(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear i liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Ar liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470, áirítear galachta-olagaisiúicríd mar bhia núíosach údaraithe.

(4)

De bhun Airteagal 5 den Rialachán (CE) Uimh. 258/97 ó Pharlaimint na hEorpa agus ón gComhairle (3), tá galachta-olagaisiúicríd údaraithe lena chur ar an margadh mar bhia núíosach atá le húsáid i roinnt bianna, lena n-áirítear bainne foirmle do naíonáin agus bainne foirmle leantach do naíonáin mar a shainmhínítear i Rialachán (AE) Uimh. 609/2013 ó Pharlaimint na hEorpa agus ón gComhairle (4).

(5)

An 28 Iúil 2023, chuir an chuideachta FrieslandCampina Ingredients (‘an t-iarratasóir’) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 le haghaidh athrú i sonraíochtaí an bhia núíosaigh galachta-olagaisiúicríd. D’iarr an t-iarratasóir go mbainfí galachtós de shonraíochtaí an bhia núíosaigh lena n-áirítear galachtós faoi láthair ar leibhéil is mó ná 0.8 % den ábhar tirim.

(6)

Thug an t-iarratasóir údar lena iarraidh ar an athrú atá beartaithe ar shonraíochtaí galachta-olagaisiúicríde trí chéimeanna íonúcháin breise a thabhairt isteach ina táirgeadh. Tá sé d’aidhm ag an íonú breise sin monaisiúicrídí amhail galachtós a bhaint chun galachta-olagaisiúicríd a bhfuil íonacht níos airde aici a tháirgeadh.

(7)

Measann an Coimisiún nach dócha go mbeidh tionchar ag an athrú a iarradh ar shonraíochtaí galachta-olagaisiúicríde ar shláinte an duine agus nach gá don Údarás Eorpach um Shábháilteacht Bia meastóireacht sábháilteachta a dhéanamh i gcomhréir le hAirteagal 10(3) de Rialachán (AE) 2015/2283. Tá stair úsáide sábháilte ag galachtós mar chuid den ghnáth-aiste bia nuair a chaitear táirgí déiríochta. Mar thoradh air sin, údaraítear é a bheith sa bhia núíosach ar íosleibhéil 0.8 % nó níos mó agus gan uasleibhéal údaraithe mar nach ábhar imní sábháilteachta é. Dá bhrí sin, beag beann ar na céimeanna íonúcháin le linn an táirgthe, ní gá go n-éileodh na sonraíochtaí leibhéal áirithe galachtóis sa bhia núíosach.

(8)

Is leor na forais atá le fáil san fhaisnéis a sholáthraítear san iarratas chun a shuí go bhfuil na hathruithe ar shonraíochtaí an bhia núíosaigh i gcomhréir le coinníollacha a leagtar síos in Airteagal 12 de Rialachán (AE) 2015/2283 agus gur cheart iad a fhormheas.

(9)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,