir é sin a bheith ina chúis, go háirithe, leis an méadú suntasach gan choinne ar líon na n-iarratas ar chosaint idirnáisiúnta ag na teorainneacha seachtracha. I ndáil leis sin, is gá fíor-rochtain éifeachtach ar an nós imeachta um chosaint idirnáisiúnta a áirithiú i gcomhréir le hAirteagal 18 den Chairt agus le Coinbhinsiún na Ginéive.

(19)

I dtaca leis an gCipir, le Rialachán (CE) Uimh. 866/2004 ón gComhairle (12), foráiltear do rialacha sonracha a bhfuil feidhm acu maidir leis an líne idir limistéir Phoblacht na Cipire ina bhfeidhmíonn Rialtas Phoblacht na Cipire an rialú éifeachtach agus na limistéir sin nach bhfeidhmíonn sé an rialú éifeachtach iontu. Cé nach teorainn sheachtrach í an líne sin, fágann sí gur cheart a mheas, i gcás ina spreagann nó ina n-éascaíonn tríú tír nó gníomhaí naimhdeach nach gníomhaí stáit é gluaiseacht náisiúnach tríú tír nó daoine gan stát leis an líne sin a thrasnú, gurb ionann sin agus ionstraimiú, más ann do gach gné eile ionstraimiú.

(20)

Féadann imthosca neamhghnácha neamh-intuartha a bheith roimh an mBallstát freisin nach bhfuil neart aige orthu, imthosca nárbh fhéidir a n-iarmhairtí a sheachaint d’ainneoin go ndearnadh gach cúram cuí. D’fhéadfadh cásanna force majeure den sórt sin cosc a chur ar an mBallstát a chuid oibleagáidí faoi dhlí an Aontais a chomhlíonadh agus d’fhéadfadh iarmhairtí a bheith acu ní hamháin sa Bhallstát sin ach san Aontas ina iomláine. Samplaí de chás force majeure is ea, i measc nithe eile, paindéimí agus tubaistí nádúrtha.

(21)

I gcás ina measfaidh Ballstát gur ann do chás géarchéime nó force majeure ar a chríoch féin, ba cheart an Ballstát sin a bheith in ann údarú a iarraidh chun na maoluithe agus na bearta dlúthpháirtíochta dá bhforáiltear sa Rialachán seo a chur i bhfeidhm. Ba cheart a áireamh san iarraidh sin tuairisc ar an gcás agus ba cheart na bearta a iarrann Ballstát chun aghaidh a thabhairt ar an gcás sonrach a shonrú. Ba cheart don Bhallstát a sholáthar freisin na cúiseanna a n-éilítear leis an gcás dul i muinín na mbeart sin agus, i gcás inarb ábhartha, na bearta a rinneadh go dtí sin chun aghaidh a thabhairt ar an gcás a léiriú.

(22)

Níor cheart úsáid na mbeart a áirítear i mBuanbhosca Uirlisí Tacaíochta an Aontais Eorpaigh don Imirce arna bhunú le hAirteagal 6(3) de Rialachán (AE) 2024/1351 (‘an Bosca Uirlisí’) a bheith ina réamhchoinníoll chun tairbhe a bhaint as na bearta dlúthpháirtíochta faoin Rialachán seo.

(23)

I gcás géarchéime, ba cheart an fhéidearthacht a bheith ag an mBallstát a bhfuil an cás sin roimhe na bearta dlúthpháirtíochta agus tacaíochta is oiriúnaí dá riachtanais a iarraidh ar Bhallstáit eile chun an cás sin a bhainistiú, bearta lena n-éilítear dlúthpháirtíocht fheabhsaithe i gcomparáid leis an dlúthpháirtíocht dá bhforáiltear i Rialachán (AE) 2024/1351, chun freagracht an Bhallstáit as déileáil le cás géarchéime a mhaolú. D’fhéadfadh athshocruithe, ranníocaíochtaí airgeadais, bearta malartacha dlúthpháirtíochta nó meascán den mhéid thuas a bheith i gceist leis na bearta feabhsaithe dlúthpháirtíochta agus tacaíochta.

(24)

I gcás géarchéime nó force majeure, ba cheart an fhéidearthacht a bheith ag an mBallstát a bhfuil an cás sin roimhe údarú a iarraidh chun maoluithe a chur i bhfeidhm ar na rialacha ábhartha maidir leis an nós imeachta tearmainn, lena n-áirítear an nós imeachta teorann um thearmann. I gcás inarb ábhartha, ba cheart a áireamh in iarrataí den sórt sin rogha an Bhallstáit lena mbaineann a mhéid a bhaineann leis an nós imeachta teorann a eisiamh nó a scor i gcás catagóirí sonracha iarratasóirí. In éineacht le hiarraidh den sórt sin, ba cheart an Ballstát lena mbaineann a bheith in ann fógra a thabhairt don Choimisiún faoin rún atá aige an maolú ar an sprioc-am clárúcháin a chur i bhfeidhm, sula n-údaraítear é déanamh amhlaidh i gcinneadh cur chun feidhme ón gComhairle, chomh maith leis na cúiseanna beachta a bhfuil gá le gníomhaíocht láithreach ina leith. Níor cheart don iarraidh ar an maolú sin a bheith níos faide ná 10 lá ón lá tar éis na hiarrata mura rud é go n-údaraítear sin sa chinneadh cur chun feidhme ón gComhairle. Ba cheart don Choimisiún agus don Chomhairle, agus a bhfreagrachtaí faoi seach faoin nós imeachta um údarú á gcomhlíonadh acu, dul ar aghaidh go gasta chun an bhearna ama a theorannú idir deireadh na tréimhse sin agus glacadh an chinnidh cur chun feidhme chomhfhreagraigh ón gComhairle.

(25)

Ós rud é go bhféadfadh roinnt de na cásanna ar a dtugtar tuairisc sa Rialachán seo a bheith roimh Bhallstát an tráth céanna, tá an Ballstát sin in ann na bearta éagsúla faoin Rialachán seo a iarraidh agus a bheith údaraithe na bearta sin a chur i bhfeidhm nó tairbhe a bhaint astu i gcomhthráth, ar ina mbearta comhlántacha a cheaptar iad.

(26)

Chun gur féidir cás géarchéime a bhainistiú go cuí, lena n-áirítear ionstraimiú, nó force majeure, agus chun intuarthacht agus oiriúnú iomchuí a áirithiú ar na rialacha ábhartha maidir leis an nós imeachta tearmainn i ndáil leis na cásanna sin, lena n-áirítear an nós imeachta teorann um thearmann, ba cheart an chumhacht a thabhairt don Choimisiún measúnú a dhéanamh ar an gcás, ach iarraidh réasúnaithe a fháil ón mBallstát lena mbaineann, agus a chinneadh, trí bhíthin cinneadh cur chun feidhme, cibé acu atá nó nach bhfuil cás géarchéime, lena n-áirítear ionstraimiú, nó force majeure roimh an mBallstát iarrthach.

