(1)

Ceanglaítear, le Rialachán (AE) Uimh. 1380/2013 ó Pharlaimint na hEorpa agus ón gComhairle (1), go bhfuil bearta caomhnaithe le glacadh agus an chomhairle eolaíoch, theicniúil agus eacnamaíoch a bhíonn ar fáil á cur san áireamh, lena n-áirítear, i gcás inarb ábhartha, tuarascálacha arna dtarraingt suas ag an gCoiste Eolaíoch, Teicniúil agus Eacnamaíoch um Iascach agus ag comhlachtaí comhairleacha eile agus aon chomhairle a fhaightear ó chomhairlí comhairleacha.

(2)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis na deiseanna iascaireachta sin, de réir mar is iomchuí. Faoi Airteagal 16(4) de Rialachán (AE) Uimh. 1380/2013, tá na deiseanna iascaireachta le socrú i gcomhréir le cuspóirí an chomhbheartais iascaigh (CBI) de réir mar a leagtar amach in Airteagal 2(2) den Rialachán sin. Faoi Airteagal 16(1) den Rialachán sin, tá deiseanna iascaireachta le cionroinnt i measc na mBallstát ar dhóigh lena n-áirithítear cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic nó iascaigh.

(3)

Dá bhrí sin, ba cheart na gabhálacha iomlána incheadaithe (TACanna) a bhunú i gcomhréir le Rialachán (AE) Uimh. 1380/2013, ar bhonn na comhairle eolaíche atá ar fáil, agus impleachtaí bitheolaíocha agus socheacnamaíocha a chur san áireamh agus cóir chothrom idir earnálacha iascaireachta á háirithiú, agus na tuairimí a cuireadh in iúl le linn na gcomhairliúchán leis na páirtithe leasmhara a chur san áireamh.

(4)

Le Rialachán (AE) 2016/1139 ó Pharlaimint na hEorpa agus ón gComhairle (2), bunaítear plean ilbhliantúil do na stoic trosc, scadán agus salán i Muir Bhailt agus don iascach a shaothraíonn na stoic sin. Is é is aidhm don phlean sin a áirithiú go ndéanfaidh saothrú bheo-acmhainní bitheolaíocha na mara líon na speiceas atá á saothrú a athbhunú agus a chothabháil os cionn leibhéil ar a mbeifear in ann an uastáirgeacht inbhuanaithe a tháirgeadh. Foráiltear le Rialachán (AE) Uimh. 1380/2013, i gcás stoic atá faoi réir pleananna ilbhliantúla sonracha, go bhfuil na deiseanna iascaireachta le socrú i gcomhréir leis na rialacha a leagtar síos sna pleananna ilbhliantúla sin.

(5)

I gcomhréir le hAirteagal 4(1) de Rialachán (AE) 2016/1139, tá na deiseanna iascaireachta le haghaidh na stoc a liostaítear in Airteagal 1 den Rialachán sin le socrú chun an bhásmhaireacht iascaireachta ar leibhéal na huastáirgeachta inbhuanaithe, arna shloinneadh ina raonta, a bhaint amach a luaithe is féidir agus, ar bhonn forchéimnitheach agus incriminteach, faoi 2020 ar a dhéanaí. Dá bhrí sin, ba cheart na teorainneacha gabhála is infheidhme in 2024 maidir leis na stoic ábhartha i Muir Bhailt a bhunú i gcomhréir le rialacha agus cuspóirí an phlean ilbhliantúil arna bhunú leis an Rialachán sin.

(6)

D’fhoilsigh an Chomhairle Idirnáisiúnta um Thaiscéalaíocht na Mara (ICES) a comhairle bhliantúil stoic maidir le stoic Mhuir Bhailt an 31 Bealtaine 2023.

(7)

