(1)

Leis na scórtha de bhlianta anuas, tá ról ríthábhachtach ag an aeriompar i ngeilleagar an Aontais agus i saol laethúil shaoránaigh an Aontais, mar cheann de na hearnálacha is fearr feidhmíochta agus is dinimiciúla i ngeilleagar an Aontais. Ba spreagadh mór é don fhás eacnamaíoch, do phoist, don trádáil agus don turasóireacht, chomh maith leis an nascacht agus an tsoghluaisteacht do ghnólachtaí agus do shaoránaigh araon, agus tá sé ar cheann de na príomhcheangaltóirí idir na réigiúin is forimeallaí agus an mhórthír, go háirithe laistigh de mhargadh aeriompair an Aontais. Chuir an méadú ar sheirbhísí aeriompair go mór leis an nascacht a fheabhsú, comhtháthú a chothú agus éagothromaíochtaí réigiúnacha a laghdú laistigh den Aontas, go háirithe do na réigiúin forimeallacha, na réigiún is forimeallaí, na réigiún inar tearc an daonra agus na réigiúin oileánda, chomh maith le tríú tíortha, agus bhí sé ina chumasóir suntasach do gheilleagar an Aontais.

(2)

Ó 2020 ar aghaidh, tá an t-aeriompar ar cheann de na hearnálacha is mó atá thíos le géarchéim COVID-19. Meastar go dtiocfaidh fás de réir a chéile faoin aerthrácht sna blianta atá le teacht agus go bhfillfidh sé ar an leibhéal a bhí ann roimh an ngéarchéim. Measann an Eagraíocht Eitlíochta Sibhialta Idirnáisiúnta (ICAO) go dtiocfaidh fás suas le 3,1 %, in aghaidh na bliana ar thrácht paisinéirí san Eoraip go dtí 2050, agus suas le 2,4 % in aghaidh na bliana ar an trácht lasta, de réir na réamhaisnéise a rinne sé tar éis COVID-19 maidir le cás ina mbeidh leibhéal ard tráchta. An tráth céanna, tá astaíochtaí ón aeriompar ag méadú ó 1990 i leith agus d’fhéadfadh an treocht maidir le hastaíochtaí a bheith ag méadú teacht ar ais agus an lámh in uachtar á fáil againn ar an bpaindéim. Dá bhrí sin, tá sé ríthábhachtach ullmhú don todhchaí agus na leasuithe is gá a dhéanamh ionas go n-áiritheofar go mbeidh earnáil aeriompair dea-fheidhmiúil ann lena gcuideofar go hiomlán le spriocanna aeráide an Aontais a bhaint amach, margadh lena ngabhfaidh ardleibhéil nascachta, inacmhainneachta, sábháilteachta agus slándála. Tá oibleagáidí dlíthiúla bunaithe ag an Aontas faoi Rialachán (AE) 2021/1119 ó Pharlaimint na hEorpa agus ón gComhairle (3) chun an aeráidneodracht a bhaint amach faoi 2050 ar a dhéanaí agus chun laghdú 55 % ar a laghad ar ghlanastaíochtaí gás ceaptha teasa a bhaint amach i gcomparáid le 1990 faoi 2030. Chun é sin a bhaint amach, ní mór do gach earnáil eacnamaíoch, lena n-áirítear earnáil an iompair, céimeanna gasta a thabhairt chun dícharbónú a dhéanamh. I gcás earnáil an aeriompair, is gá, mar gheall air sin, borradh a chur faoi tháirgeadh, sholáthar agus ghlacadh breoslaí eitlíochta inbhuanaithe.

(3)

Is gnéithe sainiúla d’fheidhmiú earnáil aeriompair an Aontais iad an ghné thrasteorann di ar fud an Aontais agus an ghné dhomhanda di. Tá an margadh eitlíochta ar cheann de na hearnálacha is comhtháite sa mhargadh inmheánach, agus rialaítear é le rialacha aonfhoirmeacha maidir le rochtain ar an margadh agus dálaí oibríochtúla. Rialaítear beartas seachtrach aeriompair an Aontais le rialacha a bhunaítear ar an leibhéal domhanda in ICAO, agus i gcomhaontuithe cuimsitheacha iltaobhacha nó déthaobhacha idir an tAontas nó a Bhallstáit agus tríú tíortha. Tá sé tábhachtach, dá bhrí sin, go leanfaidh an tAontas de na hiarrachtaí a rinneadh ar an leibhéal idirnáisiúnta, iltaobhach agus déthaobhach chun leibhéal ard uaillmhéine agus cóineasaithe a chur chun cinn maidir le glacadh breoslaí eitlíochta inbhuanaithe, agus cothrom na Féinne idirnáisiúnta á soláthar ag an am céanna.

(4)

Tá an margadh aeriompair faoi réir iomaíocht ghéar idir gníomhaithe eacnamaíocha ar fud an domhain agus ar fud an Aontais, agus tá cothrom na Féinne ríthábhachtach dó. Tá cobhsaíocht agus rathúnas an mhargaidh aeriompair agus a ghníomhaithe eacnamaíocha ag brath ar chreat beartais soiléir agus comhchuibhithe inar féidir le hoibreoirí aerárthaí, le haerfoirt agus le gníomhaithe eitlíochta eile oibriú ar bhonn rialacha agus deiseanna cothroma, as a n-eascróidh earnáil bhríomhar agus deiseanna fostaíochta. Den chuid is mó, is cuid de chúrsaí taistil domhanda iad eitiltí laistigh den Aontas arna mbunú i margadh domhanda aeriompair. Is amhlaidh atá freisin do chúrsaí taistil ó áiteanna nach bhfuil san Aontas go dtí cinn scríbe nach bhfuil san Aontas trí aerfoirt na hEorpa. Nuair a bhíonn saobhadh margaidh ann, bíonn an baol ann go gcuirfí oibreoirí aerárthaí nó aerfoirt faoi mhíbhuntáiste i gcomparáid le hiomaitheoirí inmheánacha agus seachtracha. Dá bharr sin, d’fhéadfadh sé go gcaillfí iomaíochas an tionscail aeriompair, lena gcuirfí gnólachtaí aeriompair agus poist i mbaol, agus go gcaillfí nascacht aeir agus roghanna iompair do shaoránaigh agus do ghnólachtaí.

(5)

Go háirithe, tá sé riachtanach cothrom na Féinne a áirithiú ar fud mhargadh aeriompair an Aontais maidir le breosla eitlíochta, ar sciar suntasach de chostais oibreoirí aerárthaí é, agus dícharbónú an aeriompair á chothú trí bhreoslaí eitlíochta inbhuanaithe a chur chun cinn. Is féidir le héagsúlacht i bpraghsanna breosla eitlíochta difear a dhéanamh d’fheidhmiú eacnamaíoch oibreoirí aerárthaí agus tionchar diúltach a imirt ar iomaíocht sa mhargadh. I gcás ina mbeadh táillí níos airde ann do thomhaltóirí deiridh i ngeall ar phraghsanna breoslaí eitlíochta a bheith níos airde, laghdófaí nascacht na réigiún, soghluaisteacht na saoránach agus iomaíochas na hearnála aeriompair. Nuair a bhíonn difríochtaí i bpraghsanna breosla eitlíochta ann idir aerfoirt de chuid an Aontais nó idir aerfoirt de chuid an Aontais agus aerfoirt nach de chuid an Aontais iad, d’fhéadfadh oibreoirí aerárthaí a straitéisí athbhreoslaithe a oiriúnú ar chúiseanna eacnamaíocha dá bharr. Tagann méadú ar ídiú breosla aerárthaí agus astaíochtaí gás ceaptha teasa neamhriachtanacha de bharr fhorlíonadh na n-umar breosla. Dá réir sin, baineann forlíonadh na n-umar breosla arna dhéanamh ag oibreoirí aerárthaí an bonn de iarrachtaí an Aontais atá dírithe ar chosaint an chomhshaoil. Is féidir le roinnt oibreoirí aerárthaí praghsanna fabhracha breosla eitlíochta ag a mbunáiteanna a úsáid mar bhuntáiste iomaíoch in aghaidh oibreoirí aerárthaí eile a oibríonn bealaí cosúla. D’fhéadfadh éifeachtaí díobhálacha a bheith aige sin ar iomaíochas na hearnála aeriompair, rud a d’fhéadfadh saobhadh sa mhargadh a bheith mar thoradh air agus dochar a dhéanamh do nascacht aeir. Ba cheart bearta le cosc a chur ar chleachtais den sórt sin a bhunú leis an Rialachán seo chun damáiste neamhriachtanach don chomhshaol a sheachaint chomh maith leis na dálaí cóiriomaíochta i margadh aeriompair an Aontais a athbhunú agus a chaomhnú.

(6)

Tá forbairt inbhuanaithe ar cheann de phríomhchuspóirí an chomhbheartais iompair. Éilítear leis sin cur chuige comhtháite lena ndírítear ar fheidhmiú éifeachtach chórais iompair an Aontais a áirithiú, agus caighdeáin shóisialta agus cuspóirí comhshaoil á gcur san áireamh. Is gá, i gcás forbairt inbhuanaithe aeriompair, bearta a thabhairt isteach, lena n-áirítear ionstraimí eacnamaíocha, lena ndírítear ar astaíochtaí gás ceaptha teasa ó aerárthaí a imíonn ó aerfoirt de chuid an Aontais a laghdú agus ar mhargadh a fhorbairt chun breoslaí eitlíochta inbhuanaithe a tháirgeadh agus a sholáthar. Ba cheart bearta den sórt sin rannchuidiú le cuspóirí aeráide an Aontais a chomhlíonadh faoi 2030 agus 2050.

(7)

Sa teachtaireacht ón gCoimisiún an 9 Nollaig 2020 dar teideal ‘Sustainable and Smart Mobility Strategy – putting European transport on track for the future’ [Straitéis um an tSoghluaisteacht Inbhuanaithe agus Chliste – iompar Eorpach a chur ar an mbóthar ceart don todhchaí], socraítear cur chuige do chóras iompair an Aontais chun a chlaochlú glas agus digiteach a bhaint amach agus le go mbeidh sé níos buanseasmhaí. Is próiseas riachtanach agus dúshlánach é dícharbónú na hearnála aeriompair, go háirithe sa ghearrthéarma. Chuir an dul chun cinn teicneolaíoch, agus tiomantas soiléir ón tionscal eitlíochta, a saothraíodh i gcláir Eorpacha agus náisiúnta um thaighde agus nuálaíocht le laghduithe tábhachtacha ar astaíochtaí leis na scórtha de bhlianta anuas. Sáraíonn an fás domhanda aerthráchta na laghduithe ar astaíochtaí san earnáil, áfach. Cé go bhfuil coinne go gcabhróidh teicneolaíochtaí nua, lena n-áirítear aerárthaí astaíochtaí nialasacha atá faoi thiomáint leictreachais nó hidrigine a fhorbairt, le spleáchas na heitlíochta gearraistir ar fhuinneamh iontaise a laghdú sna blianta amach romhainn agus gur féidir ról tábhachtach a bheith acu san eitlíocht tráchtála sa mheántéarma agus san fhadtéarma, is réiteach iad breoslaí eitlíochta inbhuanaithe a bhfuil gealladh fúthu chun dícharbónú suntasach i ngach saghas eitilte a bhaint amach sa ghearrthéarma, agus sa mheántéarma agus san fhadtéarma. Faoi láthair, áfach, ní bhaintear leas as an acmhainneacht sin den chuid is mó agus is gá tacú léi.

(8)

Cuireadh bunphrionsabal na héifeachtúlachta fuinnimh chun feidhme in earnáil an aeriompair. Trí innill atá níos tíosaí ar fhuinneamh a úsáid, agus trí bhreoslaí eitlíochta inbhuanaithe a úsáid ar bhealach atá níos tíosaí ar acmhainní, cuidítear le lorg comhshaoil eitiltí a laghdú.

