(1)

Déantar gníomhaíochtaí eitlíochta a áireamh sa chóras i ndáil le lamháltais astaíochtaí gás ceaptha teasa a thrádáil laistigh den Aontas (‘CTA AE’) a bunaíodh le Treoir 2003/87/CE.

(2)

Le Treoir (AE) 2023/958 ó Pharlaimint na hEorpa agus ón gComhairle (2) leasaíodh Treoir 2003/87/CE chun an Scéim Fritháirithe agus Laghdaithe Carbóin don Eitlíocht Idirnáisiúnta (‘CORSIA’) ón Eagraíocht Eitlíochta Sibhialta Idirnáisiúnta (‘ICAO’) a chur chun feidhme go hiomchuí.

(3)

De bhun Airteagal 25a(3) de Threoir 2003/87/CE tá an Coimisiún le liosta Stát a ghlacadh, seachas tíortha LEE, an Eilvéis agus an Ríocht Aontaithe, a meastar go bhfuil CORSIA á chur i bhfeidhm acu chun críocha Threoir 2003/87/CE, le bonnlíne 2019 le haghaidh 2021 go 2023. Rinne Parlaimint na hEorpa agus an Chomhairle tíortha LEE, an Eilvéis agus an Ríocht Aontaithe a eisiamh ó liosta Stát den sórt sin ó tharla go dtagann na bealaí idir na tíortha sin faoi raon feidhme na gcóras trádála astaíochtaí faoi seach.

(4)

I gcás 2023, an cinneadh chun Stát a áireamh ar an liosta Stát a meastar go bhfuil CORSIA á chur i bhfeidhm acu chun críocha Threoir 2003/87, tá sé bunaithe ar fhógra ón Stát go bhfuil sé beartaithe aige CORSIA a chur i bhfeidhm maidir le hastaíochtaí in 2023, agus ar fhógra den sórt sin a thabhairt do Rúnaíocht ICAO. Foilsíonn Rúnaíocht ICAO liosta in aghaidh na bliana de na Stáit a thug fógra den sórt sin. Chun na hathruithe ar na liosta sin a fhoilsítear ar bhonn bliantúil a léiriú, tá an Coimisiún le liosta Stát a ghlacadh gach bliain, seachas tíortha LEE, an Eilvéis agus an Ríocht Aontaithe, ar tíortha iad a meastar go bhfuil CORSIA á chur i bhfeidhm acu chun críocha Threoir 2003/87/CE.

(5)

Áirítear San Mairíne agus Monacó ar an liosta Stát a meastar go bhfuil CORSIA á chur i bhfeidhm acu agus a d’fhoilsigh Rúnaíocht ICAO i gcomhair 2023. Mar sin féin, níor cheart San Mairíne ná Monacó a áireamh san Iarscríbhinn a ghabhann leis an Rialachán seo ó tharla nach bhfuil aon aerfort acu agus ó tharla nach raibh aon eitilt ar siúl in 2023 lena mbaineann bealaí a bhfuil CORSIA á chur i bhfeidhm orthu chun críocha Threoir 2003/87/CE.

(6)

Tá an liosta Stát san Iarscríbhinn le húsáid ag oibreoirí aerárthaí agus astaíochtaí á dtuairisciú acu i gcomhair 2023. Chun cur i bhfeidhm tráthúil an liosta sin a áirithiú roimh an sprioc-am chun na hastaíochtaí sin a thuairisciú, ba cheart teacht i bhfeidhm an Rialacháin seo a bheith ar an 3ú lá tar éis lá a fhoilsithe.

(7)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Athrú Aeráide,