(1)

Leagtar síos le Rialachán (AE) 2017/625 rialacha maidir le rialuithe oifigiúla agus gníomhaíochtaí rialaithe eile arna ndéanamh ag údaráis inniúla na mBallstát chun comhlíonadh reachtaíocht an Aontais a fhíorú i réimse na sábháilteachta bia, i measc nithe eile, ag aon céim den táirgeadh, den phróiseáil agus den dáileachán. Go háirithe, foráiltear le hAirteagal 126(2), pointe (a) den Rialachán sin go bhféadfar a cheangal le gníomh tarmligthe nach dtiocfaidh isteach san Aontas ach coinsíneachtaí d’ainmhithe áirithe agus d’earraí áirithe ó thríú tír nó ó réigiún sa tír sin atá ar liosta arna tharraingt suas ag an gCoimisiún chun na críche sin.

(2)

Le Rialachán Tarmligthe (AE) 2022/2292 ón gCoimisiún (2), déantar forlíonadh ar Rialachán (AE) 2017/625 chun a áirithiú i gcás coinsíneachtaí bia-ainmhithe agus earraí áirithe a bheartaítear lena gcaitheamh ag an duine ó thríú tíortha nó ó réigiúin sna tíortha sin go gcomhlíonfaidh na coinsíneachtaí sin ceanglais ábhartha a bhunaítear sna rialacha maidir le sábháilteacht bia dá dtagraítear in Airteagal 1(2), pointe (a) de Rialachán (AE) 2017/625 nó ceanglais a aithnítear a bheith ar a laghad coibhéiseach leo. Go háirithe, sainaithnítear in Airteagal 3 de Rialachán Tarmligthe (AE) 2022/2292 na hainmhithe agus na hearraí a bheartaítear lena gcaitheamh ag an duine agus atá faoi réir an cheanglais maidir le teacht ó thríú tír nó réigiún sa tír sin atá ar an liosta dá dtagraítear in Airteagal 126(2), pointe (a) de Rialachán (AE) 2017/625.

(3)

Le Rialachán Cur Chun Feidhme (AE) 2021/405 ón gCoimisiún (3) leagtar síos na liostaí de thríú tíortha nó réigiúin sna tíortha sin óna gceadaítear coinsíneachtaí ainmhithe agus earraí áirithe a bheartaítear lena gcaitheamh ag an duine teacht isteach san Aontas i gcomhréir le hAirteagal 126(2)(a) de Rialachán (AE) 2017/625.

(4)

Le hAirteagal 20(6) de Rialachán Cur Chun Feidhme (AE) 2021/405 ón gCoimisiún, déantar foráil maidir le liosta de thríú tíortha nó réigiúin sna tíortha sin atá údaraithe maidir le coinsíneachtaí amhábhair chóireáilte teacht isteach san Aontas chun geilitín agus collaigin a tháirgeadh, dá dtagraítear i bpointe 4(b)(iii) de Roinn XIV, Caibidil I, d’Iarscríbhinn III a ghabhann le Rialachán (CE) Uimh. 853/2004 ó Pharlaimint na hEorpa agus ón gComhairle (4). I Roinn XIV d’Iarscríbhinn III a ghabhann leis an Rialachán sin leagtar síos ceanglais maidir le geilitín, agus i Roinn XV den Iarscríbhinn sin leagtar síos ceanglais maidir le collaigin. Dá bhrí sin, ba cheart tagairt a dhéanamh do Roinn XV d’Iarscríbhinn III a ghabhann le Rialachán (CE) Uimh. 853/2004 in Airteagal 20(6) de Rialachán Cur Chun Feidhme (AE) 2021/405.

(5)

Foráiltear le hAirteagal 6(1) de Rialachán Tarmligthe (AE) 2022/2292, sa bhreis ar na ceanglais a leagtar síos i Rialachán (AE) 2017/625, nach bhfuil coinsíneachtaí bia-ainmhithe, táirgí de bhunadh ainmhíoch ná táirgí ilchodacha le teacht isteach san Aontas ach ó thríú tír a bhfuil plean rialaithe i bhfeidhm aici maidir le substaintí, lotnaidicídí agus éilleáin atá gníomhach ó thaobh na cógaseolaíochta de.

(6)

Foráiltear le hAirteagal 7 de Rialachán Tarmligthe (AE) 2022/2292, sa bhreis ar na coinníollacha a leagtar síos i Rialachán (AE) 2017/625, nach bhfuil coinsíneachtaí bia-ainmhithe, táirgí de bhunadh ainmhíoch ná táirgí ilchodacha le teacht isteach san Aontas ach ó thríú tír a chomhlíonann na ceanglais dá bhforáiltear in Airteagal 6(1) agus atá san áireamh i liosta na dtríú tíortha atá formheasta maidir leis na bia-ainmhithe nó na táirgí de bhunadh ainmhíoch lena mbaineann teacht isteach san Aontas, liosta a leagtar amach in Iarscríbhinn -I a ghabhann le Rialachán Cur Chun Feidhme (AE) 2021/405.