Stoic áirithe a chumhdaítear le Rialachán (AE) 2016/1139, molann ICES gabhálacha nialasacha ina leith. Mar sin féin, dá mbunófaí na TACanna ar na leibhéil arna moladh, thiocfadh feiniméan an ‘tachtspeicis’ chun cinn de thoradh na hoibleagáide gach gabháil a thabhairt i dtír, lena n-áirítear foghabhálacha ó na stoic sin in iascaigh mheasctha. Is éard is tachtspeiceas ann speiceas lena mbaineann easpa cuóta a d’fhéadfadh tabhairt ar shoitheach iascaireachta amháin nó níos mó scor den iascaireacht fiú más rud é go bhfuil cuótaí fós ag an soitheach nó ag na soithí sin le haghaidh speicis eile. Is iomchuí, dá bhrí sin, TACanna sonracha a bhunú le haghaidh fhoghabhálacha na stoc sin chun an chothromaíocht cheart a bhaint amach idir an t-iascach a choinneáil ar bun i bhfianaise na n-impleachtaí tromchúiseacha socheacnamaíocha a d’fhéadfadh a bheith ann mura ndéanfar amhlaidh, agus an gá atá le stádas maith bitheolaíoch a bhaint amach le haghaidh na stoc sin, agus an deacracht a bhaineann le hiascaireacht a dhéanamh ar gach stoc in iascach measctha ag an uastáirgeacht inbhuanaithe a chur san áireamh. Ba cheart leibhéal na TACanna foghabhála sin a shocrú chun a áirithiú go laghdófar ráta básmhaireachta na stoc sin, go gcuirfear dreasachtaí ar fáil chun feabhas a chur ar an roghnaíocht agus go ndéanfar foghabhálacha na stoc sin a sheachaint. Chun gabhálacha na stoc a laghdú a bhfuil TACanna foghabhála socraithe ina leith, ba cheart na deiseanna iascaireachta le haghaidh na n-iascach as a ngabhtar na stoic sin a shocrú ar leibhéil a chuideoidh le bithmhais na stoc leochaileach a athshlánú go leibhéil inbhuanaithe.

(8)

De réir ICES, bíonn speicis á meascadh go pointe áirithe, ar a laghad, i bhformhór mór na n-iascach i Muir Bhailt. Baineann an meascadh sin leis an dá speicas arna mbainistiú ag TAC agus le speicis eile. Idir speicis pheiligeacha agus speiceas ghrinnill a tharlaíonn an méid is tábhachtaí den mheascadh. Molann ICES gabhálacha nialasacha a dhéanamh ar scadáin ó Mhuir Bhailt Thiar, ar throisc ó Mhuir Bhailt Thoir agus ar bhradáin sa phríomh-imchuach in 2024. Thairis sin, gabhálacha an-íseal a mholann ICES sa chomhairle réamhchúraim uaidh maidir le troisc ó Mhuir Bhailt Thiar. Dá bhrí sin, dá mbunófaí TACanna le haghaidh na stoc sin ar na leibhéil arna moladh ag ICES, bheadh ar shoithí a bhíonn ag iascach leathóg go háirithe scor den iascaireacht in 2024. Bunaithe ar shonraí ó Fhaireachlann an Mhargaidh Eorpaigh um Iascach agus um Tháirgí Dobharshaothraithe (EUMOFA), meastar gurb é EUR 24,5 milliún luach céad-díola an iascaigh leathóg a cheadaítear a ghabháil laistigh de theorainneacha na TACanna atá beartaithe. Maidir le hiascaigh atá dírithe ar speicis nach bhfuil arna mbainistiú ag TAC de chuid an Aontais, go háirithe speicis eile leathógacha, bheadh ar go leor díobh, go háirithe iascaigh chósta ar mhionscála, deireadh a chur leis an iascaireacht in 2024. Is iomchuí, dá bhrí sin, TAC a bhunú le haghaidh fhoghabhálacha na tachtspeiceas seo a leanas, faoi choinníollacha áirithe: scadáin ó Mhuir Bhailt Thiar, troisc ó Mhuir Bhailt Thoir, troisc ó Mhuir Bhailt Thiar agus bradáin sa phríomh-imchuach.

(9)

Maidir leis an stoc trosc ó Mhuir Bhailt Thoir, measann ICES go bhfuil an bhithmhais an stoic trosc ó Mhuir Bhailt Thoir fós faoi bhun an phointe tagartha teorann maidir le bithmhais an stoic sceite, leibhéal ar faoina bhun a d’fhéadfadh laghdú a bheith ar an acmhainneacht síolraithe (Blim), agus gur ar éigean a tháinig méadú uirthi i gcomparáid le 2022. Dá bhrí sin, molann ICES den chúigiú bliain as a chéile gan aon trosc ó Mhuir Bhailt Thoir a ghabháil. Sna himthosca sin, is iomchuí, de bhun Rialachán (AE) Uimh. 1380/2013, na hiascaigh spriocdhírithe choinneáil dúnta agus leanúint de na bearta feabhais atá nasctha go feidhmiúil leis an méid sin. Ba cheart na deiseanna iascaireachta le haghaidh foghabhálacha dosheachanta a shocrú ar leibhéal íseal agus feiniméan an ‘tachtspeicis’ á sheachaint ag an am céanna.

