(1)

Le hAirteagail 10 agus 11 de Rialachán (AE) 2019/6 leagtar amach an fhaisnéis atá le bheith ar lipéadú an neasphacáistithe nó ar an bhforphacáistiú ar tháirgí íocshláinte tréidliachta. Ceanglaítear le hAirteagal 10(2) agus le hAirteagal 11(3) den Rialachán sin go mbeidh an fhaisnéis sin soléite agus intuigthe go soiléir nó i ngiorrúcháin nó i bpicteagraim a bheidh mar an gcéanna ar fud an Aontais. I gcomhréir le hAirteagal 17(2) den Rialachán sin, tá liosta de ghiorrúcháin agus de phicteagraim a bheidh mar an gcéanna ar fud an Aontais le glacadh.

(2)

Is minic a bhíonn an pacáistiú ar tháirgí íocshláinte tréidliachta beag, agus dá bhrí sin bíonn teorainn leis an spás lipéid. Nuair a úsáidtear giorrúcháin agus picteagraim cuidítear an fhaisnéis riachtanach a chuimsiú ar an lipéad i bhformáid atá soiléir soléite. Le húsáid giorrúchán agus picteagram atá mar an gcéanna ba cheart go laghdófaí an téacs ar lipéadú táirgí íocshláinte tréidliachta agus ba cheart go n-éascófaí úsáid pacáistithe ilteangaigh.

(3)

Le rialacha aonfhoirmeacha maidir le giorrúcháin agus picteagraim a bheidh mar an gcéanna ar fud an Aontais lena n-úsáid ar lipéadú an neasphacáistithe agus an fhorphacáistithe ar tháirgí íocshláinte tréidliachta ba cheart go laghdófaí an t-ualach riaracháin agus go bhfeabhsófaí feidhmiú an mhargaidh inmheánaigh agus infhaighteacht táirgí íocshláinte tréidliachta san Aontas.

(4)

Chun comhthuiscint ar ghiorrúcháin a áirithiú, ba cheart an fhormáid agus an cló a úsáidtear a chomhchuibhiú ar fud an Aontais.

(5)

Ba cheart lipéid a bheith níos sothuigthe nuair a úsáidtear picteagraim shimplí agus shoiléire. Chun aon mhíthuiscint a d’fhéadfadh a bheith ann a sheachaint, ba cheart brí gach picteagraim a úsáidfear ar lipéadú táirge íocshláinte tréidliachta a mhíniú i dtéacs iomlán ar an mbileog phacáiste a ghabhann leis an táirge íocshláinte tréidliachta lena mbaineann.

(6)

Ba cheart iomadú picteagram éagsúil le haghaidh na faisnéise céanna a sheachaint, ionas nach gcuirfear mearbhall ar úinéirí ainmhithe, ar choimeádaithe ainmhithe, ar thréidlianna nó ar mhiondíoltóirí. Dá bhrí sin, níor cheart aon phicteagram seachas na picteagraim a áirítear sna hIarscríbhinní a ghabhann leis an Rialachán seo a úsáid in ionad an téacs chomhfhreagraigh mar a leagtar amach sna hIarscríbhinní. Thairis sin, ba cheart an dath lena gcuirtear picteagraim i láthair ar an lipéadú a chomhchuibhiú.

(7)

Ba cheart picteagraim a bheith inaitheanta agus soléite ag úinéirí ainmhithe, coimeádaithe ainmhithe, tréidlianna agus miondíoltóirí. Dá bhrí sin, ba cheart rialacha comhchoiteanna a shocrú maidir le conas picteagraim a thaispeáint ar lipéadú táirge íocshláinte tréidliachta.

(8)

Táirgí íocshláinte tréidliachta a údaraítear roimh dháta chur i bhfeidhm an Rialacháin seo nó atá faoi réir iarratas atá ar bun ar údarú margaíochta ar dháta chur i bhfeidhm an Rialacháin seo, d’fhéadfadh giorrúcháin nó picteagraim a bheith orthu nach gcomhlíonann riachtanais an Rialacháin seo. Dá bhrí sin, chun infhaighteacht leanúnach na dtáirgí sin a áirithiú ní mór foráil a dhéanamh maidir le hidirthréimhse inar cheart cead a thabhairt na táirgí sin a chur ar an margadh fiú mura gcomhlíonann na picteagraim agus na giorrúcháin a úsáidtear ina lipéadú an Rialachán seo.

(9)

Iarratasóirí a bhfuil sé beartaithe acu iarratas a chur isteach ar údarú margaíochta nó ar athrú údaraithe margaíochta, bheadh gá acu le ham leordhóthanach chun a n-iarratais a choigeartú chun iad a chur i gcomhréir leis na forálacha a shocraítear sa Rialachán seo. Dá bhrí sin, ba cheart feidhm a bheith ag an Rialachán seo 30 lá tar éis dháta a theacht i bhfeidhm.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Tháirgí Íocshláinte Tréidliachta,