CINNEADH (AE) 2023/2898 ÓN gCOMHAIRLE

an 19 Nollaig 2023

maidir leis an seasamh atá le glacadh thar ceann an Aontais Eorpaigh san Eagraíocht Dhomhanda Chustaim (EDC) i ndáil le glacadh Nótaí Míniúcháin, Tuairimí maidir le hAicmiú nó comhairle eile faoi léiriú an Chórais Chomhchuibhithe agus moltaí chun aonfhoirmeacht a chinntiú maidir le léiriú agus cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 31, Airteagal 43(2) agus Airteagal 207(4), an chéad fhomhír, i gcomhar le hAirteagal 218(9) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)

Trí bhíthin Chinneadh 87/369/CEE ón gComhairle (1), d’fhormheas an tAontas an Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí (2), agus an Prótacal lena ndéantar leasú air (3), lenar bunaíodh, inter alia, an Coiste um an gCóras Comhchuibhithe (Coiste CC).

(2)

De bhun Airteagal 7(1), pointí (b) agus (c), den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, tá Coiste CC freagrach as Nótaí Míniúcháin, Tuairimí maidir le hAicmiú, nó comhairle eile mar threoracha maidir le léiriú an Chórais Chomhchuibhithe agus as moltaí a ullmhú chun aonfhoirmeacht a chinntiú maidir le léiriú agus cur i bhfeidhm an Chórais Chomhchuibhithe.

(3)

De bhun Airteagal 8(3) de den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, Nótaí Míniúcháin, Tuairimí maidir le hAicmiú, comhairle eile faoi léiriú an Chórais Chomhchuibhithe agus moltaí chun aonfhoirmeacht a chinntiú maidir le léiriú agus cur i bhfeidhm an Chórais Chomhchuibhithe a ullmhaítear le linn seisiún de Choiste CC (‘cinntí ó Choiste CC’), measfar iad a bheith faofa ag Comhairle na hEagraíochta Domhanda Custaim (EDC) i gcás nach bhfuil, tráth nach déanaí ná deireadh an dara mí tar éis na míosa ar dúnadh an seisiún ar lena linn a glacadh iad, fógra ó aon Pháirtí Conarthach sa Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí tugtha d’Ard-Rúnaí EDC ina n-iarrann sé go ndéanfadh Coiste CC athscrúdú orthu nó go gcuirfí faoi bhráid Chomhairle EDC iad.

(4)

De bhun Airteagal 8(4) den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, i gcás ina gcuirtear ábhar faoi bhráid Chomhairle EDC faoi fhorálacha mhír 2 den Airteagal sin, formheasfaidh Chomhairle EDC Nótaí Míniúcháin, Tuairimí maidir le hAicmiú, comhairle nó moltaí eile den chineál sin, ach amháin má iarrann aon Chomhalta de Chomhairle EDC is Páirtí Conarthach sa Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí é go gcuirfear faoi bhráid Choiste CC iad, ina n-iomláine nó i bpáirt lena n-athscrúdú.

(5)

An seasamh atá le glacadh thar ceann an Aontais in EDC maidir le glacadh Nótaí Míniúcháin, Tuairimí maidir le hAicmiú nó comhairle eile faoi léiriú an Chórais Chomhchuibhithe agus moltaí chun aonfhoirmeacht maidir le léiriú an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí a áirithiú , is iomchuí an seasamh sin a bhunú os rud é go mbeidh na cinntí sin a ullmhaíonn Coiste CC tionchar cinntitheach a imirt ar inneachar dhlí an Aontais, go háirithe Rialachán (CEE) Uimh. 2658/87 ón gComhairle (4).

(6)

Is chun leasa an Aontais é go mbunaítear na seasaimh a léiríonn an tAontas i gCoiste CC de réir prionsabail, critéir agus treoshuíomhanna lena rialaítear aicmiú earraí de réir taraife. Is chun leasa an Aontais é freisin go mbunaítear seasaimh den chineál sin go tapa chun é a chur ar a chumas don Aontas a chearta a fheidhmiú i gCoiste CC.

