(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear i liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

An 15 Lúnasa 2019, chuir an chuideachta Kemin Foods L.C. (‘an t-iarratasóir’) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 chun béite-ghlúcan ó mhiocralgaí Euglena gracilis (parai-mhíolón) a chur ar mhargadh an Aontais mar bhia núíosach. D’iarr an t-iarratasóir go n-úsáidfí béite-ghlúcan ó mhiocralgaí Euglena gracilis (parai-mhíolón) i roinnt bianna mar a leanas: barraí gránaigh, ionadach ar an aiste bia iomlán chun meáchan a rialú mar a shainmhínítear i Rialachán (AE) Uimh. 609/2013 ó Pharlaimint na hEorpa agus ón gComhairle (3), forbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (4), iógart, deochanna iógairt, deochanna bunaithe ar shúnna torthaí agus/nó glasraí, deochanna boga agus ionadaigh ar bhéilí chun meáchan a rialú (mar dheochanna). Ina dhiaidh sin, an 25 Eanáir 2024, mhodhnaigh an t-iarratasóir an chéad iarraidh san iarratas maidir le béite-ghlúcan ó mhiocralgaí Euglena gracilis a úsáid, chun a úsáid in iógart, i ndeochanna iógairt, i ndeochanna bunaithe ar shúnna torthaí agus/nó glasraí, i ndeochanna boga agus in ionadaigh ar bhéilí chun meáchan a rialú (mar dheochanna) a chur as an áireamh. Mhodhnaigh an t-iarratasóir freisin an iarraidh tosaigh san iarratas maidir le béite-ghlúcan ó mhiocralgaí Euglena gracilis a úsáid i bhforbhianna chun naíonáin agus leanaí faoi bhun trí bliana d’aois a chur as an áireamh.

(4)

An 15 Lúnasa 2019, rinne an t-iarratasóir iarraidh ar an gCoimisiún freisin ar chosaint sonraí dílseánaigh, is iad sin staidéir choipthe in vitro (5), tástáil bhaictéarach ais-sócháin (6), tástáil micreanúicléis in vivo (7), staidéar ar ghéarthocsaineacht i bhfrancaigh (8), staidéar 14 lá ar thocsaineacht chothaithe/blastachta i bhfrancaigh (9), staidéir 90 lá ar thocsaineacht i bhfrancaigh (10), triail chliniciúil 90 lá (11), anailís ar cháithníní de réir méide (12), saintréithriú agus comparáid parai-mhíolóin le táirgí giosta (13), staidéar ar an éifeacht a bhaineann le meilt mheicniúil ar struchtúr parai-mhíolóin agus ar cháithníní de réir méide (14), tuarascálacha cobhsaíochta (15), tástáil micreanúicléis eiritricíte i mamaigh (16) agus staidéar 90 lá ar thocsaineacht bhéil ildáileog i bhfrancaigh (17).

(5)

An 23 Aibreán 2021 d’iarr an Coimisiún ar an Údarás Eorpach um Shábháilteacht Bia (‘an tÚdarás’) measúnú a dhéanamh ar bhéite-ghlúcan ó mhiocralgaí Euglena gracilis mar bhia núíosach.

(6)

An 28 Márta 2023 ghlac an tÚdarás a thuairim eolaíoch dar teideal ‘Safety of paramylon as a novel food pursuant to Regulation (EU) 2015/2283’  (18) [Sábháilteacht parai-mhíolóin mar bhia núíosach de bhun Rialachán (AE) 2015/2283] i gcomhréir le hAirteagal 11 de Rialachán (AE) 2015/2283.

(7)

Sa tuairim eolaíoch uaidh, chinn an tÚdarás go raibh an bia núíosach béite-ghlúcan ó mhiocralgaí Euglena gracilis, sábháilte faoi na coinníollacha úsáide atá beartaithe. Dá bhrí sin, is leor na forais sa tuairim eolaíoch sin chun a shuí go gcomhlíonann béite-ghlúcan ó mhiocralgaí Euglena gracilis, i gcás ina mbaintear úsáid as faoi na coinníollacha úsáide sonracha, na coinníollacha maidir lena chur ar an margadh i gcomhréir le hAirteagal 12(1) de Rialachán (AE) 2015/2283.