(10)

Maidir leis an stoc trosc ó Mhuir Bhailt Thiar, rinne ICES a chomhairle a íosghrádú, mar thoradh ar éiginnteachtaí leanúnacha, go comhairle réamhchúraim. Is cosúil faoi láthair go bhfuil an stoc faoi bhun Blim le formhór na 15 bliana seo caite agus go raibh sé ar leibhéal níos ísle ná riamh in 2022. Tá an chomhairle réamhchúraim maidir le gabhálacha ag leibhéal an-íseal. Sna himthosca sin, is iomchuí, i gcomhréir le Rialachán (AE) Uimh. 1380/2013, na hiascaigh spriocdhírithe a choinneáil dúnta agus leanúint de na bearta feabhais atá nasctha go feidhmiúil leis an méid sin, agus na hiascaigh áineasa trosc ó Mhuir Bhailt a dhúnadh. Ba cheart na deiseanna iascaireachta le haghaidh foghabhálacha dosheachanta a shocrú ar leibhéal íseal agus feiniméan an tachtspeicis á sheachaint ag an am céanna.

(11)

Maidir le bradáin i bhforanna 22 go 31 ICES, lean ICES dá chomhairle maidir le gabhálacha nialasacha, chuir sé teorainn leis an bhféidearthacht leanúint d’iascaigh spriocdhírithe shamhraidh chósta d’fhoroinn 31 ICES agus laghdaigh sé a chomhairle maidir le gabhálacha dá réir. Sna himthosca sin, is iomchuí, de bhun Rialachán (AE) Uimh. 1380/2013, an limistéar iascaireachta agus leibhéal na ndeiseanna iascaireachta a choigeartú i gcomhréir le comhairle ICES, agus na bearta ceartaitheacha a bhfuil baint fheidhmiúil acu leo a choinneáil ar bun.

(12)

Chun úsáid iomlán na ndeiseanna iascaireachta cósta a áirithiú i bhforoinn 32 ICES, tugadh isteach solúbthacht theoranta idirlimistéir do bhradáin idir foranna 22 go 31 ICES agus foroinn 32 ICES in 2019. I bhfianaise na n-athruithe ar dheiseanna iascaireachta don dá stoc sin, is iomchuí an tsolúbthacht sin a choinneáil ar bun.

(13)

Toirmeasc a chur ar iascaireacht ar bhric gheala thar cheithre mhuirmhíle arna dtomhas ó na bonnlínte agus teorannú a dhéanamh ar fhoghabhálacha breac geal go 3 % den chomhghabháil breac geal agus bradán, bhí ról acu maidir le laghdú substaintiúil ar an míthuairisciú nach beag a bhí ann roimhe sin ar ghabhálacha san iascach bradán, go háirithe iad siúd a thuairiscítí mar ghabhálacha breac geal. Is iomchuí, dá bhrí sin, na srianta atá ann cheana a choinneáil ar bun chun an míthuairisciú a choinneáil ag leibhéal íseal.

(14)

Ba cheart bearta maidir le hiascaigh áineasa trosc agus bradán, agus bearta chun na stoic breac geal agus bradán a chaomhnú, a bheith gan dochar do bhearta náisiúnta níos déine faoi Airteagail 19 agus 20 de Rialachán (AE) Uimh. 1380/2013.

(15)

Maidir le scadáin i Murascaill na Boitnia, a mbaineann tábhacht mhór shocheacnamaíoch lena n-iascach, thug ICES comhairle maidir leis an uastáirgeacht inbhuanaithe lenar ghabh raonta gabhálacha. An tráth céanna, is lú bithmhais an stoic sin ná an pointe tagartha ar faoina bhun a bhfuil gníomhaíocht shonrach iomchuí bhainistíochta le déanamh (Btrigger) agus tá dóchúlacht ann go dtitfidh an stoc faoi bhun Blim in 2025. Sna himthosca sin, is iomchuí, de bhun Rialachán (AE) 2016/1139, na deiseanna iascaireachta a shocrú sa raon íosta den bhásmhaireacht iascaireachta as a n-eascraíonn an uastáirgeacht inbhuanaithe (FMSY).

