(1)

Tá ganntanas oibrithe an Aontais ag cur srian suntasach ar a chumas dul in oiriúint do na claochluithe leanúnacha ó thaobh na hoibre, an táirgthe agus na cumarsáide de ar fud na ngeilleagar agus na margaí saothair.

(2)

Bíonn fostóirí ar fud an Aontais ag tuairisciú deacrachtaí i gcónaí maidir le hoibrithe a aimsiú a bhfuil na scileanna riachtanacha acu. Ina theannta sin, le daonra atá ag dul in aois, meastar go laghdófar an lucht saothair atá ar fáil agus go gcuirfear leis an nganntanas scileanna amach anseo. Déantar difear ar leith d’fhiontair bheaga agus mheánmhéide (FBManna), is é sin 25 mhilliún eintiteas ar fud an Aontais, toisc go bhfuil siad ag streachailt chun teacht ar an tallann cheart is gá le haghaidh fás inbhuanaithe, inscálaitheachta agus iomaíochais.

(3)

Tá an ganntanas pearsanra oilte le brath thar na héiceachórais thionsclaíocha uile i roinnt mhaith Ballstát, agus tá méadú ag teacht ar líon na bhfolúntas post ardoilte, meánoilte agus ísealoilte. Tá ganntanas leanúnach roimh earnálacha amhail earnáil na foirgníochta, na monaraíochta, na teicneolaíochta faisnéise agus cumarsáide (TFC), an iompair, na seirbhísí gairmiúla, an chúraim sláinte agus an chúraim fhadtéarmaigh. Ina theannta sin, tháinig dúbailt ar ghanntanais lucht saothair i bpríomhearnálacha atá ríthábhachtach don aistriú glas idir 2015 agus 2021. Is measa fós an staid sin toisc go mbíonn deacrachtaí ag gnólachtaí teacht ar fhostaithe a bhfuil scileanna digiteacha leordhóthanacha acu, agus go mbíonn deacrachtaí ar leith acu speisialtóirí TFC a earcú.

(4)

Is dúshlán suntasach iad ganntanais scileanna do mhianta an Aontais leanúint de bheith ina cheannaire domhanda iomaíoch agus ina mhol le haghaidh teicneolaíochtaí glan-nialasacha, agus spriocanna uaillmhianacha aeráide agus fuinnimh a bhaint amach. Cuireann siad bac freisin ar chumas an Aontais leas a bhaint as acmhainneacht na n-aistrithe glasa agus digiteacha, a cheannaireacht theicneolaíoch a neartú, fás agus nuálaíocht a spreagadh, agus freagairt go héifeachtach d’éigeandálaí amhail paindéim COVID-19 nó coinbhleachtaí geopholaitiúla. Cuireann bearnaí scileanna in earnálacha sonracha amhail an cúram sláinte agus an cúram fadtéarmach teorainn leis an acmhainneacht chun aire a thabhairt don daonra atá ag dul in aois agus chun rochtain ar chúram sláinte ar ardchaighdeán a áirithiú do chách.

(5)

Chun aghaidh a thabhairt ar na ganntanais scileanna sin, tá gá le hinfheistíocht shuntasach san uas-sciliú agus san athsciliú, chomh maith le bearta chun borradh a chur faoi rannpháirtíocht daoine fásta atá in aois oibre sa mhargadh saothair, chun soghluaisteacht an lucht saothair a éascú, chun dálaí oibre a fheabhsú agus chun daoine aonair a bhfuil na scileanna riachtanacha acu a mhealladh chuig an Aontas.