(7)

Chun cearta an Aontais a chaomhnú, ba cheart don Choimisiún a bheith in ann a iarraidh thar ceann an Aontais go gcuirfí an t-ábhar faoi bhráid Chomhairle EDC agus faoi bhráid Choiste CC lena athscrúdú de bhun Airteagal 8(2) den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, chun é a sheachaint go nglacfaí cinneadh maidir le hábhar nach féidir leis an gComhairle seasamh a ghlacadh ina leith roimh dhul in éag an sprioc-ama dá bhforáiltear in Airteagal 8(3) den Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, nó a bhfuil seasamh glactha ag Comhairle EDC ina leith atá éagsúil, ó thaobh substainte de, leis an gcinneadh a ghlac Coiste CC.

(8)

I bhfianaise a athraithí agus a theicniúla atá aicmiú na n-earraí faoin gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, i bhfianaise líon ard na gceisteanna a phléitear i rith an dá chruinniú de Choiste CC gach bliain, agus i bhfianaise na tréimhse giorra ama a bhíonn ar fáil chun na doiciméid a eisíonn Rúnaíocht EDC agus Páirtithe Conarthacha a mheas mar ullmhúchán do chruinnithe Choiste CC agus an gá a bhíonn ann, dá bhrí sin, go gcuirfí faisnéis nua a chuirtear i láthair roimh na cruinnithe sin nó lena linn san áireamh sa seasamh ón Aontas agus go ngníomhófaí ar an bhfaisnéis sin, ba cheart na bearta is gá a bhunú, i gcomhréir le prionsabal an chomhair dhílis idir institiúidí an Aontais mar a chumhdaítear in Airteagal 13(2) den Chonradh ar an Aontas Eorpach, chun an seasamh ón Aontas a shonrú.

(9)

Le Cinneadh (AE) 2020/1707 ón gComhairle (5), bunaíodh nós imeachta éifeachtúil brostaithe chun an seasamh a ghlacfar thar ceann an Aontais a bhunú maidir le formheas na Nótaí Míniúcháin, na dTuairimí maidir le hAicmiú nó na comhairle eile faoi léiriú an Chórais Chomhchuibhithe agus moltaí chun aonfhoirmeacht maidir le léiriú an Chórais Chomhchuibhithe a chinntiú faoin gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus maidir le gníomhartha den chineál sin a ullmhú san EDC. Ós rud é go rachaidh sé in éag an 31 Nollaig 2023, is iomchuí Cinneadh nua a chur ina ionad.

(10)

Ó tharla gur go déanach, arís agus arís eile, a bhíonn fáil ar na doiciméid oibre roimh chruinnithe Choiste CC, agus chun cearta agus leasanna an Aontais a chaomhnú laistigh de EDC, ba cheart don Choimisiún a seacht ndícheall a dhéanamh iarraidh ar Rúnaíocht EDC a áirithiú go mbeidh doiciméid oibre ar fáil i gcomhréir le rialacha nós imeachta Choiste CC, ionas go seolfar na doiciméid sin 30 lá ar a laghad roimh thús an tseisiúin ábhartha.

(11)

Chun a áirithiú go mbeidh an Chomhairle in ann, ar bhonn rialta, measúnú a dhéanamh ar an mbeartas atá sa Chinneadh seo agus, i gcás inarb iomchuí, é a athbhreithniú, agus de réir mheon an chomhair dhílis idir institiúidí an Aontais a chumhdaítear in Airteagal 13(2) CAE, ba cheart teorainn ama a chur le bailíocht an Chinnidh seo. Mar ullmhúchán d’Athbhreithniú Straitéiseach ar an gCóras Comhchuibhithe, a bhfuil sé beartaithe é a phlé i gCoimisiún Beartais EDC agus i gComhairle EDC i mí an Mheithimh 2024, is féidir tréimhse bhailíochta an Chinnidh seo a ghiorrú sula rachaidh sé in éag, ar thogra ón gCoimisiún.

