1.   De bhun na gceanglas comhlíontachta faoi Airteagal 22a de Rialachán Tarmligthe (AE) 2019/331, seiceálfaidh an fíoraitheoir cur chun feidhme na moltaí ó iniúchtaí fuinnimh nó ó chórais bainistíochta fuinnimh dheimhnithe dá dtagraítear in Airteagal 22a(3) de Rialachán Tarmligthe (AE) 2019/331 agus deimhneoidh sé gur cuireadh i gcrích cur chun feidhme na moltaí sin.

2.   Chun cur i gcrích chur chun feidhme na moltaí dá dtagraítear i mír 1 a dheimhniú, seiceálfaidh an fíoraitheoir an méid seo a leanas:

(a)	gur leanadh an nós imeachta maidir le moltaí dá dtagraítear in Airteagal 22a(2) de Rialachán Tarmligthe 2019/331 a chur chun feidhme, gur doiciméadaíodh go leormhaith é agus gur coinníodh ar bun i gceart é;

(b)	go ndearna an t-oibreoir bearta coincréiteacha chun na moltaí a chur chun feidhme;

(c)	go bhfuil fianaise ann gur cuireadh i gcrích an cur chun feidhme, lena n-áirítear i dtaobh ar marcáladh na moltaí sin mar mholtaí a cuireadh i gcrích sa nós imeachta dá dtagraítear i bpointe (a) den mhír seo.

1.   I gcás nach mbeidh cur chun feidhme na moltaí dá dtagraítear in Airteagal 17a den Rialachán seo curtha i gcrích, déanfaidh an fíoraitheoir measúnú ar fhianaise ón oibreoir agus seiceálfaidh sé an méid seo a leanas:

(a)	nár eisíodh na moltaí maidir le héifeachtúlacht fuinnimh dá dtagraítear in Airteagal 22a(1), an dara fomhír, pointe (f), de Rialachán Tarmligthe (AE) 2019/331 sna chéad 4 bliana den tréimhse bhonnlíne;

(b)	nach n-eascródh caomhnú fuinnimh as na moltaí laistigh de theorainneacha córais an phróisis thionsclaíoch a dhéantar ag an tsuiteáil;

(c)	gur faide ná 3 bliana an tréimhse aisghabhála dá dtagraítear in Airteagal 22a(1), an dara fomhír, pointe (a), de Rialachán Tarmligthe (AE) 2019/331;

(d)	nár tharla go fóill dálaí oibriúcháin sonracha na suiteála, lena n-áirítear tréimhsí cothabhála pleanáilte nó neamhphleanáilte, ar cinneadh an tréimhse aisghabhála ina leith;

(e)	gur mó costais infheistíochta na moltaí ná na tairseacha a liostaítear in Airteagal 22a(1), an dara fomhír, pointe (b) de Rialachán Tarmligthe (AE) 2019/331;

(f)

gur cuireadh bearta eile chun feidhme le linn na tréimhse bonnlíne ábhartha nó ina diaidh agus gur eascair astu laghduithe ar astaíochtaí gás ceaptha teasa atá coibhéiseach leis na laghduithe a mholtar sa tuarascáil iniúchóireachta fuinnimh nó córas bainistíochta fuinnimh deimhnithe le haghaidh na suiteála.

2.   I gcás nach sonraítear an tréimhse aisghabhála dá dtagraítear in Airteagal 22a(1), an dara fomhír, pointe (a), de Rialachán Tarmligthe (AE) 2019/331 sa tuarascáil iniúchóireachta fuinnimh, sa chóras bainistíochta fuinnimh deimhnithe nó i ndearbhú faoi mhionn ón iniúchóir fuinnimh, seiceálfaidh an fíoraitheoir an méid seo a leanas:

(a)	bailíocht na faisnéise a úsáidtear chun an tréimhse aisghabhála a chinneadh;

(b)	cur i bhfeidhm ceart an mhodha a úsáidtear chun an tréimhse aisghabhála a chinneadh.

3.   Chun measúnú a dhéanamh ar chur chun feidhme na mbeart dá dtagraítear i mír 1, pointe (f), seiceálfaidh agus deimhneoidh an fíoraitheoir an méid seo a leanas:

(a)	gur chuir an t-oibreoir na bearta malartacha chun feidhme agus ar tugadh cur chun feidhme na mbeart sin i gcrích;

(b)	gur baineadh amach laghduithe coibhéiseacha ar astaíochtaí gás ceaptha teasa dá dtagraítear i mír 1, pointe (f).’

1.   De mhaolú ar Airteagal 21(1), féadfaidh an fíoraitheoir a chinneadh cuairt fhíorúil a thabhairt ar an láithreán chun tuarascáil oibreora aerárthaigh a fhíorú i gcásanna eile nach gcumhdaítear le hAirteagal 34a. Beidh an cinneadh ón bhfíoraitheoir cuairt fhíorúil a thabhairt ar an láithreán bunaithe ar thoradh na hanailíse riosca agus tar éis a chinneadh gur féidir leis an bhfíoraitheoir na sonraí ábhartha uile a rochtain go cianda. Cuirfidh an fíoraitheoir an t-oibreoir aerárthaigh ar an eolas faoina chinneadh cuairt fhíorúil a thabhairt ar an láithreán gan moill mhíchuí.

2.   Déanfaidh an fíoraitheoir bearta chun an riosca fíorúcháin a laghdú chuig leibhéal inghlactha chun dearbhú réasúnach a fháil go bhfuil tuarascáil an oibreora aerárthaigh saor ó mhíráitis ábhartha.

3.   I gcásanna eile seachas na cásanna sin a chumhdaítear le hAirteagal 34a, tabharfaidh an fíoraitheoir cuairt fhisiceach ar an láithreán i gcónaí in aon cheann de na cásanna seo a leanas:

(a)	nuair a fhíoraíonn an fíoraitheoir tuarascáil astaíochtaí an oibreora aerárthaigh den chéad uair;

(b)	i gcás nach ndearna fíoraitheoir cuairt fhisiceach ar an láithreán in dhá thréimhse thuairiscithe go díreach roimh an tréimhse tuairiscithe atá ann faoi láthair;

(c)	más rud é, le linn na tréimhse tuairiscithe, go ndearnadh modhnuithe nach beag ar an bplean faireacháin lena n-áirítear na modhnuithe dá dtagraítear in Airteagal 15(4) de Rialachán Cur Chun Feidhme (AE) 2018/2066;

(d)	más rud é, le haghaidh na tréimhse tuairiscithe roimhe sin, nach siombail A an figiúr maidir le stádas comhlíontachta i gClárlann an Aontais dá dtagraítear i dtábla XIV-I d’Iarscríbhinn XIII a ghabhann le Rialachán Tarmligthe (AE) 2019/1122 (*2) ón gCoimisiún.

4.   Ní bheidh feidhm ag mír 3, pointe (d), i gcás ina bhfuil an t-oibreoir aerárthaigh incháilithe le haghaidh fíorú simplithe i gcomhréir le hAirteagal 33(2).’;

1.   Beidh úsáideoirí ábalta brath ar thuarascáil fíoraithe ó eintiteas rialáilte. Léireoidh sí go dílis an méid a mhaítear go léiríonn sí nó an méid a bhféadfaí coinne a bheith leis go réasúnach go léireodh sí.

2.   Beidh an próiseas fíorúcháin tuarascála ó eintiteas rialáilte ina uirlis éifeachtach agus iontaofa chun tacú le nósanna imeachta dearbhaithe cáilíochta agus rialaithe cáilíochta, lena soláthraítear faisnéis ar féidir le heintiteas rialáilte gníomhú ina leith chun feabhas a chur ar fheidhmíocht maidir le faireachán agus tuairisciú astaíochtaí.

1.   Déanfaidh an fíoraitheoir an fíorú agus na gníomhaíochtaí a cheanglaítear leis an gCaibidil seo agus é ina aidhm aige tuarascáil fíorúcháin a sholáthar ina gcinnfear le dearbhú réasúnta go bhfuil tuarascáil an eintitis rialáilte saor ó mhíráitis ábhartha.

2.   Déanfaidh an fíoraitheoir an fíorú a phleanáil agus a dhéanamh de mheon an sceipteachais ghairmiúil, ag aithint dó go bhféadfadh sé go bhfuil imthosca ann a fhágann go bhfuil míráitis ábhartha san fhaisnéis i dtuarascáil an eintitis rialáilte.

3.   Ní mór don fhíoraitheoir fíorú a dhéanamh ar mhaithe le leas an phobail, agus a bheith neamhspleách ar an eintiteas rialáilte agus ar na húdaráis inniúla atá freagrach as Treoir 2003/87/CE.

