(1)

Le Rialachán (CE) Uimh. 1831/2003 foráiltear maidir le breiseáin lena n-úsáid i gcothú ainmhithe a údarú agus maidir leis an bhforas agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh iarratas isteach maidir le L-isileoicín arna tháirgeadh ag Corynebacterium glutamicum KCCM 20516 a údarú. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le L-isileoicín arna tháirgeadh ag Corynebacterium glutamicum KCCM 20516 a údarú mar bhreiseán beathaithe lena úsáid i mbeatha agus in uisce óil le haghaidh gach speicis ainmhíoch, iarratas ina n-iarrtar an breiseán a aicmiú sa chatagóir breiseán ‘breiseáin chothaitheacha’ agus san fheidhmghrúpa ‘aimíonaigéid, a salainn agus analóga’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 10 Samhain 2021 (2) agus an 21 Márta 2023 (3) go bhfuil L-isileoicín arna tháirgeadh ag Corynebacterium glutamicum KCCM 80185 sábháilte do na spriocspeicis, do na tomhaltóirí agus don chomhshaol, faoi na coinníollacha úsáide atá beartaithe. Tháinig sé ar an gconclúid freisin go bhfuil an breiseán guaiseach trí ionanálú do na daoine a láimhseálann an breiseán. Thairis sin, tháinig an tÚdarás ar an gconclúid gur foinse éifeachtúil den aimíonaigéad riachtanach isileoicín é an breiseán le haghaidh ainmhithe neamh-athchogantacha, agus gur cheart an L-isileoicín forlíontach a chosaint ar dhíghrádú sa chogansach ionas go mbeidh sé lán-éifeachtúil i gcás na n-athchogantach Chuir an tÚdarás in iúl go raibh imní air maidir leis an aimíonaigéad a thabhairt go comhuaineach trí uisce óil agus beatha. Mar sin féin, níor mhol an tÚdarás uaschion i gcás L-isileoicín. Dá bhrí sin, i gcás forlíonadh le L-isileoicín trí uisce óil, is iomchuí an t-úsáideoir a chur ar an eolas an soláthar cothaithe a chur san áireamh leis na haimíonaigéid riachtanacha uile atá riachtanach agus atá riachtanach go coinníollach. Níor mheas an tÚdarás go bhfuil gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar an modh anailíse a úsáidtear chun anailís a dhéanamh ar an mbreiseán beathaithe in ábhar beatha, tuarascáil arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann L-isileoicín arna tháirgeadh ag Corynebacterium glutamicum KCCM 80185 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid an bhreiseáin sin a údarú. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,