(1)

Rinneadh roinnt athruithe substainteacha ar Threoir 2011/95/AE ó Pharlaimint na hEorpa agus ón gComhairle (4). Chun a áirithiú go bhfuil comhchuibhiú agus tuilleadh cóineasaithe ann i gcinntí tearmainn agus maidir lena bhfuil i gcosaint idirnáisiúnta ionas go laghdaítear ar an spreagadh le bogadh laistigh den Aontas, chun tairbhithe de chosaint idirnáisiúnta a spreagadh chun fanacht sa Bhallstát a dheonaigh cosaint dóibh agus chun a áirithiú go gcaitear go cothrom le tairbhithe de chosaint idirnáisiúnta, ba cheart an Treoir sin a aisghairm agus Rialachán a chur ina hionad.

(2)

Tá comhbheartas ar thearmann, lena n-áirítear Comhchóras Eorpach Tearmainn (CET), atá bunaithe ar Choinbhinsiún na Ginéive maidir le Stádas Dídeanaithe an 28 Iúil 1951, arna fhorlíonadh ag Prótacal Nua-Eabhrac an 31 Eanáir 1967 (‘Coinbhinsiún na Ginéive’), a chur i bhfeidhm ina iomláine agus go cuimsitheach, ina chuid dhílis de chuspóir an Aontais limistéar saoirse, slándála agus ceartais a bhunú de réir a chéile atá oscailte dóibh siúd a bhfuil orthu, mar gheall ar chúinsí, cosaint a lorg go dlisteanach san Aontas. Ba cheart an beartas sin a bheith rialaithe ag prionsabal na dlúthpháirtíochta agus na comhroinnte córa freagrachta, lena n-áirítear a impleachtaí airgeadais, i measc na mBallstát. Tá Coinbhinsiún na Ginéive ina bhunchloch den réim dlí idirnáisiúnta i gcomhair cosaint dídeanaithe.

(3)

Tá an Comhchóras Eorpach Tearmainn bunaithe ar chaighdeáin choiteanna maidir le nósanna imeachta tearmainn, aitheantas agus cosaint a thugtar ar leibhéal an Aontais, coinníollacha glactha agus córas lena gcinntítear an Ballstát atá freagrach as iarratas ar chosaint idirnáisiúnta a scrúdú. D’ainneoin an dul chun cinn atá déanta go dtí seo leis an gComhchóras Eorpach Tearmainn a fhorbairt de réir a chéile, tá difríochtaí suntasacha ann idir na Ballstáit go fóill maidir leis na nósanna imeachta a mbaintear úsáid astu, na rátaí aitheantais, an cineál cosanta a dheonaítear, an leibhéal ar a bhfuil na dálaí glactha ábharacha agus na sochair a thugtar d’iarratasóirí ar chosaint idirnáisiúnta agus do thairbhithe de chosaint idirnáisiúnta. D’fhéadfadh na héagsúlachtaí sin a bheith ina gcúis le gluaiseachtaí tánaisteacha agus an bonn a bhaint den chuspóir chun a áirithiú go gcaitear le hiarratasóirí go cothrom cibé áit a ndéanann siad iarratas san Aontas.

(4)

Sa teachtaireacht uaidh an 6 Aibreán 2016 dar teideal ‘Towards a Reform of the Common European Asylum System and Enhancing Legal Avenues to Europe’ [I dTreo an Comhchóras Eorpach Tearmainn a Athchóiriú agus Bealaí Dlíthiúla chun na hEorpa a Fheabhsú], leag an Coimisiún amach na roghanna atá aige maidir le feabhas a chur ar an gComhchóras Eorpach Tearmainn, eadhon córas inbhuanaithe agus cothrom a bhunú chun a chinneadh cé acu Ballstát atá freagrach as scrúdú a dhéanamh ar iarratas ar chosaint idirnáisiúnta, chun córas Eurodac a threisiú, chun cóineasú níos fearr a bhaint amach i gcóras tearmainn an Aontais, chun gluaiseachtaí tánaisteacha laistigh den Aontas a chosc agus chun gníomhaireacht a dhéanamh den Oifig Eorpach Tacaíochta do Chúrsaí Tearmainn. Tá an teachtaireacht sin i gcomhréir le héileamh na Comhairle Eorpaí an 18-19 Feabhra 2016 dul chun cinn a dhéanamh maidir le creat reatha an Aontais a athchóiriú chun beartas daonna agus éifeachtach tearmainn a áirithiú.

(5)

De bharr go n-iarrtar le hAirteagal 78(2) den Chonradh ar Fheidhmiú an Aontais Eorpaigh (CFAE) stádas aonfhoirmeach tearmainn agus dea-fheidhmiú an Chomhchórais Eorpaigh Tearmainn, ba cheart dul chun cinn suntasach a dhéanamh maidir le cóineasú córas náisiúnta tearmainn agus aird faoi leith á tabhairt ar éagsúlacht sna rátaí aitheantais agus sna cineálacha stádais cosanta sna Ballstáit. De bhreis air sin, ba cheart na cearta atá deonaithe do thairbhithe de chosaint idirnáisiúnta a shoiléiriú agus a chomhchuibhiú tuilleadh.

(6)

Tá gá mar sin le Rialachán chun leibhéal níos comhsheasmhaí de chomhchuibhiú ar fud an Aontais a áirithiú agus chun leibhéal níos airde deimhneacht dhlíthiúil agus trédhearcachta a sholáthar ann.

(7)

Is é príomhchuspóir an Rialacháin seo a áirithiú, ar lámh amháin, go gcuireann na Ballstáit critéir choiteanna i bhfeidhm le haghaidh sainaithint daoine a bhfuil cosaint idirnáisiúnta de dhíth orthu i ndáiríre, agus, ar an lámh eile, go bhfuil sraith choiteann de chearta ar fáil do thairbhithe de chosaint idirnáisiúnta i ngach Ballstát.

(8)

De bharr tuilleadh comhfhogasaithe ar na rialacha maidir le stádas dídeanaí agus stádas cosanta coimhdí a aithint agus maidir lena bhfuil sna stádais sin, ba cheart cuidiú le srian a choinneáil ar ghluaiseachtaí tánaisteacha iarratasóirí ar chosaint idirnáisiúnta agus tairbhithe de chosaint idirnáisiúnta idir na Ballstáit.

(9)

Ba cheart cosaint idirnáisiúnta a dheonú do náisiúnaigh tríú tír agus do dhaoine gan stát a thagann faoi raon feidhme an Rialacháin seo agus a cháilíonn do chosaint idirnáisiúnta. Níor cheart cosaint idirnáisiúnta a dheonú do na náisiúnaigh tríú tír agus daoine gan stát sin a thagann lasmuigh de raon feidhme an Rialacháin seo. Maidir le stádais dhaonnúla náisiúnta, i gcás ina ndeonaítear iad, níor cheart aon bhaol a bheith ag gabháil leo go gceapfaí gurb ionann iad agus cosaint idirnáisiúnta.

