(1)

Le Rialachán (AE) 2022/2399 ó Pharlaimint na hEorpa agus ón gComhairle (2), soláthraítear creat oibriúcháin de sheirbhísí ionaid ilfhreastail a sholáthraíonn sruth sonraí gan uaim idir oibreoirí eacnamaíocha agus údaráis chustaim, idir údaráis chustaim agus an Coimisiún, idir údaráis chustaim agus riaracháin nó gníomhaireachtaí eile, agus idir córais chustaim éagsúla laistigh den Aontas. Leis an gcreat sin, áirítear córas uathoibríoch bainistithe cainníochta trí mhalartú faisnéise idir na timpeallachtaí náisiúnta ionaid ilfhreastail do chustaim agus an córas bainistithe faisnéise do rialuithe oifigiúla arna bhunú agus arna rialú ag an gCoimisiún i gcomhréir le hAirteagal 131(1) de Rialachán (AE) 2017/625 (IMSOC). Déantar an malartú sin trí Chóras Malartaithe Deimhnithe an Ionaid Ilfhreastail AE (EU CSW-CERTEX), arna bhunú le Rialachán (AE) 2022/2399.

(2)

Le hAirteagal 56 de Rialachán (AE) 2017/625, bunaítear Doiciméad Coiteann Iontrála Sláinte (CHED) atá le comhlánú ag oibreoirí i gcomhréir leis an Rialachán sin maidir le feidhmiú rialuithe oifigiúla údarás inniúla na mBallstát le haghaidh ainmhithe agus earraí a thagann isteach san Aontas chun a fhíorú go gcomhlíontar reachtaíocht shlabhra agraibhia an Aontais.

(3)

Le Rialachán Tarmligthe (AE) 2019/1602 ón gCoimisiún (3), bunaítear na cásanna inar gá agus na coinníollacha faoinar gá an Doiciméad Coiteann Iontrála Sláinte (CHED) a bheith ag gabháil chuig a gceann scríbe le coinsíneachtaí de na catagóirí ainmhithe agus earraí a bhfuil sé beartaithe iad a chur ar an margadh atá faoi réir rialuithe oifigiúla ag poist rialaithe teorann i gcomhréir le hAirteagal 47(1) de Rialachán (AE) 2017/625.

(4)

Chun críoch athúsáid chalaoiseach an CHED a chosc, ceanglaítear ar údaráis chustaim le hAirteagail 4(c), 5(1)(f) agus 6(c) de Rialachán Tarmligthe (AE) 2019/1602 an fhaisnéis maidir le cainníocht na coinsíneachta a luaitear sa dearbhú custaim a chur in iúl don IMSOC trí EU CSW-CERTEX, chun a áirithiú go mbainfear na cainníochtaí a luaitear sa dearbhú custaim sin ón gcainníocht iomlán ceadaithe a dhearbhaítear sa CHED. Tá feidhm ag an oibleagáid sin maidir le bainistiú cainníochta nuair atá an choinsíneacht le cur faoin nós imeachta custaim um scaoileadh i saorchúrsaíocht dá dtagraítear in Airteagal 201 de Rialachán (AE) Uimh. 952/2013 (4) ó Pharlaimint na hEorpa agus ón gComhairle nó faoi na nósanna imeachta custaim um úsáid shonrach nó um próiseáil (lena gcuimsítear próiseáil isteach agus próiseáil amach) dá dtagraítear i bpointí (c) agus (d) d’Airteagal 210 den Rialachán sin, faoi seach. Níl feidhm aige nuair atá an choinsíneacht le cur faoi na nósanna imeachta custaim idirthurais nó stórála dá dtagraítear i bpointí (a) agus (b) d’Airteagal 210 de Rialachán (AE) Uimh. 952/2013, faoi seach.

(5)

Déantar láimhseáil coinsíneachtaí ag údaráis custaim níos casta de bharr chur i bhfeidhm an bhainistithe cainníochta ag céim na próiseála isteach. Go háirithe, nuair a chuirtear coinsíneacht faoi tuilleadh nósanna imeachta custaim sula scaoiltear i saorchúrsaíocht í, bíonn gá ann bainistiú cainníochta a dhéanamh de láimh ag gach céim de gach nós imeachta den chineál sin, agus ag an gcéim dheireanach nuair a scaoiltear an choinsíneacht i saorchúrsaíocht. Chun láimhseáil coinsíneachtaí ag údaráis chustaim a dhéanamh níos simplí, is cuí an oibleagáid atá ar údaráis chustaim bainistiú cainníochta a dhéanamh ag céim na próiseála isteach a bhaint agus an deimhniú sin a choinneáil i bhfeidhm ag an gcéim um scaoileadh i saorchúrsaíocht, chun go mbeifear in ann na cainníochtaí a luaitear sa dearbhú custaim a bhaint go huathoibríoch ón gcainníocht iomlán ceadaithe a dhearbhaítear sa CHED. Thairis sin, níl feidhm ag an nós imeachta custaim i ndáil le próiseáil amach maidir le coinsíneachtaí a bhfuil sé beartaithe iad a chur ar mhargadh an Aontais faoi réir Rialachán Tarmligthe (AE) 2019/1602. Dá bhrí sin, ba cheart an oibleagáid chun bainistiú cainníochta a dhéanamh ag an gcéim sin den nós imeachta sin a bhaint. Ba cheart Rialachán Tarmligthe (AE) 2019/1602 a leasú dá réir sin.

(6)

Ba cheart dáta theacht i bhfeidhm na hoibleagáide faisnéis den chineál sin a chur in iúl trí IMSOC a ailíniú le dáta beartaithe theacht i bhfeidhm an naisc idir an córas TRACES, a mhéid a bhaineann leis an CHED, agus an córas EU CSW-CERTEX. Le Rialachán (AE) 2022/2399, bunaítear go bhfuil an nasc sin le cur i bhfeidhm faoin 3 Márta 2025. Dá bhrí sin, ba cheart an oibleagáid chun faisnéis den chineál sin a chur in iúl chuig an IMSOC arna bhunú le Rialachán Tarmligthe (AE) 2019/1602 a ailíniú chun go mbeidh feidhm aici i ngach Ballstát ón dáta a thiocfaidh an nasc idir an córas TRACES agus an córas EU CSW-CERTEX i bhfeidhm sa Bhallstát sin nó ón 3 Márta 2025 ar a dhéanaí.

(7)

Ba cheart Rialachán Tarmligthe (AE) 2019/1602 a leasú dá réir,

(1)

in Airteagal 4, cuirtear an méid seo a leanas in ionad phointe (c):

(2)

in Airteagal 5(1), cuirtear an méid seo a leanas in ionad phointe (f):

(3)

in Airteagal 6, cuirtear an méid seo a leanas in ionad phointe (c):

(4)

in Airteagal 7, cuirtear an méid seo a leanas in ionad an tríú fomhír:

‘Beidh feidhm ag Airteagal 4, pointe (c), Airteagal 5(1), pointe (f), agus Airteagal 6, pointe (c) ón dáta ar thiocfaidh na teicnící leictreonacha próiseála sonraí dá dtagraítear in Airteagal 6(1) de Rialachán (AE) Uimh. 952/2013 i bhfeidhm nó ón 3 Márta 2025 ar a dhéanaí, áfach.’.