4.   Le linn an fhíoraithe, déanfaidh an fíoraitheoir measúnú ar an méid seo a leanas:

(a)	go bhfuil tuarascáil an eintitis rialáilte iomlán agus go gcomhlíonann sí na ceanglais a leagtar síos in Iarscríbhinní X agus Xb a ghabhann le Rialachán Cur Chun Feidhme (AE) 2018/2066;

(b)	gur ghníomhaigh an t-eintiteas rialáilte i gcomhréir le ceanglais an cheada astaíochtaí gás ceaptha teasa agus leis an bplean faireacháin a d’fhormheas an t-údarás inniúil;

(c)	go bhfuil na sonraí i dtuarascáil an eintitis rialáilte saor ó mhíráitis ábhartha;

(d)	gur féidir faisnéis a sholáthar chun tacú le sreabhadh sonraí, córas rialúcháin agus nósanna imeachta gaolmhara an eintitis rialáilte chun feabhas a chur ar fheidhmíocht faireacháin agus tuairiscithe an eintitis rialáilte.

Chun críoch phointe (c) den chéad fhomhír, gheobhaidh an fíoraitheoir fianaise shoiléir oibiachtúil ón eintiteas rialáilte chun tacú le tuairisciú na hastaíochtaí comhiomlánaithe, agus an fhaisnéis eile ar fad a sholáthraítear i dtuarascáil an eintitis rialáilte á cur san áireamh.

5.   Cuirfidh an fíoraitheoir comhairle ar an eintiteas rialáilte an formheas is gá a fháil ón údarás inniúil sna cásanna seo a leanas:

(a)	níor fhormheas an t-údarás inniúil an plean faireacháin de bhun Airteagal 75b(2) de Rialachán Cur Chun Feidhme (AE) 2018/2066;

(b)	tá an plean faireacháin neamhiomlán;

(c)	rinneadh modhnuithe nach beag i gcomhréir le hAirteagal 75b(3) de Rialachán Cur Chun Feidhme (AE) 2018/2066 le linn na tréimhse tuairiscithe agus níor fhormheas an t-údarás inniúil iad dá réir sin.

Tar éis don údarás inniúil é a fhormheas, leanfaidh an fíoraitheoir de na gníomhaíochtaí fíoraithe, déanfaidh sé iad an athuair nó a oiriúnú dá réir. Mura bhfuarthas an formheas sular eisíodh an tuarascáil fíorúcháin, tuairisceoidh an fíoraitheoir é sin sa tuarascáil fíorúcháin.

6.   Má fhaigheann an fíoraitheoir amach nach bhfuil eintiteas rialáilte ag comhlíonadh Rialachán Cur Chun Feidhme (AE) 2018/2066, áireofar an neamhrialtacht sin sa tuarascáil fíorúcháin fiú má d’fhormheas an t-údarás inniúil an plean faireacháin lena mbaineann.

1.   Sula nglacfaidh fíoraitheoir le fíorú a dhéanamh, gheobhaidh fíoraitheoir tuiscint cheart ar an eintiteas rialáilte agus déanfaidh sé measúnú i dtaobh an féidir leis tabhairt faoin bhfíorú. Chun na críche sin, déanfaidh an fíoraitheoir an méid seo a leanas ar a laghad:

(a)	meastóireacht ar na rioscaí atá i gceist chun tuarascáil an eintitis rialáilte a fhíorú i gcomhréir leis an Rialachán seo;

(b)	athbhreithniú ar an bhfaisnéis arna soláthar ag an eintiteas rialáilte chun raon feidhme an fhíorúcháin a chinneadh;

(c)	measúnú i dtaobh an dtagann an fíorú faoi raon feidhme an chreidiúnaithe;

(d)

measúnú i dtaobh an bhfuil an inniúlacht, an pearsanra agus na hacmhainní is gá aige chun foireann fíorúcháin a roghnú a bheidh in ann déileáil le castacht ghníomhaíochtaí agus chabhlach an eintitis rialáilte agus an bhfuil sé ar a chumas na gníomhaíochtaí fíorúcháin a chur i gcrích go rathúil laistigh den tréimhse ama is gá;

(e)	measúnú an bhfuil sé in ann a áirithiú go bhfuil an inniúlacht ar fad ag an bhfoireann fíorúcháin ionchasach atá ar fáil dó, agus ag na daoine is gá chun gníomhaíochtaí fíorúcháin a dhéanamh le haghaidh an eintitis rialáilte shonraigh sin;

(f)	an leithdháileadh ama is gá chun an fíorú a dhéanamh i gceart a chinneadh, le haghaidh gach rannpháirtíochta fíorúcháin a iarrtar.

2.   Soláthróidh an t-eintiteas rialáilte an fhaisnéis ábhartha uile don fhíoraitheoir a chuirfidh ar a chumas don fhíoraitheoir na gníomhaíochtaí dá dtagraítear i mír 1 a dhéanamh.

1.   Agus an leithdháileadh ama á chinneadh ag an bhfíoraitheoir le haghaidh fíorú dá dtagraítear in Airteagal 43c(1), pointe (f), cuirfidh sé an méid seo a leanas ar a laghad san áireamh:

(a)	castacht an eintitis rialáilte;

(b)	leibhéal na faisnéise agus castacht an phlean faireacháin arna fhormheas ag an údarás inniúil;

(c)	an tairseach ábharthachta is gá;

(d)	castacht agus iomláine na ngníomhaíochtaí sreafa sonraí agus córas rialaithe an eintitis rialáilte;

(e)	suíomh na faisnéise agus na sonraí a bhaineann le hastaíochtaí gás ceaptha teasa.

2.   Áiritheoidh an fíoraitheoir go ndéanfar foráil sa chonradh fíorúcháin maidir leis an bhféidearthacht go ngearrfar am breise anuas ar an am a chomhaontaítear sa chonradh, i gcás ina bhfaighfear amach go bhfuil gá leis an am breise sin le haghaidh na hanailíse straitéisí, na hanailíse riosca nó na ngníomhaíochtaí fíorúcháin eile. Áireofar an méid seo a leanas ar a laghad sna cásanna ina bhféadfadh gá a bheith leis an am breise:

(a)	le linn an fhíorúcháin i gcás ina ndealraíonn sé go bhfuil gníomhaíochtaí sreafa sonraí, gníomhaíochtaí rialaithe nó lóistíocht an eintitis rialáilte níos casta ná mar a bhí coinne leis ar dtús;

(b)	i gcás ina n-aithníonn an fíoraitheoir míráitis, neamh-chomhréireachtaí, sonraí neamhleora nó earráidí sna tacair sonraí le linn an fhíoraithe.

3.   Déanfaidh an fíoraitheoir an t-am a leithdháiltear sa doiciméadacht fíorúcháin inmheánach a thaifeadadh.

1.   Roimh an anailís straitéiseach agus ag pointí eile ama le linn an fhíoraithe, soláthróidh an t-eintiteas rialáilte an fhaisnéis uile seo a leanas don fhíoraitheoir:

(a)	cead astaíochtaí gás ceaptha teasa an eintitis rialáilte;

(b)	an leagan is déanaí de phlean faireacháin an eintitis rialáilte chomh maith le haon leagan ábhartha eile den phlean faireacháin a d’fhormheas an t-údarás inniúil, lena n-áirítear fianaise ar an bhformheas sin;

(c)	tuairisc ar ghníomhaíochtaí sreafa sonraí an eintitis rialáilte;

(d)	measúnú riosca an eintitis rialáilte, i gcomhréir le hAirteagal 59(2), pointe (a), agus Airteagal 75o de Rialachán Cur Chun Feidhme (AE) 2018/2066, agus achoimre ar an gcóras rialaithe foriomlán;

(e)	na nósanna imeachta a luaitear sa phlean faireacháin a d’fhormheas an t-údarás inniúil, lena n-áirítear nósanna imeachta ghníomhaíochtaí sreafa sonraí agus ghníomhaíochtaí rialaithe;

(f)	tuarascáil an eintitis rialáilte, lena n-áirítear an fhaisnéis arna tuairisciú a liostaítear in Iarscríbhinn Xb a ghabhann le Rialachán Cur Chun Feidhme (AE) 2018/2066;

(g)

an fhaisnéis a liostaítear in Iarscríbhinn Xa a ghabhann le Rialachán Cur Chun Feidhme (AE) 2018/2066, i gcás ina bhfuil an fhaisnéis i dtuarascáil an oibreora, an oibreora aerárthaigh nó na cuideachta loingseoireachta faighte ag an eintiteas rialáilte, i gcomhréir le hAirteagal 75v(2) den Rialachán Cur Chun Feidhme sin;

(h)

i gcás ina bhfuair an t-eintiteas rialáilte an fhaisnéis i dtuarascáil an oibreora, an oibreora aerárthaigh nó na cuideachta loingseoireachta de bhun Iarscríbhinn Xa a ghabhann le Rialachán Cur Chun Feidhme (AE) 2018/2066, aon bharúil nó toradh a bhaineann leis an eintiteas rialáilte sin a thuairiscigh an fíoraitheoir sa tuarascáil fíorúcháin, fíoraitheoir a raibh tuarascáil an oibreora, an oibreora aerárthaigh nó na cuideachta loingseoireachta á fíorú aige i gcomhréir le hAirteagal 27(3), pointí (l), (o), (re) agus (s), den Rialachán seo;