(12)

Chun seasamh an Aontais a choinneáil ar bun maidir le Nótaí Míniúcháin, Tuairimí maidir le Rangú nó comhairle eile faoi léiriú an Chórais Chomhchuibhithe a fhormheas agus moltaí chun aonfhoirmeacht a chinntiú maidir le léiriú an Chórais Chomhchuibhithe faoin gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus maidir le hullmhú na ngníomhartha sin i EDC tar éis do Chinneadh (AE) 2020/1707 dul in éag an 31 Nollaig 2023, ba cheart feidhm a bheith ag an gCinneadh seo ón 1 Eanáir 2024 agus, dá bhrí sin, ba cheart dó teacht i bhfeidhm mar ábhar práinne,

TAR ÉIS AN CINNEADH SEO A GHLACADH:

Airteagal 1

Maidir leis an seasamh atá le glacadh thar ceann an Aontais maidir le formheas na Nótaí Míniúcháin, na dTuairimí maidir le hAicmiú nó na comhairle eile faoi léiriú ar an gCoinbhinsiún ar an gCóras Comhchuibhithe um Thuairisciú agus um Chódú Tráchtearraí agus moltaí chun aonfhoirmeacht maidir le léiriú an Chórais Chomhchuibhithe a chinntiú faoin gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus maidir le gníomhartha den chineál sin a ullmhú san Eagraíocht Dhomhanda Chustaim, beidh sé bunaithe i gcomhréir leis na prionsabail, na critéir agus na treoshuíomhanna a leagtar síos i Roinn I den Iarscríbhinn a ghabhann leis an gCinneadh seo.

Airteagal 2

Maidir le seasamh an Aontais atá le glacadh faoi Airteagal 1 a shonrú, déanfar é i gcomhréir leis an tsonraíocht a leagtar síos i Roinn II den Iarscríbhinn.

Airteagal 3

Tiocfaidh an Cinneadh seo i bhfeidhm ar dháta a ghlactha.

Rachaidh sé in éag an 31 Nollaig 2026.

Arna dhéanamh sa Bhruiséil, an 19 Nollaig 2023.

Thar ceann na Comhairle

An tUachtarán

T. RIBERA RODRÍGUEZ

(1) Cinneadh 87/369/CEE ón gComhairle an 7 Aibreán 1987 maidir leis an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus an Prótacal lena ndéantar leasú air, a thabhairt i gcrích (IO L 198, 20.7.1987, lch. 1).

(2) IO L 198, 20.7.1987, lch. 3.

(3) IO L 198, 20.7.1987, lch. 11.

(4) Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus maidir leis an gComhtharaif Chustaim (IO L 256, 7.9.1987, lch. 1).

(5) Cinneadh (AE) 2020/1707 ón gComhairle an 13 Samhain 2020 maidir leis an seasamh a ghlacfar thar ceann an Aontais san Eagraíocht Dhomhanda Chustaim i ndáil le glacadh Nótaí Míniúcháin, Tuairimí maidir le hAicmiú nó comhairle eile faoi léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le léirmhíniú agus cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe (IO L 385, 17.11.2020, lch. 11).