(9)

Is é atá i mbreoslaí eitlíochta inbhuanaithe breoslaí eitlíochta ina bhfuil breoslaí intiteáin leachtacha, atá go hiomlán idirmhalartach le gnáthbhreoslaí eitlíochta agus comhoiriúnach do na hinnill aerárthaigh atá ann cheana. Deimhníodh, ar an leibhéal domhanda, roinnt conairí chun breoslaí eitlíochta inbhuanaithe a tháirgeadh le húsáid in eitlíocht shibhialta agus mhíleata. Tá breoslaí eitlíochta inbhuanaithe ullamh go teicneolaíoch cheana, san fhíor-ghearrthéarma, chun ról tábhachtach a ghlacadh in astaíochtaí aeriompair a laghdú. Tá coinne go ndéanfar suas cuid mhór den mheascán breoslaí eitlíochta leo sa mheántéarma agus san fhadtéarma. Thairis sin, le tacaíocht ó chaighdeáin bhreosla idirnáisiúnta iomchuí, agus le tacaíocht chun na caighdeáin sin a cheapadh, d’fhéadfadh breoslaí eitlíochta inbhuanaithe rannchuidiú le cion aramatach an bhreosla eitlíochta deiridh atá in úsáid ag oibreoir aerárthaí a laghdú, agus ar an gcaoi sin cuidiú le hastaíochtaí neamh-CO2 eile a laghdú. Teicneolaíochtaí a bhfuil gealladh fúthu is ea breoslaí eitlíochta eile, mar shampla leictreachas nó hidrigin, agus táthar ag súil go rannchuideoidh siad de réir a chéile le dícharbónú an aeriompair, agus eitiltí gearraistir mar thúsphointe. D’fhéadfadh an Rialachán seo dlús breise a chur le forbairt eolaíoch agus úsáid na dteicneolaíochtaí sin, agus borradh a chur faoin nuálaíocht tráchtála ina leith, trí ligean d’oibreoirí eacnamaíocha na teicneolaíochtaí nuair a bheidh siad seanbhunaithe agus ar fáil ar bhonn tráchtála. Méadóidh sé cinnteacht agus intuarthacht an mhargaidh agus beidh sé ina dhreasacht d’infheistíochtaí sna teicneolaíochtaí nua sin a bhfuil gá leo.

(10)

Beidh costais bhreosla bhreise ar na haerlínte mar thoradh ar bhreoslaí eitlíochta inbhuanaithe a thabhairt isteach i margadh aeriompair an Aontais de réir a chéile, mar tá sé níos costasaí faoi láthair teicneolaíochtaí breosla den sórt sin a tháirgeadh ná gnáthbhreoslaí eitlíochta. Meastar go gcuirfidh sé sin leis na saincheisteanna atá ann cheana i ndáil le cothrom na Féinne i margadh aeriompair an Aontais a mhéid a bhaineann le breoslaí eitlíochta agus go mbeidh tuilleadh saofa i measc oibreoirí aerárthaí agus aerfort dá bharr sin, agus i gcomhthéacs Scéim Fritháirithe agus Laghdaithe Carbóin ICAO don Eitlíocht Idirnáisiúnta (CORSIA) a bheith á chur chun feidhme ag an Aontas agus a Bhallstáit i gcomhréir le Cinneadh (AE) 2020/954 ón gComhairle (4) agus le Córas Trádála Astaíochtaí an Aontais (CTA AE), arna bhunú le Treoir 2003/87/CE ó Pharlaimint na hEorpa agus ón gComhairle (5), arna leasú le Treoir (AE) 2023/958 ó Pharlaimint na hEorpa agus ón gComhairle (6). Tá teorainn leis an bhfáil ar bhunábhar agus leis an acmhainn táirgthe breosla eitlíochta inbhuanaithe. D’fhéadfadh ganntanas soláthair agus saobhadh margaidh a bheith mar thoradh ar iomaíocht threisithe le haghaidh bunábhar teoranta, rud a d’fhéadfadh tionchar diúltach a imirt ar iomaíochas na hearnála eitlíochta ina hiomláine. Leis an Rialachán seo, ba cheart bearta a dhéanamh ionas nach mbeidh tionchar diúltach ar iomaíochas na hearnála eitlíochta de bharr breoslaí eitlíochta inbhuanaithe a thabhairt isteach trí cheanglais chomhchuibhithe ar fud an Aontais a shainiú.

(11)

Ar an leibhéal domhanda, is é ICAO a rialaíonn agus a shainíonn breoslaí eitlíochta inbhuanaithe, agus is in ICAO a chomhaontaíonn tíortha ceanglais mhionsonraithe maidir le hinbhuanaitheacht, inrianaitheacht agus cuntasaíocht chonairí deimhnithe na mbreoslaí eitlíochta inbhuanaithe a bhíonn le húsáid ar eitiltí arna gcumhdach ag CORSIA. Cé go socraítear dreasachtaí in CORSIA agus go meastar gur cuid thábhachtach iad breoslaí eitlíochta inbhuanaithe don obair ar a indéanta atá cuspóir uaillmhianach fadtéarmach maidir le hastaíochtaí glan-nialasacha carbóin a bhaint amach faoi 2050, a glacadh ag an 41ú Tionól de chuid ICAO i mí Dheireadh Fómhair 2022, níl aon scéim shainordaitheach ann faoi láthair maidir le húsáid breoslaí eitlíochta inbhuanaithe le haghaidh eitiltí idirnáisiúnta. De ghnáth, cuimsítear forálacha maidir le cosaint an chomhshaoil i gcomhaontuithe aeriompair cuimsitheacha iltaobhacha nó déthaobhacha idir an tAontas nó a Bhallstáit agus tríú tíortha. Faoi láthair, áfach, ní fhorchuireann forálacha den sórt sin ceanglas ceangailteach ar bith ar pháirtithe conarthacha maidir le húsáid breoslaí eitlíochta inbhuanaithe.

(12)

Chun saobhadh iomaíochta a chosc sa mhargadh aeriompair domhanda, a d’fhéadfadh a bheith ina chúis le caillteanas sreafaí tráchta a nascann trí aerfoirt de chuid an Aontais agus le sceitheadh carbóin agus chun margadh domhanda breoslaí eitlíochta inbhuanaithe a chruthú, ba cheart don Aontas a bheith ar thús cadhnaíochta ar fud an domhain maidir leis an aistriú i dtreo breoslaí inbhuanaithe a úsáid, dul i mbun caibidlíochta idirnáisiúnta chun sainmhínithe agus caighdeáin breoslaí aeir inbhuanaithe a chomhchuibhiú agus cóineasú idirnáisiúnta a chur chun cinn maidir leis na rialacha a bhaineann le breoslaí eitlíochta inbhuanaithe a tháirgeadh, a ghlacadh agus a ardú. Ba cheart don Choimisiún agus do na Ballstáit iarrachtaí a choinneáil ar bun in ICAO le haghaidh creat domhanda uaillmhianach maidir le breosla eitlíochta inbhuanaithe a tháirgeadh agus a úsáid. Ina theannta sin, ba cheart don Choimisiún a mheas go rialta an bhfuil éifeacht dhíobhálach ag forálacha an Rialacháin seo ar fheidhmiú mhargadh aeriompair an Aontais, ar iomaíochas na hearnála, ar chothrom na Féinne idirnáisiúnta i ndáil le haeriompróirí agus le moil aerfoirt agus ar athródú a d’fhéadfadh a bheith ann agus a mbeadh sceitheadh carbóin mar thoradh air agus, i gcás inarb iomchuí, leigheasanna a thíolacadh chun aghaidh a thabhairt ar na héifeachtaí díobhálacha sin.

(13)

Ar leibhéal an Aontais, leagtar amach rialacha ginearálta maidir le fuinneamh in-athnuaite don earnáil iompair i dTreoir (AE) 2018/2001 ó Pharlaimint na hEorpa agus ón gComhairle (7). San am a chuaigh thart, níor éirigh le creataí rialála cothrománacha trasearnálacha den sórt sin aistriú ó bhreoslaí iontaise go breosla eitlíochta inbhuanaithe a oibriú san earnáil aeriompair. Leagtar amach spriocanna uileghabhálacha ar fud na modhanna iompair uile a sholáthrófar breoslaí in-athnuaite dóibh i dTreoir (AE) 2018/2001 agus a réamhtheachtaí. Ós rud é gur margadh breoslaí measartha beag atá in earnáil an aeriompair agus go bhfuil sé níos costasaí breoslaí in-athnuaite a tháirgeadh di i gcomparáid le modhanna iompair eile, agus ós rud é go n-oibríonn an earnáil i margadh aeriompair an Aontais, margadh atá an-iomaíoch agus comhtháthaithe, ba cheart an creataí rialála a chomhlánú le bearta atá sonrach d’earnáil an aeriompair chun dlús éifeachtach a chur le himscaradh breoslaí eitlíochta inbhuanaithe. Thairis sin, tá an baol ann le trasuí Threoir (AE) 2018/2001 sa dlí náisiúnta go mbeadh scoilt shuntasach i margadh aeriompair an Aontais, ina leagfaí amach spriocanna a bheadh an-éagsúil lena chéile mar gheall ar rialacha náisiúnta maidir le breoslaí eitlíochta inbhuanaithe. Meastar go gcuirfeadh sé sin a thuilleadh leis na saincheisteanna a bhaineann le cothrom na Féinne san earnáil aeriompair.

(14)

Dá bhrí sin, tá gá le rialacha aonfhoirmeacha a leagadh síos do mhargadh aeriompair an Aontais chun Treoir (AE) 2018/2001 a chomhlánú agus chun a cuspóirí foriomlána a bhaint amach trí aghaidh a thabhairt ar na riachtanais agus na ceanglais shonracha a eascraíonn as margadh aeriompair an Aontais agus breoslaí eitlíochta inbhuanaithe a chur chun cinn. Go háirithe, is é is aidhm don Rialachán reatha scoilteadh mhargadh aeriompair an Aontais, saobhadh iomaíochta féideartha idir gníomhaithe eacnamaíocha, nó cleachtais éagóracha seachanta costais i dtaca le hoibreoirí aerárthaí a athbhreoslú a sheachaint agus forbairt breoslaí eitlíochta inbhuanaithe san Aontas á cothú. Le tacaíocht agus maoiniú spriocdhírithe ar leibhéal an Aontais agus ar an leibhéal náisiúnta, chomh maith le comhpháirtíochtaí poiblí agus príobháideacha, féadfar an Rialachán seo a chomhlánú tuilleadh chun infhaighteacht agus inacmhainneacht breoslaí eitlíochta inbhuanaithe a fheabhsú agus dlús breise lena soláthar agus leis an nglacadh leo. Thairis sin, ba cheart an Rialachán seo a bheith gan dochar do na hoibleagáidí a leagtar síos i dTreoir (AE) 2018/2001; féadfaidh Ballstáit úsáid breoslaí ábhartha a chumhdaítear leis an Rialachán seo a éileamh chun na cuspóirí agus na spriocanna a leagtar síos sa Treoir sin a bhaint amach faoi réir na gcoinníollacha agus laistigh de theorainneacha na Treorach sin.

(15)

Tá sé d’aidhm ag an Rialachán seo ar an gcéad dul síos creat a leagan amach chun cothrom na Féinne i margadh aeriompair an Aontais i dtaca le húsáid breoslaí eitlíochta a athbhunú agus a chaomhnú. Le creat den sórt sin, ba cheart cosc a chur ar cheanglais éagsúla ar fud an Aontais a gcuirfeadh le cleachtais athbhreoslaithe a shaobhfadh iomaíocht idir oibreoirí aerárthaí nó a thabharfadh míbhuntáiste iomaíochta do roinnt aerfort de chuid an Aontais seachas a chéile. Ar an dara dul síos, tá sé d’aidhm aige rialacha láidre a thabhairt isteach i margadh aeriompair an Aontais chun a áirithiú go mbeidh sciar a mhéadóidh de réir a chéile ag breoslaí eitlíochta inbhuanaithe in aerfoirt de chuid an Aontais gan dochar a dhéanamh d’iomaíochas mhargadh aeriompair an Aontais.