(i)	i gcás inarb infheidhme, plean samplála an eintitis rialáilte, dá dtagraítear in Airteagal 33 agus Airteagal 75k(1) de Rialachán Cur Chun Feidhme (AE) 2018/2066, arna fhormheas ag an údarás inniúil;

(j)	i gcás inar modhnaíodh an plean faireacháin le linn na tréimhse tuairiscithe, taifead ar na modhnuithe sin uile i gcomhréir le hAirteagal 16(3) agus Airteagal 75b(1) de Rialachán Cur Chun Feidhme (AE) 2018/2066;

(k)	i gcás inarb infheidhme, na tuarascálacha dá dtagraítear in Airteagal 75q de Rialachán Cur Chun Feidhme (AE) 2018/2066;

(l)	i gcás nach ndearna an fíoraitheoir an fíorú le haghaidh an eintitis rialáilte an bhliain roimhe sin, an tuarascáil fíorúcháin ón mbliain roimhe sin;

(m)	gach comhfhreagras ábhartha leis an údarás inniúil, go háirithe faisnéis a bhaineann le fógra a thabhairt faoi mhodhnuithe ar an bplean faireacháin chomh maith le ceartúcháin ar na sonraí a tuairiscíodh;

(n)	i gcás inarb infheidhme, formheas ón údarás inniúil gan cuairteanna ar an láithreán a dhéanamh de bhun Airteagal 43v agus Airteagal 43w den Rialachán seo;

(o)	fianaise an eintitis rialáilte lena léirítear comhlíontacht leis na tairseacha éiginnteachta le haghaidh na sraitheanna a leagtar síos sa phlean faireacháin;

(p)	aon fhaisnéis ábhartha eile is gá chun an fíorú a phleanáil agus a dhéanamh.

2.   Sula n-eiseoidh an fíoraitheoir an tuarascáil fíorúcháin, cuirfidh an t-eintiteas rialáilte tuarascáil chríochnaitheach ón eintiteas rialáilte ar fáil dó arna húdarú agus arna bailíochtú go hinmheánach.

1.   Ag tús an fhíoraithe, déanfaidh an fíoraitheoir cineál, scála agus castacht dhóchúil na gcúraimí fíorúcháin a mheasúnú trí anailís straitéiseach a dhéanamh ar na gníomhaíochtaí uile is ábhartha don eintiteas rialáilte.

2.   Chun tuiscint a fháil ar na gníomhaíochtaí a dhéanann an t-eintiteas rialáilte, baileoidh agus athbhreithneoidh an fíoraitheoir an fhaisnéis is gá chun a mheasúnú an bhfuil dóthain inniúlachtaí ag an bhfoireann fíorúcháin chun an fíorú a dhéanamh, chun a chinneadh a gur socraíodh an leithdháileadh ama a thugtar le fios sa chonradh i gceart agus chun a áirithiú gur féidir leis an anailís riosca is gá a dhéanamh. Áireofar an méid seo a leanas san fhaisnéis sin ar a laghad:

(a)	an fhaisnéis dá dtagraítear in Airteagal 43e(1);

(b)	an tairseach ábharthachta is gá;

(c)	an fhaisnéis a fuarthas ón bhfíorú i mblianta roimhe seo, má tá an fíorú á dhéanamh ag an bhfíoraitheoir le haghaidh na cuideachta céanna.

3.   Le linn don fhíoraitheoir an fhaisnéis dá dtagraítear i mír 1 a athbhreithniú, déanfaidh sé na gnéithe seo a leanas a mheasúnú ar a laghad:

(a)	catagóir an eintitis rialáilte chomh maith leis na gníomhaíochtaí earnála lena scaoileann an t-eintiteas rialáilte na breoslaí lena dtomhailt;

(b)	castacht an tslabhra soláthair breosla chomh maith le líon agus cineál na dtomhaltóirí breosla;

(c)	an plean faireacháin a d’fhormheas an t-údarás inniúil chomh maith le sonraíochtaí na modheolaíochta faireacháin agus na bhfachtóirí raoin feidhme a leagtar síos sa phlean faireacháin sin, de bhun Chaibidil VIIa de Rialachán Cur Chun Feidhme (AE) 2018/2066;

(d)	cineál, scála agus castacht na sruthanna breosla chomh maith leis an trealamh, na foinsí sonraí agus na próisis a úsáidtear chun na méideanna breosla a scaoileadh a chinneadh, tionscnamh agus cur i bhfeidhm na bhfachtóirí ríofa agus na foinsí sonraí príomhúla eile;

(e)	na gníomhaíochtaí sreafa sonraí, an córas rialúcháin agus an timpeallacht rialaithe.

4.   Le linn don fhíoraitheoir an anailís straitéiseach a dhéanamh, ba cheart dó na nithe seo a leanas a sheiceáil:

(a)	an é an plean faireacháin a cuireadh faoina bhráid an leagan is déanaí agus, i gcás inar gá, ar fhormheas an t-údarás inniúil é;

(b)	an ndearnadh aon mhodhnú ar an bplean faireacháin le linn na tréimhse tuairiscithe;

(c)

i gcás inarb infheidhme, ar tugadh fógra don údarás inniúil faoi na modhnuithe dá dtagraítear i bpointe (b) den mhír seo de bhun Airteagail 15(1) agus 75b(1) nó Airteagal 75g de Rialachán Cur Chun Feidhme (AE) 2018/2066 nó ar fhormheas an t-údarás inniúil iad i gcomhréir le hAirteagail 15(2) agus 75b(1) de Rialachán Cur Chun Feidhme (AE) 2018/2066.

1.   Sainaithneoidh an fíoraitheoir na heilimintí seo a leanas agus déanfaidh sé anailísiú orthu chun fíorú éifeachtach a dhearadh, a phleanáil agus a chur chun feidhme:

(a)	na rioscaí fréimhíochta;

(b)	na gníomhaíochtaí rialaithe;

(c)	i gcás inar cuireadh gníomhaíochtaí rialaithe dá dtagraítear i bpointe (b) chun feidhme, na rioscaí rialaithe a bhaineann le héifeachtacht na ngníomhaíochtaí rialaithe sin.

2.   Agus na heilimintí dá dtagraítear i mír 1 den Airteagal seo á sainaithint agus á n-anailísiú ag an bhfíoraitheoir, breithneoidh an fíoraitheoir an méid seo a leanas ar a laghad:

(a)	torthaí na hanailíse straitéisí dá dtagraítear in Airteagal 43f(1);

(b)	an fhaisnéis dá dtagraítear in Airteagal 43e agus in Airteagal 43f(2), pointe (c);

(c)	an tairseach ábharthachta dá dtagraítear in Airteagal 43f(2), pointe (b).

3.   Má chinneann an fíoraitheoir nár shainaithin an t-eintiteas rialáilte na rioscaí fréimhíochta agus na rioscaí rialaithe ábhartha ina mheasúnú riosca, cuirfidh an fíoraitheoir an t-eintiteas rialáilte ar an eolas faoi sin.

4.   I gcás inarb iomchuí, de réir na faisnéise a fuarthas le linn an fhíoraithe, déanfaidh an fíoraitheoir an anailís riosca a athbhreithniú agus na gníomhaíochtaí fíorúcháin a bheidh le déanamh a mhodhnú nó a athdhéanamh.

1.   Dréachtóidh an fíoraitheoir plean fíorúcháin a bheidh ag teacht leis an bhfaisnéis a gheofar agus na rioscaí a shainaithneofar le linn na hanailíse straitéisí agus na hanailíse riosca, ina gcuimseofar an méid seo a leanas ar a laghad:

(a)	clár fíorúcháin ina dtugtar tuairisc ar chineál agus ar raon feidhme na ngníomhaíochtaí fíorúcháin mar aon leis an am agus an bealach a dhéanfar na gníomhaíochtaí sin;

(b)	plean trialach ina leagtar amach an raon feidhme agus na modhanna chun na gníomhaíochtaí rialaithe a thástáil chomh maith leis na nósanna imeachta um ghníomhaíochtaí rialaithe;

(c)	plean samplála sonraí ina leagtar amach raon feidhme agus modhanna na samplála sonraí a bhaineann le pointí sonraí is bun leis na hastaíochtaí comhiomlánaithe i dtuarascáil an eintitis rialáilte.

2.   Bunóidh an fíoraitheoir an plean tástála dá dtagraítear i mír 1, pointe (b), den Airteagal seo ar bhealach lenar féidir leis a chinneadh a mhéid is féidir brath ar na gníomhaíochtaí rialaithe ábhartha chun measúnú a dhéanamh ar chomhlíontacht leis na ceanglais a leagtar amach in Airteagal 43b(4), pointí (b) agus (c).