(7)

Foráiltear le hAirteagal 8(1) de Rialachán Tarmligthe (AE) 2022/2292, de mhaolú ar Airteagal 7, go bhféadfaidh coinsíneachtaí bia-ainmhithe, táirgí de bhunadh ainmhíoch agus táirgí ilchodacha teacht isteach san Aontas ó thríú tíortha nach bhfuil plean rialaithe formheasta acu maidir le substaintí, lotnaidicídí agus éilleáin atá gníomhach ó thaobh na cógaseolaíochta de, ach a áiritheoidh i dtaca leis na bia-ainmhithe agus na táirgí de bhunadh ainmhíoch, lena n-áirítear iad siúd a úsáidtear i dtáirgí ilchodacha, gur de thionscnamh Ballstáit iad nó de thríú tír a áirítear ar an liosta a leagtar amach in Iarscríbhinn -I a ghabhann le Rialachán Cur Chun Feidhme (AE) 2021/405. Foráiltear le hAirteagal 8(2) de Rialachán Tarmligthe (AE) 2022/2292, sa bhreis ar na ceanglais a leagtar síos in Airteagal 127(3) de Rialachán (AE) 2017/625, nach ndéanfaidh an Coimisiún cinneadh maidir le tríú tír a chur ar an liosta dá dtagraítear in Airteagal 126(2), pointe (a), den Rialachán sin ach amháin má chuireann údarás inniúil an tríú tír sin fianaise agus ráthaíochtaí ar fáil don Choimisiún maidir le comhlíonadh na gceanglas a leagtar síos in Airteagal 8(1). Is éard ba cheart a bheith san fhianaise agus sna ráthaíochtaí sin faisnéis maidir leis na nósanna imeachta atá i bhfeidhm sa tríú tír sin chun inrianaitheacht agus tionscnamh na mbia-ainmhithe sin agus na dtáirgí de bhunadh ainmhíoch sin a ráthú.

(8)

Liostaítear an Bhanglaidéis, an tSile, Oileáin Fháclainne, Geansaí, an Nua-Chaladóin, Nicearagua agus Uragua in Iarscríbhinn -I a ghabhann le Rialachán Cur Chun Feidhme (AE) 2021/405 agus marcáiltear iad le ‘O’ chun a léiriú go bhfuil rún ag na tíortha sin táirgí ilchodacha a onnmhairiú chuig an Aontas, ar táirgí ilchodacha iad a mhonaraítear trí úsáid a bhaint as táirgí dobharshaothraithe próiseáilte, agus/nó bainne próiseáilte agus/nó táirgí uibhe próiseáilte a fhaightear ó Bhallstát nó ó thríú tír nó ó réigiún sa tír sin a bhfuil pleananna rialaithe i bhfeidhm acu maidir le substaintí, lotnaidicídí agus éilleáin atá gníomhach ó thaobh na cógaseolaíochta de. Chuir an Bhanglaidéis, an tSile, Oileáin Fháclainne, Geansaí, an Nua-Chaladóin, Nicearagua agus Uragua in iúl don Choimisiún, áfach, nach bhfuil suim acu na táirgí ilchodacha sin a onnmhairiú chuig an Aontas. Dá bhrí sin, ba cheart an mharcáil ‘O’ sin in Iarscríbhinn -I le haghaidh na Banglaidéise, na Sile, Oileáin Fháclainne, Geansaí, na Nua-Chaladóine, Nicearagua agus Uragua a scriosadh.

(9)

Faoi láthair, liostaítear an Cholóim in Iarscríbhinn -I a ghabhann le Rialachán Cur Chun Feidhme (AE) 2021/405 le ‘X’ haghaidh bainne. Tar éis iniúchadh a rinne an Coimisiún ón 24 Iúil go dtí an 4 Lúnasa 2023, fuarthas amach nach féidir leis an gColóim a ráthú nach n-úsáidtear 17 béite éastraidé-ól i mbodóga agus i mba, mar a cheanglaítear le hAirteagal 10 de Rialachán Tarmligthe (AE) 2022/2292 a bhaineann le toirmeasc ar shubstaintí áirithe a ngabhann gníomhaíocht hormónach nó thíreastatach leo, agus ar bhéite-agónaithe, a úsáid i bhfeirmeoireacht stoic, ar substaintí iad a n-úsáidtear bainne uathu chun táirgí ilchodacha fadré atá beartaithe do mhargadh an Aontais a tháirgeadh. Dá bhrí sin, ba cheart liostú na Colóime le haghaidh bainne le ‘X’ a scriosadh. Ós rud é go n-onnmhairíonn an Cholóim táirgí ilchodacha cheana féin chuig an Aontas, táirgí ina bhfuil bainne próiseáilte a fhaightear ó Bhallstát nó ó thríú tír a bhfuil pleananna rialaithe i bhfeidhm acu maidir le substaintí, lotnaidicídí agus éilleáin atá gníomhach ó thaobh na cógaseolaíochta de agus a liostaítear í Iarscríbhinn -I a ghabhann le Rialachán Cur Chun Feidhme (AE) 2021/405 le ‘X’ le haghaidh bainne, ba cheart, dá bhrí sin, an Cholóim a mharcáil le ‘O’ le haghaidh bainne.

