(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear i liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

I liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470 áirítear púdair síolta chia atá díshaillte go páirteach (Salvia hispanica) mar bhianna núíosacha údaraithe.

(4)

Le Rialachán Cur Chun Feidhme (AE) 2020/500 ón gCoimisiún (3) údaraíodh púdair chia atá díshaillte go páirteach (Salvia hispanica) a chur ar an margadh mar bhianna núíosacha lena n-úsáid i roinnt bianna atá beartaithe don phobal i gcoitinne.

(5)

An 26 Iúil 2021, chuir an chuideachta Functional Products Trading Arica S.A./BENEXIA (‘an t-iarratasóir’) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 ar athrú ar choinníollacha úsáide púdair síolta chia atá díshaillte go páirteach (Salvia hispanica). Go háirithe, d’iarr an t-iarratasóir úsáid púdair síolta chia atá díshaillte go páirteach (Salvia hispanica) ina bhfuil cion ard snáithín a leathnú chun líon áirithe bianna atá beartaithe don phobal i gcoitinne a chumhdach, is iad sin: cácaí agus taosráin, torthaí agus glasraí próiseáilte (lena n-áirítear miasa glasraí-bhunaithe), arán agus rollaí, táirgí pasta-bhunaithe agus táirgí próitéine.

(6)

An 26 Iúil 2021, chuir an t-iarratasóir iarraidh faoi bhráid an Choimisiúin freisin ar chosaint sonraí dílseánaigh le haghaidh staidéar (4) ar ghéarthocsaineacht, staidéar ar an duine (5), staidéar measúnaithe ar an bpróiseas (6) maidir le foirmiú éilleán agus na deimhnithe anailíse (7).

(7)

I gcomhréir le hAirteagal 10(3) de Rialachán (AE) 2015/2283, chuaigh an Coimisiún i gcomhairle leis an Údarás Eorpach um Shábháilteacht Bia (‘an tÚdarás’) an 23 Márta 2022, agus d’iarr air tuairim eolaíoch a thabhairt ar an athrú ar choinníollacha úsáide a bhaineann le púdair síolta chia atá díshaillte go páirteach ina bhfuil cion ard snáithín mar bhia núíosach.

(8)

An 27 Feabhra 2023, ghlac an tÚdarás a thuairim eolaíoch maidir le ‘Sábháilteacht i ndáil le leathnú úsáide púdair síolta chia atá díshaillte go páirteach (Salvia hispanica L.) ina bhfuil cion ard snáithín mar bhia núíosach de bhun Rialachán (AE) 2015/2283’ (8) i gcomhréir le hAirteagal 11 de Rialachán (AE) 2015/2283.

(9)

Sa tuairim eolaíoch uaidh, tháinig an tÚdarás ar an gconclúid go bhfuil an t-athrú atá beartaithe sábháilte faoi na coinníollacha úsáide atá beartaithe, agus dá bhrí sin is iomchuí leasú a dhéanamh ar choinníollacha úsáide púdair síolta chia atá díshaillte go páirteach (Salvia hispanica) ina bhfuil cion ard snáithín.

(10)

Sa tuairim eolaíoch uaidh, thug an tÚdarás dá aire tuairisciú mícheart na sonraíochta le haghaidh Listeria monocytogenes (‘Neamhláithreacht/g’) agus Escherichia coli (‘< 10 MPN/g’) sa bhia núíosach mar a údaraítear i Rialachán Cur Chun Feidhme (AE) 2020/500. Dá bhrí sin, ba cheart sonraíocht na mbianna núíosacha a leasú dá réir trí uasleibhéil chearta Listeria monocytogenes a shonrú mar ‘Níor aimsíodh in 25 g’ agus Escherichia coli a shonrú mar ‘Níor aimsíodh in 10 g’.

(11)

Sa tuairim eolaíoch uaidh, thug an tÚdarás dá aire freisin go raibh a chonclúid i ndáil le sábháilteacht an bhia núíosaigh bunaithe ar an staidéar ar an duine, ar an staidéar measúnaithe ar an bpróiseas maidir le foirmiú éilleán agus ar na deimhnithe anailíse arna gcur isteach ag an iarratasóir nach bhféadfadh sé measúnú a dhéanamh ar an mbia núíosach ná teacht ar a chonclúid dá n-uireasa.

(12)

D’iarr an Coimisiún ar an iarratasóir soiléiriú breise a thabhairt maidir leis an údar a cuireadh ar fáil i dtaca lena éileamh dílseánaigh ar na sonraí agus na staidéir sin, agus soiléiriú a thabhairt maidir lena éileamh ar cheart eisiach tagartha orthu i gcomhréir le hAirteagal 26(2)(b) de Rialachán (AE) 2015/2283.

(13)

Dhearbhaigh an t-iarratasóir go raibh cearta tagartha dílseánaigh agus eisiacha aige ar an staidéar ar an duine, ar an staidéar measúnaithe ar an bpróiseas maidir le foirmiú éilleán agus ar na deimhnithe anailíse tráth a chuir sé an t-iarratas isteach, agus nach féidir le tríú páirtithe rochtain dhlíthiúil a fháil ar na sonraí ná na staidéir sin, iad a úsáid ná tagairt a dhéanamh dóibh.

(14)

Rinne an Coimisiún measúnú ar an bhfaisnéis uile a chuir an t-iarratasóir ar fáil agus mheas sé go raibh bunús leordhóthanach tugtha acu gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, an staidéar ar an duine, an staidéar measúnaithe ar an bpróiseas maidir le foirmiú éilleán agus na deimhnithe anailíse, ba cheart iad a chosaint i gcomhréir le hAirteagal 27(1) de Rialachán (AE) 2015/2283. Dá réir sin, níor cheart ach an t-iarratasóir a údarú púdar síolta chia atá díshaillte go páirteach ina bhfuil cion ard snáithín lena úsáid i gcácaí agus i dtaosráin, i dtorthaí agus i nglasraí próiseáilte (lena n-áirítear miasa glasraí-bhunaithe), in arán agus i rollaí, i dtáirgí pasta-bhunaithe agus i dtáirgí próitéine, a chur ar an margadh laistigh den Aontas le linn tréimhse 5 bliana ó theacht i bhfeidhm an Rialacháin seo.

(15)

Mar sin féin, maidir leis an údarú agus an tagairt do na sonraí eolaíocha atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile ina dhiaidh sin cur isteach ar údarú chun an bia núíosach céanna a chur ar an margadh ar choinníoll gur ar fhaisnéis a fuarthas go dlíthiúil agus atá ina taca leis an údarú sin atá a n-iarratas bunaithe.

(16)

Leis an bhfaisnéis a sholáthraítear san iarratas agus sa tuairim ón Údarás, tá forais leordhóthanacha ann chun a shuíomh go bhfuil na hathruithe ar choinníollacha úsáide agus ar shonraíochtaí an bhia núíosaigh i gcomhréir le coinníollacha Airteagal 12 de Rialachán (AE) 2015/2283 agus ba cheart iad a fhormheas.

(17)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(18)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,