(10)

Ba cheart feidhm a bheith ag forálacha an Rialacháin seo maidir lena bhfuil i gcosaint idirnáisiúnta, lena n-áirítear na rialacha chun gluaiseachtaí tánaisteacha a dhíspreagadh, maidir leo siúd ar deonaíodh cosaint idirnáisiúnta dóibh tar éis nós imeachta um athlonnú nó nós imeachta um ligean isteach ar fhoras daonnúil a thabhairt chun críche go dearfach i gcomhréir le Rialachán (AE) 2024/1350 ó Pharlaimint na hEorpa agus ón gComhairle (5).

(11)

Urramaítear leis an Rialachán seo na cearta bunúsacha agus na prionsabail a aithnítear go háirithe sa Chairt um Chearta Bunúsacha an Aontais Eorpaigh (‘an Chairt’) agus sa Choinbhinsiún Eorpach um Chearta an Duine (ECHR). Go háirithe, féachtar leis an Rialachán seo lena áirithiú go ndéanfar dínit an duine agus ceart chun tearmainn na n-iarratasóirí ar thearmann agus a mball teaghlaigh atá á dtionlacan a urramú ina n-iomláine agus féachtar leis le cur i bhfeidhm fhorálacha na Cairte a chur chun cinn, a mhéid a bhaineann le dínit an duine, urraim do shaol an teaghlaigh agus don saol príobháideach, saoirse cainte agus faisnéise, an ceart chun oideachais, saoirse gairme agus an ceart chun obair a dhéanamh, saoirse fiontraíochta, an ceart chun tearmainn, cosaint i gcás aistriú, díbirt nó eiseachadadh, comhionannas os comhair an dlí, neamh-idirdhealú, cearta an linbh, agus cearta a bhaineann le slándáil shóisialta, cúnamh sóisialta agus cúram sláinte. Dá bhrí sin, ba cheart na forálacha sin a chur chun feidhme dá réir.

(12)

Maidir leis an dóigh a gcaitear le daoine a thagann faoi raon feidhme an Rialacháin seo, tá na Ballstáit faoi cheangal ag na hionstraimí dlí idirnáisiúnta ar páirtithe iontu iad, lena n-áirítear go háirithe na hionstraimí sin lena gcuirtear toirmeasc ar idirdhealú.

(13)

Ba cheart úsáid a bhaint as acmhainní an Chiste um Thearmann, Imirce agus Lánpháirtíocht, a bunaíodh le Rialachán (AE) 2021/1147 ó Pharlaimint na hEorpa agus ón gComhairle (6), chun tacaíocht leormhaith a thabhairt d’iarrachtaí na mBallstát na caighdeáin a leagtar síos sa Rialachán a chur chun feidhme, go háirithe do na Ballstáit sin a bhfuil brú díréireach sonrach ar a gcórais tearmainn, go háirithe de dheasca a suímh gheografaigh nó a staide déimeagrafaí. Cé gur cheart prionsabal ginearálta an toirmisc ar chistiú dúbailte a urramú, ba cheart do na Ballstáit leas iomlán a bhaint, ar gach leibhéal rialachais, as na féidearthachtaí atá ann a bhuí le cistí nach mbaineann go díreach leis an mbeartas tearmainn agus imirce ach a d’fhéadfaí a úsáid chun bearta a chistiú sa réimse sin.

(14)

Ba cheart do Ghníomhaireacht an Aontais Eorpaigh um Thearmann, a bunaíodh le Rialachán (AE) 2021/2303 ó Pharlaimint na hEorpa agus ón gComhairle (7) (‘an Ghníomhaireacht um Thearmann’), tacaíocht leordhóthanach a thabhairt maidir le cur i bhfeidhm an Rialacháin seo, go háirithe trí shaineolaithe a sholáthar, arna iarraidh sin nó le comhaontú an Bhallstáit lena mbaineann, chun cuidiú le húdaráis an Bhallstáit sin iarratais ar chosaint idirnáisiúnta a ghlacadh, a chlárú agus a scrúdú, agus trí fhaisnéis atá cothrom le dáta a sholáthar maidir le tríú tíortha, lena n-áirítear faisnéis faoin tír thionscnaimh, agus trí threoirlínte agus uirlisí ábhartha eile a sholáthar. Agus an Rialachán seo á chur i bhfeidhm acu, ba cheart d’údaráis na mBallstát caighdeáin oibríochtúla, táscairí, treoirlínte agus dea-chleachtais atá forbartha ag an nGníomhaireacht um Thearmann a chur san áireamh. Agus measúnú á dhéanamh ar iarratais ar chosaint idirnáisiúnta, agus gan dochar do chineál na measúnuithe sin de réir an cháis, ba cheart d’údaráis na mBallstát an fhaisnéis, na tuarascálacha, an anailís choiteann ar an staid i dtíortha tionscnaimh agus na nótaí treorach arna bhforbairt ar leibhéal an Aontais ag an nGníomhaireacht um Thearmann agus ag na líonraí Eorpacha maidir le faisnéis tríú tíortha i gcomhréir le Rialachán (AE) 2021/2303 a chur san áireamh.

(15)

Agus an Rialachán seo á chur i bhfeidhm, ba cheart aird ar leith a thabhairt ar leas an linbh i gcomhréir le Coinbhinsiún na Náisiún Aontaithe um Chearta an Linbh 1989. Agus measúnú á dhéanamh ar leas an linbh, ba cheart d’údaráis na mBallstát aird chuí a thabhairt go háirithe ar phrionsabal aontacht an teaghlaigh, agus ar fholláine agus forbairt shóisialta, scileanna teanga, sábháilteacht agus slándáil, agus tuairimí an mhionaoisigh i gcomhréir le haois agus aibíocht an mhionaoisigh sin.

(16)

D’fhonn leas agus folláine ghinearálta an linbh a chosaint, agus chun an leanúnachas ó thaobh cúnaimh agus ionadaíochta de i dtaca le mionaoisigh neamhthionlactha a spreagadh, ba cheart do na Ballstáit féachaint lena áirithiú, a mhéid is féidir, go mbeidh an duine nádúrtha céanna freagrach i gcónaí as mionaoiseach neamhthionlactha, lena n-áirítear le linn na nósanna imeachta tearmainn agus i ndiaidh cosaint idirnáisiúnta a dheonú.

(17)

Níor cheart leanbh lán-aoise a mheas mar chleithiúnaí, ar bhonn measúnú aonair, ach amháin in imthosca nach bhfuil an leanbh sin in ann é féin nó í féin a chothú de bharr riocht fisiceach nó meabhrach atá nasctha le breoiteacht thromchúiseach neamhshealadach nó míchumas trom.