(6)

Tá tacaíocht leanúnach tugtha ag an Aontas do ghníomhaíochtaí chun aghaidh a thabhairt ar ghanntanais scileanna agus saothair tríd an leas is fearr is féidir a bhaint as acmhainneacht a lucht saothair intíre. Áirítear ar na gníomhaíochtaí sin tionscnaimh chun soghluaisteacht an lucht saothair a fheabhsú laistigh den mhargadh inmheánach, amhail líonraí comhair Eorpacha seirbhísí fostaíochta (EURES). Ina theannta sin, féachann sé le rátaí rannpháirtíochta na mban, daoine faoi mhíchumas agus daoine ar de chúlra imirceach iad sa mhargadh saothair a ardú. Cuirtear béim ar leith freisin ar rannpháirtíocht grúpaí faoi ghannionadaíocht, go háirithe an óige nach bhfuil i mbun oideachais, fostaíochta ná oiliúna. I gClár oibre scileanna don Eoraip 2020 (1), leagtar amach 12 ghníomhaíocht chun cabhrú le daoine aonair agus gnólachtaí scileanna a fhorbairt agus iad a chur á n-úsáid, lena n-áirítear moltaí ón gComhairle maidir le gairmoideachas agus gairmoiliúint (2), cuntais foghlama aonair (3), micridhintiúir (4) agus seoladh an Chomhshocraithe um Scileanna. Tacaíonn an Comhshocrú um Scileanna le comhoibriú idir eagraíochtaí poiblí agus príobháideacha chun gníomhaíocht chomhchoiteann maidir le scileanna a neartú chun freastal ar riachtanais an mhargaidh saothair agus tacaíonn sé le comhpháirtíochtaí mórscála i bpríomhéiceachórais thionsclaíocha.

(7)

Oibríonn an tAontas i dtreo cur chuige cuimsitheach chun ganntanais lucht saothair a líonadh, go háirithe trína chur ar chumas daoine de gach glúin san Aontas a roghanna saoil agus a n-acmhainneacht sa gheilleagar agus sa tsochaí i gcoitinne a bhaint amach. Chuige sin, tá tacar cuimsitheach ionstraimí beartais de chuid an Aontais, go háirithe an Teachtaireacht ón gCoimisiún ‘An t-athrú déimeagrafach san Eoraip: bosca uirlisí le haghaidh gníomhaíochta’, ar fáil do na Ballstáit d’fhonn réiteach níos fearr a dhéanamh idir uaillmhianta teaghlaigh agus obair íoctha, tacú leis na glúnta óga agus iad a chumhachtú chun go mbeidh rath orthu, chomh maith le glúnta níos sine a chumhachtú agus a leas a chothú.

(8)

Mar sin féin, ní le lucht saothair an Aontais amháin atáthar in ann freastal ar an éileamh ar oibrithe oilte. Chun go n-éireoidh le geilleagar an Aontais agus chun go mbeidh sé athléimneach, is gá é a dhéanamh níos tarraingtí do thallann dhomhanda. Ní mór imirce dhleathach bhainistithe cuardaitheoirí poist ó thríú tíortha a bheith mar chuid den réiteach ar ghanntanais saothair atá roimh fhostóirí chun oibrithe a aimsiú ag a bhfuil na scileanna atá de dhíth orthu agus chun borradh a chur faoin bhfás eacnamaíoch.

(9)

Léiríonn sonraí ó shuirbhé an Aontais ar an bhfórsa saothair gur mó an seans go mbeidh náisiúnaigh tríú tír ag a bhfuil oideachas treasach rócháilithe dá bpost agus go mbeidh siad ag obair i ngairmeacha ísealoilte nó meánoilte i comparáid le saoránaigh an Aontais. In 2022, 39,4 % ab ea ráta ró-cháilíochta an Aontais i gcás daoine nach saoránaigh den Aontas iad, 31,8 % i gcás saoránaigh den Aontas ó Bhallstáit eile agus gan ach 21,1 % i gcás náisiúnaigh an Bhallstáit atá i gceist (5). D’fhéadfadh caillteanais eacnamaíocha do na daoine aonair lena mbaineann agus do gheilleagar an Aontais a bheith mar thoradh ar rócháiliú.