IARSCRÍBHINN

I. An seasamh a ghlacfar thar ceann an Aontais san Eagraíocht Dhomhanda Chustaim i ndáil le glacadh Nótaí Míniúcháin, Tuairimí maidir le hAicmiú nó comhairle eile faoi léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le léirmhíniú agus cur i bhfeidhm an Chórais Chomhchuibhithe faoi Choinbhinsiún CC

1. PRIONSABAIL

Faoi chuimsiú na hEagraíochta Domhanda Custaim (EDC), déanfaidh an tAontas an méid seo a leanas:

(a)

déanfaidh sé aicmiú earraí de réir custaim agus aonfhoirmeacht maidir le léirmhíniú agus cur i bhfeidhm an Chórais Chomhchuibhithe (CC) a chur chun cinn agus a éascú agus cuirfidh sé leis an aicmiú agus leis an aonfhoirmeacht sin, agus déanfaidh sé líon na gcásanna agus na ndíospóidí faoi léirmhínithe éagsúla an Chórais Chomhchuibhithe a laghdú;

(b)

oibreoidh sé chun rannpháirt iomchuí i gcéim ullmhúcháin chinntí an Choiste um an gCóras Comhchuibhithe (Coiste CC) a thabhairt do pháirtithe leasmhara, agus áiritheoidh sé gur i gcomhréir leis an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí (Coinbhinsiún CC) (1) a bheidh cinntí a ghlacfar in EDC;

(c)	áiritheoidh sé go mbeidh aon bheart a glacadh in EDC ag luí leis na rialacha ginearálta maidir le léirmhíniú an Chórais Chomhchuibhithe;

(d)	seasaimh atá comhsheasmhach leis na dea-chleachtais a d’fhorbair an tAontas sa réimse lena mbaineann, cuirfidh sé na seasaimh sin chun cinn;

(e)	cuirfidh sé simpliú agus nuachóiriú ar Ainmníocht CC chun cinn de réir mar a athraíonn riachtanais na n-úsáideoirí agus forbairt teicneolaíochtaí nua;

(f)	áiritheoidh sé comhsheasmhacht lena bheartais eile, lena n-áirítear an cuspóir maidir le leasanna airgeadais an Aontais a chosaint, agus le gealltanais idirnáisiúnta a mhéid atá ábhartha i bhfianaise chineál sonrach an aicmithe custaim.

2. CRITÉIR

Na seasaimh a ghlacfar thar ceann an Aontais in EDC:

(a)

bunófar iad de réir na gcritéar ginearálta seo a leanas:

—

an prionsabal go mbeidh, ar mhaithe le deimhneacht dhlíthiúil agus fíorú réidh, go mbeidh an critéar cinntitheach maidir le haicmiú earraí go ginearálta, chun críoch custaim, á lorg ina ngnéithe agus a sainghnéithe oibiachtúla mar a shainítear i bhfoclaíocht na gceannteideal sa Chóras Comhchuibhithe agus i nótaí na Roinne nó na Caibidle, agus

—	na rialacha ginearálta maidir le léirmhíniú an Chórais Chomhchuibhithe mar a leagtar amach san Iarscríbhinn a ghabhann le Coinbhinsiún CC.

(b)

i gcás inarb infheidhme, cuirfear na critéir shonracha seo a leanas san áireamh:

—	cás dlí Chúirt Bhreithiúnais an Aontais Eorpaigh a bhaineann le haicmiú custaim ar earraí,

—	Ainmníocht CC agus Nótaí Míniúcháin CC, tuairimí agus cinntí maidir le hAicmiú a ghlac Coiste CC,

—	fo-cheannteidil na hAinmníochta Comhcheangailte (AC) (2) agus Nótaí Míniúcháin AC,

—	rialacháin agus cinntí maidir le haicmiú a ghlac an Chomhairle nó an Coimisiún,

—	conclúidí ó Roinn na hAinmníochta Taraife agus Staidrimh den Choiste um an gCód Custaim, agus

—	aon ghníomh dlí nó treoirlíne eile a bhaineann le haicmiú custaim ar earraí arna bhforbairt ag an gComhairle nó ag an gCoimisiún.