(10)

Faoi láthair, liostaítear Iosrael (5) in Iarscríbhinn -I a ghabhann le Rialachán Cur Chun Feidhme (AE) 2021/405 le ‘X’ haghaidh uibheacha. Chuir Iosrael in iúl don Choimisiún, áfach, nach bhfuil suim aige uibheacha a onnmhairiú chuig an Aontas níos mó. Dá bhrí sin, ba cheart an mharcáil ‘X’ le haghaidh ‘uibheacha’ a scriosadh ón Iarscríbhinn sin.

(11)

Faoi láthair, liostaítear Iamáice in Iarscríbhinn -I a ghabhann le Rialachán Cur Chun Feidhme (AE) 2021/405 le ‘X’ le haghaidh meala. Ós rud é nár chuir Iamáice an plean rialaithe le haghaidh meala faoi bhráid an Choimisiúin, ba cheart an mharcáil ‘X’ le haghaidh ‘mil’ a scriosadh ón Iarscríbhinn sin.

(12)

Liostaítear an Chéinia agus Mósaimbíc in Iarscríbhinn -I a ghabhann le Rialachán Cur Chun Feidhme (AE) 2021/405 le ‘O’ chun a léiriú go bhfuil rún ag na tíortha sin táirgí ilchodacha a onnmhairiú chuig an Aontas, ar táirgí ilchodacha iad a mhonaraítear trí úsáid a bhaint as bainne próiseáilte agus/nó táirgí uibhe próiseáilte a fhaightear ó Bhallstát nó ó thríú tír nó ó réigiún sa tír sin a bhfuil pleananna rialaithe i bhfeidhm acu maidir le substaintí, lotnaidicídí agus éilleáin atá gníomhach ó thaobh na cógaseolaíochta de. Ní dhearna an Chéinia ná Mósaimbíc fianaise agus ráthaíochtaí maidir le comhlíonadh Airteagal 8(1) de Rialachán Tarmligthe (AE) 2022/2292 a chur faoi bhráid an Choimisiúin, áfach. Dá bhrí sin, ba cheart an mharcáil le haghaidh na Céinia agus Mhósaimbíc in Iarscríbhinn -I a scriosadh.

(13)

Chuir Maracó agus Ruanda pleananna rialaithe isteach maidir le mil. Leis na pleananna sin tugtar ráthaíochtaí leordhóthanacha agus ba cheart iad a fhormheas dá bhrí sin. Dá réir sin, ba cheart na hiontrálacha a bhaineann le Maracó agus le Ruanda le haghaidh ‘mil’ a liostú in Iarscríbhinn -I a ghabhann le Rialachán Cur Chun Feidhme (AE) 2021/405.

(14)

Liostaítear Montainéagró in Iarscríbhinn -I a ghabhann le Rialachán Cur Chun Feidhme (AE) 2021/405 le ‘X’ le haghaidh ‘ ainmhithe de chineál caorach/de chineál gabhair’ agus fonóta ag tagairt do speicis de chineál caorach amháin. Mar sin féin, chuir Montainéagró ainmhithe de chineál gabhair san áireamh ina phlean rialaithe. Dá bhrí sin, an fonóta maidir le Montainéagró lena gcuirtear srian ar theacht isteach feoil de chineál caorach, ba cheart an fonóta sin san Iarscríbhinn sin a scriosadh.

(15)

Tá plean rialaithe curtha isteach ag Montainéagró, plean ina gcumhdaítear cásálacha. Leis an bplean tugtar ráthaíochtaí leordhóthanacha agus ba cheart é a fhormheas dá bhrí sin. Dá réir sin, ba cheart iontráil Mhontainéagró le haghaidh ‘cásálacha’ a liostú in Iarscríbhinn -I a ghabhann le Rialachán Cur Chun Feidhme (AE) 2021/405.