(18)

Ní dhéantar difear le forálacha an Rialacháin seo maidir le haontacht an teaghlaigh do na luachanna ná prionsabail atá aitheanta ag na Ballstáit. I gcás pósadh polagamach, is faoi gach Ballstát atá sé cinneadh a dhéanamh i dtaobh an dteastaíonn uathu forálacha maidir le haontacht an teaghlaigh a chur i bhfeidhm maidir le teaghlaigh pholagamacha, lena n-áirítear maidir le leanaí mionaoiseacha céile bhreise agus tairbhí de chosaint idirnáisiúnta.

(19)

Ba cheart cur i bhfeidhm na bhforálacha maidir le haontacht an teaghlaigh a bheith bunaithe i gcónaí ar fhíorchaidrimh theaghlaigh agus níor cheart a áireamh air sin póstaí éigeantais ná póstaí agus páirtnéireachtaí a dhéantar díreach chun go bhféadfadh an duine lena mbaineann teacht isteach go dtí an Ballstát nó cónaí ann, agus chun na críche sin amháin. Ionas nach ndéanfaí idirdhealú in aghaidh ball teaghlaigh ar bhonn na háite inar bunaíodh teaghlach, ba cheart teaghlaigh a bunaíodh lasmuigh den tír thionscnaimh, ach sular shroich siad críoch an Eorpaigh, a áireamh i gcoincheap an teaghlaigh freisin.

(20)

I gcás ina gcinnfidh Ballstát, chun críocha aontacht an teaghlaigh, go bhfuil leas mionaoisigh phósta ag tuismitheoirí an mhionaoisigh sin, níor cheart do chéile an mhionaoisigh sin aon chearta cónaithe a fháil ón bpósadh sin faoin Rialachán seo.

(21)

Tá an Rialachán seo gan dochar don Phrótacal Uimh. 24 maidir le tearmann le haghaidh náisiúnaigh Bhallstáit an Aontais Eorpaigh, a ghabhann leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh.

(22)

Is gníomh dearbhaitheach é stádas dídeanaí a aithint.

(23)

D’fhéadfadh go dtabharfaí treoir luachmhar d’údaráis na mBallstát le comhairliúcháin le hArd-Choimisinéir na Náisiún Aontaithe le haghaidh Dídeanaithe (UNHCR) agus cinneadh á dhéanamh i dtaobh an dídeanaí é iarratasóir de réir bhrí Airteagal 1 de Choinbhinsiún na Ginéive.

(24)

Agus scrúdú á dhéanamh acu i dtaobh an bhfuil eagla a bhfuil bunús maith léi ar iarratasóirí go ndéanfaí géarleanúint orthu nó go bhfuil siad i bhfíorbhaol díobháil thromchúiseach a fhulaingt agus i dtaobh an ndéanann údaráis neamhstáit bhunaithe chobhsaí, lena n-áirítear eagraíochtaí idirnáisiúnta, Stát nó cuid shuntasach dá chríoch a rialú agus an dtugann siad cosaint, agus measúnú á dhéanamh acu i dtaobh an bhfuil rochtain ar chosaint ar ghéarleanúint nó ar dhíobháil thromchúiseach ag iarratasóirí i gcuid eile den tír thionscnaimh seachas a limistéar dúchais (‘rogha um chosaint inmheánach’), ba cheart don údarás cinntitheach a chur san áireamh, inter alia, faisnéis ghinearálta ábhartha agus moltaí arna n-eisiúint ag UNHCR.

(25)

Ba cheart caighdeáin a leagan síos maidir le stádas dídeanaí a shainmhíniú agus maidir lena bhfuil sa stádas sin chun comhlachtaí náisiúnta inniúla na mBallstát a threorú agus Coinbhinsiún na Ginéive á chur i bhfeidhm.

(26)

Is gá critéir choiteanna a thabhairt isteach chun iarratasóirí ar thearmann a aithint mar dhídeanaithe de réir bhrí Airteagal 1 de Choinbhinsiún na Ginéive.

(27)

I gcás nach bhfuil fianaise dhoiciméadach ná fianaise eile ann le tacú le gné amháin ar leith nó níos mó de ráitis an iarratasóra, ba cheart sochar an amhrais a thabhairt don iarratasóir ar choinníoll go bhfuil iarracht dháiríre déanta ag an iarratasóir bunús a thabhairt leis an ngá atá le cosaint idirnáisiúnta, gur cuireadh isteach na heilimintí ábhartha uile atá ar fáil don iarratasóir agus gur tugadh míniú sásúil maidir leis an bhfáth a bhfuil aon eilimintí ábhartha eile in easnamh, go meastar go bhfuil ráitis na n-iarratasóirí comhleanúnach agus inchreidte agus gur suíodh creidiúnacht ghinearálta agus tráth a ndearna an t-iarratasóir iarratas ar chosaint idirnáisiúnta á chur san áireamh, agus, i gcás inarb iomchuí, na cúiseanna nach ndearnadh an t-iarratas tráth níos luaithe á gcur san áireamh.

(28)

Níor cheart don údarás cinntitheach a chinneadh nach bhfuil creidiúnacht ag an iarratasóir díreach toisc nár bhrath an t-iarratasóir ar a ghnéaschlaonadh dearbhaithe nó ar a gnéaschlaonadh dearbhaithe tráth ar tugadh an chéad deis dó nó di foras na géarleanúna a leagan amach, ach amháin má tá sé follasach nach bhfuil sé i gceist ag an iarratasóir ach moill a chur ar fhorghníomhú an chinnidh a mbeadh a fhilleadh nó a filleadh mar thoradh air nó go bhfuil sé nó sí ag iarraidh an cinneadh sin a chur ó rath.

(29)

Tuairimí daingne, creidimh nó luíonna an iarratasóra as a n-eascraíonn gníomhaíochtaí a d’fhéadfadh a bheith ina mbunús le heagla a bhfuil bunús maith léi go ndéanfaí géarleanúint air nó uirthi nó go bhfuil sé nó sí i bhfíorbhaol díobháil thromchúiseach a fhulaingt, ba cheart iad a chur san áireamh fiú i gcás ina ndearnadh iad a cheilt ina n-iomláine nó i bpáirt agus an t-iarratasóir sa tír thionscnaimh.

(30)

I gcás nach bhfuil an t-iarratasóir ar fáil le linn an nós imeachta de bharr imthosca nach bhfuil neart ag an iarratasóir orthu, tá feidhm ag na forálacha ábhartha agus na coimircí ábhartha a leagtar amach i Rialachán (AE)2024/1351 ó Pharlaimint na hEorpa agus ón gComhairle (8), Rialachán (AE) 2024/1348 ó Pharlaimint na hEorpa agus ón gComhairle (9) agus Treoir (AE) 2024/1346 ó Pharlaimint na hEorpa agus ón gComhairle (10).