(16)

Maidir le scadáin ó Mhuir Bhailt Thiar, measann ICES, cé gur tháinig méadú ar bhithmhais an stoic, nach bhfuil inti ach 71 % de Blim. Thairis sin, tá an earcaíocht fós ar leibhéil níos ísle ná riamh agus meastar nach n-athshlánófar an bhithmhais os cionn Blim in 2025. Dá bhrí sin, molann ICES don séú bliain as a chéile gan aon scadán ó Mhuir Bhailt Thiar a ghabháil. Sna himthosca sin, is iomchuí, de bhun Rialachán (AE) 2016/1139, na hiascaigh spriocdhírithe a choinneáil dúnta agus na deiseanna iascaireachta le haghaidh foghabhálacha dosheachanta a shocrú ar leibhéal íseal chun feiniméan an tachtspeicis a sheachaint.

(17)

A mhéid a bhaineann le scadáin ó Mhuir Bhailt Láir, a mbaineann tábhacht mhór shocheacnamaíoch lena n-iascach, thug ICES comhairle maidir leis an uastáirgeacht inbhuanaithe lenar bhain réimsí gabhálacha. An tráth céanna, measann ICES gur lú bithmhais an stoic sin ná Blim den chuid is mó le 30 bliain anuas, lena n-áirítear le blianta beaga anuas, agus go bhfuil dóchúlacht ann go mbeidh bithmhais an stoc sin faoi bhun Blim i gcónaí in 2025. Sna himthosca sin, is iomchuí, de bhun Rialachán (AE) 2016/1139, na deiseanna iascaireachta a shocrú sa raon íosta FMSY, agus cosc le linn an tséasúir sceite a shocrú d’iascaigh a úsáideann trál peiligeach mar bheart ceartaitheach breise a bhfuil nasc feidhmiúil aige leis na deiseanna iascaireachta.

(18)

Maidir le scadáin i Murascaill Ríge, measann ICES go bhfuil an bhithmhais os cionn Btrigger agus go bhfuil an brú iascaireachta ag FMSY. Is iomchuí, dá bhrí sin, de bhun Rialachán (AE) 2016/1139, na deiseanna iascaireachta a shocrú ag luach phointe FMSY.

(19)

A mhéid a bhaineann le leathóga, measann ICES go mbíonn troisc a ghabháil mar fhoghabhálacha in iascaigh leathóg. Is iomchuí, dá bhrí sin, de bhun Rialachán (AE) 2016/1139, na deiseanna iascaireachta le haghaidh leathóg a shocrú faoi bhun an luacha is ísle sa raon FMSY.

(20)

Maidir le saláin, measann ICES nach raibh aon earcaíocht láidir ann ó bhí 2014 ann, cé go bhfuil an bhithmhais os cionn Btrigger. Ina theannta sin, measann ICES go raibh an earcaíocht ar leibhéal níos ísle ná riamh in 2021 agus 2022. Thairis sin, is minic gur iascaigh mheasctha iad na hiascaigh salán, ina ndéantar iascach ar salán mar aon le scadáin. Is iomchuí, dá bhrí sin, de bhun Rialachán (AE) 2016/1139, na deiseanna iascaireachta le haghaidh salán a shocrú sa raon íosta comhfhreagrach FMSY.

(21)

Tá úsáid na ndeiseanna iascaireachta a leagtar amach sa Rialachán seo faoi réir Rialachán (CE) Uimh. 1224/2009 ón gComhairle (3), agus go háirithe Airteagal 33 de maidir le gabhálacha agus an iarracht iascaireachta a thaifeadadh agus Airteagal 34 de maidir le sonraí i ndáil le hídiú deiseanna iascaireachta a tharchur chuig an gCoimisiún. Ba cheart a shonrú sa Rialachán seo, dá bhrí sin, na cóid a bhaineann le stoic a thabhairt i dtír faoi réir an Rialacháin seo atá le húsáid ag na Ballstáit agus sonraí á seoladh chuig an gCoimisiún acu.