(16)

Tá sé fíor-riachtanach rialacha comhchuibhithe a shocrú ar fud an mhargaidh inmheánaigh, a mbeidh feidhm acu ar bhealach díreach agus aonfhoirmeach maidir le gníomhaithe an mhargaidh aeriompair ar thaobh amháin agus maidir le gníomhaithe mhargadh na mbreoslaí eitlíochta ar an taobh eile. Ba cheart an creat uileghabhálach a leagtar amach i dTreoir (AE) 2018/2001 a chomhlánú le lex specialis a mbeidh feidhm aige maidir le haeriompar. Ba cheart sciartha íosta a mhéadóidh de réir a chéile maidir le soláthar breoslaí eitlíochta inbhuanaithe a áireamh ann. Ba cheart na sciartha íosta sin a shainiú go cúramach, agus na cuspóirí margadh aeriompair dea-fheidhmiúil san Aontas, an gá atá ann an earnáil aeriompair a dhícharbónú agus stádas reatha thionscal na mbreoslaí eitlíochta inbhuanaithe á gcur san áireamh.

(17)

Ba cheart feidhm a bheith ag an Rialachán reatha maidir le haerárthaí atá in úsáid san eitlíocht shibhialta agus eitiltí aeriompair tráchtála ar bun acu. Níor cheart feidhm a bheith aige maidir le haerárthaí mar aerárthaí míleata agus eitiltí nach n-úsáidtear ach amháin le haghaidh oibríochtaí chun críoch daonnúil, chun críoch aisdúichithe agus fillte, bídís deonach nó éigeantach, lena n-áirítear athligean isteach, agus chun críoch cuardaigh, tarrthála, fóirithinte anachaine nó míochaine, chomh maith le hoibríochtaí custaim, póilíneachta agus múchta tine. Go deimhin, is de chineál eisceachtúil eitiltí a oibrítear sna himthosca sin agus dá réir sin ní féidir iad a phleanáil i gcónaí ar an mbealach céanna le heitiltí aeriompair tráchtála caighdeánacha. I ngeall ar chineál a n-oibríochtaí, d’fhéadfadh sé nach mbeadh siad i gcónaí in ann na hoibleagáid faoin Rialachán seo a chomhlíonadh, mar d’fhéadfadh sé a bheith ina ualach nach bhfuil gá leis. Chun freastal ar chothrom na Féinne ar fud mhargadh eitlíochta an Aontais, ba cheart an sciar is mó is féidir den aerthrácht tráchtála a oibrítear ó aerfoirt atá lonnaithe ar chríoch an Aontais a chumhdach leis an Rialachán seo. Ag an am céanna, agus chun nascacht aeir a chosaint ar mhaithe le saoránaigh, gnólachtaí agus réigiúin an Aontais, tá sé tábhachtach nach gcuirfear ualach míchuí ar oibríochtaí aeriompair ag aerfoirt bheaga. Ba cheart tairseach bhliantúil d’aerthrácht paisinéirí agus de thrácht lasta a shainiú, tairseach ar faoina bun nach gcumhdófaí aerfoirt faoin Rialachán seo; ba cheart, áfach, 95 % ar a laghad den trácht iomlán a imíonn ó aerfoirt atá lonnaithe ar chríoch an Aontais a chumhdach le raon feidhme an Rialacháin seo. Ar na cúiseanna céanna, ba cheart tairseach a shainiú chun oibreoirí aerárthaí atá freagrach as líon an-íseal imeachtaí ó aerfoirt atá lonnaithe ar chríoch an Aontais a eisiamh ón raon feidhme. Mar sin féin, chun leibhéal níos airde uaillmhéine a bhaint amach, ba cheart do na Ballstáit a bheith in ann a chinneadh go bhfuil aerfort atá lonnaithe ar a chríoch, ar aerfort é nach mbaineann na tairseacha a leagtar síos sa Rialachán seo amach nó atá lonnaithe i réigiún forimeallach mar a shainmhínítear in Airteagal 349 den Chonradh ar Fheidhmiú an Aontais Eorpaigh (CFAE), faoi réir an Rialacháin seo. Ba cheart d’aerfort atá lonnaithe ar chríoch Aontais agus nach sroicheann na tairseacha a leagtar síos sa Rialachán seo, nó aerfort atá lonnaithe sna réigiúin is forimeallaí, a bheith in ann a iarraidh ar na húdaráis inniúla faoi seach go gcaithfí leis mar aerfort de chuid an Aontais agus go mbeadh sé faoi réir an Rialacháin seo. Thairis sin, i gcás duine a oibríonn eitiltí aeriompair tráchtála nach sroicheann na tairseacha a leagtar síos sa Rialacháin seo nó i gcás duine a oibríonn eitiltí seachas eitiltí aeriompair tráchtála a úsáideann breoslaí tuirbín eitlíochta, ba cheart don duine sin a bheith in ann a chinneadh go gcaithfí leis mar oibreoir aerárthaí chun críocha an Rialacháin seo agus, dá bhrí sin, a bheith faoi réir an Rialacháin seo, nó go gcumhdófar a eitiltí aeriompair neamhthráchtála leis an Rialachán seo.

(18)

Sainmhíníonn caighdeáin breosla eitlíochta idirnáisiúnta na cineálacha gnáthbhreoslaí eitlíochta is féidir a chumasc nó a mheascadh le breoslaí eitlíochta inbhuanaithe, rud a dhéanann difear d’infheidhmeacht an Rialacháin seo maidir le breoslaí eitlíochta. Thairis sin, tá an sainmhíniú ar bhreoslaí eitlíochta teoranta do bhreoslaí intiteáin agus, dá bhrí sin, ní chuimsíonn hidrigin ná leictreachas a úsáidtear chun aerárthaí a chumhachtú. Dá bhrí sin, tá feidhm ag na hoibleagáidí atá ar sholáthraithe breoslaí eitlíochta agus ar chomhlachtaí bainistithe aerfoirt agus oibreoirí aerárthaí san Aontas maidir le breosla intiteáin i gcás ar bith ina dtagraítear do bhreoslaí eitlíochta, ach amháin i gcás ina bhfuil hidrigin nó leictreachas i gceist.

(19)

Tá sé bunriachtanach nach ndéanfaidh na hoibleagáidí a eascraíonn as an Rialachán seo difear díréireach do réigiúin Eorpacha nach bhfuil chomh nasctha sin, mar shampla na réigiúin oileánda agus na réigiúin is forimeallaí, a bhraitheann ar an eitlíocht go minic mar an t-aon mhodh nasctha amháin, agus go n-áiritheofar go mbeidh rochtain ag na réigiúin sin ar earraí agus seirbhísí riachtanacha. Chun cuidiú le hidirnascacht aeir na réigiún ina bhfuil níos lú roghanna malartacha iompair a choimirciú, ba cheart aird a thabhairt ar na héifeachtaí a d’fhéadfadh a bheith ag forálacha an Rialacháin seo maidir le hinacmhainneacht, iomaíochas agus méaduithe a d’fhéadfadh a bheith ar phraghsanna aerbhealaí a nascann réigiúin iargúlta agus limistéir eile den Aontas.

(20)

Ba cheart forbairt agus imscaradh breoslaí eitlíochta inbhuanaithe a bhfuil ardacmhainneacht inbhuanaitheachta, aibíochta tráchtála, nuálaíochta agus fáis acu a chur chun cinn chun freastal ar riachtanais na todhchaí. Ba cheart é sin a bheith ina thaca le margadh breosla nuálach agus iomaíoch a chruthú le haghaidh breoslaí eitlíochta inbhuanaithe agus ba cheart dó soláthar leordhóthanach breoslaí eitlíochta inbhuanaithe don earnáil aeriompair a áirithiú sa ghearrthéarma agus san fhadtéarma chun rannchuidiú le uaillmhianta dícharbónaithe iompair an Aontais, agus le hiarrachtaí an Aontais maidir le hardleibhéal cosanta comhshaoil a neartú ag an am céanna. Beidh tionchar dearfach ag na dreasachtaí, arna dtabhairt faoi dhlíthe eile de chuid an Aontais, maidir le húsáid breoslaí in-athnuaite de thionscnamh ar an nglacadh a bheidh leis na breoslaí sin san eitlíocht. Teastaíonn creat inbhuanaitheachta láidir soiléir aonair chun cinnteacht dhlíthiúil agus leanúnachas a sholáthar dóibh siúd atá gníomhach sna tionscail eitlíochta agus breoslaí, maidir le hincháilitheacht breoslaí eitlíochta inbhuanaithe faoin Rialachán seo. Chun na críche sin, ba cheart gach bithbhreosla eitlíochta a chomhlíonann na critéir inbhuanaitheachta agus na critéir maidir le hastaíochtaí saolré a leagtar síos i dTreoir (AE) 2018/2001 agus a dheimhnítear i gcomhréir leis an Treoir sin, cé is moite de bhithbhreoslaí a tháirgtear ó ‘barra bia agus beatha’ agus bunábhair áirithe a liostaítear in Airteagal 4(5) den Rialachán seo, gach breosla eitlíochta sintéiseach agus gach breosla eitlíochta carbóin athchúrsáilte a chomhlíonann an tairseach maidir le laghdú ar astaíochtaí saolré dá dtagraítear sa Treoir sin a bheith incháilithe. I ndáil leis sin, chun an chomhsheasmhacht le beartais ghaolmhara eile de chuid an Aontais a áirithiú, ba cheart incháilitheacht bithbhreoslaí eitlíochta, breoslaí eitlíochta sintéiseacha agus breoslaí eitlíochta carbóin athchúrsáilte a bheith bunaithe ar na critéir inbhuanaitheachta agus ar na tairseacha a bunaíodh i dTreoir (AE) 2018/2001.

Go háirithe, tá na breoslaí eitlíochta inbhuanaithe arna dtáirgeadh ón amhábhar a liostaítear i gCuid B d’Iarscríbhinn IX a ghabhann le Treoir (AE) 2018/2001 riachtanach, mar tá siad ar na teicneolaíochtaí is aibí tráchtála atá ann faoi láthair chun aeriompar a dhícharbónú sa ghearrthéarma. Ba cheart don sciar in-athnuaite de bhreoslaí a tháirgtear trí chomhphróiseáil a bheith incháilithe faoin sainmhíniú ar bhreosla eitlíochta inbhuanaithe, ar choinníoll go dtáirgtear an sciar in-athnuaite ón n-amhábhar a liostaítear i dTreoir (AE) 2018/2001 cé is moite de bhithbhreoslaí a tháirgtear ó ‘barra bia agus beatha’ mar a shainmhínítear sa Treoir sin, agus d’amhábhar áirithe a liostaítear in Airteagal 4(5) den Rialachán seo, agus a chinntear i gcomhréir leis an modheolaíocht atá le leagan amach i rialachán tarmligthe ón gCoimisiún a ghlacfar de bhun Threoir (AE) 2018/2001. Hidrigin in-athnuaite le haghaidh eitlíochta agus breoslaí eitlíochta ísealcharbóin lena mbaintear amach ar a laghad an leibhéal céanna laghduithe ar astaíochtaí saolré le breoslaí eitlíochta sintéiseacha, is féidir léi ról a imirt maidir lena cur in ionad gnáthbhreoslaí eitlíochta agus tacú le dícharbónú eitlíochta agus, dá bhrí sin, ba cheart í a chur san áireamh freisin faoi raon feidhme an Rialacháin seo.

(21)

I bhfianaise na húsáide a bhaintear as amhábhar i gcosmaidí agus i mbeatha ainmhithe, ba cheart bithbhreoslaí eitlíochta seachas bithbhreoslaí ardfhorbartha mar a shainmhínítear i dTreoir (AE) 2018/2001 agus seachas bithbhreoslaí a tháirgtear ón mbunábhar a liostaítear i gCuid B d’Iarscríbhinn IX a ghabhann leis an Treoir sin agus a sholáthraíonn gach soláthróir breosla eitlíochta in aerfoirt de chuid an Aontais a áireamh suas go huasmhéid 3 % de bhreosla eitlíochta a sholáthraítear chun cloí le líon íosta na sciartha breoslaí eitlíochta inbhuanaithe atá le soláthar ag gach aerfort de chuid an Aontais faoin Rialachán seo.