(31)

Go háirithe, is gá coincheapa coiteanna a thabhairt isteach maidir le riachtanais chosanta a thagann chun cinn sur place, foinsí díobhála agus cosanta, cosaint inmheánach agus géarleanúint, lena n-áirítear cúiseanna na géarleanúna.

(32)

Maidir le Stát nó údaráis neamh-Stáit bhunaithe chobhsaí, lena n-airítear eagraíochtaí idirnáisiúnta, a rialaíonn an Stát nó cuid shubstaintiúil de chríoch an Stáit agus a chomhlíonann na coinníollacha a leagtar amach sa Rialachán seo, ar choinníoll go mbeidh siad toilteanach agus in ann cosaint a thabhairt, féadfaidh siad cosaint a thabhairt. Ba cheart an chosaint sin a bheith éifeachtach agus buan.

(33)

I gcás nach iad an Stát ná gníomhairí an Stáit na gníomhaithe géarleanúna nó díobhála tromchúisí, ba cheart don údarás cinntitheach scrúdú a dhéanamh, mar chuid den mheasúnú ar an iarratas ar chosaint idirnáisiúnta, an ann do rogha um chosaint inmheánach a luaithe a shuífear go mbeadh feidhm ag na critéir cháilíochta a leagtar amach sa Rialachán seo maidir le hiarratasóir murach sin. Ba cheart rogha um chosaint inmheánach ar ghéarleanúint nó ar dhíobháil thromchúiseach a bheith ar fáil go héifeachtach d’iarratasóirí i gcuid den tír thionscnaimh ar féidir leo taisteal go sábháilte agus go dleathach chuici agus cead isteach a fháil inti agus ar féidir leo a bheith ag súil leis go réasúnta go lonnóidh siad inti. Ba cheart é a bheith ar an údarás cinntitheach a léiriú go bhfuil rogha um chosaint inmheánach ar fáil. I gcás ina léiríonn an t-údarás cinntitheach go bhfuil fáil ar rogha um chosaint inmheánach, ba cheart d’iarratasóirí a bheith i dteideal fianaise a thabhairt ar aird agus eilimintí atá ar fáil dóibh a chur isteach.

(34)

Agus breithniú á dhéanamh an féidir a bheith ag súil leis go réasúnta go lonnóidh iarratasóirí i gcuid eile dá dtír thionscnaimh, ba cheart don údarás cinntitheach a chur san áireamh an mbeadh iarratasóirí in ann freastal ar a mbunriachtanais féin i dtaca le rochtain ar bhia, sláinteachas agus dídean i gcomhthéacs imthosca áitiúla ina dtír thionscnaimh.

(35)

I gcás inarb iad an Stát nó gníomhairí an Stáit na gníomhaithe géarleanúna nó díobhála tromchúisí, ba cheart a thoimhdiú nach bhfuil cosaint éifeachtach ar fáil don iarratasóir agus ní gá don údarás cinntitheach scrúdú a dhéanamh i dtaobh an ann do rogha um chosaint inmheánach. Níor cheart don údarás cinntitheach a bheith in ann scrúdú a dhéanamh i dtaobh an ann do rogha um chosaint inmheánach ach amháin i gcás ina bhfuil sé suite go soiléir go n-eascraíonn an baol géarleanúna nó díobhála tromchúisí as gníomhaí ar léir go bhfuil a chumhacht teoranta do limistéar sonrach geografach nó i gcás nach bhfuil smacht ag an Stát ach ar chodanna áirithe den tír thionscnaimh lena mbaineann.

(36)

Agus measúnú á dhéanamh ar iarratas sur place, d’fhéadfaí a thabhairt le fios, de bharr go bhfuil an baol géarleanúna nó díobhála tromchúisí bunaithe ar chúinsí nach ionann iad agus léiriú ar nó leanúint de thuairimí daingne nó luíonna a bhí ag duine agus é nó í sa tír thionscnaimh, gurb é an t-aon aidhm amháin nó an phríomhaidhm a bhí ag an iarratasóir na dálaí riachtanacha a chruthú chun iarratas a dhéanamh ar chosaint idirnáisiúnta.

(37)

Ag brath ar na himthosca, d’fhéadfaí a áireamh ar ghníomhartha géarleanúna a bhaineann go sonrach le hinscne nó le leanaí, inter alia, earcaíocht faoi aois, ciorrú ball giniúna, pósadh éigeantais, gáinneáil ar leanaí agus saothar leanaí, agus teacht i dtír gnéasach.

(38)

D’fhéadfadh gníomhartha géarleanúna a bheith i bhfoirm ionchúiseamh nó pionós díréireach nó idirdhealaitheach. D’fhéadfadh an t-ionchúiseamh nó pionós díréireach nó idirdhealaitheach sin teacht chun cinn, inter alia, i gcásanna ina ndiúltaíonn iarratasóir seirbhís mhíleata a dhéanamh ar fhorais mhorálta, chreidimh nó pholaitiúla nó de bharr gur de ghrúpa eitneach faoi leith é nó í nó go bhfuil saoránacht faoi leith aige nó aici.

(39)

Ceann de na coinníollacha le haghaidh cáilitheacht do stádas dídeanaí de réir Airteagal 1(A) de Choinbhinsiún na Ginéive is ea nasc cúisíoch a bheith idir fáthanna na géarleanúna, mar atá cine, reiligiún nó creideamh, náisiúntacht, tuairim pholaitiúil nó ballraíocht i ngrúpa sóisialta áirithe, agus na gníomhaíochtaí géarleanúna nó easpa cosanta in aghaidh gníomhaíochtaí den sórt sin.

(40)

Is gá freisin coincheap coiteann a thabhairt isteach maidir leis an bhforas géarleanúna ‘ballraíocht i ngrúpa sóisialta áirithe’. Chun grúpa sóisialta áirithe a shainmhíniú, ba cheart aird a thabhairt ar shaincheisteanna a eascraíonn ó ghnéaschlaonadh nó inscne an iarratasóra, lena n-áirítear féiniúlacht inscne agus léiriú inscne, a d’fhéadfadh a bheith bainteach le traidisiúin dhlíthiúla áirithe agus le gnásanna áirithe, arb é is toradh orthu, mar shampla, ciorrú ball giniúna, aimridiú éigeantais nó ginmhilleadh éigeantais, a mhéid a bhaineann siad leis an eagla a bhfuil bunús maith léi atá ar an iarratasóir go ndéanfaí géarleanúint air nó uirthi. Ag brath ar na himthosca, d’fhéadfadh míchumas a bheith ina thréith chun grúpa sóisialta faoi leith a shainaithint.