(22)

Le Rialachán (CE) Uimh. 847/96 ón gComhairle (4), leagtar síos coinníollacha breise maidir le TACanna a bhainistiú ó bhliain go bliain, lena n-áirítear, faoi Airteagail 3 agus 4 dá chuid, forálacha solúbthachta le haghaidh stoic atá faoi réir TACanna réamhchúraim agus anailíseacha. Faoi Airteagal 2 den Rialachán sin, tá an Chomhairle le cinneadh, agus na TACanna á socrú aici, cé na stoic nár cheart feidhm a bheith ag Airteagail 3 ná 4 maidir leo, go háirithe ar bhonn stádas bitheolaíoch na stoc. Ina theannta sin, le hAirteagal 15(9) de Rialachán (AE) Uimh. 1380/2013 leagtar síos an sásra solúbthachta ó bhliain go bliain le haghaidh na stoc uile atá faoi réir na hoibleagáide gabhálacha a thabhairt i dtír. Dá bhrí sin, chun solúbthacht iomarcach a sheachaint a bhainfeadh an bonn de phrionsabal shaothrú céillí freagrach bheo-acmhainní bitheolaíocha na mara, a chuirfeadh bac ar ghnóthú chuspóirí an Chomhbheartais Iascaigh agus a chuirfeadh meath ar stádas bitheolaíoch na stoc, ba cheart a chur in iúl go ríshoiléir nach mbeidh feidhm ag Airteagail 3 agus 4 de Rialachán (CE) Uimh. 847/96 maidir le TACanna ach amháin i gcás nach mbaintear leas as an tsolúbthacht ó bhliain go bliain dá bhforáiltear in Airteagal 15(9) de Rialachán (AE) Uimh. 1380/2013.

(23)

Maidir le bithmhais troisc ó Mhuir Bhailt Thoir, troisc ó Mhuir Bhailt Thiar agus scadáin ó Mhuir Bhailt Thiar, tá sé faoi bhun an Blim. I gcás na stoc sin go léir, ní cheadaítear in 2024 ach iascaigh foghabhála, eolaíocha, agus i gcás scadáin ó Mhuir Bhailt Thiar, iascaigh chósta ar mhionscála. Dá bhrí sin, agus i bhfianaise athléimneacht réasúnta íseal éiceachóras Mhuir Bhailt, tá gealltanas tugtha ag na Ballstáit a bhfuil sciar cuóta de na TACanna ábhartha acu gan an tsolúbthacht ó bhliain go bliain dá bhforáiltear in Airteagal 15(9) de Rialachán (AE) Uimh. 1380/2013 a chur i bhfeidhm maidir leis na stoic sin in 2024, ionas nach rachaidh gabhálacha in 2024 thar na TACanna ábhartha. Thairis sin, i bhforanna 22-30 ICES, tá an bhithmhais maidir le gach stoc bradán sna haibhneacha faoi bhun an phointe tagartha teorann do tháirgeadh gealóg (Rlim) agus ní cheadaítear ach iascaigh foghabhála agus eolaíocha in 2024. Dá bhrí sin, thug na Ballstáit ábhartha gealltanas comhchosúil maidir le solúbthacht ó bhliain go bliain i ndáil le gabhálacha bradán sa phríomh-imchuach in 2024.

(24)

Le Rialachán (AE) 2023/194 ón gComhairle (5), socraítear na deiseanna iascaireachta le haghaidh troisc Ioruacha ón 1 Samhain 2022 go dtí an 31 Deireadh Fómhair 2023 i roinn 3a ICES (‘Skagerrak-Kattegat’), in uiscí na Ríochta Aontaithe agus uiscí an Aontais i bhfolimistéar 4 ICES agus in uiscí na Ríochta Aontaithe i roinn 2a ICES (‘an Mhuir Thuaidh’). Is ón 1 Samhain go dtí an 31 Deireadh Fómhair a bheidh an séasúr iascaireachta le haghaidh troisc Ioruacha. Chuaigh an tAontas agus an Ríocht Aontaithe i mbun comhairliúcháin dhéthaobhacha de bhun Airteagal 498(2) den Chomhaontú Trádála agus Comhair idir Comhphobal Eorpach do Fhuinneamh Adamhach an Aontais Eorpaigh, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (6) an 16 Deireadh Fómhair 2023 agus tháinig siad ar chomhaontú maidir le TAC ar bhonn na comhairle ó ICES a foilsíodh an 9 Deireadh Fómhair 2023. Déantar torthaí na gcomhairliúchán a dhoiciméadú sa Taifead i Scríbhinn, a d’fhormhuinigh an Chomhairle an 20 Deireadh Fómhair 2023 agus a shínigh Ceann Toscaireachta na Ríochta Aontaithe agus ionadaí an Choimisiúin thar ceann an Aontais, i gcomhréir le hAirteagal 498(6) den Chomhaontú sin agus le Cinneadh (AE) 2021/1875 ón gComhairle (7). Dá bhrí sin, maidir leis na deiseanna iascaireachta ábhartha le haghaidh troisc Ioruacha i roinn 3a ICES, in uiscí na Ríochta Aontaithe agus in uiscí an Aontais i bhfolimistéar 4 ICES, agus in uiscí na Ríochta Aontaithe de roinn 2a ICES ón 1 Samhain 2023 go dtí an 31 Deireadh Fómhair 2024, ba cheart iad a shocrú ag an leibhéal a leagtar amach sa taifead sin i scríbhinn.

