(1)

Áirithítear cur i bhfeidhm aonfhoirmeach na gcaighdeán agus nósanna imeachta tástála idirnáisiúnta maidir le trealamh muirí a fhormheas le Treoir 2014/90/AE.

(2)

Comhlíonfaidh an trealamh muirí atá le cur ar longa an Aontais ceanglais Threoir 2014/90/AE, i gcomhréir leis na gníomhartha cur chun feidhme arna nglacadh de bhun Airteagal 35(2) den Treoir sin, lena gcuirtear in iúl na ceanglais deartha, tógála agus feidhmíochta agus na caighdeáin tástála dá bhforáiltear sna hionstraimí idirnáisiúnta maidir le trealamh muirí den sórt sin.

(3)

Ar chúiseanna sábháilteachta, éilíonn Coinbhinsiún Idirnáisiúnta um Shábháilteacht Anama ar Muir (SOLAS) go ndéantar píobáin dóiteáin a iompar agus a fhormheas ar bord long.

(4)

Níl aon chaighdeán idirnáisiúnta ann faoi láthair maidir le sonraíocht theicniúil agus tástáil na bpíobán comhraic dóiteáin cothrom neamhshíothlaitheach ag a bhfuil trastomhas inmheánach ar mó é ná 52 mm agus, dá bhrí sin, ní chumhdaítear iad le reachtaíocht an Aontais atá i bhfeidhm. Toisc nach ann do chaighdeáin idirnáisiúnta, ní féidir measúnú comhréireachta a dhéanamh ar phíobáin den sórt sin ná iad a fhormheas lena n-úsáid ar bord longa an Aontais i gcomhréir le Treoir 2014/90/AE. Mar thoradh ar an easpa comhchuibhithe, tá leibhéil éagsúla sábháilteachta ann maidir le táirgí ar bord longa an Aontais, rud a d’fhéadfadh a bheith ina chúis le cliseadh na dtáirgí sin agus iad in úsáid agus a chruthaíonn riosca tromchúiseach do-ghlactha do shláinte agus sábháilteacht mhuirí, agus cruthaíonn sé ualach riaracháin do na Ballstáit.

(5)

Níl aon chaighdeán idirnáisiúnta ann maidir le tástáil ar an seasamh in aghaidh scríobadh a dhéanamh ar phíobáin comhraic dóiteáin chothroma neamhshíothlaitheacha ag a bhfuil trastomhas inmheánach idir 25 mm 52 mm agus, dá bhrí sin, ní chumhdaítear caighdeáin den sórt sin le reachtaíocht an Aontais atá i bhfeidhm. In éagmais caighdeáin idirnáisiúnta, ní féidir measúnú comhréireachta a dhéanamh ar phíobáin den sórt sin a mhéid a bhaineann le seasamh in aghaidh scríobadh i gcomhréir le Treoir 2014/90/AE. Mar thoradh ar an easpa comhchuibhithe maidir leis na tástálacha ar an seasamh in aghaidh scríobadh, d’fhéadfadh táirgí den sórt sin a chliseadh go luath nuair a úsáidtear iad ar bord long a bhfuil bratach de chuid an Aontais ar foluain orthu, rud a chruthaíonn riosca tromchúiseach do-ghlactha do shláinte agus sábháilteacht mhuirí.

(6)

Dá bhrí sin, ba cheart sonraíochtaí teicniúla agus caighdeáin tástála chomhchuibhithe a bhunú maidir leis na píobáin comhraic dóiteáin chothroma neamhshíothlaitheacha uile ag a bhfuil trastomhas inmheánach ar mó é ná 25 mm. Ba cheart feidhm a bheith ag na sonraíochtaí agus na caighdeáin tástála sin go dtí go leasófar na hionstraimí idirnáisiúnta chun na caighdeáin tástála iomchuí maidir le píobáin den sórt sin a chur san áireamh,