(1)

Le Rialachán (CE) Uimh. 901/2007 ón gCoimisiún (2), arna leasú le Rialachán Cur Chun Feidhme (AE) Uimh. 441/2013 ón gCoimisiún (3), maidir le táirge arb é atá ann duilleoga agus barra planda gearrtha (i bpíosaí 2 go 5 mm ar fad), coipthe agus triomaithe an phlanda rooibos (Aspalathus linearis), ar a dtugtar ‘Red Bush’ freisin, a úsáidtear chun insiltí a ullmhú, rinneadh an táirge a aicmiú faoi chód 1212 99 95 den Ainmníocht Chomhcheangailte (AC) atá i gceangal le Rialachán (CEE) Uimh. 2658/87 ón gComhairle (4), mar ‘tháirge glasra eile de chineál a úsáidtear go príomha mar bhia don duine, nach sonraítear ná nach n-áirítear in áit eile’. Rinneadh an táirge a eisiamh ó aicmiú faoin gceannteideal 1211 ós rud é nach n-úsáidtear go príomha é chun na gcríoch a luaitear i dtéacs an cheannteidil sin (‘...de chineál a úsáidtear go príomha i gcumhradóireacht, i gcógaisíocht nó le haghaidh feithidicídí, fuingicídí nó chun críoch comhchosúil’). Dá bhrí sin, de bhua riail ghinearálta 1 maidir le léirmhíniú AC, rinneadh an táirge a aicmiú faoi cheannteideal 1212.

(2)

Le linn an 71u seisiún dá chuid i mí an Mhárta 2023, d’fhormheas Coiste um an gCóras Comhchuibhithe (Coiste CC) na hEagraíochta Domhanda Custaim tuairim 1211.90/1 maidir le haicmiú, lena n-aicmítear ‘tae rooibos’, a dhéantar as duilleoga triomaithe an toir rooibos (Aspalathus linearis) agus a úsáidtear chun insiltí luibhe a dhéanamh. Rinneadh an táirge sin a aicmiú faoi cheannteideal CC 1211 toisc gur measadh gur de chineál é an planda rooibos a úsáidtear go príomha i gcógaisíocht nó chun críoch comhchosúil a aicmítear fós faoin gceannteideal seo freisin nuair a chuirtear i saicíní iad, mar shampla, chun insiltí luibhe nó ‘tae’ luibhe a dhéanamh. Dá bhrí sin, aicmíodh ‘tae rooibos’ faoi fho-cheannteideal CC 1211 90, a chomhfhreagraíonn do chód AC 1211 90 86, trí rialacha ginearálta 1 agus 6 a chur i bhfeidhm maidir le léirmhíniú CC.

(3)

I bhfianaise shaintréithe ‘tae rooibos’, atá comhionann nó thar a bheith cosúil leis an táirge ar a dtugtar tuairisc i Rialachán (CE) Uimh. 901/2007, níl aicmiú taraife an táirge, mar a leagtar amach é san Iarscríbhinn a ghabhann leis an Rialachán sin, i gcomhréir le tuairim 1211.90/1 Choiste CC maidir le haicmiú.

(4)

De bhua Chinneadh 87/369/CEE ón gComhairle (5), is páirtí conarthach é an tAontas sa Choinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí. Is ionstraimí treorach le haghaidh bhearta taraife an Aontais iad tuairimí maidir le haicmiú arna bhformheas ag Coiste CC na hEagraíochta Domhanda Custaim.

(5)

D’fhonn aonfhoirmeacht a áirithiú maidir le léirmhíniú agus cur i bhfeidhm an Chórais Chomhchuibhithe ar an leibhéal idirnáisiúnta agus ós rud é go bhfuil tuairim 1211.90/1 maidir le haicmiú i gcomhréir le foclaíocht cheannteideal CC 1211 agus fho-cheannteideal CC 1211 90, is gá Rialachán Cur Chun Feidhme (AE) Uimh. 901/2014 a aisghairm.

(6)

Tá na bearta dá bhforáiltear sa Rialachán seo i gcomhréir le tuairim an Choiste um an gCód Custaim,