(27)

I gcás géarchéime, ba cheart do na bearta dlúthpháirtíochta chun aghaidh a thabhairt ar an gcás sin dul thar na cinn dá bhforáiltear i Rialachán (AE) 2024/1351. Chuige sin, nuair a bheidh measúnú á dhéanamh aige ar an gcás, ba cheart don Choimisiún na táscairí cainníochtúla agus cáilíochtúla dá bhforáiltear in Airteagal 9 den Rialachán sin agus faisnéis a bhfuil bunús léi arna soláthar ag an mBallstát iarrthach agus faisnéis a bhailítear de bhun Rialachán (AE) 2021/2303 ó Pharlaimint na hEorpa agus ón gComhairle (13) agus de bhun Rialachán (AE) 2019/1896 ó Pharlaimint na hEorpa agus ón gComhairle (14) agus an Tuarascáil Bhliantúil Eorpach ar Thearmann agus Imirce dá dtagraítear i Rialachán (AE) 2024/1351 a chur san áireamh. I gcásanna ina bhfuil ionstraimiú á dhéanamh, ba cheart don Choimisiún na cúiseanna nach leordhóthanach an Bosca Uirlisí chun aghaidh a thabhairt ar an gcás. Ba cheart don Choimisiún faisnéis leordhóthanach a bhailiú chun a mheas i gceart an bhfuil cás géarchéime, lena n-áirítear ionstraimiú, nó force majeure, roimh an mBallstát iarrthach agus ba cheart dó é sin a dhéanamh i gcomhairle leis na Gníomhaireachtaí ábhartha, go háirithe Gníomhaireacht an Aontais Eorpaigh um Thearmann (‘An Ghníomhaireacht um Thearmann’), an Ghníomhaireacht Eorpach um an nGarda Teorann agus Cósta agus Gníomhaireacht an Aontais Eorpaigh um Chearta Bunúsacha, chomh maith le heagraíochtaí idirnáisiúnta, go háirithe Ard-Choimisinéir na Náisiún Aontaithe le haghaidh Dídeanaithe (UNHCR) agus an Eagraíocht Idirnáisiúnta um Imirce (IOM), agus eagraíochtaí ábhartha eile.

(28)

Chun ardleibhéal grinnscrúdaithe pholaitiúil agus tacaíochta polaitiúla a áirithiú agus chun dlúthpháirtíocht an Aontais a léiriú, is ábhartha a mheas ar aithin an Chomhairle Eorpach go bhfuil cás ina bhfuil ionstraimiú imirceach á dhéanamh roimh an Aontas nó roimh cheann amháin dá Bhallstáit nó níos mó. Agus ionstraimiú imirceach á dhéanamh, d’fhéadfadh sé go gcuirfí i mbaol feidhmeanna bunriachtanacha Ballstáit, lena n-áirítear riail agus reacht a chaomhnú nó a shlándáil náisiúnta a chosaint.

(29)

Chun foráil a dhéanamh maidir le freagairt iomchuí atá riachtanach agus comhréireach chun aghaidh a thabhairt ar an gcás, ba cheart a shainaithint sa togra ón gCoimisiún, i gcás inarb ábhartha, na maoluithe sonracha ar cheart údarú a thabhairt do na Ballstáit iad a chur i bhfeidhm. I gcás ina bhfuil ionstraimiú á dhéanamh, ba cheart na daoine atá á n-ionstraimiú a bhféadfaí na maoluithe ábhartha a chur i bhfeidhm orthu a shainaithint go soiléir. I gcás géarchéime, i gcás inarb iomchuí agus tar éis dul i gcomhairle leis an mBallstát a bhfuil an cás géarchéime roimhe, ba cheart don Choimisiún a áireamh ina thogra dréachtphlean Freagartha Dlúthpháirtíochta, ina léirítear na bearta dlúthpháirtíochta ábhartha agus leibhéal na mbeart sin a theastaíonn don chás sonrach a léiriú, lena n-áirítear líon iomlán na n-athshocruithe, ranníocaíochtaí airgeadais nó bearta malartacha dlúthpháirtíochta agus leibhéal na mbeart sin, lena n-aithnítear go bhfuil an luach céanna ag baint leis na cineálacha éagsúla dlúthpháirtíochta, agus lánrogha iomlán na mBallstát chun na bearta dlúthpháirtíochta sin a roghnú á hurramú.

(30)

Cé go bhfuil fritháirimh athshocrúcháin nó freagrachta, i gcás brú imirce, le 60 % de na riachtanais athshocrúcháin faoi Rialachán (AE) 2024/1351 a chumhdach, tá sé tábhachtach, i gcás géarchéime, aghaidh a thabhairt ar riachtanais dlúthpháirtíochta uile an Bhallstáit lena mbaineann. Ar an gcúis sin, má bhunaítear Plean Freagartha Dlúthpháirtíochta le cinneadh cur chun feidhme ón gComhairle, ba cheart tús áite a thabhairt don Bhallstát a bhfuil an cás géarchéime roimhe leas a bhaint as na gealltanais dlúthpháirtíochta neamh-leithdháilte nó astu siúd nár cuireadh chun feidhme go fóill agus atá ar fáil sa Chomhthiomsú Dlúthpháirtíochta Bliantúil a bunaíodh i gcomhréir le hAirteagal 57 de Rialachán (AE) 2024/1351. Mura féidir é sin a dhéanamh, nó mura leordhóthanach na gealltanais sa Chomhthiomsú Dlúthpháirtíochta Bliantúil chun na riachtanais shainaitheanta a chumhdach, ba cheart don Bhallstát a bhfuil an cás géarchéime roimhe a bheith in ann leas a bhaint freisin as na rannchuidithe atá sa chinneadh cur chun feidhme ón gComhairle, lena n-aithnítear go bhfuil luach comhionann leis na cineálacha éagsúla dlúthpháirtíochta. D’fhonn aghaidh a thabhairt ar riachtanais uile an Bhallstáit lena mbaineann, mura leordhóthanach teaglaim na ngealltanas maidir le hathshocrú atá ar fáil sa Chomhthiomsú Dlúthpháirtíochta Bliantúil agus sa chinneadh cur chun feidhme ón gComhairle, ba cheart fritháirimh freagrachta a bheith éigeantach chun na riachtanais a leagtar amach sa Phlean Freagartha Dlúthpháirtíochta a chumhdach. Chun go dtarlóidh sé sin, is gá daoine a bheith i láthair ar chríoch an Bhallstáit is rannchuiditheoir a bhfuil feidhm ag na fritháirimh maidir leis.