(22)

Tá líon leathan d’amhábhair incháilithe ríthábhachtach chun an leas is fearr is féidir a bhaint as an acmhainneacht chun táirgeadh breosla eitlíochta inbhuanaithe a mhéadú ar chostais inacmhainne, agus inbhuanaitheacht an stoic sin á ráthú ag an am céanna. Ní áirítear leis an Rialachán seo cineálacha áirithe amhábhair ach amháin má áirítear amhábhar den sórt sin in Iarscríbhinn IX a ghabhann le Treoir (AE) 2018/2001, agus comhlíonann sé na coinníollacha uile is infheidhme má leagtar amach na coinníollacha sin san Iarscríbhinn sin. Níor cheart liosta na n-amhábhar atá incháilithe faoin Rialachán seo a bheith statach, dá bhrí sin, ach ba cheart dó a bheith ag athrú le himeacht ama chun amhábhar inbhuanaithe nua a chur san áireamh i gcomhréir leis an Treoir sin. Ba cheart athruithe ar liosta na n-amhábhar in Iarscríbhinn IX a ghabhann leis an Treoir sin, a chomhlíonann coinníollacha ábhartha na hIarscríbhinne sin, a léiriú go díreach i liosta na mbreoslaí incháilithe faoin Rialachán seo chun amhábhar eitlíochta inbhuanaithe a tháirgeadh.

(23)

Ar chúiseanna inbhuanaitheachta, níor cheart bithbhreoslaí eitlíochta a dhíorthaítear ó bharra beatha agus bia, lena n-áirítear lena ngabhann riosca ard maidir le hathrú indíreach ar thalamhúsáid a bheith incháilithe. Tarlaíonn athrú indíreach ar an talamhúsáid go háirithe nuair a shaothraítear barra le haghaidh bithbhreoslaí seachas le haghaidh bia agus beatha mar a dhéantaí go traidisiúnta. Méadaíonn an t-éileamh breise sin ar an mbrú ar an talamh agus mar thoradh air, d’fhéadfadh sé go sínfí talamh talmhaíochta isteach i limistéir ina bhfuil stoc ardcharbóin, amhail foraoisí, bogaigh agus talamh portaigh, rud is cúis bhreise imní é maidir le hastaíochtaí gás ceaptha teasa méadaithe agus caillteanas bithéagsúlachta. Tá sé léirithe sa taighde go mbraitheann scála na hiarmharta ar thosca éagsúla, a chuimsíonn an cineál amhábhair a úsáidtear chun breosla a tháirgeadh, an leibhéal éilimh breise ar amhábhar arna spreagadh ag úsáid bithbhreoslaí, agus a mhéid a chosnaítear talamh ar fud an domhain ar a bhfuil stoc ardcharbóin. Sainaithníodh ardriosca go mbeadh athrú indíreach ar an talamhúsáid mar thoradh ar bhithbhreoslaí, is é sin, breoslaí a táirgeadh ó amhábhar a tugadh faoi deara ina leith leathnú suntasach ar an limistéar táirgthe ionas go bhfuil sé ag brú isteach ar thalamh ar a bhfuil stoc ardcharbóin. Dá bhrí sin, níor cheart breoslaí a dhíorthaítear ó bharra beatha agus bia a chur chun cinn. Tá an cur chuige sin i gcomhréir le beartas an Aontais, agus go háirithe le Treoir (AE) 2018/2001, a theorannaíonn úsáid na mbithbhreoslaí sin don iompar de bhóthar agus d’iarnród agus a leagann síos uasteorainn leo, i bhfianaise a dtairbhí níos ísle maidir leis an gcomhshaol, a bhfeidhmíocht níos ísle i dtéarmaí an laghdaithe fhéideartha ar gháis ceaptha teasa, agus cúiseanna imní níos leithne ó thaobh na hinbhuanaitheachta de. I dteannta na n-astaíochtaí gás ceaptha teasa a bhaineann le hathrú indíreach ar an talamhúsáid – atá in ann na laghduithe uile nó cuid de na laghduithe a bhaineann le bithbhreoslaí ar leith a chur ar neamhní – is riosca é an t-athrú indíreach freisin ar an talamhúsáid don bhithéagsúlacht. Tá na rioscaí sin fíor-thromchúiseach i ndáil leis an leathnú mór táirgthe a d’fhéadfadh a bheith ann de thoradh méadú mór ar an éileamh.

Tá leibhéil ísle éilimh ar bhithbhreoslaí a dhíorthaítear ó bharra bia agus beatha san earnáil aeriompair i láthair na huaire, ós rud é gur de bhunús iontaise breis agus 99 % de na breoslaí eitlíochta a úsáidtear faoi láthair. Is iomchuí, mar sin, éileamh féideartha an-mhór ar bhithbhreoslaí a dhíorthaítear ó bharra bia agus beatha a sheachaint trí a n-úsáid faoin Rialachán seo a chur chun cinn. Maolaíonn neamh-incháilitheacht na mbithbhreoslaí ó bharra bia faoin Rialachán seo aon riosca go moilleofaí dícharbónú an iompair de bhóthar freisin, rud a d’fhéadfadh a bheith i gceist murach sin de bharr aistriú bithbhreoslaí a dhíorthaítear ó bharra bia ón earnáil bóithre chuig an earnáil aeriompair. Tá sé fíor-riachtanach an t-aistriú sin a mhaolú, ós rud é gurb é an t-iompar de bhóthar go mór fada an earnáil iompair is mó truailliú fós faoi láthair.

(24)

Tá faisnéis chruinn agus cheart faoi shaintréithe breoslaí eitlíochta inbhuanaithe ríthábhachtach le haghaidh fheidhmiú cuí an Rialacháin seo. Chun muinín na dtomhaltóirí a chur chun cinn agus chun trédhearcacht agus inrianaitheacht a áirithiú, ba cheart do sholáthróirí breosla eitlíochta freagrach as an bhfaisnéis cheart a sholáthar maidir le saintréithe an bhreosla eitlíochta inbhuanaithe arna sholáthar, maidir lena shaintréithe inbhuanaitheachta agus maidir le bunadh an amhábhair a úsáidtear i dtáirgeadh an bhreosla eitlíochta inbhuanaithe. Ba cheart an fhaisnéis sin a thuairisciú i mbunachar sonraí an Aontais arna bhunú i gcomhréir le Treoir (AE) 2018/2001. Maidir le soláthraithe breosla eitlíochta ar cruthaíodh gur thug siad faisnéis mhíthreorach nó mhíchruinn maidir le saintréithe agus bunadh na mbreoslaí eitlíochta inbhuanaithe a sholáthraíonn siad, ba cheart iad a bheith faoi réir pionóis. Ba cheart do na Ballstáit a áirithiú go gcuirfidh soláthróirí breosla eitlíochta faisnéis thráthúil agus chruinn isteach sa bhunachar sonraí de chuid an Aontais agus go ndéanfar an fhaisnéis sin a fhíorú agus a iniúchadh. Chun calaois a d’fhéadfadh a bheith ann a chomhrac, lena n-áirítear a mhéid a bhaineann leis an amhábhar is gá chun breoslaí eitlíochta inbhuanaithe a allmhairítear ó lasmuigh den Aontas atáirgeadh, ní mór do na Ballstáit, i gcomhar le comhlachtaí ábhartha an Aontais, na sásraí rialaithe do lastais a neartú, lena n-áirítear trí chigireachtaí ar an láthair a dhéanamh, i gcomhréir le rialacha ábhartha an Aontais. I ndáil leis sin, leagfaidh an Coimisiún amach rialacha cur chun feidhme maidir le deimhniú inbhuanaitheachta i gcomhréir le Treoir (AE) 2018/2001 chun comhchuibhiú agus neartú breise a dhéanamh ar na rialacha maidir le hiontaofacht, trédhearcacht agus iniúchóireacht neamhspleách agus maidir le comhar údaráis inniúla na mBallstát i dtaobh maoirseacht iniúchóireachta.

(25)

Ba cheart gurbh aidhm don Rialachán reatha é a áirithiú gur féidir le hoibreoirí aerárthaí dul san iomaíocht le chéile ar bhonn comhionannas deiseanna a mhéid a bhaineann leis an rochtain ar bhreoslaí eitlíochta inbhuanaithe. Chun aon saobhadh i margadh aeriompair an Aontais a sheachaint, ba cheart sciartha íosta aonfhoirmeacha a sholáthar do na haerfoirt ar fad de chuid an Aontais. Cé go bhfuil sé de shaoirse ag an margadh cainníochtaí níos mó breosla eitlíochta inbhuanaithe a sholáthar agus a úsáid, leis an Rialachán seo ba cheart a áirithiú gur comhionann na sciartha íosta éigeantacha de bhreoslaí eitlíochta inbhuanaithe sna haerfoirt ar fad de chuid an Aontais. Chun soiléireacht agus deimhneacht dhlíthiúil a áirithiú, agus ar an gcaoi sin forbairt agus imscaradh margaidh na dteicneolaíochtaí breosla eitlíochta is inbhuanaithe agus is nuálaí a chur chun cinn, teicneolaíochtaí a bhfuil an acmhainneacht fáis acu freastal ar riachtanais na todhchaí, leis an Rialachán seo, ba cheart sciartha íosta de bhreoslaí eitlíochta inbhuanaithe, lena n-áirítear breoslaí eitlíochta sintéiseacha, a leagan síos le himeacht ama, agus na sciartha sin ag méadú de réir a chéile. Is gá sciartha íosta tiomnaithe maidir le breoslaí eitlíochta sintéiseacha a leagan amach mar chuid de na sciartha íosta de bhreosla eitlíochta inbhuanaithe i bhfianaise fhéidearthacht dícharbónaithe mhór na mbreoslaí eitlíochta sin, agus i bhfianaise na gcostas táirgeachta measta a bhaineann leo faoi láthair. Nuair a tháirgtear iad ó leictreachas agus carbón inbhuanaithe a ghabhtar go díreach ón aer, is féidir le breoslaí eitlíochta sintéiseacha laghduithe de suas le 100 % a bhaint amach ar astaíochtaí i gcomparáid le gnáthbhreosla eitlíochta. Tá buntáistí suntasacha acu freisin i gcomparáid le cineálacha eile breoslaí eitlíochta inbhuanaithe maidir le héifeachtúlacht acmhainne (go háirithe ó thaobh riachtanais uisce de) an phróisis táirgeachta. É sin ráite, áfach, meastar go bhfuil costais táirgeachta na mbreoslaí eitlíochta sintéiseacha idir 3 agus 6 oiread níos airde faoi láthair ná praghas margaidh an ghnáthbhreosla eitlíochta. Mar sin, ba cheart sciartha íosta tiomnaithe a leagan síos leis an Rialachán seo le haghaidh na teicneolaíochta sin.

(26)

Agus gnóthú na gceanglais comhchuibhithe sin de chuid an Aontais maidir le soláthar breosla eitlíochta inbhuanaithe á áirithiú, d’fhéadfadh na Ballstáit beartais agus tionscnaimh tacaíochta a shaothrú arb é is aidhm dóibh leibhéal táirgthe agus glactha breosla eitlíochta inbhuanaithe a mhéadú, lena n-áirítear breoslaí eitlíochta sintéiseacha. Ba cheart do na beartais agus tionscnaimh sin a bheith trédhearcach, neamh-idirdhealaitheach, comhréireach agus de chineál ginearálta a bheidh oscailte do gach fiontar. Leis an Rialachán seo, níor cheart í cosc a chur ar na Ballstáit bearta tiomnaithe a chur chun feidhme lasmuigh dá raon feidhme arb é is aidhm dóibh úsáid breoslaí eitlíochta inbhuanaithe a éascú nó earnáil an aeriompair a dhícharbónú.