Agus an méid samplála agus na gníomhaíochtaí samplála á gcinneadh chun na gníomhaíochtaí rialaithe a thástáil, cuirfidh an fíoraitheoir na heilimintí seo a leanas san áireamh:

(a)	na rioscaí fréimhíochta;

(b)	an timpeallacht rialaithe;

(c)	na gníomhaíochtaí rialaithe ábhartha;

(d)	an ceanglas chun tuairim maidir leis an bhfíorú a sholáthar le dearbhú réasúnta.

3.   Agus an méid samplála agus na gníomhaíochtaí samplála á gcinneadh chun sonraí a shampláil dá dtagraítear i mír 1, pointe (c), cuirfidh an fíoraitheoir na heilimintí seo a leanas san áireamh:

(a)	na rioscaí fréimhíochta agus na rioscaí riosca rialaithe;

(b)	torthaí na nósanna imeachta anailíseacha;

(c)	an ceanglas chun tuairim maidir leis an bhfíorú a sholáthar le dearbhú réasúnta;

(d)	an tairseach ábharthachta;

(e)	ábharthacht an mhéid a chuir eilimint sonraí aonair leo le haghaidh an tacair sonraí fhoriomláin.

4.   Bunóidh an fíoraitheoir plean fíorúcháin agus cuirfidh sé chun feidhme é ar bhealach lena laghdaítear an riosca fíorúcháin chuig leibhéal inghlactha chun dearbhú réasúnach a fháil go bhfuil tuarascáil an eintitis rialáilte saor ó mhíráitis ábhartha.

5.   Déanfaidh an fíoraitheoir an anailís riosca agus an plean fíorúcháin a nuashonrú, agus déanfaidh sé na gníomhaíochtaí fíorúcháin a oiriúnú le linn an fhíorúcháin más rud é go n-aimsíonn sé rioscaí breise is gá a laghdú nó más rud é gur lú an riosca iarbhír ná mar a bhí coinne leis ar dtús.

1.   Úsáidfidh an fíoraitheoir nósanna imeachta anailíseacha chun sochreidteacht agus iomláine na sonraí a mheasúnú i gcás ina léiríonn an riosca fréimhíochta, an riosca rialaithe agus oiriúnacht ghníomhaíochtaí rialaithe an eintitis rialáilte an gá atá le nósanna imeachta anailíseacha den sórt sin.

2.   Agus na nósanna imeachta anailíseacha dá dtagraítear i mír 1 á gcur i gcrích ag an bhfíoraitheoir, déanfaidh sé measúnú ar na sonraí tuairiscithe chun réimsí riosca a d’fhéadfadh a bheith ann a shainaithint agus chun na gníomhaíochtaí fíorúcháin atá beartaithe a bhailíochtú agus a chur in oiriúint ina dhiaidh sin. Déanfaidh an fíoraitheoir an méid seo a leanas ar a laghad:

(a)	measúnú ar shochreidteacht luaineachtaí agus treochtaí le himeacht ama nó idir ítimí inchomparáide;

(b)	asluitigh láithreacha, sonraí gan choinne agus bearnaí sonraí a shainaithint.

3.   Agus na nósanna imeachta anailíseacha dá dtagraítear i mír 1 á gcur i bhfeidhm ag an bhfíoraitheoir, déanfaidh sé na nósanna imeachta seo a leanas:

(a)	réamhnósanna imeachta anailíseacha maidir le sonraí comhiomlánaithe sula ndéanfar na gníomhaíochtaí dá dtagraítear in Airteagal 43i chun tuiscint a fháil ar chineál, castacht agus ábharthacht na sonraí tuairiscithe;

(b)	nósanna imeachta anailíseacha substainteacha maidir leis na sonraí comhiomlánaithe agus na pointí sonraí is bun leis na sonraí sin chun earráidí struchtúracha a d’fhéadfadh a bheith ann agus asluitigh láithreacha a shainaithint;

(c)	nósanna imeachta anailíseacha deiridh maidir leis na sonraí comhiomlánaithe chun a áirithiú gur réitíodh i gceart gach earráid a sainaithníodh le linn an phróisis fíorúcháin.

4.   I gcás ina sainaithníonn an fíoraitheoir asluitigh, luaineachtaí, treochtaí, bearnaí sonraí nó sonraí nach bhfuil comhsheasmhach le faisnéis ábhartha eile nó a bhfuil éagsúlacht nach beag idir iad agus na méideanna nó cóimheasa a raibh coinne leo, gheobhaidh an fíoraitheoir mínithe ón eintiteas rialáilte agus fianaise ábhartha bhreise ag gabháil leo.

Ar bhonn na mínithe agus na fianaise breise a chuirfear ar fáil, déanfaidh an fíoraitheoir measúnú ar an tionchar ar an bplean fíorúcháin agus ar na gníomhaíochtaí fíorúcháin atá le déanamh.

1.   Fíoróidh an fíoraitheoir na sonraí i dtuarascáil an eintitis rialáilte trí thástáil mhionsonraithe ar na sonraí a chur i bhfeidhm, lena n-áirítear trí na sonraí a rianú ar ais go dtí an fhoinse sonraí phríomhúil, sonraí a chros-seiceáil le foinsí sonraí seachtracha, réitigh a dhéanamh, tairseacha maidir le sonraí iomchuí a sheiceáil agus athríomhanna a dhéanamh.

2.   Agus na sonraí dá dtagraítear i mír 1 á bhfíorú agus an plean faireacháin formheasta á chur san áireamh, lena n-áirítear na nósanna imeachta a bhfuil tuairisc orthu sa phlean sin, seiceálfaidh an fíoraitheoir an méid seo a leanas:

(a)	teorainneacha faireacháin an eintitis rialáilte, lena n-áirítear na suíomhanna óna scaoiltear breosla chuig an tomhaltóir;

(b)	iomláine na sreabh breosla arna scaoileadh mar a thuairiscítear sa phlean faireacháin a d’fhormheas an t-údarás inniúil chomh maith leis na méideanna breosla agus na sonraí astaíochtaí gaolmhara;

(c)	an chomhsheasmhacht idir méideanna comhiomlánaithe breosla arna scaoileadh agus sonraí maidir le breosla arna cheannach nó arna sholáthar ar bhealach eile don eintiteas rialáilte;

(d)	comhsheasmhacht na sonraí tuairiscithe comhiomlánaithe i dtuarascáil an eintitis rialáilte le sonraí foinse príomhúla;

(e)	iontaofacht agus cruinneas na sonraí.

1.   Seiceálfaidh an fíoraitheoir cur i bhfeidhm agus cur chun feidhme ceart na modheolaíochta faireacháin a d’fhormheas an t-údarás inniúil sa phlean faireacháin lena n-áirítear sonraí sonracha na modheolaíochta faireacháin sin.

2.   Chun tuarascáil astaíochtaí an eintitis rialáilte a fhíorú, seiceálfaidh an fíoraitheoir cur i bhfeidhm agus cur chun feidhme ceart an phlean samplála dá dtagraítear in Airteagail 33 agus 75k de Rialachán Cur Chun Feidhme (AE) 2018/2066, mar a d’fhormheas an t-údarás inniúil é.

3.   I gcás ina gceanglaítear le Rialachán Cur Chun Feidhme (AE) 2018/2066 ar an eintiteas rialáilte comhlíontacht leis na tairseacha éiginnteachta le haghaidh sonraí gníomhaíochta agus fachtóirí ríofa a léiriú, deimhneoidh an fíoraitheoir bailíocht na faisnéise a úsáideadh chun na leibhéil éiginnteachta a leagtar amach sa phlean faireacháin formheasta a ríomh.

4.   Agus an mhodheolaíocht faireacháin dá dtagraítear i mír 1 den Airteagal seo á seiceáil, seiceálfaidh an fíoraitheoir cur i bhfeidhm agus cur chun feidhme ceart an mhodha chun an fachtóir raoin feidhme a chinneadh, mar a leagtar síos é sa phlean faireacháin a d’fhormheas an t-údarás inniúil, de bhun Chaibidil VIIa de Rialachán Cur Chun Feidhme (AE) 2018/2066.

5.   Seiceálfaidh an fíoraitheoir fianaise an eintitis rialáilte lena léirítear ar scaoileadh an breosla lena thomhailt in earnálacha a chumhdaítear le Caibidil III de Threoir 2003/87/CE.

6.   Chun a mheasúnú ar úsáideadh na breoslaí arna scaoileadh lena dtomhailt in earnálacha a chumhdaítear le Caibidil III de Threoir 2003/87/CE san aon bhliain tuairiscithe amháin agus an féidir iad a asbhaint i gcomhréir le hAirteagal 75v(4) de Rialachán Cur Chun Feidhme (AE) 2018/2066, seiceálfaidh an fíoraitheoir an chomhsheasmhacht idir an fhaisnéis dá dtagraítear in Airteagal 43e(1), pointe (g), den Rialachán seo leis an bhfaisnéis i dtuarascáil an eintitis rialáilte a bhaineann le hIarscríbhinn Xb a ghabhann le Rialachán Cur Chun Feidhme (AE) 2018/2066.