(31)

I gcásanna géarchéime nó force majeure, d’fhéadfadh sé go gcuirfí feidhmeanna bunriachtanacha Ballstáit i mbaol freisin. Chun an mhuinín fhrithpháirteach idir na Ballstáit a neartú agus chun comhordú ar leibhéal an Aontais a fheabhsú, ba cheart cumhachtaí cur chun feidhme a thabhairt don Chomhairle chun cinneadh cur chun feidhme a ghlacadh lena n-údaraítear do Bhallstát na maoluithe agus na bearta dlúthpháirtíochta dá bhforáiltear leis an Rialachán seo a chur i bhfeidhm i gcás ina gcomhlíontar na coinníollacha a leagtar síos. Ba cheart 3 mhí a bheith sa tréimhse ama chun na bearta a údaraítear leis an gcinneadh cur chun feidhme tosaigh a chur i bhfeidhm. Ba cheart a bheith in ann síneadh 3 mhí a chur leis an tréimhse sin tar éis don Choimisiún a dheimhniú gur ann fós don chás géarchéime nó force majeure. Ba cheart an chumhacht a bheith ag an gComhairle síneadh breise a chur leis an údarú chun na maoluithe agus na bearta dlúthpháirtíochta a chur i bhfeidhm, suas le 3 mhí, ar bhonn togra ón gCoimisiún, más rud é gur ann fós do na himthosca a thugann údar le síneadh a chur leis na maoluithe agus na bearta dlúthpháirtíochta. Ba cheart a bheith in ann síneadh 3 mhí eile a chur leis an tréimhse sin tar éis deimhniú a fháil ón gCoimisiún gur ann fós don chás. Ba cheart an chumhacht a bheith ag an gComhairle cur i bhfeidhm na mbeart a aisghairm ar bhonn togra ón gCoimisiún i gcás ina dtiocfaidh deireadh leis na himthosca a thug údar le cur i bhfeidhm na maoluithe agus na mbeart dlúthpháirtíochta. Ba cheart a bheith in ann an cinneadh lena leathnaítear an t-údarú a dhéanamh chun leasú a dhéanamh ar na maoluithe a cuireadh i bhfeidhm. Agus a gcumhachtaí á bhfeidhmiú acu agus a bhfreagrachtaí á gcomhlíonadh acu, ba cheart don Choimisiún agus don Chomhairle a áirithiú i gcónaí go n-urramófar prionsabail na comhréireachta agus an riachtanais.

(32)

Ba cheart a shonrú sa chinneadh cur chun feidhme ón gComhairle, i gcás inarb iomchuí, na maoluithe sonracha a údaraítear don Bhallstát a bhfuil cás géarchéime nó force majeure roimhe a chur i bhfeidhm, ag brath ar chineál gach maolaithe, agus an dáta a shocrú óna bhféadfaí iad a chur i bhfeidhm. Thairis sin, ba cheart a shonrú sa chinneadh na forais ar a bhfuil sé bunaithe agus raon feidhme pearsanta na maoluithe.

(33)

Leis an gcinneadh cur chun feidhme ón gComhairle, ba cheart, i gcás inarb iomchuí, Plean Freagartha Dlúthpháirtíochta a bhunú, lena léirítear na bearta sonracha dlúthpháirtíochta agus tacaíochta a cheanglaítear, agus na leibhéil a bhaineann leo, chomh maith leis na gealltanais arna dtabhairt ag na Ballstáit is rannchuiditheoirí. Chuige sin, ba cheart an cleachtadh gealltanais a dhéanamh faoi chuimsiú ghlacadh an chinnidh cur chun feidhme ón gComhairle. Is den tábhacht go n-áiritheofar go mbeidh lánrogha iomlán ag na Ballstáit is rannchuiditheoirí rogha a dhéanamh idir na cineálacha beart dlúthpháirtíochta agus tacaíochta.

(34)

I bhfianaise a thábhachtaí atá sé gan na bearta a leagtar amach sa Rialachán seo a chur i bhfeidhm ach chomh fada agus a mhéid is fíorghá, ba cheart don Choimisiún agus don Chomhairle faireachán agus athbhreithniú leanúnach a dhéanamh ar an gcás a mhéid a bhaineann le riachtanas agus comhréireacht na mbeart sin. Sa chomhthéacs sin, ba cheart don Choimisiún aird ar leith a thabhairt ar chomhlíonadh na gceart bunúsach agus na gcaighdeán daonnúil agus féadann sé a cheadú iarraidh ar an nGníomhaireacht um Thearmann cleachtadh faireacháin ar chóras tearmainn nó glactha an Bhallstáit lena mbaineann a thionscnamh de bhun Airteagal 15(2) de Rialachán (AE) 2021/2303.

(35)

Na rialacha nós imeachta a leagtar amach i Rialachán (AE) 2024/1351 chun athshocrú a dhéanamh, tá feidhm acu chun a áirithiú go gcuirfear na bearta dlúthpháirtíochta chun feidhme go cuí i gcás géarchéime, agus tromchúis agus práinn an cháis á gcur san áireamh.

(36)

Chun cur chun feidhme rianúil an tsásra dlúthpháirtíochta faoin Rialachán seo a áirithiú, ba cheart do Chomhordaitheoir Dlúthpháirtíochta an Aontais Eorpaigh, i dteannta na gcúraimí a leagtar síos i Rialachán (AE) 2024/1351, tacú le gníomhaíochtaí athshocrúcháin agus cultúr ullmhachta, comhair agus athléimneachta a chur chun cinn sna Ballstáit. I gcás géarchéime, ba cheart do Chomhordaitheoir Dlúthpháirtíochta an Aontais, gach coicís, feasachán a sholáthar maidir le staid chur chun feidhme agus fheidhmiú an tsásra um athshocrú. Ba cheart dóthain foirne agus acmhainní a sholáthar d’oifig Chomhordaitheoir Dlúthpháirtíochta an Aontais chun a ról faoin Rialachán seo a chomhlíonadh go héifeachtach. Agus an t-athshocrú á chur chun feidhme, ba cheart tús áite a thabhairt do dhaoine leochaileacha.