(8)

Sa tuairim eolaíoch uaidh, thug an tÚdarás dá aire freisin go raibh a chonclúid maidir le sábháilteacht an bhia núíosaigh bunaithe ar na sonraí comhdhéanaimh (anailís ar mhéid na gcáithníní, an staidéar ar an éifeacht a bhíonn ag meilt mheicniúil ar struchtúr parai-mhíolóin agus ar mhéid na gcáithníní (Iarscríbhinn D), tuarascálacha cobhsaíochta (Iarscríbhinn E), tuarascáil ar mhicreascópacht leictreoin tarchurtha (Iarscríbhinn D), staidéar 90 lá ar thocsaineacht mheathainsealach (Iarscríbhinn I, Eurofins Advinus Limited, 2020, neamhfhoilsithe), agus nach bhféadfadh sé measúnú a dhéanamh ar an mbia núíosach agus teacht ar a chonclúid ina éagmais sin.

(9)

D’iarr an Coimisiún ar an iarratasóir soiléiriú breise a thabhairt maidir leis an údar a cuireadh ar fáil i dtaca lena éileamh dílseánaigh ar na sonraí agus na staidéir sin, agus soiléiriú a thabhairt maidir lena éileamh ar cheart eisiach tagartha orthu i gcomhréir le hAirteagal 26(2)(b) de Rialachán (AE) 2015/2283.

(10)

Dhearbhaigh an t-iarratasóir go raibh cearta dílseánaigh agus eisiacha aige chun tagairt a dhéanamh don anailís ar mhéid na gcáithníní, an staidéar ar an éifeacht a bhíonn ag meilt mheicniúil ar struchtúr parai-mhíolóin agus ar mhéid na gcáithníní (Iarscríbhinn D), do na tuarascálacha cobhsaíochta (Iarscríbhinn E), don tuarascáil ar mhicreascópacht leictreoin tarchurtha (Iarscríbhinn D) agus don staidéar 90 lá ar thocsaineacht bhéil ildáileog i bhfrancaigh (Iarscríbhinn I, Eurofins Advinus Limited, 2020, neamhfhoilsithe), tráth a chuir sé an t-iarratas isteach, agus nach féidir le tríú páirtithe rochtain dhlíthiúil a fháil ar na sonraí sin, iad a úsáid ná tagairt a dhéanamh dóibh.

(11)

Rinne an Coimisiún measúnú ar an bhfaisnéis uile a chuir an t-iarratasóir ar fáil agus mheas sé go raibh sé cuí-réasúnaithe go leormhaith gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, an anailís ar mhéid na gcáithníní, an staidéar ar an éifeacht a bhíonn ag meilt mheicniúil ar struchtúr parai-mhíolóin agus ar mhéid na gcáithníní (Iarscríbhinn D), na tuarascálacha cobhsaíochta (Iarscríbhinn E), an tuarascáil ar mhicreascópacht leictreoin tarchurtha (Iarscríbhinn D) agus an staidéar 90 lá ar thocsaineacht bhéil ildáileog i bhfrancaigh (Iarscríbhinn I, Eurofins Advinus Limited, 2020, neamhfhoilsithe), ba cheart iad a chosaint i gcomhréir le hAirteagal 27(1) de Rialachán (AE) 2015/2283. Dá réir sin, níor cheart ach an t-iarratasóir a údarú chun béite-ghlúcan ó mhiocralgaí Euglena gracilis a chur ar an margadh laistigh den Aontas le linn tréimhse 5 bliana ó theacht i bhfeidhm an Rialacháin seo.

(12)

Mar sin féin, i dtaca le húdarú béite-ghlúcan ó mhiocralgaí Euglena gracilis agus leis an tagairt do na sonraí eolaíocha atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile ina dhiaidh seo iarratas a chur isteach ar údarú chun an bia núíosach céanna a chur ar an margadh, ar choinníoll gur ar fhaisnéis a fuarthas go dlíthiúil agus atá ina taca leis an údarú sin atá a n-iarratas bunaithe.

(13)

Is iomchuí go mbeadh an fhaisnéis dá dtagraítear in Airteagal 9(3) de Rialachán (AE) 2015/2283 san iontráil a bhaineann le béite-ghlúcan ó mhiocralgaí Euglena gracilis ar liosta an Aontais de bhianna núíosacha. I ndáil leis sin, i gcomhréir le coinníollacha úsáide forbhianna ina bhfuil béite-ghlúcain ó mhiocralgaí Euglena gracilis, mar atá molta ag an iarratasóir agus atá measúnaithe ag an Údarás, is gá tomhaltóirí a chur ar an eolas trí lipéadú iomchuí faoi úsáidí forbhianna ina bhfuil béite-ghlúcan ó mhiocralgaí Euglena gracilis.

(14)

Ba cheart béite-ghlúcan ó mhiocralgaí Euglena gracilis a áireamh ar liosta an Aontais de bhianna núíosacha a leagtar amach i Rialachán Cur Chun Feidhme (AE) 2017/2470. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(15)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,