1.   I gcás inar úsáideadh modhanna a leagtar síos sa phlean faireacháin arna fhormheas ag an údarás inniúil chun sonraí in easnamh a chomhlánú de bhun Airteagal 66 agus Airteagal 75o de Rialachán Cur Chun Feidhme (AE) 2018/2066, seiceálfaidh an fíoraitheoir arbh iad modhanna is iomchuí don chás sonrach a úsáid, agus ar cuireadh i bhfeidhm i gceart iad.

Má fhaigheann an t-eintiteas rialáilte formheas ón údarás inniúil chun modhanna eile a úsáid nach na modhanna sin iad dá dtagraítear sa chéad fhomhír den mhír seo i gcomhréir le hAirteagal 66 agus Airteagal 75o de Rialachán Cur Chun Feidhme (AE) 2018/2066, seiceálfaidh an fíoraitheoir ar cuireadh an cur chuige formheasta i bhfeidhm i gceart agus an ndearnadh doiciméadú iomchuí air.

I gcás nach féidir leis an eintiteas rialáilte an formheas sin a fháil in am, seiceálfaidh an fíoraitheoir an áirithítear leis an gcur chuige a úsáideann an t-eintiteas rialáilte chun na sonraí atá in easnamh a chomhlánú nach ndéantar gannmheastachán ar na hastaíochtaí agus nach n-eascraíonn míráitis ábhartha as an gcur chuige sin.

2.   Seiceálfaidh an fíoraitheoir éifeachtacht na ngníomhaíochtaí rialaithe arna gcur chun feidhme ag eintiteas rialáilte chun sonraí in easnamh a chosc dá dtagraítear in Airteagail 66 agus 75o de Rialachán Cur Chun Feidhme (AE) 2018/2066.

1.   Agus comhréireacht na ngníomhaíochtaí rialaithe agus na nósanna imeachta dá dtagraítear in Airteagal 43i, pointí (b) agus (c) á seiceáil ag an bhfíoraithe, nó nuair a bheidh na seiceálacha dá dtagraítear in Airteagail 43j agus 43k á ndéanamh aige, féadfaidh an fíoraitheoir modhanna samplála a úsáid a bhaineann go sonrach le heintiteas rialáilte ar choinníoll go mbeidh údar le sampláil ar bhonn na hanailíse riosca.

2.   I gcás ina sainaithníonn an fíoraitheoir neamh-chomhréireacht nó míráiteas le linn na samplála, iarrfaidh sé ar an eintiteas rialáilte na príomhchúiseanna leis an neamh-chomhréireacht nó leis an míráiteas a mhíniú chun measúnú a dhéanamh ar thionchar na neamh-chomhréireachta nó an mhíráitis ar na sonraí a tuairiscíodh. Ar bhonn thoradh an mheasúnaithe sin, cinnfidh an fíoraitheoir an bhfuil gá le gníomhaíochtaí fíorúcháin breise, an gá an méid samplála a mhéadú, agus cén chuid dhaonra na sonraí a chaithfidh an t-eintiteas rialáilte a cheartú.

3.   Doiciméadóidh an fíoraitheoir toradh na seiceálacha dá dtagraítear in Airteagail 43i go 43l, lena n-áirítear sonraí na samplaí breise, sa doiciméadacht fíorúcháin inmheánach.

1.   Má shainaithníonn an fíoraitheoir míráitis, neamh-chomhréireachtaí nó neamhchomhlíontacht le Rialachán Cur Chun Feidhme (AE) 2018/2066, le linn an fhíoraithe, cuirfidh sé an t-eintiteas rialáilte ar an eolas faoi sin ar go tráthúil agus iarrfaidh sé ceartúcháin ábhartha. Ceartóidh an t-eintiteas rialáilte aon mhíráiteas nó neamh-chomhréireacht a cuireadh in iúl.

I gcás inar sainaithníodh neamhchomhlíontacht le Rialachán Cur Chun Feidhme (AE) 2018/2066, tabharfaidh an t-eintiteas rialáilte fógra don údarás inniúil agus ceartóidh sé an neamhchomhlíontacht de réir mar is iomchuí gan moill mhíchuí.

2.   Maidir le gach míráiteas, neamh-chomhréireacht nó neamhchomhlíontacht le Rialachán Cur Chun Feidhme (AE) 2018/2066 a cheartaigh an t-eintiteas rialáilte le linn an fhíoraithe, déanfaidh an fíoraitheoir iad a dhoiciméadú agus a mharcáil mar míráitis, neamh-chomhréireachtaí nó neamhchomhlíontachtaí a réitíodh sa doiciméadacht fíorúcháin inmheánach.

3.   Mura gceartaíonn an t-eintiteas rialáilte na míráitis nó na neamh-chomhréireachtaí a chuir an fíoraitheoir in iúl dó i gcomhréir le mír 1 sula n-eiseoidh an fíoraitheoir an tuarascáil fíorúcháin, iarrfaidh an fíoraitheoir ar an eintiteas rialáilte na príomhchúiseanna leis an neamh-chomhréireacht nó leis an míráiteas a mhíniú chun measúnú a dhéanamh ar thionchar na neamh-chomhréireachtaí nó na míráiteas ar na sonraí tuairiscithe.

Cinnfidh an fíoraitheoir an bhfuil éifeacht ábhartha ag na míráitis neamhcheartaithe, ina n-aonar nó nuair a chomhiomlánaítear iad le míráitis eile, ar na hastaíochtaí iomlána tuairiscithe. Agus measúnú á dhéanamh ar ábharthacht na míráiteas, breithneoidh an fíoraitheoir méid agus cineál an mhíráitis chomh maith leis na himthosca ar leith a bhaineann le tarlú na míráiteas.

Déanfaidh an fíoraitheoir measúnú i dtaobh an mbíonn tionchar ag an neamh-chomhréireacht neamhcheartaithe, go haonarach nó nuair a chomhiomlánaítear í le neamh-chomhréireachtaí eile, ar na sonraí tuairiscithe agus an mbíonn míráiteas ábhartha ann mar thoradh air sin.

Mura gceartaíonn an t-eintiteas rialáilte neamhchomhlíontacht le Rialachán Cur Chun Feidhme (AE) 2018/2066 i gcomhréir le mír 1 sula n-eiseoidh an fíoraitheoir an tuarascáil fíorúcháin, déanfaidh an fíoraitheoir measúnú i dtaobh an bhfuil tionchar ag an neamhchomhlíontacht neamhcheartaithe ar na sonraí tuairiscithe agus an mbíonn míráiteas ábhartha ann mar thoradh air sin.

Féadfaidh an fíoraitheoir míráitis a bhreithniú mar mhíráitis ábhartha fiú má bhíonn na míráitis sin, ina n-aonar nó nuair a chomhiomlánaítear iad le míráitis eile, faoi bhun na tairsí ábharthachta a leagtar amach in Airteagal 43p, i gcás ina bhfuil údar leis an mbreithniú sin i ngeall ar mhéid agus ar chineál na míráiteas agus ar imthosca ar leith a bhaineann le tarlú na míráiteas.

1.   Maidir le heintitis rialáilte a bhfuil astaíochtaí bliantúla acu a bhaineann le breoslaí arna scaoileadh lena dtomhailt atá cothrom le 500 000 tona CO2e nó níos lú ná sin, is í an tairseach ábharthachta 5 % de na hastaíochtaí iomlána tuairiscithe sa tréimhse tuairiscithe atá faoi réir fíorúcháin, chun tuarascálacha ó eintitis rialáilte a fhíorú.

2.   Maidir le heintitis rialáilte a bhfuil astaíochtaí bliantúla acu a bhaineann le breoslaí arna scaoileadh lena dtomhailt is mó ná 500 000 tona CO2e, is í an tairseach ábharthachta 2 % de na hastaíochtaí iomlána tuairiscithe sa tréimhse tuairiscithe atá faoi réir fíorúcháin, chun tuarascálacha ó eintitis rialáilte a fhíorú.

1.   Agus an fíorú á chur i gcrích agus an fhaisnéis a fuarthas le linn an fhíorúcháin á cur san áireamh, déanfaidh an fíoraitheoir an méid seo a leanas:

(a)	seiceáil ar na sonraí deiridh ón eintiteas rialáilte, lena n-áirítear sonraí a coigeartaíodh ar bhonn faisnéis a fuarthas le linn an fhíoraithe;

(b)	athbhreithniú ar na cúiseanna atá ag an eintiteas rialáilte le haon difríocht idir na sonraí deiridh agus na sonraí a soláthraíodh roimhe sin;

(c)	athbhreithniú ar thoradh an mheasúnaithe chun a chinneadh ar cuireadh an plean faireacháin a d’fhormheas an t-údarás inniúil chun feidhme i gceart, lena n-áirítear na nósanna imeachta a dtugtar tuairisc orthu sa phlean sin;

(d)	measúnú i dtaobh an bhfuil an riosca fíorúcháin ar leibhéal íseal atá inghlactha chun dearbhú réasúnta a fháil;

(e)	a áirithiú gur bailíodh fianaise leormhaith ionas gur féidir tuairim maidir leis an bhfíorú a thabhairt le dearbhú réasúnta go bhfuil an tuarascáil saor ó mhíráitis ábhartha;

(f)	a áirithiú go ndéantar an próiseas fíorúcháin a dhoiciméadú go hiomlán sa doiciméadacht fíorúcháin inmheánach agus gur féidir breithiúnas críochnaitheach a thabhairt sa tuarascáil fíorúcháin.