(37)

Ba cheart tús áite a thabhairt do dhaoine leochaileacha maidir le hathshocrú, go háirithe i gcás ina bhfuil riachtanais ghlactha speisialta acu de réir bhrí Airteagal 24 de Threoir (AE) 2024/1346, nó i gcás ina bhfuil sainráthaíochtaí nós imeachta de dhíth orthu dá dtagraítear in Airteagal 20 go 23 de Rialachán (AE) 2024/1438. De réir Airteagal 24 de Threoir (AE) 2024/1346, is mó seans go mbeidh riachtanais ghlactha speisialta ag na hiarratasóirí a thagann faoi réim aon cheann de na catagóirí seo a leanas: mionaoisigh, mionaoisigh neamhthionlactha, daoine faoi mhíchumas, daoine scothaosta, mná torracha, daoine leispiacha, aeracha, déghnéasacha, trasinscneacha agus idirghnéasacha, tuismitheoirí aonair le leanaí mionaoiseacha, íospartaigh na gáinneála ar dhaoine, daoine a bhfuil galair thromchúiseacha orthu, daoine ar a bhfuil neamhoird mheabhracha lena n-áirítear neamhord struis iarthrámaigh agus daoine ar a ndearnadh céasadh, éigniú nó foirmeacha tromchúiseacha eile d’fhoréigean síceolaíoch, fisiceach nó gnéasach, amhail íospartaigh d’fhoréigin inscne, de chiorrú ball giniúna ban, de phósadh linbh nó de phósadh éigeantach, nó foréigean a rinneadh ar chúis ghnéasach, inscne, chiníoch nó reiligiúnach.

(38)

I gcodarsnacht leis na rialacha a leagtar amach i Rialachán (AE) 2024/1351, inarb é an cás nach mbeidh sé d’oibleagáid ar na Ballstáit freagracht a ghlacadh as líon sa bhreis ar a gcion cothrom, d’fhéadfadh sé tarlú, i gcás géarchéime, gurbh é an toradh ar chur chun feidhme an phlean Freagartha Dlúthpháirtíochta go nglacfadh Ballstát is rannchuiditheoir amháin nó roinnt Ballstát is rannchuiditheoirí freagracht as scrúdú a dhéanamh ar iarratais ar chosaint idirnáisiúnta sa bhreis ar a gcion cothrom. Sna cásanna sin, ba cheart an Ballstát sin a bheith i dteideal laghdú comhréireach a dhéanamh ar an gcuid atá sa bhreis ar a chion cothrom ó chur chun feidhme gealltanas dlúthpháirtíochta faoi thimthriallta bliantúla Rialachán (AE) 2024/1351 atá le teacht thar thréimhse 5 bliana. D’fhéadfaí laghdú den sórt sin a chur i bhfeidhm freisin i gcinneadh cur chun feidhme ón gComhairle arna ghlacadh de bhun Airteagal 4(3) leis an méid comhfhreagrach iarratas thar an gcion cothrom agus laistigh de 5 bliana ón dáta nach bhfuil an cinneadh cur chun feidhme ón gComhairle a thug ar an mBallstát dul thar a chion cothrom i bhfeidhm a thuilleadh. Ba cheart a bheith in ann na laghduithe faoi na timthriallta bliantúla atá le teacht agus i gcinneadh cur chun feidhme ón gComhairle a chur i bhfeidhm go malartach nó i gcomhthráth, ar choinníoll go gcomhfhreagraíonn siad do líon na n-iarratas lenar rannchuidigh an Ballstát sin sa bhreis ar a chion cothrom agus nach dtéann siad thar an líon sin.

(39)

I gcás ina mbeidh cás géarchéime nó force majeure roimh Bhallstát, d’fhéadfaí gur gá don Bhallstát lena mbaineann acmhainní a atreorú chun bainistiú a dhéanamh ar theacht isteach náisiúnach tríú tír agus daoine gan stát a bhaineann a theorainneacha amach. Mar thoradh air sin, d’fhéadfadh am a bheith ag teastáil ón mBallstát lena mbaineann chun a chuid acmhainní a atheagrú agus chun a acmhainneacht a mhéadú, lena n-áirítear le tacaíocht ó ghníomhaireachtaí ábhartha an Aontais. D’fhéadfadh níos mó ama a bheith ag teastáil ón mBallstát sin freisin chun cinneadh a dhéanamh maidir le hiarratais gan cead a thabhairt dul isteach ar a chríoch lena linn sin. I gcás den sórt sin, ba cheart an Ballstát sin a bheith in ann maolú ar na spriocdhátaí maidir le clárú agus ar an nós imeachta teorann.

(40)

I gcás ina gcuirfidh Ballstát ceann amháin nó níos mó de na bearta dá bhforáiltear sa Rialachán seo i bhfeidhm, ba cheart don Bhallstát na náisiúnaigh tríú tír agus na daoine gan stát a chur ar an eolas, i dteanga a thuigeann siad, nó i dteanga a síltear le réasún go dtuigfidh siad í, faoi na maoluithe arna gcur i bhfeidhm agus faoi fhad na mbeart. Tá sé d’oibleagáid ar na Ballstáit aghaidh a thabhairt ar aon riachtanais ghlactha speisialta agus speisialta nós imeachta atá ag na hiarratasóirí a d’fhéadfadh teacht chun cinn agus faisnéis a sholáthar ar bhealach iomchuí dá réir sin. Ina theannta sin, tá feidhm ag Airteagal 8 de Rialachán (AE) 2024/1348 maidir le faisnéis a sholáthar agus tá feidhm ag Airteagal 36(3) den Rialachán sin maidir le faisnéis i ndáil leis an bhféidearthacht achomharc a dhéanamh i gcoinne an chinnidh maidir leis an iarratas.

(41)

I gcás ina gcuirfear maoluithe ar an nós imeachta tearmainn i bhfeidhm, ba cheart do na húdaráis inniúla tús áite a thabhairt do na coimircí d’iarratasóirí a bhfuil riachtanais speisialta nós imeachta agus ghlactha speisialta acu, lena n-áirítear fadhbanna sláinte. Ar an gcúis sin, an Ballstát a bhfuil cás géarchéime nó force majeure roimhe, níor cheart dó maoluithe ar an nós imeachta tearmainn a chur i bhfeidhm, nó ba cheart dó scor dá gcur i bhfeidhm, i gcásanna ina bhfuil cúiseanna leighis ann gan an nós imeachta teorann a chur i bhfeidhm i gcomhréir le hAirteagal 53(2), pointe (d), de Rialachán (AE) 2024/1348, i gcás nach féidir an tacaíocht is gá a sholáthar d’iarratasóirí a bhfuil riachtanais speisialta nós imeachta acu i gcomhréir le hAirteagal 53(2), pointe (b), den Rialachán sin nó i gcás nach féidir an tacaíocht is gá a sholáthar d’iarratasóirí a bhfuil riachtanais ghlactha speisialta acu i gcomhréir le Treoir (AE) 2024/1346. Ba cheart don Bhallstát lena mbaineann tosaíocht a thabhairt don scrúdú ar iarratais ó dhaoine a bhfuil riachtanais speisialta nós imeachta acu i gcomhréir le Rialachán (AE) 2024/1348 agus a bhfuil riachtanais ghlactha speisialta acu mar a shainmhínítear in Airteagal 2, pointe (14), de Threoir (AE) 2024/1346, go háirithe mionaoisigh agus a mbaill teaghlaigh.