(41)

De bharr imthosca na tíre tionscnaimh, lena n-áirítear mar shampla gur ann do dhlíthe coiriúla lena ndírítear go sonrach ar dhaoine leispiacha, aeracha, déghnéasacha, trasinscneacha agus idirghnéasacha agus go bhfuil na dlíthe sin á gcur i bhfeidhm, d’fhéadfadh sé go meastar na daoine sin mar ghrúpa sóisialta faoi leith.

(42)

Agus measúnú á dhéanamh ar iarratas ar chosaint idirnáisiúnta, ba cheart d’údaráis inniúla na mBallstát úsáid a bhaint as modhanna le measúnú a dhéanamh ar chreidiúnacht an iarratasóra ar bhealach lena léirítear urraim do chearta an iarratasóra mar atá ráthaithe sa Chairt agus sa Choinbhinsiún Eorpach um Chearta an Duine, go háirithe an ceart chun dínit an duine agus urraim don saol príobháideach agus do shaol an teaghlaigh. Maidir le gnéaschlaonadh agus féiniúlacht inscne go sonrach, níor cheart grinncheistiúchán ná tástálacha a dhéanamh ar iarratasóirí maidir lena gcleachtais ghnéis.

(43)

Tá cuspóirí agus prionsabail na Náisiún Aontaithe leagtha amach sa Bhrollach a ghabhann le Cairt na Náisiún Aontaithe agus in Airteagail 1 agus 2 de Chairt na Náisiún Aontaithe, agus tá siad corpraithe ina rúin maidir le bearta chun an sceimhlitheoireacht a chomhrac. Dearbhaítear leis na rúin sin, inter alia, go bhfuil ‘gníomhartha, modhanna agus cleachtais sceimhlitheoireachta contrártha le cuspóirí agus prionsabail na Náisiún Aontaithe’ agus go bhfuil sé ‘contrártha freisin le cuspóirí agus le prionsabail na Náisiún Aontaithe gníomhartha sceimhlitheoireachta a mhaoiniú, a phleanáil agus a ghríosú go feasach’.

(44)

Chun forálacha an Rialacháin seo maidir le heisiamh ó chosaint idirnáisiúnta a chur i bhfeidhm i gcás ina bhfuil forais réasúnacha ann a thoimhdiú go bhfuil gníomh nó gníomhartha atá contrártha do na críocha agus do na prionsabail a leagtar amach in Airteagail 1 agus 2 de Chairt na Náisiún Aontaithe déanta ag iarratasóir, ní réamhriachtanas é a shuí gur ciontaíodh -iarratasóir den sórt sin i gceann de na cionta sceimhlitheoireachta dá dtagraítear in Airteagal 3(1) de Threoir (AE) 2017/541 ó Pharlaimint na hEorpa agus ón gComhairle (11).

(45)

Chun forálacha an Rialacháin seo maidir le heisiamh ó chosaint idirnáisiúnta a chur i bhfeidhm i dtaca le hiarratasóir de bharr go ndearna sé nó sí gníomhartha arb ionann iad agus rannpháirtíocht i ngníomhaíochtaí grúpa sceimhlitheoireachta, mura bhfuil sé suite go ndearna an t-iarratasóir sin gníomh sceimhlitheoireachta mar a shainítear sna rúin ó Chomhairle Slándála na Náisiún Aontaithe, ná go ndearna an t-iarratasóir sin iarracht gníomh sceimhlitheoireachta a dhéanamh ná gur bhagair an t-iarratasóir sin gníomh sceimhlitheoireachta a dhéanamh, ní chuirtear bac leis sin ar údaráis na mBallstát iompar an iarratasóra a mheas mar iompar atá contrártha do chuspóirí agus prionsabail na Náisiún Aontaithe.

(46)

Chun measúnú aonair a dhéanamh ar na fíorais a d’fhéadfadh a bheith ina gcúiseanna tromchúiseacha lena mheas go bhfuil an t-iarratasóir ciontach i ngníomhartha atá contrártha do chuspóirí agus prionsabail na Náisiún Aontaithe, nó gur thionscain an t-iarratasóir gníomhartha den sórt sin nó go raibh an t-iarratasóir rannpháirteach i ngníomhartha den sórt sin, tá tábhacht ar leith leis an bhfíoras gur cúisíodh an t-iarratasóir i gcúirteanna Ballstáit as a bheith rannpháirteach i ngníomhaíochtaí grúpa sceimhlitheoireachta, agus tá tábhacht ar leith chomh maith le cinneadh cúirte nó binse go raibh an t-iarratasóir mar bhall de cheannaireacht ghrúpa den sórt sin, agus níor cheart aon cheanglas a bheith ann chun a shuí gurb é nó í an t-iarratasóir a thionscain gníomh sceimhlitheoireachta nó a bhí rannpháirteach ann ar bhealach eile.

(47)

Ní foras é, i bprionsabal, coir pholaitiúil a bheith déanta ag duine le stádas dídeanaí a eisiamh uaidh nó uaithi. Maidir le gníomhaíochtaí an-chruálach, i gcás ina bhfuil an ghníomhaíocht atá i gceist díréireach leis an gcuspóir polaitiúil líomhnaithe, agus gníomhartha sceimhlitheoireachta a bhfuil foréigean mar shaintréith acu, fiú amháin má rinneadh iad chun cuspóir atá in ainm a bheith polaitiúil a bhaint amach, ba cheart iad sin a mheas, áfach, mar choireanna tromchúiseacha neamhpholaitiúla agus dá bhrí sin, is féidir stádas dídeanaí a eisiamh mar gheall orthu.

(48)

Ba cheart caighdeáin a leagan síos maidir le stádas cosanta coimhdí a shainmhíniú agus maidir lena bhfuil inti. Ba cheart cosaint choimhdeach a bheith comhlántach agus sa bhreis ar an gcosaint do dhídeanaithe a chumhdaítear i gCoinbhinsiún na Ginéive. Cé nach ionann na forais chosanta idir stádas dídeanaí agus stádas cosanta coimhdí, d’fhéadfadh gur mar a chéile a bheadh an gá leanúnach le cosaint ó thaobh fad tréimhse de. D’fhéadfadh nach mbeadh aon difear idir a bhfuil sa chosaint a thugtar le stádas dídeanaí nó le stádas cosanta coimhdí ach amháin i gcás ina bhforáiltear dó sin go sainráite sa Rialachán seo. Mar sin féin, leis an Rialachán seo cumasaítear do na Ballstáit na cearta céanna agus na sochair chéanna a dheonú faoin dá stádas.

(49)

Is gá critéir choiteanna a thabhairt isteach ar a mbonn a aithneofar iarratasóirí ar chosaint idirnáisiúnta a bheith ina dtairbhithe de chosaint choimhdeach. Ba cheart na critéir sin a fháil ó oibleagáidí idirnáisiúnta faoi na hionstraimí agus na cleachtais atá ag na Ballstáit maidir le cearta an duine.