(10)

Cé go gcoinníonn na Ballstáit an ceart chun an líon daoine a thagann ó thríú tíortha chun oibriú a chinneadh, tá cur chuige cuimsitheach bunaithe ag an Aontas i leith na himirce dleathaí, ina n-aithnítear an ról ríthábhachtach atá ag imircigh i ngeilleagar agus i sochaí an Aontais, chun nósanna imeachta imirce a chuíchóiriú agus chun coinníollacha iontrála agus cearta náisiúnach tríú tír san Aontas a chomhchuibhiú. Aithnítear sa chomhaontú maidir le himirce agus tearmann (6) gur cuid ríthábhachtach de chóras cuimsitheach bainistithe imirce é bealaí dleathacha i dtreo an Aontais a fhorbairt le haghaidh náisiúnaigh tríú tír oilte. Le Treoir athmhúnlaithe (AE) 2021/1883 ó Pharlaimint na hEorpa agus ón gComhairle (7) (‘an Treoir maidir le Cárta Gorm’ mar a thugtar uirthi) beartaítear tallann ardoilte a mhealladh chuig an margadh saothair. Chun aghaidh a thabhairt ar an éileamh méadaitheach ar ghairmithe oilte in earnáil TFC sna Ballstáit, foráiltear leis an Treoir seo gur cheart a mheas go bhfuil ardscileanna gairmiúla coibhéiseach le cáilíochtaí ardoideachais i ngairmeacha sonracha TFC. Ina theannta sin, leis an bpacáiste scileanna agus tallainne (8), a ghlac an Coimisiún i mí Aibreáin 2022, cuirtear i dtábhacht go dtéann an imirce dhleathach chun tairbhe d’imircigh agus dá dtíortha tionscnaimh agus cinn scríbe araon. Leis an bpacáiste, moladh bearta beartais reachtacha, oibríochtúla atá dírithe ar an todhchaí chun creat imirce dleathaí an Aontais a threisiú, lena n-áirítear tograí chun leasú a dhéanamh ar Threoir 2003/109/CE ón gComhairle (9) agus ar Threoir 2011/98/AE ó Pharlaimint na hEorpa agus ón gComhairle (10) chun na nósanna imeachta maidir le ligean isteach náisiúnach tríú tír ag a bhfuil gach leibhéal scileanna a shimpliú agus chun a gcearta a atreisiú nuair a bheidh cónaí orthu san Aontas.

(11)

Daoine oilte a bhfuil cosaint idirnáisiúnta de dhíth orthu agus atá toilteanach dul i mbun fostaíochta sna Ballstáit, is baicle cuardaitheoirí poist féideartha iad nach mbaintear úsáid leordhóthanach aisti agus a d’fhéadfaí a úsáid chun freagairt do riachtanais na bhfostóirí. I gcomhréir leis an Moladh ón gCoimisiún (AE) 2020/1364 (11) maidir le conairí dlíthiúla cosanta a chur chun cinn san Aontas, mhol an Coimisiún do na Ballstáit conairí comhlántacha saothair a chur ar bun le haghaidh daoine a bhfuil cosaint idirnáisiúnta de dhíth orthu chun a scileanna, a gcáilíochtaí agus a n-inspreagadh a ghiaráil, agus aghaidh á tabhairt an tráth céanna ar na ganntanais scileanna agus saothair san Aontas.

(12)

Chun earcaíocht idirnáisiúnta a éascú agus chun deiseanna a chur ar fáil do náisiúnaigh tríú tír chun bheith ag obair i ngairmeacha lena mbaineann ganntanas agus a aithnítear a bheith ábhartha don Aontas, tá sé beartaithe ag an gCoimisiún ‘Linn Tallann an Aontais’ (12) a bhunú, ardán lena dtugtar le chéile próifílí cuardaitheoirí poist ó thríú tíortha agus lena dtacaítear le meaitseáil na bpróifílí sin le folúntais fostóirí atá bunaithe sna Ballstáit. Beidh sé d’aidhm ag an Linn Tallann an tAontas a dhéanamh níos tarraingtí do chuardaitheoirí poist ó thríú tíortha agus tacú le fostóirí aghaidh a thabhairt ar ghanntanais scileanna agus saothair san Aontas. D’fhéadfadh Linn Tallann an Aontais tacú freisin le hoibríochtú na gconairí saothair comhlántacha.