(42)

I gcásanna géarchéime agus force majeure, ba cheart an Ballstát a údarú maolú ar Rialachán (AE) 2024/1348 chun iarratais ar chosaint idirnáisiúnta a chlárú tráth nach déanaí ná 4 seachtaine tar éis iad a dhéanamh. Ba cheart síneadh den sórt sin a bheith gan dochar do chearta na n-iarratasóirí ar thearmann a ráthaítear leis an gCairt, Rialachán (AE) 2024/1348 agus Treoir (AE) 2024/1346. Gan dochar don eisceacht dá bhforáiltear le linn na tréimhse idir an iarraidh a dhéanamh agus an cinneadh cur chun feidhme ón gComhairle a ghlacadh, i gcás géarchéime, arb é is príomhthréith dó líon ollmhór náisiúnach tríú tír agus daoine gan stát a bheith ag teacht isteach, níor cheart an síneadh leis an tréimhse chlárúcháin a chur i bhfeidhm ach amháin le linn na tréimhse ama a leagtar amach sa chinneadh cur chun feidhme tosaigh ón gComhairle.

(43)

I gcás géarchéime nó force majeure, ba cheart don Bhallstát lena mbaineann a bheith in ann síneadh 6 seachtaine a chur le scrúdú na n-iarratas ar chosaint idirnáisiúnta ag an teorainn. Níor cheart an síneadh a úsáid i dteannta na tréimhse dá dtagraítear in Airteagal 51(2), an tríú fomhír, de Rialachán (AE) 2024/1348.

(44)

Agus cás géarchéime nó force majeure roimhe, ba cheart do Bhallstát a bheith in ann bearta a iarraidh as measc roinnt roghanna maidir leis an nós imeachta teorann a chur i bhfeidhm, agus comhdhéanamh na sreabh agus a gcineál éagsúil, ag brath ar an gcás géarchéime beaichte, á gcur san áireamh.

(45)

I gcásanna géarchéime, arb é is príomhthréith dóibh líon ollmhór náisiúnach tríú tír agus daoine gan stát a bheith ag teacht isteach, nó i gcásanna force majeure, d’fhéadfadh sé gur gá cead a thabhairt do Bhallstát gan an nós imeachta teorann a chur i bhfeidhm maidir le daoine a thagann ó thríú tíortha ina bhfuil an meánráta aitheantais faoi bhun 20 % i dtaca leis an Aontas ar fad. Chun maolú den sórt sin a chur i bhfeidhm, ba cheart a mheas sa chinneadh cur chun feidhme ón gComhairle an leordhóthanach na bearta atá i bplean teagmhasach an Bhallstáit lena mbaineann dá dtagraítear in Airteagal 32 de Threoir (AE) 2024/1346 chun aghaidh a thabhairt ar an gcás sin. Ar aon chaoi, tá sé d’oibleagáid ar na Ballstáit an nós imeachta teorann a chur i bhfeidhm sna cásanna dá dtagraítear in Airteagal 42(1), pointí (c) agus (f) de Rialachán (AE) 2024/1348.

(46)

I gcás géarchéime arb é is príomhthréith dó líon ollmhór náisiúnach tríú tír agus daoine gan stát a bheith ag teacht isteach a bhfuil iarratas ar chosaint idirnáisiúnta á dhéanamh acu, d’fhéadfadh sé gur gá cead a thabhairt do Bhallstát an tairseach le haghaidh chur i bhfeidhm éigeantach an nós imeachta teorann dá bhforáiltear in Airteagal 42(1), pointe (j), de Rialachán (AE) 2024/1348 a ísliú. In aon chás, níor cheart don tairseach laghdaithe dul faoi bhun 5 %. Tá sé d’oibleagáid ar na Ballstáit an nós imeachta teorann a chur i bhfeidhm sna cásanna dá dtagraítear in Airteagal 42(1), pointí (c) agus (f) den Rialachán sin.

(47)

I gcás géarchéime arb é is príomhthréith dó líon ollmhór náisiúnach tríú tír agus daoine gan stát a bheith ag teacht isteach a bhfuil iarratas ar chosaint idirnáisiúnta á dhéanamh acu, d’fhéadfadh sé gur gá leathnú a dhéanamh ar raon feidhme chur i bhfeidhm an nós imeachta teorann, arna bhunú le hAirteagal 43 de Rialachán (AE) 2024/1348 agus a cheadú do Bhallstát cinneadh a dhéanamh faoi chuimsiú nós imeachta teorann freisin maidir le fiúntas an iarratais i gcásanna inar náisiúnach an t-iarratasóir nó, i gcás daoine gan stát, inar duine é a raibh gnáthchónaí air i dtríú tír roimhe sin, ar ina leith is 50 % nó níos ísle cion na gcinntí lenar deonaíodh cosaint idirnáisiúnta. Dá thoradh sin, agus an nós imeachta teorann géarchéime á chur i bhfeidhm acu, ba cheart do na Ballstáit leanúint den nós imeachta teorann dá bhforáiltear in Airteagail 43 go 54 den Rialachán sin a chur i bhfeidhm ach d’fhéadfaidís cur i bhfeidhm an nós imeachta teorann a leathnú chun náisiúnaigh tríú tír nó daoine gan stát a chumhdach arb as tríú tír dóibh ina bhfuil an meánráta aitheantais os cionn 20 % ach faoi bhun 50 % i dtaca leis an Aontas ar fad, agus na riachtanais chosanta, a bhíonn ag athrú go tapa, a d’fhéadfadh teacht chun cinn sa tír thionscnaimh á gcur san áireamh mar a léirítear sna nuashonruithe ráithiúla ar shonraí Eurostat. Níor cheart don leathnú sin ar raon feidhme an nós imeachta teorann difear a dhéanamh d’fhorais agus do rialacha eile is infheidhme maidir leis an nós imeachta éigeantach teorann faoin Rialachán sin. I gcás ina n-údaraítear do Bhallstát raon feidhme an nós imeachta teorann a leathnú, níor cheart iarratais a scrúdaítear faoin nós imeachta sin a mheas mar chuid den acmhainneacht leordhóthanach de bhun Airteagal 47 ná níor cheart iad a áireamh chun an uasteorainn bhliantúil a chur i bhfeidhm de bhun Airteagal 50 den Rialachán sin.