(50)

Chun measúnú a dhéanamh ar dhíobháil thromchúiseach a d’fhéadfadh iarratasóirí a cháiliú mar dhaoine atá incháilithe do chosaint choimhdeach, ba cheart a áireamh i nóisean an fhoréigin neamh-idirdhealaithigh foréigean a d’fhéadfadh cur isteach ar dhaoine gan beann ar a gcúinsí pearsanta.

(51)

Chun measúnú a dhéanamh ar dhíobháil thromchúiseach, ba cheart cásanna ina bhfuil fórsaí armtha tríú tír ag tabhairt faoi ghrúpa armtha amháin nó níos mó, nó ina bhfuil dhá ghrúpa armtha nó níos mó ag tabhairt faoina chéile, ba cheart a mheas gur coinbhleacht armtha inmheánach é. Níl sé riachtanach an choinbhleacht sin a aicmiú mar ‘choinbhleacht armtha nach de chineál idirnáisiúnta í’ faoin dlí daonnúil idirnáisiúnta agus níl sé riachtanach ach oiread, i dteannta breithmheas ar an leibhéal foréigin atá sna críocha atá i gceist, measúnú ar leith a dhéanamh ar a dhéine atá na caismirtí armtha, leibhéal eagrúcháin na bhfórsaí armtha lena mbaineann nó fad na coinbhleachta.

(52)

Maidir leis an gcruthúnas is gá chun a shuí gur ann do bhagairt thromchúiseach agus bagairt aonair ar bheatha an tsibhialtaigh nó ar iomláine an tsibhialtaigh, níor cheart d’údaráis chinntitheacha a cheangal ar iarratasóirí fianaise a thabhairt ar aird go bhfuiltear ag díriú go sonrach orthusan mar gheall ar thosca a bhaineann lena gcúinsí pearsanta féin. Is ísle áfach, leibhéal an fhoréigin neamh-idirdhealaithigh atá ag teastáil chun bunús a thabhairt leis an iarratas más féidir le hiarratasóirí a léiriú go bhfuil siad go sonrach thíos leis mar gheall ar thosca a bhaineann lena gcúinsí pearsanta féin. Thairis sin, ba cheart don údarás cinntitheach a mheas go heisceachtúil gur ann do bhagairt thromchúiseach agus do bhagairt aonair i gcás ina n-ardaítear ar mhéid an fhoréigin neamh-idirdhealaithaigh a bhaineann leis an gcoinbhleacht armtha go leibhéal chomh hard sin gur ann d’fhorais shubstaintiúla lena chreidiúint, i gcás sibhialtach, dá gcuirfí ar ais chuig an tír thionscnaimh nó chuig an gcuid ábhartha den tír thionscnaimh iad, go mbeidís i bhfíorbhaol díobháil thromchúiseach a fhulaingt toisc iad a bheith ann, agus san imthosca sin amháin.

(53)

Ag brath ar na himthosca, lena n-áirítear fad agus cuspóir an fhanachta, d’fhéadfadh sé go bhféadfadh taisteal chuig an tír thionscnaimh a bheith ina léiriú go bhfuil leas á bhaint arís ag tairbhithe de stádas dídeanaí as cosaint na tíre tionscnaimh nó go bhfuil siad tar éis cur fúthu arís ina dtír thionscnaimh, nó, i gcás tairbhithe de stádas cosanta coimhdí, nach ann a thuilleadh do na forais chun an stádas sin a dheonú.

(54)

I gcomhréir le Rialachán (AE) 2024/1348, ba cheart do na Ballstáit a áirithiú go bhfuil rochtain ag iarratasóirí ar leigheas éifeachtach os comhair cúirte nó binse in aghaidh cinntí ó údaráis chinntitheacha diúltú d’iarratais ar chosaint idirnáisiúnta toisc iad a bheith gan bhunús nó i gcoinne cinntí maidir le cosaint idirnáisiúnta a tharraingt siar. I ndáil leis sin, ba cheart na cúiseanna a thug ar údarás cinntitheach cinneadh a dhéanamh diúltú d’iarratas ar chosaint idirnáisiúnta nó cosaint idirnáisiúnta a tharraingt siar ó thairbhí a bheith faoi réir athbhreithniú críochnúil ag cúirt nó binse inniúil faoi chuimsiú aon chaingean arna tabhairt i gcoinne an chinnidh sin maidir le diúltú nó tarraingt siar.

(55)

Maidir leis na doiciméid taistil a eisítear do thairbhithe de chosaint idirnáisiúnta den chéad uair nó a athnuaitear tar éis theacht i bhfeidhm an Rialacháin seo, ba cheart iad a bheith i gcomhréir le Rialachán (CE) Uimh. 2252/2004 ón gComhairle (12) nó leis na íoschaighdeáin chomhionanna atá ann maidir le gnéithe slándála agus bithmhéadrachta,

(56)

An cead cónaithe a eisítear do thairbhithe de chosaint idirnáisiúnta den chéad uair nó a athnuaitear tar éis theacht i bhfeidhm an Rialacháin seo, ba cheart é a bheith i gcomhréir le Rialachán (CE) Uimh. 1030/2002 ón gComhairle (13).

(57)

Le linn na tréimhse idir cosaint idirnáisiúnta a dheonú agus cead cónaithe a eisiúint, ba cheart do na Ballstáit a áirithiú go mbeidh rochtain éifeachtach ag tairbhithe de chosaint idirnáisiúnta ar na cearta uile a leagtar síos sa Rialachán seo, cé is moite de shaoirse gluaiseachta laistigh den Aontas agus d’eisiúint doiciméad taistil.

(58)

Is iondúil go mbíonn baill teaghlaigh, mar gheall ar an ngaol gar atá acu le tairbhithe de chosaint idirnáisiúnta, i mbaol gníomhartha géarleanúna nó díobhála tromchúisí a d’fhéadfadh a bheith mar bhonn le cosaint idirnáisiúnta a dheonú. Chun aontacht an teaghlaigh a chaomhnú, i gcás nach gcáilíonn baill teaghlaigh atá i láthair ar chríoch an Bhallstáit chéanna do chosaint idirnáisiúnta, ba cheart dóibh a bheith i dteideal iarratas a dhéanamh ar chead cónaithe. Ba cheart na ceadanna cónaithe sin a dheonú, mura rud é go dtagann baill teaghlaigh faoi na forais eisiaimh nó mura n-éilítear amhlaidh ar shlí eile ar mhaithe leis an tslándáil náisiúnta nó leis an mbeartas poiblí. Ba cheart do bhaill teaghlaigh a bheith i dteideal na gceart a thugtar don tairbhí de chosaint idirnáisiúnta a luaithe agus atá cosaint idirnáisiúnta deonaithe. Gan dochar d’fhorálacha an Rialacháin seo a bhaineann le haontacht an teaghlaigh a chaomhnú, i gcás ina dtagann an staid faoi raon feidhme Threoir 2003/86/CE ón gComhairle (14) agus inar comhlíonadh na coinníollacha maidir le haontacht an teaghlaigh a leagtar amach inti, ba cheart ceadanna cónaithe agus cearta cónaithe a dheonú do bhaill teaghlaigh an tairbhí de chosaint idirnáisiúnta nach gcáilíonn ar bhonn aonair do chosaint den sórt sin i gcomhréir leis an Treoir sin. Ba cheart an Rialachán seo a chur i bhfeidhm gan dochar do Threoir 2004/38/CE ó Pharlaimint na hEorpa agus ón gComhairle (15).