(13)

Tá Comhpháirtíochtaí Tallainne á bhforbairt ag an gCoimisiún freisin atá ar cheann de phríomhghnéithe ghné sheachtrach an Chomhaontaithe maidir le himirce agus tearmann agus a chuirtear i ngníomh i gcomhréir leis an teachtaireacht ón gCoimisiún maidir le scileanna agus tallann a mhealladh chuig an Aontas (13).

(14)

I gcomhthéacs iomaíocht dhomhanda mhéadaitheach le haghaidh scileanna agus tallainne, níl ach ceann amháin de Bhallstáit an Aontais ar áireamh sna cúig thír is tarraingtí de chuid ECFE d’oibrithe ardoilte in 2023 (14). Bíonn an cumas chun tallann a mhealladh agus a choinneáil ag brath ar athróga éagsúla lena n-áirítear beartais maidir le lánpháirtiú agus cuimsiú, bearta tacaíochta d’imircigh a bhfuil riachtanais speisialta acu, bealaí dlíthiúla chuig buanchónaí agus chuig saoránacht lena n-áirítear bealaí den sórt sin do mhic léinn, ionchais ioncaim agus cúrsaí cánach, an bhraistint ar ionchais amach anseo, cáilíocht saoil agus an t-aitheantas a thugtar do scileanna agus do cháilíochtaí.

(15)

Is ar fud raon gníomhaíochtaí an Aontais maidir le scileanna agus imirce a thugtar aghaidh ar an tsaincheist maidir le hoibrithe oilte a mhealladh agus ar an ról maidir le scileanna agus cáilíochtaí a aithint. Sa teachtaireacht ón gCoimisiún a ghabhann leis an gclár oibre Scileanna don Eoraip (15), leagtar béim ar an ngá atá le níos mó a dhéanamh chun feabhas a chur ar chonairí dlíthiúla isteach san Aontas agus ar aitheantas a thabhairt do scileanna náisiúnach tríú tír i margadh saothair an Aontais. I bplean gníomhaíochta an Choimisiúin maidir le lánpháirtiú agus cuimsiú 2021–2027 (16) aithnítear a thábhachtaí atá sé aithint agus inchomparáideacht cáilíochtaí náisiúnach tríú tír a éascú chun tacú le náisiúnaigh tríú tír leas iomlán a bhaint as a gcuid scileanna. I bplean tionsclaíoch an chomhaontaithe ghlais (17), fógraíodh gníomhaíochtaí lena n-áirítear obair ar aitheantas a thabhairt do cháilíochtaí náisiúnach tríú tír, agus cuireadh in iúl den chéad uair an luach a bhaineann le cur chuige ‘tús áite do scileanna’ chun scileanna iarbhír na saoránach agus na náisiúnach tríú tír a shainaithint. Aithníodh sa phacáiste faoisimh do FBManna (18) go bhfuil ganntanas scileanna i measc na ndúshlán is mó atá os comhair FBManna agus meabhraíodh an gealltanas tionscnamh a chur i láthair chun feabhas a chur ar an aitheantas a thugtar do scileanna agus do cháilíochtaí náisiúnach tríú tír chun cabhrú le haghaidh a thabhairt ar bhearnaí scileanna i margadh saothair an Aontais. Ar an gcaoi chéanna, sa Teachtaireacht ón gCoimisiún dar teideal ‘Iomaíochas fadtéarmach an Aontais: níos faide ar aghaidh ná 2030’, cuireadh i dtábhacht gur gá soghluaisteacht a éascú chun aghaidh a thabhairt ar ghanntanais scileanna san Aontas trína dhéanamh níos éasca scileanna agus cáilíochtaí shaoránaigh Ballstáit eile agus cáilíochtaí náisiúnach tríú tír a aithint.