(27)

Cuireann easpa modheolaíochta, critéar agus táscairí coiteanna arna ndeimhniú agus arna dtuairisciú go leordhóthanach agus arna ndéanamh faireachán leordhóthanach orthu ar chumas oibreoirí aerárthaí leibhéil feidhmíochta astaíochtaí a n-eitiltí a mhaoímh, ar leibhéil iad nach féidir a chur i gcomparáid lena chéile. Ní mór do phaisinéirí a bheith in ann muinín a bheith acu as an bhfaisnéis ó oibreoirí aerárthaí maidir le hinbhuanaitheacht na mbreoslaí eitlíochta a úsáideann oibreoirí aerárthaí agus inbhuanaitheacht a n-eitiltí chun roghanna eolasacha a dhéanamh agus comparáid á déanamh idir roghanna éagsúla eitiltí, i gcás eitiltí díreacha agus indíreacha araon, arna dtairiscint ag oibreoirí aerárthaí. Chun go mbeidh tomhaltóirí in ann rogha eolasach a dhéanamh, áfach, is gá faisnéis níos láidre, níos iontaofa, níos neamhspleáiche agus níos comhchuibhithe a bheith ann maidir le tionchar na n-eitiltí ar an gcomhshaol. Dá bhrí sin, is gá na critéir agus na táscairí a úsáidtear chun leibhéal feidhmíochta astaíochtaí a n-eitiltí a chur in iúl faoi chomhlipéad deonach comhshaoil (‘an lipéad’). Ba cheart go bhféadfaí iad a thabhairt cothrom le dáta go héasca chun coinneáil suas le hathruithe teicneolaíocha agus le caighdeáin idirnáisiúnta agus Eorpacha. Ós rud é go bhféadfadh roinnt de na sonraí is gá chun leibhéal agus cáilíocht an bhreosla eitlíochta inbhuanaithe a úsáidtear a ríomh mar aon le critéir eile chun feidhmíocht inbhuanaitheachta eitilte a thomhas a bheith íogair ó thaobh na tráchtála de, is gá freisin do chomhlacht neamhspleách tuarascálacha na n-oibreoirí aerárthaí a lárú, faireachán a dhéanamh ar a gcuid sonraí, a gcruinneas a dheimhniú agus lipéad ar an leibhéal iomchuí a eisiúint. I bhfianaise chineál dinimiciúil na sonraí a sholáthraíonn oibreoirí aerárthaí, ba cheart an lipéad a bheith faoi réir rialú agus bailíochtú tréimhsiúil, amhail ag deireadh gach séasúir IATA,. Nuair is gá, bheadh na sonraí sin bunaithe ar mheastacháin amhail an meán-lódfhachtóir d’eitilt, bealach agus séasúr ar leith. Ós rud é go bhfuil oibleagáidí faireacháin agus tuairiscithe ar Ghníomhaireacht Sábháilteachta Eitlíochta an Aontais Eorpaigh (‘an Ghníomhaireacht’) faoin Rialachán seo, is iomchuí gurb í an Ghníomhaireacht an comhlacht de chuid an Aontais atá i gceannas ar chur chun feidhme an lipéid. Is iomchuí, dá bhrí sin, na coinníollacha a sholáthar maidir le heisiúint an lipéid chun feidhmíocht chomhshaoil na heitlíochta a thomhas agus, chun a áirithiú go gcomhlíonfar na coinníollacha sin, a cheangal ar an nGníomhaireacht athbhreithniú tréimhsiúil a dhéanamh orthu.

(28)

Mar thoradh ar thabhairt isteach breoslaí eitlíochta inbhuanaithe in aerfoirt de chuid an Aontais agus an borradh a bheidh fúthu, d’fhéadfadh cleachtais fhorlíonadh na n-umar breosla a bheith níos forleithne de dheasca méaduithe ar chostas an bhreosla eitlíochta. Tá na cleachtais forlíonta umar neamh-inbhuanaithe agus ba cheart iad a sheachaint mar go ndéanann siad dochar d’iarrachtaí an Aontais tionchar an iompair ar an gcomhshaol a laghdú. Thiocfadh na cleachtais sin salach ar na cuspóirí dícharbónaithe eitlíochta mar go méadódh meáchan breise an aerárthaigh ar an ídiú breosla agus ar na hastaíochtaí bainteacha i gcás aon eitilt. Is riosca iad na cleachtais forlíonta umar freisin do chothrom na Féinne san Aontas idir oibreoirí aerárthaí, agus idir aerfoirt. Dá bhrí sin, leis an Rialachán seo, ba cheart ceanglas a chur ar oibreoirí aerárthaí athbhreoslú roimh imeacht dóibh ó aerfort ar leith de chuid an Aontais. An méid breosla a chuirtear ar bord roimh imeacht ó aerfort ar leith de chuid an Aontais, ba cheart é a bheith i gcomhréir leis an méid breosla a theastaíonn chun na heitiltí ón aerfort sin a oibriú. Áirithítear leis an gceanglas go mbeidh feidhm ag coinníollacha comhionanna maidir le hoibreoirí aerárthaí an Aontais agus oibreoirí aerárthaí eachtracha ar fud an Aontais, agus ardleibhéal cosanta comhshaoil á áirithiú ag an am céanna. Toisc nach sainíonn an Rialachán sciartha uasta breoslaí eitlíochta inbhuanaithe i ngach breosla eitlíochta, féadfaidh oibreoirí aethárthaí agus soláthróirí breosla eitlíochta beartais chomhshaoil níos uaillmhianaí a shaothrú, lena mbeadh glacadh agus soláthar breoslaí eitlíochta inbhuanaithe níos fearr ina líonra foriomlán oibríochtaí, agus forlíonadh na n-umar breosla á sheachaint ag an am céanna. Mar sin féin, ba cheart a chur san áireamh leis an Rialachán seo freisin go dtarlaíonn forlíonadh na n-umar breosla ag amanna chun na rialacha maidir le sábháilteacht breosla i gcomhréir le Rialachán (AE) Uimh. 965/2012 ón gCoimisiún (8) a chomhlíonadh agus i gcásanna den sórt sin go bhfuil údar maith leis ar chúiseanna sábháilteachta. D’fhéadfadh sé go n-áireofaí leis sin, mar shampla, cásanna de ghanntanas breosla nó d’éilliú breosla ag an aerfort cinn scríbe arna dheimhniú le Fógra d’Eitleoirí nó le Fógra d’Aermhisin (NOTAM). Ina theannta sin, d’fhéadfadh forlíonadh na n-umar breosla a bheith mar thoradh ar dheacrachtaí sonracha oibríochtúla a bheith ag roinnt oibreoirí aerárthaí ag roinnt aerfort, inter alia i dtaobh agaí athluchtúcháin níos faide ar bhonn díréireach a bheith ag aerárthaí nó acmhainn laghdaithe aerfoirt a bheith ann ag buaic-amanna. Ba cheart don Choimisiún in éineacht leis an nGníomhaireacht, dá bhrí sin, faireachán, meastóireacht agus anailís ghéar a dhéanamh ar chásanna a thuairiscítear ina dtarlaíonn forlíonadh na n-umar breosla agus ar na bunchúiseanna atá leo agus, más iomchuí, tograí reachtacha a thíolacadh chun an Rialachán seo a leasú. Tá an méid sin gan dochar do chumhacht an Choimisiúin agus údaráis iomaíochta na mBallstát faoi Airteagail 101 agus 102 CFAE iompraíocht fhrithiomaíoch ag gníomhaithe ar an margadh a imscrúdú agus smachtbhannaí a chur ina leith chun feidhmiú cuí an mhargaidh le haghaidh breoslaí eitlíochta inbhuanaithe a chosaint, go háirithe, i gcás ina nochtar cleachtais fhrithiomaíocha de dheasca faisnéise atá i mbunachar sonraí an Aontais agus sonraí eile a thuairiscítear do na húdaráis inniúla.

(29)

Mar sin féin, leis an Rialachán seo ba cheart foráil a dhéanamh maidir leis an bhféidearthacht díolúine a thabhairt i gcás bealaí sonracha, ar feadh tréimhse theoranta, ón oibleagáid athbhreoslú a dhéanamh d’oibreoirí aerárthaí a imíonn ó aerfoirt de chuid an Aontais, i gcás inar féidir leis na hoibreoirí sin a léiriú go mbíonn deacrachtaí tromchúiseacha oibríochtúla ann arís agus arís eile maidir le haerárthaí a athbhreoslú ag aerfort ar leith de chuid an Aontais, ar deacrachtaí iad a fhágann nach féidir leo casadh thart laistigh de thréimhse réasúnta ama, a d’fhéadfaidís tionchar a bheith acu ar nascacht, go háirithe i réigiúin imeallacha, nó ar deacrachtaí struchtúracha soláthair breosla iad a fhágann praghsanna breosla i bhfad níos airde i gcomparáid leis an bpraghas a chuirtear i bhfeidhm, ar an meán, maidir le breoslaí de chineálacha comhchosúla in aerfoirt eile de chuid an Aontais. Níor cheart na praghsanna i bhfad níos airde sin ag an aerfort de chuid an Aontais i dtrácht a bheith mar thoradh go príomha ar úsáid níos airde breoslaí eitlíochta inbhuanaithe ag an aerfort sin de chuid an Aontais.

(30)

Cabhróidh glacadh breise breoslaí eitlíochta inbhuanaithe, a mbíonn cion aramatach níos ísle agus cion sulfair níos ísle acu go hiondúil, le tionchar aeráide neamh-CO2 a laghdú. D’fhéadfadh laghdú breise ar an gcion aramatach agus ar an gcion sulfair i mbreoslaí eitlíochta foirmiú ciorras conaire comhdhlúthaithe a laghdú, feabhas a chur ar cháilíocht an aeir sna haerfoirt agus timpeall orthu, agus cáilíocht an bhreosla a mhéadú chun leasa na n-aerlínte, trí ard-dlús fuinnimh agus trí chostais chothabhála níos ísle mar gheall ar leibhéil níos ísle súiche. Ina theannta sin, ba cheart idirthuilleamaíochtaí idir astaíochtaí CO2 agus astaíochtaí neamh-CO2 a mheas. Ní mór, áfach, an cion aramatach i mbreoslaí eitlíochta a laghdú agus, ag an am céanna, cloí leis na rialacha idirnáisiúnta maidir le sábháilteacht breosla agus cothrom na Féinne idirnáisiúnta a chaomhnú. Dá bhrí sin, ba cheart do sholáthróirí breosla eitlíochta tuairisciú don Ghníomhaireacht agus do na húdaráis inniúla ábhartha maidir le cion cumhránaice, naftailéiní agus sulfair na mbreoslaí eitlíochta a sholáthraítear. Agus faisnéis den sórt sin á tuairisciú, d’fhéadfadh soláthróirí breosla eitlíochta brath ar dheimhnithe ábhartha maidir le cáilíocht bhreosla arna dtáirgeadh chun ceanglais na gcaighdeán idirnáisiúnta cáilíochta breosla a sholáthraíonn táirgeoirí agus cumascóirí breoslaí a chomhlíonadh.

(31)

Chomh maith leis na héifeachtaí athraithe aeráide a bhíonn ag an ngnáthbhreosla eitlíochta, bíonn drochthionchar aige freisin ar cháilíocht an aeir. Is féidir ról a bheith ag glacadh breise breoslaí eitlíochta inbhuanaithe maidir le cáilíocht an aeir a fheabhsú.

(32)

Tá sé tábhachtach a áirithiú go ndéanfaidh comhlachtaí bainistithe aerfoirt de chuid an Aontais a chumhdaítear leis an Rialachán seo na bearta is gá chun rochtain oibreoirí aerárthaí ar bhreoslaí eitlíochta ina bhfuil breoslaí eitlíochta inbhuanaithe a éascú, ionas nach mbeidh siad ina gconstaic i ndáil le glacadh breoslaí eitlíochta inbhuanaithe. Más gá, ba cheart d’údaráis inniúla an Bhallstáit ina bhfuil an t-aerfort lonnaithe a bheith in ann a cheangal ar chomhlacht bainistíochta aerfoirt de chuid an Aontais an fhaisnéis is gá a sholáthar maidir le comhlíonadh an Rialacháin seo ar mhaithe le dáileadh agus athbhreoslú rianúil oibreoirí aerárthaí le breoslaí eitlíochta inbhuanaithe. Ba cheart do ról na n-údarás inniúil ligean do chomhlachtaí bainistíochta aerfoirt agus aerárthaí de chuid an Aontais pointe fócasach coiteann a bheith acu, i gcás ina dteastóidh soiléiriú teicniúil maidir le hinfhaighteacht bonneagair breosla eitlíochta. Nuair a thiocfaidh aerárthaí leictreacha nó aerárthaí faoi thiomáint hidrigine chun bheith aibí agus nuair a bheidh siad ar fáil ar bhonn tráchtála agus i gcás inarb iomchuí, beidh sé riachtanach go ndéanfaidh comhlachtaí bainistithe aerfoirt de chuid an Aontais, soláthróirí breosla eitlíochta agus láimhseálaithe breosla a chumhdaítear leis an Rialachán seo, gach beart is gá chun comhoibriú agus rochtain ar an mbonneagar iomchuí um athluchtú hidrigine agus leictreach le haghaidh aerárthaí a éascú, i gcomhréir leis an gcreat beartais náisiúnta faoi seach le haghaidh bonneagar breoslaí malartacha.