2.   Déanfaidh an fíoraitheoir athbhreithniú neamhspleách i gcomhréir le hAirteagal 25.

3.   Ullmhóidh agus tiomsóidh an fíoraitheoir doiciméadacht fíorúcháin inmheánach ina mbeidh an méid seo a leanas ar a laghad:

(a)	torthaí na ngníomhaíochtaí fíorúcháin a rinneadh;

(b)	an anailís straitéiseach, an anailís riosca agus an plean fíorúcháin;

(c)	faisnéis leormhaith chun tacú leis an tuairim maidir leis an bhfíorú, lena n-áirítear údair le breithiúnais a rinneadh i dtaobh an bhfuil éifeacht ábhartha ag na míráitis a sainaithníodh ar na hastaíochtaí tuairiscithe.

Beidh feidhm ag Airteagal 26(2) agus (3) chun tuarascálacha ó eintiteas rialáilte a fhíorú.

1.   Ar bhonn na faisnéise a bailíodh le linn an fhíorúcháin, eiseoidh an fíoraitheoir tuarascáil fíorúcháin don eintiteas rialáilte maidir le gach tuarascáil astaíochtaí a bhí faoi réir fíorúcháin. Leagfar amach sa tuarascáil fíorúcháin an méid seo a leanas:

(a)	fíoraíodh gur sásúil an tuarascáil;

(b)	an bhfuil míráitis ábhartha i dtuarascáil an eintitis rialáilte nár ceartaíodh sular eisíodh an tuarascáil fíorúcháin;

(c)	an bhfuil raon feidhme an fhíorúcháin rótheoranta de bhun Airteagal 43s agus níorbh fhéidir leis an bhfíoraitheoir fianaise leordhóthanach a fháil chun tuairim maidir leis an bhfíorú a eisiúint maille le dearbhú réasúnta go bhfuil an tuarascáil saor ó mhíráitis ábhartha;

(d)	an dtugann neamh-chomhréireachtaí, ina n-aonar nó in éineacht le neamh-chomhréireachtaí eile, soiléireacht neamhleor agus an bhfágann siad nach féidir leis an bhfíoraitheoir a lua le dearbhú réasúnta go bhfuil tuarascáil an eintitis rialáilte saor ó mhíráitis ábhartha.

Chun críocha na chéad fhomhíre, pointe (a), ní fhéadfar tuarascáil an eintitis rialáilte a fhíorú mar thuarascáil shásúil ach amháin i gcás ina bhfuil tuarascáil an eintitis rialáilte saor ó mhíráitis ábhartha.

2.   Cuirfidh an t-eintiteas rialáilte an tuarascáil fíorúcháin faoi bhráid an údaráis inniúil in éineacht le tuarascáil an eintitis rialáilte atá i gceist.

3.   Beidh na heilimintí seo a leanas ar a laghad sa tuarascáil fíorúcháin:

(a)	ainm an eintitis rialáilte;

(b)	cuspóirí an fhíorúcháin;

(c)	raon feidhme an fhíorúcháin;

(d)	tagairt do thuarascáil an eintitis rialáilte a fíoraíodh;

(e)	na critéir a úsáideadh chun tuarascáil an eintitis rialáilte a fhíorú, lena n-áirítear an cead agus na leaganacha den phlean faireacháin a d’fhormheas an t-údarás inniúil chomh maith le tréimhse bhailíochta gach plean;

(f)	astaíochtaí comhiomlánaithe a bhaineann leis an mbreosla arna scaoileadh lena thomhailt chuig gníomhaíocht dá dtagraítear in Iarscríbhinn III a ghabhann le Treoir 2003/87/CE agus in aghaidh an eintitis rialáilte;

(g)	an tréimhse tuairiscithe atá faoi réir fíorúcháin;

(h)	freagrachtaí an eintitis rialáilte, an údaráis inniúil agus an fhíoraitheora;

(i)	an dearbhú tuairime maidir leis an bhfíorú;

(j)	tuairisc ar aon mhíráiteas agus neamh-chomhréireacht a sainaithníodh nár ceartaíodh sular eisíodh an tuarascáil fíorúcháin;

(k)	na dátaí a ndearnadh na cuairteanna ar an láithreán agus cé a rinne iad, lena n-áirítear dátaí na gcuairteanna fíorúla ar an láithreán;

(l)	faisnéis i dtaobh ar tarscaoileadh aon chuairt ar an láithreán chomh maith leis na cúiseanna le tarscaoileadh na gcuairteanna sin ar an láithreán;

(m)	faisnéis i dtaobh an ndearna cuairt fhíorúil ar an láithreán chomh maith leis na cúiseanna le cuairteanna fíorúla ar an láithreán a dhéanamh agus dáta an fhormheasa ón údarás inniúil;

(n)

deimhniú go ndearna an fíoraitheoir na seiceálacha de bhun Airteagal 43l(6) den Rialachán seo agus go bhfuil an fhaisnéis dá dtagraítear in Airteagal 43e(1), pointe (g), den Rialachán seo comhsheasmhach leis an bhfaisnéis i dtuarascáil an eintitis rialáilte a bhaineann le hIarscríbhinn Xb a ghabhann le Rialachán Cur Chun Feidhme (AE) 2018/2066;

(o)	aon saincheist maidir le neamhchomhlíontacht le Rialachán Cur Chun Feidhme (AE) 2018/2066 a tháinig chun solais le linn an fhíorúcháin;

(p)	mura féidir formheas ón údarás inniúil a fháil in am le haghaidh an mhodha a úsáideadh chun na sonraí atá ar iarraidh a chomhlánú de bhun Airteagal 43m(1), an tríú fomhír, den Rialachán seo, deimhniú an bhfuil an modh a úsáideadh coimeádach agus an mbíonn míráitis ábhartha ann dá thoradh;

(q)	moltaí chun feabhais, i gcás inarb infheidhme;

(r)	ainm an phríomhiniúchóir CTA AE maidir le trádáil astaíochtaí, an athbhreithneora neamhspleách agus, i gcás inarb infheidhme, an iniúchóra CTA AE maidir le trádáil astaíochtaí agus an tsaineolaí theicniúil a bhí rannpháirteach i bhfíorú na tuarascála ón eintiteas rialáilte;

(s)	an dáta agus an síniú ag duine údaraithe thar ceann an fhíoraitheora, lena n-áirítear a ainm.

4.   Tabharfaidh an fíoraitheoir tuairisc sa tuarascáil fíorúcháin ar na míráitis, na neamh-chomhréireachtaí agus an neamhchomhlíontacht le Rialachán Cur Chun Feidhme (AE) 2018/2066 chun go mbeidh an t-eintiteas rialáilte agus an t-údarás inniúil in ann an méid seo a leanas a thuiscint:

(a)	méid agus cineál an mhíráitis, na neamh-chomhréireachta nó na neamhchomhlíontachta le Rialachán Cur Chun Feidhme (AE) 2018/2066;

(b)	an fáth a bhfuil éifeacht ábhartha ag an míráiteas, nó nach bhfuil;

(c)	an eilimint de thuarascáil an eintitis rialáilte dá dtagraíonn an míráiteas, nó an eilimint den phlean faireacháin dá dtagraíonn an neamh-chomhréireacht;

(d)	an tAirteagal i Rialachán Cur Chun Feidhme (AE) 2018/2066 lena mbaineann an neamhchomhlíontacht.

1.   Déanfaidh an fíoraitheoir a mheasúnú ar cheartaigh an t-eintiteas rialáilte na neamh-chomhréireachtaí a léirítear sa tuarascáil fíorúcháin a bhaineann leis an tréimhse faireacháin roimhe sin de réir na gceanglas ar an eintiteas rialáilte dá dtagraítear in Airteagal 75q(4) de Rialachán Cur Chun Feidhme (AE) 2018/2066, i gcás inarb ábhartha.

Murar cheartaigh an t-eintiteas rialáilte na neamh-chomhréireachtaí sin de bhun Airteagal 75q(4) de Rialachán Cur Chun Feidhme (AE) 2018/2066, breithneoidh an fíoraitheoir an méadaíonn an t-easnamh an riosca míráitis nó an bhféadfadh sé an riosca míráitis a mhéadú.

Tuairisceoidh an fíoraitheoir sa tuarascáil fíorúcháin ar réitigh an t-eintiteas rialáilte na neamh-chomhréireachtaí sin.