(16)

An 14 Meán Fómhair 2022, d’fhógair an tUachtarán von der Leyen Bliain Eorpach na Scileanna (2023) ina haitheasc ar staid an Aontais Eorpaigh inar cuireadh i dtábhacht nach mór mealladh na ndaoine, ag a bhfuil na scileanna cearta, chuig an Aontas a bheith mar chuid den réiteach ar dhúshláin scileanna. Le Cinneadh (AE) 2023/936 ó Pharlaimint na hEorpa agus ón gComhairle (19), bunaíodh ceithre chuspóir do Bhliain Eorpach na Scileanna, lena n-áirítear an cuspóir ‘daoine ó thríú tíortha a bhfuil na scileanna is gá sna Ballstáit acu a mhealladh’. Is éard atá i gceist leis an gcuspóir sin deiseanna foghlama a chur chun cinn (lena n-áirítear oideachas agus oiliúint teanga nuair is gá), forbairt scileanna agus soghluaisteacht a chothú, agus aithint cáilíochtaí a éascú.

(17)

I gcomhthéacs tallann a mhealladh agus ó thaobh na hearcaíochta i gcoitinne bíonn ról lárnach á imirt ag aithint scileanna agus cáilíochtaí. Feidhmíonn cáilíochtaí agus torthaí foghlama a bhaineann le cáilíochtaí mar chomharthaí gnóthachtála san fhoghlaim. Is minic a úsáidtear cáilíochtaí agus leibhéil cáilíochtaí chun riachtanais iontrála a shocrú do phoist agus d’fhéadfaidís a bheith nasctha le dul chun cinn gairme agus luach saothair. Is minic a éilítear cáilíochtaí chun comhlíonadh na gcaighdeán agus na gceanglas chun oibriú i róil áirithe a léiriú, mar shampla i ngairmeacha rialáilte.

(18)

I gcur chuige ‘tús áite do scileanna’ moltar scileanna duine a shainaithint agus úsáid iomlán a bhaint astu – cibé acu an i suíomhanna foirmiúla, seachfhoirmiúla nó neamhfhoirmiúla a shealbhaítear iad – seachas measúnuithe a bhunú ar cháilíochtaí amháin. Is féidir bearta chun tallann a mhealladh agus chun rannpháirtíocht sa mhargadh saothair a mhéadú a uasmhéadú agus ba cheart cur chuige ‘tús áite do scileanna’ a bheith mar bhonn taca leo, ar cur chuige lena gcuirtear luach ar scileanna agus lena bhféachtar le daoine a mheaitseáil le poist a oireann dá mbuanna agus dá n-acmhainneacht.

(19)

Is ar bhealaí éagsúla ar an leibhéal náisiúnta a eagraítear agus a bhainistítear aithint na scileanna agus na gcáilíochtaí de chuid náisiúnach tríú tír, ag brath ar cheanglais dhlíthiúla agus ar eagrú fostaíochta, oideachais, oiliúna agus imirce i mBallstáit éagsúla. Déanann na Ballstáit cinntí aitheantais atá ceangailteach ó thaobh dlí i gcásanna ina ndeonaíonn siad cearta do náisiúnaigh tríú tír a bhfuil cáilíochtaí sonracha acu. Leis na cinntí sin, cuirtear bealach ar fáil chun a fhíorú go bhfuil na scileanna agus na cáilíochtaí is gá ag duine sula ndeonaítear cearta dóibh i dtrí chás ar leith, is é sin rochtain a fháil ar ghairm rialáilte, rochtain a fháil ar fhoghlaim, nó i gcomhthéacs imirce lucht saothair.

(20)

Tarlaíonn an chéad chás de rochtain ar ghairm rialáilte nuair a d’fhéadfadh sé go mbeadh ar náisiúnach tríú tír aitheantas a fháil dá scileanna agus dá gcáilíochtaí d’fhonn gairm rialáilte a rochtain nó a shaothrú. Tagann na céadta gairmeacha faoin gcatagóir sin, mar shampla san altranas, sa leigheas, sa chógaisíocht, san ailtireacht agus – i roinnt Ballstát – bríceadóirí, pluiméirí, leictreoirí agus innealtóirí sibhialta. Tá ‘aithint cáilíochtaí gairmiúla’ riachtanach chun rochtain a fháil ar na gairmeacha sin sna Ballstáit ina ndéantar iad a rialáil.