3. TREOSHUÍOMHANNA

I gcás inarb iomchuí, féachfaidh an tAontas leis na cinntí seo a leanas a ghlacadh in EDC, de réir na bprionsabal agus na gcritéar dá dtagraítear i bpointí 1 agus 2:

(a)	Nótaí Míniúcháin, Tuairimí maidir le hAicmiú nó comhairle eile a mholadh agus a ullmhú mar threoraíocht chun an Córas Comhchuibhithe a léirmhíniú;

(b)	moltaí a ullmhú chun aonfhoirmeacht maidir le léirmhíniú agus cur i bhfeidhm an Chórais Chomhchuibhithe a áirithiú;

II. Sonrú an tseasaimh a ghlacfar thar ceann an Aontais san Eagraíocht Dhomhanda Chustaim i ndáil le glacadh Nótaí Míniúcháin, Tuairimí maidir le hAicmiú nó comhairle eile faoi léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le léirmhíniú agus cur i bhfeidhm an Chórais Chomhchuibhithe faoi Choinbhinsiún CC

Roimh gach cruinniú de Choiste CC a n-iarrfar ar Choiste CC lena linn cinntí a bhfuil éifeachtaí dlíthiúla leo ar an Aontas a ghlacadh, glacfar na céimeanna is gá ionas go gcuirfear san áireamh sa seasamh a léireofar thar ceann an Aontais an fhaisnéis theicniúil agus an fhaisnéis ábhartha eile is déanaí a tarchuireadh chuig an gCoimisiún, i gcomhréir leis na prionsabail, na critéir agus na treoshuíomhanna a leagtar amach i roinn I. Chun cearta agus leasanna an Aontais in EDC a chaomhnú, tabharfaidh an Coimisiún dá aire go háirithe go mbeidh fáil ar dhoiciméid oibre i gcomhréir le rialacha nós imeachta Choiste CC.

Chuige sin, agus bunaithe ar an bhfaisnéis sin, tarchuirfidh an Coimisiún chuig an gComhairle, in am trátha roimh gach cruinniú de Choiste CC dá dtagraítear i bpointe 1, doiciméad i scríbhinn ina leagfar amach sonraí na sonraíochta atá beartaithe maidir le seasamh an Aontais chun sonraí an tseasaimh atá le cur in iúl thar ceann an Aontais a phlé agus a fhormhuiniú. Scrúdóidh an Chomhairle doiciméid an Choimisiúin a luaithe agus is féidir.

Mura bhformhuineoidh an Chomhairle cuid shonrach den togra, ní thíolacfaidh an Coimisiún seasamh thar ceann an Aontais maidir leis an gcuid sin ag Coiste CC.

I gcás ina bhfuil difear substaintiúil idir an seasamh ón Aontas agus an cinneadh a ghlac Coiste CC, déanfaidh an Coimisiún, in am trátha roimh an sprioc-am dá bhforáiltear faoi Airteagal 8(3) de Choinbhinsiún CC, doiciméad i scríbhinn a tharchur chuig an gComhairle nó chuig a comhlachtaí ullmhúcháin lena leagtar síos gur féidir an cinneadh/na cinntí i gceist a ghlacadh nó go bhfuil gá ann an cheist a chur faoi bhráid Chomhairle EDC nó faoi bhráid Choiste CC lena hathscrúdú de bhun Airteagal 8(2) de Choinbhinsiún CC.

Chun cearta an Aontais a chaomhnú agus chun é a sheachaint go nglacfaí cinneadh maidir le hábhar nach féidir leis an gComhairle seasamh a ghlacadh ina leith roimh an sprioc-am dá bhforáiltear faoi Airteagal 8(3) de Coinbhinsiún CC atá á ghlacadh in EDC, iarrfaidh an Coimisiún thar ceann an Aontais go gcuirfear an t-ábhar faoi bhráid Chomhairle EDC agus faoi bhráid Choiste CC lena athscrúdú de bhun Airteagal 8(2) de Choinbhinsiún CC.

(1) IO L 198, 20.7.1987, lch. 3.

(2) Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim, IO L 256, 7.9.1987, lch. 9