(33)

Soláthraítear breoslaí eitlíochta do roinnt aerfoirt de chuid an Aontais go príomha trí phíblínte ó scaglanna nó ó stáisiúin chumaisc breoslaí eitlíochta inbhuanaithe. Tá sé ríthábhachtach, dá bhrí sin, go gcomhoibreodh na páirtithe atá i gceannas ar na píblínte sin le chéile agus go ndéanfaidís na bearta uile is gá ionas go mbeidh rochtain leanúnach gan bhriseadh ag soláthróirí breosla eitlíochta ar bhonneagar breoslaí eitlíochta sibhialta chun gnáthbhreoslaí eitlíochta agus breoslaí eitlíochta ina bhfuil sciartha breoslaí eitlíochta inbhuanaithe a sholáthar.

(34)

Ba cheart é a bheith de cheangal ar oibreoirí aerárthaí tuairisc bhliantúil a thabhairt dá n-údarás inniúil nó dá n-údaráis inniúla faoi seach agus don Ghníomhaireacht maidir lena gceannach breosla eitlíochta inbhuanaithe, agus maidir lena dtréithe. Ba cheart faisnéis a sholáthar faoi shaintréithe agus faoi bhunadh an amhábhair, faoin bpróiseas tiontaithe agus faoi na hastaíochtaí saolré le haghaidh gach ceannacháin agus gach cineáil breosla eitlíochta inbhuanaithe.

(35)

Ba cheart ceangal a chur ar oibreoirí aerárthaí tuairisciú ar bhonn bliantúil maidir leis an méid iarbhír breosla eitlíochta a thógann siad ar bord in aghaidh an aerfoirt de chuid an Aontais, lena n-áirítear a mhéid a chomhlíonann siad na rialacha is infheidhme maidir le sábháilteacht breosla, chun a chruthú nach ndearnadh aon fhorlíonadh breosla gan údar. Ba cheart na tuarascálacha a bheith fíoraithe ag fíoraitheoirí neamhspleácha agus a tharchur chuig an údarás inniúil nó na húdaráis inniúla agus chuig an nGníomhaireacht chun measúnú agus faireacháin a dhéanamh ar chomhlíontacht. Ba cheart d’fhíoraitheoirí neamhspleácha cruinneas an bhreosla eitlíochta bhliantúil atá de dhíth arna tuairisciú ag na hoibreoirí aerárthaí a chinneadh trí uirlis arna formheas ag an gCoimisiún a úsáid.

(36)

Gan dochar do na sonraí arna dtaifeadadh ag soláthróirí breosla eitlíochta i gcomhréir le Treoir (AE) 2018/2001 agus Rialachán Cur Chun Feidhme (AE) 2022/996 ón gCoimisiún (9), ba cheart a cheangal ar sholáthróirí breosla eitlíochta tuairisciú bliantúil a dhéanamh ar bhunachar sonraí an Aontais dá dtagraítear sa Treoir sin, maidir lena soláthar breosla eitlíochta, lena n-áirítear breoslaí eitlíochta inbhuanaithe agus a dtréithe. Ba cheart faisnéis a sholáthar faoi shaintréithe agus faoi bhunadh an amhábhair, faoi phróisis tiontaithe agus faoi astaíochtaí saolré an bhreosla eitlíochta inbhuanaithe arna sholáthar. Áirítear san fhaisnéis faoi shaintréithe breoslaí eitlíochta inbhuanaithe an cineál táirge agus na hamhábhair a úsáidtear agus saintréithe inbhuanaitheachta eile is gá chun a léiriú go gcomhlíonann breoslaí eitlíochta inbhuanaithe na critéir inbhuanaitheachta faoi Threoir (AE) 2018/2001.

(37)

Ba cheart do na Ballstáit údarás inniúil nó údaráis inniúla a ainmniú, a bheidh freagrach as cur chun feidhme an Rialacháin seo a fhorfheidhmiú ar oibreoirí aerárthaí, comhlachtaí bainistithe aerfoirt de chuid an Aontais agus soláthróirí breosla eitlíochta. Ba cheart a shainmhíniú sa Rialachán seo na rialacha maidir le hoibreoirí aerárthaí, comhlachtaí bainistithe aerfoirt de chuid an Aontais agus soláthróirí breosla eitlíochta a shannadh do na húdaráis inniúla. Sonraí a dhéantar a chomhiomlánú le haghaidh na n-oibreoirí aerárthaí agus na soláthróirí breosla eitlíochta a bhfuil na húdaráis sin inniúil ina leith, ba cheart don Ghníomhaireacht iad a sheoladh chuig na húdaráis inniúla. A mhéid is féidir, ba cheart go gcuirfeadh leibhéal an chomhiomlánaithe ar chumas na n-údarás inniúil na sonraí comhiomlánaithe sin a chur i gcomparáid le foinsí sonraí eile.

(38)

Ba cheart don Ghníomhaireacht tuarascáil theicniúil a fhoilsiú ar bhonn bliantúil agus í a chur ar aghaidh chuig Parlaimint na hEorpa agus chuig an gComhairle. Tá an méid sin riachtanach chun go mbeifí in ann infheictheacht shoiléir a sholáthar maidir le cur chun feidhme an Rialacháin, maidir le ceannach agus soláthar breoslaí eitlíochta inbhuanaithe san Aontas agus i dtríú tíortha ábhartha, maidir le staid an mhargaidh lena n-áirítear faisnéis maidir le forbairt na bearna praghsanna idir breoslaí eitlíochta inbhuanaithe agus breoslaí iontaise, agus comhdhéanamh an bhreosla eitlíochta.

(39)

In éagmais nósanna imeachta breise, ní féidir a chinneadh go cruinn cé acu an bhfuil nó nach bhfuil sciartha breoslaí eitlíochta inbhuanaithe curtha ar bord ina n-umair go fisiciúil ag oibreoirí aerárthaí in aerfoirt shonracha de chuid an Aontais. Dá bhrí sin, ba cheart cead a bheith ag oibreoirí aerárthaí a n-úsáid breoslaí eitlíochta inbhuanaithe a thuairisciú bunaithe ar thaifid cheannaigh. Ba cheart d’oibreoirí aerárthaí a bheith i dteideal an fhaisnéis a fháil ón soláthróir breosla eitlíochta, atá ag teastáil chun tuairisc a thabhairt ar an gceannach breosla eitlíochta inbhuanaithe. Is é an cuspóir atá le húsáid an chórais cothromaíochta maise dá dtagraítear i dTreoir (AE) 2018/2001 inrianaitheacht breoslaí eitlíochta a áirithiú, agus féadfaidh soláthróirí breosla eitlíochta a léiriú go bhfuil an Rialachán seo á chomhlíonadh trí chóras cothromaíochta maise den sórt sin a úsáid, lena n-áirítear nuair a roinntear córas den sórt sin idir dhá Bhallstát nó níos mó.

(40)

Mar thoradh ar shainordú a thabhairt isteach san Aontas maidir le glacadh breoslaí eitlíochta inbhuanaithe, d’fhéadfadh sé go mbeadh míbhuntáiste iomaíochta míchuí ann d’aerlínte Aontais a oibríonn eitiltí cianaistir dhíreacha ó aerfort de chuid an Aontais i gcomparáid lena n-iomaitheoirí a nascann trí mhol aerfoirt lasmuigh de raon feidhme an Rialacháin seo gan beartais choibhéiseacha maidir le breoslaí eitlíochta inbhuanaithe. Chun glacadh breoslaí eitlíochta inbhuanaithe san Aontas a chur chun cinn a thuilleadh, a dtuartar go mbeidh difríocht shuntasach praghsanna ag baint leo i gcomparáid le gnáthbhreoslaí eitlíochta amach anseo, ba cheart go mbeadh oibreoirí aerthárthaí in ann lamháltais a éileamh do ghlacadh breoslaí eitlíochta inbhuanaithe i gcomhréir le CTA AE.

(41)

Chun glacadh breoslaí eitlíochta inbhuanaithe a dtuartar go mbeidh difríocht shuntasach praghsanna ag baint leo i gcomparáid le gnáthbhreoslaí eitlíochta a chur chun cinn, tá sé ríthábhachtach go mbeidh oibreoirí aerárthaí in ann a mhaíomh go bhfuil breoslaí eitlíochta inbhuanaithe á n-úsáid acu faoi scéimeanna gás ceaptha teasa amhail CTA AE nó CORSIA, faoina rogha féin, gan an laghdú ar astaíochtaí a mhaíomh faoi dhó. Níor cheart d’oibreoirí aerárthaí sochair a éileamh as baisc de bhreoslaí eitlíochta inbhuanaithe a úsáid faoi níos mó ná scéim gáis ceaptha teasa amháin. Ba cheart iarraidh ar sholáthróirí breosla eitlíochta aon fhaisnéis a sholáthar d’oibreoirí aerárthaí saor in aisce a bhaineann le saintréithe an bhreosla eitlíochta inbhuanaithe a díoladh leis an oibreoir aerárthaí sin agus atá ábhartha chun críoch tuairiscithe ag an oibreoir aerárthaí faoin Rialachán seo nó faoi scéimeanna gás ceaptha teasa.

(42)

Chun cothrom na Féinne sa mhargadh inmheánach eitlíochta agus comhlíonadh uaillmhianta aeráide an Aontais a áirithiú, leis an Rialachán seo, ba cheart pionóis éifeachtacha, chuí agus athchomhairleacha a ghearradh ar sholáthróirí breosla eitlíochta agus ar oibreoirí aerárthaí i gcás neamh-chomhlíontachta. Ní mór leibhéal na bpionós a bheith i gcomhréir leis an damáiste don chomhshaol agus leis an dochar do chothrom na Féinne sa mhargadh inmheánach de dheasca na neamh-chomhlíontachta. Nuair a bhíonn fíneálacha agus pionóis eile á bhforchur, ba cheart do na húdaráis forás phraghas an bhreosla eitlíochta agus an bhreosla eitlíochta inbhuanaithe sa bhliain tuairiscithe a chur san áireamh agus d’fhéadfadh siad méid an neamhchomhlíonta a chur san áireamh freisin, mar shampla i gcás ina mbíonn sáruithe a dhéantar arís agus arís eile.

(43)

Beidh ról nach beag ag an aistriú ó bhreoslaí iontaise go breosla eitlíochta inbhuanaithe maidir le dícharbónú a éascú. Mar sin féin, i bhfianaise thearcfhorbairt mhargadh an Aontais do bhreoslaí eitlíochta inbhuanaithe faoi láthair, go bhfuil ardleibhéal iomaíochta ann idir oibreoirí aerárthaí, difreálach tábhachtach praghais idir gnáthbhreoslaí eitlíochta agus breoslaí eitlíochta inbhuanaithe, ba cheart tacú leis an aistriú sin trí dhreasachtaí a léiríonn an tairbhe chomhshaoil a bhaineann le breoslaí eitlíochta inbhuanaithe agus a dhéanann iad níos iomaíche d’oibreoirí aerárthaí. Agus úsáid á baint as an ioncam a ghintear ó fhíneálacha, nó an choibhéis i luach airgeadais an ioncaim sin, chun tacú le tionscadail taighde agus nuálaíochta i réimse na mbreoslaí eitlíochta inbhuanaithe, táirgeadh na mbreoslaí eitlíochta inbhuanaithe nó sásraí lena bhféadfaí na difríochtaí i bpraghsanna idir breoslaí eitlíochta inbhuanaithe agus gnáthbhreoslaí eitlíochta a dhúnadh.