(21)

Chun an tsaoirse chun seirbhísí a bhunú agus a sholáthar agus saorghluaiseacht daoine a áirithiú go héifeachtach, agus a áirithiú an tráth céanna go gcomhlíontar caighdeáin agus ceanglais ghairmiúla, bhunaigh an tAontas prionsabail, nósanna imeachta agus critéir chomhchoiteanna maidir le haitheantas chun trédhearcacht, cothroime agus comhsheasmhacht a chur chun cinn maidir le haitheantas a thabhairt do cháilíochtaí gairmiúla trí Threoir 2005/36/CE ó Pharlaimint na hEorpa agus ón gComhairle (20).

(22)

Is náisiúnaigh de chuid na mBallstát a fheidhmíonn cearta saorghluaiseachta faoi dhlí an Aontais tairbhithe Threoir 2005/36/CE. Chun an Treoir a chomhlánú, is éard is príomhthairbhithe an Mholta seo náisiúnaigh tríú tír atá i mbun víosa nó cead oibre agus cónaithe a fháil i mBallstát nó a bhfuil cónaí orthu go dlíthiúil san Aontas cheana féin, gan beann ar cháilíochtaí a eisíodh san Aontas nó i dtríú tíortha a bheith acu. D’fhéadfadh roinnt moltaí a bheith ábhartha freisin maidir le haitheantas a thabhairt do cháilíochtaí náisiúnach de chuid an Aontais a bhfuil cáilíochtaí acu a eisíodh i dtríú tíortha, chun a áirithiú go n-urramófar prionsabal na córa comhionainne.

(23)

Luaitear in Aithris 10 de Threoir 2005/36/CE nach gcuireann an Treoir bac ar an bhféidearthacht go dtabharfadh na Ballstáit aitheantas, i gcomhréir lena rialacha, do cháilíochtaí gairmiúla náisiúnach tríú tír a fuarthas lasmuigh den Aontas, ach gur cheart d’aitheantas den sórt sin na coinníollacha íosta oiliúna do ghairmeacha áirithe a urramú. Tá feidhm ag roinnt rialacha maidir le haitheantas a thabhairt do cháilíochtaí maidir le náisiúnaigh tríú tír, i gcás ina mbaineann siad tairbhe as cóir chomhionann le náisiúnaigh an Bhallstáit óstaigh faoi reachtaíocht an Aontais maidir le tearmann agus imirce dhleathach, agus as saorghluaiseacht (e.g. cónaitheoirí fadtéarmacha, baill teaghlaigh tríú tír de shaoránaigh an Aontais, tairbhithe stádais dídeanaí nó cosanta coimhdí, taighdeoirí, oibrithe ardoilte a bhfuil Cárta Gorm AE acu, náisiúnaigh tríú tír a thagann faoi raon feidhme Threoir 2011/98/AE agus oibrithe séasúracha).

(24)

Tá feidhm ag Treoir 2005/36/CE freisin maidir le náisiúnaigh tríú tíortha sonracha trí ionstraimí agus comhaontuithe éagsúla. Mar shampla, tá feidhm ag Treoir 2005/36/CE freisin maidir le náisiúnaigh thíortha LEE (faoin gComhaontú maidir leis an Limistéar Eorpach Eacnamaíoch) agus maidir le náisiúnaigh na hEilvéise (faoin gComhaontú idir an tAontas agus an Eilvéis maidir le saorghluaiseacht daoine). Leis an gComhaontú um Tharraingt Siar agus leis an gComhaontú Trádála agus Comhair a tugadh i gcrích idir an tAontas Eorpach agus an Ríocht Aontaithe, soiléirítear socruithe maidir le Treoir/2005/36/CE a chur i bhfeidhm maidir le cáilíochtaí a fuarthas sa Ríocht Aontaithe roimh dheireadh na hidirthréimhse an 31 Nollaig 2020.