(48)

Ba cheart coinneáil iarratasóirí a chur i bhfeidhm i gcomhréir leis an mbunphrionsabal nár cheart duine a bheith faoi choinneáil ar an gcúis amháin go bhfuil cosaint idirnáisiúnta á lorg ag an duine sin, go háirithe i gcomhréir le hoibleagáidí dlíthiúla idirnáisiúnta na mBallstát agus le hAirteagal 31 de Choinbhinsiún na Ginéive. I gcomhréir le Treoir (AE) 2024/1346, níor cheart, de ghnáth, mionaoisigh a chur faoi choinneáil ach iad a chur i gcóiríocht le soláthar speisialta do mhionaoisigh, lena n-áirítear, i gcás inarb iomchuí, i socrúcháin neamhchoinneála, phobalbhunaithe. I bhfianaise an drochthionchair a bhíonn ag an gcoinneáil ar mhionaoisigh, d’fhéadfaí coinneáil den sórt sin a úsáid, i gcomhréir le dlí an Aontais, in imthosca eisceachtúla amháin, i gcás fíorghá, mar rogha dheireanach amháin, don tréimhse ama is giorra agus is féidir, agus ní i gcás ar bith i gcóiríocht phríosúin nó i saoráid eile, chun críocha fhorfheidhmiú an dlí. Níor cheart mionaoisigh a scaradh óna dtuismitheoirí nó óna gcúramóirí agus, mar thoradh ar phrionsabal na haontachta teaghlaigh, ba cheart roghanna malartacha leordhóthanacha ar choinneáil do theaghlaigh le mionaoisigh a úsáid, i gcóiríocht atá oiriúnach dóibh. Thairis sin, is gá gach ní is féidir a dhéanamh chun a áirithiú go mbeidh réimse inmharthana roghanna malartacha leordhóthanacha ar choinneáil do mhionaoisigh ar fáil agus inrochtana.

(49)

I gcás ina bhfuil ionstraimiú á dhéanamh agus chun cosc a chur ar ghníomhaí de chuid tríú tír nó gníomhaí naimhdeach nach gníomhaí stáit é nó í díriú ar náisiúntachtaí sonracha nó ar chatagóirí sonracha náisiúnach tríú tír nó daoine gan stát, ba cheart Ballstát a bheith in ann maolú ar an nós imeachta tearmainn a leagtar amach sa Rialachán seo trí chinneadh a dhéanamh faoi chuimsiú an nós imeachta teorann, mar a leagtar amach in Airteagail 44 go 55 de Rialachán (AE) 2024/1348, maidir le fiúntas na n-iarratas uile. Ba cheart na prionsabail agus na ráthaíochtaí a leagtar amach sa Rialachán sin a urramú. Sa chinneadh cur chun feidhme ón gComhairle lena n-údaraítear don Bhallstát na maoluithe dá dtagraítear a chur i bhfeidhm, ba cheart na náisiúnaigh tríú tír nó na daoine gan stát atá á n-ionstraimiú a shonrú. Agus an maolú sin á chur i bhfeidhm, ba cheart aird ar leith a thabhairt ar chatagóirí áirithe náisiúnach tríú tír agus daoine gan stát atá á n-ionstraimiú, go háirithe mionaoisigh faoi bhun 12 bhliain d’aois agus a mbaill teaghlaigh, agus daoine leochaileacha a bhfuil riachtanais speisialta nós imeachta nó riachtanais ghlactha speisialta acu. Dá bhrí sin, ba cheart na grúpaí sin a eisiamh ón nós imeachta teorann, nó, nuair is conclúid measúnaithe aonair é gur dócha go bhfuil bunús maith lena n-iarratais, ba cheart don nós imeachta sin scor dá chur i bhfeidhm maidir leo a thuilleadh. Is faoin mBallstát, a bhfuil cur i bhfeidhm an mhaolaithe sin á iarraidh aige, fós an lánrogha roghnú idir na roghanna malartacha sin. Ba cheart an rogha a shonraítear san iarraidh a léiriú sa chinneadh cur chun feidhme ón gComhairle lena n-údaraítear cur i bhfeidhm an mhaolaithe sin. Níor cheart don leathnú sin ar raon feidhme an nós imeachta teorann, i gcás ina bhfuil ionstraimiú á dhéanamh, difear a dhéanamh do na forais ná do rialacha eile is infheidhme maidir leis an nós imeachta éigeantach teorann faoi Rialachán (AE) 2024/1348. I gcás ina n-údaraítear do Bhallstát raon feidhme an nós imeachta teorann a leathnú, níor cheart iarratais a scrúdaítear faoin nós imeachta sin a mheas mar chuid den acmhainneacht leordhóthanach de bhun Airteagal 48 den Rialachán sin ná níor cheart iad a áireamh chun an uasteorainn bhliantúil a chur i bhfeidhm de bhun Airteagal 51 den Rialachán sin.

(50)

Chun tacú leis an mBallstát lena mbaineann an cúnamh is gá a sholáthar do náisiúnaigh tríú tír agus do dhaoine gan stát a thagann faoi raon feidhme an Rialacháin seo, ba cheart rochtain éifeachtach ar an teorainn, faoi na coinníollacha a leagtar amach i dTreoir (AE) 2024/1346 agus i Rialachán (AE) 2024/1348, a bheith ag gníomhaireachtaí na Náisiún Aontaithe, UNHCR go háirithe, agus eagraíochtaí comhpháirtíochta ábhartha eile a gcuireann na Ballstáit cúraimí sonracha orthu. Ba cheart rochtain ar iarratasóirí, lena n-áirítear iad siúd ag an teorainn, a cheadú do UNHCR. Chuige sin, ba cheart don Bhallstát lena mbaineann comhar leis na heagraíochtaí sin a choinneáil ar bun.

(51)

Ba cheart rialacha sonracha a leagan síos maidir le cásanna géarchéime, arb é is príomhthréith dóibh líon ollmhór daoine a bheith ag teacht isteach, nó maidir le cásanna force majeure, chun gur féidir leis na Ballstáit síneadh a chur leis na teorainneacha ama a leagtar amach i Rialachán (AE) 2024/1351 faoi choinníollacha diana i gcás ina mbeidh sé dodhéanta cloí leis na teorainneacha ama sin i ngeall ar an gcás eisceachtúil. Ba cheart feidhm a bheith ag an síneadh sin i gcomhthráth maidir leis na teorainneacha ama a leagtar amach maidir le hiarrataí ar ghabháil ar láimh agus fógraí maidir le tógáil ar ais a sheoladh agus a fhreagairt, chomh maith leis an teorainn ama le haghaidh iarratasóir a aistriú chuig an mBallstát freagrach. Ba cheart síneadh a chur leis na teorainneacha ama gan beann ar cibé acu a dhéantar nó nach ndéantar foráil sa Rialachán sin maidir le teorainneacha ama níos giorra i gcásanna áirithe.