(59)

Ba cheart doiciméid taistil a eisiúint do bhaill teaghlaigh tairbhithe de chosaint idirnáisiúnta i gcomhréir le nósanna imeachta náisiúnta.

(60)

Agus measúnú á dhéanamh ar athrú cúinsí i dtríú tír, ba cheart d’údaráis inniúla na mBallstát a fhíorú, agus aird á tabhairt acu ar staid aonair tairbhí de chosaint idirnáisiúnta, go bhfuil céimeanna réasúnta glactha ag gníomhaí nó gníomhaithe na cosanta sa tír sin chun an ghéarleanúint nó díobháil thromchúiseach a chosc, agus, dá bhrí sin go bhfeidhmíonn siad, inter alia, córas éifeachtach dlí chun gníomhartha ar géarleanúint nó díobháil thromchúiseach iad a bhrath, a ionchúiseamh agus a phionósú agus go mbeidh rochtain ag an tairbhí de chosaint idirnáisiúnta lena mbaineann ar chosaint den sórt sin má tharraingítear siar an stádas dídeanaí nó an stádas cosanta coimhdí.

(61)

Agus measúnú á dhéanamh i dtaobh ar scoir na forais ar a raibh deonú cosanta idirnáisiúnta bunaithe de bheith ann, ba cheart don údarás cinntitheach na foinsí faisnéise agus treorach náisiúnta, Aontais agus idirnáisiúnta ábhartha uile atá ar fáil, lena n-áirítear moltaí arna n-eisiúint ag UNHCR, a chur san áireamh.

(62)

I gcás ina dtagann iarratasóir faoi raon feidhme Airteagal 1(D) de Choinbhinsiún na Ginéive maidir le soláthar cosanta nó cúnaimh ag orgáin nó ag gníomhaireachtaí de chuid na Náisiún Aontaithe seachas Ard-Choimisinéir na Náisiún Aontaithe le haghaidh Dídeanaithe, agus measúnú á dhéanamh i dtaobh ar scoir an chosaint nó an cúnamh sin de bheith ann ar chúiseanna nach bhfuil smacht ag an iarratasóir orthu, agus atá neamhspleách ar thoil an iarratasóra, ba cheart don údarás cinntitheach a fháil amach ar cuireadh iallach ar an iarratasóir limistéar oibríochtaí an orgáin nó na gníomhaireachta ábhartha a fhágáil, an raibh sábháilteacht an iarratasóra i mbaol tromchúiseach agus an raibh an t-orgán nó an ghníomhaireacht ábhartha in ann dálaí maireachtála an iarratasóra a áirithiú i gcomhréir lena shainordú nó lena sainordú.

(63)

I gcás ina scoireann an stádas dídeanaí nó an stádas cosanta coimhdí de bheith ann, ní chuireann an cinneadh ó údarás cinntitheach Ballstáit an stádas a tharraingt siar cosc ar an náisiúnach tríú tír nó ar an duine gan stát lena mbaineann iarratas a dhéanamh ar chead cónaí ar fhorais eile seachas na forais ba bhunús le cosaint idirnáisiúnta a dheonú nó leanúint de bheith ag fanacht go dlíthiúil ar chríoch an Bhallstáit sin ar fhorais eile, go háirithe nuair atá cead cónaithe fadtéarmach bailí de chuid an Aontais i seilbh an té sin, i gcomhréir le dlí ábhartha an Aontais agus leis an dlí ábhartha náisiúnta.

(64)

Níor cheart éifeacht chúlghabhálach a bheith ag cinneadh deireadh a chur le cosaint idirnáisiúnta. Ba cheart éifeacht chúlghabhálach a bheith ag cinneadh cosaint idirnáisiúnta a chúlghairm. I gcás ina bhfuil cinneadh bunaithe ar fhoras scoir, níor cheart éifeacht chúlghabhálach a bheith ag gabháil leis. I gcás ina gcúlghairfear stádas dídeanaí nó stádas cosanta coimhdí ar an mbonn nár cheart riamh é a dheonú, d’fhéadfaí cearta faighte a choinneáil nó a chailleadh i gcomhréir leis an dlí náisiúnta.

(65)

Ba cheart do thairbhithe de chosaint idirnáisiúnta cónaí sa Bhallstát a dheonaigh cosaint dóibh. Na tairbhithe sin de chosaint idirnáisiúnta a bhfuil doiciméad taistil bailí agus cead cónaithe acu a d’eisigh Ballstát a bhfuil acquis Schengen á chur i bhfeidhm ina iomláine aige, ba cheart a cheadú dóibh dul isteach agus gluaiseacht faoi shaoirse laistigh de chríoch na mBallstát a bhfuil acquis Schengen á chur i bhfeidhm ina iomláine acu, laistigh den tréimhse údaraithe fanachta i gcomhréir le Rialachán (AE) 2016/399 ó Pharlaimint na hEorpa agus ón gComhairle (16) agus le hAirteagal 21 den Choinbhinsiún lena ndéantar Comhaontú Schengen a chur chun feidhme (17). Is féidir le tairbhithe de chosaint idirnáisiúnta iarratas a dhéanamh chun fanacht i mBallstát eile nach é an Ballstát a dheonaigh cosaint idirnáisiúnta dóibh, i gcomhréir leis na rialacha ábhartha de chuid an Aontais agus rialacha ábhartha náisiúnta. Mar sin féin, ní hionann sin agus a rá go n-aistreofar an stádas dídeanaí nó an stádas cosanta coimhdí agus cearta gaolmhara.