(44)

Na fíneálacha atá faoi dhliteanas ar sholáthróirí breosla eitlíochta a mhainníonn na sciartha íosta a leagtar amach sa Rialachán seo a chomhlíonadh, ba cheart iad a chomhlánú leis an oibleagáid cainníochtaí breoslaí eitlíochta inbhuanaithe, lena n-áirítear breoslaí eitlíochta sintéiseacha, a sholáthar don mhargadh, a chomhfhreagraíonn don easnamh maidir leis na sciartha íosta a leagtar amach in Airteagal 4 agus in Iarscríbhinn I a chomhlíonadh sa tréimhse tuairiscithe ina dhiaidh sin. Mar sin féin, ba cheart solúbthacht a bheith ag soláthróirí breosla eitlíochta maidir leis na hoibleagáidí a chomhlíonadh i ndáil le soláthar breoslaí eitlíochta sintéiseacha agus an oibleagáid easnaimh ghaolmhair in idirthréimhse idir 2030 agus 2034, nuair a thiocfaidh an oibleagáid sin i bhfeidhm den chéad uair, chun aistriú agus baint amach na spriocanna a éascú.

(45)

Tá sé fíor-riachtanach a áirithiú gur féidir sciartha íosta na mbreoslaí eitlíochta inbhuanaithe a sholáthar go rathúil don mhargadh eitlíochta gan aon ghanntanas soláthair. Chun na críche sin, ba cheart sásra solúbthachta a dhearadh agus a chur i bhfeidhm chun aga tionscanta 10 mbliana a cheadú do thionscal breoslaí eitlíochta inbhuanaithe chun acmhainneacht táirgeachta agus soláthair a fhorbairt dá réir agus chun ligean do sholáthróirí breosla eitlíochta a n-oibleagáidí a chomhlíonadh ar an mbealach is costéifeachtaí, gan uaillmhianta foriomlána comhshaoil an Rialacháin seo a laghdú, agus chun ligean do chomhlachtaí bainistithe aerfoirt de chuid an Aontais, soláthróirí breosla eitlíochta agus oibreoirí aerárthaí na hinfheistíochtaí teicneolaíocha agus lóistíochta is gá a dhéanamh. Ba cheart soláthar na mbreoslaí eitlíochta inbhuanaithe a thosú in 2025, leis an tsolúbthacht dá bhforáiltear sa sásra solúbthachta. Le linn chur i bhfeidhm an tsásra solúbthachta, féadfaidh soláthróirí breosla eitlíochta breosla eitlíochta ina bhfuil sciar níos airde de bhreoslaí eitlíochta inbhuanaithe in aerfoirt áirithe a sholáthar chun cúiteamh a dhéanamh ar bhreoslaí eitlíochta a bhfuil sciar níos ísle de bhreoslaí eitlíochta inbhuanaithe acu in aerfoirt eile nó ar infhaighteacht laghdaithe gnáthbhreosla eitlíochta in aerfoirt eile. Ar an gcaoi chéanna, chun deimhneacht dhlíthiúil agus intuarthacht a sholáthar don mhargadh agus chun infheistíochtaí a bhrú go marthanach i dtreo acmhainneacht táirgeachta na mbreoslaí eitlíochta inbhuanaithe, ba cheart an Rialachán seo a bheith cobhsaí le himeacht ama.

(46)

Chun aistriú rathúil chuig breosla eitlíochta inbhuanaithe a bhaint amach, tá gá le cur chuige cuimsitheach agus leis an timpeallacht chumasúcháin iomchuí chun nuálaíocht a spreagadh, lena mbaineann infheistíocht phoiblí agus phríobháideach araon sa taighde agus san fhorbairt, agus tacaíocht a spreagadh d’ath-imlonnú, d’athsciliú agus d’uas-sciliú oibrithe, chomh maith le bearta teicneolaíocha agus oibríochtúla, agus imlonnú na mbreoslaí eitlíochta inbhuanaithe agus na dteicneolaíochtaí astaíochtaí nialasacha, lena n-áirítear an bonneagar athbhreoslaithe agus athluchtaithe is gá in aerfoirt de chuid an Aontais, agus céadphrionsabal na héifeachtúlachta fuinnimh á chur san áireamh. Chun na críche sin, ba cheart an t-ioncam a ghintear leis na fíneálacha faoin Rialachán seo a leithdháileadh ar thionscadail an Chiste nua Eitlíochta Inbhuanaithe. Ina theannta sin, tá sé d’aidhm ag bunú na Comhghuaillíochta Eorpaí Tionsclaíochta trí chomhoibriú deonach geallsealbhóirí sa slabhra luacha soláthar agus glacadh breoslaí eitlíochta inbhuanaithe san Eoraip a chothú a thuilleadh.

(47)

Bhí ról suntasach ag an taighde agus ag an nuálaíocht i dtaobh breoslaí eitlíochta inbhuanaithe agus breoslaí eitlíochta sintéiseacha a fhorbairt agus acmhainn táirgeachta a fhorbairt. Ba cheart forbairt agus táirgeadh breoslaí eitlíochta inbhuanaithe a mhéadú i bhfad níos mó sna blianta atá le teacht. Tá sé tábhachtach, dá bhrí sin, leanúint de na hiarrachtaí sin agus an infheistíocht i mbreoslaí eitlíochta inbhuanaithe a éascú. Tá deis chomhshaoil agus thionsclaíoch araon ag baint le hinfheistíocht a dhéanamh i dtionscadail acmhainneachta breoslaí eitlíochta inbhuanaithe, rud a bhfuil éifeachtaí iarmharta aige ó thaobh cruthú post agus nuálaíochta de.

(48)

Chun éifeachtacht chomhshaoil bhearta an Aontais a mhéadú agus chun cumas soláthróirí breosla eitlíochta a éascú a n-oibleagáidí soláthair breoslaí eitlíochta inbhuanaithe a chomhlíonadh agus breoslaí eitlíochta inbhuanaithe arna chur ar bord ag oibreoirí aerárthaí ar bhealach atá éifeachtach ó thaobh costais de agus, dá bhrí sin, iomaíochas earnáil eitlíochta an Aontais a neartú, ba cheart don Choimisiún, tar éis dó dul i gcomhairle leis na geallsealbhóirí ábhartha uile, measúnú a dhéanamh ar cheart bearta breise a ghlacadh chun dáileadh agus úsáid chostéifeachtach breoslaí eitlíochta inbhuanaithe i margadh aeriompair an Aontais a éascú trí cheannach breoslaí eitlíochta inbhuanaithe a scaradh óna sheachadadh agus a úsáid fhisiciúil. D’fhéadfaí é sin a dhéanamh, inter alia, trí mheasúnú a dhéanamh ar a indéanta atá sé córas soláthair agus deimhnithe ceannaigh intrádála breoslaí eitlíochta inbhuanaithe a chur ar bun, a mbeadh eilimintí de scéim leabhair agus éilimh ag gabháil leis, agus cothrom na Féinne agus ardleibhéal sláine comhshaoil á ráthú ag an am céanna, lena n-áirithítear comhsheasmhacht le dlí eile an Aontais, lena n-áirítear Treoracha 2003/87/CE agus 2009/28/CE, chomh maith le riosca calaoise, neamhrialtachtaí nó éilimh dhúbailte a íoslaghdú. Ina anailís, ba cheart don Choimisiún na treochtaí agus na tionscnaimh dhomhanda ábhartha uile a chur san áireamh, chomh maith leis an tionchar a d’fhéadfadh a bheith ag córas den sórt sin ar fheidhmiú an mhargaidh, lena n-áirítear maidir le haon luaineacht sa mhargadh, éabhlóid praghsanna nó iompraíocht trádála rannpháirtithe sa mhargadh.

(49)

Ba cheart forálacha a bheith sa Rialachán seo maidir le tuarascálacha tréimhsiúla a chur chuig Parlaimint na hEorpa agus chuig an gComhairle maidir le forbairt na margaí eitlíochta agus breoslaí, maidir le cur chun feidhme an Rialacháin seo agus a thionchar ar mhargadh aeriompair an Aontais, maidir leis an nascacht go hoileáin agus go críocha iargúlta agus maidir le hiomaíochas aeriompróirí an Aontais agus na mol aerfoirt le hais a n-iomaitheoirí i dtíortha comharsanachta, maidir le héifeachtacht na bpríomhghnéithe atá sa Rialachán seo amhail sciartha íosta breoslaí eitlíochta inbhuanaithe, agus leibhéal na bhfíneálacha nó na bhforbairtí beartais maidir le glacadh breoslaí eitlíochta inbhuanaithe ar an leibhéal idirnáisiúnta. Is den ríthábhacht na heilimintí sin chun staid imeartha shoiléir a sholáthar maidir le margadh na mbreoslaí eitlíochta inbhuanaithe agus ba cheart iad a chur san áireamh agus leasú ar an Rialachán seo á bhreith. Ba cheart tagairt a dhéanamh sna tuarascálacha ón gCoimisiún freisin d’idirghníomhú an Rialacháin seo le gníomhartha reachtacha ábhartha eile, ina sainaithnítear forálacha a d’fhéadfaí a nuashonrú agus a shimpliú, chomh maith le gníomhaíochtaí agus bearta a glacadh nó a d’fhéadfaí a dhéanamh chun an brú costais iomlán ar earnáil an aeriompair a laghdú. Sna tuarascálacha sin, ba cheart don Choimisiún breithniú a dhéanamh ar roghanna maidir le leasuithe, i gcás inarb iomchuí, lena n-áirítear sásraí chun tacú le táirgeadh agus cur ar bord breoslaí eitlíochta inbhuanaithe chomh maith le sásraí lena bhféadfaí na difríochtaí praghais a dhúnadh idir breoslaí eitlíochta inbhuanaithe agus breoslaí traidisiúnta eitlíochta chun teorainn a chur le tionchar díobhálach an Rialacháin seo ar an aernascacht agus ar an iomaíocht, agus chun sceitheadh carbóin a mhaolú.

(50)

Maidir leis an gceanglas a leagtar síos sa Rialachán seo chun a áirithiú go gcuirfear sciartha íosta de bhreoslaí eitlíochta inbhuanaithe ar fáil ag gach aerfort de chuid an Aontais, d’fhéadfadh sé go spreagfadh a leithéid oibreoirí aerárthaí, a oibríonn nasceitiltí a imíonn as aerfoirt de chuid an Aontais agus a bhfuil ceann scríbe deiridh acu lasmuigh den Aontas, chun idirthuras a dhéanamh trí mhoil aerfort nach de chuid an Aontais iad – agus nach bhfuil faoi réir an cheanglais sin – seachas trí mhoil aerfort de chuid an Aontais féin. D’fhéadfadh saobhadh iomaíochta a bheith ina thoradh ar an méid sin, mar aon le riosca sceite carbóin, agus gurb iad aerfoirt de chuid an Aontais agus oibreoirí a úsáideann na haerfoirt sin a bheadh thíos leis. In éagmais scéime éigeantaí maidir le húsáid breoslaí eitlíochta inbhuanaithe d’eitiltí idirnáisiúnta ar leibhéal ICAO nó i gcomhaontuithe cuimsitheacha iltaobhacha nó déthaobhacha aeriompair idir an tAontas agus/nó a Bhallstáit agus tríú tíortha a bhfuil leibhéal uaillmhéine den chineál céanna acu i gcomparáid leis na ceanglais a leagtar amach sa Rialachán seo agus cuspóirí Chomhaontú Pháras (10), arna ghlacadh faoi Chreat-Choinbhinsiún na Náisiún Aontaithe ar an Athrú Aeráide, nó na sásraí a fhorbraítear ar an leibhéal idirnáisiúnta chun riosca sceite carbóin agus saobhadh na hiomaíochta a chosc, ba cheart don Choimisiún breithniú a dhéanamh go háirithe ar fhorbairt sásraí spriocdhírithe lena ndírítear ar na héifeachtaí sin a chosc.

(51)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún i ndáil leis na díolúintí ón oibleagáid maidir le réamhimeacht athbhreoslaithe a d’fhéadfaí a dheonú d’oibreoirí aerárthaí agus chun na forálacha mionsonraithe agus na caighdeáin theicniúla d’fheidhmiú an chórais lipéadaithe a bhunú. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (11).