(52)

Chun a áirithiú go mbeidh rochtain éifeachtach ar an nós imeachta maidir le cosaint idirnáisiúnta a dheonú, i gcás nach dtarlóidh an t-aistriú i ngeall ar mharthanacht an cháis ghéarchéime arb é is príomhthréith dó líon ollmhór daoine a bheith ag teacht, nó i ngeall ar mharthanacht an cháis force majeure, nó i gcás nach gcuirfidh Ballstát an aistrithe an t-aistriú chun feidhme nuair atá an t-iarratasóir ar fáil d’údaráis inniúla Bhallstát an aistrithe, ba cheart uasteorainn ama a leagan amach chun an t-aistriú a dhéanamh chuig Ballstát a bhfuil an cás sin roimhe. Níor cheart don uasteorainn ama sin a bheith níos faide ná bliain amháin ó ghlacadh leis an iarraidh ar ghabháil ar láimh nó ó dheimhniú an fhógra maidir le tógáil ar ais ó Bhallstát eile nó ón gcinneadh críochnaitheach maidir le cinneadh aistrithe a achomharc nó a athbhreithniú i gcás ina mbeidh éifeacht fionraíochta ann i gcomhréir le hAirteagal 43(3) de Rialachán (AE) 2024/1351. Tá an uasteorainn ama sin gan dochar don fhéidearthacht síneadh a chur leis na teorainneacha ama de bhun Airteagal 46(2) den Rialachán sin chun aistriú a dhéanamh.

(53)

Chun nach n-éireodh an Comhchóras Eorpach Tearmainn neamhfheidhmiúil mar gheall ar theacht isteach líon ollmhór daoine ar scála agus déine urghnách den sórt sin, fiú má tá córas dea-ullmhaithe tearmainn, glactha agus fillte ag Ballstát, mura dtabharfadh an tAontas aghaidh ar an gcás sin ina iomláine, d’fhéadfadh baol tromchúiseach d’easnaimh thromchúiseacha a bheith ann sa chaoi a gcaitear le hiarratasóirí. Ba cheart do Bhallstát a bheith in ann, sna himthosca is eisceachtúla sin, scaoileadh ón oibleagáid iarratasóir a thógáil ar ais de bhun Airteagal 16(2) agus Airteagal 38(4) de Rialachán (AE) 2024/1351. Mar sin féin, chun a áirithiú nach mbeidh brú breise ar an mBallstát a bhfuil cás den sórt sin roimhe mar thoradh ar an maolú sin a chur i bhfeidhm, níor cheart feidhm a bheith ag an maolú sin ach go cúlghabhálach maidir le hiarratais atá cláraithe cheana sa Bhallstát sin laistigh de 4 mhí roimh an dáta a ghlacfar an cinneadh cur chun feidhme ón gComhairle.

(54)

I gcás ina dtabharfaí le fios le himthosca oibiachtúla, i gcomhréir le Rialachán (AE) 2024/1347, go bhféadfadh bunús maith a bheith le hiarratais ar chosaint idirnáisiúnta arna ndéanamh ag grúpaí iarratasóirí ó thír thionscnaimh shonrach nó ó áit iar-ghnáthchónaithe nó ó chuid den tír sin nó ar bhonn na gcritéar arna dtarraingt ón Rialachán sin, is chun leas na n-údarás cinntitheach agus na n-iarratasóirí lena mbaineann araon é scrúdú a chur i gcrích ar fhiúntas an iarratais a luaithe is féidir agus ligean do na húdaráis cosaint idirnáisiúnta a dheonú go tapa agus go héifeachtúil i gcás géarchéime.

(55)

Iarratasóirí, a ndéantar a n-iarratais a scrúdú i gcomhthéacs an nós imeachta bhrostaithe dá bhforáiltear sa Rialachán seo, ba cheart na cearta agus na ráthaíochtaí uile a bheith acu a bhfuil iarratasóirí ina dteideal i gcomhréir le Rialachán (AE) 2024/1348, lena n-áirítear an ceart chun faisnéise agus chun leighis éifeachtaigh.

(56)

Agus an Moladh ón gCoimisiún maidir le nós imeachta brostaithe á chur i bhfeidhm, níor cheart aon agallamh a bheith ann maidir le fiúntas, ach má tá amhras ann maidir le cibé acu a bhaineann nó nach mbaineann an t-iarratasóir leis an gcatagóir nó leis na catagóirí daoine a shainaithnítear sa mholadh sin nó maidir le cibé acu atá nó nach bhfuil feidhm ag na forais eisiaimh, d’fhéadfadh sé gur gá agallamh den sórt sin a dhéanamh. I ngach cás, níor cheart don nós imeachta maireachtáil níos faide ná 4 seachtaine ón dáta a taisceadh an t-iarratas. I gcás inar shuigh Ballstát gur bagairt ar an tslándáil inmheánach é iarratasóir, níor cheart don Bhallstát sin a bheith in ann an nós imeachta brostaithe a chur i bhfeidhm maidir leis an iarratasóir sin. Sna himthosca sin, ba cheart an t-iarratas a scrúdú i gcomhréir le hAirteagail 36 agus 40 de Rialachán (AE) 2024/1348.

(57)

I gcomhréir le hAirteagal 29 de Rialachán (AE) 2024/1348, ba cheart d’iarratasóirí, a ndéantar a n-iarratais a scrúdú i gcomhthéacs an nós imeachta bhrostaithe dá bhforáiltear sa Rialachán seo, doiciméad a fháil lena ndeimhnítear a stádas i dteanga a thuigeann siad nó i dteanga a shíltear le réasún go dtuigfidh siad í.

(58)

Is féidir dul i gcomhairle le gníomhaireachtaí ábhartha an Aontais, le UNHCR agus le heagraíochtaí ábhartha eile ag na céimeanna éagsúla de chur i bhfeidhm an nós imeachta bhrostaithe.

(59)

Chun leibhéal leordhóthanach ullmhachta a áirithiú do chás géarchéime, ba cheart do na Ballstáit na bearta is gá a áireamh ina bpleananna teagmhasacha chun freagairt do chás géarchéime agus chun é a réiteach, lena n-áirítear bearta a bhfuil gá leo chun dúshláin i bhfeidhmiú an Chomhchórais Eorpaigh Tearmainn a shárú agus chun cearta iarratasóirí ar chosaint idirnáisiúnta agus tairbhithe de chosaint idirnáisiúnta a chosaint chomh maith le hathléimneacht a chothú sa Bhallstát lena mbaineann amach anseo. Ba cheart do na Ballstáit úsáid a bhaint freisin as na huirlisí uile atá ar fáil faoin dlí náisiúnta agus faoi dhlí an Aontais, lena n-áirítear úsáid a bhaint as uirlisí réamhaíochta agus luathrabhaidh faoi shásra an Aontais maidir le hullmhacht agus bainistiú géarchéimeanna a bhaineann leis an imirce dá bhforáiltear i Moladh (AE) 2020/1366 ón gCoimisiún (15).