(16)

Liostaítear an Nua-Chaladóin in Iarscríbhinn -I a ghabhann le Rialachán Cur Chun Feidhme (AE) 2021/405 agus marcáiltear í le ‘P’ chun a léiriú go bhfuil rún aici táirgí ilchodacha a onnmhairiú chuig an Aontas ar táirgí ilchodacha iad a mhonaraítear trí úsáid a bhaint as táirgí próiseáilte a dhíorthaítear ó mhoilisc de thionscnamh na mBallstát nó de thionscnamh tríú tíortha nó réigiún sna tíortha sin a liostaítear in Iarscríbhinn VIII a ghabhann le Rialachán Cur Chun Feidhme (AE) 2021/405. Chuir an Nua-Chaladóin in iúl don Choimisiún, áfach, nach bhfuil suim aici táirgí ilchodacha den chineál sin a onnmhairiú chuig an Aontas. Dá bhrí sin, ba cheart an mharcáil ‘P’ le haghaidh na Nua-Chaladóine in Iarscríbhinn -I a scriosadh.

(17)

Tá plean rialaithe maidir le gastrapóid mhuirí curtha isteach ag an Afraic Theas, plean ina gcumhdaítear an fhochatagóir ‘moilisc/gastrapóid mhuirí ó dhobharshaothrú’. Leis an bplean sin tugtar ráthaíochtaí leordhóthanacha maidir le sábháilteacht bia agus ba cheart é a fhormheas dá bhrí sin. Dá bhrí sin, ba cheart an Afraic Theas a liostú in Iarscríbhinn -I a ghabhann le Rialachán Cur Chun Feidhme (AE) 2021/405, a mharcáil le ‘M’ agus a liostú in Iarscríbhinn VIII a ghabhann leis an Rialachán Cur Chun Feidhme sin.

(18)

Liostaítear an Asarbaiseáin in Iarscríbhinn IX a ghabhann le Rialachán Cur Chun Feidhme (AE) 2021/405 agus an ráiteas ‘caibheár ó ghabháil fhiáin, agus é sin amháin’ ag gabháil leis. Tá plean rialaithe dobharshaothraithe curtha isteach ag an Asarbaiseáin, plean ina gcumhdaítear táirgí éisc eite (caibheár agus eochraí). Leis an bplean sin tugtar ráthaíochtaí leordhóthanacha maidir le sábháilteacht bia agus ba cheart é a fhormheas dá bhrí sin. Dá bhrí sin, ba cheart an Asarbaiseáin a liostú in Iarscríbhinn -I dá réir sin agus an ráiteas ‘caibheár ó ghabháil fiáin, agus é sin amháin’ in Iarscríbhinn IX a ghabhann leis an Rialachán Cur Chun Feidhme sin a athrú go ‘Dobharshaothrú: éisc eite agus caibheár (táirge éisc eite)’.

(19)

Liostaítear an tSile in Iarscríbhinn IX a ghabhann le Rialachán Cur Chun Feidhme (AE) 2021/405 leis an ráiteas ‘Dobharshaothrú: éisc eite, agus iad sin amháin’. Le plean rialaithe na Sile cumhdaítear éisc eite agus táirgí éisc eite (caibheár agus eochraí). Dá bhrí sin, an ráiteas ‘Dobharshaothrú: éisc eite, agus iad sin amháin’ san iontráil a bhaineann leis an tSile in Iarscríbhinn IX a ghabhann le Rialachán Cur Chun Feidhme (AE) 2021/405, ba cheart é a athrú go ‘Dobharshaothrú: éisc eite agus caibheár (táirge éisc eite)’.

(20)

Dá bhrí sin, ba cheart Rialachán Cur Chun Feidhme (AE) 2021/405 a leasú dá réir.

(21)

Maidir le coinsíneachtaí táirgí ilchodacha fadré a mhonaraítear trí úsáid a bhaint as táirgí bainne phróiseáilte de thionscnamh na Colóime, coinsíneachtaí a seoladh cheana ón gColóim ar dháta theacht i bhfeidhm an Rialacháin seo, ar chúiseanna intuarthachta agus deimhneachta dlíthiúla, is iomchuí foráil a dhéanamh maidir le hidirthréimhse chun coinsíneachtaí den sórt sin a thabhairt isteach san Aontas.

(22)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Cuirtear an méid seo a leanas in ionad Airteagal 20(6):

(2)

Cuirtear an téacs a leagtar amach in Iarscríbhinn I a ghabhann leis an Rialachán seo in ionad Iarscríbhinn -I.

(3)

Leasaítear Iarscríbhinn VIII i gcomhréir le hIarscríbhinn II a ghabhann leis an Rialachán seo.

(4)

Leasaítear Iarscríbhinn IX i gcomhréir le hIarscríbhinn III a ghabhann leis an Rialachán seo’.