2.   Déanfaidh an fíoraitheoir sonraí a thaifeadadh sa doiciméadacht fíorúcháin inmheánach maidir le cathain agus conas a réitigh an t-eintiteas rialáilte neamh-chomhréireachtaí arna sainaithint le linn an fhíorúcháin.

1.   I gcás inar shainaithin an fíoraitheoir réimsí ina bhféadfaí feabhas a chur ar fheidhmíocht an eintitis rialáilte a bhaineann le pointí (a) go (d) den mhír seo, áireoidh sé sa tuarascáil fíorúcháin moltaí chun feabhais a bhaineann le feidhmíocht an eintitis rialáilte maidir leis na pointí seo a leanas:

(a)	measúnú riosca an eintitis rialáilte;

(b)	gníomhaíochtaí sreafa sonraí agus gníomhaíochtaí rialaithe a fhorbairt, a dhoiciméadú, a chur chun feidhme agus a choinneáil ar bun mar aon le meastóireacht ar an gcóras rialúcháin;

(c)	nósanna imeachta a fhorbairt, a dhoiciméadú, a chur chun feidhme agus a choinneáil ar bun maidir le gníomhaíochtaí sreafa sonraí agus gníomhaíochtaí rialaithe chomh maith le nósanna imeachta eile nach mór d’eintiteas rialáilte a bhunú de bhun Rialachán Cur Chun Feidhme (AE) 2018/2066;

(d)	an faireachán agus tuairisciú ar astaíochtaí, lena n-áirítear i ndáil le leibhéil níos airde a bhaint amach, rioscaí a laghdú agus éifeachtúlacht a fheabhsú san fhaireachán agus sa tuairisciú.

2.   Le linn an fhíorúcháin tar éis bliana ina ndearnadh moltaí chun feabhais i dtuarascáil fíorúcháin, seiceálfaidh an fíoraitheoir ar chuir an t-eintiteas rialáilte na moltaí sin chun feabhais chun feidhme agus an bealach ina ndearnadh sin.

I gcás nár chuir an t-eintiteas rialáilte na moltaí sin chun feidhme nó nár chuir sé chun feidhme i gceart iad, déanfaidh an fíoraitheoir measúnú ar an tionchar aige sin ar an riosca a bhaineann le míráitis agus neamh-chomhréireachtaí.

1.   Uair iomchuí amháin nó níos mó le linn an phróisis fíorúcháin, tabharfaidh an fíoraitheoir cuairt ar an láithreán chun measúnú a dhéanamh ar oibriú na bhfeistí tomhais agus na gcóras faireacháin, agallaimh a dhéanamh, na gníomhaíochtaí a cheanglaítear leis an gCaibidil seo a dhéanamh agus faisnéis agus fianaise leormhaith a bhailiú lena gcuirfear ar a chumas a chinneadh an bhfuil tuarascáil an eintitis rialáilte saor ó mhíráitis ábhartha.

Agus cuairteanna ar an láithreán á ndéanamh ag an bhfíoraitheoir i gcomhréir leis an gcéad fhomhír, déanfaidh an fíoraitheoir measúnú freisin ar iomláine na sreabh breosla arna scaoileadh agus na méideanna breosla arna scaoileadh.

2.   Tabharfaidh an t-eintiteas rialáilte rochtain don fhíoraitheoir ar a chuid láithreán.

3.   Chun tuarascáil astaíochtaí an eintitis rialáilte a fhíorú, cinnfidh an fíoraitheoir, ar bhonn na hanailíse riosca, an bhfuil gá le cuairteanna ar shuíomhanna breise, lena n-áirítear, i gcás inarb ábhartha, i gcás ina ndéantar codanna ábhartha de ghníomhaíochtaí sreafa sonraí agus gníomhaíochtaí rialaithe i suíomhanna eile amhail ceanncheathrú na cuideachta agus oifigí lasmuigh den láithreán.

4.   De mhaolú ar mhír 1, féadfaidh an fíoraitheoir a chinneadh gan cuairteanna ar an láithreán a thabhairt ar eintitis rialáilte. Beidh an cinneadh sin bunaithe ar na critéir seo a leanas:

(a)	toradh na hanailíse riosca;

(b)	an deimhniú gur féidir leis an bhfíoraitheoir na sonraí ábhartha uile a rochtain go cianda;

(c)	an deimhniú go gcomhlíontar na coinníollacha ábhartha maidir le gan na cuairteanna ar an láithreán a dhéanamh, de bhun Airteagal 43w den Rialachán seo;

(d)	an deimhniú nach bhfuil na cuairteanna sainordaitheacha ar an láithreán, de bhun mhír 7 den Airteagal seo, infheidhme maidir leis an eintiteas rialáilte sin.

Cuirfidh an fíoraitheoir a chinneadh in iúl don eintiteas rialáilte gan moill mhíchuí.

5.   Cuirfidh an t-eintiteas rialáilte iarratas faoi bhráid an údaráis inniúil lena n-iarrfar ar an údarás inniúil cinneadh an fhíoraitheora gan an chuairt a thabhairt ar an láithreán a fhormheas. Beidh an fhaisnéis seo a leanas ar a laghad san iarratas:

(a)	toradh na hanailíse riosca;

(b)	fianaise gur féidir na sonraí ábhartha a rochtain go cianda;

(c)	fianaise go gcomhlíontar na coinníollacha ábhartha maidir le gan na cuairteanna ar an láithreán a dhéanamh, de bhun Airteagal 43w den Rialachán seo;

(d)	fianaise nach bhfuil na cuairteanna sainordaitheacha ar an láithreán, de bhun mhír 7 den Airteagal seo, infheidhme maidir leis an eintiteas rialáilte sin.

Ní cheanglófar formheas an údaráis inniúil le haghaidh eintitis rialáilte a bhfuil astaíochtaí ísle acu, mar a shonraítear in Airteagal 75n(1) de Rialachán Cur Chun Feidhme (AE) 2018/2066.

6.   Agus an fhaisnéis dá dtagraítear i mír 5, pointí (a) go (d) á cur san áireamh, cinnfidh an t-údarás inniúil an ndéanfaidh sé an cinneadh ón bhfíoraitheoir gan an chuairt a thabhairt ar an láithreán a fhormheas nó gan é a fhormheas.

I gcás nár thug an t-údarás inniúil freagra ar an iarratas ón eintiteas rialáilte, i gcomhréir le mír 5 laistigh de 2 mhí ón iarratas a fháil, measfar go bhfuil cinneadh ón bhfíoraitheoir formheasta.

7.   Tabharfaidh an fíoraitheoir cuairteanna ar an láithreán i gcónaí sna cásanna seo a leanas:

(a)	tá tuarascáil astaíochtaí oibreora aerárthaigh á fíorú den chéad uair;

(b)	níor thug fíoraitheoir cuairt ar an láithreán in dhá thréimhse thuairiscithe go díreach roimh an tréimhse tuairiscithe atá ann faoi láthair;

(c)	rinneadh modhnuithe nach beag ar an bplean faireacháin, i gcomhréir le hAirteagal 75b(3) de Rialachán Cur Chun Feidhme (AE) 2018/2066, le linn na tréimhse tuairiscithe.

1.   Déanfaidh fíoraitheoir nós imeachta amháin nó níos mó a bhunú, a dhoiciméadú, a chur chun feidhme agus a choinneáil ar bun le haghaidh gníomhaíochtaí fíorúcháin dá bhforáiltear i gCaibidil IIIa, agus le haghaidh na nósanna imeachta agus na bpróiseas a cheanglaítear le hIarscríbhinn II a ghabhann leis an Rialachán seo. Agus na nósanna imeachta agus na próisis sin á mbunú agus á gcur chun feidhme ag an bhfíoraitheoir, déanfaidh an fíoraitheoir na gníomhaíochtaí a liostaítear in Iarscríbhinn II a ghabhann leis an Rialachán seo i gcomhréir leis an gcaighdeán comhchuibhithe dá dtagraítear san Iarscríbhinn sin.

2.   Beidh feidhm ag Airteagail 41(2) agus 42(1) den Rialachán seo maidir le fíorú astaíochtaí eintitis rialáilte a chumhdaítear le Caibidil IVa de Threoir 2003/87/CE.

3.   Cuirfidh fíoraitheoir faisnéis ar fáil don eintiteas rialáilte agus do pháirtithe ábhartha eile go tráthrialta i gcomhréir leis an gcaighdeán comhchuibhithe dá dtagraítear in Iarscríbhinn II a ghabhann leis an Rialachán seo.

1.   Beidh fíoraitheoir neamhspleách ar an eintiteas rialáilte agus beidh sé neamhchlaonta agus é ag gabháil dá ghníomhaíochtaí fíorúcháin.