(25)

Áirítear i gcomhaontuithe saorthrádála an Aontais (CSTanna) forálacha chun tacú le comhaontuithe maidir le haitheantas frithpháirteach (CAFP) a fhorbairt le haghaidh cáilíochtaí gairmiúla le tríú tíortha. Leis an CAFP le haghaidh ailtirí a tugadh i gcrích i bprionsabal in 2022 idir an tAontas agus Ceanada, cumasaítear dul i mbun cleachtadh mar ailtire sa dá chríoch i gcomhréir le critéir chomhaontaithe. Ar áireamh freisin i gcomhaontuithe trádála an Aontais tá gealltanais chun láithreacht shealadach gairmithe oilte san Aontas a éascú, rud a d’fhéadfadh nósanna imeachta a chomhlánú chun aitheantas a thabhairt do cháilíochtaí tríú tír ar bhealach níos fearr.

(26)

‘Aitheantas acadúil’ is ea an dara cás ina bhféadfadh sé go mbeadh ar náisiúnaigh tríú tír aitheantas a fháil dá scileanna agus dá gcáilíochtaí, rud a chiallaíonn aitheantas a thabhairt d’fhonn rochtain a fháil ar chineálacha foghlama breise amhail staidéar acadúil agus gairmoiliúint; nó chun teideal acadúil a úsáid. Díríonn aitheantas acadúil ar bhailíocht, leibhéal agus torthaí foghlama cáilíochta oideachais iasachta nó réamhfhoghlama d’fhonn rochtain a fháil ar staidéir bhreise. Cuireann líonraí Líonra Eorpach na Lárionad Náisiúnta Faisnéise agus na Lárionad Náisiúnta Faisnéise um Aitheantas Acadúil (líonraí ENIC-NARIC) faisnéis, comhairle agus cinntí aitheantais ar fáil chun iontráil chuig staidéir bhreise a éascú (san ardoideachas de ghnáth) agus d’fhéadfadh ról a bheith acu maidir le cinntí aitheantais a dhéanamh, achomhairc a láimhseáil nó comhairle a thabhairt maidir le haitheantas a thabhairt do cháilíochtaí nó inchomparáideacht cáilíochtaí, lena n-áirítear le haghaidh rochtain ar fhostaíocht i dtíortha áirithe.

(27)

(28)

(29)

(30)

Tionscnaimh sheanbhunaithe amhail an creat Europass (21) agus uirlisí trédhearcachta amhail an Creat Eorpach um Cháilíochtaí (EQF) (22), Scileanna, Inniúlachtaí, Cáilíochtaí agus Gairmeacha Eorpacha (ESCO), Dintiúir Eorpacha Dhigiteacha don Fhoghlaim agus uirlisí trédhearcachta Phróiseas Bologna, is féidir iad a úsáid chun tacú le trédhearcacht agus inchomparáideacht scileanna agus cáilíochtaí ar fud an Aontais chun foghlaim agus forbairt gairme a éascú.

(31)

(32)

(33)

(34)

(35)

(36)

(37)

Le Moladh (AE) 2022/554 ón gCoimisiún (23), leagadh amach moltaí agus treoraíocht chun tacú leis na Ballstáit aitheantas do cháilíochtaí gairmiúla daoine atá ar a dteitheadh ó chogadh foghach na Rúise i gcoinne na hÚcráine a éascú. Le measúnú ón gCoimisiún (24), a foilsíodh i mí an Mheithimh 2023, maidir le glacadh na mBallstát leis an Moladh sin agus a bhfreagairtí air, sainaithníodh réimse cleachtas a bhfuil gealladh fúthu.

(38)

Déantar comhpháirtíochtaí le tríú tíortha chun tallann a mhealladh a fhorbairt ar bhealach a rachaidh chun tairbhe an dá thaobh agus a thacóidh le riachtanais mhargadh saothair an dá pháirtí a chomhlíonadh. Níor cheart teitheadh daonna, teitheadh caipitil ná ‘imirce daoine oilte’ a tharlú mar gheall ar iarrachtaí tallann a mhealladh, rud a d’fhéadfadh teorainn a chur le hacmhainneacht shocheacnamaíoch agus forbairt tríú tíortha agus a gcumas seirbhísí riachtanacha a bhainistiú.