(25)

Le Rialachán (AE) 2023/194, socraítear deiseanna iascaireachta le haghaidh cadóg i bhfolimistéar 4, roinn 6a agus roinn 3a ICES (an Mhuir Thuaidh, Iarthar na hAlban, Skagerrak) le haghaidh 2023, bunaithe ar thoradh na gcomhairliúchán iascaigh idir an tAontas, an Iorua agus an Ríocht Aontaithe le haghaidh 2024, mar atá doiciméadaithe sa Taifead Comhaontaithe, a síníodh an 9 Nollaig 2022. Chun a ráthú go mbainfear lánúsáid as deiseanna iascaireachta, is iomchuí foráil a dhéanamh maidir le socrú solúbtha a chur chun feidhme idir cuid de na limistéir TAC inarb é an stoc bitheolaíoch céanna atá i gceist. Is iomchuí, dá bhrí sin, solúbthacht idirlimistéir a thabhairt isteach maidir le cuótaí na mBallstát le haghaidh cadóg, is é sin suas le 10 % ón Muir Thuaidh go dtí uiscí an Aontais in Skagerrak-Kattegat.

(26)

Leis an gComhaontú Comhpháirtíochta Iascaigh Inbhuanaithe idir an tAontas Eorpach, de pháirt amháin, agus Rialtas na Graonlainne agus Rialtas na Danmhairge, den pháirt eile, agus leis an bPrótacal a ghabhann leis (8), foráiltear go bhfuil an tAontas chun 7,7 % den TAC le haghaidh na gcaibeallán (Mallotus villosus) atá le gabháil in uiscí na Graonlainne d’fholimistéir 5 agus 14 ICES a fháil ó Rialtas na Graonlainne. An 5 Deireadh Fómhair 2023, chuir Rialtas na Graonlainne in iúl don Aontas nach bhfuil Rialtas na Graonlainne in ann caibealláin a thairiscint don Aontas le haghaidh na tréimhse comhfhreagraí, bunaithe ar an gcomhairle eolaíoch idirmheánach a d’fhoilsigh Institiúid Taighde Mara agus Fionnuisce na hÍoslainne, ina sonraítear nár cheart do na gabhálacha sa tréimhse ‘geimhreadh 2023/2024’ a bheith níos mó ná nialas tona. Go dtí go n-eiseofar an chomhairle eolaíoch chríochnaitheach, a d’fhéadfadh ligean do Rialtas na Graonlainne caibealláin a thairiscint don Aontas, ba cheart a mharcáil go bhfuil na deiseanna iascaireachta le haghaidh an stoic sin i Rialachán (AE) 2023/194 ‘Le bunú’.

(27)

Dá bhrí sin, ba cheart Rialachán (AE) 2023/194 a leasú dá réir.

(28)

Chun briseadh i ngníomhaíochtaí iascaireachta a sheachaint, ba cheart feidhm a bheith ag forálacha an Rialacháin seo a bhaineann le Muir Bhailt ón 1 Eanáir 2024. Mar sin féin, ba cheart feidhm a bheith ag an Rialachán seo maidir le troisc Ioruacha i roinn 3a ICES, in uiscí na Ríochta Aontaithe agus uiscí an Aontais i bhfolimistéar 4 ICES, agus in uiscí na Ríochta Aontaithe i roinn 2a ICES ón 1 Samhain 2023 go dtí an 31 Deireadh Fómhair 2024, ós rud é gurb é sin séasúr iascaireachta an troisc Ioruaigh. Ba cheart feidhm a bheith ag an Rialachán seo maidir le cadóga i bhfolimistéar 4, roinn 6a agus roinn 3a ICES (an Mhuir Thuaidh, Iarthar na hAlban, Skagerrak) ón 1 Samhain 2023 go dtí an 31 Nollaig 2023, chun úsáid iomlán na ndeiseanna iascaireachta le haghaidh 2023 a ráthú. Ar chúiseanna práinne, ba cheart go dtiocfadh an Rialachán seo i bhfeidhm láithreach tar éis a fhoilsithe,