(1)

Chun a shuíomh an bhfuil bithbhreoslaí, bithleachtanna, breoslaí bithmhaise, breoslaí in-athnuaite iompair gásacha agus leachtacha de thionscnamh neamhbhitheolaíoch agus breoslaí carbóin athchúrsáilte ag comhlíonadh cheanglais Threoir (AE) 2018/2001, tá a ndeimhniú ceart agus comhchuibhithe trí scéimeanna deonacha fíor-riachtanach. Dá bhrí sin, le Rialachán Cur Chun Feidhme (AE) 2022/996 ón gCoimisiún (2) bunaítear rialacha comhchuibhithe is infheidhme maidir leis an bpróiseas deimhniúcháin ar fad, rud lena dtugtar an deimhneacht dhlíthiúil is gá i ndáil leis na rialacha is infheidhme maidir le hoibreoirí eacnamaíocha agus scéimeanna deonacha.

(2)

Tháinig Rialachán Cur Chun Feidhme (AE) 2022/996 i bhfeidhm an 30 Meitheamh 2022 agus beidh feidhm ag a rialacha ó 18 mhí tar éis a theacht i bhfeidhm, is é sin ón 30 Nollaig 2023.

(3)

Le linn chur chun feidhme na gceanglas ar na Ballstáit maidir le creidiúnú nó aitheantas i ndáil le maoirseacht ar chomhlachtaí deimhniúcháin a leagtar amach in Airteagal 11(1) de Rialachán Cur Chun Feidhme (AE) 2022/996, thángthas ar an gconclúid go mbeadh gá ag na Ballstáit le tréimhse ullmhúcháin i bhfad níos faide chun cláir chreidiúnúcháin nó córas aitheantais a ullmhú go cuí agus nach mbeadh sé indéanta sin a chur chun feidhme faoi dháta chur i bhfeidhm an Rialacháin sin.

(4)

Mura mbeadh na Ballstáit in ann rochtain a thabhairt ar chláir chreidiúnúcháin nó ar chóras aitheantais do na comhlachtaí deimhniúcháin atá ann cheana ar dháta chur i bhfeidhm Rialachán Cur Chun Feidhme (AE) 2022/996, ní bheadh aon cheann de na comhlachtaí deimhniúcháin atá ann cheana in ann forálacha Airteagal 11(1) den Rialachán sin a chomhlíonadh agus, dá bhrí sin, leanúint dá gcuid oibre deimhniúcháin i gcomhréir le forálacha Threoir (AE) 2018/2001 agus Rialachán Cur Chun Feidhme (AE) 2022/996 is infheidhme maidir le comhlachtaí deimhniúcháin. Leis sin chuirfí isteach go mór ar mhargadh na mbreoslaí in-athnuaite ó thús 2024 ar aghaidh.

(5)

Dá bhrí sin, ionas gur féidir Airteagal 11(1) de Rialachán Cur Chun Feidhme (AE) 2022/996 a chur i bhfeidhm, is gá a chur i bhfeidhm a chur siar, mar atá an ceanglas ar dá réir atá comhlachtaí deimhniúcháin le creidiúnú ag comhlacht creidiúnaithe náisiúnta agus i gcomhréir le Rialachán (CE) Uimh. 765/2008 ó Pharlaimint na hEorpa agus ón gComhairle (3) nó le haithint ag údarás inniúil chun raon feidhme Threoir (AE) 2018/2001 nó raon feidhme sonrach na scéime deonaí a chumhdach. Tréimhse iomchuí, riachtanach agus chomhréireach is ea tréimhse bliana féilire amháin chun go mbeifear in ann tuilleadh ullmhúcháin a dhéanamh.

(6)

Ba cheart Rialachán Cur Chun Feidhme (AE) 2022/996 a leasú dá réir sin.

(7)

Ba cheart an Rialachán Cur Chun Feidhme leasaitheach seo a chur i bhfeidhm ó dháta chur i bhfeidhm an Rialacháin Cur Chun Feidhme, is é sin an 30 Nollaig 2023, chun bailíocht na ndeimhnithe uile a d’eiseodh na comhlachtaí deimhniúcháin ón 30 Nollaig 2023 go dtí teacht i bhfeidhm an Rialacháin seo a áirithiú.

(8)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise a bunaíodh le hAirteagal 34(2) de Threoir (AE) 2018/2001.