(1)

Le Rialachán (CE) Uimh. 1831/2003 déantar foráil maidir le breiseáin a údarú lena n-úsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú, a mhodhnú agus a athnuachan.

(2)

Údaraíodh ullmhóid arb é atá inti ion–1,4-béite-xiolanáis arna táirgeadh ag Aspergillus oryzae DSM 26372 ar feadh tréimhse 10 mbliana mar bhreiseán beathaithe le haghaidh éanlaith chlóis lena ramhrú, bainbh scoite agus muca lena ramhrú le Rialachán Cur Chun Feidhme (AE) Uimh. 1206/2012 ón gCoimisiún (2), le haghaidh cránacha atá ag tál le Rialachán Cur Chun Feidhme (AE) 2020/995 ón gCoimisiún (3) agus le haghaidh béaróg le Rialachán Cur Chun Feidhme (AE) 2020/1034 ón gCoimisiún (4).

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun údarú na hullmhóide ion–1,4-béite-xiolanáis, arna táirgeadh ag Aspergillus oryzae DSM 26372, a athnuachan mar bhreiseán beathaithe le haghaidh éanlaith chlóis lena ramhrú, bainbh scoite, muca lena ramhrú, cránacha atá ag tál agus béaróg, iarratas inar iarradh go n-aicmeofaí an breiseán sa chatagóir breiseán ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’. I gcomhthéacs an iarratais sin, mhol sealbhóir an údaraithe freisin téarmaí údaraithe na hullmhóide lena mbaineann a athrú trí athrú a iarraidh ar an tréithchineál táirgthe, ó Aspergillus oryzae DSM 26372 go Aspergillus oryzae DSM 33700 i gcomhréir le hAirteagal 13(3) de Rialachán (CE) Uimh. 1831/2003. Bhí na sonraí agus na doiciméid a cheanglaítear faoi Airteagal 14(2) agus na sonraí ábhartha a thacaíonn leis an iarraidh ar athrú ag gabháil leis an iarratas.

(4)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas chun úsáidí nua na hullmhóide ion–1,4-béite-xiolanáis, arna táirgeadh ag Aspergillus oryzae DSM 33700, a údarú. Baineann an t-iarratas leis an ullmhóid sin a údarú mar bhreiseán beathaithe le haghaidh gach speicis éanlaithe clóis agus Suidae uile agus iarradh ann go n-aicmeofaí an breiseán sin sa chatagóir breiseán ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(5)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 26 Meán Fómhair 2023 (5) go bhfuil an ullmhóid ion–1,4-béite-xiolanáis, arna táirgeadh ag Aspergillus oryzae DSM 33700, sábháilte go fóill do speicis éanlaithe clóis lena ramhrú, do bhainbh scoite, do mhuca lena ramhrú, do chránacha atá ag tál, do bhéaróga, do na tomhaltóirí agus don chomhshaol faoi na coinníollacha úsáide atá údaraithe faoi láthair. Tháinig sé ar an gconclúid freisin go bhfuil an breiseán sábháilte d’éanlaith chlóis uile, do Suidae uile, do na tomhaltóirí agus don chomhshaol, faoi na coinníollacha úsáide a mholtar. Luaigh an tÚdarás freisin nach raibh an dá fhoirmliú den bhreiseán (leacht agus soladach) greannach don chraiceann. Ní greannaitheoir súl é an foirmliú leachtach ach ní féidir teacht ar aon chonclúid maidir leis an bhféidearthacht go mbeadh an foirmliú soladach ina ghreannaitheoir súl. Mar gheall ar an easpa sonraí, ní raibh an tÚdarás in ann teacht ar chonclúid maidir leis an bhféidearthacht go mbeadh an dá fhoirmliú den bhreiseán ina n-íogróirí deirmeacha. Mar gheall ar chineál próitéineach na substainte gníomhaí (xiolanáis), meastar gur íogróir riospráide é an breiseán. A mhéid a bhaineann leis na húsáidí nua atá beartaithe le haghaidh na spriocspeiceas breise, tháinig an tÚdarás ar an gconclúid go bhféadfadh an breiseán a bheith éifeachtúil i ngach speiceas éanlaithe clóis agus i Suidae uile faoi na coinníollacha úsáide atá beartaithe. Tháinig an tÚdarás ar an gconclúid go bhfuil an ullmhóid ion–1,4-béite-xiolanáis, arna táirgeadh ag Aspergillus oryzae DSM 33700, éifeachtach go fóill le haghaidh éanlaith chlóis lena ramhrú, bainbh scoite, muca lena ramhrú, cránacha atá ag tál agus béaróg. Níor mheas an tÚdarás go raibh gá le ceanglais shonracha maidir le faireachán iarmhargaidh.

(6)

Maidir leis na conclúidí agus na moltaí ar ar thángthas le linn an mheasúnaithe a rinneadh i ndáil leis an modh a úsáideadh chun anailís a dhéanamh ar ion–1,4-béite-xiolanáis, arna táirgeadh ag Aspergillus oryzae DSM 33700, mar bhreiseán beathaithe i gcomhthéacs an údaraithe roimhe seo, mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. Dá bhrí sin, i gcomhréir le hAirteagal 5(4), pointe (c), de Rialachán (CE) Uimh. 378/2005 ón gCoimisiún (6), níl gá le tuarascáil mheastóireachta ón tSaotharlann Tagartha.

(7)

I bhfianaise an mhéid thuas, measann an Coimisiún go gcomhlíonann an ullmhóid ion–1,4-béite-xiolanáis, arna táirgeadh ag Aspergillus oryzae DSM 33700, na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan le haghaidh éanlaith chlóis lena ramhrú, bainbh scoite, muca lena ramhrú, cránacha atá ag tál agus béaróg, agus ba cheart úsáid na hullmhóide sin a údarú le haghaidh gach speicis éanlaithe clóis seachas éanlaith chlóis lena ramhrú agus béaróga, agus le haghaidh Suidae uile seachas bainbh scoite, muca lena ramhrú agus cránacha atá ag lachtadh. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc. Ba cheart na bearta cosanta sin a bheith gan dochar do cheanglais eile sábháilteachta oibrithe faoi dhlí an Aontais.

(8)

Mar thoradh ar údarú ullmhóide arb é atá inti ion–1,4-béite-xiolanáis arna táirgeadh ag Aspergillus oryzae DSM 33700 mar bhreiseán beathaithe a athnuachan le haghaidh éanlaith chlóis lena ramhrú, bainbh scoite, muca lena ramhrú, cránacha atá ag tál agus béaróg, ba cheart Rialacháin Cur Chun Feidhme (AE) Uimh. 1206/2012, (AE) 2020/995 agus (AE) 2020/1034 a aisghairm.

(9)

Ós rud é nach gá na modhnuithe ar na coinníollacha údaraithe maidir leis an ullmhóid arb é atá inti ion–1,4-béite-xiolanáis, arna táirgeadh ag Aspergillus oryzae DSM 33700, le haghaidh éanlaith chlóis lena ramhrú, bainbh scoite, muca lena ramhrú, cránacha atá ag tál agus béaróg a chur i bhfeidhm láithreach ar chúiseanna sábháilteachta, is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,