(52)

Beidh éifeacht thánaisteach freisin ag an aistriú chuig breoslaí eitlíochta inbhuanaithe, is é sin spleáchas ar allmhairí breosla iontaise ó thríú tíortha a laghdú, rud a mhéadóidh slándáil fuinnimh an Aontais. Leis an staid pholaitiúil idirnáisiúnta atá ann faoi láthair, cuirtear béim ar an ngá atá leis an mbeart sin.

(53)

Ós rud é nach féidir leis na Ballstáit cuspóir an Rialacháin seo, eadhon cothrom na Féinne a choinneáil ar bun i margadh aeriompair an Aontais agus úsáid breoslaí eitlíochta inbhuanaithe á méadú san am céanna, a ghnóthú go leordhóthanach agus, de bharr chineál trasteorann na heitlíochta, ach fearr is féidir iad a ghnóthú ar leibhéal an Aontais toisc shaintréithe an mhargaidh agus iarmhairtí an bhirt, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú,

(1)

ciallaíonn ‘aerfort de chuid an Aontais’‘aerfort’ mar a shainmhínítear in Airteagal 2, pointe (1), de Threoir 2009/12/CE ó Pharlaimint na hEorpa agus ón gComhairle (12) i gcás inar mhó an trácht paisinéirí ná 800 000 paisinéir nó i gcás inar mhó an trácht lasta ná 100 000 tona sa tréimhse tuairiscithe roimhe sin, agus nach bhfuil suite i réigiún forimeallach, mar a liostaítear in Airteagal 349 CFAE;

(2)

ciallaíonn ‘comhlacht bainistíochta aerfoirt de chuid an Aontais’, i ndáil le haerfort de chuid an Aontais, ‘comhlacht bainistíochta an aerfoirt’ mar a shainmhínítear in Airteagal 2, pointe (2), de Threoir 2009/12/CE nó, i gcás ina bhfuil bainistiú na mbonneagar láraithe le haghaidh córais dáileacháin breosla forchoimeádta do chomhlacht eile ag an mBallstát lena mbaineann de bhun Airteagal 8(1) de Threoir 96/67/CE ón gComhairle (13), an comhlacht eile sin;

(3)

ciallaíonn ‘oibreoir aerárthaí’ duine a d’oibrigh ar a laghad 500 eitilt aeriompair tráchtála paisinéirí, nó 52 eitilt aeriompair uile-lasta tráchtála a imíonn ó aerfoirt de chuid an Aontais sa tréimhse tuairiscithe roimhe sin nó, i gcás nach féidir an duine sin a shainaithint, úinéir an aerárthaigh;

(4)

ciallaíonn ‘eitilt aeriompair tráchtála’ eitilt arna hoibriú chun críocha paisinéirí, lasta nó post a iompar le haghaidh luach saothair nó ar cíos, lena n-áirítear eitilt eitlíochta gnó a oibrítear chun críoch tráchtála;

(5)

ciallaíonn ‘bealach’ turas a dhéantar ar eitilt, ag féachaint d’áit imeachta agus do cheann scríbe na heitilte sin;

(6)

ciallaíonn ‘breosla eitlíochta’ breosla intiteáin arna mhonarú lena úsáid go díreach ag aerárthaí;

(7)

ciallaíonn ‘breoslaí eitlíochta inbhuanaithe’ breoslaí eitlíochta arb é atá iontu:

(8)

ciallaíonn ‘bithbhreoslaí eitlíochta’ breoslaí eitlíochta arb é atá iontu:

(9)

ciallaíonn ‘breoslaí eitlíochta carbóin athchúrsáilte’ breoslaí eitlíochta ar ‘breoslaí carbóin athchúrsáilte’ iad mar a shainmhínítear in Airteagal 2, an dara mír, pointe (35), de Threoir (AE) 2018/2001, a chomhlíonann an tairseach maidir le laghdú ar astaíochtaí saolré dá dtagraítear in Airteagal 29a(2) den Treoir sin agus a dheimhnítear i gcomhréir le hAirteagal 30 den Treoir sin;

(10)

ciallaíonn ‘baisc’ cainníocht de bhreoslaí eitlíochta inbhuanaithe is féidir a shainaithint le huimhir agus is féidir a rianú;

(11)

ciallaíonn ‘astaíochtaí saolré’ astaíochtaí de bhreoslaí eitlíochta inbhuanaithe léirithe mar choibhéis dé-ocsaíde carbóin lena gcuirtear na nithe seo a leanas san áireamh – astaíochtaí de tháirgeadh fuinnimh léirithe mar choibhéis dé-ocsaíde carbóin, iompar, riar fuinnimh agus úsáid ar bord, lena n-áirítear le linn dócháin, arna ríomh i gcomhréir leis na modheolaíochtaí arna nglacadh de bhun Airteagal 28(5) nó in Airteagal 31(5) de Threoir (AE) 2018/2001 nó de bhun dhlí ábhartha an Aontais;

(12)

ciallaíonn ‘breoslaí eitlíochta sintéiseacha’ breoslaí eitlíochta ar ‘breoslaí in-athnuaite de thionscnamh neamhbhitheolaíoch’ iad, mar a shainmhínítear in Airteagal 2, an dara mír, pointe (36), de Threoir (AE) 2018/2001, a chomhlíonann an tairseach coigiltis astaíochtaí saolré dá dtagraítear in Airteagal 29a(1) den Treoir sin agus a dheimhnítear i gcomhréir le hAirteagal 30 den Treoir sin;

(13)

ciallaíonn ‘breoslaí eitlíochta sintéiseacha ísealcharbóin’ breoslaí eitlíochta ar de thionscnamh neamhbhitheolaíoch iad, a ndíorthaítear a gcion fuinnimh ó hidrigin ísealcharbóin neamhiontaise, a chomhlíonann tairseach 70 % maidir le laghdú ar astaíochtaí saolré agus na modheolaíochtaí chun laghdú astaíochtaí saolré den sórt sin a mheasúnú de bhun dhlí ábhartha an Aontais;

(14)

ciallaíonn ‘gnáthbhreoslaí eitlíochta’ breoslaí eitlíochta a tháirgtear as foinsí breoslaí hidreacarbóin ar foinsí fuinnimh neamh-in-athnuaite iad;

(15)

ciallaíonn ‘hidrigin ísealcharbóin le haghaidh eitlíochta’ hidrigin atá le húsáid in aerárthaí a ndíorthaítear a luach fuinnimh ó fhoinsí neamh-iontaise neamh-in-athnuaite, a chomhlíonann tairseach 70 % maidir le laghdú ar astaíochtaí saolré agus na modheolaíochtaí chun laghdú astaíochtaí saolré den sórt sin a mheasúnú de bhun dhlí ábhartha an Aontais;

(16)

ciallaíonn ‘hidrigin in-athnuaite le haghaidh eitlíochta’ hidrigin lena húsáid in aerárthaí a cháilíonn mar ‘breosla in-athnuaite de thionscnamh neamhbhitheolaíoch’, mar a shainmhínítear in Airteagal 2, an dara mír, pointe (36), de Threoir (AE) 2018/2001, agus a chomhlíonann an tairseach coigiltis astaíochtaí saolré dá dtagraítear in Airteagal 29a(1), den Treoir sin agus atá deimhnithe i gcomhréir le hAirteagal 30 den Treoir sin;

(17)

ciallaíonn ‘hidrigin le haghaidh eitlíochta’ hidrigin in-athnuaite le haghaidh eitlíochta nó hidrigin ísealcharbóin le haghaidh eitlíochta;

(18)

ciallaíonn ‘breoslaí eitlíochta ísealcharbóin’ breoslaí eitlíochta sintéiseacha ísealcharbóin nó hidrigin ísealcharbóin le haghaidh eitlíochta;

(19)

ciallaíonn ‘soláthróir breosla eitlíochta’‘soláthróir breosla’ mar a shainmhínítear in Airteagal 2, an dara mír, pointe 38, de Threoir (AE) 2018/2001, a sholáthraíonn breosla eitlíochta nó hidrigin le haghaidh eitlíochta ag aerfort de chuid an Aontais;

(20)

ciallaíonn ‘láimhsealaí breosla’ soláthróir seirbhísí láimhseála ar an talamh a eagraíonn agus a dhéanann oibríochtaí breoslaithe agus díbhreoslaithe, lena n-áirítear stóráil breosla agus rialú cháilíocht agus chainníocht na seachadtaí breosla, chuig oibreoirí aerárthaí in aerfoirt de chuid an Aontais, dá dtagraítear san Iarscríbhinn a ghabhann le Treoir 96/67/CE;

(21)

ciallaíonn ‘príomháit ghnó’ ceannoifig nó oifig chláraithe soláthróra breosla eitlíochta sa Bhallstát ina ndéantar príomhrialú airgeadais agus oibríochtúil an tsoláthróra breosla eitlíochta;

(22)

ciallaíonn ‘bliain tuairiscithe’ tréimhse aon bhliana, inar gá na tuarascálacha dá dtagraítear in Airteagail 8 agus 10 a chur isteach, bliain dar tosach an 1 Eanáir agus dar críoch an 31 Nollaig;

(23)

ciallaíonn ‘tréimhse tuairiscithe’ tréimhse ón 1 Eanáir go dtí an 31 Nollaig de chuid na bliana roimh an mbliain tuairiscithe;

(24)

ciallaíonn ‘breosla eitlíochta bliantúil atá de dhíth’ an méid breosla eitlíochta ar a dtugtar ‘breosla turais’ agus ‘breosla innealta’ in Iarscríbhinn IV a ghabhann le Rialachán (AE) Uimh. 965/2012 ón gCoimisiún (14) is gá chun na heitiltí uile a oibríonn oibreoir aerárthaí a chumhdaítear leis an Rialachán seo a oibriú, a imíonn as aerfort áirithe de chuid an Aontais, le linn tréimhse tuairiscithe;

(25)

ciallaíonn ‘cainníocht bhreosla bhliantúil nár tugadh ar bord’ an difríocht idir an breosla eitlíochta bliantúil atá de dhíth agus an breosla arna chur ar bord ag oibreoir aerárthaí roimh eitiltí a chumhdaítear faoin Rialachán seo a imíonn as aerfort áirithe de chuid an Aontais, le linn tréimhse tuairiscithe;

(26)

ciallaíonn ‘cainníocht iomlán bhreosla bhliantúil nár tugadh ar bord’ méid na gcainníochtaí bliantúla nár forlíonadh na humair leo ag oibreoir aerárthaí ag gach aerfort de chuid an Aontais le linn tréimhse tuairiscithe;

(27)

ciallaíonn ‘scéim gáis ceaptha teasa’ scéim lena mbronntar sochair ar oibreoirí aerárthaí chun breoslaí eitlíochta inbhuanaithe a úsáid.

(a)

méid an bhreosla eitlíochta arna sholáthar ag gach aerfort de chuid an Aontais, arna shloinneadh i dtonaí;

(b)

méid an bhreosla eitlíochta inbhuanaithe arna sholáthar ag gach aerfort de chuid an Aontais, agus maidir le gach cineál breosla eitlíochta inbhuanaithe, mar a shonraítear i bpointe (c), arna shloinneadh i dtonaí;

(c)

an próiseas tiontúcháin, saintréithe agus bunús an bhunábhair a úsáidtear le haghaidh táirgthe agus astaíochtaí saolré gach cineáil breosla eitlíochta inbhuanaithe arna sholáthar ag aerfoirt de chuid an Aontais;

(d)

an cion cumhránaice agus naftailéiní de réir céatadán de thoirt agus cion sulfair de réir céatadáin de mhais i mbreosla eitlíochta arna sholáthar in aghaidh na baisce, in aghaidh aerfort de chuid an Aontais agus ar leibhéal an Aontais, lena léirítear toirt agus mais iomlán gach baisce agus gach modha tástála a cuireadh i bhfeidhm chun cion gach substainte ar leibhéal na baisce a thomhas;

(e)

an luach fuinnimh le haghaidh breosla eitlíochta agus breosla eitlíochta inbhuanaithe arna soláthar ag gach aerfort de chuid an Aontais, i gcás gach cineáil breosla.