(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta i leith an t-údarú sin a dheonú.

(2)

Le Rialachán Cur Chun Feidhme (AE) 2017/2308 ón gCoimisiún (2) údaraíodh ullmhóid Bacillus subtilis (DSM 5750) agus Bacillus licheniformis (DSM 5749) a úsáid mar bhreiseán beathaithe le haghaidh bainbh diúil ar feadh tréimhse 10 mbliana.

(3)

I gcomhréir le hAirteagal 7 de Rialachán (CE) Uimh. 1831/2003, cuireadh iarratas isteach an 15 Deireadh Fómhair 2019 ar údarú úsáidí nua ullmhóid Bacillus subtilis DSM 5750 agus Bacillus licheniformis DSM 5749 mar bhreiseán beathaithe le haghaidh bainbh, mionspeicis mucúla eile atá ag fás agus mionspeicis mucúla atáirgthe eile, laonna lena ramhrú agus athchogantaigh eile atá ag fás, turcaithe le haghaidh pórúcháin agus mionspeicis éanlaithe clóis eile, ullmhóid atá le haicmiú sa chatagóir ‘breiseáin zóiteicniúla’ agus san fheidhmghrúpa ‘cobhsaitheoirí fhlóra na stéige’. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(4)

Tharraing an t-iarratasóir siar an iarraidh ar údarú maidir le mionspeicis mucúla eile atá ag fás agus mionspeicis mucúla atáirgthe eile, turcaithe le haghaidh pórúcháin agus mionspeicis éanlaithe clóis eile. Maidir le bainbh, shoiléirigh sé freisin go raibh an t-iarratas ag féachaint le húsáid neamhspleách a bhaint as an ullmhóid le haghaidh cránacha agus bainbh diúil, arb é atá ann iarraidh ar mhodhnú ar théarmaí an údaraithe a dheonaítear le Rialachán Cur Chun Feidhme (AE) 2017/2308.

(5)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 31 Eanáir 2023 (3) maidir le hullmhóid Bacillus subtilis DSM 5750 agus Bacillus paralicheniformis DSM 5749 (a sainaithníodh go tacsanomaíoch roimhe sin mar Bacillus licheniformis DSM 5749) go meastar í a bheith sábháilte do na spriocspeicis, do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid freisin gur cheart a mheas gur íogróir féideartha riospráide í an ullmhóid sin. In éagmais measúnachtaí bailíochtaithe chun miocrorgánaigh a mheasúnú, ní fhéadfadh an tÚdarás teacht ar chonclúid maidir leis an íogrú craicinn a d’fhéadfadh an ullmhóid a dhéanamh. Shuigh an tÚdarás freisin i ndáil leis na conclúidí maidir le héifeachtúlacht an bhreiseáin i leith bainbh scoite agus laonna lena dtógáil, conclúidí ar tháinig an tÚdarás orthu sa tuairim uaidh an 12 Iúil 2016 (4), gur féidir na conclúidí sin a leathnú chuig bainbh diúil, laonna lena ramhrú agus athchogantaigh eile atá ag fás. Níor mheas sé go bhfuil gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar na modhanna a úsáidtear chun anailís a dhéanamh ar na breiseáin bheathaithe arna cur isteach ag an Saotharlann Tagartha a bunaíodh le Rialachán (CE) Uimh. 1831/2003.

(6)

I bhfianaise an mhéid thuas, measann an Coimisiún go gcomhlíonann ullmhóid Bacillus subtilis DSM 5750 agus Bacillus paralicheniformis DSM 5749 na coinníollacha dá bhforáiltear in Airteagal 5 de Rialachán (CE) Uimh. 1831/2003 a mhéid a bhaineann le húsáidí nua na hullmhóide sin le haghaidh laonna lena ramhrú, uain lena dtógáil agus lena ramhrú, agus mionspeicis athchogantacha lena dtógáil agus lena ramhrú. Dá réir sin, ba cheart úsáidí sin na hullmhóide a údarú. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Measann an Coimisiún freisin go gcomhlíonann údarú ullmhóid Bacillus subtilis (DSM 5750) agus Bacillus licheniformis (DSM 5749) na coinníollacha dá bhforáiltear in Airteagal 5 de Rialachán (CE) Uimh. 1831/2003 nuair a mhodhnaítear téarmaí an údaraithe a mhéid a bhaineann le bainbh diúil, trí mholadh seachas oibleagáid a dhéanamh de chothú comhuaineach cránacha agus bainbh diúil leis an ullmhóid sin. Dá bhrí sin, ba cheart Rialachán Cur Chun Feidhme (AE) 2017/92 a leasú dá réir sin. Ós rud é nach gceanglaítear, ar chúiseanna sábháilteachta, go gcuirfear na modhnuithe ar na coinníollacha maidir le húdarú na n-ullmhóid sin le haghaidh bainbh diúil i bhfeidhm láithreach, is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

‘4.

Sonraigh sna treoracha úsáide:

‘Moltar an breiseán a thabhairt do chránacha atá ag tál agus bainbh diúil ag an am céanna.’ ’