(1)

Na bearta atá i bhfeidhm i gcoinne allmhairí aigéid thríchlóraisicianúraigh (‘TCCA’) de thionscnamh Dhaon-Phoblacht na Síne (‘an tSín’), is bearta frithdhumpála cinntitheacha idir 3,2 % agus 42,6 % iad, arna bhforchur le Rialachán Cur Chun Feidhme (AE) 2017/2230 ón gCoimisiún (2). Tá athbhreithniú éaga ar na bearta sin ar siúl faoi láthair.

(2)

Fuair an Coimisiún iarraidh ar athbhreithniú ‘onnmhaireora nua’ de bhun Airteagal 11(4) den bhun-Rialachán. Chuir Hebei Xingfei Chemical Co., Ltd (‘Hebei Xingfei’ nó ‘an t-iarratasóir’) an iarraidh isteach an 28 Feabhra 2023, a bhfuil a onnmhairí chuig an Aontas faoi réir dleacht frithdhumpála 42,6 % ar fud na tíre.

(3)

Mhaígh an t-iarratasóir nár onnmhairigh sé TCCA chuig an Aontas le linn thréimhse imscrúdúcháin an imscrúdaithe bunaidh, i.e. ón 1 Aibreán 2003 go dtí an 31 Márta 2004 (‘an tréimhse imscrúdúcháin bhunaidh’).

(4)

Mhaígh an t-iarratasóir freisin nach raibh sé gaolmhar le haon cheann de na táirgeoirí onnmhairiúcháin a tháirgeann TCCA agus atá faoi réir na mbeart atá i bhfeidhm. Ar deireadh, mhaígh an t-iarratasóir gur onnmhairigh sé TCCA chuig an Aontas tar éis dheireadh na tréimhse imscrúdúcháin bunaidh.

(5)

Scrúdaigh an Coimisiún an fhianaise a bhí ar fáil agus tháinig sé ar an gconclúid gur leor í chun údar cuí a thabhairt le hathbhreithniú ‘onnmhaireora nua’ a thionscnamh de bhun Airteagal 11(4) den bhun-Rialachán. Tar éis deis a thabhairt do tháirgeoirí an Aontais barúil a thabhairt, thionscain an Coimisiún an t-athbhreithniú le Rialachán Cur Chun Feidhme (AE) 2023/712 ón gCoimisiún (3).

(6)

Is éard atá sa táirge faoi athbhreithniú aigéad tríchlóraisicianúrach agus ullmhóidí de, ar a dtugtar ‘siomclóisín’ freisin faoin ainm neamhdhílseánaigh idirnáisiúnta (ANI), atá faoi láthair faoi chóid CN ex 2933 69 80 agus ex 3808 94 20 (cóid TARIC 2933698070 agus 3808942020), de thionscnamh Dhaon-Phoblacht na Síne (‘an táirge lena mbaineann’ nó ‘TCCA’).

(7)

Is táirge ceimiceach é TCCA a úsáidtear mar dhíghalrán clóirín orgánach speictrim leathain agus tuarthóir, go háirithe chun uisce i linnte snámha agus spánna a dhíghalrú. Cuimsíonn úsáidí eile cóireáil uisce i ndabhcha séarachais nó i dtúir fuarúcháin agus glanadh fearas cistine. Díoltar TCCA i bhfoirm púdair, gráinníní, táibléad nó sliseanna. Is ionann na saintréithe bunúsacha (díghalrán) atá i ngach foirm TCCA agus dá bhrí sin, meastar gur táirge aonair iad.

(8)

An 16 Deireadh Fómhair 2023, tharraing an t-iarratasóir siar go foirmiúil a iarraidh ar athbhreithniú ‘onnmhaireora nua’.

(9)

I gcomhréir le hAirteagal 9(1) den bhun-Rialachán, nuair a tharraingíonn an gearánach siar a ghearán, féadfar an t-imeacht a fhoirceannadh ach amháin mura mbeadh foirceannadh den sórt sin chun leas an Aontais.

(10)

Mheas an Coimisiún gur cheart an imeacht frithdhumpála a fhoirceannadh ós rud é nár tugadh chun solais leis an imscrúdú aon ghné a léiríonn nach mbeadh foirceannadh den sórt sin chun leasa an Aontais.

(11)

I bhfianaise a bhfuil thuas, tháinig an Coimisiún ar an gconclúid, an t-athbhreithniú maidir le hallmhairí TCCA isteach san Aontas a tháirgeann an t-iarratasóir, gur cheart an t-athbhreithniú sin a fhoirceannadh. An dleacht is infheidhme maidir le ‘gach cuideachta eile’ de bhun Airteagal 1(2) de Rialachán Cur Chun Feidhme (AE) 2017/2230, ba cheart feidhm a bheith aici maidir le táirgí arna monarú ag an iarratasóir. Dá bhrí sin, ba cheart scor de chlárú allmhairí an iarratasóra, agus an dleacht uile-tíre is infheidhme maidir le cuideachtaí eile (42,6 %) arna forchur le Rialachán Cur Chun Feidhme (AE) 2017/2230, ba cheart an dleacht sin a thobhach ar na hallmhairí sin ó dháta thionscnamh an athbhreithnithe seo.

(12)

Chuir an Coimisiún páirtithe leasmhara ar an eolas go raibh sé ar intinn aige an imscrúdú an athbhreithnithe a fhoirceannadh, dleacht frithdhumpála chinntitheach a fhorchur ar allmhairí TCCA agus an dleacht sin a thobhach ar allmhairí atá faoi réir clárú faoi Rialachán Cur Chun Feidhme (AE) 2023/712. Tugadh an deis do na páirtithe leasmhara barúlacha a thabhairt. Ní bhfuarthas aon bharúil.

(13)

Tá an Rialachán seo i gcomhréir leis an tuairim ón gCoiste arna bhunú le hAirteagal 15(1) Rialachán (AE) 2016/1036.