Chun neamhspleáchas agus neamhchlaontacht a áirithiú, ní bheidh an fíoraitheoir ná aon chuid den eintiteas dlítheanach céanna ina eintiteas rialáilte, úinéir eintitis rialáilte ná faoina úinéireacht, ná ní bheidh caidreamh ag an bhfíoraitheoir leis an eintiteas rialáilte a d’fhéadfadh difear a dhéanamh dá neamhspleáchas agus dá neamhchlaontacht. Beidh an fíoraitheoir neamhspleách freisin ar chomhlachtaí a thrádálann lamháltais astaíochtaí faoin gcóras trádála lamháltas astaíochtaí gás ceaptha teasa a bunaíodh de bhun Airteagal 19 de Threoir 2003/87/CE.

2.   Eagrófar fíoraitheoir ar bhealach a dhéanfaidh a oibiachtúlacht, a neamhspleáchas agus a neamhchlaontacht a choimirciú. Chun críocha an Rialacháin seo, beidh feidhm ag na ceanglais ábhartha maidir le struchtúr agus eagrú an fhíoraitheora a leagtar síos sa chaighdeán comhchuibhithe dá dtagraítear in Iarscríbhinn II.

3.   Ní dhéanfaidh fíoraitheoir gníomhaíochtaí fíorúcháin le haghaidh eintiteas rialáilte lena ngabhann riosca do-ghlactha dá neamhchlaontacht nó lena gcruthaítear coinbhleacht leasa dó. Ní bhainfidh an fíoraitheoir úsáid as pearsanra ná as daoine atá ar conradh chun tuarascáil ó eintiteas rialáilte a fhíorú lena mbaineann coinbhleacht leasa iarbhír nó fhéideartha. Áiritheoidh an fíoraitheoir freisin nach ndéanfaidh gníomhaíochtaí pearsanra ná eagraíochtaí difear do rúndacht, d’oibiachtúlacht, do neamhspleáchas ná do neamhchlaontacht an fhíorúcháin. Chun na críche sin, déanfaidh an fíoraitheoir faireachán ar na rioscaí don neamhchlaontacht agus déanfaidh sé gníomhaíocht iomchuí chun aghaidh a thabhairt ar na rioscaí sin.

Maidir le riosca do-ghlactha don neamhchlaontacht nó do choinbhleacht leasa dá dtagraítear sa chéad abairt den chéad fhomhír, measfar gur ann dó go háirithe i gceachtar de na cásanna seo a leanas:

(a)

i gcás ina soláthróidh fíoraitheoir nó aon chuid den eintiteas dlíthiúil céanna seirbhísí comhairliúcháin chun forbairt a dhéanamh ar chuid den phróiseas faireacháin agus tuairiscithe a bhfuil tuairisc air sa phlean faireacháin arna fhormheas ag an údarás inniúil, lena n-áirítear forbairt na modheolaíochta faireacháin, dréachtú tuarascála eintitis rialáilte agus dréachtú an phlean faireacháin;

(b)	i gcás ina soláthróidh fíoraitheoir nó aon chuid den eintiteas dlíthiúil céanna cúnamh teicniúil chun an córas a cuireadh chun feidhme a fhorbairt nó a choinneáil ar bun chun faireachán agus tuairisciú a dhéanamh ar astaíochtaí.

4.   Measfar gur tháinig coinbhleacht leasa chun cinn maidir le fíoraitheoir sa chaidreamh idir é agus an t-eintiteas rialáilte, go háirithe i gceachtar de na cásanna seo a leanas:

(a)	i gcás ina bhfuil an caidreamh idir an fíoraitheoir agus an t-eintiteas rialáilte ar bhonn na comhúinéireachta, an rialachais choitinn, na comhbhainistíochta nó an phearsanra choitinn, na n- acmhainní comhroinnte, an mhaoinithe choitinn agus na gcomhchonarthaí nó na margaíocht coitinn;

(b)

i gcás ina bhfaigheann an t-eintiteas rialáilte seirbhísí comhairliúcháin dá dtagraítear i bpointe (a) de mhír 3 nó cúnamh teicniúil dá dtagraítear i bpointe (b) den mhír sin ó chomhlacht comhairleach, comhlacht cúnaimh theicniúil nó eagraíocht eile a bhfuil caidreamh aici leis an bhfíoraitheoir agus a chuireann neamhchlaontacht an fhíoraitheora i mbaol.

Chun críocha phointe (b) den chéad fhomhír, measfar go bhfuil neamhchlaontacht an fhíoraitheora curtha i mbaol i gcás ina bhfuil an caidreamh idir an fíoraitheoir agus an comhlacht comhairleach, an comhlacht cúnaimh theicniúil nó an eagraíocht eile ar bhonn na comhúinéireachta, an rialachais choitinn, na comhbhainistíochta nó an phearsanra choitinn, na n- acmhainní comhroinnte, an mhaoinithe choitinn agus na gcomhchonarthaí nó na margaíocht coitinne agus na híocaíochta coitinne ar choimisiún díolacháin nó dreasú eile chun cliaint nua a tharchur.

5.   Ní dhéanfaidh fíoraitheoir tabhairt i gcrích an chomhaontaithe idir an t-eintiteas rialáilte agus an fíoraitheoir, an t-athbhreithniú neamhspleách ná eisiúint na tuarascála fíorúcháin a sheachfhoinsiú. Chun críocha an Rialacháin seo, nuair a bheidh gníomhaíochtaí fíorúcháin eile á seachfhoinsiú, comhlíonfaidh an fíoraitheoir na ceanglais ábhartha a leagtar síos sa chaighdeán comhchuibhithe dá dtagraítear in Iarscríbhinn II.

Mar sin féin, chun críocha na chéad fhomhíre, ní hionann daoine aonair a chur faoi chonradh chun gníomhaíochtaí fíorúcháin a dhéanamh, má ghlacann an fíoraitheoir, le linn dó na daoine sin a chur faoi chonradh, freagracht iomlán as na gníomhaíochtaí fíorúcháin a dhéanann pearsanra ar conradh. Nuair a bheidh daoine aonair ar conradh chun gníomhaíochtaí fíorúcháin a dhéanamh, cuirfidh an fíoraitheoir de cheangal ar na daoine aonair sin comhaontú i scríbhinn a shíniú go gcomhlíonann siad nósanna imeachta an fhíoraitheora agus nach bhfuil coinbhleacht leasa ann agus na gníomhaíochtaí fíorúcháin sin á ndéanamh.

6.   Déanfaidh fíoraitheoir próiseas a bhunú, a dhoiciméadú, a chur chun feidhme agus a choinneáil ar bun chun neamhchlaontacht agus neamhspleáchas leanúnach an fhíoraitheora a áirithiú, mar aon le neamhchlaontacht agus neamhspleáchas leanúnach na gcodanna den eintiteas dlítheanach céanna, eagraíochtaí eile dá dtagraítear i mír 4, agus gach pearsanra agus gach duine ar conradh a bhfuil baint acu leis an bhfíorú. Áireofar sa phróiseas sin sásra chun neamhchlaontacht agus neamhspleáchas an fhíoraitheora a chosaint agus chun na ceanglais ábhartha a leagtar síos sa chaighdeán comhchuibhithe dá dtagraítear in Iarscríbhinn II a chomhlíonadh.

6a.   Nuair a dhéanfaidh fíoraitheoir an t-eintiteas rialáilte céanna a fíoraíodh an bhliain roimh sin a fhíorú, déanfaidh an fíoraitheoir an riosca don neamhchlaontacht a mheas agus déanfaidh sé bearta chun an riosca don neamhchlaontacht a laghdú.

7.   Ó 2026 ar aghaidh, i gcás ina ndéanfaidh an t-iniúchóir CTA AE fíorú bliantúil ar astaíochtaí a chumhdaítear le Caibidil IVa de Threoir 2003/87/CE le haghaidh tréimhse 5 bliana as a chéile maidir le heintiteas rialáilte ar leith, tógfaidh sé briseadh 3 bliana as a chéile ó sheirbhísí fíorúcháin a sholáthar don eintiteas rialáilte céanna sin.’;

1.   Féadfaidh na Ballstáit a cheangal ar fhíoraitheoirí teimpléid leictreonacha nó formáidí comhaid sonracha a úsáid le haghaidh tuarascálacha fíorúcháin i gcomhréir le hAirteagal 74(1) nó Airteagal 75u de Rialachán Cur Chun Feidhme (AE) 2018/2066 nó i gcomhréir le hAirteagal 13 de Rialachán Tarmligthe (AE) 2019/331.

2.   Féadfar teimpléid leictreonacha chaighdeánaithe nó sonraíochtaí formáide comhaid a chur ar fáil le haghaidh cineálacha breise cumarsáide idir an t-oibreoir, an t-oibreoir aerárthaigh, an t-eintiteas rialáilte, an fíoraitheoir, an t-údarás inniúil agus an comhlacht náisiúnta creidiúnaithe i gcomhréir le hAirteagal 74(2) nó Airteagal 75u de Rialachán Cur Chun Feidhme (AE) 2018/2066.’