(a)

Ón 1 Eanáir 2021, glacfaidh na Stáit CSTE páirt sna gníomhaíochtaí a d’fhéadfadh a bheith mar thoradh ar an ngníomh AE seo a leanas agus sna gníomhaíochtaí i nGníomhaireacht an Aontais Eorpaigh um an gClár Spáis, dá ngairtear ‘an Ghníomhaireacht’ anseo feasta, cé is moite de ghníomhaíochtaí cumarsáide satailíte rialtais (GOVSATCOM), gníomhaíochtaí feasachta ar an staid sa spás agus gníomhaíochtaí faireachais agus rianaithe spáis, arna gcur ar bun leis an ngníomh AE seo a leanas:

(b)

Déanfaidh na Stáit CSTE ranníocaíochtaí airgeadais i leith na ngníomhaíochtaí dá dtagraítear faoi phointe (a) i gcomhréir le hAirteagal 82(1)(a) den Chomhaontú agus le Prótacal 32 a ghabhann leis an gComhaontú.

(c)

Leis an ranníocaíocht airgeadais dá dtagraítear faoi phointe (b), cumhdófar freisin an costas a bhaineann le cuimsiú na Stát CSTE i misean Bhreis-seirbhís na hEorpa um Loingseoireacht Gheochobhsaí (EGNOS) agus le cumhdach sheirbhísí EGNOS a leathnú ionas go gcuimseofar críocha na Stát CSTE rannpháirteach. Beidh leathnú an chumhdaigh sin faoi réir na féidearthachta teicniúla agus ní chuirfidh sé moill ar leathnú an chumhdaigh gheografaigh a thugtar le córas EGNOS ar fud chríocha na mBallstát atá san Eoraip ó thaobh a suímh gheografaigh.

(d)

Na costais a thabhaítear i leith na ngníomhaíochtaí a gcuirtear tús lena gcur chun feidhme tar éis an 1 Eanáir 2021, is féidir a mheas gur costais iad atá incháilithe ó dháta tosaigh na gníomhaíochta arna shocrú sa chomhaontú deontais nó sa chinneadh deontais lena mbaineann, faoi na coinníollacha a leagtar amach ann, ar choinníoll go dtiocfaidh Cinneadh Uimh. 319/2021 ó Chomhchoiste LEE an 29 Deireadh Fómhair 2021 i bhfeidhm roimh dheireadh na gníomhaíochta.

(e)

Glacfaidh na Stáit CSTE incháilithe páirt iomlán, gan ceart vótála, i mBord Riaracháin na Gníomhaireachta.

(f)

Glacfaidh na Stáit CSTE incháilithe páirt, gan ceart vótála, i mBord um Chreidiúnú Slándála na Gníomhaireachta, maidir le codanna ábhartha den chlár agus beidh a rannpháirtíocht srianta i gcomhréir leis an mbeartas ‘ar bhonn riachtanais eolais’ arna bhunú leis an gclár.

(g)

Beidh pearsantacht dhlítheanach ag an nGníomhaireacht. I Stáit uile na bPáirtithe Conarthacha, beidh an inniúlacht dhlíthiúil is fairsinge a thugtar do dhaoine dlítheanacha faoina ndlíthe aige.

(h)

Deonóidh na Stáit CSTE pribhléidí agus díolúintí don Ghníomhaireacht agus dá foireann, pribhléidí agus díolúintí atá coibhéiseach leis na pribhléidí agus na díolúintí atá i bPrótacal ar Phribhléidí agus Díolúintí an Aontais Eorpaigh.

(i)

De mhaolú ar Airteagal 12(2)(a) agus Airteagal 82(3)(a) de Choinníollacha Fostaíochta Sheirbhísigh Eile an Aontais Eorpaigh, náisiúnaigh de Stáit CSTE a bhfuil a gcearta iomlána acu mar shaoránaigh, féadfaidh Stiúrthóir Feidhmiúcháin na Gníomhaireachta iad a fhostú faoi chonradh.

(j)

De mhaolú ar Airteagail 12(2)(e), 82(3)(e) agus 85(3) de Choinníollacha Fostaíochta Sheirbhísigh Eile an Aontais Eorpaigh, na teangacha dá dtagraítear in Airteagal 129(1) den Chomhaontú, measfaidh an Ghníomhaireacht gur teangacha de chuid an Aontais iad dá dtagraítear in Airteagal 55(1) den Chonradh ar an Aontas Eorpach, i ndáil lena baill foirne.

(k)

De bhua Airteagal 79(3) den Chomhaontú, beidh feidhm ag Cuid VII (Forálacha Institiúideacha) den Chomhaontú, cé is moite de Ranna 1 agus 2 de Chaibidil 3, maidir leis an mír seo.

(l)

Maidir le Rialachán (AE) 2021/696 a chur i bhfeidhm, beidh feidhm ag Rialachán (CE) Uimh. 1049/2001 ó Pharlaimint na hEorpa agus ón gComhairle an 30 Bealtaine 2001 maidir le rochtain phoiblí ar dhoiciméid ó Pharlaimint na hEorpa, ón gComhairle agus ón gCoimisiún i ndáil le haon doiciméad de chuid na Gníomhaireachta a bhaineann leis na Stáit CSTE freisin.

(m)

Glacfaidh na Stáit CSTE incháilithe páirt iomlán, gan ceart vótála, i gcoistí an Aontais a thugann cúnamh don Choimisiún Eorpach le bainistiú, forbairt agus cur chun feidhme comhpháirteanna Galileo, EGNOS agus Copernicus agus fo-chomhpháirteanna feasachta ar an staid sa spás a bhaineann le teagmhais aimsire sa spás agus réada neasdomhanda, ar fo-chomhpáirteanna iad de na gníomhaíochtaí dá dtagraítear faoi phointe (a).

I gcomhréir leis an mbeartas ‘ar bhonn riachtanais eolais’ arna bhunú leis an gclár, cuirfear srian ar rannpháirtíocht na gcoistí sin sa chumraíocht slándála.

(n)

Díolmhófar Lichtinstéin ó bheith rannpháirteach sa chlár seo agus ón ranníocaíocht airgeadais a bhaineann leis.

(o)

Beidh an Íoslainn rannpháirteach sna gníomhaíochtaí seo a leanas den chlár agus déanfaidh sí ranníocaíocht airgeadais ina leith: EGNOS, Copernicus, agus fo-chomhpháirteanna feasachta ar an staid sa spás a bhaineann le teagmhais aimsire sa spás agus réada neasdomhanda.’

’44.

Bord um Chreidiúnú Slándála Ghníomhaireacht an Aontais Eorpaigh um an gClár Spáis (Rialachán (AE) 2021/696 ó Pharlaimint na hEorpa agus ón gComhairle).

45.

Bord Riaracháin Ghníomhaireacht an Aontais Eorpaigh um an gClár Spáis (Rialachán (AE) 2021/696 ó Pharlaimint na hEorpa agus ón gComhairle).’.