(60)

Gan dochar don mhéid thuas agus i gcás inarb ábhartha, i gcás géarchéime, ba cheart leas a bhaint as na sásraí uile le haghaidh géarchéimeanna dá bhforáiltear sa Bhosca Uirlisí, go háirithe an tacaíocht airgeadais agus oibríochtúil is féidir le gníomhaireachtaí an Aontais, Cistí an Aontais agus Sásra an Aontais um Chosaint Shibhialta a sholáthar i gcomhréir leis na gníomhartha dlíthiúla is infheidhme. Ina dhiaidh sin, ba cheart don Choimisiún, i gcomhthéacs an Fhóraim Leibhéil Theicniúil um Imirce, comhordú agus malartú faisnéise a áirithiú le hardáin eile atá ábhartha chun an cás géarchéime a bhainistiú, lena n-áirítear Líonra an Aontais um Ullmhacht agus Bainistiú Géarchéimeanna i gcomhréir le Moladh (AE) 2020/1366, agus leis na socruithe comhtháite maidir le freagairt pholaitiúil ar ghéarchéimeanna (IPCR).

(61)

Is féidir le Ballstát a bhfuil cás géarchéime nó force majeure roimhe tacaíocht a iarraidh ar an nGníomhaireacht um Thearmann, ar an nGníomhaireacht Eorpach um an nGarda Teorann agus Cósta nó ar Europol i gcomhréir lena sainorduithe. Ina theannta sin agus de réir mar is iomchuí, féadann an Ghníomhaireacht um Thearmann cúnamh a thairiscint ar a thionscnamh féin i gcomhréir le hAirteagal 16(1), pointe (d), de Rialachán (AE) 2021/2303, agus is féidir leis an nGníomhaireacht Eorpach um an nGarda Teorann agus Cósta cúnamh a thairiscint i réimse an fhillte i gcomhréir le hAirteagail 48, 50, 52 agus 53 de Rialachán (AE) 2019/1896 i gcomhaontú leis an mBallstát lena mbaineann, agus féadann Europol cúnamh a thairiscint i gcomhréir le hAirteagal 6(1) de Rialachán (AE) 2016/794 ó Pharlaimint na hEorpa agus ón gComhairle (16).

(62)

Chun tacú leis na Ballstáit a thugann faoi athshocrú mar bheart dlúthpháirtíochta, ba cheart tacaíocht airgeadais ó bhuiséad an Aontais a sholáthar, lena n-áirítear tacaíocht airgeadais ón tsaoráid théamach a leagtar amach i Rialachán (AE) 2021/1147 ó Pharlaimint na hEorpa agus ón gComhairle (17).

(63)

Ós rud é nach féidir leis na Ballstáit cuspóirí an Rialacháin seo, eadhon foráil a dhéanamh maidir leis an oiriúnú is gá ar na rialacha maidir le nósanna imeachta tearmainn agus, i gcás inarb ábhartha, ar na rialacha maidir le dlúthpháirtíocht chun a áirithiú go mbeidh na Ballstáit in ann aghaidh a thabhairt ar chásanna géarchéime agus ar chásanna force majeure i réimse an bhainistithe tearmainn agus imirce laistigh den Aontas, a ghnóthú go leordhóthanach agus, de bharr fhairsinge agus éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach (CAE). I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(64)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm. Ós rud é gurb é atá in Airteagail 12 agus 13, agus Airteagail 1 agus 6, a mhéid a bhaineann siad leis na maoluithe in Airteagail 12 agus 13, den Rialachán seo leasuithe de réir bhrí Airteagal 3 den Chomhaontú a tugadh i gcrích idir an Comhphobal Eorpach agus Ríocht na Danmhairge maidir leis na critéir agus na sásraí lena ndéantar amach cén Stát a bheidh freagrach as scrúdú a dhéanamh ar iarraidh ar thearmann arna taisceadh sa Danmhairg nó in aon Bhallstát eile den Aontas Eorpach agus maidir le córas ‘Eurodac’ chun méarloirg a chur i gcomparáid le chéile ar mhaithe le cur i bhfeidhm éifeachtach Choinbhinsiún Bhaile Átha Cliath (18), is gá don Danmhairg fógra a thabhairt don Choimisiún faoina cinneadh maidir lena bhfuil sna leasuithe sin a chur chun feidhme nó gan é a chur chun feidhme an tráth a ghlacfar na leasuithe nó laistigh de 30 lá ina dhiaidh sin.

(65)

I gcomhréir le hAirteagail 1 agus 2 agus Airteagal 4a(1) de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus le CFAE, agus gan dochar d’Airteagal 4 den Phrótacal sin, níl Éire rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(66)

A mhéid a bhaineann leis an Íoslainn agus an Iorua, is reachtaíocht nua é Airteagail 12 agus 13, agus Airteagail 1 go 6, a mhéid a bhaineann leis na maoluithe in Airteagail 12 agus 13, den Rialachán seo i réimse atá cumhdaithe ag ábhar na hIarscríbhinne a ghabhann leis an gComhaontú a thug an Comhphobal Eorpach agus Poblacht na hÍoslainne agus Ríocht na hIorua i gcrích maidir leis na critéir agus na sásraí lena gcinntear an Stát a bheidh freagrach as scrúdú a dhéanamh ar iarraidh ar thearmann arna taisceadh i mBallstát nó san Íoslainn nó san Iorua (19).

(67)

A mhéid a bhaineann leis an Eilvéis, is é atá in Airteagail 12 agus 13, agus Airteagail 1 go 6, a mhéid a bhaineann leis na maoluithe in Airteagail 12 agus 13, den Rialachán seo gníomhartha nó bearta lena leasaítear nó lena bhforbraítear forálacha Airteagal 1 den Chomhaontú idir an Comhphobal Eorpach agus Cónaidhm na hEilvéise maidir leis na critéir agus na sásraí lena gcinntear an Stát a bheidh freagrach as scrúdú a dhéanamh ar iarraidh ar thearmann arna taisceadh i mBallstát nó san Eilvéis (20).

(68)

A mhéid a bhaineann le Lichtinstéin, is é atá in Airteagail 12 agus 13, agus Airteagail 1 go 6, a mhéid a bhaineann leis na maoluithe in Airteagail 12 agus 13, den Rialachán seo gníomhartha nó bearta lena leasaítear nó lena bhforbraítear forálacha Airteagal 1 den Chomhaontú idir an Comhphobal Eorpach agus Cónaidhm na hEilvéise maidir leis na critéir agus na sásraí lena gcinntear an Stát a bheidh freagrach as scrúdú a dhéanamh ar iarraidh ar thearmann arna taisceadh i mBallstát nó san Eilvéis dá dtagraítear in Airteagal 3 den Phrótacal idir an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an Comhphobal Eorpach agus Cónaidhm na hEilvéise maidir leis na critéir agus na sásraí lena gcinntear an Stát a bheidh freagrach as scrúdú a dhéanamh ar iarraidh ar thearmann arna taisceadh i mBallstát nó san Eilvéis (21),