(66)

Chun a áirithiú go n-urramaíonn tairbhithe de chosaint idirnáisiúnta an tréimhse údaraithe fanachta nó cónaithe i gcomhréir leis an dlí ábhartha náisiúnta, an dlí ábhartha de chuid an Aontais nó an dlí ábhartha idirnáisiúnta, ba cheart Treoir 2003/109/CE ón gComhairle (18) a leasú lena fhoráil gur cheart, i bprionsabal, tús a chur in athuair leis an tréimhse 5 bliana a mbeidh tairbhithe de chosaint idirnáisiúnta i dteideal stádas mar chónaitheoir fadtéarmach an Aontais ina dhiaidh gach uair a aimseofar tairbhí de chosaint idirnáisiúnta i mBallstát, seachas an Ballstát a dheonaigh cosaint idirnáisiúnta don tairbhí sin de chosaint idirnáisiúnta, gan ceart a bheith ag an tairbhí sin fanacht nó cónaí ann.

(67)

Bíonn lánrogha áirithe i gcónaí ag údaráis na mBallstát maidir le beartas poiblí agus slándáil náisiúnta, agus ba cheart í a léirmhíniú i gcomhréir leis an dlí náisiúnta, dlí an Aontais agus an dlí idirnáisiúnta. Faoi réir measúnú aonair ar na fíorais shonracha, is féidir a chumhdach le cúrsaí beartais phoiblí agus slándála náisiúnta cásanna ina bhfuil náisiúnach tríú tír ina bhall nó ina ball de chomhlachas a thacaíonn le sceimhlitheoireacht idirnáisiúnta nó ina dtacaíonn sé nó sí le comhlachas den sórt sin. Agus measúnú á dhéanamh acu an gcuireann náisiúnach tríú tír nó duine gan stát slándáil náisiúnta Ballstáit i mbaol, tá údaráis an Bhallstáit i dteideal, inter alia, faisnéis a fhaightear ó Bhallstáit eile nó ó thríú tíortha a chur san áireamh.

(68)

Agus cinneadh á dhéanamh maidir le teidlíocht ar na sochair dá bhforáiltear sa Rialachán seo, ba cheart d’údarás inniúil aird chuí a thabhairt ar leas an linbh agus ar na cúinsí ar leith a bhaineann leis an spleáchas ar thairbhí de chosaint idirnáisiúnta de chuid garghaolta atá i láthair cheana féin sa Bhallstát lena mbaineann agus nach baill teaghlaigh iad. I gcúinsí eisceachtúla, i gcás ina bhfuil garghaol de chuid tairbhí de chosaint idirnáisiúnta ina mhionaoiseach pósta nó ina mionaoiseach pósta ach nach bhfuil a chéile nó a céile á thionlacan nó á tionlacan, d’fhéadfaí a mheas gurbh é leas an mhionaoisigh a bheith lena theaghlach bunaidh nó lena teaghlach bunaidh.

(69)

Ba cheart do na Ballstáit a bheith in ann srian a chur ar an rochtain sin ar ghníomhaíochtaí fostaithe nó féinfhostaithe i ndáil le poist a bhaineann le húdarás poiblí a fheidhmiú, agus freagracht as leas ginearálta an Stáit nó údarás poiblí eile a chosaint. I gcomhthéacs fheidhmiú a gcirt chun cóir chomhionann a fháil maidir le ballraíocht in eagraíocht a dhéanann ionadaíocht ar oibrithe nó atá i mbun gairm shonrach, ba cheart é a bheith indéanta tairbhithe de chosaint idirnáisiúnta a eisiamh ó pháirt a ghlacadh i mbainistiú comhlachtaí atá rialaithe ag an dlí poiblí agus ó bheith i seilbh oifig atá rialaithe ag an dlí poiblí.

(70)

Ba cheart sochair chóiríochta a bheith ina bpríomhshochar sa mhéid is gur féidir iad a mheas mar chúnamh sóisialta.

(71)

Chun feabhas a chur ar fheidhmiú éifeachtach na gceart agus na sochar a leagtar síos sa Rialachán seo ag tairbhithe de chosaint idirnáisiúnta, is gá a chur san áireamh na riachtanais shonracha atá acu agus na dúshláin lánpháirtíochta ar leith a bhíonn rompu agus a rochtain a éascú ar chearta a bhaineann le lánpháirtiú go háirithe maidir le deiseanna oideachais a bhaineann le fostaíocht, gairmoiliúint agus rochtain ar nósanna imeachta aitheantais le haghaidh dioplómaí agus teastais agus fianaise eile ón iasacht de cháilíochtaí foirmiúla, go háirithe in imthosca ina bhfuil easpa fianaise dhoiciméadach agus nach bhfuil ar a gcumas na costais a bhaineann leis na nósanna imeachta aitheantais a sheasamh.

(72)

Ba cheart an chóir a chuirtear ar thairbhithe de chosaint idirnáisiúnta a bheith comhionann leis an gcóir a chuirtear ar náisiúnaigh an Bhallstáit a dheonaigh cosaint idirnáisiúnta dóibh maidir le slándáil shóisialta.

(73)

Ba cheart rochtain ar chúram sláinte, lena n-áirítear cúram sláinte fisiceach agus meabhrach agus cúram sláinte gnéis agus atáirgthe, a áirithiú do thairbhithe de chosaint idirnáisiúnta, ar choinníoll go n-áirithítear freisin í do náisiúnaigh an Bhallstáit a dheonaigh cosaint idirnáisiúnta dóibh.

(74)

Chun lánpháirtiú tairbhithe de chosaint idirnáisiúnta sa tsochaí a éascú, ba cheart rochtain a bheith acu ar bhearta lánpháirtíochta, ar an leibhéal áitiúil, ar an leibhéal réigiúnach agus ar an leibhéal náisiúnta, faoi choinníollacha a shocróidh na Ballstáit. Ba cheart do na Ballstáit breithniú a dhéanamh ar rochtain a choimeád ar chúrsaí teanga do thairbhithe de chosaint idirnáisiúnta i gcás ina raibh rochtain acu ar chúrsaí teanga agus iad ina n-iarratasóirí.

(75)

Le faireachán éifeachtach a dhéanamh ar chur i bhfeidhm an Rialacháin seo ní mór meastóireacht a dhéanamh air go tráthrialta.

(76)

Ós rud é nach féidir leis na Ballstáit cuspóirí an Rialacháin seo, eadhon caighdeáin a leagan síos i dtaca leis na Ballstáit a bheith ag deonú cosaint idirnáisiúnta do náisiúnaigh tríú tír agus daoine gan Stát, i dtaca le stádas aonfhoirmeach le haghaidh dídeanaithe nó daoine atá incháilithe do chosaint choimhdeach, agus i dtaca lena bhfuil sa chosaint a dheonaítear, a ghnóthú go leordhóthanach, agus de bharr fhairsinge agus éifeachtaí an Rialacháin seo, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(77)

I gcomhréir le hAirteagail 1 agus 2 agus Airteagal 4a(1) de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus le CFAE, agus gan dochar d'Airteagal 4 den Phrótacal sin, níl Éire rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(78)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm,